Martes, 30 de xuño de 2009   

Xosé Manuel Méndez entrará no Consello Nacional do BNG en calidade de  responsábel comarcal do Baixo Miño

A Asemblea Comarcal do BNG no Baixo-Miño vén de elixir a Xosé Manuel Méndez como Responsábel Comarcal. Substitúe no cargo a Alberte Alonso que  viña desempeñando de xeito continuado este cargo desde hai doce anos, e que continúa formando parte do Consello Comarcal, máximo órgano de dirección da organización nacionalista na Comarca do Baixo-Miño. O Consello Comarcal do Baixo-Miño está formado por 14 persoas ás que  se sumarán os responsábeis das cinco  localidades que conforman a comarca e que se elixirán nos próximos días.

Na súa intervención diante da Asemblea, Méndez afirmou estar convencido “que con un BNG militante e preocupado polos problemas da sociedade,  temos capacidade para achegar a moitos novos compañeiros e compañeiras a este proxecto que van ser fundamentais para paralizar a onda reaccionaria e centralista dun PP que pretende levarnos novamente ao Estado Preautonómico”.

Noutro momento da súa intervención falou da necesidade de apoiar a organización xuvenil Galiza Nova e de potenciar a área da muller dentro da organización.

Rematou a súa intervención poñendo o horizonte do BNG nas próximas eleccións municipais dicindo que o BNG nunca foi conformista e non é o momento de conformarse con manter o poder  municipal conquistado na comarca. A chegada do BNG a alcaldía de Tomiño -dixo- é un exemplo claro das políticas que precisa a comarca e estas políticas compre estendelas aos outros Concellos. 

Xoves, 25 de xuño de 2009   

Érguete comeza o programa Cambio de sentido en colaboración coas autoescolas

O pasado martes comezouse a impartir nas autoescolas do Baixo Miño o Programa de prevención do consumo de alcohol e outras drogas na conducción de vehículos “Cambio de Sentido”.

Trátase dunha actuación preventiva que pretende mellorar a información dos alumnos das autoescolas, principalmente mozas e mozos, en relación cos riscos asociados á condución de vehículos baixo os efectos do consumo de alcohol ou outras drogas, promovendo actitudes e condutas máis seguras e responsables no respecto das taxas de alcoholemia, no uso de cintos de seguridade e en evitar conducir ante o menor síntoma de sono ou cansazo.

Tamén se darán recomendacións en caso de ter pensado beber alcohol, así como actuar ante unha intoxicación alcohólica (que facer e que non facer).

            Para a realización deste programa a asociación Érguete conta co apoio das autoescolas da comarca do Baixo Miño (Tui, A Guarda, Tomiño e O Rosal) ás que agradece a súa disposición e colaboración para a realización desta actividade. As sesións serán impartidas  polo persoal da Asociación, dúas Educadoras Sociais e unha Traballadora Social, durante os meses de xuño, xullo e setembro utilizando recursos audiovisuais e unha metodoloxía participativa. A intención é chegar aproximadamente a unhas 210 persoas.

Mércores, 24 de xuño de 2009   

Informa Beti Rey

Doazón de Sangue no Rosal e en Tui

    As unidade móbiles do Centro de Transfusións de Sangue de Galicia achéganse esta semana ao Baixo Miño. Unha unidade está hoxe na Praza do Calvario no Rosal. Pódese doar sangue de 10 a 14 e de 16.30 a 21h.

    Outra unidade estará o venres e o sábado na Praza de Galicia en Tui. O venres poderase doar de 10 a 14 e de 16 a 21 e o sábado de 10 a 15h

Martes, 23 de xuño de 2009   

Informa Beti Rey

Hoxe celébrase a Noite de San Xoán

    Hoxe celébrase unha das noites máis máxicas do ano, a de San Xoán. Volveranse repetir as fogueiras ás 12 da noite, e na mesa non faltarán as sardiñas asadas.

    No barrio de Riomuíños terán, dende ás 19.30 horas, fogueira para asar sardiñas e música ambiente. Organiza a Asociación de Veciños de Riomuíños.

    No Parque das Penizas, en Paramos, teñen dende ás 20 horas, degustación de sardiñas asadas con pan de millo,  ás 12 prenderán lume á fogueira de San Xoan que organiza a Comisión de San Caetano 2009.

    En Chan do Carrasco, Randufe dende ás 23 terán sardiñada de balde e ás 12 prenderán a Fogueira de San Xoán. Esta actividade está organizada pola Comisión de Festas de San Pedro.

    En Amorín, Tomiño, dende ás 22h terán Sardiñada de balde e  fogueira de San Xoán organizada pola Comisión de Festas de San Xoán.

    Por último en Salceda sairán ás sete desta tarde a recoller herbas de San Xoán” nunha actividade organizada polo Banco de Tempo. A cita será no Centro Cultural da Picoña.

Xoves, 18 de xuño de 2009   

ANPAs do Baixo Miño cuestionan o valor da enquisa da Consellaría de Educación sobre o galego na escola

As Asociacións de Nais e Pais do Baixo Miño, dos colexios Manuel Suárez Marquier, S. Xerome Emiliani, Solleiro IES Tomiño, escolas rurais do Rosal (CRA María Zambrano) e  Manuel Rodríguez Sinde, emitiron un comunicado conxunto diante do anuncio da Consellaría de Educación e Ordenación Universitaria de realizar unha consulta nos centros educativos en relación co uso do galego.

Para estes colectivos a consulta que se realiza, deseñada á marxe da comunidade educativa, carece de rigor na metodoloxía de distribución e no procesamento de datos e sen garantías para a intimidade das persoas e a protección de datos de carácter persoal. Tampouco se tiveron en conta, din, tódolos centros educativos, pois nesta comarca o centro de Educación Especial San Xerome Emiliani (con 4 unidades concertadas coa Consellería), non figura na relación de centros nos que se aplica a enquisa, cuestión que consideran discriminatoria.

Entenden desde as ANPAs que o Plan Xeral de Normalización da Lingua Galega, aprobado por unanimidade de todas as forzas políticas con representación no Parlamento Galego en 2004 (PP, PSOE e BNG), é un punto de encontro na definición dos obxectivos para o ámbito educativo, lembrando que o Decreto 124/2007, de 28 de xuño, recolle este acordo do Parlamento Galego dándolle carácter normativo e a súa legalidade foi avalada por varias sentenzas do Tribunal Superior de Xustiza de Galicia. Esta norma pretende garantir unha competencia similar en galego e en castelán.

Para as asociacións mencionadas, o obxectivo de que ao remate do ensino obrigatorio os nenos e as nenas sexan plenamente competentes nas dúas linguas oficiais non pode conseguirse con menos do 50% das materias impartidas en galego. Coa enquisa que se envía aos centros o mantemento desta porcentaxe só se garantiría marcando a resposta “en galego” ou “todo en galego”, pois esta opción non fai referencia á totalidade do ensino, senón soamente ás materias que habería que impartir hoxe en galego –o 50%-, xa que a enquisa non recolle a opción de que todas as materias, agás as linguas, poidan ser impartidas en galego.

Diante destas consideracións, as ANPASs que asinan o escrito propoñen marcar a opción “galego” (en Infantil e FP) e “todo en galego” (en Primaria e Secundaria), porque desta maneira se estaría indicando que se queren galego as materias que hoxe se deben impartir nesta lingua, tal e como indica o decreto en vigor. Non significaría, por tanto, que se opte por todo o ensino en galego, pois esta opción non se considera.

Finalmente, as ANPAs xulgan preciso transmitir a nais e pais a necesidade de incluíren no apartado de observacións da enquisa peticións semellantes ás que se expresan a continuación: “Desexaría que o ensino fose en galego”, unha opción que non recolle esta enquisa; “Estou a favor da aplicación do decreto actual de promoción e uso do galego no ensino, realizado co consenso da comunidade educativa e que emana do Plan Xeral de Normalización da Lingua Galega, aprobado por unanimidade no Parlamento Galego”.

Para as ANPAs todo o anterior fai que os resultados desta consulta non parezan lexítimos.

Sábado, 13 de xuño de 2009   

Máis de 400 persoas pasaron polo I Festival Fin de Curso da Escola de Teatro Baixomiñota celebrado en Tomiño

A Escola Comarcal de Teatro Baixomiñota presentou o pasado domingo, no Auditorio de Goián (Tomiño), o Festival de Fin de Curso de Teatro, para presentar as obras teatrais preparadas durante o curso, ao que asistiron mais de 400 persoas.

O acto contou coa presenza do Concelleiro de Cultura de Tomiño, Jesús Castiñeira.

Neste primeiro festival representáronse un total de 4 obras seguintes:

"Pobres pantasmas”, polo grupo infantil de A Guarda

Sinopse: As pantasmas que viven no planeta Bort están cansas do mal que lle tratan os seus habitantes, que xa non se asustan delas, asi que deciden emigrar a un planeta novo que se chama “terra” e ali descobren un lugar xenial onde os seus habitantes senten auténtico medo ás fantasmas.

“O home espido e o frac”, polo grupo xuvenil de A Guarda

Sinopse: é un farsa de enredo onde a través de dúas barrendeiras aprendemos a valorar o interior e non as apariencias. Durante unha noite no seu traballo atópanse con personaxes diversos: un home espido que está agochado ata atopar roupa ca que voltar a casa, un muller que se adica a roubar na rúa, unha garda que está obsesionada con cumplir co seu deber, unha vendedora con frac que aparece no medio deste caos cómico.

“Donde el corazón se inclina el pié camina”, polo grupo adulto de Tui

Sinopse: Apolo é un simpático personaxe có soño de ser taxista e que, incitado por un bo amigo se dedica a realizar pequenas e inocentes estafas.

“Zeus”, polo grupo adulto de A Guarda

Sinopse: Dous antigos gregos, un autor teatral e un actor, están atascados nun final para unha obra que se ten que estrear agora mesmo, desesperados piden axuda a unha galería de personaxes que lonxe de axudar enredan máis aínda esta comedia trepidante.

O próximo 21 o Teatro do Baixo Miño achegará estas representaicóns ao auditorio do Rosal a partir das 17.00 horas, coa actuación de dous grupos infantís mais.

Sábado, 13 de xuño de 2009   

Suspendidas as actividades do Mercado Solidario en Redondela

            As asociacións responsables de promover o Mercado Solidario tiñeron que suspender esta iniciativa diante do roubo  de material e os destrozos provocados na carpa  a pasada durante a noite do xoves ao venres.

            Estaba previsto que a citada carpa estivera aberta ó público durante as Festas de Redondela, coas actividades de concienciación e venda de productos.

            Debido aos destrozos producidos na estructura da carpa, e  as poucas garantías de seguridade,  as seis asociacións promotoras do Mercado Solidario (Avelaiña, Vontade, San Xerome, Aceesca, Cogami e Alento), xunto coa Asociación local de axuda ao enfermo mental Lenda,  decidiron desmontar a carpa para a sua reparación.

Nestes momentos as Asociacións  promotoras estan a realizar o reconto do material roubado para  a presentación da correspondente denuncia.

            As  Asociacións afectadas lamentan profundamente este incidente, e solicitan á Policía Local de Redondela  que poña  tódolos os seus medios para esclarecer os feitos e o destino do material  roubado,  tan necesario para o mantemento das citadas entidades.

Xoves, 11 de xuño de 2009   

Informa. Beti Rey

A Deputación cartografiará os 497 núcleos de poboación do Baixo Miño xunto aos existentes en toda a provincia

    A Deputación de Pontevedra acordou iniciar a cartografía dos 6.623 núcleos de poboación que define na provincia o Instituto Nacional de Estatística.

    En cada un deles definiranse os seus límites e debuxarase o núcleo en formato vectorial poligonal para que poida ser utilizado, posteriormente, mediante Sistemas de Información Xeográfica, en proxectos referidos á ordenación do territorio, xestión de infraestruturas, medio ambiente, equipamentos, etc.

    O traballo posibilitará que a Deputación pontevedresa sexa a primeira institución que desenvolva e dispoña desta información pois, ata o de agora, as iniciativas levadas a cabo neste eido por outras entidades ou ben son incompletas, ou non dispoñen de núcleos dixitalizados, ou os núcleos veñen definidos por un único punto sen definir os seus lindes.

    No Baixo Miño existen un total de 497 núcleos. O maior número de núcleos rexístrase no concello de Tomiño con 195, seguido de Tui con 155. O Rosal posúe 54 núcleo, A Guarda 51 e Oia 40.

    O traballo incluirá información relativa á demografía, vivenda, planeamento urbanístico, estrutura territorial e rede viaria. Tamén  información cartográfica e alfanumérica sobre redes de abastecemento de augas (captacións, depósitos, instalacións de tratamento e potabilización, rede de distribución e elementos singulares da rede) e redes de saneamento e depuración (sumidoiros, emisarios, depuradoras e saneamento autónomo).

    Por outra parte, a EIEL dispón de datos sobre servizos (residuos sólidos, enerxía eléctrica, gas, iluminación e telecomunicacións) e equipamentos (centros de ensino, centros culturais e sociais, instalacións deportivas, mercados e feiras, centros sanitarios e asistenciais e edificios municipais).

    Toda a antedita información _tanto a da EIEL como a de núcleos de poboación_ será posta a disposición pública en formato estándar SHP e poderá ser descargada vía web a través do futuro nodo de infraestruturas de datos espaciais IDEPont.

Martes, 7 de xuño de 2009   

Resultados das eleccións europeas no Baixo Miño

    A comarca do Baixo Miño rexistrou, nas eleccións europeas, unha participación do 50% superior á media estatal. Por concellos a maior afluencia nas urnas rexistrouse en Tui cun 54,4% de participación, seguida do Rosal onde a participación foi do 51,79%. Mentres en Oia a participación foi do 50,43%, na Guarda foi do 49.98% e en Tomiño do 49,11%.

    Nos votos a candidaturas o PP foi o partido que maior porcentaxe de votos obtivo na comarca, o PSOE pasou a ser a segunda forza e o BNG a terceira.

    En Tui o PP logrou o 61,01% dos sufraxios, o PSdG o 25,90%, e o BNG o 8,89%. En Tomiño o PP logrou o 55,63% dos votos, o PSOE tivo o 28,92% e o BNG o 11,74%.

    No Rosal os populares lograron o 54,05% dos apoios, o PSOE o 34,56% e o BNG o 7,66%. Na Guarda o PP tivo o 53,91% dos votos, seguida do PSOE co 31,38% e do BNG co 10,21%. Por último en Oia o PP tivo o 58,59% dos votos, seguida do 31,38% do PSOE, e o 6,84% do BNG.

Sábado, 6 de xuño de 2009   

Delegado da Xunta en Pontevedra entrevistouse cos Alcaldes do Baixo Miño

    O Delegado da Xunta de Galicia en Pontevedra, Jose Manuel Cores Tourís, reuniuse o xoves á tarde cos cincos Alcaldes do Baixo Miño no marco dunha serie de xuntanzas que cos mandatarios municipais están a manter por comarcas. Estes encontros responden ao compromiso que adoptou o día da súa toma de posesión de achegarse aos 48 concellos da provincia que dependen da súa Delegación, póndose a dispor dos rexedores municipais.

    Jose Manuel Cores Tourís, explicaba na Radio Municipal de Tui que un dos principais temas aos que onte se fixo referencia foi o Vial de Alta Capacidade Tui-A Guarda, sobre todo no tramo II de Tomiño a Goián. A este respecto aludía ao compromiso electoral do Presidente da Xunta de recuperar o trazado do ano 2005. E tamén se falou da comunicación da VAC co polígono de Tui comprometéndose a levar a estudar esta demanda do Alcalde de Tui por ser unha demanda xusta.

    Outro dos temas que estivo sobre a mesa foi a Estación Depuradora de Augas Residuais de Guillarei, unha obra que supuxo un investimento moi importante, e que dicía hai que por en marcha. Apuntaba que a Xunta de Galicia van tentar avanzar nos colectores e pozos de bombeo que hai que levar a cabo.

    Por outra parte o Delegado da Xunta en Pontevedra referíase tamén á polémica pola apertura doutra delegación en Vigo, explicando que en cada cidade se manteñen os mesmos servizos que había.

Xoves, 4 de xuño de 2009   

O paro baixou en maio en todos os concellos da comarca menos na Guarda

    O paro baixou na comarca do Baixo Miño o pasado mes de maio en 84 persoas até situarse nos 4.812 desempregados. O paro baixou en todos os concellos menos na Guarda onde se incrementou en 14 persoas. O maior descenso produciuse no Rosal con 44 parados menos. Por sectores baixou en 42 persoas no sector servizos, en 28 na industria, e en 14 na construción, mentres que permaneceu estable na agricultura e no colectivo sen emprego anterior

    Analizamos os datos por concellos.  En Tui o número de parados durante o mes de maio ascendeu a 1.758 persoas, cun descenso de 20 persoas con respecto ao mes de abril. Por sectores hai 15 parados menos en Tui na industria, 8 menos no sector servizos, 5 menos na construción, mentres que 1 persoa incorporouse ás listas do paro na agricultura, e 7 son novos parados sen emprego anterior.

    En Tomiño o número de parados ascende a 1.372, 15 persoas menos que en abril. Baixou en 11 persoas na industria, 5 na agricultura e 4 no colectivo sen emprego anterior, mentres que hai 3 novos parados na construción e 2 no sector servizos.

    Durante o mes de maio o número de desempregados no Rosal ascendeu a 564 persoas, 44 menos que o mes anterior. Neste municipio baixou o paro en todos os sectores. Fíxoo en 12 persoas tanto na agricultura coma no colectivo sen emprego anterior, hai 8 parados menos na industria, e 4 menos na construción.

    En Oia o número de parados en maio foi de 268 persoas, o que significa un descenso de 19 persoas con respecto a abril. Neste concello o paro baixou en todos os sectores menos no colectivo sen emprego anterior que subiu en 2 persoas. Onde máis baixou foi no sector servizos onde diminuíu en 14 persoas, hai 5 parados menos na construción, e un parado menos na agricultura e outro menos na industria.

    Por último A Guarda foi o único concello da comarca onde subiu o paro en maio incrementándose en 14 persoas até os 850 desempregados. O maior incremento produciuse na agricultura con 17 parados máis, e na industria onde hai 7 desempregados novos, mentres que 3 persoas se incorporaron á lista de parados no colectivo sen emprego anterior. Por contra creáronse 3 postos de traballo na construción e 10 no sector servizos.

Martes, 2 de xuño de 2009  

Cursos Xuventude Actívate no Rosal e na Guarda

A Deputación de Pontevedra xunto ás Oficinas de información xuvenil dos Concellos da Guarda e O Rosal ofertan o programa formativo Actívate dirixido a mozos e mozas de 16 a 35 anos preferentemente en situación de desemprego.

Os cursos levaranse a cabo durante os meses de setembro, outubro e novembro do 2009 e desenvolveranse en cada municipio, aquel que teña máis número de solicitudes.

Para inscribirse haberá que pasar pola OMIX do Concello e recoller un modelo de solicitude no que se terá que marcar tres cursos por orden de preferencia escollidos do listado que se achega en cada instancia.

O prazo para solicitar estos cursos será ata o 20 de xullo de 2009.

Infórmate pasándo pola OMIX do teu concello

O Conselleiro Agustín Hernández di que o seu departamento recuperará o tramo polo río da VAC en Tomiño

    O Conselleiro de Medio Ambiente, Territorio e Infraestruturas, Agustín Hernández, en declaracións á Radio Municipal de Tui, explicou con respecto á tramitación do Plan Xeral de Ordenación Municipal de Tui, que están ordenando todo o traballo acumulado na Consellería, e nas próximas dúas semanas explicaba que se vai reunir co Alcalde de Tui para avaliar a situación do Plan, co obxectivo de pórlle ritmo e liberar os atrancos que había.

    Ao Conselleiro de Medio Ambiente preguntaban na Radio Muniicpal de Tui pola Estación Depuradora de Augas Residuais de Guillarei. Neste senso indicaba que existe unha actuación do Ministerio para arranxar os desperfectos, e está prevista unha xuntanza para tentar acadar un acordo para xestionar de xeito conxunto a EDAR.

    Por outra parte manifestaba Agustín Hernández que o obxectivo da súa Consellería sobre o tramo II da Vía de Alta Capacidade é dar cumprimento á promesa que fixeron na campaña electoral de recuperar o trazado polo río coas modificacións que sexan precisas para lograr as mínimas afeccións. Engadía que rexeitan cambiar o trazado que tiña en estudo informativo a anterior Consellería de Política Territorial.

    Nese senso explicaba que van preparar o documento de trazado e unha vez o teñan axustado, coas melloras que se poidan incorporar, poranse en contacto co Alcaldesa de Tomiño, para evitar que se demore moito con respecto aos outros dous.

    Con respecto ao tramo I de Tui-Tomiño, e o III de Goián a Guarda, espera que as obras poidan comezar este mesmo ano, unha vez se están acometendo as expropiacións no Rosal, para iniciar as obras en agosto se é posible.

Alumnos de la Escuela de Teatro visitaron el estudio de grabación ‘Sodinor’

El pasado sábado, día 30, los alumnos de la Escuela Comarcal de Teatro realizaron una visita a ‘Sodinor’ estudio de grabación y doblaje, que cuenta entre sus trabajos, con los doblajes de películas como La tapadera, Parque Jurásico, El fugitivo, A Lingua das Bolboretas, Harry Potter y  Ocean´s eleven entre otras.

En la actualidad ‘Sodinor’ está doblando al gallego la serie de televisión “Doutora Quinn”, que está siendo emitida por la TVG.

En el estudio los alumnos de la escuela pudieron hacer diversas pruebas de doblaje sobre la cinta de “Doutora Quinn” y otros spots publicitarios.

La escuela quiere mostrar su agradecimiento  a ‘Sodinor’  y especialmente a Paco por la atención prestada en la visita guiada a las instalaciones.

Sábado, 23 de maio de 2009  

Levantamento de actas previas á ocupación dos bens afectados polo tramo III da VAC TUI- A Guarda nos concellos de Tomiño, O Rosal e A Guarda

    Do 1 ao 19 de xuño terá lugar o levantamento de actas previas á ocupación dos bens e dereitos afectados polo tramo III da VAC Tui-A Guarda. Así o informa a Consellería de Medio Ambiente, Territorio e Infraestruturas ao través do anuncio publicado no DOG o venres 22 de maio.

    Mediante resolución do 30 de abril deste ano do Servizo Provincial de Estradas de Pontevedra fíxase a data para o levantamento de actas previas á ocupación con trámite de urxencia, logo de que o 13 de marzo fosen declaradas de utilidade pública.

    Por iso o Servizo Provincial de Estradas convoca aos titulares dos bens e dereitos afectados a quen comparezan nas datas e lugares sinaladas para proceder ao levantamento de actas. Aí procederase á recollida dos datos necesarios para determinar os bens e dereitos afectados e os prexuízos derivados da rápida ocupación, sen prexuízo de se trasladar ao lugar dos predios si se considera necesario.

    Os propietarios afectados de Tomiño están citados na Casa de Cultura de Tomiño de 9.15 a 13.45 o día 1 de xuño de Álvarez Carrera, Carme na Martínez Silva, Marta; e o día 2 de Moure Pérez, Manuel a Xunta de Galicia.

    Mentres a citación para os propietarios do Rosal farase no propio concello de 9.15 a 13.45 do 3 ao 16 de xuño, de acordo co seguinte calendario.

   Data: 3 de xuño de 2009 de: Adrover Cividanes, Manuel a Blanco Pérez, César.

    Data: 4 de xuño de 2009 de Brey Martínez, Mª José a CMVMC Tabagón.

    Data: 5 de xuño de 2009 de CMVMC S. Miguel de Tabagón a Díaz González, Manuel.

    Data: 8 de xuño de 2009 de Domínguez Álvarez, Agustina a Fernández González, Teresa.

    Data: 9 de xuño de 2009 de Fernández Martínez, Estela a González Alonso, Manuel.

    Data: 10 de xuño de 2009 de González Álvarez, Francisco a Lorenzo Alonso, Mª del Pilar.

    Data: 11 de xuño de 2009 de  Lorenzo Ferreira, Rosa a Padín Martínez, José Mª.

    Data: 12 de xuño de 2009 de Pequeño Fernández, Anselmo a Piedra Pérez, Carmen.

    Data: 15 de xuño de 2009 de Piñeiro Otero, Noemia a Ruiz Martínez, Santiago.

    Data: 16 de xuño de 2009 de Saa Gómez, Jesús a Villa Vicente, Celso.

     Aos propietarios da Guarda cítaselles do 17 ao 19 de xuño no Obradoiro de Emprego da Guarda de 9.15 a 13.45 co seguinte calendario:

    Data: 17 de xuño de 2009 de Alonso Alonso, Mª Cruz a Gil Vicente, Manuel.

    Data: 18 de xuño de 2009 de González Álvarez, Celia a Reyes González, Nieves.

    Data: 19 de xuño de 2009 de Riveiro Iglesias, Eugenio a Vicente Vicente, Dionisia.

    Por outra parte a relación de titulares con bens e dereitos afectados, e os planos parcelarios poden consultar nos concellos de Tomiño, O Rosal, e A Guarda e no Servizos Provincial de Estradas.

Xoves, 14 de maio de 2009  

FESPO, que agrupa a diferentes asociacións de comerciantes, asina a súa acta fundacional en Tui

Un total de sete asociacións de carácter multisectorial do sur da provincia de Pontevedra, firmaron o pasado martes a Acta Constitucional e os Estatutos dunha nova Federación Empresarial, FESPO (Federación de Empresarios e Comerciantes do Sur de Pontevedra), que nace cos obxectivos principais de atender as necesidades de información, formación e asesoramento das asociacións que a conforman así como de desenvolver e levar a cabo accións destinadas a implantar o desenrolo do seu ámbito xeográfico.

Ademais,  a Federación de Empresarios e Comerciantes do Sur de Pontevedra, FESPO, que no momento de constitución está formada pola Asociación do Baixo Miño de Comerciantes e Empresarios (ABACO), a Asociación de Autónomos de Comercio, Hostalaría, Industria e Centros Comerciais Abertos de Tomiño (ADETO),  a Asociación de Comerciantes e Industriais de Tui (ACITUI), a Asociación de Comerciantes e Industriais de O Porriño (ACIPOR), a Asociación de Comerciantes, Hostaleiros e Empresarios de Gondomar (ACHEGO), a Asociación de Empresarios do Val Miñor e pola Asociación de Comerciantes e Empresarios de Baiona (ACEBA), sen prexuízo de que se adiran no futuro outras asociacións que así o desexen; levará a cabo do mesmo xeito proxectos transfroteirizos con outras asociacións e federacións do norte de Portugal.    

Na reunión mantida, tamén se designaron os cargos de representación e composición da Xunta Directiva de FESPO, cargos que foron adscritos por consenso entre os asistentes, quedando composta, na presidenciapor Jorge A. Álvarez Bautista, presidente na actualidade de ACITUI; Ángel Luis Baz Vicente en representación de ABACO, ocupará o cargo de secretario da Federación; Ezequiel A. Simons González, en representación de ACEBA será o tesoureiro da Federación; Manuel Piñón Copena, presidente de ACHEGO, ocupará o cargo de vicesecretario; Fernando Martínez Fernández representando a ADETO, ocupará o cargo de vicetesoureiro e os cargos de vogais estarán representados en Juana Pérez Rodríguez, presidenta de ACIPOR, e

José Luis Froiz Espiño, en representación da Asociación de Empresarios do Val Miñor.

Os integrantes desta Federación que aglutina a máis de 1.000 empresarios dos distintos sectores de actividade económica, cren que este é o momento de facer un esforzo conxunto ante a difícil situación económica que estamos a sufrir, promovendo a Federación con ilusión e ganas de poder levar a cabo proxectos en conxunto co fin de beneficiar a todos os sectores que abarcan as súas asociacións e esperando que nun futuro próximo se sumen máis asociacións a esta Federación.

Luns, 11 de maio de 2009  

O BNG advirte de que non consentirá a paralización de proxectos fundamentais para o Baixo Miño

A deputada do BNG Carme Adán, responsábel do grupo parlamentar nacionalista nos temas relativos ao Baixo Miño, mantivo unha reunión co Consello Comarcal nacionalistaanalizando algúns dos temas máis relevantes que afectan á zona, entre os que destacaron de xeito especial algúns dos que están pendentes da aprobación do Consello da Xunta, como o parque empresarial de Tomiño.

A parlamentar nacionalista coincidiu cos membros do Consello Comarcal na necesidade de ser especialmente vixiante con proxectos relevantes como o do parque empresarial, que suporía un investimento de 15 millóns de euros, e que tan só está pendente da aprobación do Consello da Xunta para a súa posta en marcha polo que, tal e como indicaron, “non se pode paralizar un elemento de dinamización económica coma este en época de crise”.

Tamén trataron nesta xuntanza sobre proxectos pendentes que o goberno bipartito deixou xa nas últimas fases da súa tramitación para seren aprobados como a galescola e a piscina de Tomiño e a situación dos servizos sociais da comarca.

Os representantes do BNG analizaron asemade as necesidades do dique sur do porto da Garda e a mellora do vial de acceso ao parque empresarial da Garda, asi como a humanización de espazos.

Adán resaltou que o BNG “non vai permitir que o goberno free todos aqueles proxectos que o nacionalismo impulsou desde a Xunta e que agora son especialmente necesarios para os cidadáns do Baixo Miño”.

Mércores, 6 de maio de 2009  

Informa Beti Rey

O paro descendeu no Baixo Miño en 38 persoas con respecto a marzo

    A comarca do Baixo Miño rexistrou o pasado mes de abril un total de 4.896 parados, 38 menos que no mes de marzo. Deste total 2.225 corresponden ao sector servizos, 1.026 á industria, 831 á construción, 466 ao colectivo sen emprego anterior, e 348 á agricultura e gandería.

    Por concellos o paro baixou en todos os concellos da comarca menos en Tui, onde subiu en 30 persoas.

    Así Tui ten 1.778 desempregados. Tomiño ten 1.387 parados, 16 menos que en marzo. No caso da Guarda o número de persoas sen emprego ascende a 862, 26 menos que hai un mes. No Rosal o paro baixou en 20 persoas até o 608 desempregados, e por último en Oia hai 6 desempregados menos cunha cifra total de 287 parados.

Xoves, 30 de abril de 2009  

Oito desempregados formalizan os seus contratos na deputación para traballar durante seis meses nos concellos de Oia e O Rosal

Cento setenta desempregados da provincia de Pontevedra formalizaron hoxe na Deputación os seus contratos para traballar durante seis meses en concellos de menos de 10.000 habitantes. Estas persoas desenvolverán a súa actividade entre o un de maio e o 31 de outubro de 2009.”.

Dos 170 traballadores seleccionados de entre un total de 3.150 aspirantes, oito desenvolverán a súa actividade en concellos do Baixo Miño: 4 en Oia, a xornada completa (1 operario de mantemento, 1 de albanelería, 1 tractorista, 1 auxiliar administrativo), e outros 4 no Rosal, tamén a xornada completa (2 auxiliares administrativos e 2 peóns de servizos varios).

As  xornadas a tempo completo será de 37,50 horas semanais (7 horas e 30 minutos/día) e o horario de traballo será determinado polos respectivos concellos nos que realizarán o seu labor.

Con respecto á retribución económica, o salario do peón-operario será de 1.286,09 euros brutos e o dos auxiliares de 1.437,05 euros  brutos traballando a xornada completa. e o período vacacional será de 11 días.

Este plan que posibilitou a contratación de 170 traballadores complementarase con outro plan que posibilitará a contratación doutras 150 persoas, por un periodo de seis meses, será o Plan de Limpeza de Praias e Espazos Naturais que terá unha asignación económica de 1,1 millóns de euros, e que se destina a concellos entre 10.000 e 50.000 habitantes polo que poderán acollerse a el un total de 22 concellos da provincia.

Sábado, 25 de abril de 2009  

Axenda da Mostra de Teatro para hoxe, 25 de abril:

Venres, 24 de abril de 2009  

Comeza a IIIª Mostra de Teatro non profesional do Miño. A Guarda – Goián (Tomiño): 24, 25 e 26 de abril

A IIIª Mostra de Teatro non profesional do Miño vaise celebar nos concellos da Guarda e Tomiño (Auditorio de Goián), os días 24, 25 e 26 de abril, durante os cales se representarán as seis pezas que foron seleccionadas polo Xurado da Mostra de entre os máis de 30 traballos apresentados a concurso por grupos teatrais galego-portugueses.

Segundo o programa elaborado pola organización, hoxe, día 24, no IES A Sangriña, representarase “Conversas na cuneta mentras a vida pasa lá fora”, por O Trasno Novo Teatro (Vigo), e ás 22.30 horas, no Auditorio Municipal de Goián (Tomiño), porase en escena “ Dormes?”, polo grupo de teatro do  IES Manuel García Barros (A Estrada).

Mañá, sábado, día 25 ás 20.30 horas, representarase no IES da Sangriña (A Guarda) “Ponte da Lima em Festa”, pola Associação Cultural Unhas do Diabo. (Ponte da Lima), eás 22.30 horas no Auditorio Municipal de Goián (Tomiño) “A magia da inocência”, polo grupo de teatro da Associação Cultural e Recreativa de Arcozelo. (Ponte da Lima).

            O domingo, 26, de abril, ás 18.00 horas no IES da Sangriña (A Guarda), represéntase “Adeus Kantor”, pola Asociación Teatral Paso de Valverde (A Coruña), e ás 20.00 horas no  Auditorio Municipal de Goián (Tomiño) “Auto da Hibris” pola. Associaçao Juvenil de Deão (Viana do Castelo) & Lohengrin Teatro (Vigo).

            Ás 21,30 horas otorgarase o Premio do público e pecharase esta IIIª Mostra de Teatro non profesional do Miño.

Programa para hoxe, venres

Xoves, 23 de abril de 2009  

IIIª Mostra de Teatro non Profesional do Miño. A Guarda – Goián: 24, 25 e 26 de abril

A IIIª Mostra de Teatro non profesional do Miño, que reúne a grupos teatrais non profesionais e a amantes do teatro das dúas beiras do Miño, celebrarase esta fin de semana, os días 24, 25 e 26 de abril nas vilas da Guarda e Goián (Tomiño). Ao longo destes días serán representadas as 6 pezas que foron seleccionadas polo xurado da mostra de entre os máis de 30 traballos apresentados a concurso por grupos teatrais galego-portugueses.

Este evento, organizado polas direccións xerais de Creación e Difusión Cultural e de Xuventude e Solidarieade, asociación cultural Feixó-Araúxo e Espazo Xuvenil Galiza-Portugal, xurdiu co obxetivo de se converter en plataforma que permitise a grupos teatrais non profesionais de Galiza e Portugal (ou calquera outro lugar da Lusofonia) ampliar o circuíto de representacións. Esta mostra premia os mellores traballos apresentados, pero por riba de todo homenaxea o esforzo e a ilusión de millares de mulleres, homes e nenos que dedican boa parte do seu tempo e paixón ao mundo do teatro. A cantidade e calidade das obras presentadas nestes anos, así como o número de público que acode a cada sesión da Mostra, só pon de claro manifesto a boa saúde e vitalidade da que o teatro afeccionado goza a ambos lados da Raia.

Polo tanto, estes serán días de encontro para os amantes do teatro -xa sexa no palco como na platea- chegados de calquer ponto de Galiza e de Portugal. Unha vez máis a arte circulará de maneira libre axudando a derrubar vellas e ríxidas fronteiras (as máis resistentes sempre son as mentais). O teatro como grandiosa ferramenta de expresión e de diálogo é capaz de producir este riquísimo contexto de cominicación e troca socio-cultural no que galegos e portugueses podemos coñecérmonos aínda máis, conseguindo recoñecer no outro a boa parte de nós mesmos.

Ver PROGRAMA

Sábado, 18 de abril de 2009  

IIIª Mostra de Teatro non profesional do Miño. A Guarda – Goián (Tomiño): 24, 25 e 26 de abril

Nos últimos tempos, o mes de abril e o teatro afeccionado son sinónimos nestas terras baixomiñotas pois ven sendo por estas datas que se celebra a festa que reúne a grupos teatrais non profesionais e a amantes do teatro das dúas beiras do Miño.

A IIIª Mostra de Teatro non profesional do Miño xá está en marcha... e será celebrada durante os días 24, 25 e 26 de abril nas vilas da Guarda e Goián (Tomiño). Ao longo destes días serán representadas as 6 pezas que foron seleccionadas polo Xurado da Mostra de entre os máis de 30 traballos apresentados a concurso por grupos teatrais galego-portugueses.

Este evento xurdiu co obxetivo de se converter en plataforma que permitise a grupos teatrais non profesionais de Galiza e Portugal (ou calquera outro lugar da Lusofonia) ampliar o circuito de representacións, infelizmente tan reducido e limitado ao ámbito máis local. Esta mostra premia os mellores traballos apresentados, pero por riba de todo homenaxea o esforzo e a ilusión de millares de mulleres, homes e nenos que dedican boa parte do seu tempo e paixón ao mundo do teatro. A cantidade e calidade das obras presentadas nestes anos, así como o número de público que acode a cada sesión da Mostra, só pon de claro manifesto a boa saúde e vitalidade da que o teatro afeccionado goza a ambos lados da Raia.

Polo tanto, estes serán días de encontro para os amantes do teatro -xa sexa no palco como na platea- chegados de calquer ponto de Galiza e de Portugal. Unha vez máis a arte circulará de maneira libre axudando a derrubar vellas e ríxidas fronteiras (as máis resistentes sempre son as mentais). O teatro como grandiosa ferramenta de expresión e de diálogo é capaz de producir este riquísimo contexto de cominicación e troca socio-cultural no que galegos e portugueses podemos coñecérmonos aínda máis, conseguindo recoñecer no outro a boa parte de nós mesmos.

Programa da Mostra de Teatro

DIA 23 DE ABRIL (XOVES-5ª FEIRA)

                            20:30 - IES da Sangriña (A Guarda)

-Acto de Inauguración.

DIA 24 DE ABRIL (VENRES - 6ª FEIRA)

                             20:30 - IES da Sanriña (A Guarda):
-Conversas na cuneta mentras a vida pasa lá fora. O Trasno Novo Teatro (Vigo)

                              22:30 - Auditorio Municipal de Goián (Tomiño):
- Dormes?. IES Manuel García Barros (A Estrada)

DIA 25 DE ABRIL (SÁBADO)

                              20:30 - IES da Sangriña (A Guarda):

- Ponte da Lima em Festa. Associação Cultural Unhas do Diabo. (Ponte da Lima)

                              22:30 - Auditorio Municipal de Goián (Tomiño):

- A magia da inocência. Associação Cultural e Recreativa de Arcozelo. (Ponte da Lima)

DIA 26 DE ABRIL (DOMINGO)

                              18:00 - IES da Sangriña (A Guarda):

-Adeus Kantor. Asociación Teatral Paso de Valverde (A Coruña)

                              20:00 - Auditorio Municipal de Goián (Tomiño):

-Auto da Hibris. Associaçao Juvenil de Deão (Viana do Castelo) & Lohengrin Teatro (Vigo)

                              21:30:

- Premio do público e peche.

Avelaíña solicita o apoio dos concellos do Val Miñor para a urxente creación dun centro de axuda a persoas con enfermidade mental

A Asociación de Axuda a Persoas con Enfermidade Mental Avelaíña de A Guarda vén de remarcar a apremiante necesidade de crear un Centro de Rehabilitación Psicosocial e Laboral (CRPL) no Val Miñor que atenda a crecente demanda do colectivo na zona.

Das 32.624 persoas con enfermidade mental recoñecidas en Galicia con certificado de minusvalía (fonte: Subdirección Xeral de Discapacidade – Vicepresidencia da Igualdade e do Benestar 2008), máis do 38% localízase na provincia de Pontevedra. Nesta, a área sanitaria de Vigo (da que o Val Miñor forma parte) concentra a maior parte da demanda sociosanitaria.

Ante esta situación, a asociación Avelaíña (con sede en A Guarda) vén estendendo dende 2006 a súa atención ao colectivo da zona. Actualmente, a entidade atende no Val Miñor a 51 usuarios, número que vai en constante aumento dende a apertura da Unidade de Saúde Mental no Centro de Saúde da Xunqueira, dispositivo –por outra parte- longamente demandado por Avelaíña á Consellería de Sanidade durante estes anos.

Provisionalmente, a entidade está ofertando os seus servizos aos usuarios no Centro da Terceira Idade da Ramallosa en Nigrán, onde se imparten actividades de ocio e deporte, Escola de Familias, talleres ocupacionais, cursos de informática, artes plásticas, terapia individual e grupal, etc.). Mais esta situación está ao bordo das súas posibilidades tanto por carecer do local axeitado, como pola insostibilidade de manter ao seu persoal –pese á boa disposición e vontade dos profesionais- desdobrando esforzos entre o Centro da Guarda e o de Nigrán.

Neste senso, Avelaíña obtivo do SERGAS unha dotación de 15 prazas para un novo Centro de Rehabilitación nesta comarca, sempre e cando se dispuxese do local adecuado, e este estivese debidamente homologado conforme aos requisitos legais establecidos pola Consellería de Sanidade con data límite de 1 de xullo para a entrada en funcionamento do mesmo.

Ante esta urxencia, Avelaíña solicitou ao Concello de Gondomar concesión temporal da Escola Infantil de San Martiño de Borreiros, pechada dende hai anos, para poder adaptala e ofertala como Centro de Rehabilitación Psicosocial concertado co SERGAS.

A ONG esperaba que no pasado Pleno Municipal de Gondomar fose aprobada a solicitude de desafectación da devandita escola e poder contar con ela para non dar por perdido o Concerto de 15 prazas co SERGAS. Esta dotación perderase se o Centro non se pon en funcionamento antes do 1 de xullo. O Pleno do Concello, malia a boa disposición amosada e o coñecemento da urxencia do trámite, deixou este asunto en suspenso alegando que debe ser analizado en profundidade no seguinte Pleno Ordinario (a celebrarse o próximo 30 de abril) xunto coa aprobación da representación veciñal (que se reunirá mañá sábado 18 de abril). Dada a premura na tramitación do procedemento burocrático para conseguir a habilitación e apertura do Centro antes da data requerida, Avelaíña considera que, se o debate se pospón ata o 30 de abril, será completamente imposible cumprir cos prazos prospostos polo SERGAS, e perderase irremisiblemente a posibilidade de abrir un dispositivo tan necesario nunha zona de grande demanda de asistencia psicosocial como é o Val Miñor.

Avelaíña quere destacar a boa disposición amosada polos responsables políticos dos tres concellos da comarca (Gondomar, Nigrán e Baiona), así como da Mancomunidade do Val Miñor, intencións que -sen embargo- non conseguiron cristalizar en toma de decisións concreta.

Ante esta situación, Avelaíña solicita destas entidades o apoio e compromiso firme na creación urxente do Centro de Rehabilitación solicitado. Trala recente apertura da Unidade de Saúde Mental no Centro de Saúde da Xunqueira, a ONG cree que é o momento de dar un salto cuantitativo e cualitativo na atención sociosanitaria e psicosocial, incrementando a dotación deste tipo de dispositivos. Un Centro de Rehabilitación Psicosocial e Laboral é, a fin de contas, un servizo, un ben e un dereito do que o colectivo de persoas con enfermidade mental, -como membros activos da cidadanía- non poden ser privados.

Xoves, 16 de abril de 2009  

ORGANIZAN: OFICINAS MUNICIPAIS DE INFORMACIÓN XUVENIL DE TOMIÑO, SALCEDA DE CASELAS, A GUARDA, O ROSAL, PORRIÑO, BAIONA, GONDOMAR E CASA DA XUVENTUDE DE TUI.

Poderán participar mozos e mozas de entre 12 e 35 anos.

A temática responderá  ao título do Certame VIAXANDO.

As fotografías poden ser en branco e negro ou cor, presentaranse en papel fotográfico cun tamaño de 18 a 20x24 a 25 e pegadas sobre unha cartolina negra de tamaño DIN A4.

Cada participante pode presentar unha única fotografía que terá que ser orixinal e inédita.

A fotografía entregarase en sobre pechado coa indicación VIAXANDO no exterior da mesma. Cada fotografía levará no dorso o pseudónimo do autor/a e, de ser o caso, o título da dita fotografía. Acompañaranse con outro sobre pechado no que figurará novamente o pseudónimo do autor/a recollendo no interior o nome e apelidos, enderezo, teléfono e fotocopia do DNI.

As fotos poderán presentarse nas instalacións de calquera das entidades organizadoras ata o mércores 30 de setembro de 2009.

Con todas as fotografías presentadas realizarase unha exposición itinerante que percorrerá os concellos organizadores, inaugu´randose oficialmente na OMIX de Tomiño  o venres 16 de outubro de 2009 ás 20 horas.

O xurado estará integrado por membros da organización ou persoas nas que deleguen.

O fallo do xurado farase público o 9 de outubro de 2009. Difundirase  o fallo nos medios de comunicación así como por teléfono á persoa premiada.

O xurado poderá declarar deserto o premio.

Concederase un único premio consistente nunha CÁMARA DIXITAL.

A participación no Certame implica a aceptación das bases e das decisións adoptadas polo xurado.

Martes, 7 de marzo de 2009  

Encontro de Empresarios do Alto Minho e do Baixo Miño

    Once asociacións empresariais do Alto Miño e do Baixo Miño galego veñen  de subscribir, baixo a iniciativa do Consello Empresarial dos Vales do Lima e Miño (CEVAL) o Compromiso de Caminha. Trátase dun acordo de entendemento que contempla o establecemento de relacións regulares entre todas as entidades que potencie, a curto prazo, a creación dun organismo que permita promover o desenvolvemento económico desta rexión transfronteiriza.

    De acordo co documento, o obxectivo pasa por “planear, promover e a articular iniciativas/proxectos de interese común, con vista ao desenvolvemento económico e social das áreas abranguidas” polas asociacións asinantes. Estando aberta a posibilidade a novas incorporacións.  

    O presidente da Asociación de Comerciantes e Industriais de Tui, ACITUI, Jorge Álvarez, manifestou na sinatura do acordo as preocupacións actuais de todos os empresarios do Baixo Miño galego ao considerar que este “é o momento de facer un esforzo conxunto por mor da crise que atravesamos”.
    Por parte do Alto-minho, Olegário Gonçalves, Presidente do CEVAL, e Luís Ceia, Presidente da Asociación Empresarial de Viana do Castelo (AEVC), foron unánimes ao considerar que “cada vez máis é necesario estabelecer unha organización de carácter xurídico que permita crear unha dinámica innovadora e creativa coas entidades que forman parte do acordo”.

    Entre os obxectivos estará a realización de eventos gastronómicos, dinamización de zonas de comercio como Valença e Tui, e promoción de áreas de lecer como Baiona e Vila Praia de Âncora. Por parte galega hai especial  interese no incremento da promoción do Camiño de Santiago pola costa, algo que choca coa ausencia dunha ponte sobre o río Miño que una Caminha e  A Guarda. Mentres Luís Ceia, o Presidente da AEVC entende que é posíble avanzar, desde xa, “cunha ponte virtual mentres se agarda pola decisión política de construción dun ponte física”.

    O Compromiso de Caminha foi subscrito por representantes das seguintes institucións: ACITUI - Asociación de Comerciantes e Industrias de Tui, ABACO - Asociación de Comerciantes e Empresarios do Baixo Miño; ADETO - Asociación de Comerciantes de Tomiño; Asociación de Empresarios do Vale Miñor; ACHEGO,  Asociación de Comerciantes de Gondomar, ACEBA - Asociación de Empresarios e Comerciantes de Baiona, AEVC - Asociación Empresarial de Viana do Castelo; ACIAB - Asociación Comercial e Industrial dos Arcos e Barca; ACIVAC - Asociación Comercial e Industrial dos Vales do Âncora e Coura, ACICMM Asociación Comercial e Industrial dos Concellos de Monção e Melgaço, e AEPL - Asociación Empresarial de Ponte de Lima.

Venres, 3 de marzo de 2009  

O paro subiu un 2,9% o pasado mes de marzo no Baixo Miño

    O número de parados na comarca do Baixo Miño durante o pasado mes de marzo ascende a 4.934 persoas, é dicir 141 persoas máis que en febreiro o que representa un incremento do 2,9%.

    Por concellos onde máis subiu o paro en marzo foi na Guarda, onde o fixo nun 6,7%, acadando os 862 parados. No Rosal subiu un 3% até os 628 desempregados, en Tui o incremento foi dun 2,4% até os 1.748 parados. Por último en Oia subiu un 2,1% contabilizándose 293 parados e en Tomiño o crecemento foi dun 1,6% até os 1.403 parados.

Xoves, 4 de marzo de 2009  

O número de parados no Baixo Miño en febreiro foi de 4.793 persoas, 169 máis ca en xaneiro

    O número de parados na comarca do Baixo Miño o pasado mes de febreiro foi de 4.793 persoas, 169 máis que no mes anterior, e 1.286 máis que hai un ano. O paro subiu en todos os concellos, onde máis o fixo foi en Tui cun 4,3% seguido de Oia onde subiu un 4%, un 3,9% subiu na Guarda, 3,4% en Tomiño, e no Rosal o número de parados no último mes creceu un 2,2%.

    O paro creceu na comarca do Baixo Miño en todos os sectores menos na agricultura onde baixou un 1,2%, onde baixou o número de parados en todos os concellos menos en Oia onde hai catro parados máis neste sector. Onde máis se incrementou o paro no mes de febreiro foi na construción cun crecemento do 11,2% mentres que en servizos subiu un 2,9%, na industria un 1,4 e no colectivo sen emprego anterior un 2,7%.

    Por Concello Tui ten un total de 1.707 parados, 70 máis que no mes de xaneiro, pese ao descenso que experimento na agricultura e na industria, que non foi suficiente para constrarrestar a destrución de emprego na construción con 44 novos parados, e no sector servizos con 19 novos desempregados.

    Tomiño ten 1.381 parados, 45 máis que en xaneiro, dos que 23 son do sector da construción, 14 do sector servizos, 10 sen emprego anterior, e 1 da industria. Por contra hai 3 parados menos na agricultura.

    O Rosal tivo en febreiro 13 parados máis que mes anterior chegando aos 610 desempregados. A destrución de emprego neste concello estivo centrada sobre todo no sector servizos con 10 parados máis, na construción con 6 postos de traballo menos, e na industria con 2 novos desempregados, por contra hai un empregado máis na agricultura e 4 no colectivo sen emprego anterior.

    O número de parados na Guarda chegou en febreiro aos 808, o que significa que son 30 máis que en xaneiro. Deles 14 pertencen ao sector servizos, 9 á construción, 8 á industria e 2 ao colectivo sen emprego anterior. Por contra hai tres parados menos na agricultura.

    Por último en Oia o número de desempregados en febreiro foi de 287, 11 máis que en xaneiro. Este é o único concello da comarca onde en febreiro aumentou o paro na agricultura, en concreto en 4 persoas. Amais hai 5 parados novos en industria, 1 na construción e 4 no sector servizos. Mentres que se crearon 3 postos de traballo no colectivo sen emprego anterior.

Martes, 3 de marzo de 2009  

Resultados no Baixo Miño nas eleccións do 1-M

    Un total de 40.618 persoas tiñan dereito a voto o domingo na comarca do Baixo Miño, onde se rexistrou unha participación do 74,66%, tres puntos máis que hai catro anos. Por concellos a maior participación deuse en Oia cun 78,45%, seguido de Tomiño cun 75,43%, logo está Tui cun 74,79%, O Rosal cun 74,07% e por último A Guarda cun 72,67%. En todos os concellos a participación foi superior á media autonómica.

    No conxunto da comarca o PP obtivo o 52,75% dos votos, 2 puntos máis que hai catro anos, o PSdG-PSOE logrou o 25,57% dos sufraxios, 3 puntos menos que nos últimos comicios autonómicos, e o BNG subiu lixeiramente pasando dun 17,71% en 2005, ao 17.76% de votos logrados o domingo.  A cuarta forza máis votada no Baixo Miño foi Unión, Progreso e Democracia con 239 votos, e Terra Galega con 130.

    Analizamos os datos por concellos. En Tui o PP obtivo o 57,17% dos votos, subindo catro puntos con respecto a 2005 cando lograra o 53,86% dos votos.  O PSdG baixou do 24,94% logrado hai catro anos ao 22,14% dos votos obtidos onte. Por último BNG baixou case un punto o lograr o domingo o 16,55% dos sufraxios emitidos.

    En Tomiño o PP subiu apenas 93 décimas a súa porcentaxe de votos con respecto a hai catro anos logrando o 49,97% dos votos. Mentres o PSdG perdía case 5 puntos até os 23,27%. Tomiño foi o único municipio onde o BNG incrementou o número de votantes con respecto a hai catro anos, pasando dun 19,92% en 2005 a un 23,47% nos comicios do domingo.

    Na Guarda o PP incrementou o seu apoio con respecto a 2005 nun punto logrando o 48,60% dos votos emitidos. O PSdG-PSOE tiña un 29,68% dos sufraxios baixando con respecto ao 32,17 logrado hai catro anos. O BNG obtivo un 15,15, un punto menos que hai catro anos.

    No Rosal  o PP pasou de ter un 49,33% dos votos en 2005 ao 49,97% no día de onte. O PSdG logrou onte no Rosal o 30,40% dos sufraxios, dous puntos menos que hai catro anos. E por último o BNG perdía un punto con respecto ás últimas autonómicas logrando onte o 15,26% dos apoios.

    En Oia o PP subiu catro puntos até o 56,42% dos votos. O PSOE baixou case tres puntos até o 29,68% dos sufraxios e o BNG baixou un punto quedándose no 11,35% dos votos.

Sábado, 28 de febreiro de 2009  

O tramo III da VAP Tui-A Guarda comezará en breve trala súa adxudicación

    A unión temporal de empresas FCC-Atlántica será a responsable de executar o tramo tres da Vía de Altas Prestacións que unirá Tui e A Guarda. Trátase do treito comprendido entre Goián e A Guarda cunha lonxitude de 10 quilómetros e un orzamento de execución de 34 millóns de euros.

    Así vén publicado, no número d eonte, no Diario Oficial das Comunidades Europeas onde se expón que o prazo de execución será de 23 meses. A adxudicación foi realizada pola Consellería de Política Territorial o pasado día 21 entre ás 19 propostas presentadas.

    Este tramo transcorre polos concellos de Tomiño, O Rosal e A Guarda. En canto as características técnicas cómpre salientar que terá dous carrís, un en cada sentido de 3,5 metros de ancho, e dúas beiravías de 2,5 metros.  Ao longo dos dez quilómetros de percorrido construiranse 7 pasos superiores e 4 pasos inferiores, así como un viaduto sobre o río Tamuxe cun falso túnel no Rosal.  A súa execución suporá un investimento de 33.990.000€. Trala adxudicación o comezo das obras será inmediato. Este será o primeiro treito desta infraestrutura que comece a executarse.

Venres, 27 de febreiro de 2009  

Entidades dio Baixo Miño beneficiarias do plan da Deputación para a adquisición dun vehículo

O presidente da Deputación, Rafael Louzán, o representante  de Caixanova, Javier Gómez Rivera; e o directivo de Citröen, Gonzalo Macías, comunicáronlles hoxe a 31 entidades asistenciais (serán 40 en total) e deportivas da provincia sen ánimo de lucro a súa inclusión na segunda fase do plan impulsado por esta institución para adquirir un vehículo para o transporte de persoas.

Entre as entidades beneficiarias hai dúas do Baixo Miño: o concello do Rosal e o Club de Remo Robaleira da Guarda

Rafael Louzán destacou que con esta segunda fase “elevamos o orzamento da iniciativa a preto dos tres millóns de euros e conseguimos colaborar con 80 entidades de carácter social e deportivo da provincia e damos resposta a case a totalidade das peticións recibidas”.

Pola súa banda, Javier Gómez Rivera salientou que “con esta iniciativa contribuímos a solventar os problemas de mobilidade de entidades sociais e deportivas”. Sobre este respecto destacou o encomiable labor que desenvolven tanto as institucións asistenciais sen ánimo de lucro, como os directivos que están ao fronte de clubs de base “que precisan todo o noso apoio para que poidan seguir desenvolvendo este traballo”.

Pola súa banda, o representante de Citröen, Gonzalo Macías, manifestou a satisfacción da empresa pola posta en marcha deste plan e comentou que en vista do éxito que tivo a iniciativa, “a empresa estará disposta a seguir mantendo colaboracións deste tipo”.

Sábado, 21 de febreiro de 2009  

Asociacións da Guarda e O Rosal nos cursos “Ti tamén contas” da Deputación

           O presidente da Deputación de Pontevedra, Rafael Louzán, e a vicepresidenta provincial, Teresa Pedrosa, acudiron onte a mañá ao Auditorio da Cidade de Príncipe Felipe á presentación dos cursos para maiores do programa «Ti Tamén contas», programa que naceu hai catro anos coa finalidade de fomentar a participación social, concienciar ós maiores do seu papel activo na sociedade e facilitar o acceso dos maiores a cursos sobre desenvolvemento persoal e saúde, ocio e outras materias que lles afectan.

           Este ano nas comarcas do Sur da provincia participarán 21 asociacións da Guarda, Arbo, Baiona, Cañiza, Soutomaior, Porriño, O Rosal, Salceda, Mos, Nigrán e Pazos de Borbén; en cursos de musicoterapia, cantos populares, axilidade mental, tai-chi, tapizado, ximnasia de mantemento ou informática.

Luns, 16 de febreiro de 2009  

A Deputación propiciará cinco actuacións no Baixo Miño cun investimento de 418.638 euros a través do Plan Provincial de Cooperación

Os concellos da comarca do Baixo Miño disporán dun total de 418.638 euros para executar nove actuacións incluídas no Plan Provincial de Cooperación  (PPC) que xestionará a Deputación de Pontevedra en 2009. Esta liña de axudas está financiada pola institución provincial, os concellos beneficiarios e o Ministerio de Administracións Públicas (MAP). As obras que se prevén executar con cargo a este orzamento son as seguintes:

A Guarda: saneamento e pluviais en rúa Oliva. 66.858,93 euros.

Oia: pavimentación camino da Calzada. 71.398,23 euros.

Rosal: saneamento Picóns-Eiras. 69.500 euros.

Tomiño: pavimentación e alumeado  estrada de Sobrada. 106.951,17 euros.

Tui: pavimentación de camiños no lugar de Fernal e Vide.  103.929,83 euros.

O PPC posibilitará a execución de obras na provincia de Pontevedra por arredor de 6.589.030,36 millóns de euros. Esta liña de investimentos irá dirixida á promoción de calquera tipo de obra de competencia municipal nos concellos de menos de 50.000 habitantes. Os importes deste plan distribuiranse empregando como criterio obxectivo unha porcentaxe do 60% para o peso poboacional do municipio e do 40% para o criterio de superficie.

As obras incluídas nestes plans selecciónanse a partir das propostas formuladas polos concellos, que terán como data límite para presentar as solicitudes o vindeiro 12 de xaneiro de 2009. Así mesmo, serán os propios concellos os encargados de tramitar a contratación, seguimento e xustificación das obras incluídas no plan.

O Plan Provincial de Cooperación poderá financiar en todos os municipios actuacións no alumeado público, cemiterios, recollida de residuos, limpeza viaria, abastecemento de auga potable, sumidoiros e pavimentación de vías públicas.

Ademáis das actuacións anteditas, nos municipios con máis de 5.000, habitantes tamén se poderán realizar con cargo a este plan obras en  parques e bibliotecas públicas, mercados e tratamentos de residuos.

Finalmente, nas áreas de máis de 20.000 habitantes, ademais de todas as actuacións mencionadas, tamén se poderán executar actuacións para protección civil, prevención e extinción de incendios, instalacións deportivas e servizos.

Venres, 13 de febreiro de 2009  

Cruz Roja Juventud en Vigo organiza un Curso de formación para trabajar en la comarca de O Baixo Miño

Durante el próximo mes de marzo Cruz Roja Juventud desarrollará en la Asamblea Comarcal de Vigo un curso de formación de mediadores/as en prevención de conductas violentas los días 2, 3, 4, 5 y 6 de marzo en horario de 9.00 a 14.00. El plazo de inscripción, que tiene carácter gratuito,  termina el 25 de Febrero.

El objetivo de este curso es la formación de un grupo de jóvenes interesados en realizar actividad voluntaria, en IES y CEIP de la comarca de O Baixo Miño, dentro del Programa de Prevención de Conductas Violentas que Cruz Roja Juventud desarrolla desde el año 2003 en convenio con la Diputación Provincial de Pontevedra.

Los destinatarios son jóvenes entre 18 y 30 años (aunque se podría ampliar este margen) con disponibilidad horaria de mañana y que se sientan atraídos por la acción voluntaria y les interese el trabajo con adolescentes.

El curso consta de 65 horas distribuidas en 25 horas teóricas, 30 horas prácticas y 10 horas de tutorías, repartidas en ocho bloques temáticos que incluyen sesiones de:

Formación Básica Institucional

El papel del mediador y planificación de talleres

Derechos humanos

Violencia y violencia de género

Habilidades sociales y de comunicación

Técnicas de resolución de conflictos.

Autoestima

Bullying

Una vez finalizado el curso teórico comienza la fase de prácticas que se realizará en el programa de Prevención de Conductas Violentas. Este voluntariado consistirá en la realización de talleres socio educativos con alumnos de enseñanza secundaria de la provincia de Pontevedra, a través de los cuáles se trabajará de forma participativa y dinámica los siguientes contenidos:

Derechos Humanos

Resolución de Conflictos

Violencia y Violencia de Género

Autoestima

Bullying

Las sesiones con los alumn@s se complementarán con sesiones informativas a docentes y familiares que son dirigidas por un psicólogo.

Esta acción formativa se enmarca dentro del proyecto “Sen Violencia Convivencia” que Cruz Roja Juventud desarrolla en convenio con la Diputación Provincial de Pontevedra.

Para más información los interesados podrán dirigirse a la Asamblea Comarcal Cruz Roja Baixo Miño C/Agustín Nandín Lomba, n1 Bajo, o llamando al tlf: 986 614609 / 606 34 84 71.

Mércores, 4 de febreiro de 2009  

O paro subiu un 3,8% en xaneiro no Baixo Miño, sendo a construción onde máis emprego se perdeu

    A comarca do Baixo Miño ten 4.624 parados segundo os datos feitos públicos onte pola Consellería de Traballo referidos ao mes de xaneiro. Esta cifra supón un incremento de 168 persoas con respecto ao mes de decembro, ou o que é o mesmo un 3,8%. Esta cifra está por baixo tanto da media galega coma da nacional, e inferior ao incremento rexistrado en decembro que fóra dun 7,5%. No que se refire ao paro interanual, de xaneiro de 2008 a xaneiro de 2009, o incremento é dun 32,6% é dicir 1.136 persoas.

    Por sectores o paro incrementouse en xaneiro en todos os sectores, salvo no colectivo sen emprego anterior onde baixou un 0,3%. A maior subida rexistrouse na construción cun 10,3%, seguida do sector servizos e da industria cun 3,7 e un 3,3%.  No que se refire ao paro interanual o sector onde máis se incrementou o desemprego foi na construción cun 73,9% seguida da industria cun 43,9%, logo estaría o sector servizos cun 26,4% e agricultura e gandería cun 20,1. Onde menos creceu o número de parados no último ano foi no colectivo sen emprego anterior onde o fixo nun 14,9%.

    Por Concellos Tui ten o maior número de desempregados, un total de 1.637,  e aquí foi onde máis subiu o paro con respecto a decembro, fíxoo nun 6,2%, e isto pese ao descenso dun 1,2% na industria, por contra subiu nun 17,9% na construción, e nun 7,4% no sector servizos.

    En Tomiño o número de parados o pasado mes de xaneiro acadou os 1.336 persoas cun incremento do 4,7%. No sector que máis subía o número de desempregados foi na agricultura e gandería cun 9,1%, un 6,2% subía na industria, un 5,4% en servizos e un 4,7% na construción, mentres que baixaba un 1,6% no colectivo sen emprego anterior.

    Na Guarda foi onde menos subiu o paro en xaneiro, un 0,3% até os 778 parados. Este leve incremento explícase pola baixada de desempregados no en Agricultura e Gandería nun 6,3% e no colectivo sen emprego anterior nun 6,4%. Pero contra subía un 11% na industria, un 9% na construción e un 0,3% no sector servizos.

    No Rosal o número de parados en xaneiro situouse nas 597 persoas cun incremento do 1,4% con respecto a decembro. Neste concello o paro é onde máis sube, un 6,8%, no colectivo sen emprego anterior, seguido dun 4,1% na industria, un 3,5% na construción e un 1,8% na agricultura e gandería, mentres que baixaba un 1.8% no sector servizos.

    Por último Oia rexistra un total de 276 parados, un 1,1% máis que en decembro. O incremento produciuse pese ao descenso dun 9,1% na agricultura e gandería, un 0,7% no sector servizos, e un 9,3 no colectivo sen emprego anterior. Estas baixadas sen embargo non puideron contrarrestar o incremento dun 16,7% na construción e dun 7,4% na industria.

    No que se refire aos datos do paro interanual por Concello onde máis subiu foi en Tomiño nun 39,6%, seguido de Oia nun 38,7% pese ao descenso neste concello dun 28,6% na agricultura e gandería no último ano. Na Guarda o incremento interanual acada o 34,5%, destacando un descenso do 0,2% no colectivo sen emprego anterior, e no Rosal o número de parados subiu un  28,4% no último ano. Por último en Tui foi onde menos subiu o paro no último ano e aínda así fíxoo nun 27,1%.

Luns, 2 de febreiro de 2009

Davila presenta unha proposición no Congreso para que se equipare aos pescadores do Miño ao Réxime Especial do Mar

    A deputada do BNG no Congreso, Olaia Fernández Davila, rexistrou unha proposición non de lei e unha pregunta parlamentaria na Cámara Baixa na que insta ao Goberno a incorporar aos pescadores de río Miño, dende Arbo até a Guarda, no Réxime Especial do Mar.

    Davila lembra que na actualidade estes pescadores están incluídos no Réxime de Autónomos cando a “súa actividade e as súas condicións son similares aos do mar. Teñen que contar cos mesmos requisitos que se piden para a actividade pesqueira, por exemplo no relativo ás licencias, como no que respecta á normativa á que teñen que se axustar as embarcacións”.

    Pero a pesar de todo iso, recalca, “e a pesar de que as condicións regulamentarias dos pescadores de río son semellantes ás do mar, non gozan dos mesmos beneficios do Réxime de Seguridade Social que os traballadores do mar”.

    A deputada do BNG pon de manifesto que se trata dunha vella reivindicación, e sinala que “tamén padecen as mesmas situacións de penosidade, perigosidade e problemas de saúde que os mariñeiros”.

    Por iso, pide ao Goberno que contemple esta demanda nos debates relativos á modificación do Pacto de Toledo para poder consideralos nos acordos que finalmente se adopten.

    Pregunta ao Executivo cal é o seu dispor a atender esta xusta demanda do colectivo dos pescadores de río. 

Venres, 30 de xaneiro de 2009

O Programa Fortrans porá en valor as fortalezas do Baixo Miño e norte de Portugal

A recuperación das fortalezas da Raia busca potenciar o atractivo turístico e a actividade económica a ambas beiras do Miño. Unha iniciativa que forma parte do programa Fortrans, xestionado conxuntamente pola Dirección Xeral de Patrimonio Cultural, a Cámara Intermunicipal do Vale do Minho, a Cámara Municipal de Valença e a Cámara Municipal de Monçao.

Neste proxecto, as administracións galega e portuguesa colaboran para recuperar e preservar un legado histórico e cultural, que aínda que orixinalmente tiña a función de separar a ambos países, agora serve para reforzar os seus lazos de unión.

A Consellería de Cultura e Deporte está a recuperar parte das construcións defensivas situadas no Baixo Miño. As actuacións rehabilitadoras desenvólvense en seis fortalezas: Santa Cruz (A Guarda), o forte dos Medos en Tomiño, San Lourenzo de Goián e Nosa Señora da Concepción de Goián pertencentes tamén ao municipio de Tomiño, a torre de Fornelos en Crecente, e máis a fortaleza de Salvaterra do Miño. Todas estas fortalezas foron construídas no século XVII, agás a torre de Fornelos, que é de orixe medieval.

No Castelo de Santa Cruz, na Guarda, estará localizado o Centro de Interpretación das Fortalezas que contará cunha exposición permanente e recursos didácticos que permitirán coñecer polo miúdo estas fortificacións. Será, Santa Cruz, o inicio ou remate, como se desexe, dun itinerario das fortalezas da raia que ten, á par que un valor cultural-histórico, un importante compoñente turístico.

O proxecto está financiado nun 75% con fondos europeos do Interreg III e conta con 1.350.000 € en intervencións no territorio galego.

Martes, 27 de xaneiro de 2009

O Baixo Miño estará representado en FITUR a través dos seus concellos e asociacións no stand de Turismo Rías Baixas

A Deputación de Pontevedra, a través do seu organismo autónomo Turismo Rías Baixas, inicia hoxe en Fitur a promoción turística da provincia nun stand dun espazo único de 300 metros cadrados.

Nel repartiránse 40.000 folletos de turismo familiar, enoturismo, turismo accesible, termalismo, gastronomía, ocio, museos, monumentos, golf, rías, festas, pazos, natureza, mapa provincial e de rúas de Pontevedra e Vigo, e tamén distinto ripo de información turística de 27 concellos.

Os 62 concellos da provincia son co-expositores e 29 participan activamente no stand. Dez concellos presentarán a súa oferta turística ante profesionais do sector e touroperadores e outros 18 contarán con diverso material de información turística (Sanxenxo, Vilanova, Redondela, Baiona, Cangas, A Guarda, O Grove, A Illa, Gondomar, Lalín, Marín, Cambados, Soutomaior, Moraña, Oia, Arbo, Ribadumia y Poio). Nove organismos e asociacións relacionadas co turismo terán tamén no stand diverso material promocional.

O stand da Deputación de Pontevedra acollerá asemesmo 16 presentacións de 15 empresas, asociacións e organización turísticas: a Mancomunidade do Salnés, a asociación do Cristo de los Afligidos de Vigo, a Asociación de Empresarios da Guarda (ACIGU), Turismo Sanxenxo, organización de Val Miñor, Sanxenxotour, Mancomunidad de Vigo, CETS, Hotel Rúas, Mar de Ons, Talaso Sanxenxo, Agarimo e Hosteleiros do Morrazo.

A Deputación e o seu organismo Turismo Rías Baixas concretaron máis de 3.000 contactos con profesionais do sector nun stand que conta con 6 informadores turísticos e 4 técnicos.

Sábado, 24 de xaneiro de 2009

O Centro San Xerome e o Club Kayak Tudense entre os beneciarios dun vehículo da Deputación

            O presidente da Deputación, Rafael Louzán, o responsable de Caixanova, Julio Fernández Gayoso, e o directivo de Citröen, Ricardo Muñoz, comunicáronlles onte ás 40 entidades asistenciais e deportivas da provincia sen ánimo de lucro a súa inclusión no plan impulsado por esta institución para adquirir un vehículo para o transporte de persoas.

        Entre as entidades beneficarias figura o Centro San Xerome e o Club Kayak Tudense.

Xoves, 22 de xaneiro de 2009

As bandas de música do Baixo Miño que participen no certame de bandas da Deputación competirán o 28 de marzo

A Deputación presentou as bases dos segundos certames zonais de bandas de música que, no que se refire ás bandas da zona sur de Pontevedra, terá lugar o 28 de marzo. As bandas desta zona son as da Guarda, O Rosal, Oia, Tomiño, Tui, Mondariz, As Neves, Ponteareas, Salvaterra, Arbo, A Cañiza, Covelo, Crecente, Baiona, Gondomar, Mos, Nigrán, Porriño, Redondela e Salceda de Caselas.

As bandas participantes clasificaranse por zonas en tres seccións: primeira, tres bandas de 61 músicos en adiante; segunda, cinco bandas de 46 a 60 músicos; e terceira, seis bandas de 30 a 45 músicos. Cada agrupación poderá contar con instrumentistas alleos á formación (cinco na sección terceira, cinco na segunda e seis na primeira) e deberá interpretar dúas obras de libre elección, unha delas dun compositor galego.

O xurado valorará, de 0 a 10, aspectos como afinación, sonoridade (dinámica, planos sonoros, equilibrios harmónicos, etc.), interpretación e técnica en cada unha das dúas obras.

As bandas participantes recibirán por participar 1.800 euros na sección primeira, 1.500 na segunda e 1.200 na terceira. A Deputación concederá en cada sección e por cada zona un primeiro premio de 2.000 euros na sección primeira, de 1.750 na segunda e de 1.500 na sección terceira. O prazo de inscrición será de 20 días dende a publicación das bases no BOP.

Sábado, 17 de xaneiro de 2009

As OMIX dos Concellos da Guarda, O Rosal e Tomiño informan da apertura do prazo para a Preinscrición para o Xuventudegaliza.Net

Xuventude Galiza Net volve á cunha nova edición.O evento informático máis grande de Galicia chega á súa décima edición con grandes cambios. Para comezar, Xuventude Galiza Net cambia de localización e pasa de celebrarse no Palacio de Congresos e Exposicións de Galicia ao Multiusos Fontes do Sar, permitindo que este ano case o dobre de mozos ca o ano pasado poida desfrutar de tres días ininterrompidos rodeados de cables, ordenadores e consolas.

Celebrarase a primeira edición do concurso internacional de Robótica, en colaboración coa organización Ieee, e mesmo contarase co embaixador de Lego, que traerá unha morea de construcións feitas co deseñador dixital de Lego (entre elas, por exemplo, a estrela da morte de Star Wars). O software libre tamén terá unha presenza destacada con actividades, obradoiros e relatorios que se están a concretar no momento en que se redacta esta noticia, e mesmo poderase encontrar traballo se se estás buscando, xa que vaise contar con varios representantes das principais empresas que estarán dispostos a recoller o currículo dos participantes. As inscricións formalizaranse en www.xuventudegaliza.net

As oficinas de Información xuvenil informan do programa de Primavera Activa en Turismo Rural

As OMIX dos Concellos da Guarda, O Rosal e Tomiño informan da próxima apertura de prazo para particpar na Primavera Activa en Turismo Rural.

O programa de turismo rural activo Primavera Activa oferta este ano un total de 1.100 prazas para mozos e mozas de Galiza. Trátase dun programa promovido por segundo ano consecutivo pola Dirección Xeral de Xuventude e Solidariedade e pola Dirección Xeral de Turismo. É unha iniciativa que combina as actividades de lecer e tempo libre con estanzas en casas de turismo rural de toda Galiza e que se vai desenvolver durante todas as fins de semana de marzo a maio.

Poden participar os mozos e mozas de entre 18 e 35 anos, que terán que aboar 100 euros por praza, aínda que os posuidores de Carné Xove ou Carné Máis gozarán dun 25% de desconto.

Disfrutarán dunha estanza de fin de semana nunha casa de turismo rural, combinada cunha das dezaoito opcións de actividades de lecer e tempo libre dispoñibles. Na iniciativa participan 107 aloxamentos rurais de toda Galicia. Nas actividades de lecer colaboran nove empresas de turismo activo e cincuenta monitores especializados nas diferentes accións programadas.

Cada fin de semana, un grupo de 24 persoas participarán en cada unha das modalidades de actividade. O programa, que comeza o venres recibindo en cada aloxamento rural ao grupo de mozos e mozas participantes, terán incluído o aloxamento completo, a manutención completa (cea do venres e sábado, almorzo, xantar e cea do sábado e almorzo do domingo), o transporte dende a casa rural ata o lugar das actividades durante a xornada do sábado e o programa de actividades, equipo de monitores e material para o seu desenvolvemento.

Obxectivos

- Facilitar que os mozos e mozas participantes coñezan a xeografía e o patrimonio natural, cultural e etnográfico de Galicia, promovendo o seu respecto.

- Proporcionar á xente nova a oportunidade de vivir a experiencia do turismo activo e do turismo rural de Galicia.

- Promover a educación ambiental e o ocio saudable.

Actividades

Dentro das dezaoito opcións de actividades de lecer e turismo activo que se ofertan, os mozos e mozas poderán elixir, por exemplo, entre unha ruta en canoa polo Miño e unha visita ás adegas de Terras Gauda (opción 1) ; unha ruta de sendeirismo pola Serra do Suído e visita ao Castro de Troña (opción 2) ; un paseo en piragua polo encoro de Portodemouros (opción 3); unha visita á área arqueolóxica de Tourón (opción 4); mergullo deportivo e ruta en catamarán (na opción 5) ; tiro con arco e raid de orientación e xeocaptura (opción 6) ; ximkana de orientación (na opción 8) ou paintball (na opción 9).

Outras actividades das que se poderá gozar, dentro da Primavera Activa, son rutas a cabalo, circuítos termais, rutas en canoa polo canón do Sil, raid de orientación, rutas en kaiak, actividades náuticas como surf ou bodyboard, rutas paisaxísticas en 4x4, escalada en parede natural ou saltos en parapente biplaza.

Inscricións

Os interesados neste programa poderán facer a reserva da súa praza mediante chamada telefónica, a partir do 26 de xaneiro,en horario de 9 a 14 horas, aos números sinalados en cada programa.

Todos os mozos e mozas interesados neste programa poden consultar toda a información necesaria nas webs de Xuventude, www.xuventude.net, e de Turgalicia, www.turgalicia.es, así como na páxina propia do programa, www.primaveractiva.info.

Xoves, 15 de xaneiro de 2009

O Baixo Miño ten 50.012 habitantes dos que o 7,29% son estranxeiros

    O Instituto Nacional de Estadística publicou esta semana a explotación estatística do padrón de habitantes con data de 1 de xaneiro de 2008. Nos datos referidos á comarca do Baixo Miño a poboación ascende a 50.012 habitantes, 496 máis que a 1 de xaneiro de 2007. Todos os concellos incrementaron a súa poboación con respecto ao ano anterior. Onde máis o fixo foi en Tomiño con 331 novos habitantes, e onde menos creceu o número de empadroados foi en Tui con so 24 novos habitantes.

    Os datos feitos públicos polo INE recollen tamén o número de estranxeiros que viven na comarca, son 3.824, un total de 215 máis que hai un ano. Tui sigue a estar a cabeza no número de estranxeiros empadroados un total de 1.527 que supoñen o 9% da súa poboación, logo está Tomiño con 1.023 estranxeiros o 7,9% da súa poboación. En terceiro lugar sitúase A Guarda onde o 7,26% dos seus habitantes son estranxeiros, é dicir 756 persoas, O Rosal ten o 5,6% de estranxeiros, e Oia o 4,9%. A nivel comarca os estranxeiros que residen no Baixo Miño supoñen o 7,29% da poboación.

Martes, 13 de xaneiro de 2009

Actividades de inmersión lingüística no verán 2009

As OMIX da Guarda, O Rosal e Tomiño  informan da apertura do prazo para solicitar as axudas que vén de facer públicas a Consellería de Educación que convoca 2.650 axudas para realizar actividades de inmersión lingüística no verán de 2009, desde a última semana de xuño ata o 31 de agosto. As axudas van dirixidas ao alumnado de centros de ensino sostidos con fondos públicos e que estén cursando: 6º de Primaria; 2º, 3º, 4º da Educación Secundaria Obrigatoria e 1º e 2º de Bacharelato.

As estadías poder ser entre dúas e tres semanas en familias, campamentos ou residencias e os destinos son: Reino Unido, Irlanda, Francia, Canadá ou campamento en Galicia, dependendo sempre do curso do solicitante.

As becas cubrirían os gastos de: viaxe, monitores que acompañarán ao alumnado durante a actividade, os gastos de docencia (incluíndo material escolar e libros), as actividades culturais e complementarias dos cursos, os gastos de mantenza e aloxamento, certificación de realización da actividade e seguro de accidentes e responsabilidade civil.

Para máis información pode acudirse ás OMIX dos respectivos concellos.

Érguete Baixo Miño comeza co programa de Intervención Socioeducativa na Aula para os alumnos

            A Asociación de Prevención en Drogodependencias, Educación e Promoción da Saúde Érguete Baixo Miño comeza hoxe, 13 de xaneiro, o Programa de Intervención Socioeducativa na Aula, enmarcada dentro dos diferentes programas de prevención que realiza esta entidade na comarca do Baixo Miño. Este programa, que conta co financiamento da Consellería de Sanidade-Sergas, Subdirección Xeral de Saúde Mental e Drogodependencias, e a Mancomunidade do Baixo Miño,  ábrese co Obradoiro de “Educación nas emocións” para alumnos de Educación Primaria e Secundaria, aínda que posteriormente traballaranse outros ámbitos educativos como o Consumo Responsable e o Afectivo-Sexual.

            Cada Obradoiro ten unha duración de 5 horas e os centros educativos nos que se desenvolven este ano son o CIP Suarez Marquier, do Rosal, o CRA María Zambrano, tamén do Rosal, e o CEIP de Tebra-Tomiño, sendo un total de 421 alumnos os que van participar.

Luns, 12 de xaneiro de 2009

O BNG presenta mocións nos concellos do Baixo Miño de condena do ataque israelí a Gaza

Nos últimos días o exército de Israel ten bombardeado e invadida a franxa de Gaza, en Palestina, provocando centos de vítimas, maioritariamente nenos, nenas e mulleres, sen contar os centos de feridos e feridas de carácter grave.

Este ataque é un crime de guerra que aparece como colofón de máis dun ano de bloqueo do Estado de Israel contra o pobo de Gaza, que xa provocara unha grave crise humanitaria, e as súas vítimas súmanse aos máis de 5.000 palestinos mortos desde setembro do ano 2000, en que empezou a rebelión contra o Estado israelí na coñecida como Segunda Intifada, e onde tamén morreron máis de 900 nenos e nenas.

O BNG quere facer un chamamento a que se deteña inmediatamente a agresión contra Gaza rexeitando os bombardeos e invasión levados a cabo polo exército de Israel, que evidencian o colofón da blocaxe perpetrada polo Estado israelí contra o pobo de Gaza, en Palestina, constituíndo un crime de guerra.

Para elo a formación nacionalista iniciou unha campaña presentando mocións nos diferentes concellos da comarca nas que se solicita a paralización da invasión nos territorios de Gaza, así como os bombardeos que está a facer por terra, mar e aire por parte do exército israelí, instando ao Estado español a que suspenda as relacións diplomáticas e económicas co Estado de Israel até que non se poña fin á agresión militar, invasión e blocaxe que está a perpetrar na franxa de Gaza, en Palestina. Así mesmo, que o Estado español inste oficialmente ao cumprimento das reiteradas resolucións da ONU relativas á retirada do Estado de Israel dos territorios ocupados; ao tempo que se demanda, no marco das Nacións Unidas, o envío inmediato dunha misión de observación e interposición co fin de garantir a fin da blocaxe e da agresión militar.

Sábado, 10 de xaneiro de 2009

A Deputación destina 60.000 euros a 14 obras de interese comunitario no Baixo Miño

A Deputación de Pontevedra financia con 60.000 euros 14 actuacións no Baixo Miño, no marco do Plan de Acción Comunitaria do 2008, que se desenvolverán antes do 31 de outubro de 2009.

Estas axudas foron solicitadas por todas aquelas agrupacións veciñais que carecendo de fins de lucro, desenvolven as súas actuacións no ámbito territorial do municipio ao que pertencen e están ao corrente das súas obrigas tributarias e coa Seguridade Social. As obras subvencionadas teñen a consideración de ser de interese comunitario.

No reparto de fondos o Goberno provincial atendeu a criterios como a inexistencia ou deficiencia de cobertura pública para dar satisfacción á actuación demandada, a necesidade da devandita obra, o número de veciños beneficiados pola súa realización, os servizos que abranguen e que as actuacións teñen un marcado interese comunitario.

As obras subvencionadas deberán executarse antes do 31 de outubro de 2009, aínda que o prazo poderá prorrogarse se se producen atrasos derivados de condicións meteorolóxicas adversas ou por outras situacións xustificables.

As principais actuacións subvencionadas foron pavimentacións, acondicionamento de casas de cultura, canalizacións de augas, equipamentos, mellora de alumeados ou adecuación de locais sociais en parroquias.

A neve protagonista na comarca do Baixo Miño

    A neve foi onte á mañá a gran protagonista ao aparecer en toda a comarca do Baixo Miño, onde comezou nevando en Goián e Tomiño para estenderse logo até Tui, e tamén a outras localidades coma  Salceda, Salvaterra e o Porriño.

    No centro de Tui a neve caeu entre ás 9 e ás 10 da mañá, revivindo unha estampa que non se producía dende hai máis de 20 anos.  Moitos foron amais os que pola mañá se animaban a subir ao monte Aloia para disfrutar da paisaxe nevada.

    As complicacións na estrada repetíronse en toda a provincia, e na nosa zona a situación estivo complicada no alto de San Antonio, na estrada do Porriño a Salvaterra e no alto de Puxeiros.

Venres, 9 de xaneiro de 2009

Política Territorial licita o primeiro treito da VAC por 44,8 millóns de euros

    A Consellería de Política Territorial, Obras Públicas e Transportes licita, segundo se publica onte no Diario Oficial de Galicia, as obras de construción do primeiro treito da Vía de Altas Prestacións do Baixo Miño cun orzamento de 44,8 millóns de euros e un prazo de execución de 36 meses. Este treito, de 3,9 quilómetros entre Tui e Tomiño, terá dende o primeiro momento características de autovía, logo de que a Consellería de Política Territorial, Obras Públicas e Transportes modificase o proxecto inicial para mellorar a súa capacidade, o que supuxo tamén un notable incremento orzamentario da obra. Ademais deste primeiro treito, tamén terá características de autovía dende o primeiro momento o segundo treito, entre Tomiño e a ponte internacional de Goián, duns 14 quilómetros.

    O treito hoxe licitado, entre o enlace coa Autovía Tui-Vigo (A-55) e o enlace coa estrada Areas-Tomiño (PO-350) ao seu paso por este último termo municipal, ten unha lonxitude total de 3,9 quilómetros. A reformulación do proxecto orixinal dotou a este treito de catro carrís, dous en cada sentido, de 3,5 metros de ancho e dúas beiravías de 2,5 metros. Ademais, reformarase o enlace inicial coa A-55, onde se construirá unha glorieta elevada para distribuír os tráficos tanto das dúas autovías como da estrada convencional Vigo-A Guarda-Tui (PO-552). Este treito de autovía contará con cinco pasos inferiores e tres pasos superiores.

    Con anterioridade a esta licitación, a Consellería de Política Territorial xa iniciou o proceso expropiador dos terreos necesarios para a construción tanto deste primeiro treito entre Tui e Tomiño como do terceiro entre Goián e A Guarda, cuxas obras xa están tamén en licitación por 53,2 millóns de euros.

    Ademais, a CPTOPT someteu a información pública o pasado verán os estudos informativos tanto da variante da Guarda como do segundo treito, entre Tomiño e Goián, cos novos trazados propostos para este último que definen un itinerario factible que minimiza o impacto ambiental que presentaba o previsto polo anterior goberno.

    Coas modificacións introducidas pola CPTOPT, o custo total da nova autovía entre Tui e Goián, de 18 quilómetros, situarase no entorno dos 130 millóns de euros. O terceiro treito da Vía de Altas Prestacións e a variante da Guarda, que suman outros 13 quilómetros, suporán un custo estimado doutros 65 millóns de euros. Deste xeito, o custo total da nova infraestrutura entre Tui e A Guarda será duns 200 millóns de euros.

    A futura Autovía Tui-Goián e a súa continuación como Vía de Altas Prestacións ata a Guarda e a súa circunvalación mellorará a mobilidade e seguridade viaria do Baixo Miño, facilitando as conexións dos concellos da Guarda, O Rosal e Tomiño con Tui e, dende alí, a través da A-55, con Vigo e o resto da rede viaria galega. Este corredor suporá un importante avance nos tempos de conexión e na seguridade viaria fronte á vella estrada Tui-A Guarda, que atravesa numerosas travesías urbanas.

O Baixo Miño tiña en decembro 4.456 parados, un 7,5% máis que o mes anterior e un 32,6% máis que hai un ano

    A comarca do Baixo Miño rexistrou no mes de decembro un total de 4.456 parados, un 7,5% máis que no mes anterior segundo os datos feitos públicos pola Consellería de Traballo.  Por sexos o paro subiu nun 12,8% para os homes e nun 3,7% para as mulleres.

    Por concellos o paro rexistrado en decembro en Tui é de 1.592 parados, un 6,9% máis que no mes anterior, en Tomiño hai 1.276 parados un 7,6% máis que en novembro, no Rosal teñen 589 parados, cun incremento do 6,9%, na Guarda a cifra ascende a 776 desempregado cun crecemento respecto a novembro dun 7,5%, e por último en Oia foi onde máis creceu o paro en decembro, un 11,4% até os 273 parados.

    Sen embargo analizando os datos máis polo miúdo vese que o paro baixo nun 0,6% no colectivo feminino no Rosal, sobre todo entre mulleres de 25 anos. Tamén baixo o paro entre os homes menores de 25 anos na Guarda nun 4,8% e en Oia nun 4,5%.

    Con respecto ao paro interanual, de decembro de 2007 a decembro de 2008, o paro subiu no Baixo Miño en 1.096 persoas o que representa un 32,6%, unha cifra que está por riba da media galega que se sitúa no 22,5%.

    O paro interanual subiu en todos os concellos da comarca, onde máis o fixo foi en Oia nun 42,9%, seguido de Tomiño cun 38,4%, na Guarda o crecemento interanual foi do 35,4% pese a baixada nun 6,7% nas mulleres menores de 25 anos. No Rosal o paro creceu no último ano nun 34,8, aínda que baixou entre as mulleres menores de 25 anos nun 4,9%. Por último Tui tivo o menor ascenso cun 24,7%.

    Por sectores dos 4.456 parados que hai na comarca 2.021 pertencen ao sector servizos, 765 á industria, 672 á construción, 665 ao colectivo sen emprego anterior, e 333 a agricultura e gandería.  Con respecto ao mes anterior o paro subiu nun 17,9% na construción, nun 8,1% na industria e nun 6,9% no sector servizos, mentres que se estancou na Agricultura e Gandería, onde incluso chegou a baixar en Tui nun 11,4% e en Tomiño nun 2%.

    Analizando por sectores o paro interanual onde máis subiu foi na construción nun 63,9%, un 40,9% na industria, un 27,2 no sector servizos, un 22,2% no colectivo sen emprego anterior, e por último un 21,5% na agricultura.  Compre salientar amais que o para interanual na agricultura e gandería baixou un 15,4% no concello de Oia.

Xoves,  8 de xaneiro de 2009

Sae a licitación o contrato harmonizado de asistencia técnica do tramo III da VAC

O Diario Oficial de Galicia publicou onte un anuncio da Sociedade Pública de Investimentos de Galicia polo que se dá conta da licitación do contrato harmonizado de asistencia técnica integral á dirección das obras da VAC Tui-A Guarda no treito III do enlace de Goián ao enlace da Guarda.

A asistencia técnica terá un prazo de execución de 28 meses cun orzamento base de licitación de 1.517.380 euros.

A documentación pode obterse até o 30 deste mes na SPI Galicia ou na web www.spigalicia.es, e a presentación de ofertas está aberta até o 5 de febreiro de 2009 ás 12h.

A apertura das ofertas terá lugar o 20 de febreiro na sede da Sociedade Pública de Investimentos de Galicia en Santiago.

Luns, 5 de xaneiro de 2009

Os Reis visitarán hoxe a comarca do Baixo MIño

            Hoxe xa se anticipa a ilusión de pequenos, pero tamén dos maiores que ‘cren’ que esa ilusión aínda é posible. As dez da mañá Melchor, Gaspar e Baltasar, comezarán o seu percorrido polo Rosal visitando xuradías e parroquias deste municipio.

            Despois de xantar e, logo dun merecido descanso, estarán, a partir das cinco da tarde, na Praza do Calvario para recibir a tódolos nenos, escoitar as súas peticións e obsequiarlles co espectáculo que ofrecerá Roi o Caga-bólas e convidalos, logo a chocolate.

            E con esa posibilidade que teñen de estar en diferentes lugares á vez, as Súas Maxestadas estarán, tamén ás cinco na Guarda para, saíndo da praza San Bernardo, percorrer as rúas Puerto Rico e Galicia e recibir aos nenos na Carpa da Alameda.

En Tui os Reis Magos comezarán o seu perocrrido tamén pola mañá visitando as residencias “Paz y Bien”, e “San Telmo”, para entregar agasallos aos maiores. Pola tarde, ás 18.00h, sairán desde a antiga alfándega até o Paseo da Corredoiroa, sobre cabalos e acompañados de sete carrozas e dos seus paxes xunto cunha ampla comitiva integrada por máis de 120 persoas.

No seu percorrido pola Avenida de Portugal, a rúa Martínez Padín e Augusto González Besada e Paseo da Corredoira os Reis de Oriente repartirán máis de 1.200 quilos de caramelos sen gluten, así coma un millar de globos. Irán escoltados pola Policía Local e participarán tamén os Bombeiros Voluntarios de Valença, unha ambulancia, e Protección Civil e a banda musical deste acontecemento estará a cargo da Rondalla do Centro Cultural “O Mosteiro” de Pexegueiro.

En Tomiño a Cabalgata de Reis comezará, ás 17.00 horas na Praza do Seixo.

            Segundo soubemos polo paxe real, a maioría dos encargos, malia crise que se vive e a que os expertos anticipan pior para o ano no que andamos, serán posíbles practicamente todas as peticións, agás aquelas que por mor das dificultades existentes nalgún dos aeroportos, como o de Barajas, impedirán que eses regalos se poidan entregar.

Sábado, 3 de xaneiro de 2009

A Deputación concede 421 mil euros ao Baixo no PPC

    Os concellos da comarca do Baixo Miño disporán dun total de 421.061 euros para executar actuacións incluídas no Plan Provincial de Cooperación  (PPC) que xestionará a Deputación Provincial de Pontevedra en 2009. Esta liña de axudas está financiada pola institución provincial, os concellos beneficiarios e o Ministerio de Administraciones Públicas (MAP)

    A falta de confirmar a achega do MAP, o PPC posibilitará a execución de obras na provincia de Pontevedra por arredor de 6.584.056,96 millóns de euros. Esta liña de investimentos irá dirixida á promoción de calquera tipo de obra de competencia municipal nos concellos de menos de 50.000 habitantes. Os importes deste plan distribuiranse empregando como criterio obxectivo unha porcentaxe do 60% para o peso poboacional do municipio e do 40% para o criterio de superficie.

    As obras incluídas nestes plans selecciónanse a partir das propostas formuladas polos concellos, que terán como data límite para presentar as solicitudes o vindeiro 12 de xaneiro de 2009. Así mesmo, serán os propios concellos os encargados de tramitar a contratación, seguimento e xustificación das obras incluídas no plan.

    Por concello Tui recibirá ao abeiro do PP 106.453,27 euros e Tomiño recibirá 107.728,43. A Guarda percibirá do Plan Provincial de Cooperación 68.489,97 euros, O Rosal 65.702,67 euros e Oia recibirá 72.687 euros.