|
galiciasuroeste Informativo Baixo Miño |
Martes, 7 de setembro de 2010
O paro na comarca do Baixo Miño en agosto foi de 4.772 persoas
O pasado mes de agosto rexistráronse no Baixo Miño un total de 4.772 parados, o que supón unha suba de 4 desempregados con respecto ao mes anterior. Por concellos o paro baixo en Tui e Tomiño e creceu no Rosal, A Guarda e Oia. Do total de desempregados na comarca 2.205 son homes e 2.567 son mulleres.
Así en Tui hai un total de 1.724 desempregados, 8 menos que en xullo. En Tomiño o número de parados é de 1.413, o que supón un descenso de 3 con respecto ao mes anterior. Por contra o paro subiu nos outros tres concellos. Así na Guarda produciuse un incremento de 7 desempregados ata chegar aos 803 parados, no Rosal e Oia o crecemento foi de 4 persoas máis na lista do antigo INEM ata os 617 e os 215 desempregados respectivamente.
Por sectores durante o pasado mes de agosto o paro baixou en agricultura e pesca con 14 novos empregados neste ámbitos, así coma na industria onde atoparon traballo 13 persoas, e 5 fixérono na construción. Por contra subiu en 20 persoas no sector servizos e en 16 no colectivo sen emprego anterior.
Venres, 20 de agosto de 2010
Educación pon en marcha diversas obras durante o verán en centros educativos do Baixo Miño
Pérez Ares no pavillón polideportivo do IES
A Delegación Territorial da Xunta en Pontevedra a través da Xefatura Territorial de Educación está a realizar, durante os meses estivais, obras de mellora en varios centros da comarca do Baixo Miño. Entre os concellos beneficiarios atópanse Tui, Tomiño, Salceda de Caselas e A Guarda.
O xefe territorial de Educación, César Pérez Ares, visitou varias destas obras onte mesmo para comprobar o seu avance.
No concello de Tui, a visita realizouse en compaña da concelleira de Educación do municipio, Patricia Ricón. Neste concello estanse a levar a cabo obras en tres centros de Primaria e nun instituto, co obxectivo de mellorar o servizo educativo público ofertado. No IES Francisco Sánchez reparouse a cuberta do centro que se atopaba danada por mor das filtracións acaecidas durante o inverno, cun custe de 7.582 euros. Ademais, adecuouse a vivenda do conserxe que foi dividida para a execución de dúas novas aulas e tres baños, un deles para minusválidos. Esta obra está practicamente rematada e tivo un custo de 57.000 euros.
Neste mesmo municipio elevouse o peche galvanizado do CEIP Nº1 e cambiouse a súa instalación eléctrica por un valor aproximado de 52.000 euros. Tamén se levou a cabo a mesma obra no CEIP Nº2, cunha inversión de 53.129 euros. Neste último colexio, no CEIP Nº2, iniciaranse ó próximo luns as obras de motorizacións do portalón de entrada, como solicitaran os pais dos nenos asistentes a este centro, contratándose tamén a seguridade do centro cun gasto total de 16.139,87€. Por último, e tamén no municipio de Tui, a Delegación Territorial renovou a instalación eléctrica do CEIP Pazos de Reis, que supuxo un custe de 46.828,69 euros.
Tamén estanse a executar obras de
mellora en dous centros educativos do concello de Tomiño. Así, no IES do
municipio, Educación investiu 300.000 euros para reparar a cuberta que estaba
danada polos temporais do pasado inverno. No CEIP Antonio Fernández, situado na
parroquia de Goián, estanse a facer aseos novos, por valor de 35.000 euros.
En canto ao concello de Salceda de Caselas, as obras realizadas consistiron na substitución da cuberta para o comedor escolar do CEIP Altamira, no que se investiron 17.195,97 euros. Este comedor será compartido co CRA da localidade contando con 160 prazas. Durante a visita, os responsables da Xefatura Territorial de Pontevedra estiveron acompañados do alcalde da localidade, José Manuel Fernández Rodríguez, quen solicitou a César Pérez Ares unha entrevista que se desenvolverá nas próximas semanas co obxectivo de analizar a parcela proposta polo concello para a construción do futuro centro educativo da vila. “Aínda así, recordeille ao alcalde da vila que debe ser o concello o que leve a cabo un Plan Especial de Dotacións para poder executar a obra sobre esa área”, explicou o xefe territorial de Educación.
Por último, o xefe territorial de Educación visitou as obras que se están a realizar no IES A Sangriña, pertencente o concello de A Garda, on se están levando a cabo dous labores de mellora simultáneas. Por unha banda a Delegación Territorial investiu 58.000 euros na reposición da cuberta do seu pavillón e, por outra banda, estase reparando a instalación eléctrica dos talleres que o centro educativo posúe, por un custe aproximado de 35.000 euros.
Estas obras de mellora están dentro do programa de recuperación dos centros educativos que Educación está a levar a cabo na provincia de Pontevedra. A Delegación Territorial da Xunta en Pontevedra, a través da Xefatura Territorial de Educación, recorda que con estas actuacións a Consellería continúa a demostrar a súa implicación na mellora das instalacións dos centros educativos pontevedreses. O obxectivo último da realización destas obras é dar o mellor servizo á comunidade educativa da provincia. Ademais, o xefe territorial de Educación, César Pérez Ares, engadiu que estas obras “demostran o cumprimento do compromiso que a Consellería de Educación ten coa totalidade da provincia de Pontevedra”.
Martes, 17 de agosto de 2010
Doazón de sangue no Baixo Miño
Esta semana unha unidade móbil do Centro de Transfusións de Galicia desprazarase ata o Baixo Miño.
Hoxe martes poderase doar na Praza Avelino Vicente na Guarda de 10 a 14 e de 16 a 21horas.
O xoves a unidade deprazarase ata O Rosal, onde estará na Praza do Calvario de 10 a 14 e de 16.30 a 21horas.
Por último o venres e sábado poderase doar na Praza de Galicia en Tui. O venres a unidade estará de 10 a 14 e de 16 a 21horas e o sábado de 10 a 15 horas.
Mércores, 11 de agosto de 2010
Augas de Galicia financia melloras de abastecemento no Baixo Miño, enmarcadas no Plan Auga, cunha achega de 25,5 millóns de euros
A Consellería de Medio Ambiente, Territorio e Infraestruturas, a través de Augas de Galicia, inviste un total de 25,5 millóns de euros nas actuacións de mellora que o Plan Auga contempla no sistema de abastecemento do Baixo Miño, concretamente nos concellos da Guarda, O Rosal, Oia, Tomiño e Tui.
Augas de Galicia, tras analizar o estado actual do sistema de abastecemento desta zona pontevedresa, detecta diversas deficiencias. Deste xeito, constátase que as captacións en manancial teñen unha forte compoñente estacional e poñen en perigo o subministro. Ademais, a capacidade de regulación dalgunhas zonas é escasa, xa que a estación de tratamento de auga potable (ETAP) de Tui é insuficiente para todo o sistema.
O estado actual do sistema de abastecemento do Baixo Miño está composto polos seguintes elementos: sete captacións en manantial, tres no Rosal e 4 na Guarda; captación do río Miño que conecta coa ETAP de Tui; 8 depósitos en toda a rede e a ETAP de Tui, cunha capacidade de 180 l/s. É dicir, ten unha capacidade de 15.300 metros cúbidos.
O Plan Auga preséntase como unha solución a todas as citadas carencias en infraestruturas hidráulicas e destina un total de 25,5 millóns de euros que se distribuirán na posta en marcha de captacións, bombeos, depósitos, unha ETAP e conducións.
Actuacións
O proxecto abrangue a execución
de tres bombeos, un na captación, outro ao depósito do Rosal e outro ao de
Tomiño. Ademais, construirase un depósito en Tomiño e ampliaranse outros tres en
Tui, Tomiño e Rosal cunha capacidade total de 42.000 m3. A ETAP de Tui
ampliarase en 150 l/s. Á vista destas cifras, duplicarse a capacidade de
tratamento da Etap de Tui e triplicarase a capacidade de depósito de auga.
Estas novas infraestruturas beneficiarán a máis de 68.300 habitantes do Baixo Miño, mellorando a súa calidade de vida e potenciándose o desenvolvemento económico e social dos concellos que pertencen a esta zona.
Mércores, 4 de agosto de 2010
O paro baixou en 207 persoas o pasado mes de xullo no Baixo Miño
O número de desempregados na comarca do Baixo Miño baixou o pasado mes de xullo en 207 persoas co que o número de parados sitúase nas 4.768. Deste total 2.211 son homes e 2.547 mulleres.
Por sectores a nivel comarcal o paro descendeu en todos. Onde máis o fixo foi en Servizos con 99 desempregados menos, seguido da construción con 46 persoas que atoparon traballo neste campo, hai 31 parados menos na industria, 24 menos no colectivo sen emprego anterior, e hai 7 parados menos en agricultura e pesca.
O colectivo sen emprego descendeu en todos os concellos da comarca. Onde máis o fixo foi na Guarda con 85 parados menos, ata situarse no 796 desempregados. O número de parados baixou en 51 persoas en Oia ata os 211, en 43 persoas diminuiu en Tui ata os 1.732 desempregados, no Rosal reduciuse en 23 ata as 613 persoas sen emprego, e en 5 fíxoo en Tomiño onde o número de parados é de 1.416 persoas.
Mércores, 21 de xullo de 2010
Clubs deportivos da comarca recibiron sendas subvencións da Deputación
O Club Kayak Tudense, con 9.578,84 euros, e o club Balonmán Guardés, con 10.000 euros, foron as entidades deportivas do Baixo Miño que onte recibiron cadanseu cheque entregados polo deputado de Deportes, José Enrique Sotelo, e a vicepresidenta, Teresa Pedrosa.
As axudas que a Deputación outorga ó deporte federado teñen como obxectivo específico apoiar ás entidades deportivas nas actividades derivadas da participación en ligas ou competicións oficiais de ámbito comarcal, provincial, autonómico ou nacional, convocados por organismos oficiais ou federacións deportivas galegas, nas modalidades deportivas de implantación na provincia de Pontevedra.
Sábado, 17 de xullo de 2010
O BNG urxe de Sanidade que dote dos medios humanos necesarios á Unidade de Saúde Mental do Val Miñor
A deputada do Grupo Parlamentario do BNG, Carme Adán, vén de reclamar da Consellería de Sanidade que adopte as medidas necesarias para correxir a situación “difcilmente sostíbel” que padece a Unidade de Saúde Mental do Val Miñor.
Carme Adán rexistrou unha iniciativa parlamentar na que se fai eco dos recortes que a Xunta acometeu na dita unidade, na que había un equipo constituido por un sicólogo e dous psiquiatras, a un dos cales non se lle renovou o contrato e, por tanto, deixou de prestar os seus servizos.
Esta situación está a provocar que, por exemplo, non mes de Xuño a primeira visita solicitada se estaba concedendo para o mes de Agosto, de ahí que urxa dotar de máis medios humanos a esta Unidade e no menor prazo de tempo posíbel, dixo.
Para a deputada nacionalista, os problemas descritos se enmarcan na paralización do Primeiro Plano Estratéxico de Saúde Mental de Galiza, que trouxo consigo que proxectos tan necesarios para o numeroso colectivo afectado foran eliminados ou retrasados sine die.
Venres, 16 de xullo de 2010
Doazón de Sangue na comarca do Baixo Miño
A comarca do Baixo Miño rexistrou unha media de 57 doazóns por cada mil habitantes o ano pasado. En Tui a cifra é de 54 doantes por cada mil, 88/1000 na Guarda, 69 no Rosal, 34 en Oia, e Tomiño 35 doantes por cada mil habitantes.
No verán diminúen as doazón mentres que aumentan as necesidades de aí que fagan un chamamento á doar sangue. É preciso sobre doantes de 0- , 0+ e A+. Precisamente unha unidade móbil do Centro de Transfusións estará hoxe venres na Praza de Galicia en horario de 10 a 14 e de 16 a 21h e mañá sábado de 10 a15 horas.
Martes, 14 de xullo de 2010
Aprobadas xa axudas por 1.350.000 euros do programa Leader para o desenvolvemento rural na mancomunidade de Vigo e Baixo Miño
O Grupo de Desenvolvemento Rural AGRD18 ten aprobadas xa axudas por 1.350.000 euros do programa Leader para o desenvolvemento rural na mancomunidade de Vigo e Baixo Miño.
Nos últimos a Xunta de Galicia notificoulles a aceptación de cinco novos proxectos que percibirán un total 473.000 euros de axuda procedentes dos Fondos Feader da Unión Europea para a promoción e o desenvolvemento do rural, creando emprego e permitindo a posta en marcha de novas empresas ou actuacións de recuperación patrimonial e paisaxística. Trátase da posta en valor do patrimonio natural e cultural da parroquia de Laxe (Fornelos de Montes) ou a do río Barragán, que beneficiará ás parroquias de Calvos e Traspielas en Fornelos de Montes e Moscoso e Xunqueiras en Pazos de Borbén; un roteiro arqueolóxico polos montes de Couso (Gondomar), unha plantación que introducirá a variedade do kiwi amarelo en España, un proxecto piloto de produción mel de monte veciñal en Santa Cristina da Ramallosa ou un restaurante-viñoteca especializado en produtos do Baixo Miño en Tomiño.
Con estes proxectos aprobados, son xa un total de trece as subvencións concedidas nos tres últimos meses ao abeiro do Programa Leader nos quince concellos da Mancomunidade da Area Intermunicipal de Vigo-Baixo Miño, que suman un total de 1.350.000 euros en axudas para o noso rural en actividades que van dende centros de día para dependentes, empresas de tratamento de biomasa ou centros de formación para discapacitados a diversas postas en valor do noso patrimonio.
A esta cantidade haberá que sumar a parte de co-finanzamento que deben aportar os promotores, co que se chegaría a un total de 3.312.000 euros a investir entre os axentes públicos e privados participantes no Plan Leader 2007-2013 na reactivación territorial do rural.
A Asociación Grupo de Desenvolvemento Rural da Mancomunidade da Área Intermunicipal de Vigo-Baixo Miño leva xestionados, dende a apertura da convocatoria o pasado mes de decembro, 70 expedientes de axuda Leader, dos que 13 foron xa informados favorablemente pola Xunta de Galicia e o resto están á espera de resposta nas próximas semanas.
A Cámara de Comercio de Tui pon en marcha un curso para axudar ao pequeño comercio
A Cámara de Comercio de Tui organiza un programa gratuíto de apoio ao pequeno comercio que deu comezo hoxe co obxectivo de asesorar aos comerciantes dos municipios da demarcación (Tui, O Porriño, A Guarda, Tomiño, O Rosal, Oia e Salceda de Caselas) para que rendibilicen ao máximo o seu negocio e ofrecer solucións para que crezan no ámbito empresarial.
Os participantes contarán cun consultor que, de forma individualizada, axudaralles a elaborar o Proxecto e o Plan Estratéxico do seu negocio. En palabras de Gumersindo Alonso, presidente da Cámara de Comercio tudense, programas como este favorecen a dinamización do comercio no centro urbano dos municipios que integran a demarcación da Cámara. Indica que un dos obxectivos prioritarios é potenciar aos concellos da demarcación como centros de interese comercial e ser capaces de atraer a compradores de municipios limítrofes potenciando áreas de comercio que atraian o interese dos visitantes.
Alonso insiste na necesidade de xerar novas iniciativas comerciais complementarias á oferta comercial de Valença con apoios como os propostos con este programa de axuda ao pequeno comercio e doutros xa existentes como o Plan Ágora Re-Comercia anunciado recentemente pola consellería de Economía e Industria e dirixido a fomentar o labor estratéxico dos comerciantes galegos. O curso, que será impartido nas instalacións da Cámara de Comercio de Tui, consta de 80 horas e conta coa colaboración do Fondo Social Europeo, a Consellería de Traballo e Benestar da Xunta de Galicia e a Fundación INCYDE. Fundación INCYDE O Instituto Cameral de Creación e desenvolvemento da Empresa (INCYDE) ten como obxectivo apoiar a creación e consolidación de empresas. INCYDE xorde dunha iniciativa das Cámaras para fomentar a vocación empresarial. A súa actividade supón un achegamento das empresas creadas cara aos seus Cámaras correspondentes, para dentro delas obter o asesoramento necesario.
Sábado, 3 de xullo de 2010
O paro descendeu en 243 persoas en xuño no Baixo Miño
O número de desempregados na comarca do Baixo Miño descendeu en 243 persoas o pasado mes de xuño segundo os datos feitos públicos pola Consellería de Traballo e Benestar. Esta é a maior baixada do paro no que levamos de ano, rexistrándose amais un descenso en todos os concellos e en todos os sectores menos no colectivo sen emprego anterior.
O número total de desempregados na comarca ascende a 4.975 persoas. O sector onde máis baixou o número de parados foi en Servizos con 122 persoas menos sen emprego, seguido da industria con 71 desempregados menos, a construción con 47 persoas que atoparon traballo, e en agricultura e pesca creáronse 14 postos de traballo. Por contra no colectivo sen emprego anterior hai 14 novos parados.
Por concellos en Tui hai 1.775 paradas, 61 menos que en maio. En Tomiño o paro baixou en 64 parados ata as 11.421 persoas. No Rosal creáronse 21 postos de traballo polo que o número de desempregados é de 636, e na Guarda foi onde máis baixou o paro en xuño con 74 persoas sen traballo menos ata as 881. Por último en Oia hai 262 parados tras atopar 23 persoas emprego.
Venres, 25 de xuño de 2010
21 persoas do programa de inserción laboral “Mobilia II” mellorará o mobiliario urbano do Rosal, Oia, Tui e Mos
Os 21 alumnos do Obradoiro de Emprego “MOBILIA II”, da Deputación de Pontevedra, realizarán obras de mellora no mobiliario urbano de catro concellos das comarcas de Baixo Miño e Louriña (O Rosal, Oia, Tui e Mos). Neste caso, infraestruturas fabricadas ó abeiro desta iniciativa perfeccionarán casetas de información turística e varias pistas polideportivas dos citados municipios, nas que se acometerán obras de soldadura e carpintería.
As casetas de información turística que serán melloradas pertencen ós concellos de Mos e Oia; O Rosal e, novamente Mos, son os municipios nos que se perfeccionará a pista deportiva.
O Obradoiro de Emprego “MOBILIA II”
Trátase da segunda edición dun obradoiro de emprego organizado pola Deputación de Pontevedra a través do Servizo de Desenvolvemento Local e Fondos Comunitarios, a Xunta de Galicia e o Fondo Social Europeo, cun orzamento total de 550.000 euros. O seu obxectivo principal é formar a persoas en situación de desemprego, maiores de 25 anos, nas especialidades de soldadura e carpintería metálica e de madeira para conseguir a súa posterior inserción laboral.
A duración de MOBILIA II é de 12 meses (do 21 de decembro de 2009 ó 20 de decembro do ano seguinte), durante os cales se formará a 21 persoas (5 mulleres e 16 homes). Ao final do obradoiro os alumnos recibirán cadanseu certificado profesional de Carpinteiro e Barnizador-Lacador ou de Soldadura e Carpintería Metálica.
As obras de mellora recaerán nun total de 17 concellos da provincia de Pontevedra (Ponteareas, Meis, Mos, Oia, Ribadumia, Salvaterra de Miño, Arbo, As Neves, Sanxenxo, Meaño, Vilanova de Arousa, O Rosal, Pazos de Borbén, Campolameiro, Barro, Lalín e Tui).
Xoves, 17 de xuño de 2010
Entrega de subvencións a colectivos deportivos da Guarda e do Rosal
Ás 17.00 horas de hoxe, na Casa do Concello do Rosal, o deputado José Enrique Sotelo, fará entrega das resolucións de concesión de colaboracións económicas á Sociedade Deportiva e Cultural Atlético Novás, ao Club de Remo Robaleira e ao Club Balonmán Atlético Guardés.
Mércores, 16 de xuño de 2010
Cinco corais do Camiño Portugués da Costa cantarán na Misa do Peregrino o 26 de xuño
Organizado pola Agrupación Coral Polifónica da Guarda, o próximo 26 de xuño, cinco corais do Camiño Portugués da Costa participarán nos Sons do Camiño.
As corais Orfeão de Vila Praia de Âncora, Agrupación Coral Polifónica da Guarda, Agrupación Coral Musical do Rosal, Coral Polifónica Vagalume de Oia e Agrupación Coral Atlántida de Matamá cantarán a Misa do Peregrino con motivo da finalización do Camiño Portugués da Costa no que participan máis de 160 peregrinos, nunha iniciativa xurdida do concello.
Programa do 26 de xuño en Santiago
As 17:00 Encontro das corais na Praza do Obradoiro onde se farán entrega dos báculos conmemorativos a cada coral participante:
Orfeão de Vila Praia de Âncora
Agrupación Coral Polifónica da Guarda
Agrupación Coral Musical do Rosal
Coral Polifónica Vagalume de Oia
Agrupación Coral Atlántida de Matamá
As 17:30 Entrada á catedral pola Porta de Platerías, situándose na marxe dereita do Altar Mayor
As 18:00 Misa do Peregrino. O conxunto das cinco corais formarán un único orfeón de mais de 200 persóas e cantarán, dirixidos por Marisilda Sánchez Lomba a misa que celebra o remate da peregrinación do Camiño Portugués da Costa, co seguinte repertorio:
Entrada: Canticorum Jubilo (F.Handel)
Primera Lectura: Aleluia
Ofertorio: amenizado polo organista da Catedral de Santiago
Comunión: Pescador de Hombres (C. Gabaráin) e Cerca de Ti (L. Masón)
Durante o Voo do Botafumeiro o orfeón entonará o Himno ó Apostol (J. Barcia Caballero, M. Soler Palmer)acompañado polo órgano.
Ó final da misa, cantarase a Salve Marinera (C. Oudrid/C. Monllor) en honra aos pobos mariñeiros da costa
As 19:00 De novo o orfeón composto polas cinco corais ofrecerá un Concerto na Praza da Quintana, dirixido polos directores das corais invitadas, interpretando pezas populares galegas.
Mércores, 9 de xuño de 2010
La Asamblea Comarcal de Cruz Roja Baixo Miño iniciará sus actividades de verano el 5 de julio
Cruz Roja Española informa que desde su Asamblea Comarcal Baixo Miño pondrá en marcha el próximo 5 de Julio sus actividades de verano.
Las ludovermellas se desarrollarán en el CEIP Mestre Manuel García de Oia, en las dependencias del Omix de Tomiño y en el patio del CP A Sangriña en A Guarda, estando dirigidas a niños con edades comprendidas entre los 5 y 12 años. La finalidad de estas actividades es hacer llegar a los niños valores como solidaridad, tolerancia, cooperación, empatía, compañerismos y respeto, además de fomentar la interrelación entre niños de distinto grupo de edad.
Los objetivos que se pretenden conseguir son, básicamente, Promover la adquisición de nuevos hábitos lúdicos y educativos; Fomentar la participación; Promover la adquisición de valores y conductas positivas respecto a la vida grupal y a la convivencia, y Reforzar y favorecer la creación de redes interpersonales.
Estos talleres, de carácter gratuito, serán realizados los lunes en Oia, martes y Jueves en A Guarda y los Viernes en Tomiño.
Para más información, reserva o inscripción las personas interesadas deberán dirigirse a la Asamblea Comarcal de Cruz Roja Baixo Miño, en la calle Agustín Nandín Lomba, nº 1 Bajo. A Guarda, o llamar a los teléfonos 986 61 46 09 / 606 34 84 71; incluso dirigir un correo electrónico a laguardia@cruzroja.es
Xoves, 3 de xuño de 2010
O paro descendeu no Baixo Miño en 134 persoas en maio
O número de desempregados na comarca do Baixo Miño descendeu en 134 persoas o pasado mes de maio ata situarse nas 5.218 persoas. O paro baixou en todos os concellos menos na Guarda onde subiu en oito persoas ata as 955.
En Tui o paro descendeu en 33 persoas ata situarse nos 1.836 desempregados. En Tomiño a baixada foi de 74 persoas ata os 1.485. Mentres no Rosal a cifra do paro sitúase en 657 persoas tras descender en 11 en maio, e en Oia hai 285 desempregados, 24 menos que o mes anterior.
A nivel comarcal e por sectores o paro baixou en 78 persoas no sector servizos; en 60 na construcción e en 17 na industria. Mentres no colectivo sen emprego anterior hai 1 desempregado menos, e por contra hai 22 novos parados en agricultura.
Martes, 1 de xuño de 2010
Gran éxito de nuestros atletas en el campeonato gallego promesa-junior con un total de 10 medallas
Se disputó el pasado domingo en Ferrol, el campeonato gallego de atletismo categoría promesa-junior de aire libre, donde participaron algunos de nuestros atletas consiguiendo entre todos ellos un total de 10 medallas (5 oros, 4 platas y 1 bronce)
Por parte del Suárez Marquier, los de Félix Piñel consiguieron los siguientes trofeos:
Jonathan Correa, categoría junior, se alzó con 3 medallas: Oro en lanzamiento de peso con 10m96cm, plata en lanzamiento de disco con 36m14cm y bronce en lanzamiento de jabalina con 48m33cm
Brais Otero, también junior, consiguió 2 medallas: Oro en lanzamiento de disco, con 37m55cm y plata en peso con 10m78cm.
Por lo que ambos dominaron los lanzamientos de peso y disco en categoría junior proclamándose campeones y subcampeones gallegos
También del Suárez Marquier, Iván Rodríguez Maceiras, estuvo en Ferrol, fuera de concurso debido a que todavía es juvenil, pero con una sensacional actuación, ya que consiguió la mínima para el campeonato de España juvenil en salto de altura (ya la tenía en longitud), y marca personal, con un salto de 1m85cm, ganando incluso a los atletas promesa y junior. Además, también mejoró marca en el triple salto, con un salto de 12m55cm
También participó Sergio Rodríguez, el guardés que pertenece al Coruña Comarca, en categoría promesa, consiguiendo un total de 4 medallas: oro en 200 metros lisos, plata en 100 ml y salto de longitud, donde pulverizó su marca personal con un salto de 6m46cm, y bronce en triple salto con un salto de 11m86cm
En categoría femenina también hubo representación guardesa, por parte de Raquel Rodríguez Casaleiro, quien se proclamó campeona gallega junior en 5.000 ml, con una marca de 19'58"
Venres, 28 de maio de 2010
A programación do Xacobeo 2010 recala na comarca do Baixo Miño
O Director Xerente da S.A. do Xacobeo 2010, Ignacio Santos deu onte conta das actividades que ao abeiro da programación do Xacobeo restan por disfrutar na provincia de Pontevedra. Son un total de 182 espectáculos cun orzamento de 2,7 millóns de euros, dos que algúns terán lugar na comarca do Baixo Miño.
No eido expositivo Tui acollerá a exposición Iacobus Gallaecia. O 27 de xullo terá lugar na cidade o concerto de Dulce Pontes presentando o seu disco “Momentos”.
Ata A Guarda chegará unha das actuacións do Festival Via Stellae así como a Orquestra de Pulso e Púa. No Rosal actuarán Nordestin@as. E por último en Oia terán o 16 de xullo a Orquestra Cabaret.
Xoves, 27 de maio de 2010
Certame de Fotografía “ Viaxando”
As Oficinas Municipais de Información Xuvenil de Gondomar, Tomiño, Salceda de Caselas, A Guarda, O Rosal, Porriño, Baiona e a Casa Xuventude de Tui organizan a cuarta edición do certame fotográfico “Viaxando”, no que poderán participar mozos e mozas entre 12 e 35 anos, que presentarán unha fotografía en branco e negro ou cor en papel fotográfico pegada sobre unha cartolina negra tamaño A4 sobre o título “Viaxando”.
A fotografía entregarase en sobre pechado coa indicación “Viaxando”, no exterior da mesma. Cada fotografía levará no dorso o pseudónimo do autor e, de ser o caso, o título da fotografía. Acompañaranse con outro sobre pechado no que figurará novamente o pseudónimo do autor recollendo no interior o nome e apelidos, enderezo, teléfono e fotocopia do DNI.
As fotos poderán presentarse nas instalacións de calquera das entidades organizadoras ata o xoves 30 de setembro do 2010.
Con todas as fotografías presentadas realizarase unha exposición itinerante que percorrerá os concellos organizadores, inaugurándose oficialmente na OMIX de Gondomar o venres 15 de outubro do 2010 ás 20.00 horas.
O xurado estará integrado por membros da organización ou persoas nas que se delegue. O fallo do xurado farase público o 8 de outubro do 2010. Difundirase o fallo nos medios de comunicación, así como, por teléfono á persoa premiada. A fotografía premiada quedará en propiedade do Concello organizador. Concederase un único premio consistente nunha fin de semana para dúas persoas nunha Casa Rural de Galicia, dentro do programa “Outono gastronómico”, a disfrutar do 16 de outubro ao 15 de decembro.
A participación no Certame implica a aceptación das bases e das decisións adoptadas polo xurado.
Xoves, 13 de maio de 2010
Queremos Galego chama a encher a Praza do Obradoiro o 17 de maio
A plataforma cidadá Queremos Galego convoca para o 17 de maio, Día das Letras Galegas, unha manifestación en defensa da lingua .
Baixo o lema “O Galego, o noso existir” a mobilización, que segundo agardan os organizadores, será histórica polas súas dimensións, sairá ás 12 do mediodía da Alameda de Santiago de Compostela e rematará na Praza do Obradoiro, onde como xa acontecera na manifestación contra o decretazo no ensino do pasado 21 de xaneiro, se espera unha praza ateigada.
Como en ocasións anteriores, a Plataforma Queremos Galego disporá dun servizo de autobuses para todas aquelas persoas que desexen acudir a Compostela e cuxo horario no Baixo Miño será o seguinte: 9.30, pasará pola Alameda da Guarda; 9.35, por Pías; ás 9.40 o autobús recollerá á xente en Goián; ás 9.45 farao na praza tomiñesa do Seixo, e as 10.00 pasará pola Corredoira de Tui.
Os autobuses de volta sairán de Compostela ás 17.30 horas.
O prezo da viaxe será de 5€ para as persoas maiores de idade e gratuíto para os menores. Pódense reservar prazas nos autobuses no teléfono 679 986 290 ata mañá, venres.
Martes, 11 de maio de 2010
O BNG denuncia que a Consellaría de Sanidade privatizará os novos centros de saúde de Oia, Gondomar e Tui
A portavoz de Sanidade do BNG no Parlamento Galego, Ana Luísa Bouza, presentou unha iniciativa na que denuncia que a Consellaría de Sanidade optou por entregarlle a empresas privadas a construción dos novos centros de saúde previstos para 2010 e 2011, entre eles os de Oia, Gondomar e Tui, previstos para este ano.
A deputada do BNG lembra que na memoria da Consellaría de Sanidade dos Orzamentos 2010 da Xunta de Galiza “aparece unha previsión de investimentos en atención primaria polo sistema de iniciativa de financiamento privado (PFI)”. En concreto, os fondos privados achegarán á Consellaría de Sanidade 46 millóns de euros en 2010 e máis de 68 millóns en 2011 para a construción das infraestruturas de atención primaria, entre as que están 18 centros de saúde en 2010, e entre eles os de Oia, Gondomar e Tui, e outros 29 centros de saúde en 2011, así como tres Centros de Alta Resolución.
Ana Luísa Bouza critica que “a Xunta
de Galicia non especifica a fórmula que se empregará para a construción con
fondos privados nin o tipo de xestión posterior”.
Nin máis barato nin máis rápido
Ana Luísa Bouza advirte de que “non é máis barato nin máis rápido construír un centro de saúde con financiamento privado”, tal e como defende a Consellaría de Sanidade, e engade a parlamentaria nacionalista que “ao custo de construción que levaría a cabo unha empresa privada, haberá que sumar os beneficios que reclamará a empresa que financia o centro de saúde, en forma de concesións sen concurso doutros servizos”.
Un modelo que fracasou noutros países
Por outra parte, Ana Luísa Bouza advirte de que “os modelos de financiamento privado (PFI) dos centros de saúde e das infraestruturas hospitalarias está demostrado que fracasaron nos países nos que se implantaron, como en Gran Bretaña, ou nas comunidades de Madrid e Valencia”.
En concreto, denuncia que “este modelo de xestión que escolleu a Consellaría de Sanidade non ten como obxectivo rebaixar os custos, que non o fai, senón modificar quen controla os cartos públicos que pasan a mans privadas e converten a saúde pública nunha mercadoría”.
“É un modelo obsoleto e que está en cuestión alí onde se implantou nos anos 90”, asegura ana Luísa Bouza.
Cal vai ser o prezo a pagar por construír con capital privado?
Ante esta situación, a deputada do BNG pregúntalle á Consellaría de Sanidade se está definida a localización para a construción dos novos centros de saúde de Oia, Gondomar e Tui, e se están a disposición do Goberno Galego os terreos necesarios.
Ademais, solicita que a Consellaría de Sanidade informe sobre as condicións e os prazos para a licitación destes novos centros de saúde.
Por último, Ana Luísa Bouza demanda que a Xunta informe sobre os servizos que a Consellaría de Sanidade prevé que non se manterán baixo a xestión pública do SERGAS nestes centros que a Xunta vai construír co novo sistema PFI e cal será o modelo de xestión alternativo para estes servizos.
O BNG chama a reivindicar a sanidade pública
Ante esta privatización dos servizos públicos sanitarios por parte do Goberno do PP, o BNG fai un chamamento á cidadanía a reivindicar o dereito a unha sanidade que teña como obxectivo a mellora da saúde por riba dos intereses económicos.
Xoves, 6 de maio de 2010
65 usuarios do Baixo Miño beneficiáronse do programa de teleasistencia domiciliaria en 2009
A Deputación de Pontevedra reunida en Xunta de Goberno aprobou un ano máis un convenio de colaboración co IMSERSO (Instituto de Maiores e Servizos Sociais) para poñer en marcha o Programa de Teleasistencia Domiciliaria 2010, destinado a ofrecer atención no domicilio 24 horas ó día os 365 días do ano a maiores, enfermos ou persoas con algún tipo de discapacidade. Esta actividade organízase cada ano dende 1999 gracias a un convenio de colaboración entre a Xunta de Galicia (a través do IMSERSO) e a Deputación provincial de Pontevedra.
Segundo o informe redactado pola entidade provincial, o pasado ano 2009 o programa asistiu, na comarca do Baixo Miño a 65 usuarios, dos que 39 foron de Tui, 18 de Tomiño, 6 houbo en Oia e A Guarda e O Rosal tiveron un único usuario en cada un destes concellos.
O programa de Teleasistencia Domiciliaria
A Teleasistencia Domiciliaria é un servizo que, durante as 24 horas do día e ó longo dos 365 días do ano, a través da liña telefónica e cun equipamento informático situado no centro de atención e no domicilio do usuario, permite a maiores, enfermos ou persoas con algún tipo de discapacidade, entrar en contacto cos operadores do centro de atención mediante o simple mecanismo de pulsar un botón dun dispositivo (medallón ou pulseira). Así, profesionais capacitados daranlle resposta á crise presentada ou mobilizarán recursos humanos ou materiais.
Son susceptibles de seren usuarios deste servizo as persoas que viven soas, que conviven con outra de máis de 65 anos, que padecen enfermidades, ou calquera persoa en situación de risco.
Mércores, 5 de maio de 2010
O paro subiu no Baixo Miño en abril en 21 persoas ata o 5.352 desempregados
O número de desempregados na comarca do Baixo Miño incrementouse o pasado mes de abril en 21 persoas ata chegar aos 5.352 parados. Con esta suba a comarca non segue a tónica experimentada a nivel estatal onde se produciu un descenso do 0,6%, mentres que en Galicia a baixada foi dun 1,07%.
Por concellos o paro subiu en Tui en 13 persoas, en Tomiño hai 36 novos desempregados, e hai 5 parados máis en Oia. Por conta na Guarda baixou o número de desempregados en 28 persoas, e en 5 fíxoo no Rosal.
Por sexos na comarca hai 2.534 homes e 2.818 mulleres sen traballo. Do total de 5.352 desempregados 690 teñen menos de 25 anos.
Por sectores no Baixo Miño o paro baixou na agricultura en sete persoas ata os 355 desempregados, na construción descendeu en 27 persoas ata os 981 parados, do mesmo xeito baixou nó sector servizos en 3 persoas ata os 2.409 parados. Por contra o número de desempregados subiu na industria en 41 persoas ata os 1.036 parados, e tamén subiu no colectivo sen emprego anterior en 17 persoas ata ás 571 sen traballo.
Xoves, 29 de abril de 2010
A Deputada popular Marta Valcárcel salienta a aposta da Xunta polo Baixo Miño
Marta Valcárcel, deputado do PP no Parlamento de Galicia, facía o pasado venres un balance do primeiro ano de goberno popular e das súa repercusións na comarca do Baixo Miño. Así o expuña nun acto celebrado na sede popular. Previamente facía un resumo do mesmo na Radio Municipal de Tui.
Marta Valcárcel sinalaba que cando o PP chegou á Xunta hai un ano atopouse unha forte crise económica con case 50 mil parados máis e cuns orzamentos irreais feitos polo bipartito que contiñan un buraco de 1.200 millóns de euros. Con respecto á comarca dicía que neste primeiro ano a Xunta popular apostou claramente, no seu parecer, polo Baixo Miño, coa posta en marcha de proxectos vitais para a comarca que estiveran paralizados na anterior etapa do goberno do PSOE-BNG coma a posta en marcha da EDAR de Guillarei e a VAC Tui-A Guarda.
Dicía que neste primeiro ano de goberno a Xunta destinou case 60 millóns de euros á comarca, dos que o 60% foron mediante investimentos directos a través da Consellería de Medio Ambiente, Territorio e Infraestruturas.
Por outra parte salientou as axudas destinadas pola Consellería de Industria con 900 mil euros a través de distintos plans; 1,3 millóns do IGAPE para as empresas, e os 3,5 millóns de Presidencia, e 500 mil euros da Consellería de Medio Rural, todo isto dicía son feitos que deixan ver o compromiso real da Xunta co Baixo Miño.
Xoves, 23 de abril de 2010
A Mostra de Teatro non Profesional do Baixo Miño bota andar con tres representacións teatrais
Hoxe comeza a Mostra de teatro non profesional do Baixo Miño, organizada pola Asociación Cultural Feixó de Araúxo, coa colaboración da Xunta de Galicia, e os concellos da Guarda, O Rosal e Tomiño.
A Sección Escaparate, que inaugura hoxe este ciclo, ofrecerá obras presentadas por grupos, fóra de concurso. Ás 18.00 horas no Auditorio do IES A Sangriña subirán ao escenario os actores da Escola Municipal de Teatro da Guarda que representarán “Catalina Zucco”; ás 20.00 horas, no Auditorio Municipal do Rosal, será a oportunidade de Teatro Tarumba, de Ourense, escenificando “Don Juan”, e pechará a xornada de hoxe, ás 22.00 horas, no Auditorio Municipal de Goián, a Asociación Teatral Paso de Valverde, da Coruña, que representa “Drammático”, espectáculo para mayores de 14 anos.
Martes, 20 de abril de 2010
Agustín Hernández anuncia que o tramo da VAP do Baixo Miño ata o enlace da ponte de Goián será autovía dende o primeiro momento
O conselleiro de Medio Ambiente, Territorio e Infraestruturas, Agustín Hernández, destacou onte que a Xunta de Galicia está a cumprir os compromisos asumidos coa Vía de Altas Prestacións Tui- A Guarda, que actualmente, ten os treitos I e III en fase de obras, e, ao mesmo tempo, retomou a alternativa sur para o trazado do segundo treito, enlace PO-350 (Areas-Tomiño)–enlace de Goián.
Hernández sinalou que a alternativa para o tramo dous desta infraestrutura implica unha menor ocupación do territorio, menor impacto ambiental e mellores prestacións para os usuarios. Recordou que dende mediados de marzo o proxecto de trazado da alternativa sur, e a súa comparativa coa alternativa norte, está sometido á información pública, polo que nos próximos días a Xunta disporá das alegacións realizadas, que pasará a analizar e estudar, pra dar continuidade á tramitación.
Hernández
visitou onte á tarde tarde as obras que se están a realizar no tramo I, Tui
(enlace A-55)-Tomiño (enlace PO-350) e o treito III, enlace de Goián- enlace A
Guarda, asegurando que a Xunta rematará en 2013 estes
dous tramos e porá en servizo a totalidade da vía en 2015. O conselleiro dixo
que a actual Xunta non é responsable do que fixo o bipartito con esta vía de
alta capacidade, paralizando durante catro anos o tramo intermedio. “É incrible
que quen non foi capaz de resolver un trazado en catro anos, agora pida
explicacións”, afirmou.
o conselleiro avanzou que o tramo da VAP do Baixo Miño ata o enlace da ponte de Goián será autovía dende o primeiro momento, e solicitou a colaboración dos concellos para acadar o mellor trazado.
A VAC Tui-A Guarda está recollida dentro do Plan MOVE (Plan de Mobilidade e Ordenación Viaria Estratéxica), cun orzamento que supera os 200 millóns de euros e ten unha lonxitude de 24,5 quilómetros. Esta infraestrutura constituirá unha vía imprescindible para dar saída comercial as empresas emprazadas nos polígonos industriais dos concellos beneficiarios, xa que suporá unha mellor conexión coa Meseta e con Portugal. Potenciará ademais as comunicacións e o desenvolvemento da comarca, propiciará máis industria e a creación de novos postos de traballo, ademais de favorecer o transporte, mellorar a seguridade vial e aumentar a calidade de vida dos cidadáns. Ao remate das obras da VAC Tui-A Guarda, esta infraestrutura ofrecerá un servizo alternativo e mais seguro ao actual ramal da estrada A Guarda-Tui (PO-552).
Treito I
As obras de construción do tramo Tui-Tomiño contan cun presuposto de 48,7 millóns de euros. A empresa encargada de levar a cabo as obras deste primeiro tramo é UTE Acciona Infraestruturas, S.A - Copasa. Os traballos de execución xa están iniciados cos primeiros movementos de terras, así como os labores de despexe e desbroce das superficies afectadas polas obras.
Este treito ten a súa orixe no enlace de Tui sobre a autovía Vigo-Portugal (AG-55) e o remate no enlace coa estrada autonómica Areas-Tomiño (PO-350), polo que ten unha lonxitude de 3.900 metros.
No proxecto deste ramal especifícase a ubicación de tres enlaces: no enlace coa autovía A-55 en Tui, deseñarase unha glorieta en estrutura sobre a autovía; o enlace coa estrada Forcadela-Areas (PO-552), para o que se modificará a intersección actual coa vía dispoñendo unha glorieta de 25 metros de radio; e o enlace coa estrada Tui-Tomiño, para o cal se proxectan dúas glorietas a ambas marxes do tronco da estrada unidas por un ramal bidireccional para permitir todos os movementos de entrada e saída ao viario en proxecto.
Treito III
O tramo Goián-A Guarda ten unha lonxitude de 10,15 quilómetros. As obras foron adxudicadas en xaneiro deste ano á UTE FFC-Atlántica, cun prazo de execución de 23 meses. Implica un orzamento de 57,9 millóns de euros.
Na actualidade as obras céntrase no movemento de terras. O proxecto define a materialización de catro enlaces: Goián, Rosal, A Guarda este e un cuarto enlace na glorieta ubicada á altura do pk 9+300. Tamén será necesario construír dous falsos túneles, un viaduto e 8 pasos (5 superiores e 3 inferiores).
Treito II
En canto ao tramo II (Tomiño-Goián), o trazado da opción sur recupera a alternativa de 2005 que xa conta con declaración de impacto ambiental. Desenvólvese polo concello de Tomiño, tendo a súa orixe no enlace coa PO-350. Esta alternativa discurre ao longo de 10 km ata o pq 14+300, onde enlaza co tramo 3 da VAC na glorieta de Goián.
A comparativa entre ambas alternativas conclúe que a sur é a mais favorable, xa que presenta unha serie de vantaxes en canto a capacidade de tráfico, parámetros medioambientais ou rentabilidade para os usuarios.
No que respecta ao planeamento, as dúas alternativas discorren na súa totalidade dentro do termo municipal de Tomiño, concello regulado polo PXOM. Non obstante, resulta desfavorable a opción norte pola súa maior afección a solo rústico de protección ecolóxica e de zonas agrícolas. A vía descartada afecta a 400.000 m2 de solo rústico protexido fronte aos 175.000 m2 da opción sur. Así, en cifras totais, a alternativa norte incide sobre 930.000 m2 e a sur afecta a 730.000 m2, 200.000 m2 menos. Por outra parte, cabe citar que na alternativa norte, vense afectadas diversas edificacións no entorno do enlace coa PO-344 (Forcadela- Couso).
En referencia ao tráfico, a alternativa sur é máis vantaxosa en canto á capacidade, presentando niveis sensiblemente mellores aos da norte. Este feito provocará que a opción norte presente mais problemas de tráfico. Así, en planta, ambos trazados son semellantes, ainda que a circulación pola alternativa sur resultará máis cómoda por contemplar parámetros máis uniformes. En alzado, a sur mostra un deseño mellor, xa que as pendentes máximas son do 3% fronte ao 5% da norte. Ademais, a permeabiliade transversal da alternativa sur é máis beneficiosa, xa que repón de forma directa case o 50% dos camiños interceptados pola traza fronte ao 30% da outra opción.
Medio Ambiente
En relación aos aspectos medioambientais, a alternativa sur é claramente preferible á norte, especialmente na incidencia sobre as augas continentais e na permeabilidade faunística, onde a opción norte é manifestamente deficitaria.
A Xunta de Galicia tamén considerou como puntos en contra da opción norte a incidencia directa desta sobre o xacemento arqueolóxico de O Castelo, discurrindo ao longo da súa área de cautela case 500 metros. Tamén afecta á área de protección integral do xacemento arqueolóxico das Torres, desenvolvéndose ao longo de preto de 500 metros no seu interior.
Investimento
A alternativa sur supón unha importante vantaxe en canto á rentabilidade das obras de cara aos usuarios, xa que presentan valores sensiblemente mellores aos da norte, entre eles un trazado mais curto para facer o mesmo percorrido. Non obstante, é preciso explicar que o custe económico da alternativa sur é un 22% máis elevado (102 millóns de euros fronte a 80) porque o orzamento está condicionado polos viadutos dispostos no LIC Baixo Miño co fin de acadar melloras medioambientais. Estas infraestruturas, que conlevan á consecución de vantaxes, supoñen máis do 51% do presuposto total da alternativa.
Mércores, 14 de abril de 2010
36 obras se presentaron a la Mostra de Teatro non profesional do Miño que se celebrará del 23 al 25 de abril
Organizado pola Asociación Cultural Feixó de Araúxo, en colaboración coa Xunta de Galicia, do 23 ao 25 de abril terá lugar a Mostra de Teatro non Profesional do Miño, na que se dan cita compañías teatrais chegadas de toda Galicia e Portugal.
Nesta cuarta edición ponse unha vez máis de manifesto a importancia do teatro afeccionado en ambas beiras do Miño como demostra o feito de que se presentasen a concurso un total de 36 obras (26 galegas e 10 portuguesas). De entre todas elas, o xurado da Mostra seleccionará seis pezas que serán exhibidas os días 23, 24 e 25 de abril.
Unha importante novidade desta edición é a incorporación do concello do Rosal a este evento do que xa forman parte A Guarda e Tomiño. Deste xeito, a Mostra de Teatro desenvolverase conxuntamente nas vilas da Guarda, O Rosal e Goián (Tomiño) sendo representadas dúas obras en cada unha delas.
Tendo en conta estas características, a Mostra de Teatro do Miño converteuse nun dos poucos eventos culturais de Galicia, que teñen a peculiaridade de organizarse ao mesmo tempo en tres municipios diferentes, sendo un bo exemplo de colaboración entre diferentes institucións públicas.
Martes, 13 de abril de 2010
O BNG demándalle ao goberno que o baleirado do encoro de San Estevo se realice despois do 30 de maio, para que non afecte á tempada de pesca no Miño
A deputada do BNG, Olaia Fernández Davila, vén de presentar unha iniciativa no Congreso dos Deputados na que lle demanda ao Goberno que adíe a data autorizada para o baleirado do encoro de San Estevo por parte de Iberdrola até despois do 30 de maio, para que non coincida coa temporada de pesca.
Davila lembra que o baleirado do encoro, previsto para o 19 de abril, “suporá a liberación dunha gran cantidade de auga e de lodo que afectará negativamente á fauna pesqueira do río Miño e ao colectivo de pescadores”.
Neste sentido, a deputada nacionalista e o responsábel comarcal do BNG, despois de escoitar aos representantes da Comisión de Pescadores do Miño, defenden que “sería necesario ter en conta a temporada de pesca profesional no río, que é fundamentalmente dende o 1 de novembro até o 30 de maio, polo que actuacións como as previstas para o día 19 de abril seguramente se poderían acometer en datas posteriores a fin de non afectar tan negativamente a un sector que, nas ribeiras do Miño, é unha importante fonte económica, sobre todo en tempos de crise como o actual”.
Ademais, e con carácter xeral a deputada nacionalista denuncia “a gran afectación que sobre a pesca fluvial teñen os encoros, que ademais, periodicamente abren as súas comportas elevando o cauce da auga e provocando a morte de milleiros de alevíns como consecuencia dos bruscos cambios do nivel de auga”.
Ante esta situación, Olaia Fernández Davila pregúntalle ao Goberno se non considera posíbel un cambio de data para o baleirado para despois do 30 de maio, e que se valoren os intereses xerais do río tanto dende o punto de vista medioambiental como da pesca.
Ademais, pregúntalle se en relación co funcionamento xeral dos embalses hidroeléctricos que periodicamente abren as súas comportas, non considera o Goberno que sería necesaria unha regulación que permitise reducir a afectación medioambiental nos ríos.