Música Coral nas Festas do Monte

seguinte

         O auditorio ao aire libre de San Bieito recibiu, o venres, 7 de agosto, o II Encontro de Música Coral nas Festas do Monte, organizado pola Agrupación Coral Polifónica da Guarda, que este ano cumpre as bodas de Prata.

          Presentou o 'encontro' Diana Español e participaron a Coral do Centro Artístico Sportivo de Ponteareas, dirixida por Ángel Viro; a Coral do Val do Avia de Leiro, baixo a dirección de Celso Domínguez, e a anfitriona, a Agrupación Coral Polifónica da Guarda, dirixida por Marisilda Sánchez Lomba.

         Antes de que as tres corais subisen ao escenario para interpretar xuntas entre outras composicións o Himno á Guarda, a Agrupación Coral da Guarda lembrando os seus comezos pediu que subise ao escenario José Marino González, (Santeiro) o primeiro director desta formación ao que lle entregou a Placa dos 25 anos. Por impedimentos laborais, non puido estar presente a segunda directora que tivo esta formación, Araceli, para recoller outra placa de Aniversario.

           Pola súa banda o alcalde da Guarda, José Manuel Domínguez Freitas, en nome do concello da Guarda, e en recoñecemento ao labor dos 25 anos da Agrupación Coral Polifónica da Guarda, entregoulle a esta formación musical unha placa animándoa a continuar cultivando o canto e levando o nome da localidade alí a onde van coas súas voces.

           Entre o público asistente tamén se atopaba o presidente da Federación Coral Galega que foi convidado asemade a subir ao escenario.

seguinte