XXIII Certamen de Poesía Feliciano Rolán A Guarda, 5 agosto 2009 Organizado pola Agrupación Cultural Guardesa, o Centro Cultural da Guarda volveu ser o escenario no que se entregaron os premios de Poesía do Certame Feliciano Rolán, convocado pola Agrupación Cultural Guardesa que acada neste ano a vixésimo terceira edición. Ao acto, ademais da presidenta do colectivo organizador, Julia Sobrino González, e directivos, asistiron o alcalde da Guarda, José Manuel Domínguez Freitas, e o concelleiro de Cultura, Antonio Lomba Baz, e o concelleiro do BNG, Xan Lois Lomba Alonso. Tamén estiveron presentes os poetas galardonados que recitaron cadanseu poema. Presentou o acto de entrega de premios Manuel Santos que fixo unha semblanza biográfica do poeta que dá nome ao Certame. A secretaria da Agrupación Cultural Guardesa, Soledad Amil, leu un fragmento dun dos poemas de Feliciano Rolán e, de seguido, foi a pianista María Alonso quen ofreceu un miniconcerto. Julia Sobrino subiu ao escenario para agradecer a presenza das autoriades, público e poetas galardonados na entrega dos premios. E deixou despois o protagonismo aos poetas, subindo en primeiro lugar ao estrado Isaura Lago Álvarez, que acadou o áccesit otorgado polo xurado polo seu poema "Sueños". Rosa Martínez Vilas, autora de "A vacaloura dos meus soños", co que obtivo o terceiro premio, foi a seguinte en ler o seu poema, facéndoo a continuación Cruz Martínez Vilas, autora de "Se cadra son pequena de máis", co que obtivo o segundo premio do certame. Pechou a quenda de recitacións o autor do poema gañador do primeiro premio, Xermán Torres, autor de "De Profundis". A Agrupación Cultural Guardesa afasallou cun ramo de flores aos membros que formaron parte do Xurado e o concelleiro de Cultura, en nome da Comisión de Festas, un recordo alusivo ás Festas 2009 a María Alonso e á Julia Sobrino. Tamén foron directivos da Agrupación Cultural Guardesa quen entregaron os premios aos poetas galardoados. Julia Sobrino delegou a entrega do primeiro premio no alcalde, José Manuel Domínguez Freitas que, a súa vez quixo que o entregase Adolfo Rolán, sobriño do poeta recordado neste certame, e que se encontraba entre o público.
|
||||||
