Fotografía, probablemente, de finais dos anos 70 mediados dos 80 (de pepemc)

LETRAS GALEGAS NO ANO 1981

Por Agustín Ferreira Lorenzo

        No ano 1981, a Agrupación Cultural Guardesa, dedicaba o seu Día das Letras Galegas a un dos mestres máis recordados e queridos da Guarda: D. Manuel Rodríguez Sinde. A homenaxe tivo lugar nas escolas que levan o seu nome, concretamente, diante do busto que alí había. Actualmente este busto atópase no novo Colexio, pasando da rúa Puerto Rico, á de Manuel Álvarez. A colocación do mesmo no seu primeiro lugar foi no ano 1969 e debeuse ao agradecemento dos que foran os seus alumnos. No ano 2004, o monumento foi retirado da súa inicial ubicación para ser trasladado ao novo centro escolar, que segue levando o nome do mestre.

        Manuel Rodríguez Sinde, exerceu o maxisterio na vila guardesa dende mediados dos anos noventa do século XIX ata o primeiro cuarto de século do XX. Moitas foron as xeracións e moitos os alumnos que pasaron pola súa aula. O seu grande labor no ensino, a súa disposición para preparar, mesmo gratuitamente, a moitos nenos, fixo que, aínda non sendo un escritor pero si un impulsor do coñecemento que contribuiu decisivamente na preparación das antigas xeracións, a ACG, en recoñecemento dese labor, decidise homenaxear no Día das Letras Galegas a este ilustre mestre.

Juan Noya Gil, histórico republicano guardés, alumno de D. Manuel Rodríguez Sinde, acudiu a esta homenaxe, dedicando unhas palabras de recordo do que fora o seu mestre

Á homenaxe asistiu un pequeno grupo de persoas que coa súa presenza apoiou o acto. Entre estas persoas, algunhas de certa idade que coñeceron e mesmo asistiron ás clases do homenaxeado

Os membros da A.C.G., o poeta Koki e o coñecido poteiro, Victoriano da Saladina, foron os encargados de colocar a coroa no busto dedicado a tan ilustre e querido persoeiro

Dous mozos asistentes ao acto, portando a bandeira galega mentres era interpretado o Himno de Galicia

Momento no que o párroco da Guarda, dirixe, como era tradicional neste día, un responso pola alma do ilustre homenaxeado, mentres o público asistente escoita con atención o mesmo

Damos por rematada esta serie de catro capítulos dedicadas aos catro primeiros anos (1980, 1981, 1982 e 1983) da celebración do Día das Letras Galegas na Guarda. Actos que estiveron desenvolvidos pola Agrupación Cultural Guardesa, entidade da que o autor destes artigos formou parte entre os anos 1982 a 1985

Letras Galegas no ano 1981

Por Victoriano Rodríguez Glez

Xoan Noia Xil dirixindo unhas palabras ante o monumento de Rodríguez Sinde, a quen ese ano a Agrupación Democrática Guardesa, lle adicara o Día das Letras Galegas, como destacado personaxe local.

Letras Galegas no ano 1980

Por Agustín Ferreira Lorenzo

agfelo@terra.es

Tal vez un dos primeiros actos culturais organizados pola Agrupación Cultural Guardesa, senón o primeiro, fose a celebración do Día das Letras Galegas do ano 1980. Nese ano, esta asociación cultural da Guarda aínda non estaba constituída formalmente, faríao dous anos despois. Os seus integrantes eran xentes de esquerda, activos e de moi variadas profesións, a maioría vinculados directa ou indirectamente a partidos políticos coma o PC ou PSOE e cunha grande ilusión en relanzar a cultura na localidade, un tanto esquecida ata entón.

Pois ben, no citado ano de 1980, con motivo da celebración do referido Día das Letras Galegas, a ACG decidiu dedicarlle unha homenaxe a un dos maiores poetas que tivo A Guarda: Feliciano Rolán. Así deu comezo a celebración duns actos que xa duran 31 anos ininterrompidos, buscando cada ano un personaxe relacionado co mundo das letras (en galego ou en castelán).

Como lembranza daqueles actos, traemos hoxe algunhas das fotografías que obtivemos durante o desenvolvemento dos mesmos.

Nesta foto vemos a Ricardo Rodríguez Vicente no momento de dedicar unhas palabras en torno á figura de Feliciano Rolán, acompañado doutros membros da Agrupación Cultural Guardesa, entre eles o poeta Koki e Eloi Gómez Mariño, ademais doutras persoas que arrouparon este sinxelo acto coa súa presenza

O párroco da Guarda rezando un responso en memoria de Feliciano Rolán

O poeta guardés Koki, afincado na actualidade en Nova York, no momento de colocar unha coroa no busto dedicado a Feliciano Rolán, no xardín que levan o nome deste poeta, na denominada popularmente “Estación do Norte”.

Logo da coroa de flores, coa lenda “A Garda non te esquece”, colocouse a bandeira galega coma homenaxe deste día dedicado a lembrar a aquela xente que fixo grande a cultura de Galicia.