galiciasuroeste

Ignacio Lomba leva 24 anos no mundo dos libros. No ano 1983 abriu, na rúa Concepción Arenal a Librería Atlántica, hoxe unha referencia na Guarda no sector. Co gallo de celebrarse neste 23 de abril o Día do Libro achegámonos a este establecimento para coñecer un pouco máis de como se move a lectura na localidade.

¿Como foi evolucionando neste case cuarto de século que levas xestionando a librería a venda de libros?

No tempo que levo como libreiro, se nos referimos estrictamente á venda de libros, e exceptuando os escolares, dase un descenso, quizais debido, por unha banda, á oferta que hai de coleccionables; tamén poden influír as novas tecnoloxías, como Internet, que restan tempo á lectura, pero tamén se ofertan novos formatos de lectura, por dicir dalgunha forma, baseados nesas novas tecnoloxías.

¿Hai exceso de oferta?

Cada vez estanse publicando máis títulos e o que chega ao mercado non é absorbido pola xente; ou sexa, publícase máis da conta e podemos dicir que de cada cen títulos que saen, en realidade o que se vende é un cinco por cento.

Nestes momentos ¿qué pide o lector?

Nestes intres aos lectores impórtalles a novela histórica baseada nos primeiros anos do cristianismo, pero tamén están en auxe os libros que tratan da saúde e da medicina.

Se nos trasladamos ao ámbito escolar, ¿é importante a adquisición de libros recomendados polos centros educativos para unha librería?

O que lle chaman os profesores lecturas prescritivas para as librerías é, ata certo punto, un balón de osíxeno pois grazas a iso podemos tirar o ano e contribúe tamén a ofertar outro tipo de libros.

Desde a túa opinión ¿este tipo de lecturas contribúe a facer lectores para o día de mañá?

En primeiro lugar non creo que o lector naza, o lector vaise facendo, de modo que algo pode repercutir en crear hábitos lectores, pero, fundamentalmente, penso que o lector faise no ámbito familiar; ou sexa: se ve que os pais len, el acabará lendo tamén. Neste sentido imaxínate que un pai se achegase á librería cun fillo pequeno, dous anos, e que ademais non lle custa nada, ensínalle os libros, sen comprar ningún, simplemente mostrándollo e o van olleando os dous xuntos, pois estaremos creando novos lectores para o día de mañá.

¿Coidas que a xente segue sendo reticente para entrar na librería e se conforma co que se ofrece no escaparate?

Imos ver. O escaparate axuda, loxicamente, a vender, e a medida que os vas cambiando, a xente observa que tes novidades e que tes surtido. O escaparate vende, e a xente entra e a veces compra o que ve no escaparate. Pero seguen a ser reticentes a entrar nunha librería só para observar qué títulos poden ofertarse no interior pois creo que consideran que polo feito de entrar xa están obrigados a mercar un libro. Contrariamente, á xente que vén de visita no verán ou nas pontes, está máis habituada a entrar e ver que é o que hai, e despois comprará ou non, e non pasa nada, porque non están obrigados a facelo só polo feito de entrar.

¿Que media de libros poden saír mensualmente dos andeis da Librería Atlántica?

Home, depende. Hai meses, como no verán, que podes vender máis libros; pero ben, se facemos unha media, pódense vender sobre setecentos libros ao mes, libros, non títulos.

¿Solicítanse máis libros en castelá ou prefírese a lectura en galego?

Máis en cstelán, pero tamén a oferta é maís ampla; de todos modos, a xente le máis en castelá.

Días como o de hoxe, 23 de abril, que é o Día do Libro, ou o que se vai celebrar o 17 de maio, co gallo do Día das Letras Galegas, ¿contribúen á achegarse máis aos libros?

Coido que non. Quitando aqueles que xa están relacionados cos libros, como pode ser algún profesor ou un lector que xa o é e que mercan un libro para agasallar neste día, non teñen outra repercusión, cando menos nas librerías. ¿Vendas que podemos facer nestes días, e que nós ampliamos ata finais de abril? Poden ser un un por cento.

Na época de maior afluenza turística, como pode ser o verán ou esas pontes longas, ¿obsérvase un incremento no despacho de libros?

Si, pero na Guarda quizais menos que noutros lugares como Sanxenxo ou Baiona, segundo me comentan os distribuidores. Logo hai que sinalar que os visitantes á Guarda non soen pedir un título concreto. Miran o que hai, é compran se lles interesa o título co que se atopan no andel ou na exposición; salvo excepcións, non preguntan por títulos.

E para rematar, Ignacio, ¿como celebra a Librería Atlántica o Día do Libro?

Pois como todos estes anos atrás: facendo un dez por cento de desconto na venda de libros que prolongamos durante uns quince días.

Abril, 2007