Iván Alonso Lage gañou o Cuadriatlón en individuais e Adolfo Monteagudo e Nicolás Domínguez en parellas

O tudense Iván Alonso Lage, membro do Club Kaiak Tudense, fíxose coa vitoria en individuais no V Cuadriatlón Cidade de Tui Gran Premio Orange disputado o pasado sábado en Tui. Iván Alonso fixo un tempo de 1h 38minutos 16 segundos. Tan so tres segundos despois chegaba o segundo clasificado, o coruñés Adolfo Monteagudo Leal, gañador da proba en 2007, e que nesta edición acusou o cansanzo de ter competido pola mañá en parellas. O terceiro posto foi para Rubén Caamaño Nieto de Noia cun tempo de 1h 40 minutos 43 segundos.

    A competición entre Iván Alonso e Adolfo Monteagudo estivo moi igualada, facendo valer o tudense en piragua o seu poderío tal coma acreditan os numerosos títulos que posúe.

    En parellas a vitoria, coma diciamos foi para Adolfo Monteagudo que competiu xunto a Nicolás Domínguez García, xuntos fixeron un tempo de 1 h 32 minutos 26 segundo, case dous minutos por riba da segunda parella clasificada que foi a de Benito Santana e Rubén Queiruga, da Coruña e Cambre respectivamente. Foron terceiros con 1h 36 minutos e 12 segundo Roberto Pazos de Vigo e José Comesaña do Porriño.

    Os máis de 180 deportistas que participaron na competición, 72 deles na modalidade de individuais, tiveron que enfrontarse a 700 metros a nado, 18 km en bicicleta, 3 km en piragua e 7 km de carreira a pé. Pola mañá disputouse a competición en parellas e pola tarde en individuais. No entorno da proba, sobre todo no Paseo Fluvial onde estaba a liña de boxes e por tanto a transición entre cada disciplina citouse un gran número de público que seguiu con expectación o desenvolvemento do Cuadriatlón, disfrutando da súa espectacularidade. A organización correu a cargo da Asociación de Monitores de Tempo Libre “Vagalume” que se amosa moi satisfeita tanto da participación, superando a cifra de 2007, coma da excelente resposta do público