Día 25 de xullo, Día da Patria Galega. A Guarda
acolleu, un ano máis, o Encontro dos Pobos, unha idea que xorde do grupo Do
Lusco ó Fusco, dirixido por Julia Sobrino, que acada a décimo quinta
edición. Quince anos traendo á Guarda outros bailes, outras cores, outros
ritmos; outras culturas nun enriquecemento mutuo para os participantes, pero
tamén para o público, guardés e visitantes estivais, que se dan cita no
auditorio ao aire libre de San Bieito.
Desde Rumanía, chegou o grupo Doina, devolvendo a
visita que en novembro fixera o grupo guardés a aquel país. E desde Yébenes,
en Toledo, fíxoo o grupo Virgen de Finisbuterre. Pendente queda a devolución
de visita que realizarán os da Guarda a aquela localidade toledana.
O día gris, chuvento. A xornada iniciouse no Monte
Santa Trega cunha visita ao poboado galaico romano, á ermida e ao museo, na
compaña dun monitor de ANABAM que serviu de guía nesta viaxe imaxinaria polo
pasado, as lendas e as tradicións. A climatoloxía non permitiu sacar todo o
proveito que ofrece o Monte, pero aínda así os colectivos que rumanos e
toledanos, coñeceron o fundamental de Santa Trega, aínda que tamén se
perderon, pola nubosidade, as expcionais vistas posibles desde o Facho ou o
pico de San Francisco.
Á tardiña, incertidume: ¿pavillón cuberto do IES A
Sangriña ou arriscarse e realizar o Encontro no auditorio de San Bieito?.
Decidiuse por esta última opción, e ás nove, como estaba previsto, os
distintos grupos saíron da Alameda en dirección ao auditorio pola rúa
Galicia e Concepción Arenal. Abrindo a comitiva as treboadas de Do Lusco ó
Fusco e, precedendo cada grupo, a enseña do Encontro dos Pobos, este ano,
con fondo azul.
