Infraestruturas Tui-A Guarda

seguinte

A conselleira de Política Territorial presentou na Guarda o novo vial Tui-A Guarda

A conselleira de Política Territorial, María José Caride, visitou onte (18/07/2008) A Guarda para presentar o estudo da circunvalación da Guarda, que forma parte da VAC, para evitar o paso de vehículos polo centro da localidade.

A conselleira, que chegou con algo máis de media hora de atraso con respecto ao programa previsto, foi recibida na Praza do Reló con pitos, consignas e apupos por pouco máis de setenta veciños que portaban pancartas, e que se desprazaron desde Tomiño para manifestar o seu rexeitamento aos posibles trazados proxectados para este viario por Tomiño, non permitíndolles o acceso ao interior da Consistorial.

Nalgún momento un grupo destes veciños, no momento en que Caride saía do coche oficial, quixo rodear á conselleira intervindo as forzas de seguridade que impediron que se achegasen a María José Caride. Na Casa do Concello esperaban corporativos locais, á fronte dos cales atopábase o alcalde, José Manuel Domínguez Freitas; representantes socialistas doutros municipios, e cargos públicos como o presidente da Entidade Menor de Camposancos, así como simpatizantes do PSdeG-PSOE.

Antes de reunirse con Domínguez Freitas na Alcaldía, María José Caride acudiu ao Salón de Plenos onde asinou no Libro de Honra do concello e sinalou que o seu departamento tiña proxectos moi interesantes para este municipio. Tras manifestar que hoxe (por onte) comezaba o proceso de información pública da variante da Guarda, que marcará, dixo, un antes e un despois "na vida deste concello porque permitirá liquidar moitos dos problemas de tráfico que hoxe teñen os seus veciños", lamentou "que algunhas destas visitas se poidan ver un pouco distorsionadas por veciños doutros municipios que tamén teñen os seus lexítimos dereitos para estar en desacordo con algunhas das actuacións da Consellería".

Pasou, a continuación, ao despacho da Alcaldía, mentres no exterior da Casa Consistorial seguían manifestando o seu desacordo os tomiñeses.

Un dos membros do equipo da conselleira reuniuse cos concentrados e dialogou con dous dos representantes facéndolles ver que a súa protesta non procedía nesta localidade, ao mesmo tempo que invitaba a que dous membros do colectivo se entrevistarsen con María José Caride.

Rubén Muñoz e Mari Cruz Rivas, tras reunirse coa titular da Consellería de Política Territorial, comunicaron o resultado das conversacións aos concentrados que se retiraron tras o compromiso da Conselleira de enviar un técnico do seu departamento a Tomiño, cuestión que xa anunciara, diría máis tarde a conselleira, á rexedora local na mesma mañá de onte.

Circunvalación á Guarda
Na segunda comparecencia ante os medios de comunicación, e cos paneis dos trazados ás súas costas, María José Caride, acompañada no estrado polo alcalde da Guarda, presentou os estudos informativos da variante desta localidade e os trazados de Tomiño.

Cualificou Caride a alternativa da Guarda como unha infraestrutura para o desenvolvemento futuro desta localidade e que modifica substancialmente calquera proxecto que existía inicialmente, porque o trazado Tui-A Guarda do anterior goberno metía todo o tráfico no centro guardés, que se evitará co novo proxecto que levará os vehículos pesados, e lixeiros que non teñan como destino A Guarda, a tomar a alternativa que evite o centro.

O trazado desta alternativa local "basicamente vai por onde todos os veciños poden entender que pode ir unha variante da Guarda". Agora os guardeses terán, por espazo de dous meses, tempo para coñecer as afectacións que supoñan esta variante, que non afectará a ningunha vivenda, excepto a Casa da Comunidade de Montes de Salcidos, no Torroso.

O investimento desta variante ten un orzamento estimado en 15,5 millóns de euros.

Un proxecto que difire do pensado polo PP
Engadiu a conselleira que fronte á vía rápida Tui-A Guarda, prevista polo goberno anterior do Partido Popular, optouse por un proxecto que permitirá a súa ampliación cando o demande o tráfico: unha autovía entre Goián e Tui que dará resposta ao incremento de tráfico portugués, e un corredor entre Goián e A Guarda.

Asegurou que o proxecto do anterior goberno cambiouse todo, aínda que nalgúns tramos vaia pola mesma traza, pero con características técnicas substancialmente distintas.

Acudindo ás cifras, e tras reiterar que o proxecto do PP non contemplaba a variante da Guarda, sinalou que fronte a un investimento do Partido Popular de 80 millóns de euros, o proxecto que desenvolve a Consellería que preside, ten un investimento previsto de 190 millóns de euros.

Este investimento, sinalou Caride, ten tres obxectivos: integrar a vía ao longo de todo o seu trazado; mellorar a accesibilidade do Baixo Miño desde todos os concellos, e dotala da capacidade suficiente para que tanto agora, como nos próximos anos, se resolva a mobilidade do Baixo Miño.

Entre os tramos que se manteñen sinalou os do Rosal e a saída de Tui. O primeiro porque é imposible pasar por outro lado a pesar dos moitos estudos técnicos feitos, e no caso de Tui, porque hai proxectos empresariais próximos a esta infraestrutura.

Adiantou María José Caride que o tramo do Rosal e o primeiro tramo entre Tui e Areas, licitaranse este mesmo ano, despois de que este último se transforme en autovía co aumento das afectacións.

Tamén dixo, referíndose ao tramo máis polémico, o de Tomiño, que o trazado do goberno anterior xeraba unha barreira artificial á beira do río Miño, e engadiu, noutro momento, que o estudo informativo que se presenta aos tomiñeses ten como premisa, mellorar a integración desa infraestrutura no territorio polo que pasa; en segundo lugar, transformala en autovía; terceiro, mellorar a accesibilidade do concello de Tomiño a esa infraestrutura, que tal como estaba prevista anteriormente obrigaría aos tomiñeses a acceder a ese novo viario, retrocedendo ata Goián, ou desprazándose ata Areas. O novo trazado permite alternativas de incorporación no termo municipal, e ademais construirase unha circunvalación, ou variante de Tomiño, ofrecéndolles aos veciños dous enlaces que poderán utilizar tamén para a mobilidade, única e exclusivamente, dentro do municipio.

Outros compromisos coa Guarda
A conselleira referiuse a outros compromisos "que temos con este concello (da Guarda), que queremos potenciar". Concretamente citou a mellora do vial Baiona-A Guarda, cuxo proxecto está previsto que conclúa pasado o verán, e que incorporará un trazado peonil e para bicicletas, co obxectivo de humanizar máis esta estrada que segue pola costa.

As previsións de investimento para esta mellora, cífranse en 11 millóns de euros.

Outra mellora viaria é a comunicación entre A Guarda e Fornelos, coa construción dunha senda peonil, cun investimento previsto dun millón de euros, e cuxas obras, dixo María José Caride, queren licitar este mesmo ano.

Ábrense agora, como apuntou María José Caride, dous meses para que os colectivos cidadáns, veciños e concellos, coñezan os proxectos da infraestrutura Tui-A Guarda e presenten as súas alegacións con obxecto de que "poidamos mellorar eses proxectos, pero entendendo que estes son os proxectos que, tecnicamente, son viables facer".

Finalmente a conselleira fíxose eco de "novos retos" para esta localidade, transmitidos polo alcalde a María José Caride e dos que deu conta Domínguez Freitas na súa comparecencia diante dos medios de comunicación, como a necesidade de contar cun multiusos para A Guarda, "alcanzando o compromiso da conselleira de facer un anteproxecto para coñecer a valoración de canto custaría esta obra e de como se podería facerlle fronte economicamente entre ambas as institucións".

As pancartas

Chegada da Conselleira recibida con asubíos

Caride asina no Libro de Honor e recibe unha réplica da gamela, embarcación tradicional da Guarda

Concelleiros socialistas, do Partido Popular e do BNG, acudiron á recepción da Conselleira. Entre os presentes atopábase o edil socialista de Tomiño, Santiago Vergara, e o ex concelleiro nacionalista, Lito Oliveira

O alcalde, José M. domínguez Freitas, reuniuse en privado coa conselleira, María José Caride, á que lle trasladou, entre outras necesidades, a urxencia de contar cun centro multiusos

Rubén Muñoz, á esquerda, de fronte, e Mari Cruz Rivas, á dereita, conversan co representante da conselleira quen lles informa que a titula de Política Territorial recibirá a dous representantes dos concentrados fronte ao concello da Guarda

Xornalistas agardando a comparecencia da conselleira que lles informará dos proxectos que se barallan para as comunicacións entre a Guarda e Tui