Miguel Capón de ALT di na presentación da candidatura que aspiran a ser a lista máis votada

Un proxecto serio, honesto e comprometido. Así foi definida o xoves á noite a candidatura de Alternativa Tudense encabezada por Miguel Capón, na presentación da lista que tivo lugar no Hotel Colón que foi seguida por máis de 300 persoas.

Abriu as intervencións a número 4 da lista Patricia Ricón salientado que o apoio con que contan se empeza a notar na rúa e promete un cambio. Explicaba que Alternativa Tudense aposta polo bo funcionamento dos servizos básicos coma a recollida do lixo, a limpeza da cidade, o abastecemento de auga... porque neses momento de crise subliñaba que “non se pode aspirar a grandes proxectos”. Outros temas que figuran no seu programa son mellorar o funcionamento do Concello e reestruturar algunhas concellerías “porque así o esixen as novas necesidades” dicía Patricia Ricón. Remataba amosado o seu convencemento de que “imos gobernar, o único que pode impedírnolo é non romper a inercia” engadindo que “hai ideas novas, gañas de cambiar as cousas, e de movernos” polo que  está convencida de que van gobernar porque dende Alternativa Tudense queren “mirar cara adiante”.

A número 2 da lista  María Beatriz Fernández García indicaba quere que os que estean no Concello traballen por, para e cos cidadáns de Tui.  E denunciaba coma “publicidade enganosa” as promesas feitas hai catro anos porque non están nin comezadas. Avanzaba que o seu partido aposta pola gardería infantil, o centro de día, o aparcamento,  sacar adiante o PECH para o que crearán un consello asesor, e tamén pola creación dun programa de seguimento de expedientes no Concello.

Miguel Capón Rey, Candidato de Alternativa Tudense expuña que a xente que forma a candidatura “é moi capaz, con formación e con futuro en política porque son honestos”. Engadía que “temos unha candidatura non só para gañar as eleccións, aspiramos a ser a lista máis votada”.  Insistía Capón Rey en que a lista que encabeza é unha lista para gobernar porque reúne a un equipo magnífico para pórse ao fronte dos distintos departamentos do Concello.

Entre as prioridades de Alternativa Tudense Miguel Capón sinalaba en primeiro lugar “o día a día” para que o concello estea limpo, ordenado, cos sumidoiros e o servizo de abastecemento de auga en bo funcionamento. Engadía que este próximo mandato terá coma retos rematar o PECH que xa está adxudicado e para o que propoñen a formación dun consello consultivo. O inventario de bens, a realización dun aparcamento soterrado, un padroado de deporte e cultura, e o desenvolvemento do PXOM coa creación dunha xerencia de urbanismo son outros dos retos que poñen por diante.

Remataba Miguel Capón prometendo traballo, xestión, honradez, accesibilidade dos cidadáns ao concello, e igualdade de oportunidades para todos.

A lista está encabezada por Miguel Capón Rey, a nº2 é María Beatriz Fernández García, o nº3 Telmo González Ramos, a cuarta Patricia Ricón Alonso, o quinto José Pena Besada, a sexta Mª José González Pérez, o sétimo Manuel Angel Areal Freitas, o oitavo Isacc Alén Romero, o noveno Manuel Martín Heredero, e a décima Margarita Patricio González. Mentres a candidata á Entidade Local Menor de Pazos de Reis é María Dolores Martínez Fernández.