XXV Aniversario Coro Arpegios Cantabile  

Aplausos. Máis aplausos. E aínda máis aplausos. Así podería resumirse o éxito da convocatoria do Coro Arpegios Cantábile que celebrou, na parroquial de Santa María da Guarda, o Concerto do 25 Aniversario coa presenza de preto de catrocentas persoas que ocuparon a totalidade das bancadas das naves de Santa María e amén do coro. Outras tiveron que seguir o concerto de pé e mesmo desde a entrada do templo parroquial.

            Presentou o acto o párroco da Guarda, Jesús García Villadóniga, lembrando os comezos do coro Arpegios e aos que o fixeron posible. Antes de cada actuación, fixo unha semblanza dos respectivos participantes que foron recibidos polo público, entre os que se atopaban o alcalde da Guarda e as concelleiras de Turismo e Muller, así como unha representaclón da Comisión das Festas do Monte, cos correspondentes aplausos de cortesía, pero que, como dixemos ao comezo, foron de auténtica aprobación logo de cada interpretación.

            Abriu o concerto a Rondalla Antorcha, dirixida por María José Baz, que tamén foi solista neste encontro musical.

            Diego Fernández Rodríguez, pianista, interpretou ao piano “Sacro Monte (Dazas Gitanas)”, de J. Turina. A voz especial chegou nesta ocasión da Mezzo Soprano Miriam Valado Montero, acompañada ao piano por Diego Fernández. Un placer e un honor escoitala para cantos se congregaron neste Aniversario.

            E chegou o turno do Coro Cantabile, baixo a dirección, primeiro, de Lucía Alonso Castro, e nunha segunda parte, dirixido por José Luis Lorenzo Rodríguez, para interpretar “O Danubio Azul”, co acompañamento, á frauta, de Laura González Portela e ao piano, de Lucía Alonso Castro.

            O Concerto de Aniversario do Coro Arpegios Cantábile rematou co “Canto á Guarda”, letra de Chuny Vázquez e música do fundador do coro, José Luis Lorenzo Rodríguez.

            A entrega de agasallos e recordos pechou esta cita musical que serviu de homenaxe a esa etapa que vai de 1986 ao 2011 dun coro que deu, e volve dar, sona á Guarda.

Outra forma de ver a reportaxe: premer na foto

Inauguración

das Festas

do Monte

 

Outras reportaxes

Índice reportaxes 2010

Reportaxes dos lectores

Se desexa incluír unha reportaxe comercial en galiciasuroeste infórmese sen compromiso enviando un correo a:

galiciasuroeste(arroba)gmail (punto)com