Mostra da Camelia do Baixo Miño

(A Gándara, 12 e 13 de marzo)

Celebrada na Finca das Mercedes a V Mostra da Camelia do Baixo Miño

Coa presenza dos alcaldes da Guarda, O Rosal e Tomiño, e concelleiros das corporacións mencionadas, así como directivos, usuarios e técnicos do San Xerome, e público en xeral, o sábado, día 12 de marzo, inaugurouse na finca das Mercedes, onde se forman os xardineiros do Centro Especial de Emprego, dependente do Centro San Xerome, a V Mostra da Camelia do Baixo Miño.

Unha exposición de camelias con distintas variedades, procedentes da Quinta Vilar de Matos, en Portugal, cuxo propietario é un coleccionista e estudoso desta flor, ademais de produtor de novas variedades, algunha cun especial cheiro, coma a Simone Sodrey.

Na entrada da finca recibía aos visitantes unha colección de bonsais do tomiñés Javier González.

Na finca das Mercés os 19 traballadores do San Xerome cultivan ao redor de 40 variedades de camelios, ademais doutras moitas plantas ornamentais. No proxecto, dirixido por dúas monitoras e tres persoas de apoio, tamén colaboran oito voluntarios.

Os traballadores que se forman neste proxecto incorpóranse, uns, ao Centro Especial de Emprego, dependente do San Xerome, e outros á empresa privada, tendo traballado algúns deles en viveiros do Baixo Miño.

Maite Santos, traballadora do viveiro e usuaria do San Xerome, foi a responsable de dar a benvida aos presentes e recordar os inicios do Centro San Xerome. “Houbo unha vez un grupo de persoas da nosa comarca, a finais dos anos 70, empeñadas en loitar polos dereitos das persoas marxinadas”, e para logralo creáronse a Asociación e o Centro San Xerome, aumentando as persoas, os colaboradores e os profesionais que lograron que “pasásemos da época da caridade, de pedir esmola á de esixir os nosos dereitos”.

E así, aos poucos, dixo Maite Santos, “fomos conseguindo pequenas metas coa integración escolar, social e laboral”.

En 1983 construíuse o primeiro invernadoiro no que cultivaban, entre outras plantas, hortalizas, que vendían na Praza de Abastos no establecemento de Hortensia; e flores, cuxa venda realizaban na floristería de Foto París.

En 1990 lograron o primeiro traballo de xardinería fóra do centro: foi na urbanización Los Castaños, e en 1993 xa traballaban nos xardíns do Rosal, ata que deciden crear a empresa de xardinería.

No ano 2000 inician un novo proxecto na finca cedida polo bispado, na Gándara, cultivando, entón, planta de tempada e camelios. O pasado ano conseguiron o mantemento dos xardíns da Guarda, contratanto a empresa a novos traballadores.

Desde fai cinco anos organizan este encontro de dous días na Finca das Mercedes que coñeceu un importante número de visitantes nos dous días que durou a Mostra.

Outra forma de ver a reportaxe: premer na imaxe

Feira de San

Gregorio en Pías

(O Rosal)

 

Outras reportaxes

Índice reportaxes 2010

Reportaxes dos lectores

Se desexa incluír unha reportaxe comercial en galiciasuroeste infórmese sen compromiso enviando un correo a:

galiciasuroeste(arroba)gmail (punto)com