Entrega das medallas de ouro da cidade de Tui a tres congregacións relixiosas

O pasado sábado o Concello de Tui entregou a medalla de ouro da cidade a tres congregacións relixiosas que veñen de cumprir cen anos da súa presenza no municipio. O acto celebrouse no salón de sesións da Casa do Concello presidido polo alcalde, Moisés Rodríguez, e coa presenza de membros da corporación.

A medalla de ouro concedeuse ás Fillas da Caridade de San Vicente de Paula, ás irmás relixiosas de Santa Dorotea e das Franciscanas hospitaleiras da Inmaculada Concepción. O acto contou coa interpretación musical ao piano de Anastasia Papú Chiu.

Tras un repaso a historia destas tres congregacións e dar lectura o acordo pleno tomaba a palabra o alcalde de Tui quen dirixíndose ás homenaxeadas salientaba que coas medallas quérese testemuñar a gratitude pola súa labor, e indicaba que queremos que continúen enriquecendo a cidade coa súa presenza e traballo, dándolle as grazas en nome de todos os tudenses.

Tras a entrega das medallas tomaba a palabra en representación das tres congregacións a representante das fillas da caridade de San Vicente de Paul,  Rosario González Alonso, que é amais tudense.

Comezaba e remataba a súa intervención en galego, aínda que se desculpaba por empregar no resto das súas palabras o castelán polos moitos anos que leva lonxe desta terra. Dicía que para as tres congregacións é unha honra recibir esta medalla de honra, indicando que con esta concesión homenaxeábase a todas as relixiosas que durante máis de cen anos deron o mellor de si dende a fe e o compromiso.

Remataba a súa intervención desexando Construír entre todos e para todos un mundo de respecto, solidariedade e amor.