Feira do Viño do Rosal: presentación

Presentación no Rosal a XIX Feira do Viño que se celebrará do 15 ao 17 de xullo

A Casa Rural Abadía Eiras Restaurante acolleu, o 1 de xullo, a presentación da XIX Feira do Viño que se celebrará no Rosal do 15 ao 17 de xullo.

Presidida polo alcalde, Jesús Fernández Portela, acompañado na mesa por Gumersindo Alonso Gestoso, presidente da Cámara de Comercio de Tui; Ramón Burdeos Quintana, téccnico da Ruta do Viño Rías Baixas; Clara Pousa Ortega, técnica da Oficina Agraria Comarcal, e as concelleiras Charo Tabales Perozo e Ánxeles  Vicente Manzano, o rexedor local deu a benvida aos presentes, adegueiros e medios de comunicación, agradecendo que arroupasen este acto.

Gumersindo Alonso Gestoso, que recordou que leva un ano á fronte da Cámara de Comercio, asegurou que desde esta institución trabállase para achegar a Cámara ás empresas da demarcación, á vez que persegue potenciar a internacionalización desas empresas.

Referiuse ás misións comerciais inversas como un factor que promocionará os nosos produtos no exterior, recordando a presenza mexicana durante a pasada Feira do Viño e que nesta edición terá como invitados a unha delegación brasileira. Neste sentido destacou, Gumersindo Alonso, que Brasil terá dous acontecementos mundiais, que converten a este país nun referente inmediato: os mundiais de fútbol, en 2014, e e as Olimpíadas, en 2016.

Revistas de prestixio no sector vitivinícola, importadores e xornalistas especializados, entre outros membros da delegación brasileira, visitarán a Feira do Viño e distintas zonas da comarca como parte da iniciativa da misión comercial inversa.

Román Burdeos Quintana, representado á Ruta do Viño Rías Baixas, subliñou as excelencias da comarca como atractivo para os visitantes que se achegan á Ruta do Viño, e que ademais das paisaxes, gastronomía, patrimonio e outros recursos, poden visitar as adegas, como unha forma de coñecer as elaboracións que nesta zona se crean.

Clara Pousa Ortega, técnica da Oficina Agraria Comarcal, centrou a súa intervención na convocatoria das 4ª Xornadas Técnicas do Viño do Rosal, que este ano orientará as referencias que aquí se fagan á outra marxe do Miño, xa que nesta edición as Xornadas están dedicadas aos viños portugueses  do Douro, con relatorios que falarán da orixe das denominacións de orixe, de catas e dos viños maduros da Rexión do Douro, entre outras.

Charo Tabales Perozo explicou o apartado cultural da Feira, que terá actuacións musicais coa presenza de distintas charangas como Os Charamujas, Big Bandbaiona, Vaite Xa; exposicións como as que ofrecerá o colectivo Médicos artistas plásticos de Galicia; cerámicas de Leandro Alonso, filatélica organizada polo Grupo Filatélico Val do Rosal, e cadros de aplicación en tea de Susi Vanbeck.

Ángeles Vicente Manzano pechou a quenda de intervencións adiantando a incorporación nas festas do novo Servizo de atención e punto de información turística. Trátase dun grupo de nove voluntarios que resolverán as dúbidas que os visitantes á Feira lles espoñan, así como facilitarán  información dos lugares e valores de interese no municipio.

Feira do Viño

Creouse a Feira do Viño do Rosal en 1993, organizada polo concello e o apoio de distintas consellerías da Xunta de Galicia, co obxectivo de promocionar os sectores vinícolas, lácteos, conserveiros e produtos típicos de horta e flor. Nas súas primeiras edicións realizouse no Pavillón Municipal, coincidindo coa Semana Santa, ata que se considerou mellor opción realizala ao aire libre, cambiando para iso as datas procurando aqueloutras que poidan garantir un mellor tempo atmosférico, trasladándose así ao mes de xullo.

Nesta edición a Feira do Viño será inaugurada, polo conselleiro Alfonso Rueda Valenzuela, o venres día 15 de xullo, nunha xornada con degustación de produtos típicos, concertos de música folk na Praza do Calvario, e outras propostas de lecer, como a actuación da charanga Os Charamujas, a partir das 22 horas.

O sábado, día 16, continuará a degustación de viño e produtos expostos. Pola tarde actuará, a partir das 20.30 horas, a charanga Big Bandbaiona e pola noite haberá un concerto.

O domingo, día 17, estará amenizado, pola tarde, pola charanga Vaite Xa.

A Feira conta cun orzamento de máis de 42.000 euros, que proceden das subvencións de distintas institucións e organismos, e venda de cataviños.

Oito serán as casetas que se instalarán na Praza do Calvario dedicados ao viño; haberá outro de produtos vexetais, ademais das destinados ao Consello Regulador da D.O Rías Baixas e Ruta do Viño.

Nas carpas poderanse degustar distintas elaboracións gastronómicas: polbo, carne ó caldeiro, empanadas, sobremesas caseiras e embutidos, entro outros.

Outra forma de ver a reportaxe: premer na fotografía

Campus de Verán de fútbol (O Rosal)

Índice reportaxes 2010

Reportaxes dos lectores

Se desexa incluír unha reportaxe comercial en galiciasuroeste infórmese sen compromiso enviando un correo a:

galiciasuroeste(arroba)gmail (punto)com