|
Voluntarios na defensa ambiental do río Folón
Reportaxe
Juan Ramón/concello do Rosal
Voluntarios de Cruz
Vermella e alumnos do San Xerome colocaron carteis de
concienciación nos muíños do Folón
O mércores 27
de abril voluntarios de Cruz Vermella procederon á
instalación de carteis de concienciación medioambiental na ribeira fluvial
do río Folón, en Martín (O Rosal), co apoio de alumnos do colexio San Xerome
Emiliani e a colaboración da concellería de Medio Ambiente rosaleira, que
dirixe Charo Tabales Perozo.
Esta é unha das
actividades programadas dentro do proxecto “Moviéndonos por el río”, que
continuará o sábado 30. O seu obxectivo principal é “contribuír á
conservación e recuperación do río Miño e os seus afluentes, a través da
concienciación e a educación ambiental dos cidadáns”.
Segundo
informa Cruz Vermella, para a posta en marcha deste
proxecto, financiado polo “Ministerio de Medio Ambiente y Medio Rural y
Marino”, a través do Programa de Voluntariado en Ríos e coa colaboración da
Confederación Hidrográfica Miño-Sil, creáronse equipos de voluntarios que
realizan accións formativas así como diagnósticos e avaliacións do Miño, que
favorezan e contribúan á conservación do río.
Despois dunha
pequena andaina polos Muíños do Folón, os participantes chegaron ata a
fervenza da Regueira Fonte do Aloque, onde colocaron o último cartel antes
de acometer o vindeiro sábado unha nova xornada de concienciación, xa pola
“carreira ou ringleira” da Cereixeira e a vertente dos Muíños do Picón.
Outra forma de ver a reportaxe: premer na imaxe
|
