Paletada-Laconada de San Amaro

Camposancos (A Guarda)

Camposancos cumpriu a tradición de celebrar con paleta e lacón ao santo patrón, San Amaro

            Máis de duascentas persoas acudiron, o sábado, 14 de xaneiro, á primeira cita gastronómica da comarca do Baixo Miño, a paletada-laconada, organizada pola Comunidade de Montes de Camposancos para honrar a San Amaro, que dá nome a este encontro celebrado no antigo colexio do PP. Xesuítas, que chega á súa décimoquinta edición e que lembra a tradición familiar de compartir mesa os parentes o día do patrón para degustar o xantar típico coas mellores partes do porco como materia prima, reservadas para esta ocasión.

            Camposinos de todas as idades, pero tamén veciños das parroquias próximas, deron conta de 60 kg de lacón, 80 de paleta, 35 de chourizos, 100 de patacas e 200 manoxos de verduras preparados, como vén encargándose desde fai nove anos, polo catering A Pizzicata.  Antes de tan saborosa degustación, na que non faltaron viños brancos e tintos, ademais de refrescos, sobre a mesa probáronse empanadas, empanadillas, embutidos varios e croquetas.

Sobremesas, e café e licores completaron o “mantel”.

            O encontro serviu a moitos para lembrar anécdotas e vivencias; preguntar por “este” ou “aquel” e estreitar lazos de veciñanza.

            Durante a tarde, fría e húmida, a sesión discoteca prolongou a estancia da maioría dos comensais até máis alá das nove da noite, hora na que se presentou o grupo de pandereteiras Xamaraina, baixo a dirección de Elena Baz, que deixaron a súa voz nun animado ambiente de festa. A esas horas os estómagos volvían entrar en calor coa degustación do tradicional caldo servido pola Pizzicata.

            Os comuneiros, unha vez máis, non só cumpriron coa tradición, senón que cumpriron tamén con fartura ao reunir aos fregueses neste encontro no que se conxugan gastronomía e irmandade.

Outra forma de ver a reportaxe: premer na foto

Exposición de Daniel Alonso en Novacaixagalicia

Índice reportaxes 2011

Reportaxes dos lectores

Se desexa incluír unha reportaxe comercial en galiciasuroeste infórmese sen compromiso enviando un correo a:

galiciasuroeste(arroba)gmail (punto)com