O PP logra a maioría absoluta en Tui. Moisés Rodríguez dedica a vitoria a Fernández Rocha

Moisés Rodríguez Pérez será o próximo 11 de xuño o novo alcalde de Tui logo de acadar maioría absoluta nas eleccións celebradas o domingo. O resultado definitivo destes comicios fíxose agardar ata a contabilización da última mesa, unha das de Guillarei, que foi a que lle deu maioría absoluta aos populares con 9 concelleiros.  A segunda forza política é Alternativa Tudense con 3 edís, perdendo un representante con respecto aos resultados acadados hai catro anos por Acción Tudense. O Partido Socialista situouse nestas eleccións coma terceira forza da corporación, con dous concelleiros, aínda que ata o último momento estivo moi preto de acadar os tres, ao subir o número de votos con respecto a hai  anos. O Bloque Nacionalista Galego perdeu votos con respecto aos comicios de 2007 pero aínda así mantén os seus dous representantes. Amais aparece na escena política Converxencia XXI ao lograr 648 votos. Mentres o Partido Galeguista Demócrata non acadou representación ao non ser suficientes para lograr un concelleiro os 324 obtidos.

Nas eleccións celebradas onte compre resaltar a ampla participación acada cun 76%, e nalgunhas mesas coma Pexegueiro acadouse un 83%, mentres que por el contra nunha das do IES San Paio so votaban o 66% dos electores.

A xornada electoral de onte transcorreu con normalidade salvo o incidente de primeira hora ao non haber sobres para a introdución das papeletas en ningunha das 21 mesas electorais de Tui.  O reconto das mesas foi tamén moito máis lento que en anos anteriores, e por exemplo os datos da Entidade Local Menor de Pazos de Reis non se coñecían ata case ás doce da noite. Aquí o novo presidente será Enrique Martínez do Partido Popular.

Victoria dedicada a Fernández Rocha

O domingo á noite no programa especial seguimento da xornada electoral que fixo a Radio Municipal de Tui os seis candidatos valoraron os resultados acadados.

Moisés Rodríguez Pérez, candidato do PP e novo alcalde de Tui a partir do 11 de xuño, quería dedicar a maioría absoluta acadada onte ao actual Alcalde Antonio Fernández Rocha. Salientaba que foi o mellor alcalde que tivo Tui ata o momento e que lle deixa o listón moi alto.

Moisés Rodríguez amosaba o seu agradecemento a todos aqueles que confiaron no PP nestas eleccións. Dicía que agora o importante é facer un equipo sólido e estable. Recoñecía que acadar a maioría absoluta era moi complicado, pero coa campaña que fixeron lograron ese resultado.

Tamén manifestaba o seu respecto por todos os candidatos que se presentaron nestas eleccións, e dicía que pese a ter maioría absoluta e dada a actual situación económica farán unha política de man tendida.

Explicaba que aos militantes e simpatizantes do PP lles pediu o máximo respecto cara ás outras formación, salientando que o que lles levou á vitoria foi a humildade, o traballo serio, limpo, expondo o seu programa. Salientaba que isto é unha vitoria dun equipo que levara Tui polo bo camiño, dicía.

AtT perde un edil,  o PSOE pasa a ser a terceira forza, o BNG baixa e aparece CXXI

Alternativa Tudense perdía o domingo un dos catro concelleiros que tiña Acción Tudense, quedándose con tres representantes. O seu líder Miguel Capón Rey recoñecía que o resultado para el era sorprendente xa que tiña claro que ninguén tería maioría absoluta, e dicía que esta se producía por 100 votos. Onte mesmo felicitaba xa a Moisés Rodríguez.

Pese a baixada de votos experimentada recoñecía que para unha candidatura independente manterse ao longo de tres procesos electorais tamén ten o seu mérito. Dicía que a baixada de votos experimentada pola súa formación pode deberse a distintos factores.

O Partido Socialista lograba no día 2 concelleiros, aínda que estivo moi preto do terceiro ata o último momento. O seu candidato Enrique Cabaleiro manifestaba que estaba medianamente satisfeito pero non contento. Salientaba que coa perda dese terceiro edil pechouse a posibilidade dunha alternancia política en Tui. Destacaba que tiveron unha mellora considerable nos resultados pero non suficiente. Felicitaba ao candidato do PP polo seu triunfo. 

Sinalaba que ao mellorar a base electoral lles permitirá traballará co equipo humano que teñen, e tratar de mellorar para algún día converterse nunha alternativa sólida en Tui.

O Bloque Nacionalista Galego mantivo onte os dous concelleiros con que contaba na corporación pese a perder algo máis de 200 votos. O seu candidato Laureano Alonso amosouse sorprendido por estes resultados porque dicía non entraban en ningún prognóstico os resultados de Tui polo descontento que lles amosou a xente.

Laureano Alonso tampouco agardaba a baixada rexistrada. Dicía que hai que seguir traballando e agardaba que dentro de catro anos a xente lles poida dar unha oportunidade. Felicitaba a Moisés Rodríguez pola súa maioría absoluta, e avanzaba que farán unha oposición o máis seria posible.

Converxencia XXI lograba onte un concelleiro na próxima corporación, o seu candidato, Carlos Vázquez Padín, amosaba a súa satisfacción por este resultado porque dicía que non había precedentes en Tui en que un partido que partía de cero lograse representación, e lles abre perspectivas moi interesantes.

Para Padín é incomprensible os resultado do PP tras 14 anos do que cualificaba dunha xestión nefasta, aínda que respecta os resultados. Avanzaba que farán unha férrea oposición.

Por último José Prada Álvarez, do PGD, que non conseguiu representación, recoñecía que o resultado non era o agardado porque tiñan outro tipo de expectativas.    

Apuntaba José Prada que non agardaba uns resultados así a nivel xeral pero a cidadanía é a que elixe. Felicitaba a Moisés Rodríguez polo seu resultado.