A Asociación Un máis dará acollida aos pais de nenos con trastornos do especto autista

O pasado sábado tivo lugar a inauguración oficial da sede Asociación Un Máis que reúne a pais, nais, familiares e amigos de persoas con trastornos do espectro autista. A sede está situada na rúa Párroco Rodríguez Vázquez nº5. A asociación creouse o ano pasado a raíz das necesidades que un conxunto de familias foron atopando tras o diagnóstico dos seus fillos con trastornos do espectro autista. Na creación deste colectivo tiveron o  apoio de BATA que traballa a nivel profesional con persoas afectadas por TEA.

A Asociación parte inicialmente con cinco familias coma socias fundadoras, e dan xa cobertura a nenos diagnosticados non só en Tui senón tamén en Salceda, Tomiño, Vincios, e Vigo. Indican que a tónica habitual é que 1 de cada 150 nenos é diagnosticado con autismo. Como exemplo citaban que só no núcleo urbano de Tui teñen coñecemento de 6 nenos autistas.

Na inauguración da sede do pasado sábado, Ana Rodríguez, socia fundadora de Un Máis, explicaba que o obxectivo do acto era celebrar o feito de contar cun espazo dende o que promover o coñecemento e sensibilizar sobre o autismo.

Explicaba que as áreas nas que se manifesta o autismo son dificultades na linguaxe e a comunicación, dificultades na relacións sociais, e intereses restrinxido se repetitivos, puntos que se poden superar coa correcta estimulación. Tamén manifestaba que os autistas son “loitadores natos que se esforzan a diario” indicando que “a realidade do autismo hai que asociala á superación, ao esforzo, á nobreza, ao cariño e a sensibilidade”. 

Montserrat Mon, presidenta de Un Máis, moi emocionada, explicaba as actividades que teñen previsto levar a cabo, como chegar a converterse nun punto de acollida para as familias de nenos recen diagnosticados.

Falaba tamén da implantación de sistema de comunicación a través de pictogramas en distintos espazos lúdicos coma por exemplo a biblioteca, xa que facilita moito a comunicación aos nenos autistas. Tamén queren organizar talleres para a capacitación dos profesionais, pais e nais, ou persoas con esta necesidade de formación, así coma colaborar coa elaboración de recursos nos centros educativos,e  actividades propias xa cos nenos. Marcan tamén en vermello a celebración do Día Mundial de concienciación sobre o Autismo o 2 de abril, e de forma máis cercana no tempo farán unha festa de Nadal.

            No acto interviron tamén Carmen Márquez, coordinadora da Unidade de Diagnóstico de BATA e Nacho Rey, presidente de BATA e coordinador do servizo de emprego.

            Pola súa parte o alcalde de Tui, Moisés Rodríguez,  e a concelleira de Servizos Sociais, Raquel Lorenzo, amosaron o apoio total do Concello, ao tempo que resaltaron a labor feita polos pais de esforzo e sacrificio para levar adiante este proxecto.