Celebración do Voto

            A Guarda cumpriu, unha edición máis, o Voto penitencial de Santa Trega, celebración relixiosa á que só acoden os varóns en cumprimento dunha promesa feita hai máis de seis séculos, segundo a tradición, por mor dunha seca que asolou a comarca e se prolongou  no tempo.

            Menos de medio centenar de homes, e algún rapaz, iniciaron ás 20.30 horas o percorrido no Cancelón subindo pola estrada que leva ao cume do Trega, uns 3,5 quilómetros, rezando o Rosario coas reflexións procedentes, polo párroco da Visitación de Santa María a Isabel, Camposancos, Ángel Soliño.  Á altura da Casa Forestal, substituíuse o rezo do Rosario polo Vía Crucis meditado. Desde aquí, e ata a ermida, sumáronse unha trintena máis de asistentes.

            Ás 21.45 horas os asistentes ao acto procesional chegaron a última cruz do Vía Crucis. No exterior xa agardaba a imaxe de Santa Trega, entregando Ángel Soliño, a testemuña da dirección dos rezos e plegarias ao párroco da Guarda, Jesús García Villadóniga, acompañado polo crego do Rosal, Isaac Penelas.

            Tralas confesións, iniciouse a Misa oficiada por Jesús García. Ao seu remate, os asistentes bicaron a reliquia de Santa Trega e recibiron un bolo de pan símbolo do xexún que hai máis de seis séculos mantiveron os veciños das sete parroquias da Foz do Miño.

Outra forma de ver a reportaxe