A presentación de “Xosé María Álvarez Blázquez: Entre o Miño ao mar de Vigo”, vai ter lugar ás 20.00horas no Museo Muniicpal de Tui (Antigo Convento de San Domingos).

Asociados de ACITUI participarán na XIII edición do Premio Xoven Empresario do ano

A Asociación de Comerciantes e Industriais de Tui, ACITUI, estará presente na XIII Edición do Premio Xoven Empresario a través da participación dos seguintes empresarios asociados: JL Música, Viñoteca de García, Café Museu, Frutas Hnos. Álvarez, S.L.U., Volvoreta, Zapatería Infantil Petit e Talleres Álvaro Hermida S.L

O Premio está organizado pola Asociación de Jóvenes Empresarios de Pontevedra, AJE, e consiste nunha dotación económica de 6.000 euros. O obxexto é render homenaxe a unha xuventude emprendedora e dinámica.

A entrega do galardón terá lugar no Liceo Casino de Pontevedra o vindeiro 9 de maio, ás 21.00 horas.

Martes, 29 de abril de 2008

Mesa redonda sobre Xosé María Álvarez Blázquez e a literatura hoxe no Museo Municipal

Hoxe, ás oito da tarde, o Museo Municipal de Tui acollerá unha mesa redonda sobre “Xosé María Álvarez Blázquez e a literatura” que contará coas intervencións de Xosé María Álvarez Cáccamo, Darío Xohán Cabana e Xavier Rodríguez Baixeras. Esta actividade forma parte da programación organizada pola Concellería de Cultura para a celebración do “Ano Xosé María Álvarez Blázquez”.

Nesta mesa redonda abordarase a relación do autor tudense coa literatura tanto dende o punto de vista de creador como dende o seu labor coma editor e estudoso da historia literaria de Galicia.

Xosé María Álvarez Cáccamo, fillo do escritor tudense, posúe unha ampla obra de creación tanto narrativa como poética. Amais é crítico literario e catedrático de literatura nun instituto vigués. A súa relación filial con Xosé María Álvarez Blázquez, a quen ten estudado e analizado, convérteo nunha voz imprescindible para analizar a actividade literaria do seu pai.

Dario Xohán Cabana é un dos principais autores da literatura galega actual. Mantivo unha estreita relación con Xosé María Álvarez Blázquez ao traballar, ao longo de varios anos, con el na editorial Castrelos. Ten escrito varios traballos sobre Xosé María, recentemente editou en Xerais “Xosé María Álvarez Blázquez, vida e obra”.

Xavier Rodríguez Baixeras, outro destacado creador da literatura galega actual, é un experto sobre a obra poética de Álvarez Blázquez. En 1987 fixo unha primeira edición de “Poesía Galega completa”, que foi logo ampliada e revisada.

Para o concelleiro de Cultura de Tui é un motivo de gran satisfacción poder reunir na cidade a tres escritores de sona para falar sobre o escritor a quen este ano está dedicado o Día das Letras Galegas. Deste xeito os interesados poderán achegarse á traxectoria que como creador e estudoso da literatura desenvolveu Xosé María Álvarez Blázquez.

Pleno extraordinario sobre urbanismo solicitado polos grupos de AT, BNG e PSOE

A corporación municipal de Tui reúnese hoxe en pleno de carácter extraordinario centrado no urbanismo que foi solicitado polos grupos de AT, BNG e PSOE. Comezará ás oito da tarde, coa seguinte Orde do Día

Debate e adopción de acordo, se procede, sobre ordenación prevista nos terreos situados entre a rúa Martínez Padín e a zona verde 140.
Debate e adopción de acordo, se procede, sobre xustificación da altura de B + 5 nos Polígonos de Execución Integral, PEI’s 6 e 5 e terreos ao norte deste ultimo.
Debate e adopción de acordo, se procede, sobre xustificación das alturas de B+ 4 no denominado PEI-7, e B+5 na Unidade de Execución nº1 situada entre os terreos ao norte do PEI 5 e ao sur da estación do ferrocarril).
Debate e, adopción, se procede, sobre grafado das árbores taladas no denominado PEI-6 correspondente á Finca Patazumba
Debate e adopción, se procede, sobre o solo urbanizable nº3 para parque empresarial en Ribadelouro
Debate e adopción de acordo, se procede, sobre a E-35 correspondente á Zona Deportiva na Veiga do Louro
Debate e adopción de acordo, se procede, sobre uso do Subsolo na Zona Verde 150.
Debate e adopción de acordo, se procede, sobre o uso da parcela municipal na Avenida da concordia corresponde a antiga Cam-fran
Debate e adopción de acordo, se procede, sobre a afección de terreos lindeiros á parcela municipal, da antiga Cam-fran, na Avenida da Concordia para posible ampliación futura do Centro de Saúde e aparcadoiro do mesmo.
A vista da crise do sector inmobiliario, e no animo de considerar ao pobo de Tui e aos titulares afectados, proponse que o Concello de Tui recompre as propiedades das unidades dos denominados PEI’s 5,6,7 e 9 e da Unidade de Execución 1, e da EI 5 aos prezos de monetarización do 10% do Concello capitalizado a día de hoxe engadindo no seu caso, os custes de urbanización.

A meirande parte destes asuntos están entre as modificación suxeridas por Política Territorial na Orde do 10 de abril de 2007 pola que se xustificaba a non aprobación definitiva do PXOM de Tui, e na que se recollía que para lograr o visto bo da Consellería deberíase “elaborar un novo documento no que se introduzan as modificacións precisas para emendar as deficiencias expresadas”.

O trámite tería que completarse aprobado inicialmente de novo o PXOM en pleno en remitíndoo de novo a Política Territorial, cos informes sectoriais correspondentes, para a súa aprobación definitiva.

Arcebispo Lago recusa ao Alcalde e a Moisés Rodríguez no punto que trata sobre a Finca Patazumba no pleno de hoxe

A Asociación Social e Cultural “Arcebispo Lago” presentou no concello de Tui o pasado sábado un escrito dirixido ao alcalde e á Secretaria Municipal no que solicita se proceda a recusación do alcalde, Antonio Fernández Rocha, e do concelleiro Moisés Rodríguez Pérez, ou se lles advirta do seu deber de abster de intervir nos puntos da orde do día do pleno de hoxe relacionados coa Finca Patazumba que vai no punto 4º da orde do día.

Argumentan dende Arcebispo Lago a súa solicitude ante a vinculación que tanto o alcalde coma o xoncelleiro teñen con este inmoble propiedade de PromoTuiVi S.L. Sinalan que Fernández Rocha é apoderado desta sociedade e pai do propietario, mentres que Moisés Rodríguez é cuñado do propietario e persoal asalariado desta sociedade.

Dende Arcebispo Lago fan a súa solicitude ao amparo do contemplado no artigo 28 da Lei 30/1992.

Arcebispo Lago convoca unha reunión pro Centro de Día e Gardería

A Asociación Cultural e Social Arcebispo Lago convoca unha reunión co obxecto de ter unha primeira toma de contacto coas persoas interesadas en promover a existencia dun Centro de Día e unha gardería pública na cidade.

A cita será o venres 9 de maio, ás 21h, na Sala Félix Rodríguez da Área Panorámica,

Vacantes e prazas de suplentes nos cursos do Plan FIP en Tui

O Centro de Formación do concello de Tui informa que quedan algunhas prazas vacantes e outras para suplentes nos cursos do Plan FIP que vai impartir.

Así o Curso de carpinteiro e fontaneiro están completos, pero ofertan 5 prazas de suplentes. Comezarán o 5 e o 13 de maio respectivamente.

No curso de electricista de edificios queda unha praza vacante e 5 de suplentes. Comezará o 5 de maio. E no curso de electricista de mantemento quedan 7 prazas vacantes e 5 de suplentes, comezará o 12 de maio.

As persoas interesadas poden acadar máis información no Centro de formación, en Guillarei, ou no teléfono 986 60 39 49

Relevo no mando do Cabo Fradera

Hoxe terá lugar o relevo no mando do patrulleiro “Cabo Fradera”. O tenente de navío Germán Feijoo Álvarez tomará o mando do patrulleiro sucedendo no posto á tenente de navío Anita Sánchez Pandal, quen foi comandante do barco durante dous anos. O acto de substitución de comandante terá lugar a bordo do propio patrulleiro, na súa base de Tui.

O Cabo Fradera ten como misión a vixilancia do tramo internacional do río Miño, de 76 km de lonxitude.

O tenente de navío Germán Feijoo recibiu o seu despacho de oficial da Armada en 1993. Formou parte da dotación do patrulleiro de altura “Atalaia”, do que foi segundo comandante, e do tamén patrulleiro de altura “Serviola”. É natural de Vigo, está casado e é pai de dous fillos.

A presenza da Armada en Tui remóntase ao ano 1864 co primeiro patrulleiro que daquela era o Segura, ao que substituíron La Perla e o primeiro Cabo Fradera en 1928. A Comandancia Naval do Miño coma tal non se crearía até 1988.

Actividades da Casa da Xuventude de Tui para o mes de maio

A Casa da Xuventude de Tui vén de facer públicas as actividades que impartirá durante o mes de maio.

Así este centro xuvenil acollerá un curso de Photoshop dentro da programación que a Dirección Xeral de Xuventude e Solidariedade da Xunta de Galicia desenvolverá nos seus centros. O curso terá unha duración de 16 horas e se celebrará entre o 7 e o 29 de maio, os mércores e xoves de 18.30 a 20.30 horas. Está dirixido a mozos e mozas de entre 16 e 30 anos. A participación é gratuíta. Ofértanse 8 prazas que se cubrirán por orde de inscrición.

Por outra parte a Casa da Xuventude organiza unha nova edición do curso de percusión a cargo do músico senegalés Abdoulaye Bilal Traore. O protagonista será o djembé. O curso terá lugar os días 24 e 30 de maio en horario de 10.30 a 13.30. Cada participante deberá traer o seu instrumento aínda que o profesor facilita o aluguer de 5 djembés para aqueles interesados que non conten con instrumentos propios. A participación é gratuíta, sendo necesario realizar inscrición xa que as prazas son limitadas. Terán preferencia os interesados de entre 12 e 30 anos.

Por outra parte a Casa da Xuventude súmase á rede de servizos onde se pode facer o Carné de Alberguista. Este Carné posibilita o acceso a máis de 4.500 albergues que forman parte de “Hostelling International” e que están espallados por máis de 80 países do mundo.

Hai varios tipos de carnés de alberguista:

· Carné de alberguista xove (14 a 30 anos): 5 €

· Carné de alberguista adulto (+ de 30 anos): 12 €

· Carné de alberguista grupo (<30 anos, mínimo 10 persoas): 15 €

· Carné de alberguista familiar (pais+fillos menores de 14 anos): 24 €

A validez dos carnés é de 1 ano a partir da data de expedición.

Mañá preséntase en Tui un traballo multimedia sobre Álvarez Blázquez

Mañá mércores, ás oito da tarde, será presentado no Museo Municipal en Santo Domingo o traballo multimedia “Xosé María Álvarez Blázquez, entre o Miño e o Mar”. A edición deste proxecto corresponde á Compañía Sons Galiza, que continúa deste xeito a xeira comezada o pasado ano coa edición dun libro/disco/dvd sobre María Mariño.

Este ano Sons Galiza vén de editar un libro/disco/dvd con poemas do libro para nenos titulado “Roseira do teu mencer”, de Xosé María Álvarez Blázquez no que se inclúen once poemas musicados que se incorporan no CD. O libro inclúe os poemas con fotografías de lugares e feitos importantes na vida do autor. Mentres o DVD contén un documental de 60 minutos coa vida do autor. Nel faise un percorrido dende o seu nacemento en Tui, pasando polas vicisitudes ao longo da súa vida, como o seu desterro en Zamora, as súas incursións no mundo editorial, e todo o seu intenso labor cultural e de investigación na cidade de Vigo, ata o seu pasamento en 1985.

No documental interveñen: María Luisa Cáccamo Frieben, os seus fillos Pepe, Alfonso, Elena, Celso e Berta Álvarez Cáccamo, así coma os seus sobriños Darío e Alfonso Álvarez Gándara. Tamén están presentes persoeiros da cultura coma Marga Romero, María do Carme Krukenberg, Pilar Fernández, Darío Xoán Cabana, Francisco Fernández del Riego, Lalo Vázquez Gil, Luis Ferreiro, Rafael Sánchez Bargiela e Victor F. Freixanes, sobre imaxes de Tui, Vigo e do Museo Municipal de Vigo “Quiñones de León”.

Na presentación de mañá estarán presentes Eloi Caldeiro, autor da obra, Pepe Álvarez Cáccamo, escritor e fillo do homenaxeado e Rafael Sánchez Bargiela, historiador.

Conferencia sobre Álvarez Blázquez no Teatro Municipal

O Teatro Municipal de Tui acolle ás cinco desta tarde unha conferencia -coloquio sobre a figura de Xosé María Álvarez Blázquez, a quen este ano se lle dedica o Día das Letras Galegas.

Este acto correrá a cargo do seu fillo Xosé María Álvarez Cáccamo, e ao mesmo asistirán 300 alumnos do IES Francisco Sánchez, estando aberto tamén ao público en xeral.

Sábado, 26 de abril de 2008

I Festa do Chourizo e o xamón en Rebordáns

O Parque do Laxal fronte ao Centro Cultural en Rebordáns acolle este domingo dende ás dez da mañá a I Festa do Chourizo e o xamón. Pola tarde actuará a orquestra Ritmo Joven e haberá sorteo de agasallos. Organiza a Comisión de Festas da Virxe do Camiño e de San Antonio.

Tui terá este ano un orzamento de 11.517.773,40€

Onte á noite foi aprobado en pleno, cos votos a favor do equipo de goberno do PP e do grupo municipal de TUI, o orzamento do Concello para o ano 2008 que ascende a 11.517.773,40 euros. Os outros grupos, AT, BNG e PSOE, xustificaron no debate o seu voto en contra.

O Concelleiro de Facenda, Moisés Rodríguez, foi o responsable de explicar as liñas xerais do orzamento que dicía, fíxose buscando a estabilidade orzamentaria e a igualdade e solidariedade entre o casco urbano e as parroquias. Son ambiciosos, dicía, ao tempo que sinalaba que a demora na súa presentación debeuse ao longo proceso de negociación da Relación de Postos de Traballo.

Engadía o edil de Facenda que nos orzamentos figura un apoio decidido ás asociacións culturais e clubs deportivos, ao comercio e ao turismo así coma que este non foi un orzamento inamovible xa que nas tres comisións celebradas estivo aberto ás aportacións da oposición.

Dende o Partido Socialista, que votou en contra dos orzamentos, interveu o concelleiro Pablo Alonso, criticando a demora na presentación das contas para este ano argumentada na RPT, cando a lei que a regula leva dez anos publicada. O edil socialista acusaba amais ao alcalde de mentir aos seus votantes xa que nos orzamentos non hai partida este ano para o Complexo deportivo da Veiga do Louro, e amais dicía que baixou o nivel de investimento.

Outros puntos criticados polos socialistas foron que as partidas de sancións urbanísticas e de ruído están abertas con 6€ o que para eles reflicte o nulo interese do goberno neste tema. Por contra explicaba que se incrementou ao dobre a recadación de multas co que dicía “hai unha intencionalidade encuberta de recadar cartos en vez de darlle unha solución ao aparcamento”.

Falou amais Pablo Alonso de solo dotacional propondo a compra de diversos terreos e pedindo que sexa o pleno quen informe nas compras do solo dotacional. Solicitaba tamén a creación de dúas prazas de traballo: unha de electricista e outra de albanel. Tamén puñan sobre a mesa os 30 mil € que custará unha consultoría do PXOM, que consideran é un gasto innecesario xa que o traballo poderíano facer os empregados municipais.

Por parte de Tudenses Unidos Independentes, tomou a palabra o seu voceiro Juan Miguel Diz Guedes, quen amosou a súa satisfacción co procedemento e método empregado na elaboración do orzamento, que dicía foi analizado, debatido e puideron facer propostas en tres comisións informativas. Sinalaba Diz Guedes que “é momento para o diálogo e dende o debate lograr consensos” xa que “Tui necesita que estemos unidos, o municipio necesita unidade para superar a situación crítica que estamos vivindo”.

Explicou amais o seu voto afirmativo por estas e outras razóns, indicando que o proxecto de orzamentos do municipio ten que presentar e marcar as políticas para Tui, e agradecendo que as propostas que fixeron fosen aceptadas.

En contra do orzamentos posicionouse o Bloque Nacionalista Galego explicando que “para nada foron partícipes na elaboración dos orzamentos, nin fomos consultados”. As contas, dicía o seu voceiro, Laureano Alonso, presentan “moitas eivas e carencias” e teñen unhas connotacións de políticas de dereitas coas que dicía non estar de acordo. Apuntaba que previa á elaboración dos orzamentos sería precisa unha auditoría por parte dunha empresa na que se prioricen os recursos humanos e materiais.

Propuña amais a creación dunha praza de Técnico en Medio Ambiente, un técnico informático e un técnico de turismo. E criticaba a retribución dos altos cargos, e os 30 mil euros consignados para persoal de gabinete. Engadía Laureano Alonso que “o orzamento ten moitísimas carencias, continúa cunha política negativa para Tui” explicando que o municipio está a perder forza e deixa de ser un referente.

Dende Acción Tudense tomou a palabra o seu voceiro, Miguel Capón Rey, cun exhaustivo análise dos orzamentos que realizou durante case 45 minutos. Así criticou a política de ingresos xa que dicía que para chegar a recadación prevista por licencias de construción haberá que ingresar o imposto correspondente a 2.500 vivendas en 2008. Por este motivo dicía que o orzamento nace desequilibrado, polo que anunciaba xa que no prazo de alegación van presentar unha neste senso. Tamén apuntaba que os investimentos previstos non se van poder executar salvo que se vaia a unha operación de crédito. E centraba tamén as súas críticas na partida de dedicacións exclusivas, xa que dicía que non lle dan as contas, xa que hai 33 mil euros a mais o que lle leva a pensar que “no futuro pensan darlla a alguén”.

Presentaba amais dúas emendas, que logo foron rexeitadas, unha delas propondo a redistribución das dedicacións exclusivas, de tal xeito que o alcalde manteña a que ten, que os concelleiros do equipo de goberno pasen a ter media dedicación cobrando 813,21€ e que o resto dos concelleiros da oposición cobren a metade disto e non cobre por asistencia nin a plenos nin a comisións. A outra emenda tamén rexeitada era que se inclúa a todo o persoal na RPT e que as distribucións por produtividade e gratificacións sexan propostas polos xefes de servizo.

Pediu amais un informe e Secretaría e intervención sobre se o Concello ten que dar o 25% dos impostos recadados no seu territorio á Entidade Local Menor de Pazos Reis, queixándose de que non se incluísen no orzamentos 2 obras que solicitou o seu presidente.

O Alcalde, Antonio Fernández Rocha, criticou duramente a presentación destas emendas no pleno e non en comisión, advertindo que se eran aprobadas terían que ir os orzamentos de novo a comisión. Acusou a oposición de irresponsable e de non querer que haxa orzamentos e os traballadores non teñan a RPT aprobada.

Por último previa á votación o rexedor explicou os investimentos que van no orzamento e que superan os 2 millóns de euros, o que supón dicía un 23% do total.

Aprobada por unanimidade a RPT

Por unanimidade foi onte aprobada en pleno a Relación de Postos de Traballo do Concello de Tui, froito dun traballo elaborado pola Universidade de Santiago e negociada cos representantes sindicais cos informes de secretaría e intervención.

Tras a súa aprobación no día de onte publicarase agora no BOP, someterase a exposición pública 20 días e de non haber reclamación considerarase definitivamente aprobada.

O Concelleiro de Persoal e Facenda, Moisés Rodríguez, sinalou que este “é un documento de gran importancia, porque ao través do mesmo faise unha ordenación integral dos postos de traballo do concello”. A mesma indicaba que implica a xerarquización dos postos, descrición e funcionamento, e valoración económica dos mesmos. E explicaba que “a situación actual do concello dificultou o traballo polas baixas retribucións” engandido que a RPT abrangue só aos postos estruturais, e que se trata dun punto de partida, xa que é un documento que admite modificacións.

Dende Acción Tudense Miguel Capón avanzou o seu voto a favor, pero deixando claro que dende hoxe “buscaremos a fórmula legal para que os traballadores que quedan fóra sexan incorporados”. Dende o BNG avanzaron tamén o seu voto a favor por respecto aos traballadores, aínda que consideran que falta incorporar postos coma os de técnico en medio ambiente, informática e turismo, e dixo non entender amais os cambios de nivel que se dan en funcionarios do grupo A e B, xa que considera que non hai un criterio único.

Por último o Alcalde explicaba que a RPT supón que o Concello está pondo enriba da mesa entre melloras de salario e seguridade social mil euros diarios. Con respecto aos traballadores que quedan fóra dicía que “os propios sindicatos recoñeceron que ir todos era inviable” e avanzou o compromiso que teñen tamén de empezar a negociar de cara aos orzamentos de 2009.

No pleno de onte acordouse por unanimidade a supresión do Padroado Deportivo Municipal, e a creación no prazo dun ano de órganos consultivos de deporte e cultura con participación cidadá.

Tamén se acordou por unanimidade a adhesión á Asociación de Desenvolvemento Rural da Mancomunidade Intermunicipal de Vigo.

O mércores chega a Tui o “Kiosco das almas perdidas”

Un espectáculo multidisciplinar, que ten na danza o seu punto de partida, é o que achega o próximo mércores, 30 de abril, ás 21.00h o Centro Coreográfico Galego ao Teatro Municipal de Tui. “Kiosco das almas perdidas” é unha creación de Roberto Oliván, baseándose no lugar do mesmo nome que existe na cidade de Vigo.

Esta peza, ao longo de 75 minutos, fusiona a danza, o teatro, a música en directo, o ilusionismo, o vídeo e a animación, conformando un punto de partida a unha xeración de “Almas perdidas”.

Ana Beatriz Pérez, Álvaro Esteban, Anna Calsina, Jordi Vilaseca, Hannah Shakti, Kirenia Fernández, Gabriela Máthe, Nuria Sotelo, Lenka Bartunkiva, Natxo Montero e Henrique Peón conforman o corpo de baile do espectáculo no que o espazo sonoro é creado por Mercedes Peón. A asesoría máxica foi compartida polo Mago Antón e Lipar Company, mentres que o creador do espazo escénico foi Rodrigo Roel.

Para a cidade de Tui é unha oportunidade única ter sido elixida polo Centro Coreográfico para pór en escena este espectáculo, grazas a excelente acollida que tiveran coa súa anterior montaxe Vacuo.

As entradas para este espectáculo poranse á venda o propio mércores, na billeteira do Teatro, a partir das 16.30h ao prezo de 6€, cos descontos habituais.

Cincuenta persoas participaron nos obradoiros de achegamento á danza

Coma acto paralelo e previo ao Kiosco das Almas Perdidas, que se vai representar o mécores, o Centro Coreográfico ofreceu en Tui unha serie de obradoiros de achegamento á danza nos que participaron 50 persoas que valoraron moi positivamente esta iniciativa. O propio Teatro Municipal foi o lugar onde se desenvolveu esta actividade o mércores día 23 e o xoves día 24 con alumnos chegados principalmente de Tui pero tamén de Vigo, A Guarda e Tomiño.

Venres, 25 de abril de 2008

Comezou Campaña do Día da Nai en ACITUI

A Asociación de Comerciantes e Industriais de Tui, ACITUI, puxo en marcha a súa Campaña Promocional do “Día da Nai”.

Co obxecto de incentivar as compras deste día tan sinalado, ACITUI premiará aos clientes do comercio asociado de Tui con 3 estancias dunha fin de semana para dúas persoas no Parador de Turismo de Tui.

O sorteo celebrarase o día 5 de maio na Radio Municipal de Tui.

Levada Libre publica o número 1 de Tribuna corresponde ao 19 de marzo de 1933

A asociación Levada libre vén de publicar o número 1 do Semanario Popular de Tui “Tribuna” correspondente ao 19 de marzo de 1933, editado por Guillermo Vicente de Santiago, último alcalde republicano tudense.

A distribución de 150 exemplares deste número fíxose coincidir onte co inicio dos actos do "Ano Xosé María Álvarez Blázquez" xa que na páxina 3 de Tribuna recóllese na sección de BATELADAS LÍRICAS, un conto titulado "ENVEXA", cuxo autor é Xosé María Álvarez Blázquez, cun grabado de Turas.
Deste xeito Levada libre, honra a memoria de Xosé María Álvarez Blázquez, polo seu compromiso coa cultura de Galicia e coa causa da liberdade.

Doazón de sangue en Tui

Unha unidade móbil do Centro de Doazón de Sangue de Galicia está hoxe en Tui na Praza de Galicia. Pódese doar de 10 a 14 e de 16 a 21h.

Conferencia sobre a Depresión en Baldráns

O Centro Cultural “Val de Flores” de Baldráns acolle mañá, sábado, ás 20.30h unha conferencia sobre a depresión. Está organizada pola Asociación Cultural “Val de Flores”.

Manualidades e decoración en Randufe

A vogalía da Xuventude de Xuntanza organiza para mañá, sábado, unha tarde de manualidades e decoración no Centro Cultural de Randufe. A cita vai ser a partir das catro e media da tarde. E os asistentes confeccionarán murais, cadeas e flores colgantes.

Xoves, 24 de abril de 2008

El Club Náutico San Telmo organiza un curso de PER (Patrón de Embarcaciones de Recreo)

Según informa el Club Náutico San Telmo, de Tui, en esta entidad se está organizando para el próximo mes de mayo un curso de PER (Patrón de embarcaciones de recreo). Las clases serán en fin de semana, sábados por la tarde y domingos por la mañana. El examen se realizará en julio.

Las personas interesadas pueden obtener más información telefónicamente en el 986.60.24.64, en horario de oficina de 9.30 a 13.30 y de 16.00 a 20.00 horas de lunes a viernes, o en el correo electrónico nautico@cnsantelmo.com

Teatro de Ningures presenta este venres en Tui “Emigrados”

Un tema tan actual coma o da emigración e a inmigración é o que aborda Teatro de Ningures na súa última montaxe “Emigrados”. Está baseada nunha creación conxunta de Xosé Manuel Pazos, Suso de Toro, Anxos Sumais, Sonia Torre e Cándido Pazó, que recibiu o Premio MAX 2008 ao mellor texto teatral en galego.

A representación de “Emigrados” terá lugar mañá, 25 de abril, ás 21.00h no Teatro Municipal de Tui, dentro da programación que organiza a Concellería de Cultura. As entradas poranse á venda ao prezo 4,5€, cos descontos habituais, a partir das 16.30h.

Etelvino Vázquez é o director e dramaturgo de “Emigrados”, unha obra que nos achega unha historia múltiple de distintos autores, que nos ofrecen unha visión sobre a emigración e inmigración, retorno e desenraizamento, abordados dende o punto de vista actual pero sen esquecer que este é un fenómeno de seu dos galegos.

Sobre o escenario sitúanse Sonia Rúa, Santiago Cortegoso, Mónica Camaño, Fran Paredes, Salvador del Río e Casilda García. A escenografía corresponde a Pablo Giráldez “Pastor”, o vestiario foi elaborado por Carlos Alonso e a música é de Anxo Graña.

Teatro de Ningures fundouse en 1986 sendo na actualidade unha das compañías teatrais máis estables de Galicia. O equipo humano de “Teatro de Ningures” está formado por cinco actores, cinco actrices e dous técnicos que contan cun recoñecido prestixio, e para as distintas produción súmanse actores, técnicos e creadores de todo o país.

Tui leva hoxe a pleno os orzamentos de 2008

A corporación municipal de Tui reúnese, a partir das oito desta tarde, en pleno de carácter ordinario con sete puntos na orde do día. Un dos asuntos destacados desta sesión é o debate e aprobación dos orzamentos municipais para este ano 2008. Así se recolle no punto quinto da orde do día. No mesmo pleno, no punto seguinte, vai a aprobación inicial da Relación de Postos de Traballo.

A este pleno lévase tamén a supresión do Padroado Municipal Municipal a proposta da Alcaldía, e unha proposta de Miguel Capón para a creación de órganos consultivos no ámbito da cultura e o deporte.

Tamén se tratará a solicitude de ingreso do Concello na Asociación de Desenvolvemento Rural da Mancomunidade da Área Intermunicipal de Vigo.

O pleno rematará coas mocións de urxencia e a quenda de rogos e preguntas.

Mércores, 23 de abril de 2008

Contratación de monitores para cursos de Formación Ocupacional

O concello de Tui convoca un proceso de selección para a contratación de monitores para os seguintes cursos de Formación Ocupacional: Carpinteiro, Electricista de Edificios, Electricista de Mantemento, Fontaneiro, Módulos de Riscos Laborais, Módulo de Formación para a Igualdade.

Os interesados poderán presentar as súas solicitudes no Rexistro Xeral do concello ata o venres, 25 de abril.

Martes, 22 de abril de 2008

Accidente o domingo en Tui e detido por alteración da orde

O domingo á tarde producise un accidente de tráfico no cruzamento entre a rúa Martínez Padín e a Avenida de Portugal no que se viron implicados dous vehículos, un Peugot 407 e un Citroen Xantia. Coma consecuencia do impacto rexistráronse feridos leves e danos materiais en ambos vehículos.

Segundo a información da Policía Local de Tui o Citroen Xantia conducido por H. F.D. veciño de Tomiño invandiu o carril contrario colisionando co Peugot 407 conducido polo veciño de Tui J. P.G.

Por outra parte onte á mañá pasou a disposición xudicial o mozo de 20 anos, veciño de Salceda, David N.M., detido ás 2 da madrugada do domingo ao luns pola Policía Local tras recibir aviso dos veciños. Foi detido por desordes públicos e atentado contra axente da autoridade. Tras pasar a noite nos calabozos pasou a disposición xudicial.

Tui leva este xoves a pleno os orzamentos de 2008

A corporación municipal de Tui vai debater este xoves, en pleno, os orzamentos municipais para o ano 2008. Así se recolle no punto quinto da orde do día. No mesmo pleno, no punto seguinte, vai a aprobación inicial da Relación de Postos de Traballo.

A este pleno lévase tamén a supresión do Padroado Municipal. E unha proposta de Miguel Capón para a creación de órganos consultivos no ámbito da cultura e o deporte.

O pleno rematará coas mocións de urxencia e a quenda de rogos e preguntas.

Mañá comezan os actos do Ano Xosé María Álvarez Blázquez

O descubrimento dunha placa conmemorativa na Casa do Rollo, na rúa Maristas, e un acto institucional na Casa do Concello abren mañá, ás oito da tarde, os actos do Ano Xosé María Álvarez Blázquez. Ata o 28 de novembro vanse desenvolver na cidade un programa de actividades entorno a figura deste persoeiro tudense a quen se lle dedica o Día das Letras Galegas, dando cumprimento ao acordo plenario tomando nese senso.

O alcalde de Tui, Antonio Fernández Rocha, o concelleiro de Cultura, Moisés Rodríguez e o director da Biblioteca, Rafael Sánchez Bargiela, foron os responsables de presentar as actividades a levar a cabo.

Fernández Rocha na súa intervención destacou o seu agradecemento tanto á Real Academia coma a familia do escritor, e destacou que estes actos poñen a Tui nunha posición central na cultura de Galicia.

Moisés Rodríguez explicou pola súa banda que o obxectivo do programa elaborado é que “todos coñezamos a dimensión intelectual de Álvarez Blázquez".

Precisamente o primeiro dos actos, coincide co Día do Libro que se celebra o 23 de abril. Ás oito da tarde na Casa do Rollo, na rúa Maristas, vaise descubrir unha placa conmemorativa. Este inmoble está ligado sentimentalmente ao homenaxeado e presente na súa obra literaria. Aí van intervir o seu fillo, Xosé María Álvarez Cáccamo, e o Concelleiro de Cultural. Posteriormente, xa no salón de plenos do Concello, terá lugar o acto institucional, no que intervirá outro dos fillos do escritor, Alfonso Álvarez Cáccamo, e dous nenos dun colexio de Tui darán lectura ao poema “Roseira do teu mencer”, poemario infantil do escritor homenaxeado. A continuación intervirá o Presidente da Real Academia Galega, Xosé Ramón Barreiro, e terase a oportunidade de escoitar parte do discurso que Álvarez Blázquez pronunciou hai 35 anos, en 1973, no Día das Letras Galegas, dedicado daquela a outro tudense, ao Bispo Manuel Lago González. O acto pecharase coa intervención do Alcalde de Tui, e o himno galego interpretado por un alumno do Conservatorio de Tui.

A seguinte cita será o martes da próxima semana, o 29 de abril, cunha conferencia ás 20.00h, no Museo Municipal titulada “Xosé María Álvarez Blázquez e a literatura”. Correrá a cargo de Xosé María Álvarez Cáccamo, Darío Xoán Cabanas e R.X. Rodríguez Baixeras. En maio haberá dúas novas citas: o día 7 de maio coa conferencia “Xosé María Álvarez Blázquez, historiador e arqueólogo”, por Clodio González Pérez, Fernando Acuña Castroviejo e Xoán Martínez “Tamuxe”, e o día 14 coa presentación do libro “Xosé María Álvarez Blázquez e Tui”, a cargo de Rafael Sánchez Bargiela e Marga Romero.

O programa de actividades elaboradas contempla tamén a colocación de 10 pancartas por diversos sitios de Tui con poemas de Álvarez Blázquez, e unha exposición biográfica que se abrirá o 5 de maio, á que se sumará a Exposición Filatélica do 16 ao 20 de maio.

Terá, claro está, especial relevancia do 17 de maio, Día das Letras Galegas, dedicado ao escritor, que estará tamén presente na Semana do Libro que se celebrará en Tui do 18 ao 24 de maio.

Os actos continúan no mes de xuño o día 24, onde co gallo do Aniversario dos Xogos Florais de Galicia os poetas van homenaxear a Álvarez Blázquez. A súa figura estará tamén resaltada o 20 e 21 de setembro nas Xornadas Europeas do Patrimonio nas que se visitarán Cabeza de Francos e o Conxunto de San Domingos, pola súa vinculación ao escritor. E por último o 28 de novembro, data na que Álvarez Blázquez deu lectura ao seu discurso de ingreso na Real Academia Galega, clausurarase o programa de actividades.

Pero amais nos próximos días estará na rúa un Roteiro Xosé María Álvarez Blázquez no que se recollen distintos lugares do municipio vinculados a súa figura. Así está a súa casa natal no Paseo da Corredoira, a Casa do Rollo, na rúa Maristas, a actual Casa da Xuventude, que era a Antiga Escola Graduada de Nenos onde foi mestre, a Escola das Olivas, o Conxunto de Santo Domingo onde xunto co grupo Ultreia colaborou na montaxe do primeiro museo de Tui, Cabeza de Francos onde realizou escavacións, e o río Miño e Tui en conxunto que son constantes na súa obra.

Sábado, 19 de abril de 2008

Presentación das actividades do Ano Xosé María Álvarez Blázquez

O próximo luns, 21 de abril, ás 11.30h can ser presentadas, no Salón de Plenos da Casa do Concello de Tui, as actividades que se van desenvolver no próximos meses co gallo do Ano Xosé María Álvarez Blázquez.

Dita presentación correrá a cargo do alcalde, Antonio Fernández Rocha, e do concelleiro de Cultura, Moisés Rodríguez.

ACITUI asiste á presentación da Rede de Comercio Rural Galego

A Asociación de Comerciantes e Industriais de Tui, ACITUI, representada polo seu presidente Jorge A. Álvarez Bautista, asistiu o pasado 16 de abril á xornada de presentación da Rede de Comercio Rural Galego que puxo en marcha a Consellería de Innovación e Industria.

A directora xeral de Comercio, Ana Rúa, explicou a iniciativa que ten como obxectivo favorecer unha correcta dotación de servizos para a poboación das areas rurais, freando así a tendencia de peche de establecementos comerciais do rural.

Obxectivos estratéxicos da Rede:

Mellora na calidade do servizo e atención ao cliente. Apoiar a innovación comercial e a xestión moderna. Atracción de novos clientes no comercio rural: visitantes e turistas. Dinamizar a economía do rural. Ofrecer unha canle de distribución dos produtos locais contribuíndo ao desenvolvemento da economía das zonas rurais. Facilitar a inserción das mulleres ao mercado de traballo no rural, tendo en conta que o comercio rural supón unha importante fonte de emprego para as mulleres, xa que o 64% das comerciantes son mulleres. Dotar de servizos tecnolóxicos ao rural, cun punto de acceso a internet nos establecementos.

Obxectivos operativos da Rede:

Deseñar dun establecemento multiservizo viábel no rural. Coordinar e promocionar conxuntamente os establecementos adheridos á Rede.

Segundo se detalla na orde de axudas da Rede de Comercio Rural Galego, poderán adherirse á mesma os comercios ou emprendedores de todo o país, excepto nos núcleos de máis de 1.500 habitantes situados en concellos de máis de 5.000 habitantes. As axudas consistirán nunha subvención a fondo perdido de ata o 70% do investimento, sendo o importe máximo subvencionable de 100.000 euros. O prazo para a presentación de solicitudes remata o vindeiro 9 de maio.

Para máis información, porse en contacto con ACITUI no teléfono 986 607 556 ou acudir Ás oficinas sitas no Paseo da Corredoira, 21-1º Dta., tamén na web www.comercioruralgalego.eu

Hoxe presentación dos novos libros de Antonio García Rivas

O escritor tudense Antonio García Rivas presenta hoxe sábado ás sete da tarde na Sala Félix Rodríguez da Área Panorámica os seus dous últimos libros, un galego e outro castelán, titulados respectivamente “Nos Lares de Breogán” e “A tiempo cero”.

Mercadiño solidario co pobo saharauí hoxe e mañá na Corredoira

Esta fin de semana nun local do Paseo da Corredoira haberá un mercadiño para recadar fondos para o pobo saharauí ante a situación de emerxencia que están a sufrir nos campamentos de refuxiados. Venderán camisetas, gorras e cadros. Hoxe, sábado, abrirán de 17 a 21h e o domingo de 10 a 14 e de 17 a 21h.

Teatro en Pexegueiro este domingo

O Centro Cultural “O Mosteiro” de Pexegueiro acolle este domingo, ás seis da tarde, a representación da obra de teatro “A Pingueira” a cargo do grupo de teatro “Seixos Albos” de Areas. Organiza o propio Centro Cultural “O Mosteiro”.

Venres, 18 de abril de 2008

Exposición do premios de arquitectura GrandeArea na Corredoira

O paseo da Corredoira acolle ata finais de mes, a exposición itinerante organizada polo Colexio de Arquitectos de Galicia coas obras galardonadas nos “Premios Grandearea de Aportación á Arquitectura”.

Estes premios “Grandearea” foron instituídos hai xa seis anos pola delegación viguesa do Colexio de Arquitectos de Galicia coa intención de recoñecer o labor dos arquitectos e promotores á hora de realizar unha arquitectura de calidade coa finalidade de promover o seu coñecemento polo gran público e destacar os seus valores. Prémianse tanto os proxectos básicos como de execución ou obras xa construídas que teñan sido visadas o ano anterior na delegación.

Nesta VI edición dos premios Grandearea, correspondente aos proxectos visados no anos 2006, premiáronse dezasete obras asinadas por catorce estudos de arquitectura. Os premios abranguen vivendas unifamiliares, edificios de vivendas, rehabilitacións e, incluso, obra pública. A maioría das obras están ubicadas en Vigo ou nos municipios do sur da provincia de Pontevedra.

A exposición que encetou o seu percorrido o pasado mes de decembro en Vigo, esta deseñada polo estudio de arquitectura de Alberto Quintáns, Emma Ríos e Cristina Ansede, e na súa itinerancia visita as localidades de Baiona, O Porriño, A Guarda, Tui e Redondela.

Para o Concelleiro de Cultura do concello de Tui, Moisés Rodríguez Pérez, resulta moi satisfactorio que o Colexio de Arquitectos de Galicia teña escollido á cidade de Tui para realizar esta exposición, pois a mestura entre as propostas arquitectónicas contemporáneas e o Paseo da Corredoira co seu carácter histórico e patrimonial resulta certamente atractivo, amais esta exposición ten o interese engadido de realizarse en plena rúa para lograr así unha mellor difusión entre os veciños de Tui e os visitantes a nosa cidade. Por último, o concelleiro tudense agradece ao Colexio de Arquitectos de Galicia o seu interese por achegar ata a nosa cidade esta exposición.

Relación de obras e autores

JAVIER MARIÑO

VIV UNIF. EN CIDADELLE-CHAPELA-REDONDELA

JULIO DANIEL RODRÍGUEZ

DANIEL RIVOIRA ZECCA

EDIFICIO DE 27 VIV EN CAMIÑO REAL-SABARÍS-BAIONA

BEATRIZ GONZÁLEZ LÓPEZ

JAVIER SÁNCHEZ FERNÁNDEZ

ELENA SIMÓN BARREIRO

VIV UNIF EN LARACHE-STA CRISTINA DE COBRES-VILABOA

LEÓN LOPEZ DE LA OSA

MODIFICACIÓN DE VIV UNIF EN CANIDO-VIGO

VIV UNIF EN BAREDO-BAIONA

GUADALUPE PIÑERA MANSO

PROYECTO AMPLIACIÓN DEL COLEGIO LOSADA- VIGO

VIVENDA UNIFAMILIAR EN TEBRA- TOMIÑO

J.JAVIER VILLACE RODRÍGUEZ

MARTÍN DE COMINGES CARVALLO

REHABILITACIÓN DE DOS VIVENDAS NA RÚA CRUZ VERDE-VIGO

JOSÉ MANUEL PEÑA SERNA

VIV UNIF EN SAN ROQUE-TORNEIROS-PORRIÑO

VALERIO CANALS REVILLA

VIV UNIF EN HÍO-CANGAS

PERFECTO CENDÓN – JAVIER VÁZQUEZ

ESCUELA INFANTIL EN EVEL-VILALONGA-SANXENXO

VICTOR GONZÁLEZ MAGDALENA

VIV UNIF EN SAIÁNS-VIGO

FRANCISCO JAVIER VÁZQUEZ

GERARDO VILLANUEVA

VIV UNIF EN BARRANTES-TOMIÑO

NURIA CAMPOS DÍAZ

VIV UNIF EN VILAS-MORGADÁNS-GONDOMAR

MILAGROS ÁLVAREZ CONDE- LEONCIO AREAL SALVE

VIV UNIF EN ARRUFANA-LOUREDO-MOS

ROGELIO PÉREZ CONDE –ANTONIO DE COMINGES CARVALLO

VIV UNIF EN CERQUEIRO Nº 2 –VIGO

Xoves, 17 de abril de 2008

Conferencia da investigadora tudense Paula Sánchez Diz sobre “CSI Galicia?: a investigación xenética e forense do instituto de medicina legal da Unversidade de Santiago”

Mañá, venres, ás 20.30h, a Sala da Fundación “Felix Rodríguez” (no edifico Área Panorámica – entrada polo aparcadoiro municipal) acolle una conferencia divulgativa da investigadora tudense Paula Sánchez Díz co atractivo título de “CSI Galicia?, A investigación xenética e forense do Instituto de Medicina Legal da Universidade de Santiago de Compostela”.

O obxectivo desta conferencia é a divulgación do traballo que realiza este Instituto, froito dun convenio entre a Universidade de Santiago e a Xunta de Galicia, que na súa condición de departamento universitario se dedica á formación e á investigación en varios campos entre eles a xenética e os temas forenses.

A famosa serie de televisión ten posto en coñecemento do gran público o labor que desenvolven os institutos de investigación que traballan con temas de ADN e xenética, e que, entre outros aspectos, coas suas investigacións colaboran en identificacións, temas forenses, crimes e agresións. Un traballo que en moitos casos supera a propia ficción televisiva.

O Instituto de Medicina Legal da Universidade de Santiago de Compostela, que dirixe o profesor Angel Carracedo, ten sona mundial e ocupa posicións punteiras neste ámbito de investigación. Cómpre lembrar que este centro ten participado en casos “famosos” como o das nenas de Alcasser, o atentado do 11 M ou recentemente na filiación de “Enmanuel”, o fillo de Clara Rojas, liberada polas FARC colombianas o pasado xaneiro.

Paula Sánchez Diz é unha das investigadoras deste Instituto e pretende con esta charla poñer en coñecemento do gran público o extraordinario traballo que se desenvolve nel e que a pesar do recoñecemento mundial do que goza resulta completamente descoñecido para o público xeral.

Paula Sánchez Díaz, natural de Tui, é Doutora en Bioloxía pola Universidade de Compostela. Posúe unha ampla relación de artigos e publicacións de carácter científico en revistas de España e do estranxeiro, poñente en numerosos congresos e reunións de investigadores e ten participado en varios proxectos de investigación, de carácter internacional, financiados pola Unión Europea e outras entidades públicas.

A Concellería de Cultura do Concello de Tui, que dirixe Moisés Rodríguez Pérez, ten acollido con interese este iniciativa de Paula Sánchez Diz e congratúlase do seu desexo de expoñer na súa cidade o labor que desenvolve neste centro de investigación. Moisés Rodríguez anuncia que é pretensión da concellería de cultura de Tui continuar realizando este tipo de charlas que amosen o traballo que xentes de Tui realizan en diversos campos da investigación e a cultura.

“Do, re, mi Mozart xoga aquí” este venres en Tui con Títeres Cachirulo

Os nenos a partir de 4 anos son os destinatarios da obra que este venres achega ao Teatro Municipal de Tui a compañía Títeres Cachirulo denominada “Do, re, mi Mozart xoga aquí”.

Escrita e dirixida por Jorge Rey cóntanos a historia do neno Mozart que é chamado a tocar en Palacio pola súa xenialidade. Manipulan as marionetas talladas en madeira o propio Jorge Rey e Carmen Domech. A acción desenvólvese nun escenario barroco.

A obra dura 55 minutos e comezará ás 20h. As entradas poranse á venda ás 16.30 ao prezo xeral de 2,5€ cos descontos habituais.

Títeres Cachirulo creouse no ano 1986 converténdose nunha das referencias artísticas do teatro de monicreques en Galicia. Os seus espectáculos caracterízanse pola axilidade dramática e o especial coidado da elaboración das marionetas de fío e os monicreques del uva.

Unha neveira de regalo polos seus 106 anos

Unha neveira, un ramo de flores e unha tarta foron os agasallos que onte á mañana entregaron o alcalde de Tui, Antonio Fernández Rocha, e a concelleira de Servizos Sociais, Patricia Ricón, á señora Palmira, polo seu 106 cumpreanos.

A súa casa parecía onte a romaría da Rocha, coma ela mesma dicía, ante as numerosas visitas que recibiu e os numerosos agasallos que lle levaron, incluídos os 106 cohetes que os seus netos fixeron estourar, un por cada ano da avoa.

A señora Palmira está en pleno estado de forma, segue traballando o campo e facendo as cousas da casa.

O servizo de Drogodependencias do Concello de Tui premio Galicia por póster sobre as drogas legais

O Servizo de Drogodependencias do Concello de Tui recibiu a pasada semana o Premio Galicia no concurso de pósters realizado co gallo das XXXV Xornadas Nacionais de SOCIDROGALCOHOL que se celebraron na Coruña do 10 ao 12 deste mes. Estas xornadas a nivel nacional, organizadas pola sociedade científica SOCIDROGALCOHOL, contaron con 800 participantes, e cos mellores expertos en adiccións de Europa para debater o momento dos problemas médicos e psiquiátricos das adicións: alcoholismo, cannabis, cocaína, ludopatía e drogas emerxentes.

Nos días do Congreso permaneceron os 200 pósters que foron previamente becados para a súa participación, entre eles o do concello de Tui, a través do Servizo de Prevención de Drogodependencias, tivo a súa presenza grazas a un traballo feito en 2006 que consistiu nun estudo do consumo de drogas legais e ilegais nos adolescentes na provincia de Pontevedra nos concellos de Vilagarcía de Arousa, Illa de Arousa, Cambados, Meis, Ribadumia, Caldas de Reis, Portas, A Estrada, O Grove, Catoira, Valga, Pontecesures, Pontevedra, Sanxenxo e Tui.

A partir deste traballo o Servizo de Prevención do Concello de Tui presentou no Congreso dous pósters: un dedicado ás drogas ilegais e outro as drogas legais, acadando con este último o Premio Galicia, dotado con 500€.

Acadar este premio nun foro científico como é o de Socidrogalcohol, no que todas as miradas están postas nos último avances en farmacoloxía, neurobioloxía e investigacións clínicas varias, temas tratados nos caseque douscentos pósters exhibidos, explican dende o Servizo que foi emocionante.

Mércores, 16 de abril de 2008

Tui acollerá unha das rotas polo patrimonio natural en xuño

Os bens patrimoniais de tipo arqueolóxico e etnográfico presentes no rural da provincia de Pontevedra serán os protagonistas do programa “Patrimonio no Medio”. As delegacións provinciais de Cultura e Medio Rural, en colaboración coas comunidades de montes, poñen en marcha este programa de charlas e visitas en parroquias de Tui, a Lama, Cuntis, Covelo, O Grove e Cangas.

O programa desenvólvese nunha fin de semana en cada parroquia participante. Inícianse cunha charla na que se expón de forma didáctica un tema relacionado co patrimonio arqueolóxico e etnográfico da zona. A charla complétase cun percorrido, sempre de aproximadamente 5 quilómetros e 3 horas de duración. Acompañados dun especialista coñecedor da zona, percórrense bens culturais e puntos de atractivo paisaxístico e ambiental.

Con este programa, as Consellarías de Cultura e de Medio Rural promoven a xestión sostible dos montes galegos, que implica a conservación e defensa do patrimonio cultural. Neste obxectivo xogan un papel fundamental as xuntas de montes en man común, que teñen unha gran importancia na propiedade do monte en Galicia.

En Tui a cita será o xoves 5 de xuño na Casa Cultural de Pazos de Reis, ás 20h, cunha charla a cargo do arqueólogo Juan José Perles. E o domingo día 8 sairase ás dez da mañá dende o Colexio de Pazos de Reis para realizar un percorrido pola zona.

Comezan o sábado os xogos populares en Riomuíños

Este sábado, 19 de abril, comezan a desenvolver en Riomuíños os Xogos Populares organizados pola Asociación de Veciños. Será a partir das 8 da tarde no local da propia asociación. Os xogos están abertos a todos os nenos a partir de 3 anos, e a adultos sempre que sexan socios.

Establécense tres premios por categoría para homes, mulleres e nenos. E para os pequenos de 3 a 8 anos haberá dous premios.

As Amas de Casa de Tui organizan unha viaxe a León e Astorga

A Asociación de Amas de Casa de Tui organiza unha viaxe a León e Astorga do 16 ao 18 de maio.

As persoas interesadas poden acadar máis información os venres de 16 a 20h na Casa da Xuventude. O prazo para anotarse remata o 1 de maio.

Reunión da plataforma pro-centro de Saúde de Tui

Este venres, ás 21h, no pavillón do IES San Paio está convocada unha reunión da Plataforma pro Centro de Saúde. Na mesma informarán aos veciños da reunión que recentemente mantiveron co Secretario Xeral do Sergas.

Ás oito desta tarde inaugurase unha exposición de Juan Bellas na Sala Municipal

Ás oito desta tarde será inaugurada na Sala Municipal de Exposicións, na Área Panorámica, unha exposición de pintura do artista Juan Bellas, na que recolle unha parte da súa produción artística dos últimos vinte cinco anos, e contará cunha sección especial dedicada a paisaxes tudenses.

Juan Bellas iniciou a súa andaina pictórica no ano 1983 participando na VII Bienal de Arte da Deputación Provincial de Pontevedra, tras unha longa viaxe por diversos lugares de Europa onde se achega ás técnicas artísticas do exterior. Boa parte dos seus óleos e acuarelas reflicten a paisaxe das Rías Baixas, especialmente o Val Miñor pois na parroquia de Chaín (Gondomar) ten ubicado o seu estudo.

Ten participado en numerosas exposición colectivas en España ou Francia, pero preferentemente realiza exposicións de carácter individual ao longo de toda a xeografía de Galicia. Agora achégase ata Tui, dende a veciña parroquia gondomareña de Chaín para amosar as súas paisaxes.

Para o concelleiro de cultura de Tui, Moisés Rodríguez Pérez, esta exposición ofrece aos tudenses a visión de diversos lugares e paisaxes da nosa cidade e concello dende a perspectiva da cor e da luz de Juan Bellas, onde resalta a beleza destas terras miñotas.

A Sra. Palmira cumpre hoxe 106 anos

A señora Palmira, que pola súa idade é a avoa de Tui, cumpre hoxe 106 anos. Tal celebración merecerá unha festa en toda regra. O propio alcalde de Tui acudirá ás 10 desta mañá a súa casa para felicitala coma merece, e os seus netos téñenlle preparada tamén unha sorpresa moi relacionada cos anos que cumpre.

Felicidades.

Martes, 15 de abril de 2008

O Arquivo Municipal de Tui actualiza os seus instrumentos de descrición coa colaboración de Deputación Provincial

O persoal do Arquivo Municipal de Tui en colaboración co Servizo Técnico do Patrimonio Documental da Deputación acaba de rematar un proceso de colaboración na actualización dos instrumentos de descrición referidos á documentación transferida no último ano dende as propias oficinas xestoras do Concello ao arquivo municipal de Tui, situado na planta baixa da casa do Concello.

Estes traballos desenvolvidos nos últimos meses polos responsables do arquivo municipal tudense, Rafael Sánchez Bargiela e María Dolores Martínez Gamallo, supuxeron a incorporación de 112 novas unidades de instalación e 14 metros lineais de documentación, que corresponden ao último ano, que veñen de ser revisadas e incorporadas os instrumentos de descrición, actualizando a información que deste arquivo se ofrece dende a páxina web da Deputación Provincial de Pontevedra.

Esta actuación enmárcase dentro dun proceso de asistencia técnica permanente aos concellos por parte da Deputación Provincial en materia de patrimonio documental, que no caso concreto do Arquivo Municipal de Tui se iniciou en 1985 e se desenvolveu en sucesivas fases de profundización informativa e de actualización e informatización nos anos 1986, 1987, 2005, 2006 e 2007.

O resultado vén ser un conxunto documental organizado, debidamente instalado, de fácil manexo e consulta e de conservación garantida, composto por un total de 4.401 unidades de instalación, con documentación principalmente do século vinte, con datas extremas que van de 1789 ata o 2007.