Índice

www.galiciasuroeste.info

 

AGOSTO

 

Venres, 12 de agosto de 2016 

Cancelado o espectáculo “Jiñol” de Títeres Trompicallo previsto para o     

Por causas alleas ao Concello de Tui tivo que ser cancelado o espectáculo “Jiñol” a cargo de Trompicallo previsto para o xoves 25 deste mes dentro da programación cultural do verán en Tui.

Lembramos que ao abeiro desta programación este sábado celébrase a VI Festa do Miño. Amais haberá dúas proxeccións de cinema o venres 19 “Os Minions” e o venres 26 “Os pingüíns de Madagascar” na Praza de San Fernando. Amais o sábado 20 ás 22h terá lugar o XXV Festival de Bandas de Música.

 

Xoves, 11 de agosto de 2016 

Tui celebra este sábado a VI Festa do Miño

O río Miño é o protagonista da festa que este sábado se celebra en Tui e na que se agardan miles de persoas ao longo da xornada. Deporte, gastronomía, música son só tres dos ingredientes da Festa do Miño que cumpre a súa sexta edición. 

O programa previsto comeza ás 12h na ribeira de Caldelas coa V Romaría Popular. Dende este punto ás 16h sairán os preto de 800 participantes que se agardan no VI Descenso Popular do Miño organizado polo Club Kaiak Tudense. Serán preto de sete quilómetros os que participantes realicen en piragua ata Tui, fronte ás instalacións do Centro Interfederado. ÁS 18.30h dende Salvaterra de Miño, preto da ponte internacional, terá a súa saída o XLV Descenso Internacional do Miño no que van participar 550 padeeiro de 42 clubs españois, portugueses, arxentinos e italianos. A penas unha hora tardarán en completar  os 16 quilómetros percorrido ata a liña de meta en Tui as primeiras embarcacións k2 e k1.

A rúa Lugo acollerá a partir das 20h a VI Festa Gastronómica con nove postos dobres a cargo das asociacións culturais Seixos Albos de Areas, Aloia de Pazos de Reis, Santa Columba de Ribadelouro, Xuntanza  de Randufe, San Xoan de Paramos, O Mosteiro de Pexegueiro, A Insua de Caldelas, Lembranzas da Terra de Guillarei, e Santiago de Malvas. A prezos populares poderanse degustar pratos tradicionais elaborados artesanalmente.

Ás 22.30h a música en directo será a protagonista co concerto a cargo de Guadi Galego que presentará "Lúas de outubro e agosto" o seu segundo traballo como solista tras o álbum Benzón, que se publicou en 2009. Estará acompañada no escenario por Guillerme Fernández, Guitarras e coros; Paco Charlín, baixo; e Isaac Palacín, batería e coros. Cunha longa traxectoria musical que comezou no ano 97 formando parte de Berrogüeto, formou parte dos proxectos colectivos: Nordestinas, Espido e aCadaCanto, e ten colaborado con múltiples artistas coma Uxía, Marful, Susana Seivane, Tejedor, Fred Martíns, Capercaille… O ano pasado Guadi Galego foi galardoada co “Premio da Crítica de Galicia”, nomeada aos “Premios da Música Independente” e galardoada co “Premio Bos e Xenerosos” da Fundación Eduardo Pondal. 

Restricións no tráfico

Debido á celebración da Festa do Miño, e para garantir a seguridade e o bo desenvolvemento dos eventos haberá algunhas restricións no tráfico. Así dende as 10h pecharase ao tráfico a baixada á rúa Olímpicos tudenses – onde están situados os clubs de remo e piragüismo - dende o cruzamento coa Avenida de Portugal. Amais para os participantes no Descenso Popular habilitarase un aparcamento na antiga alfándega.

Por outra parte pola celebración da Festa Gastronómica a rúa Lugo estará pechada ao tráfico dende o venres as 8h, a rúa Mondoñedo dende o sábado ás 10h e a rúa Ourense dende o sábado as 14h. Estas prohibición de circulación e estacionamento manteranse ata as 4h do domingo.  Amais no aparcamento municipal non se poderá estacionar na esquina entre a rúa Ourense e a Área Panorámica dende venres as 8h, e o sábado dende as 14h pecharase a saída do aparcamento cara a rúa Ourense.

Tui – VI Festa do Miño

Sábado 13

Ás 12h Comezo da V Romaría de Caldelas. Xantar Campestre

Ás 16h Saída do VI Descenso Popular do Miño dende Caldelas

Ás 18.30h Saída do XLV Descenso Internacional do Miño dende Salvaterra

Ás 19.30h Chegada do Descenso Internacional ás instalacións do Centro Interfederado

Ás 20h VI Festa Gastronómica na rúa Lugo.

Ás 22.30h Concerto musical de Guadi Galego na rúa Lugo

 

Mércores, 10 de agosto de 2016 

A Xunta asiste en Tui ao acto de presentación da Agrupación Europea de Cooperación Territorial do Río Minho

O director xeral de Relacións Exteriores e coa UE, Jesús Gamallo, asistiu ao acto de constitución da nova Agrupación Europea de Cooperación Territorial do Río Minho, que tivo lugar en Tui, e foi presidido pola presidenta da Deputación provincial de Pontevedra, Carmela Silva.

Tamén contou coa asistencia do presidente da Cámara Municipal de Viana do Castelo e da CIM AltoMinho, José María Costa, o vicepresidente da Comisión de Coordinación e Desenvolvemento Rexional do Norte (CCDR-N), Ricardo Magallaes, e o presidente de Uniminho, Manoel Baptista.

No acto de inauguración, o director xeral de Relacións Exteriores e coa UE subliñou que a constitución hoxe da Agrupación Europea de Cooperación Territorial (AECT) Río Miño permitirá aproveitar os instrumentos da Unión Europea para facer a cooperación no territorio transfronteirizo do Río Miño “máis visible e máis útil para os cidadáns”.

Así, durante o acto de presentación da entidade, Gamallo remarcou que a creación desta AECT supón crear “un marco xurídico regulador da traxectoria de colaboración existente no territorio transfronteirizo do Río Miño”, posto que se trata dun instrumento nado do dereito comunitario, con personalidade xurídica propia para contratar actuacións e servizos de interese para os socios galegos e portugueses e para a cidadanía.

Xunto con isto, o director xeral puxo en valor que a posta en marcha da entidade permite “que potenciemos e afondemos na cooperación de proximidade como modelo de xestión eficaz e de cidadanía europea”. Non en van, segundo salientou, esta é xa a terceira AECT que nace na Eurorrexión Galicia-Norte de Portugal.

Entre as vantaxes que conleva a constitución da AECT do Río Miño, Gamallo destacou que supón “abrir a porta á xestión conxunta do financiamento necesario para tirar o máximo rendemento das relacións entre  as dúas beiras do Miño”. Tamén lembrou a necesidade de aproveitar a potencialidade da AECT para continuar o camiño iniciado co obxectivo de acadar unha xestión “coordinada, coherente e máis eficiente das dúas beiras do Miño”, polo que avogou por afondar na xestión de equipamento conxunta, na xestión de servizos comúns ou na posta en marcha de mecanismos conxuntos de coordinación en eidos como a mobilidade, a xestión turística conxunta ou a valorización dos recursos da pesca fluvial. Nesa liña, apostou por facer chegar a moitos máis veciños e servizos as vantaxes da xestión conxunta e compartida de instalacións e funcións municipais, evitando duplicidades e aforrando custos.

Gamallo aproveitou para facer balance da Cooperación Transfronteiriza entre Galicia e o Norte de Portugal, así como do camiño percorrido pola Eurorrexión e dos novos retos que se abren na nova etapa que se iniciará no próximo outono, cando Galicia asuma a Presidencia da Comunidade de Traballo Galicia-Norte de Portugal. O balance, en todo caso, lembrou, “ten que ser necesariamente positivo, non só no desenvolvemento concreto dos programas, proxectos ou iniciativas como as das AECT, que atopan un referente e un modelo na AECT Galicia-Norte de Portugal, con sede en Vigo,  senón tamén, e mesmo isto é aínda máis importante, na consolidación do propio concepto de Eurorrexión, de experiencia compartida e vivida entre os cidadáns tanto de Galicia como de Portugal, que afonda e profundiza o concepto de Cooperación de Proximidade. 

Finalmente, lembrou que na Eurorrexión seguimos a traballar para consolidar o crecemento e estendelo a ambos lados do Miño, buscando sempre vías de desenvolvemento cara ao futuro. Por iso apostamos polo programa de bolsas e intercambio universitario IACOBUS, ou pola competitividade empresarial, a reindustrialización de zonas máis afectadas pola crise ou os programas de creación de emprego. Neste momento, os indicadores macroeconómicos indican un cambio cara a unha conxuntura máis favorable e cómpre poñer os recursos transfronteirizos ao servizo desta situación para aproveitar e tomar un impulso definitivo cara ao desenvolvemento.

A xuízo do director, resulta indubidable que a cooperación transfronteiriza é unha ferramenta de enorme utilidade para facerlle fronte con maior eficacia aos novos desafíos que puxo ante nós a situación de escaseza derivada da crise económica que estamos a superar a ambas beiras do Miño.

 

Tui acollerá un obradoiro de inglés para a restauración no mes de setembro

O Centro de Formación do Concello de Tui, en Guillarei, acollerá a finais de setembro un obradoiro de inglés para a restauración promovido polo Servizo de Cohesión Social e Xuventude da Deputación de Pontevedra en colaboración co Concello de Tui.

Esta actividade forma parte “Obradoiros de inglés para o turismo rural, termal e hostaleiro”  promovidos pola Deputación para capacitar ao alumnado para o emprego de termos, expresións e funcións comunicativas concretas relacionadas coas actividades laborais diarias propias nun establecemento rural, hostaleiro ou termal. Os interesados  deben ter entre 16 e 35 anos e estar empadroados nalgún dos concellos da provincia así coma ter coñecementos mínimos de inglés nivel A2. En Tui impartirase o luns 26 e martes 27 de setembro, en horario de 9.30h a 15h cun máximo de 12 prazas.

Os interesados teñen que presentar as súas solicitudes ata o 30 de agosto no rexistro xeral da Deputación ou nas oficinas de rexistro da Deputación. Xunto ao modelo normalizado de solicitude deberán achegar fotocopia do DNI, volante de empadroamento e certificado mínimo do nivel de A2. Para os que non posúan o certificado de nivel farase unha proba de nivel no edificio administrativo da entidade provincial o 7 de setembro. Tamén se poden presentar a solicitude nas oficinas do ORAL en Tui.

 

Martes, 9 de agosto de 2016 

Restricións no tráfico na rúa Colón por obras mañá martes e o mércores

A rúa Colón de Tui será obxecto tanto hoxe, martes, coma o mércores de obras polo que haberá restricións ao tráfico na mesma.

Así por unha banda hoxe, debido a obras de condución de augas pluviais do saneamento, permanecerá pechado un carril de circulación dende o cruzamento coa rúa Augusto González Besada ata o cruzamento coa rúa Casal Aboy. O tráfico será desviado pola rúa Casal Aboy, polo que se solicita a colaboración cidadá non estacionando en dobre fila nesta rúa para garantir así a fluidez de tráfico na mesma.

Por outra parte o mércores executaranse os traballos de asfaltado e pintado da sinalización horizontal polo que estará prohibido o estacionamento en toda a rúa dende o cruzamento con Martínez Padín e Augusto González Besada ata a ponte do tren.

 

Luns, 8 de agosto de 2016 

Ata o 4 de setembro amósase en Tui a exposición “Acollida e hospitalidade no Camiño de Santiago”

A Sala de Exposicións Municipal na Área Panorámica acolle dende o luns, 8 de agosto, e ata o 4 de setembro a exposición “Acollida e hospitalidade no Camiño de Santiago”, con fotografías realizadas por Manuel G. Vicente que achegan a súa propia visión da peregrinación a Santiago.

O luns ás 19.30 horas a mostra será visitada polo alcalde, Enrique Cabaleiro, xunto co bispo da diocese de Tui-Vigo, Luís Quinteiro Fiuza, e o xerente do Xacobeo, Rafael Sánchez Bargiela.

A exposición abrirá de luns a venres de 9 a 21 horas e os sábados de 9 a 13 horas.

 

A área de autocaravanas conectouse ao sistema de saneamento

A área de autocaravanas situada na Avenida de Portugal vén de ser conectada ao sistema de saneamento xeral, de tal xeito que os vertidos dos usuarios deste espazo van directamente, a través dos colectores, á EDAR de Guillarei. Deste xeito, coa obra acometida polo Consorcio do Louro, eliminouse a fosa séptica que ata entón recollía as augas fecais. O elevado número de autocaravanas que empregan esta área facía que a fosa séptica tivese que ser baleirada frecuentemente co conseguinte desembolso económico.

 

Sábado, 6 de agosto de 2016 

Exposición do censo electoral do 8 ao 15 de agosto

Dende o próximo luns, 8 de agosto, estará en exposición pública o Censo Electora que estará vixente nas eleccións ao Parlamento de Galicia a celebrar o 25 de setembro. Os interesados poden consultar os seus datos de luns a venres de 9 a 14h ata o luns 15  na Oficina de Empadroamento da Casa Consistorial. Nesas mesmas datas os electores poderán presentar as reclamacións que estimen oportunas.  Lembramos que é de especial interese a consulta do censo electoral para comprobar que os seus datos figuran correctamente a aqueles electores que veñen de cumprir os 18 anos, e exercerán o seu dereito ao voto por vez primeira, así coma a aqueles que mudaron de enderezo recentemente.

 

Venres, 5 de agosto de 2016 

179 veciños doaron sangue na última visita da unidade móbil no mes de xullo

O Concello de Tui e a Axencia Galega de Sangue, Órganos e Tecidos amosan o seu agradecemento á poboación de Tui pola excelente resposta á campaña de doazón de sangue desenvolvida no municipio os pasados días 18 e 19 de xullo cando 179 veciños se achegaron á unidade móbil para realizar unha doazón.

Do total de persoas que se achegaron ata unidade situada na Praza de Galicia 152 puideron doar sangue e 7 deles era a primeira vez que o facían.

Esta resposta da poboación tudense continúa na liña dos últimos anos. Así compre lembrar que en 2015 houbo 1.048 doazóns de sangue en Tui co que sitúa a media anual en 62 doazón por cada mil habitantes, unha cifra que está por riba da media galega. Precisamente grazas a esta boa resposta a unidade acode unha vez ao mes á cidade. Tui conta con 2.504 doadores censados que realizaron 16.755 doazóns de sangue dende a primeira visita da unidade móbil do CTG en marzo de 1995.

 

Mércores, 3 de agosto de 2016 

Convocados dez postos de venda directa para a VI Festa Gastronómica do sábado 13 de agosto

O Concello de Tui convoca dez postos dobres de venda directa para a VI Festa Gastronómica que se celebrará na rúa Lugo o sábado, 13 de agosto, de 20 a 00h, dentro da Festa do Miño.

A esta convocatoria só poderán optar asociacións culturais do municipio de Tui inscritas no rexistro municipal de asociacións, debendo presentar mañá, xoves, e o venres o modelo normalizado de solicitude no rexistro de entrada do Concello entre as 9 e as 14h. Deberán acompañar copia do CIF da asociación, nomeamento da xunta directiva, DNI do presidente da asociación, os certificados de manipulador de alimentos de cada membro participantes así coma a carta de produtos á venda e os prezos dos mesmos.

As bases desta convocatoria poden consultarse na web municipal, no taboleiro de anuncios da casa do concello ou no departamento de Cultura.  Segundo se recolle nas mesmas os produtos que se poñan á venda deberán ser naturais, autóctonos e elaborados artesanalmente, amais permitirase á venda de auga, refrescos, cervexa ou viño. Os participantes deberán aboar unha taxa de 14,90€,  pola ocupación de vía pública cun posto de venda ambulante de 10 metros cadrados.

 

Diego das Dores, remero del club Remo do Miño Seta, concentrado con la selección nacional

Desde el pasado lunes, que partió con destino a Bañolas (Girona), Diego das Dores, remero peso ligero del Club Remo do Miño Seta, se encuentra concentrado con la selección nacional para realizar  pruebas con el objetivo de formar parte de una de las tripulaciones de la mencionada categoría que se desplaará al Campeonato del Mundo.

Das Dores es actualmente medalla de plata en cuatro con timonel y ocho absoluto en el reciente campeonato de España que se celebró a finales de junio en el lago de Bañolas.

Si todo va bien y consigue meterse en una tripulación, a finales de este mes, irá a Rotterdam (Holanda) donde disputaría el campeonato del Mundo Junior, Sénior y Sub 23 de botes no Olímpicos.
 

O 24 de setembro celebrarase o II Torneo de Xadrez da Eurocidade

O sábado, 24 de setembro, desde as 10 horas, celebrarase o II Torneo de Xadrez da Eurocidade organizado polos clubs Xadrez Tui e Xadrez Infortui xunto ao Concello de Tui e a Cámara Municipal de Valença.

A presentación desta actividade tivo lugar na Cámara de Valença por parte dos responsables de deportes das dúas cidades, Laureano Alonso e José Monte, o director técnico do torneo e representante de Xadrez Galega, Roberto Paramos, e o presidente do club Xadrez Tui, Luís Fernández.

O concelleiro de Deportes de Tui, Laureano Alonso, explicou coma o xadrez será a segunda modalidade deportiva, despois do fútbol sala veterano, da que a Eurocidade conte cun club. Ao tempo destacou o interese por potenciar a práctica do xadrez por parte dos dous clubs tudenses o Xadrez Tui e o Xadrez InforTui. Amais o vereador de Desporto de Valença, José Monte, avanzou que en setembro no novo curso escolar o xadrez pasará a ensinar nas escolas valencianas.

Roberto Paramos de Xadrez Galego destacou que este II Torneo de Xadrez da Eurocidade é un evento único en Europa ao celebrarse entre dous países. Ao tempo subliñou que a súa celebración fará da Eurocidade un referente do xadrez tanto a nivel galego, nacional coma internacional. No mesmo culminará o traballo de formación de xadrez que se realizará ao longo do ano.

Por último o presidente de Xadrez Tui, Luís Fernández, amosou a total colaboración do seu club e a intención de estreitar lazos cos xogadores de Valença.

Pola mañá a competición terá lugar na Área Panorámica de Tui e pola tarde na Praça da República de Valença, onde se disputarán as finais. Está previsto a participación de 120 xogadores dende A Coruña ata Faro, sendo a metade de cada país. A inscrición está aberta ata o mes de setembro en xg@xadrezgalego.net ou no teléfono 986 26 02 59.

 

Martes, 2 de agosto de 2016 

Comeza o pintado da sinalización horizontal no casco urbano

Hoxe comezan os traballos de pintado da sinalización horizontal no casco urbano de Tui. En concreto actuarase na Avenida da Concordia polo que se solicita a colaboración cidadá respectando as prohibicións de non aparcar. Estes traballos continuarán nos próximos días en todas as rúas do casco urbano cun investimento que chega aos 100 mil euros, e para os que o Concello conta cos preceptivos permisos. Este trámite administrativo foi precisamente o que demorou a execución do pintado.

O pintado da sinalización comezou xa en Guillarei, na rotonda entre a N-550 e Po-404 logo dos traballos de arranxo do firme executados. Desde onte estanse a realizar estes labores na estrada entre Guillarei e a Avenida da Concordia ao seu paso pola parroquia de Rebordáns.

Por outra parte dende hoxe estará pechada ao tráfico a rúa Bispo Salvado dende o cruzamento coa rúa Martínez Padín e ata a ponte sobre o río Tripes, debido a traballos de arranxos do firme.