agostotui

Venres, 31 de agosto de 2007

O Cantautor Javier González Méndez presenta hoxe en Tui “Sin novedad en el frente”

O concello de Tui en colaboración con Radio Líder e Punto Radio presenta mañá venres, ás 22h, no Paseo da Corredoira ao cantautor Javier González Méndez, en concerto.

Este artista presentará en Tui, dentro da súa xira de verán 2007, o seu último traballo “Sin novedad en el frente” acompañado polo grupo “La Mafía”

Explica Javier González que o obxectivo deste traballo discográfico é enviar unha mensaxe á sociedade de que estamos cheos de batallas diarias, nas que hai que aceptar as vitorias e derrotas estando preparados para outra batalla nova na vida. En “Sin novedad en el frente” este cantautor reflicte historias que o cantautor coñece ou imaxina, póndose no lugar de persoas anónimas.

O espectáculo completarase coa actuación do grupo “Deaf Noise”.

Javier González&La Mafia

Deaf Noise

Data: Venres ás 22.00h

Lugar: No Paseo da Corredoira

Organizan: Concello de Tui, Punto Radio e Radio Líder

Xoves, 30 de agosto de 2007

Incendio dun coche no aparcamento do Froiz na rúa Casal Aboy

Antonte á noite, pouco despois das 11.20 da noite, un Seat Marbella que estaba a saír da garaxe do supermercado Froiz na rúa Casal Aboy, prendeu lume e pese a que o seu propietario tentou sacalo completamente da garaxe non o logrou. As lapas estendéronse rapidamente polo vehículo que resultou totalmente calcinado. Até o lugar desprazouse a Policía Local, a Garda Civil, o Grumir e os bombeiros de Valença

Debido a gran cantidade de fume que se desprendía foi preciso a presenza dos bombeiros voluntarios de Valença que acudiron con 2 camións bomba, vinte efectivos e equipos de respiración autónoma.

As lapas xeraron unha gran cantidade de fume que encheron todo o aparcamento do Froiz e tamén o dos veciños. Igualmente o lume entrou polo conduto de aire ao interior do supermercado, o que provocou que saltasen os detectores de fume que a súa vez dispararon os aspersores contraincendios. A auga caída no interior do supermercado estragou parte da mercadoría perecedoira.

O aparcamento do Froiz permanecía onte a primeira hora da mañá precintado, e entorno ás dez e cuarto foi retirado o Seat Marbella, que coma diciamos ardeu completamente. Para retiralo do interior da garaxe foi preciso a intervención dun patrol da Garda Civil, que tirou do coche até o exterior onde foi subido xa a unha grúa.

O supermercado permaneceu pechado onte á mañá debido os labores de avaliación dos danos, e seguramente tamén as tarefas de limpeza precisas.

Exposición de pintura e curso de patrón no Club Náutico San Telmo

O Club Náutico San Telmo acolle estes días unha exposición de Antonio Baños Saldaña que amosa paisaxes da zona feitas en óleos e acuarelas, ao través duns sesenta cadros.

Esta é unha das actividades que o Club Náutico San Telmo ofrece aos seus socios neste verán, pero non a única, coma explicaba o seu presidente Álvaro Hermida. Precisamente este sábado o Club inicia un curso para obter o título de patrón de embarcacións, e lembraba que o Náutico conta xa cunha escola oficial recoñecida.

Por último Álvaro Hermida explicaba que o Náutico cada vez ten máis influencia na zona, e destacaba a lista de espera para prazas de atraque que hai no porto deportivo.

Citas hoxe

Cun concerto a cargo dos alumnos do Conservatorio de Música Profesional de Tui hoxe remata o III Ciclo de Concertos no Claustro Gótico da Catedral. A cita será ás nove desta noite.

Continúa, tamén hoxe, a Semana Cultural Xuntanza en Randufe. A cita será ás 21.30h no adro da Guía coa actuación do grupo “A Roda”. Mañá venres as actividades comezarán ás nove e cuarto co grupo folk “Meigallo” e logo o Mago Cyrille porá en escena o espectáculo “Abracadabra”.

Mércores, 29 de agosto de 2007

Citas hoxe en Tui

Andrea González ofrecerá hoxe mércores, ás 21h, un concerto no claustro gótico da Catedral de Tui no marco do III Ciclo de Concertos que alí se están a celebrar. O ciclo péchase mañá xoves cun concerto a cargo dos alumnos do Conservatorio Profesional de Música de Tui.

Martes, 28 de agosto de 2007

O sábado comeza no Náutico San Telmo un curso de patrón de embarcacións

Este próximo sábado, 1 de setembro, comeza a impartirse no Club Náutico San Telmo de Tui un curso de Patrón de Embarcacións. As clases terán lugar os sábados pola tarde e os domingos pola mañá, realizándose o exame a mediados de outubro.

Impartiranse clases para obter o título de Patrón de Navegación Básica, Patrón de Embarcacións de Recreo e Patrón de Iate.

Os interesados poden acadar máis información no Club de luns a venres de 11.30 a 13.30, e de 16 a 20, no teléfono 986.60.24.64 ou no correo electrónico nautico@cnsantelmo.com.

O BNG levará ao pleno de setembro unha moción sobre o Centro Interfederado

O Bloque Nacionalista Galego vai presentar unha moción para o seu debate no pleno de setembro, na que proporá a sinatura dun convenio coa Dirección Xeral para o Deporte da Xunta de Galicia, para que esta entidade se faga cargo da xestión e gastos de mantemento do Centro Interfederado de Remo e Piragüísmo.

Previamente os nacionalistas anuncian que consensuarán a moción cos outros grupos políticos, para que poida saír adiante, segundo avanzaba o seu voceiro, Laureano Alonso.

Puntualizaba Lano Alonso que con esta moción buscan que a Dirección Xeral leve a xestión do Centro.

Explicaba o voceiro do BNG que segundo o último informe de intervención o Centro Interfederado está a xerar un gastos, cos que no seu parecer non ten que correr o Concello.

Citas para hoxe

Esta noite rematan as Festas na honra á Virxe da Rocha en Caldelas. A última verbena correrá a cargo de Lamas e América.

Por outra parte hoxe continúa o Ciclo de Concertos no Claustro Gótico da Catedral. Ás nove desta noite actuará Patricia González, frauta, e Rasa Jakutyte, piano.

Sábado, 26 de agosto de 2007

Dez mil persoas disfrutaron dos once espectáculos do Verán Cultural en Tui

A Concellería de Cultura de Tui vén de facer unha valoración moi positiva das actividades desenvolvidas durante os meses de xullo e agosto no marco da programación cultural do Verán da cidade.

Máis de dez mil persoas asistiron aos once espectáculos programados entre o 13 de xullo e o 19 de agosto, que xiraron entorno á música, o teatro e o cinema.

Os actos máis multitudinarios foron os concertos que na parte posterior da Área Panorámica ofreceron a pasada fin de semana Milladoiro e Mercedes Peón, pondo así un broche musical destacado a esta programación.

Reeditáronse ao longo destes dous meses citas clásicas do verán tudense coma o Encontro dos Pobos, o Festival de Bandas de Música ou a Noite Internacional do Miño en Rebordáns.

Tui participou amais no percorrido de “Las rutas de la Barraca” unha proposta de teatro universitario que chegou a Galicia ao igual que entre 1932 e 1936 fixera unha compañía universitaria dirixida por García Lorca.

Dende a Concellería de Cultura pensouse tamén nos máis pequenos programando para eles dúas proxeccións de películas de animación, nas que se tivo unha exitosa resposta por parte das familias que ateigaron a praza de San Fernando.

A estas actividades hai que engadir o Encontro Internacional de Corais da Ribeira do Baixo Miño, cuxa organización correspondeu este ano a Tui e Valença, no percorrido anual que este evento realiza pola zona.

Pero amais nesta programación houbo oco tamén para a música clásica cos dous concertos celebrados na Igrexa de Santo Domingo no marco do festival Via Stellae.

O Concelleiro de Cultura de Tui, Moisés Rodríguez, destaca a excelente acollida que tivo esta programación, sinalando a “fidelidade do público coa programación cultural o que supón un incentivo máis na aposta que dende a Concellería temos feito por ofrecer unha programación cultural estable e de calidade”. Moisés Rodríguez amosou o seu agradecemento ás miles de persoas que disfrutaron do verán cultural de Tui, así coma as entidades e institucións que apostan cada ano pola cidade, e contribúen a facer posible esta programación e o alto nivel acadado na mesma. Salienta así o edil o importante papel de entidades coma a Consellería de Innovación e Industria, a Deputación de Pontevedra, Turismo Rías Baixas, a Fundación Caixa Galicia e Caixanova. Pero tamén quere deixar constancia da súa felicitación á Escola de Gaitas e Baile “San Fins” pola organización da VIII Noite Internacional do Miño en Rebordáns, que abre cada verán unha fiestra ao folclore máis internacional no Parque do Laxal, así coma ao grupo Do Lusco ó Fusco que organiza o XIV Encontro dos Pobos. Igualmente o Concelleiro amosa o seu recoñecemento á Coral da S.I. Catedral que levou a organización do Encontro de Corais da Ribeira do Baixo Miño.

Moisés Rodríguez destaca por outra parte o importante traballo realizado polo persoal da Concellería de Cultura, e polos traballadores municipais xa que sen o seu labor labor sería imposible levar a cabo esta programación.

Unha vez pechada a programación do Verán Cultural, a actividade retomarase no mes de setembro os días 22 e 23 cunha dobre proposta teatral no marco das celebracións dos 125 anos de teatro galego, e por outra o día 28 cun dobre concerto de Brath e Faltriquera. Esta actividades desenvolveranse xa no Teatro Municipal na Área Panorámica.

Actuacións esta noite no Centro Cultural de Pexegueiro

O Centro Cultural “O Mosteiro” de Pexegueiro acolle hoxe sábado, a partir das nove da noite, a actuación do grupo de baile e gaitas “O Mosteiro” de Pexegueiro e o grupo “Quejío folk” de Cáceres.

Hoxe inaugurase cun concerto a tenda de música JL Música

A Banda de Música da Casa do Pobo de Tangil de Monçao de Portugal ofrecerá hoxe, ás 21.30h, un concerto co gallo da inauguración da tenda de música JL Música. Será na praza que está a carón da Praza de Abastos.

Esta tenda de música vén cubrir un oco importante que existía na comarca xa que os músicos da comarca tiñan que desprazarse ata Vigo para comprar un instrumento ou calquera peza. O seu propietario, Jose Luis Holgado, explicou na Radio Municipal de Tui, que este foi un dos motivos que o levou a abrir esta nova tenda.

En JL Música poderanse atopar instrumentos de Calidade, así coma instrumentos para bebés, a material pedagóxico ou para músicos, e agasallos relacionados coa música.

Éxito de feira dos cabalos de San Bartolomé

Nunha mañá totalmente soleada e con agradables temperaturas comezou a tradicional Feira dos Cabalos de San Bartolomé, dende primeira hora da mañá de onte congregou a numeroso público na rúa Loureiro. A gran afluencia motivou retencións puntuais ao longo da mañá na Avenida da Concordia, que estaba totalmente ateigada de coches estacionados que ían incluso máis aló da coñecida coma ponte de Magnolia.

No recinto feiral déronse cita coma cada ano centos de exemplares equipos, cabalos, potros e ponis, que lucían o seu mellor aspecto, e que fixeron as delicias dos seareiros dos cabalos.

O recinto, perfectamente acondicionado e acotado, permitiu darse un paseo e contemplar os exemplares presentes. Ao longo do día houbo actividades paralelas coma unha proba de habilidade, presentación de sementais ou carreira de sacos, ou exhibicións de doma.

E por suposto na feira non faltaron nin os polbeiros, nin as rosquilleiras, así coma varios postos de material hípico.

Venres, 25 de agosto de 2007

Polémica pola celebración este domingo dunha proba de motocross en Randufe

A celebración esta fin de semana dunha proba de MotoCross en Randufe volveu reavivar a polémica entre os veciños e o Moto Club Randufe, enfrontados dende hai tres anos pola construción dun circuíto de MotoCross na zona dos Muíños, próximo ás casas, e que se atopa paralizado.

O colectivo de veciños afectado estase a mobilizar porque non están dispostos a soportar o ruído que xeran as motos a 150 metros das súas casas, e no entorno dunha zona natural coma os muíños do Tripes.

Dende o Concello concedeuse autorización para esta proba concreta do domingo, e dende o Moto Club Randufe sinalan que non están a facer un novo circuíto, senón simplemente a arranxalo para a proba deste domingo, e din que o ruído non supera nin na metade o tope establecido na ordenanza municipal de ruídos.

Representantes dos Veciños e do Moto Club estiveron onte na sintonía da RMT expondo cada un deles o seu posicionamento.

Mónica Álvarez, voceira dos veciños dos Muíños e de Circos explicaba coma o circuíto onde se vai disputar a proba deste domingo está a 100 metros dos sendeiros e a 150 metros da casa máis próxima. Remontábase á orixe desta política coa construción dun circuíto, que consideran ilegal, e que foi paralizado ao non contar coas preceptivas licenzas.

Engaden que o Concello para a proba deste domingo deu un permiso referido unicamente á celebración desta actividade, pero denuncian que se están a facer movemento de terra que na práctica supoñen a construción dun novo circuíto no seu parecer, algo que é negado polo Moto Club Randufe que explican que están só acondicionándoo para este domingo.

Quéixanse os veciños do trato recibido polo equipo de goberno que dá longas a unha solución a este problema. Tamén apuntan que non van parar até paralizar este circuíto, e se é preciso non quedarán só na vía administrativa, anunciando que poden chegar incluso ao Tribunal dos Dereitos Humanos.

Os veciños convidan a quen desexe este domingo a achegarse até a zona e comprobar a problemática que supón este circuíto.

Tamén estivo na RMT Andrés, do Moto Club Randufe, que explicaba que o circuíto estaba feito dende 1992 empregándose inicialmente para xincanas, e engadía que o circuíto é anterior ás casas que alí hai. Tras quedar en desuso durante anos, o Moto Club Randufe decidiu limpar e acondicionar a zona, tras contar cunha cesión da Comunidade de Montes.

Explicaba que tralas denuncias dos veciños, este só se empregou dous días, e eles mesmos puxeron os indicadores de que o circuíto estaba fóra de servizo. Engadía Andrés que tras realizar unha medición acústica o nivel é a metade do permitido na actual ordenanza, e sinalaba que fixeron un proxecto de legalización, sobre o que tiveron a autorización de Medio Ambiente e Política Territorial, para que o Concello poida dar a licenza previa para o circuíto.

Engadía Andrés, que o Concello outorgoulle a licenza para esta proba que cumpre todos os requisitos.

O representante do Moto Club Randufe sinalaba que dende este colectivo dirixíronse aos afectados nas parroquias de Pazos de Reis e de Randufe, e que non lles puxeron trabas.

Autobús para acudir aos partidos do Celta en Balaídos dende Tui

Este domingo, ás 10.45h, sairá dende Tui o autobús para acudir ao primeiro partido da Liga no Estadio Municipal de Balaídos que pon a Peña Celtista Tudense a dispor dos socios celestes. O autocar fará paradas na Gasolineira de Guillarei, na Gándara e no Cerquido.

O Partido xogarase ás 12 entre o R.C. Celta e o Córdoba.

Feira dos Cabalos de San Bartolomé e festas

Hoxe celébrase a tradicional feira dos cabalos de San Bartolomé, a máis antiga posiblemente das dúas que se celebran en Tui. Será na rúa Loureiro.

Amais A feira arranca ás nove da mañá con compra e venda de gando, e continuará ao longo de toda a xornada, sendo a primeira vez que se celebra tamén pola tarde. Haberá diferentes actividades ao longo do día.

E hoxe continúa tamén a programación das Festas de San Bartolomé. Ás 12 haberá misa solemne con procesión acompañada pola Banda de Música Popular de Tui. E a verbena da noite será amenizada por Azúcar e Sensación.

“Vida nas rúas” de ACITUI presenta varias actividades na Corredoira esta fin de semana

A asociación de Comerciantes e Industriais de Tui, ACITUI, presenta esta fin de semana varias actividades no marco da programación de “Vida nas rúas”.

Por unha banda esta noite continúa o IV Festival Internacional de Teatro e Artes de Rúa que se poderá disfrutar ata o domingo no Paseo da Corredoira. Hoxe, mañá e pasado actuarán os grupos Paiaso “Chacovachi” , Maku Jarrak, Pipo Estrella e Acromics.

Por outra parte, logo do éxito obtido a pasada fin de semana, ACITUI volve organizar o sábado e o domingo unha Feira de Oportunidades na que os comercios asociados porán á venda a prezos de liquidación parte do seu stock. A feira abrirá sábado e domingo ás 6 da tarde na Corredoira.

E amais o sábado, ás 21h, actuará na Corredoira o grupo folclórico “Seixos Albos” de Areas.

Remata a semana cultural de Caldelas e comeza a de Randufe

Esta noite remata a semana cultural de Caldelas organizada pola Asociación Cultural “A Insúa”. Pechará nesta programación ás dez da noite co “Show A Insua” con play-backs de nenos e maiores. Xa na fin de semana celebraranse as festas na honra á Virxe da Rocha.

Por outra parte con deporte comeza a Semana Cultural organizada pola Asociación Xuntanza de Randufe. Mañá sábado no campo de fútbol municipal disputarase ás once un partido de fútbol infantil, e ás seis da tarde xogarán solteiras contra casadas, e unha hora despois solteiros contra casados.

O domingo ás dez da mañá sairá dende o adro da Guía a XXI Carreira Popular Xuntanza.

Xoves, 23 de agosto de 2007

Política Territorial licita as obras da estrada Virxe do Camiño Mosende e fixa para setembro o levantamento de actas previas á ocupación

A Consellería de Política Territorial licita hoxe, no Diario Oficial de Galicia, o acondicionamento da estrada PO-342 no treito Virxe do Camiño Mosende, entre os concellos de Tui e O Porriño. A obra ten un orzamento de 3.649.848,32 euros, e un prazo de execución de 12 meses.

Na realización dos traballos terase en conta a particularidade desta estrada xa que boa parte da mesma coincide co trazado do Camiño Portugués a Santiago. Nos sete quilómetros que serán obxecto da obra ampliarase a calzada a 8 metros de ancho, rectificaranse as curvas e mellorarase a seguridade dos peóns cunha senda peonil de 2 metros.

Por outra parte Política Territorial anuncia tamén no DOG o levantamento de actas previas á ocupación dos bens e dereitos afectados por estas obras no tramo Virxe do Camiño-Mosende.

O levantamento de actas realizarase no mes de setembro na Casa do Concello de Tui e no Centro Cultural de Mosende.

Así do 13 ao 20 de setembro de 9.30h a 14h realizarase o levantamento de actas na casa do Concello de Tui establecéndose cada día un número determinado de predios que se poden consultar no anuncio que onte aparecía no DOG. No Centro Cultural de Mosende o levantamento de actas realizarase o 21 de setembro de 9.30 a 14h.

A relación de titulares dos bens e dereitos afectados, así coma o plano parcelario correspondente estará exposto na Casa do Concello de Tui e na do Porriño, así coma no Servizo Provincial de Estradas en Pontevedra.

Ao levantamento de actas deben acudir os titulares afectados persoalmente ou representados, achegando os documentos acreditativos da súa titularidade, co DNI e o último recibo da contribución.

Mañá venres celébrase Feira dos Cabalos de San Bartolomé

Mañá venres, día 24, celébrase a tradicional feira dos cabalos de San Bartolomé, a máis antiga posiblemente das dúas que se celebran en Tui. Será na rúa Loureiro.

A feira arranca ás nove da mañá con compra e venda de gando, e continuará ao longo de toda a xornada, sendo a primeira vez que se celebra tamén pola tarde. Haberá diferentes actividades ao longo do día para que o público que acuda se divirta segundo explicaba Marcos González,organizador da Feira, na Radio Municipal de Tui

Ás 11 haberá unha proba de habilidade a cabalo, logo carreira de sacos, presentación dos mellores sementais, exhibición de rexoneo a cargo de Manuel Vázquez Boullosa.

Tamén haberá unha solta de coellos. Pola tarde, tralo xantar no recinto da feira, haberá exhibición de doma de alta escola a cargo de Alejandro Nandez de Nigrán. Continuarán cunha xincana en paralelo, exhibición de doma e circo a cargo de Ernesto Prado, carreira de cabalos humanos, exhibición de doma vaqueira.

Este ano terán tamén unha carruaxe de época e quen o desexe ao longo da feira poderá dar un paseo no mesmo.

Marcos González agradecía ao Concello de Tui a colaboración e implicación nesta feira do cabalo.

Os Veciños dos Muíños e Circos solicitan do concello que evite a celebración dunha proba de motocross en Randufe esta fin de semana

A Asociación de Veciños do Barrio dos Muíños e Circos en Randufe presentaron onte un escrito de denuncia no Concello de Tui polo que solicitan se tomen as medidas preventivas necesarias para evitar a celebración, esta fin de semana, dunha proba puntuable para o Campionato Galego de Supercross, que os veciños cualifican de “ilegal”.

Para os veciños resulta incomprensible que o concello patrocine este evento deportivo que se vai realizar nunha zona sobre a que decretou suspensión de actividade e de obras, en razón dun expediente disciplinario que se segue contra o Moto Club Randufe.

Aclaran os denunciantes que eles non se opoñen a proba senón a súa celebración nestes terreos. E engaden que un mínimo rigor administrativo debe “impedir” que o propio concello patrocine e autorice esta actividade nuns terreos sobre os que ten suspendida a actividade.

Os veciños remitiron copia do escrito presentado no Concello á Secretaría Xeral para o Deporte, á Federación Galega de Motociclismo, ás Consellerías de Medio Ambiente, Medio Rural e Política Territorial.

Mércores, 22 de agosto de 2007

Mañá remata o prazo para inscribirse no Obradoiro Básico de Informática e Internet promovido polo Concello

Mañá, xoves, remata o prazo para inscribirse no Obradoiro Básico de Informática e Internet que promove o Concello de Tui e será impartido polo Dinamizador da Sociedade da Información.

Este curso vai dirixido a persoas maiores de 30 anos que teñan un baixo nivel ou que non teñan coñecementos de informática.

As clases terán lugar do 27 de agosto ao 28 de setembro os luns, mércores e venres de 10 a 11.30h. Os interesados deben inscribirse no Centro de Formación en Guillarei ou no teléfono 986.60.39.49.

Segundo concerto co Ciclo no Claustro da Catedral

Ás nove desta noite prosegue o III Ciclo de Concertos no claustro gótico da Catedral de Tui. Hoxe será a quenda de Noelia Castiñeira ao violín, Rasa Jakutte ao piano, e Marta Quintana á arpa.

Hoxe comezan as Festas de San Bartolomé de Rebordáns

Hoxe comezan as festas na honra a San Bartolomé en San Bartolomé de Rebordáns, en Tui. O programa ábrese co I Festival da Canción que se celebrará a partir das nove da noite, presentado por Ramón Presley e no que actuarán cantantes que están empezando xunto a outros xa coñecidos coma Alberto Cuña, Miriam de OT ou Javier Álvarez.

Mañá xoves haberá verbena a cargo de Costa Blanca e Zereza.

O venres, ás 12 do mediodía, haberá misa solemne na honra a San Bartolomé con procesión acompañada pola Banda de Música Popular de Tui. A verbena da noite será amenizada por Azúcar e Sensación.

Continúa a semana cultural de Caldelas

Hoxe prosegue a Semana Cultural de Caldelas que organiza a Asociación Cultural “A Insua”. As dez desta noite actuará o paiaso Popín, e ás once está previsto que a Asociación A Insua represente a obra de teatro infantil “A visita do inspector”.

Exposición no Náutico San Telmo

Os salóns do Club Náutico San Telmo acollen ata finais de mes unha exposición de pintura Antonio Baños Saldaña, residente en Goián.

A mostra pode visitarse até o próximo día 31 de agosto.

Martes, 21 de agosto de 2007

Balanzo da Fin de Semana

Éxito de público nas actividades celebradas esta fin de semana en Tui e que se abrían na noite do venres cun exitoso concerto de Milladoiro na parte posterior da Área Panorámica. Este grupo repasou en Tui os seus éxitos e tamén ofreceu algúns temas do seu disco dedicado a Manuel María.

Por outra parte o Paseo da Corredoira acolleu a primeira fin de semana do Festival Internacional de Teatro e Artes de rúas que congregou a numeroso publico que ateigou o paseo para disfrutar dos espectáculos que se foron sucedendo. Era unha iniciativa de ACITUI.

E exitosa foi tamén a iniciativa da I Feira de Oportunidades, que o sábado e o domingo se celebrou no Paseo da Corredoira que se convertiu nun ir e vir de xente.

E se a fin de semana se abriu con música, pechouse igualmente con música co concerto que ofreceu Mercedes Peón no aparcamento municipal. O público disfrutou do son directo desta artista galega de sona internacional que trouxo ata Tui o seu “Sihá”.

Balanzo da Fin de Semana

Autobús para acudir aos partidos do Celta en Balaídos dende Tui

A Peña Celtista Tudense vai pór de novo este ano un autobús a dispor dos afeccionados do Celta para acudir aos partidos que xogue o equipo en Balaídos. Ao estar en segunda división os encontros disputaranse os sábados pola tarde, domingo de mañá ou de tarde. O autobús sairá de Tui hora e cuarto antes do encontro.

O primeiro autobús sairá ás 10.45 o domingo, día 26, primeira xornada de liga. Pararán na Gasolineria de Guillarei, na Gándara e no Cerquido.

Por outra parte a Peña Celtista acompañará tamén ao equipo nalgúns partidos que xogue fóra, para o que teñen programado catro viaxes. O primeiro vai ser a Gijón o 27 de outubro, con paradas en Ribadeo.

A segunda viaxe farana o 22 e 23 de marzo a Soria, visitando Yecla e Silos, combinando a faceta cultural.

E despois unha terceira viaxe será a Ferrol en abril, dun só día, con xantar en Betanzos.

O cuarto será a Salamanca, visitando o Lago de Sanabria.

Por outra parte o vicepresidente da Peña Celtista, Lano Alonso, daba conta que teñen aberto o prazo de inscrición para novos socios, contando xa na actualidade con 130 asociados. Os interesados poden dirixirse ao 653.842.130.

Este mércores celébrase o I Festival da Canción en San Bartolomé

Este mércores celébrase en San Bartolomé o I Festival da Canción a partir das nove da noite, dentro do programa de Festexos de San Bartolomé.

Maica Diz, que está levando o peso da organización explicaba que no Festival daranse cita artistas noveis que cantarán versións e tamén cantantes con experiencia con traballos discográficos ou maquetas que cantarán os seus propios temas coma Alberto Cunha, Javier Álvarez, ou Miriam de OT. Contarán tamén co humorista Freddy Crugger e será presentada por Ramón Presley.

O 90% dos participantes no Festival son da comarca coma Patricia Castro, Alby Estévez, Sandra Martínez, Alba Pérez e Laura Núñez. Haberá amais un participante de Pontevedra, e dous de Vigo.

O Festival da Canción durará entorno a 3 horas nas que o público poderá disfrutar coa actuación en directo de todos estes cantantes.

Tudenses Unidos Independentes solicita a creación dunha Xunta de Portavoces

Tudenses Unidos Independentes presentou unha moción no Concello na que solicita a creación dunha Xunta de Portavoces dos grupos municipais, presidida polo Alcalde, para tratar os asuntos excepcionais e urxentes.

No texto da moción apuntan dende TUI que de xeito independente ás Comisións Informativas consideran que pode ser “eficaz e operativo” dispor no Concello dun instrumento político de participación para asuntos excepcionais e urxentes coa participación directa e activa do alcalde e os voceiros municipais. Engaden que dita Xunta de Portavoces pode ser convocada polo Alcalde ou por calquera portavoz concretando o asunto e motivo da urxencia.

O Concello de Tui publicou no BOP as bases que rexeran a adxudicación das vivendas do antigo cuartel de Caldelas

O Boletín Oficial da Provincia de Pontevedra recolleu un anuncio do Concello de Tui polo que se dá conta da aprobación das bases que rexerán a adxudicación das vivendas do antigo cuartel de Caldelas, e que se somete agora a exposición pública polo prazo de oito días. Igualmente se establece que o prazo para presentar as solicitudes para acceder a estas vivendas será dun mes dende que apareza o último anuncio publicado no BOP ou no DOGA.

Trátase da adxudicación mediante venda das 18 vivendas e unha para discapacitados construídas polo Concello no antigo cuartel da Garda Civil en Caldelas, e que terán un custe que oscilará entre os 73.597,21 € da Vivenda tipo F aos 78.721,32 da vivenda para discapacitado.

Nas bases recóllense as características destas vivendas, así coma as condicións da adxudicación e as características para a presentación de solicitudes.

O Kaiak Tudense subcampión de España senior

O Kaiak Tudense proclamouse esta fin de semana subcampión de España na categoría senior. A pesar de conseguir un total de sete medallas: un ouro, 3 pratas e 3 bronces, os de Tui non puideron co Breogán Outón Xunqueiriña e tiveron que conformarse co segundo lugar na xeral de clubs, a terceira posición foi para a Agrupación Deportiva Zamora Iberdrola.

O subcampionato do club tudense cimentouse na excelente actuación do seu equipo de kaiak masculino. Así no k4 1.000 metros, proba raíña do campionato, o Kaiak Tudense conseguiu o ouro por terceiro ano consecutivo, a embarcación estaba formada por Roberto Leituga, Iván Alonso, Víctor Rodríguez e Diego Piña.

Tamén en kaiak e sobre a distancia de 1000 metros, pero esta vez na modalidade de k2, houbo piragüístas de Tui no podio, así a prata foi para o k2 de Roberto Rodríguez e Iván Alonso, e o bronce para Diego Piña e Jovino González. Xa na distancia de 500 metros, o k4 de Roberto Leituga, Iván Alonso, Víctor Rodríguez e Diego Domínguez, conquistaban a medalla de prata, e o k2 de Diego Piña e Jovino González, volvían subir ao caixón para recoller outra medalla de bronce.

Na modalidade de canoa, unha medalla de prata para o c2 1000 metros de Jose Luís Bouza e Daniel Costa, un bronce en c1 500 de José Luís Bouza, e dous cuartos postos do C4 en 1000 e 500 metros, foron os resultados mais destacados.
En damas, Ana Varela finalizou en 5º lugar en k1 1000 e 500 metros, así como en k2 500 metros con Silvia Vázquez.

O Paseo da Corredoira acolleu o IV Encontro Internacional de Teatro e Artes de Túa Cidade de Tui

A pasada fin de semana comezou en Tui o VI Encontro Internacional de Teatro e Artes de Rúa Cidade de Tui, que a Asociación de Comerciantes e Industriais de Tui, ACITUI, leva a cabo dentro da súa programación de “Vida nas Rúas 07”.

A partir das 20.00 horas da tarde do venres, sábado e domingo, espectáculos de clown, malabares, acrobacias e humor, fixeron disfrutar ao númeroso público que se congregou no Paseo da Corredoira. Os artistas invitados foron a Compañía “Nuevo Circo”, “Los Hermanos Corpo Corto”, Cia. “Kumulus Limbus” e a Cia. “A la Olla Producciones”.

O Festival continuará a próxima fin de semana coa presenza dos seguintes artistas:

PAYASO CHACO VACHI, co seu espectáculo, “CUIDADO UN PAYASO MALO PUEDE ARRUINAR TU VIDA”

MAKU JARRAK, co seu espectáculo “RIN BOM BAM!”

PIPO ESTRELLA, co seu espectáculo: “LA RISA CONTINUA”

ACROMICS, co seu espectáculo “ACROMICS”

Sábado, 18 de agosto de 2007

Hoxe comeza a Semana Cultural de Caldelas, en Tui

Dende hoxe sábado e ata o 24 deste mes celébrase a Semana Cultural de Caldelas organizada pola Asociación Cultural, Xuvenil e Deportiva “A Insua”.

Hoxe sábado, ás 21.30h, proxectarase a película “Click”. O domingo a cita será a partir das cinco da tarde na ribeira de Caldelas con xogos populares coma rá, sacos, corda e aros. O luns, ás dez da noite, actuará o grupo de sevillanas “Los Caireles” de Bouzas de Vigo, e logo haberá play-backs.

Ata o venres día 24 proseguirán as actividades con pandereteiras, play-backs, teatro e paiasos, entre outras alternativas.

Mercedes Peón presenta o domingo en Tui o seu último traballo “Sihá”

Un dos máximos expoñentes da música galega destes momentos coma é Mercedes Peón ofrece este domingo, ás 22.30h, no aparcamento municipal, un concerto en Tui para presentar o seu último traballo “Sihá”. Este espectáculo forma parte da programación cultural de Tui do segundo semestre, e a organización corresponde á Concellería de Cultura e á Fundación Caixa Galicia.

“Sihá” hai tres meses que saíu á rúa e no mesmo Mercedes Peón recolle as súas últimas composicións sendo fiel a sí mesma. O do domingo á noite será un concerto sinceiro e moi enerxético, no que estará acompañada por unha banda de gran calidade, ofrecendo xuntos un concerto cheo de enerxía, directo e con Mercedes Peón entregada ao público.

III Ciclo de Concerto no Claustro da Catedral de Tui do 21 ao 30 de agosto

O Claustro Gótico da Catedral de Tui acollerá, do 21 ao 30 de agosto, o III Ciclo de Concertos de Música de Cámara organizado polo Cabildo da Catedral coa colaboración do Concello de Tui.

O primeiro concerto vai ter lugar o martes día 21 ás nove da noite a cargo de varios intérpretes que ao longo do ciclo actuarán tamén coma solistas.

O mércores, día 22, Noelia Castiñeira ao violín; Rasa Jakutte, ao piano, e Marta Quintana, á arpa serán as responsables deste evento. E ao día seguinte actuará Vanesa González ao clarinete acompañada por Rasa Jakutte ao piano.

Na segunda semana, o martes 28, será a quenda de Patricia González, á frauta, xunto a Rasa Jakutte ao piano. O mércores, 29, actuará Andrea González ao piano. E o ciclo pecharase o xoves, día 30, cun concerto dos alumnos do Conservatorio Profesional de Música de Tui.

O 8 de setembro celébrase a II Xornada de Confraternidade Galego-Asturiana

O sábado 8 de setembro vaise celebrar en Tui a II Xornada de Confraternidade Galego-Asturiana organizada pola Asociación Astur-Galaica “La Santina”.

Os actos comezarán ás 11.30h cunha concentración dos asistentes diante do palco da música no Paseo da Corredoira, dende onde se dirixirán ata o Colexio Maristas acompañados por un grupo de gaitas.

Ás 12, na capela deste colexio, celebrarase unha misa oficiada por Don Ricardo García, e ao seu remate terá lugar, nos xardíns do colexio, unha “Espicha”, acto típico asturiano con sidra, bolos preñados e queixo de Asturias.

Ás 2 da tarde celebrarase un xantar cun menú centrado en empanada e fabada, dous produtos gastronómicos representativos de Galicia e Asturias. A festa prolongarase pola tarde amenizada por Kiko Carballo.

As persoas que desexen participar nesta Xornada de Confraternidade deben inscribirse no teléfono 627.170.376 de 19 a 21h.

Asociación Astur-Galaica “La Santina” está integrada por asturianos residentes en Tui e familiares, que coa organización destas Xornadas queren crear un punto de encontro anual para todas as persoas vinculadas a Asturias que residen en Tui ou na comarca.

Éxito da Feira de Oportunidades de Tui

A Asociación de Comerciantes e Industriais de Tui, ACITUI, celebrou a pasada fin de semana a primeira Feira de Oportunidades de Tui.

Durante toda a tarde do sábado e do domingo e ata as 11 da noite, aproximadamente, o Paseo da Corredoira converteuse nun ir e vir de xente que aproveitou a ocasión para mercar artigos de tempada a un bo prezo en todos aqueles establecementos do comercio asociado de Tui que decidiron participar nesta feira.

Tanto os comercios asociados, como a propia Asociación, coinciden en afirmar que o éxito obtido, tanto en ventas como en presenza de público, foi maior do esperado polo que non descartan volver a realizar unha Feira deste tipo en breve.

Dende ACITUI queren agradecer a todos os comercios asociados a súa participación., así como a colaboración prestada por parte do Concello de Tui.

Venres, 17 de agosto de 2007

Hoxe concerto de Milladoiro en Tui

Ás dez e media desta noite comeza o concerto de Milladoiro en Tui. Será na parte posterior da Área Panorámica, nun evento organizado pola Concellería de Cultura de Tui, Caixanova e a Deputación de Pontevedra. A entrada é gratuíta.

Van presentar o seu novo traballo discográfico “25” no que fan unha lectura actualizada das súas composicións. Debido á celebración do Concerto de Milladoiro o aparcamento municipal de Tui permanecerá pechado dende ás 8 desta mañá até o luns ás 12 do mediodía.

O Kaiak Tudense impúxose por clubs no Trofeo Príncipe de Asturias

O Club Kaiak Tudense gañou por clubs o Trofeo Príncipe de Asturias disputado en Pontevedra, ao lograr 135 puntos, seguidos polas Torres Romaría Vikinga con 131 puntos, e o Breogán Outón Xunqueira con 113 puntos.

O Kaiak Tudense pese a non contar coa participación das embarcacións senior de kaiak tanto masculino coma feminino, ao decidir o seu director técnico reservar estas embarcacións para o Campionato de España, logrou un excelente resultado.

O K4 cadete do Kaiak de Oscar Carrera, Pedro Fernández, Rubén Millán e Abraham Fernández logrou a vitoria, ao igual que o C4 tudense de Luis Morais, Adrián González, David González e Josiño Romero.

Foron segundo o K4 xuvenil do kaiak de Andrés Pérez, Daniel Vieira, Bruno Cardoso, e Alex Cortiñas. Mentres que o K4 dama cadete de Leti Piña, Silvia Rodríguez, Valeria Romero e Diana Freiría tiveron que conformarse cun terceiro posto tras sufrir un percance no timón.

Terceiro foi tamén o C4 de Manuel Garrido, David González, Juan Piña e Enrique Míguez.

Abre de novo a Oficina de información ao Inmigrante e Emigrante Retornado no Concello de Tui

O Concello de Tui informa que está de novo en funcionamento a Oficina de Atención ao Inmigrante e Emigrante retornado. O seu obxectivo é informar a estes colectivos sobre a súa situación xurídica e trámites administrativos a realizar. Tamén se lles asesorará na tramitación de autorizacións de residencia, traballo, visados, adquisición de nacionalidade, reagrupamento familiar, e todo tipo de trámites administrativos que este colectivo precise. Igualmente daráselles información sobre as posibles prestacións sociais, educativas ou sanitarias, e os programas formativos e de orientación, e inserción laboral a que teñan dereito.

A oficina está na mesma casa do Concello e o horario de atención ao público é de 9 a 14 de luns a venres.

ACITUI organiza esta fin de semana o Festival de Artes de Rúa e unha Feira de Oportunidades

As rúas de Tui serán esta fin de semana o escenario dende este venres e até o domingo do IV Festival Internacional de Teatro e Artes de Rúa que continuará a próxima fin de semana. Os espectáculos desta fin de semana correrán a cargo de Novo Circo, os irmáns Corpo Coto, A la olla e Cumbus Limbus.

Serán espectáculos de rúa a partir das oito da tarde cada día, venres, sábado e domingo.

Pero esta fin de semana tamén se celebra a I Feira de Oportunidades co obxectivo de dar saída ao stock comercial dos asociados de ACITUI. Será dende ás 7 da tarde tanto sábado coma domingo.

Nesta primeira edición quince establecementos estarán na feira con produtos de moda, complementos, arte e decoración.

O Kayak Tudense buscará o podio no Campeonato de España de Pista para Senior

O Club Kayak Tudense despraza un equipo de 35 piragüístas ao o XXXIX Campionato de España de Pista para Senior, que esta fin de semana terá lugar no encoro de Santa Cruz de Trasona, en Avilés. O obxectivo do club de Tui é facerse un oco no podio na xeral de clubs.

Os seus principais rivais serán o Ría de Aldán Hnos Gandón, o Breogán Xunqueiriña, a Agrupación Deportiva Zamora e o Real Círculo Labradores de Sevilla.
A nivel individual o club tudense presentará un equipo moi compensado, xa que competirá con 10 damas, 9 canoas e 16 kaiakistas homes, coa esperanza de lograr varias medallas.

En canoa, o mundialista José Luís Bouza en C1, e en C2 con Daniel Costa, terán opcións de podio, do mesmo xeito que o C4 de Daniel e David Costa, Manuel Garrido e Pablo Branco.

As opcións de medalla en damas centraranse no k1 1000 de Ana Varela, así como no k2 500 de Ana Varela e Silvía Vázquez.

Mentres no grupo de kaiakistas homes, Jovino González en k1, o k2 do propio Jovino con Diego Piña e o k4 de Roberto Rodríguez, Iván Alonso, Víctor Rodríguez e Diego Piña, tamén terán as súas opcións de conseguir medalla.

Martes, 15 de agosto de 2007

T.U.I. solicita un sistema de aparcamento limitado gratuíto coma solución provisoria

Tudenses Unidos Independentes vén de presentar unha nova moción no rexistro de entrada do Concello na que solicita establecer un sistema de aparcamento gratuíto durante hora e media nalgunhas rúas do centro urbano para lograr un maior grao de axilidade e mobilidade no uso das prazas de aparcamento.

No texto da moción dende T.U.I. sinalan que nas eleccións municipais todas as forzas políticas que se presentaron plantexaron a necesidade de dotar á cidade de espazos de aparcadoiro, e engaden que mentres se carece de PXOM non se poderá executar un aparcadoiro de xeito definitivo. É por iso que solicitan unha solución provisoria e que se realice un estudo de viabilidade para establecer nunha serie de rúas o sistema de limitación horaria gratuíta. Solicitan amais dende TUI que esta moción se inclúa na orde do día do próximo pleno que celebre a corporación.

Citas hoxe en Tui

Nas Festas na honra á “Virxe do Camiño” en Rebordáns hoxe ás once da mañá fará un pasarrúas e entrará no torreiro da festa a Banda de Música Popular de Tui. Ás doce do mediodía celebrarase a misa solemne con procesión. Ao remate terán lugar as tradicionais poxas, concerto da banda de música de Tui e actuación do grupo folclórico San Fins de Rebordáns. A ultima verbena será amenizada por Norwest e Versalles.

En San Bartolomé de Rebordáns comezan hoxe as Festas na honra a San Roque. Ás nove da noite dende o convento das Encerradas acompañada pola Banda de Guerra da Brilat Galicia VII e da Banda de Música Popular de Tui. Xa en San Bartolomé ofrecerá un concerto a Banda da Brilat.

O xoves ás 12 misa solemne na honra a San Roque con procesión acompañada pola Banda de Música Popular de Tui, e posterior concerto da banda. A verbena da noite correrá a cargo de Ciudad de Pontevedra e Aramio. Estas festas están organizadas pola Asociación cultural San Roque e San Bartolomé.

Obradoiro Básico de Informática e Internet promovido polo Concello

O Concello de Tui promove un Obradoiro Básico de Informática e Internet que será impartido polo Dinamizador da Sociedade da Información que traballa no Concello.

Este curso vai dirixido a persoas maiores de 30 anos que teñan un baixo nivel ou que non teñan coñecementos de informática.

Milladoiro este venres en Concerto en Tui

A Concellería de Cultura de Tui, Caixanova e a Deputación de Pontevedra presentan este venres en Tui ao grupo Milladoiro en concerto. Será ás 22.30h no aparcamento municipal na parte traseira da Área Panorámica, con entrada gratuíta.

Milladoiro está formado por Xosé V. Ferreirós, Nando Casal, Antón Seoane, Xosé A. Fernández, Moncho García, Roi Casal, Harry C. e Manu Conde.

Este grupo pioneiro na música folk galega repasará en Tui os seus 25 anos de traxectoria dende que en 1978 se subiron ao escenario do auditorio da Coruña. Dende entón a súa música encheu teatros, auditorios e prazas colleitando un gran éxito de público. Tamén lle chegaron o longo deste tempo numerosos premios, moitos deles por bandas sonoras coma o Goya que recibiron por “La mitad del cielo”.

Os temas da súa carreira musical veñen de recollelos nun novo traballo discográfico “25” no que fan unha lectura actualizada das súas composicións. Este novo disco será o que presenten este venres en Tui ofrecéndonos unha ollada retrospectiva dende o punto de vista da tradición coma algo vivo que evoluciona.

O Aparcamento Municipal permanecerá pechado o venres dende ás 8.00h

Debido a celebración do Concerto de Milladoiro o venres á noite, e doutros concertos a cargo de Mercedes Peón, o domingo, aparcamento municipal de Tui permanecerá pechado dende ás 8 da mañá do venres até o luns ás 12 do mediodía.

Martes, 14 de agosto de 2007

O Club Kaiak Tudense foi o claro vencedor esta fin de semana nas dúas probas celebradas o sábado en Tui no mundo do piragüísmo.

Pola mañá clasificouse no primeiro posto por clubs na Copa Presidente da Xunta de K4 e C4 ao lograr 225 puntos, seguido polo Piraguísmo As torres Romaría Vikinga con 201.

Este éxito sustentouse nos excelentes resultados dos k4 e c4 en cadete, xuvenís e seniors.

Na categoría cadete o Kaiak logrou a vitoria en k4 damas e homes e tamén no C4. En xuvenis o K4 homes logrou o segundo posto. E en senior volverán a facer triplete.

En senior o K4 de Diego Domínguez, Diego Piña, Victor Rodríguez e Roberto Rodríguez facían unha boa regata sacándolle 23’’ aos segundo clasificados do Piragüísmo Vilaboa.

En damas senior a vitoria viu da man de Ana Varela, Patricia Domínguez, Marta Rodríguez e Silvia Vázquez, e en canoas os irmáns Costa Bouzada xunto a Pablo Blanco e David González subiron tamén ao alto do podio.

A regata foi moi espectacular e o público puido seguila perfectamente dende as gradas na beira do Miño xunto ao Centro Interfederado.

Pola tarde a cita estaba co clásico Descenso Internacional do Miño onde a marea alta propiciou unha regata rápida, sen problemas salvos algúns envorcos que se produciron na saída dende terra en Salvaterra.

57 minutos e 19 segundos foi o tempo dos gañadores absolutos do descenso, Iván Alonso e Roberto Rodríguez, do Kaiak Tudense, que en K2 se impuxeron no Descenso, nunha regata que foron quen de remontar logo dos problemas que tiveron na saída e facendo unha bonita chegada ao sprint superando en 6 segundo ao K2 do Piragüísmo Vilaboa que nos últimos quilómetros viñan moi pegados. Iván e Roberto recibiron moitas felicitacións en canto subiron ao pantalán tras selar o triúnfo.

Iván e Roberto coñecían a vitoria xa en K1 onde competiron nos últimos anos, facéndose coa vitoria en 2006 Roberto Rodríguez, e Iván o ano anterior.

En K1 a vitoria foi para o arxentino Martín Mosicafredo do Grandero Baigorria. En C1 Senior foi primeiro Oscar Graña do Piragüísmo Illa de Arousa, en Damas K1 Amaia Osaba do Piragüismo Pamplona.

En C2 Senior os irmáns Costa Bouzada do Kaiak Tudense subiron ao máis alto do podio, en K2 dama senior a vitoria foi para Ana Valón e Lorena Jubón do Breogán Outón Xunqueiriña.

En xuvenis en K1 a vitoria foi para Yoel Alonso e en C1 para Angel Rivadomar ambos do Breogán Outón Xunqueira. En K1 dama Raquel Larbajo do Fresno de la Ribera lograba o primeiro posto, e en K2 a vitoria sería para o Kaiak Tudense con Daniel Vieira e Andrés Pérez, o mesmo farían as súas compañeiras Silvia Vázquez e Diana Freiría no K2 damas. Mentres que en C2 o Náutico o Muiño subiu ao podio con David Maquieira e Joaquín Boisa.

En Cadete o K1 do Náutico O Muíño subiu ao podio con Paulino Otero, en C1 o Kaiak Tudense logrou a vitoria con Emilio José Romero, en K1 dama a primeira foi Aloia das Torres Romería Vikinga, e foi prata Leticia Piña do Kaiak Tudense. No K2 cadete Miguel Suárez Otero e Juan Luis Oubiña do Piragüísmo Illa de Arousa leváronse a vitoria seguidos de Isaac Rodríguez e Santiago Sabor do Kaiak Tudense. O clube de Tui subiría ao podio en C2 cadete con Luis Morais e Adrián González, e en K2 Dama con Silvia Rodríguez e Valeria Romero.

César Estévez, Presidente do Kaiak facía unha valoración positiva do Descenso e da Copa e falaba da vitoria do K2 de Iván Alonso e Roberto Rodríguez.

Incendio dun cobertizo en Paramos e roubo nun coche en Soutelo

Onte ás 7.30 da mañá produciuse un incendio nun cobertizo en Soutelo, Salceda, por causas descoñecidas. O lume afectou a un Citroen 2cv e a un tractor segundo informou o GRUMIR.

Na noite do sábado ao domingo produciuse un roubo dunha Citroen Berlingo de cor branco no interior dunha finca en Soutelo, Salceda. A matrícula da furgoneta é 5169BKF e quen teña algunha pista pode contactar cos seus donos no teléfono 986.63.92.64