A comarca do Baixo Miño conta con 413.275,29 euros do PPC xestionados pola Deputación para impulsar obras de saneamento, iluminación e accesos

Os concellos da comarca do Baixo Miño dispoñen dun orzamento de 413.275,29 euros do Plan Provincial de Cooperación  (PPC) que xestiona a Deputación de Pontevedra en 2008. Esta liña de axudas está cofinanciada pola propia institución provincial, polos concellos beneficiarios e por aportacións económicas do Ministerio de Administracións Públicas.

O PPC contará con 6,6 millóns de euros e vai dirixido a calquera tipo de obra de competencia municipal nos concellos de menos de 50.000 habitantes. Deste orzamento a aportación do estado é de 2,7 millóns de euros; a achega da Deputación de 2,2 millóns; a dos Concellos de 1,5 e as restantes aportacións de 35.329,26 euros.

Os importes deste plan distribuiranse empregando como criterio obxectivo unha porcentaxe do 60% para o peso poboacional do municipio e do 40% para o criterio de superficie. Asemade, o Plan Provincial de Cooperación conta cunha partida de 1,5 millóns de euros para acometer obras nas estradas de titularidade provincial que executa directamente a Deputación de Pontevedra.

As obras irán dirixidas, nos municipios con máis de 5.000, habitantes a parques e bibliotecas públicas, mercados e tratamentos de residuos; e en áreas de máis de 20.000 habitantes para protección civil, prevención e extinción de incendios, instalacións deportivas e servizos. Non obstante, hai actuacións que se poden realizar a través deste programa en todos os municipios como alumeado público, cemiterios, recollida de residuos, limpeza viaria, abastecemento de auga potable, sumidoiros e pavimentación de vías públicas. Pola súa banda, os municipios que superan os 50.000 habitantes, beneficiaranse dun convenio propio coa institución provincial, como é o caso dos de Vigo e Pontevedra.

As obras incluídas nestes plans selecciónanse a partir das propostas formuladas polos concellos. Así mesmo, as obras incluídas no PPC están dirixidas a cubrir os servizos básicos municipais. Sobre este aspecto, a Deputación delega nos concellos a contratación, seguimento e xustificación das obras incluídas no plan.

Plan Provincial de Cooperación 2008

Total 413.275,29 euros

OIA

Martes, 22 de xaneiro de 2008  

Doazón de Sangue hoxe en Oia e venres e sábado en Tui

    Esta semana dúas unidades móbiles do Centro de Transfusións de Sangue de Galicia estarán no Baixo Miño.

    A primeira delas estará hoxe, martes, en Oia, diante do Concello en horario de 16 a 21h.

    Outra unidade estará o venres e o sábado en Tui, na Praza de Galicia. O venres poderase doar de 16 a 21h e o sábado de 10 a 15h.

A ASEP satisfeitos da reunión con Sócrates polo compromiso de solucionar o problema dos españois que traballan en Portugal

    A Asociación de Profesionais Sanitarios Españois en Portugal reuniuse esta fin de semana co presidente Sócrates, en Braga, aproveitando a celebración do Cumio Hispano-Luso.

    Dende este colectivo agradecen ao presidente portugués a súa vontade de levar a cabo as accións necesarias para solucionar o grave problema de circulacións dos traballadores españois en Portugal.

    Os sanitarios cren que é un importante avance que os presidentes Sócrates e Zapatero teñan en consideración a busca dunha solución a esta problemática que afecta a 14 mil profesionais de todos os sectores, e que dende o seu colectivo veñen demandando dende hai dous anos.

    Non obstante, dende la APSEP manifestan a súa preocupación  porque as medidas que se adopten conduzan a unha solución definitiva, e que estean guiadas pola lóxica e o sentido común erradicándose o concepto "transfronterizo".

    Este colectivo considera que os mandatarios da Península Ibérica, guiados polo "espíritu de Lisboa" fixeron unha importante aposta que contribúe á consolidación dunha Europa máis forte.

Venres, 18 de xaneiro de 2008 

Vicepresidencia e Caixanova sortearán catro cruceiros entre os asistentes aos bailes de maiores en Tui, Pontevedra, Cangas, Baiona, e Vigo

    A Delegación Provincial de Pontevedra da Vicepresidencia da Xunta en colaboración con Caixanova sortearán un total de catro cruceiros entre os asistentes aos bailes de maiores que a Vicepresidencia vén organizando en Tui, Pontevedra, Cangas, Baiona e Vigo, no marco do programa “Bailando cos nosos maiores”.

    Os asistentes aos bailes de maiores están xa a recibir desde comezos de anos os tickets cos que participarán no sorteo dos catro cruceiros para dúas persoas con todos os gastos pagos. Este sorteo celebrarase na primeira semana do mes de marzo, que será cando se escollerán as catro parellas gañadoras e as outras catro parellas suplentes, no caso de que as primeiras non puideran aceptar o premio.

    A Vicepresidencia da Xunta puxo en marcha no mes de outubro o programa de bailes semanais para maiores en distintas vilas e cidades da provincia de Pontevedra, coñecido como “Bailando cos nosos maiores”. No centro social de Tui os bailes teñen lugar os domingos. Os bailes, que son abertos e gratuítos, están dirixidos a todas as persoas maiores, tanto usuarios dos centros sociais da Vicepresidencia como os que forman parte das asociacións de maiores das distintas comarcas. Ademais, poden tamén asistir todas as persoas que o desexen aínda que non pertenzan a ningunha asociación de maiores, o único requisito é ser maior de 60 anos ou xubilado, independentemente da súa idade.

Xoves, 17 de xaneiro de 2008 

O PPdeG interpreta que María José Caride xa descartou construír a vía de alta capacidade do Baixo Miño polo monte, desautorizando aos responsables comarcais do PSOE

O PPdeG considera que o anuncio efectuado pola conselleira de Política Territorial na visita que cursou este luns a Tui, onde afirmou que a Xunta estuda integrar o tramo 2 da vía de alta capacidade do Baixo Miño, entre Tomiño e Goián,  no proxecto elaborado polo anterior Goberno galego revela que xa está descartada a posibilidade de construír o vial polo monte como Pérez Touriño lle prometera aos veciños afectados na campaña electoral das autonómicas de 2005.

Logo das declaracións da conselleira, o deputado popular César Pérez Ares apunta que María José Caride deixa aos socialistas de Tomiño “aos pés dos cabalos” e pregunta cal será a estratexia que van seguir, a partir de agora, os cadros comarcais do PSOE en relación con este asunto.

 “María José Caride veu á comarca a dar o pistoletazo de saída da campaña das Eleccións Xerais, sen efectuar anuncio novo algún, máis aló de reiterar as insuficientes partidas presupostarias previstas pola Xunta para a construción da VAC do Baixo Miño, con tan só 9,7 millóns de euros en 2008, cando a estas alturas as obras xa deberían estar practicamente rematadas”, apunta o deputado popular.

Tendo en conta que o custo total das obras rolda os 120 millóns de euros, Pérez Ares conclúe que, ao actual ritmo investidor, serán precisos 12 anos para materializar un proxecto xestado na anterior Lexislatura polo Goberno do PPdeG no marco do Plan Galicia.

O coordinador do PPdeG para a comarca do Baixo Miño anuncia tamén a súa intención de trasladar ao Parlamento unha iniciativa para reclamar unha reforma do proxecto que inclúe a construción dunha circunvalación de Tomiño, que permita conectar a futura vía de alta capacidade co proxectado polígono industrial, sen que o tráfico rodado teña que circular polo centro da localidade.

Mércores, 16 de xaneiro de 2008 

Axudas a establecementos polos danos das riadas de 2006

    O Diario Oficial de Galicia recolleu onte a resolución da Consellería de Innovación e Industria pola que se dá conta da concesión de axudas para compensar os danos sufridos en establecementos comerciais, mercantís, industriais e turísticos polas inundacións de outubro de 2006. 

    Na lista aparece a concesión de axudas a cinco empresas de Oia e unha de Tui. O importe total das subvencións a estas empresas ascende a 58.229,21 €.

Martes, 15 de xaneiro de 2008 

Este ano comezan as obras da VAC no tramo 1 e 3

    Ao longo deste ano iniciaranse as obras do tramo 1 e 3 do Vial de Alta Capacidade que unirá Tui e A Guarda segundo explicaba en Rebordáns a Conselleira de Política Territorial María Jose Caride.

    Sinalaba con respecto a este proxecto que ao longo dos próximos meses se iniciarán as expropiacións precisas para acometer a obra iniciándose logo os traballos.

    Mentes, no tramo 2, o que discorre polo termino municipal de Tomiño explicaba que consideraron que podía existir unha alternativa mellor á que se baralla polo que se está a realizar un estudo informativo, que en canto se conclúa  sairá a exposición pública.

    Tamén aludía á Circunvalación da Guarda, que agora se vai construír e que evitará que todo o tráfico da vía teña que pasar pola Guarda para dirixirse cara a costa de Oia ou Baiona.

Venres, 11 de xaneiro de 2008 

Informa Beti Rey

A entrada en vigor do Regulamento de Pesca no tramo internacional do Miño pendente da súa publicación no Boletín Oficial de Portugal e do canxe de notas con España

    Faltan só dous trámites administrativos para que entre en vigor o Regulamento de pesca no tramo internacional do río Miño, co que quedará derogado o que estaba en vigor dende 1980 e que quedou completamente obsoleto. A tramitación que falta é a súa publicación no Boletín Oficial do Estado de Portugal e o canxe de notas do goberno portugués co seu homólogo español.

    Este documento foi aprobado na Comisión Internacional de Límites entre España e Portugal en 2004, pero o trámite burocrático preciso entre os dous países fixo que a súa entrada en vigor tardase case catro anos. Isto é así porque o Regulamento precisa a aprobación de cada un dos gobernos. O español dáballe o visto bo en 2006, mentres que o goberno portugués aprobou aínda o pasado 20 de decembro.

    O Regulamento de Pesca no Tramo Internacional do río Miño consta dun total de 47 artigos e un anexo e foi redactado tanto en castelán coma en portugués. Este documento, cando entre en vigor nos próximos meses, vai regular a pesca tanto deportiva coma profesional no tramo internacional do río Miño dende a desembocadura.

    A pesca deportiva, aquela na que se emprega a cana ou artes similares, poderá exercerse só dende as beiras e coa preceptiva licenza do país. E a pesca profesional será aquela na que se empregan artes distintas da cana e non poderá exercerse dende terra firme salvo coa “peneira” no caso da captura do meixón.

    No artigo 7 recóllese que a tripulación da embarcación sempre que traballe con rede ou pola noite debe estar integrada por dúas persoas, unha delas co título de patrón, e cunha potencia máxima de motor de 20 cv.

    As artes permitidas son o trasmallo; lampreeira; solleira o picadoira e varga de solla; varga de múxil, muxileira; peneira ou rapeta; anguileira; biturón e cabaceira; palangres e espineis; canas e liñas.

    As redes terán que ser sinalizadas en cada extremo de día cunha bandeira laranxa, e de noite cunha luz vermella.

    Recóllese tamén que mentres non se proceda ao dragado da barra do esteiro do Miño que facilite a entrada de especies migratorias, autorizarase o uso da “tea” por un período máximo de dous anos dende a entrada en vigor do regulamento.

    O capítulo V que vai dos artigos 19 ao 25 dedícase ás pesqueiras establecéndose que terán que ter un patrón, que en cada boca das mesmas só se poderá empregar unha rede ou biturón, amais de prohibir a construción de novas pesqueiras ou ampliar a dimensión das existentes.

    O regulamento recolle tamén as dimensións mínimas dos peixes que será de 55 cm para salmón, 50cm para a lamprea, 36 para o robaliza, 30cm para o reo e o Sáibao (sábalo), 20cm para a anguía, 19cm para a troita común, e 16cm para a solla.

    Pero amais unha vez entre en vigor este regulamento, e co obxecto de recuperar a poboación de salmón prohibirase a súa captura durante un período transitorio de dous anos.

    No capítulo VII do artigo 34 ao 42 recóllense as sancións establecidas sendo este un dos avances importantes con respecto ao regulamento en vigor. Así carecer dos documentos do patrón, embarcación ou pesqueira será sancionado cunha multa de ata 275 euros, e non levalos cando se está pescando suporá unha penalización de até 80 euros.

    Por outra parte a pesca con arte en época ou lugar no que o uso da mesma non estea permitido conleva unha multa de 200 a 550€, e pescar con artes prohibidas sancionase con entre 200 e 825€. Igualmente a navegación ou exercicio da pesca por barco sen patrón competente ou autorizado suporá unha multa a cada tripulante e ao propietario da embarcación de entre 40 e 275€.

    O regulamento recolle tamén unha sanción de 40 a 550€ o feito de botar ao río ou ás beiras entullos, lixo ou sustancias que afecte ás súas condicións naturais. 

    Amais do pago das multas establecidas as infraccións poderán conlevar a prohibición do exercicio da actividade, aprehensión do peixe ou das artes, ou a reposición do leito do río no caso de terse depositado entullos ou lixo.

    Amais xa no artigo 45 recóllese que a Comisión Permanente Internacional do río Miño, que se reunirá preferentemente cada mes de maio, terá por finalidade principal o estudo e preparación de propostas para mellorar as condicións biopesqueiras do río. Así entre as actuacións suxeridas xa está promover a repoboación do río con salmónidos e outras especies.

    Este regulamento Internacional de Pesca unha vez entre en vigor terá unha vixencia de seis anos renovable automaticamente por un período similar.  Co súa posta en funcionamento igualaranse as condicións de pesca entre españois e portugueses no Miño.

Xoves, 10 de xaneiro de 2008

Carta dos sanitarios españois en Portugal a Zapatero

    A Asociación de Profesionais sanitarios que traballan en Portugal veñen de remitir unha carta aberta ao presidente do Goberno, Josá Luis Rodríguez Zapatero, expóndolle o problema que están a sufrir co acoso a que  lles somenten as autoridades lusas ao non ter os coches matriculados en Portugal.

    Por este motivo os médicos e enfermeiros que se achegan ao seu traballo nun coche de matrícula española, son parados pola Garda Fiscal que lles multa e requisa o vehículo en tanto non arranxan a súa situación de acordo coa lei portuguesa que ao traballar no seu país lles obriga ao mesmo. Contábao Xoan Gómez, Presidente da Asociación de Profesionais Sanitarios que traballan en Portugal na Radio Municipal de Tui,

    Os sanitarios consideran que isto é un atropelo dos seus dereitos no espazo europeo.

    O Presidente dos sanitarios afectados explica que eles manteñen a súa residencia en España, onde mercan os seus vehículos, e non entenden por que esta “persecución”, coma a cualifican, que sofren en Portugal, onde traballan.

    A situación, que levan tempo denunciando, non mudou, incluso insisten que agora a Garda Fiscal actúa con máis celo. 

    Xoan Gómez demandaba que este problema precisa dunha solución política, e algo que deben tratar entre os dous países.

    Toda esta situación estalles a provocar a os profesionais un importante stress, de aí a carta que veñen de remitir ao presidente do Goberno. 

    O presidente do sanitarios que traballan en Portugal denunciaba tamén que este tema ten un trasfondo económico, tanto pola multa que lles impoñen, coma no caso de querer cambiar a matrícula portuguesa o imposto que terían que aboar xa que se calcula sobre o valor do coche novo. A isto engadiríase o problema de ter que facerse residentes en Portugal.

Mal comezo da temporada de lamprea

    Mal comezo da temporada de lamprea que se iniciou ás 12 da noite do luns ao martes. José Benito Pousa, presidente da Asociación de Pescadores do Miño explicábao na RMT engadindo que segundo a tónica dos últimos anos esta especie chega máis tarde.

    José Benito Pousa coida que é posible facer unha predición do que vai ser a temporada tomando coma referencia o que aconteceu en anos anteriores. Agardan que as capturas se incrementen sobre todo a partir de marzo.

    A situación mudou moito nos últimos anos xa que antes na propia tela do meixón miraban as lampreas antes do comezo incluso da temporada, e agora esta especie retrasa a súa chegada.

    José Benito Pousa denunciaba na sintonía de Radio Tui prácticas que se están a dar fóra de temporada na época de desove que acaban coa especie.

    Insistía neste tema xa que a captura destas lampreas en desove pon en perigo a continuidade da especie, e por iso amosaba a súa esperanza en que o novo regulamento aprobado en decembro endureza as sancións e remate con estas prácticas.

    Os pescadores son os primeiros que teñen que contribuír a coidar o río Miño. Así explicaba coma no regulamento aprobado se lle deu dous anos de vida á tea do meixón para darlle máis vida a esta especie.

    Pero son necesarias outras medidas coma a defensa da boca da barra onde se produce o cambio da auga salgada á doce, e pescar máis arriba.

    O labor e a concienciación de todos é unha peza fundamental para que o río manteña o seu futuro.

Mércores, 9 de xaneiro de 2008

Cursos para autónomos convocado pola Organización de Autónomos e Profesionais de Galicia

    A Organización de Autónomos e Profesionais de Galicia convoca unha serie de cursos dirixidos a traballadores autónomos. Na oferta figura un itinerario de Xestión Empresarial e Inglés na modalidade de teleformación e formación a distancia. O curso comezará o venres, 25 de xaneiro, e o prazo de inscrición permanece aberto até o luns 21.

    Tamén se oferta un segundo itinerario de Inglés Empresarial e Prevención de Riscos Laborais e un terceiro de Inglés Empresarial e Económico Fiscal. Ambos comezarán o 4 de febreiro e o prazo de inscrición remata o 18 deste mes.

   As persoas interesadas en realizar algún destes cursos poden dirixirse ao 986.62.85.42.60 ou o  617.42.76.73, ou ben ao correo electrónico info@oapgalicia.org.

    Por outra parte dende a Organización de Autónomos informa que o IGAPE promove do 21 ao 25 de xaneiro no Pazo de Congresos de Galicia un Encontro de Empresarios e Profesionais Galegos en Rede. Pódese ampliar esta información na web do IGAPE.

Sábado, 5 de xaneiro de 2008

Fortes precipitacións con case 69l/m2 en Tui

    A noite do mércores ao xoves foi de fortes precipitacións e incluso treboadas que se deixaron sentir en toda a comarca, xunto a refachos de vento. As consecuencias deste mal tempo tradúcense sobre todo en problemas co alumeado público na meirande parte dos concellos da comarca.  Segundo a información facilitada polas Policías Locais non houbo que lamentar outros danos.

    Só o mércores, e segundo a información recollida pola Estación Meteorolóxica do Monte Aloia, en Tui caían 68,6 l/m2. Nos últimos 30 días recolléronse 184 l/m2 dos que 117 l/m2, caeron dende o pasado día 1.

    No que ao vento se refire houbo refachos de 18,5 m/s no día de onte.

   Na outra estación meteorolóxica da comarca, a situada en Oia no castro Vicaludo, rexistráronse no día de onte 26,4 l/m2. Alí nos últimos 30 días a choiva chegou aos 86,4 l/m2 dos que 40 litros caeron nos últimos tres días.

    En Oia os refachos de vento teñen sido importantes e onte rexistrábase un refacho de ata 38,1 m/s.