|
|
DECEMBRO |
Luns, 31 de decembro de 2007
O pleno de Tomiño aproba os orzamentos do 2008 con máis de 1.100.000 euros de investimentos reais
Nun Salón de Plenos abarrotado de público, a Corporación Municipal de Tomiño aprobou inicialmente, por maioría, os orzamentos do ano 2008, que ascenden a 6.080.000 €, e significan un incremento do 2,4% respecto dos do ano anterior.
O concelleiro delegado de Facenda, Uxío Benítez, deu unha explicación xeral dos orzamentos antes da votación. O edil salientou, en primeiro lugar, que as contas municipais lévanse a pleno “en tempo e forma”, sendo Tomiño un dos concellos que máis pronto resolve este tema. En segundo lugar, explicou que aínda que son estes os orzamentos máis altos da historia da vila, non se subirán os impostos, recorrendo en cambio, a aumentar as solicitudes de axuda á Xunta de Galicia e outras Administracións.
Tamén salientou Benítez a situación de “fraxilidade” en que se atopa o actual sistema de recadación de impostos, salientando a necesidade de reforzar o control e a eficacia fiscal, de modo que sexa posible aumentar os ingresos procedentes das taxas directas, e chegar neste capítulo a un 80% superando o 37% actual. “Nos últimos 8 anos a maioría dos ingresos procedían da actividade urbanística, pero na actualidade produciuse un parón nesta actividade que afecta ao volume de recadacións; a pesar desta fráxil situación, o noso goberno tomou a decisión de non subir os impostos e apostar por unha política de mellor e maior control fiscal, onde cada un pague o que lle corresponde”, dixo o concelleiro.
Dentro do capítulo de inversións reais (838.709,55 €), aos que hai que engadir as transferencias para tres obras veciñais que elevan a cantidade a 1.180.000 €, sobresaen as seguintes:
Plan Director do Saneamento: proxecto que marcará as pautas de aplicación das obras do saneamento en Tomiño.
Beirarrúas de acceso a Tomiño (2ª fase): obra cofinanciada coa Deputación. O Concello aportará 147.121,03 € dun total de 490.403,43 €.
Orde de subvención pública e transparente: a principios do ano 2008, convocarase unha orde de subvención pública e transparente dirixida a todo tipo de asociacións veciñais.
Plan Director de Aforro Enerxético.
Cemiterio de Barrantes: obra realizada pola Comunidade de Montes, na que o Concello aportará 120.000 €.
Plan de mellora dos colexios e escolas unitarias.
Centro Cultural San Salvador: obra realizada pola Comunidade de Montes, na que o Concello aportará 80.000 €.
Tramo de saneamento Xibao-Pedra do Couto.
A alcaldesa de Tomiño, Sandra González Álvarez, salientou os 3 millóns de euros comprometidos pola Xunta de Galicia para proxectos como o futuro Centro de Día, a Galescola, a segunda fase do colector xeral do Miño, o plan de mellora da Concentración Parcelaria, a implantación do sistema Wi-max en dúas parroquias, e o equipamento do auditorio de Goián, entre outros.
Na sesión tamén se aprobou a cesión dunha casa para a súa utilización con fins culturais á Asociación de Veciños Rego da Salgosa, que nos vindeiros 5 anos debe facer melloras e actividades en ben da comunidade.
Outros puntos aprobados na sesión foron a probación provisional da modificación nº 5 do PXOM de Tomiño, a cesión ao ORAL da recadación liquidación definitiva do ICIO e a estimación dun recurso da CMVMC de Taborda.
Mocións
No turno de Rogos e Preguntas, o Grupo Municipal do BNG de Tomiño presentou por vía de urxencia unha moción, na que propón solicitar á Deputación Provincial unha nova estructura orzamentaria que permita incrementar as axudas aos concellos e garantir a prestación dos servizos públicos mínimos.
A moción fundaméntase no feito de que “as deputacións teñen asignadas unhas funcións precisas e determinadas que constitúen as súas obrigas e competencias fundamentais”, como son a solidariedade e equilibrio interterritorial, a prestación e coordinación integral dos servizos de competencia municipal, a asistencia e cooperación xurídica, económica e técnica aos concellos, e a prestación dos servizos públicos de caracter supramunicipal.
Segundo o texto da moción, “O funcionamento da Deputación de Pontevedra, dirixida polo Partido Popular, non ten garantido a prestación deses servizos mínimos aos concellos, pois seguen existindo graves carencias na asistencia xurídica, estradas provinciais en desastroso estado e cidadáns que carecen de abastecemento de auga e saneamento, carencia de bombeiros, prais descoidadas, etc.”.
De forma paradoxal, segundo o texto, a Deputación recolle no seus orzamentos un alto gasto en funcións complementarias; gasto que supera ao destinado ás competencias propias. Así, os gastos non estritamente competenciais ascenden a 59 millóns de euros, mentres que os de cooperación cos concellos, solo chegan a 29, e os adicados ás estradas provincias, a 18.
A corporación aprobou por maioría a moción, na que tamén se propuña solicitar da Deputación a prestación de servizos de competencia municipal non obrigatorios como protección civil, medio ambiente (praias), etc.
Por último, acordouse solicitar á Deputación o inicio das xestións para cinguir a súa actuación ás súas competencias propias, negociando a transferencia ás administracións competentes de servizos e equipamentos alleos ás competencias da Deputación (Escola de Enfermería, Cidade Infantil Príncipe Felipe, Finca de Mouriscade, Estación Fitopatolóxica de Areeiro, Centro de Vacacións A Lanzada, Castelo de Soutomaior, etc.).
Violencia de Xénero
Outra moción presentada no pleno, e neste caso aprobada por unanimidade, foi unha referida á violencia de xénero. A moción, presentada nun principio polo PP e a Alcaldía, e asumida logo por todos os grupos políticos, propón que o Concello de Tomiño dispoña un fondo de emerxencia co fin de atender aos casos de mulleres en situación de violencia de xénero que necesiten de recursos económicos con urxencia, solicitando á Mancomunidade do Baixo Miño a disposición dun piso para as vítimas da violencia.
A moción propón tamén, estimular á coordinación e apoio entre as distintas institucións (Xunta de Galicia, Deputación Provincial e Concello); elaborar un plan integral de sensibilización, prevención e tratamento da violencia de xénero a nivel local, e solicitar do Estado o incremento do número de xulgados de violencia sobre a muller en Galicia.
Segundo o PP o tripartito de Tomiño aumenta o gasto de persoal e baixan as inversións
César Pérez Ares, concelliro do Partido Popular, asegura que os orzamentos do ano 2008, aprobados inicialmente polo tripartito, aumenta considerablemente o gasto en altos cargos pasando de 80.435 € a 220.861 € o que supón un aumento de 174,58%, mentres que as inversións baixan en termos xerais nun 25% e nas referentes a Vías e Obras o descenso inversor acada unha baixada do 82% pasando de 507.769 € no ano 2007 a 91.500 € o que vai a suponer unha paralización de obras en tódalas parroquias do Concello. Tamén, engade o portavoz dos populares, cabe destacar a contratación de novo persoal de confianza que vai a ser adscrito a alcaldesa e ao concelleiro de Cultura, Jesús Castiñeira, de modo que estes orzamentos son os que máis adican a gastos en altos cargos, non soamente na historia de Tomiño senón que tamén superan con creces a todos os municipios que conforman a comarca do Baixo Miño, cuestionando Pérez Ares a austeridade e a racionalidade no gasto que practica a alcaldesa, Sandra González.
Di o portavoz do grupo maioritario na oposición que se debe ter en conta que neste orzamento estase contabilizando como ingreso unha finca na parroquia de Barrantes que se pretende vender, e hai que recordar que fai dous anos o BNG criticaba esta medida porque consideraba que debía pasar á Comunidade de Montes. Agora, a alcaldesa do BNG pretende vender unha parcela de titularidade pública a particulares con fins urbanísticos, preguntándose se esta é a defensa do interese público que fai Sandra González.
No apartado do Saneamento, continúa o citado edil, as partidas en inversións reais baixan un 8,15% dotando cunha cantidade insignificacnte o Plan Director de Saneamento (29.580 €) e non hai partidas para facer obras novas de saneamento en ningunha parroquia, tal como se comprometera a alcaldesa e o Sr. Vergara, concelleiro delegado.
En Educación, as partidas destinadas a melloras nos centros, así como subvencións a ANPAS e Instituto de Ensino Secundario desaparecen, baixando a partida de Educación en xeral nun 14,42%, o que para este portavoz, irónicamente, “é o gran compromiso do tripartito co ensino público”.
Este orzamento trata de aprobarse cun informe de Intervención e Secretaría onde se indica que algunhas partidas non se axustan á legalidade, o que podería dar lugar a impugnación do orzamento ao sobrepasar os límites permitidos pola Lei Xeral do Presuposto do Estado que fixa con carácter xeral subidas salariais nun 2%.
Mocións do PP
O P.P. presentou duas Mocións: unha consensuada co resto dos Grupos sobre Violencia de Xénero que foi aprobada por unanimidade e outra que foi rexeitada polo tripartito onde se solicitaba a creación dunha Oficina Municipal de Atención aos Dependentes, aproveitando os servizos sociais do Concello, e así evitar que os dependentes teñan que desprazarse a outros concellos para tramitar as axudas que, a día de hoxe, non foi aprobada ningunha, a pesar de facer un ano dende a aprobación de dita Lei.
Sábado, 29 de decembro de 2007
Actividades hoxe sábado e mañá domingo en Tomiño
No Auditorio de Goián dentro da programación de Nadal, hoxe ás 19.30h presentarase o libro “Rosas en la arena” de Oliva Mª Pereira González e logo ofrecerá un concerto de Nadal a Camerata Viguesa.
Proseguen tamén en Figueiró as actividades de Nadal. Hoxe sábado a partir das seis actuará na Praza do Telleiro a Rondalla Tradicional de Freixo de Vigo, nun acto que organiza a Asociación de Veciños “Fonte dos Carreiros”.
Hoxe sábado o grupo Virxe do Alivio celebra o seu Festival de Fin de Ano. Será na Casa de Cultura de Tomiño a partir das nove da noite. Actuarán os grupos “Muiñeiros do río Tripes” de Tui, e a Escola de Danzas e Gaitas Virxe do Alivio.
Mañá domingo ás cinco da tarde no centro de Tomiño ADETO fará entrega dos premios do concurso de debuxo que convocou.
Hoxe presentarase no Multiusos de Barrantes unha publicación sobre o santuario da Madanela
Xoan Martínez Tamuxe e Juan Ramón Martínez, son os autores de “Memoria Histórica da capela de Madanela no monte da Pedrada e vestixios dunha fortaleza”, libro que hoxe, 29 de decembro, vai ser presentado no Multiusos de Barrantes a partir das sete do serán.
Editado polas comunidades de montes de Barrantes (Tomiño) e Burgueira (Oia), arroupando a presentación estará a Banda de Gaitas de San Vicente de Barrantes.
Segundo explican os autores, o nome da Madanela é un localismo de Cristelos e Vilachán do Monte para referirse ao santuario que houbo na Pedrada. A publicación segue a liña doutros libros da autoría de Martínez Tamuxe, que o autor recorda: “recuperar valores e fitos históricos que, se non se chega a tempo pode levar a perda de moita documentación” e este mesmo sentido de “recuperación do seu”, motivou aos comuneiros de Barrantes e Burgueira a encargar o estudo que se publica en forma de libro con profusión de fotografias a cor e en branco e negro.
Martínez Tamuxe e Juan Ramón Martínez, ademais de beber en fontes escritas, conversaron cos veciños para averiguar tradicións relacionadas coa ermida da Madanela.
Aínda que o eixo central do libro é a capela, o estudo abarca tamén o entorno “porque”, conta Xoan Martínez, “tamén se descubre que non soamente había no monte Pedrada unha capeliña, senón ademais, unha fortaleza”, lembrando os autores que sempre cunha fortaleza hai unha capela.
O estudo, sen pensar en ser publicado, ten a súa orixe en 1973, cando Martínez Tamuxe, e o desaparecido Gómez Sobrino, localizan os restos dunha capela, así como laxes e pedras ás que os veciños atribúen unha serie de virtudes. Se embargo eses restos localizados en 1973 desaparecen segundo constataron os autores de “Memoria Histórica da capela de Madanela no monte da Pedrada e vestixios dunha fortaleza” cando procuran novos datos para elaborar o estudo obxecto de publicación. Incluso a pía de auga bendita ao parecer atópase hoxe nun xardín privado en Tui.
Como recuperación do patrimonio cultural-relixioso dos antergos, explica Juan Ramón, os comuneiros de Barrantes e Burgueira voltaron celebrar a romaría da Madanela, que ten lugar en xullo, e que se recuperou en 2005.
Venres, 28 de decembro de 2007
Continúan as actividades do programa infantil “divírtete no nadal”
Continúan celebrándose con éxito de público os obradoiros do programa infantil “Divírtete no Nadal”, organizado pola Concellería de Cultura do Concello de Tomiño.
Hoxe, venres 28 de decembro, realizaranse xogos de paracaídas e rá, na Praza do Seixo, de 17 a 19 horas.
O sábado, 29 de decembro, haberá animación de rúa cun boneco de neve e b-ola patinadora. Será en Goián, de 17.00 a 17.45 horas, e en Tomiño, de 18.00 a 18.45 horas.
O domingo 30 de decembro, haberá tamén animación de rúa en Tomiño cos Duendes do Nadal e Carteiros Reais. De 17.00 a 18.30 horas.
Por outra banda, a Cabalgata de Reis percorrerá o vindeiro día 5 de xaneiro, a partir das cinco da tarde, as rúas de Tomiño. Os Reis recibirán cun agasallo aos cativos e cativas da localidade, na Praza do Seixo. Así mesmo, poderán participar no sorteo de numerosos regalos aportados pola Asociación de Empresarios de Tomiño “ADETO”. Colaboran na realización da Cabalgata a Escola de Gaitas e Danzas Virxe do Alivio, a Comparsa “Estrelas da Noite” e Veciños de Amorín.
Actuación da Camerata Viguesa este sábado en Goián e presentación de “Risas en la arena” de Oliva María Pereira
Mañá, sábado, ás sete e media da tarde, a poetisa Oliva María Pereira, presentará o seu libro “Rosas en la arena”, no Auditorio de Goián.
Ás 20.00 horas terá lugar un concerto da Camerata Viguesa dirixida polo violinista e profesor de música Armando Toledo.
A Camerata Viguesa é unha asociación músico-cultural sen ánimo de lucro, fundada en 1995 por alumnos de violín do profesor Armando Toledo, e pais, co fin de complementar a formación con prácticas de conxunto, música de cámara e orquestra. A Camerata conta con destacados alumnos de centros de ensino musical de toda Galicia, moitos dos cales atópanse realizando cursos de postgrado en centros de altos estudos de España e do estranxeiro.
Armando Toledo, violinista e profesor nado en Cuba e afincado en Galicia dende o ano 1991, é o director musical da asociación e da orquestra de cordas. Realizou os seus estudos na Escola Nacional de Arte de Cuba e no Conservatorio Estatal de Odessa (antiga URSS), contando con máis de 30 anos de experiencia.
Hoxe Festival Solidario a prol do San Xerome en Goián
O Auditorio de Goián acolle hoxe, ás oito da tarde, o Festival Solidario organizado polo Colectivo de Mariñeiros da Guarda a prol do San Xerome. Contan coa colaboración do Concello de Tomiño e da Asociación Cultural Eliseo Alonso.
A entrada é libre. Neste festival actuará o grupo de teatro Xeratrium do San Xerome e o cantante Alberto Mvundi presentará o seu novo traballo.
O grupo de teatro XERATRIUM constituíuse recentemente e está composto por dez actrices e actores con discapacidade, dirixidos por Irene Moreira Fontán da Compañía de teatro Xerpo Cultural de O Porriño (www.xerpocultural.com)
Despois do éxito acadado no Certame de teatro especial de Lugo, o grupo representará a obra “O lago dos cisnes” . Trátase dunha revisión do conto do “parrulo feo” de Andersen, onde dun xeito metafórico fálase das dificultades que atravesa unha persoa con discapacidade intelectual ao longo da súa vida. Parte da banda sonora do espectáculo está composta e interpretada en directo polo grupo Xerock.
Tra-la representación de teatro, Alberto Mvundi, presentará o seu traballo “Musseque”, que se porá a venda ese día ó prezo de 10 €
Xoves, 27 de decembro de 2007
Trescentos rapaces e rapazas de Tomiño asistirán aos partidos da selección galega de fútbol
Trescentos nenos e nenas dos colexios e clubs deportivos de Tomiño asistirán hoxe, día 27 de decembro, aos partidos da Selección Galega de Fútbol, que se disputarán en Balaídos.
A iniciativa da Concellería de Deportes que dirixe Fernando Álvarez Fernández, xurdiu co propósito de achegar aos rapaces ao deporte e, en especial, á selección galega de fútbol. “É unha oportunidade de fomentar a afección polo deporte dende unha idade temperá e amosar a importancia que ten o mesmo”, explicou o concelleiro delegado da área.
Varios autobuses recollerán aos rapaces a partir das catro menos cuarto da tarde diante dos colexios e dos campos de fútbol da Carballeira e Goián.
A representación tomiñesa estará encabezada pola alcaldesa da vila, Sandra González Álvarez, e polo concelleiro de Deportes, Fernando Álvarez, que acompañarán aos escolares.
Estes levarán dúas pancartas coa inscrición “Tomiño coa Selección Galega”, co fin de dar o seu apoio aos deportistas da Comunidade.
O primeiro dos partidos disputarase ás seis da tarde, entre as seleccións femininas de Galicia e Cataluña. Ás nove e media da noite comezará o segundo encontro, entre as seleccións masculinas de Galicia e Camerún.
Á chegada a Tomiño, os autobuses repartirán os rapaces nos mesmos puntos de recollida.
O concello de Tomiño reparte pegatinas e cartas aos Reis Magos en galego
O Departamento de Normalización Lingüística do concello de Tomiño pon en marcha unha campaña para fomentar o uso do galego entre os comerciantes e as escolas de educación primaria.
O concello de Tomiño, a través do Departamento de Normalización Lingüística, leva a cabo nestas semanas unha campaña de promoción do idioma galego entre nenos de 3 a 7 anos. Os nenos foron agasallados con cartas aos Reis Magos que se distribuíron polos colexios de Tebra, Goián, Sobrada, Barrantes e o CRA.
Os comerciantes tamén foron beneficiarios da campaña. Neste caso se lles obsequiou con pegatinas para os agasallos de Nadal. Ademais distribuíuse un cartel onde se reflicte a campaña e a finalidade da mesma. Desta forma o concello de Tomiño pretende normalizar o uso do galego en ámbitos cotiáns.
Sábado, 22 de decembro de 2007
O goberno de Tomiño presenta os orzamentos máis elevados da historia
O Goberno Tripartito de Tomiño (BNG, CDT e PSOE) presentou onte os orzamentos municipais para o ano 2008, que se levarán a pleno o vindeiro día 28 de decembro.
As contas municipais para o ano que vén, os máis altos da historia da vila, ascenden a 6.080.000 €, o que significa un aumento dun 2,4% respecto dos do ano pasado.
O concelleiro delegado de Facenda, Uxío Benítez, resaltou en rolda de prensa que “se trata dos orzamentos máis altos da historia de Tomiño sen subir os impostos”. Isto é posible, segundo o edil, grazas a unha política de máis e mellor eficiencia fiscal, “a pesar da gran dependencia que posúen os ingresos da actividade urbanística, cunha clara ralentización”.
Os investimentos reais ascenden a 838.709,55 €, aos que hai que engadir as transferencias para tres obras veciñais que elevan a cantidade a 1.180.000 €.
Entre os investimentos, os responsables municipais salientaron:
Plan Director do Saneamento: proxecto que marcará as pautas de aplicación das obras do saneamento en Tomiño.
Beirarrúas de acceso a Tomiño (2ª fase): obra cofinanciada coa Deputación. O Concello aportará 147.121,03 € dun total de 490.403,43 €.
Orde de subvención pública e transparente: a principios do ano 2008, convocarase unha orde de subvención pública e transparente dirixida a todo tipo de asociacións veciñais.
Plan Director de Aforro Enerxético.
Cemiterio de Barrantes: obra realizada pola Comunidade de Montes, na que o Concello aportará 120.000 €.
Plan de mellora dos colexios e escolas unitarias.
Centro Cultural San Salvador: obra realizada pola Comunidade de Montes, na que o Concello aportará 80.000 €.
Tramo de saneamento Xibao-Pedra do Couto.
Pola súa banda, a alcaldesa de Tomiño, Sandra González Álvarez, salientou que os orzamentos van ser aprobados en tempo, “o que amosa que o goberno municipal é un goberno estábel e responsábel”.
A rexedora salientou, ademais, a xestión política levada a cabo nestes seis primeiros meses de goberno, para conseguir, dadas as limitacións orzamentarias da Administración Local, fondos extramunicipais. “Ante os orzamentos que se vos presentan, tíñamos 2 opcións para levar adiante as contas: ante o parón da construcción, subir os impostos ou buscar financiamento presentando varios proxectos ante a Xunta, e optamos por este último”, explicou a presidenta do Goberno Local.
Entre estes logros, a rexedora citou:
O Centro de Día (600.000 €)
2ª Fase Colector Xeral de saneamento (Carregal-Sobrada) (1.300.000 €)
Plan de mellora de fincas e camiños da concentración parcelaria (675.000 €)
Rede de acceso a internet WI-MAX (60.000 €)
Melloras no Auditorio de Goián (60.000 €)
PEIM (95.000 €)
Galescola
O grupo municipal do CDT destacou, a través do concelleiro Pablo Baquero, dous aspectos fundamentais respecto dos orzamentos; en primeiro lugar, as melloras en colexios e escolas unitarias, e tamén nos servizos socias; melloras que se comezarán a implementar no vindeiro ano.
Pola súa banda, o portavoz do PSOE, Santiago Vergara, indicou que os orzamentos “teñen vocación de sentar as bases para futuras actuacións non oportunistas, senón lóxicas e racionais e, que ó mesmo tempo, garantan o normal funcionamento do Concello”.
Venres, 21 de decembro de 2007
Citas en Tomiño na fin de semana
Ao abeiro da programación de Nadal Cultural que organiza a Concellería de Cultura de Tomiño hoxe, ás nove da noite, no Auditorio de Goián ofrecerá un concerto a Banda Sinfónica de Jovens de Santa María da Feira de Portugal.
No mesmo lugar, o Auditorio de Goián, o domingo ás cinco da tarde ofrecerán o concerto de Nadal a Coral Polifónica de Tomiño, a Coral de Atios e a de San Andrés de Comesaña.
Por outra parte hoxe mesmo comeza o programa “Divírtete no Nadal” que organiza tamén a Concellería de Cultura de Tomiño para os nenos. Así esta tarde de 17 a 19h na Praza do Seixo haberá un Obradoiro de gorros de Papa Noel e Adornos para a árbore. Mañá sábado de 17 a 19h, tamén no Seixo, haberá xogos de Zancos e sogatira. E o domingo de 17 a 18.30h no centro de Tomiño haberá animación de rúa cun Papa Noel xigante e unha Mama Noel Patinadora.
Tamén están programadas actividades de Nadal en Figueiró para esta fin de semana organizadas polo Centro Recreativo e Cultural de Figueiró. Así mañá, a partir das seis da tarde, celebrarán o “Día dos maiores” coa actuación dos regueifeiros Luís O Caruncho e Pinto de Herbón. O domingo dedicarán o día aos Nenos e dende ás catro e media terán sorpresas e diversión co paiaso mago Miguel o Clown que presentará un espectáculo de maxia e globoflexia, e logo recibirán a visita de Papá Noel.
PSOE e BNG rexeitan dotar ao baixo miño dos orzamentos necesarios para financiar proxectos pendentes en 2008
PSOE e BNG rexeitaron no trámite parlamentario emendas valoradas en 15 millóns de euros, que foran formuladas polo deputado popular César Pérez Ares para tratar de corrixir as carencias dos Orzamentos da Xunta de 2008 na comarca do Baixo Miño.
Nesta liña, a vía de alta capacidade Tui-A Guarda, que precisaría 120 millóns de euros para comezar a execución das obras e facer que estas avancen a bo ritmo, só recibirán 9 millóns de euros en 2008.
Desautorización par ao PSOE de Porriño
Pérez Ares apunta que o trámite parlamentario dos orzamentos da Xunta de 2008 tamén permitiu “visualizar a verdadeira faciana do PSOE, que promete grandes investimentos aos veciños, e logo desinfla eses compromisos en Santiago”. Como exemplo, o deputado popular recorda que mentres a Consellería de Educación, a través do PSOE porriñés, anunciara un investimento de 2 millóns de euros para a construír un novo colexio para substituír ao actual Antonio Palacios, o Presuposto da Xunta de Galicia de 2008 tan só consigna 600.000 euros, e cunha finalidade distinta: renovación en lugar de nova construción, como figuraba no compromiso inicial.
Paralelamente, Pérez Ares lamenta que a Consellería de Sanidade non contemple nos orzamentos do ano próximo partida nominal algunha para iniciar as obras dos centros de saúde de Tui e Oia; ou que fosen rexeitadas as propostas para executar a segunda fase do saneamento de Estás (Tomiño); o colector primario entre Amorín e Sobrada, outras obras de saneamento en diferentes núcleos do Rosal, Oia e Tui; e obras de mellora de traídas de auga nos diferentes concellos do Baixo Miño, especialmente necesarias tendo en conta a persistente seca que se está rexistrar. En materia ambiental, tampouco foi aprobada a iniciativa que reclamaba a creación dun punto limpo en Tomiño.
O plan de emprego feminino que o PPdeG pretendía implantar no Baixo Miño tampouco foi dotado do orzamento necesario, eiva que tamén impedirá a posta en funcionamento dos centros de día de Tomiño e Crecente e maila execución dun centro xeriátrico de ámbito comarcal que debería ser financiado pola Vicepresidencia da Igualdade e do Benestar.
Axudas para os viveiristas
A única das emendas aceptadas corresponde a unha partida de 200.000 euros, reclamada por Pérez Ares para habilitar unha liña de axudas dirixida aos viveiristas co obxectivo de contribuír a poñer en valor os recursos da horta, flor e planta ornamental.
Non se aceptou, sen embargo, unha liña específica para os produtores de kiwi, que sufriron perdas cuantiosas polas intensas xeadas rexistradas en novembro e que, nalgúns casos, perderon toda a colleita desa froita.
Por iso, en datas próximas, Pérez Ares elaborará unha proposición non de lei na que instará á Xunta a deseñar e poñer en marcha un plan integral de apoio e promoción deste cultivo e a súa comercialización.
Os xulgados Tui tampouco recibirán as dotacións orzamentarias que precisan. Para 2008, a Xunta consigna só unha partida de 90.000 euros, unha cifra “ridícula” para financiar as reformas que precisa a sede actual e para iniciar as obras dun novo edificio que poda albergar tamén o terceiro xulgado.
Xoves, 20 de decembro de 2007
O goberno tomiñés adiantará, mañá, as liñas en que se moverán os orzamentos municipais de 2008
Mañá, venres, 21 de decembro, ás 13,30 horas, a alcaldesa de Tomiño, Sandra González Álvarez, o concelleiro delegado de Facenda, Uxío Benítez, e os portavoces dos grupos municipais de Goberno, darán unha rolda de prensa sobre a proposta de Orzamentos Municipais 2008. Desde o goberno tomiñes destacan que estes orzamentos son os primeiros propostos polo Goberno Tripartito de Tomiño que asumiu o goberno local tras últimas eleccións municipais.
Medio Ambiente colaborará no financiamento do colector xeral de Tomiño
A Consellería de Medio Ambiente aportará unha subvención de 1,3 millóns de Euros ao concello de Tomiño para financiar o último tramo do colector xeral de Tomiño.
Así o confirmou o pasado martes o Conselleiro Manuel Vázquez á Alcaldesa de Tomiño, Sandra González, e ao Concelleiro de Medio Ambiente, Santiago Vergara nun encontro que mantiveron en Compostela.
O conselleiro amosou a disposición do seu departamento a colaborar na mellora da rede de abastecemento.
Para a alcaldesa e o concelleiro de Medio Ambiente a realización da obra do colector xeral é “fundamental” xa que supón o primeiro paso para artellar o saneamento das parroquias, amosándose “satisfeitos pola implicación da Consellería coas necesidades do concello”, xa que a nova infraestrutura permitirá achegar este servizo no futuro a un maior número de parroquias, facilitando un crecemento sostible da localidade.
A alcaldesa de Tomiño, Sandra González Álvarez, salientou que o último tramo do colector “é unha obra moi necesaria porque supón rematar a columna vertebral do que logo serán as distintas ramas do saneamento”.
Pola súa banda, Santiago Vergara, indicou que a rede de abastecemento é unha das materias pendentes do Concello, xa que “con só 90 aboados, é unha rede mal concibida estruturalmente, á que hai que dar unha solución”. Engadiu que se tomarán as medidas necesarias para que a Deputación Provincial cumpra coas súas obrigas en materia de saneamento e abastecemento de augas, xa que esta é unha das súas competencias propias.
Mércores, 19 de decembro de 2007
O concello de Tomiño recibirá de Medio Rural unha inversión de 675.000 € para o acondicionamento de fincas, camiños e eliminación de accidentes naturais
O Concello de Tomiño acolleu na mañá de onte, a reunión da xunta local de concentración parcelaria na que o delegado provincial de Medio Rural, Gonzalo Constenla, informou dos 41 recursos presentados ao acordo de concentración dos predios nas parroquias de Estás, Goián e Figueiró. Estes expedientes serán remitidos á Dirección Xeral de Infraestructuras e Estructuras Agrarias da Consellería do Medio Rural para a súa resolución co cal se lle poderá dar firmeza ao acordo.
En rolda de prensa, o delegado anunciou ademais un investimento 675.000 € no 2008, destinados ao acondicionamento de fincas, eliminación de accidentes naturais na zona de Estás-Goián-Figueiró e mellora de camiños nas zonas de concentración dos Panascos e Estás-Goián-Figueiró.
Esta cuantiosa inversión no Concello de Tomiño é o comezo dun proceso dinamizador, que en palabras do delegado provincial de Medio Rural, suporán un verdadeiro impulso do rural na comarca, que se sumará á serie de medidas co mesmo fin, como a incorporación de mozos e mozas como titulares de explotacións agrarias; plans de mellora das instalacións e equipamentos das explotacións; apoio ao sector transformador e comercializador e establecemento de plans de promoción e calidade dos productos agroalimentarios. Outras medidas que axudarán a dinamizar o sector, segundo precisou Gonzalo Constenla, son a declaración da comarca do Baixo Miño, como Zona de Especial Interese Agrario e zona piloto do Banco de Terras de Galiza; o plano de renovación do parque de maquinaria agrícola, e o Plan Estratéxico de Infraestructuras no Medio Rural.
Sobre este último, Uxío Benítez, concelleiro de Urbanismo e Patrimonio, lembrou que a Consellería de Medio Rural aportará outros 95.000€ que serán invertidos no camiño do Alivio e no que une Estás e Figueiró. O edil agradeceu o interese do delegado provincial, afirmando que “esta actuación pon de manifesto unha vez máis, o compromiso da Consellería co Concello de Tomiño”.
|
A Banda de Gaitas San Vicente de Barrantes primeira clasificada na 1ª faxe do “XVIII Campionato da Liga Galega de Bandas de Gaitas” O pasado sábado, día 15, realizouse en Hospitalet (Barcelona) a 1ª fase do “XVIII Campionato da Liga Galega de Bandas de Gaitas” no Recinto Ferial de la Farga na Calle de Barcelona, 2, competindo, no 4º Grao 17 Bandas de Gaitas:
A primeira clasificada deste 4º Grao foi a Banda de Gaitas San Vicente de Barrantes (Tomiño) A Comunidade de Montes da Parroquia de Barrantes, manifestou sentirse orgullosa do éxito acadado polos representantes tomiñeses xa que desde a primiera vez que se presentaron a concursar na “Liga Galega de Bandas de Gaitas” foron colleitando éxitos quedando en todas as clasificacións os primeiros de grupo. Desde a Comunidade de Barrantes entenden que levar o folclore da nosa terra a outros lugares, é levar a cultura galega alí a onde se vai. Desde a Comunidade de Montes desecan felicitar públicamente aos componentes da Banda de Gaitas, e ao seu director Hipólito Cabezas, sen cuxo ímpetu e bo facer sería imposible lograr tantos éxitos para a Parroquia de Barrantes. |
Martes, 18 de decembro de 2007
O grupo municipal do PP califica de falta de respeto institucional a ausencia de invitación aos actos do cambio de nome das rúas
O voceiro do grupo municipal do P.P., César Pérez Ares, califica de “falta de respecto institucional” que varios concelleiros, incluído el mesmo, no foran invitados en tempo e forma aos actos que se celebraron na rúa Av. de Gondomar.
Consideran que alcaldesa, Sandra González, do BNG, así como os outros grupos que forman o equipo de goberno (CdT, PSOE), non actuaron con lealtade democrática, toda vez que o consenso entre todos os grupos políticos no cambio de nome nas rúas foi unha realidade.
“Non podemos entender como a Sra. Alcaldesa, non tivo a consideración de comunicarlle ao voceiro deste grupo municipal ben persoalmente –coincidiron ambos dous días antes desta celebración en actos do parlamento de Galicia no concello de Tui e na Comisión informativa nas dependencias do Concello- ben polos distintos medios técnicos e humáns de que dispón no Concello para estes menesteres, medios que se viron ampliados cando a alcaldesa, Sandra González contratou a unha secretaria particular para “levarlle a axenda”.
Lamentablemente, engade o comunicado asinado polos populares, esta situación non é novedosa pois na festa da terceira idade celebrada na parroquia de Sobrada no mes de Setembro e organizada pola Comunidade de Montes tampouco lles foi entregada a invitación que días antes a propia Comunidade depositou no Concello para tal fin confiando en que as persoas responsables respectaran a súa vontade. Non foi así, din, o que fai sospeitar que a alcaldesa esta actuando dunha maneira sectaria deixando en tela de xuízo unha repetida frase súa da que a tenor dos feitos so fai un uso teórico, onde dí: “Hai que prestar atención ao fondo, mais tamén as formas”.
As formas da señora alcaldesa, conclúen os populares, non son propias dunha persoa que esta ocupando un cargo institucional e non van encamiñadas na procura do consenso democrático.
A alcaldesa de tomiño desminte as declaracións do concelleiro do PP sobre a falla de invitación aos actos de cambio de nome das rúas
Dende o Goberno de Tomiño, maniféstase a total sorpresa polas declaracións verquidas polo concelleiro César Pérez Ares sobre a falla de invitación ao acto de cambio de nome das rúas franquistas, celebrado o pasado sábado.
A alcaldesa de Tomiño, Sandra González Álvarez, afirma categoricamente que con 15 días de antelación, se enviou carta a tódolos concelleiros convidándoos a asistir ao acto, polo que “dubidando das declaracións do concelleiro do PP, a partir de agora, as comunicacións municipais, se lle farán chegar por correo certificado con acuse de recibo, co fin de evitar malentendidos, a pesar de que isto supoña un gasto maior”.
A alcaldesa lembra, ademais, que na anterior lexislatura, “directamente non se convidaba aos membros da oposición a participar na maioría dos actos que se celebraban, e mesmo, non se transmitían convites feitos por asociacións que de xeito expreso, convidaban a toda a corporación”.
“No obstante –continúa a rexedora- dende o Goberno Local agradécese o interese do concelleiro César Pérez Ares, por asistir ao cambio de nome das rúas franquistas, cando el mesmo votou en contra da medida durante tantos anos”.
Regueifas, paiasos, música e baile no programa que organiza a Asociación Centro Recreativo e Cultural de Figueiró
A Xunta Directiva da Asociación Centro Recreativo e Cultural de Figueiró informa das actividades que esta institución vai desenvolver nos vindeiros días, có motivo das Festas de Nadal. Segundo o programa diseñado, o sábado 22 de decembro ás 6 da tarde estará dedicado ao “día dos Maiores” e para eles será a actuación dos regueifeiros, Luis “O Caruncho” e Pinto “De Herbón”, coñecidos polas súas intervencións na Televisión de Galicia.
O Domingo, 23 de decembro, ás 4.30 da tarde os protagonistas serán os miúdos co “Día dos Nenos” con sorpresas e diversión a cargo do Paiaso-Mago “Miguel o Clown”, que presentará un gran espectáculo de maxia e globoflexia, e a redor das 6.30 da tarde daranlle a benvida a Papá Noel.
O mércores, 26, o xoves, 27, e o venres, 28 de decembro, haberá “Actividades de Nadal para nenos” en colaboración coa Asociación de Veciños “Fonte dos Carreiros”, de Figueiró.
O luns 31 de decembro, ás 12.30h da noite “Gran Baile de Fin de Ano” e para Recibir ao 2008 o grupo convidado será “Adredde”.
O sábado, 5 de xaneiro, ás 11.30 da noite “Baile de Reis”, amenizado polo grupo “Adredde”.
As actividades culturais dos días 22, 23, 26, 27 e 28 están patrocinadas pola Deputación de Pontevedra.
Luns, 17 de decembro de 2007
A alcaldesa de Tomiño cambiou o nome das rúas franquistas
“Hoxe é un bo día, un día de ledicia, de avance cara ao futuro, de xustiza histórica. Hoxe avanzamos, trinta anos despois daquelas primeiras eleccións constituíntes de 1977, ata pechar, neste momento, un capítulo da historia tan dolorosa para a maioría de galegos e galegas, bos e xenerosos, que botan a vista atrás para lembrar a dureza e a sinrazón daquela longa noite de pedra.”. Con estas palabras, a alcaldesa de Tomiño, Sandra González Álvarez, comezou o seu discurso durante o acto de cambio de nome das rúas franquistas da vila: Avenida Generalísimo e Rúa José Antonio, que a partir do pasado sábado pasaron a chamarse Rúa Gondomar. “Hoxe retiramos un vestixio humillante do réxime franquista; hoxe enterramos definitivamente a Avenida Generalísimo e a rúa José Antonio, e dámoslle a benvida calorosa, nesta fría maña de decembro á rúa Gondomar”, sinalou a rexedora local, quen cualificou o acto coma de xustiza, non solo simbólico.
A alcaldesa rematou o seu discurso animando ao pobo tomiñés a “mirar cara ao futuro, pechando etapas e tendo claras as metas, pero sen esquecer de onde vimos e o que somos para saber con certeza cara a onde queremos camiñar”. Sandra González explicou que a elección do novo nome das rúas, levouse a cabo despois de falar cos veciños e constatar que era así como as chamaban antigamente.
Pola súa banda, o alcalde de Gondomar, Antón Araúxo, tamén presente no acto, agradeceu o feito de pór ás rúas o nome da súa vila, e comentou que cando viña a Tomiño, dáballe “certo arrepío” ver as placas cos nomes de Generalísimo e José Antonio. “É para mín, un grande orgullo que nos dediquen esta rúa, e sobre todo, cando goberna unha alcaldesa do BNG”, salientou o alcalde gondomareño.
Antón Araúxo asegurou que Gondomar quedaba en débeda con Tomiño e que o xesto sería correspondido no futuro. “Tomamos nota deste detalle e corresponderemos gratamente”, afirmou.
O acto, ao que asistiu numeroso público, estivo amenizado por un grupo de pandereteiras de Sobrada.
Sábado, 15 de decembro de 2007
Goián contará, desde hoxe, cun novo parque na Feira Pequena
A Comunidade de Montes de Goián inaugura hoxe, ás 17.00 horas, un novo parque público no terreo da antiga Feira Pequena da parroquia tomiñesa.
O parque, que se dedicará a lugar de paseo de persoas maiores, é o resultado dunha venda simbólica realizada por unha veciña do lugar, Clementina Ozores Ozores, á Comunidade de Montes goianesa.
O novo lugar de recreo, duns 1.200 metros cadrados, foi axardinado e dotado de rego automático, dez puntos de luz, bancos e unha fonte de auga. Ademais, algunhas partes foron empedradas e instalouse un busto de Juan Ozores, antigo propietario do terreo e pai de Clementina. Martín González, presidente da Comunidade de Montes de Goián, cualificou a esta última como “unha muller de enorme xenerosidade”, pola súa vontade de doar o terreo, o que finalmente, por razóns legais, tivo que ser vendido por un prezo simbólico.
Ao acto de inauguración asistirá o Goberno Tripartito de Tomiño, encabezado pola alcaldesa, Sandra González Álvarez.
Axenda Cultural do concello de Tomiño para os próximos días
Dentro do Nadal Cultural organizado pola Concellaría de Cultura de Tomiño, actuará hoxe, ás 18,30 horas, no Auditorio de Goián, a compañía de monicreques, Falcatrúa, coa obra “Albízaras”.
Os actos continuarán o vindeiro venres 21, ás 21,00 horas, co concerto da Banda Sinfónica de Jovens de Santa Mª da Feira (Portugal).
O domingo 23, ás 18 horas, celebrarase na Casa da Cultura o Concerto de Nadal a cargo da Coral Polifónica de Tomiño coas corais invitadas de Atios e San Andrés de Comesaña.
Dentro do ciclo denominado “Divírtete no Nadal”, destinado a nenos e nenas do concello, o vindeiro venres 21, de cinco a sete da tarde, realizaranse na Praza do Seixo, obradoiros de gorros de Papá Noel e adornos da árbore de Nadal.
O sábado 22, tamén de 17.00 a 19.00 horas, xogos de zancos e “sogatira”.
O domingo 23, de cinco a seis e media, no centro da vila, haberá animación de rúa cun Papá Noel xigante e unha “Mamá Noel” patinadora.
Por outra banda, dende hoxe, 15 de decembro, e ata o 15 de xaneiro, permanecerá aberto o prazo de inscrición para as comparsas que queiran participar na festa de Entroido “Venres de Foliada”, que terá lugar na noite do vindeiro 1 de febreiro.
Monicreques en Goián
No Auditorio de Goián, hoxe sábado, dentro do Nadal Cultural que organiza a Concellería de Cultura actúa ás seis e media da tarde Títeres Falcatrúa.
O domingo no auditorio de Goián Títeres Tanxarina
Mañá domingo, ás seis da tarde, actúa no auditorio de Goián Títeres Tanxarina coa obra “Sombreiros sen chapeu”. Neste caso a organización corresponde a Asociación Cultural Eliseo Alonso. O prezo da entrada para o domingo é 5 € adultos e 2€ os menores de 18 anos.
Irmanamento o domingo en Figueiró
En Figueiró a Asociación de Veciños “Fonte dos Carreiros” recibe este domingo a visita de máis de 200 persoas da parroquia viguesa de Valladares con quen están irmanados. A cita comeza ás once da mañá no Santuario de San Campio, onde terán unha misa na honra ao santo e actuación da Coral da Asociación Cultural de Valladares cun concerto de Nadal.
O Goberno de Tomiño leva a pleno a contratación do servizo de lixo ampliando as súas prestacións
O luns, ás oito da tarde, a corporación de Tomiño celebra pleno de carácter extraordinario. Entre os asuntos que se levan figura unha proposta da Alcaldía para a aprobación do expediente de contratación por concesión do servizo de recollida de lixo.
Segundo figura no expediente ampliaranse os servizos que se prestan na actualidade incluíndo a limpeza viaria nos núcleos de Seixo e Goián que abranguerá a limpeza de solares e zonas sen urbanizar de titularidade municipal, un plan específico para a tempada de verán, Nadal e Entroido, a limpeza de pintadas en fachadas, vías públicas, mobiliario urbano, aparcamentos, retirada de carteis e pancartas, así coma a limpeza de mercadiños, mercados (exterior), feiras, festas, actos deportivos e zonas de ocio.
Incluirá tamén, segundo a proposta, novos servizos coma a recollida de restos de poda, entullos de pequenas obras, instalación de colectores con maior capacidade que os actuais pasando de 800 a 1.200 litros, así coma a recollida diaria en máis barrios e parroquias, a recollida de residuos perigosos do fogar e unha maior frecuencia de recollida de papel/cartón e envases nos núcleos urbanos.
O concelleiro de Medio Ambiente, Santiago Vergara Álvarez, explica que estas melloras faranse dentro dunha política de contención do gasto, e que o incremento no gasto dun 20% non se vai repercutir no recibo que deben pagar os veciños que se vai manter en 39€/ano. Amais a proposta inclúe destinar o 1,5 % do orzamento anual desta partida á realización de campañas de información e sensibilización acerca da problemática medioambiental. Con todo isto, explica Santiago Vergara, búscase “potenciar a reciclaxe e o uso racional dos recursos”.
Hoxe abre o prazo de inscrición para o Venres de Foliada en Tomiño
Dende hoxe sábado está aberto o prazo de inscrición para o Desfile do Venres de Foliada en Tomiño que se celebrará o 1 de febreiro.
Para anotarse é preciso recoller a folla de inscrición no Departamento de Cultura de Tomiño. As comparsas cun mínimo de 15 compoñentes e sen carroza recibirán 150,25€, e as que teñan máis de 15 compoñentes e carroza recibirán 240,40€.
Establécese un máximo de 25 comparsas participantes, tendo preferencia as de Tomiño, e non podendo participar cabalo. Se chove o desfile aprazaríase para o venres seguinte.
Xoves, 13 de decembro de 2007
O concello de tomiño cambiará o vindeiro sábado os nomes das antigas rúas franquistas
O vindeiro sábado, día 15 de decembro, ás 13.00 horas, terá lugar en Tomiño un acto de cambio de placas en rúas con nomes franquistas.
As actuais rúas Generalísimo e José Antonio, pasarán a chamarse Rúa Gondomar, despois de que o Goberno Municipal así o decidira, tendo en conta a antiga denominación desta vía.
Ao acto asistirán a alcaldesa de Tomiño, Sandra González Álvarez, outros representantes do Goberno Local, e o alcalde de Gondomar, Antón Araúxo.
Para a alcaldesa de Tomiño, a substitución destes nomes era unha antiga demanda do BNG e de moitos tomiñeses, por considerar “unha aldraxe que as víctimas da represión teñan que ver todos os días os nomes daquela época”.
A rexedora da vila considera esta iniciativa como un acto de xustiza histórica que permitirá non seguir rendendo culto a nomes de ditadores. “Desgraciadamente, Tomiño é un dos poucos concellos que manteñen rúas con nomes franquistas, aínda cando a Lei da Memoria Histórica establece a obriga de cambialos”, advirte Sandra González.
Ademais, a alcaldesa considera que un novo goberno “ten que dar aires novos á vida cidadá, tanto no fondo como nas formas”.
Data: sábado 15 de decembro de 2007
Hora: 13:00 horas
Lugar: Cruzamento das rúas Gondomar e da Feira (fronte a Caixanova)
ADETO responde ao PP sobre as críticas recibidas
A Asociación de Empresarios de Tomiño, ADETO, vén de saír ao paso das críticas recibidas dende o Partido Popular con respecto ao alumeado de Nadal.
En nota de prensa ADETO lembra que en 2006 decidiron en Asemblea Xeral e por unanimidade “desvincular aos comerciantes do alumado do Nadal”.
Engaden dende esta asociación que este ano mantiveron unha
reunión co Concello e solicitaron que as luces acendesen na ponte da
Constitución e que fose un alumado un pouco máis innovador. Dende ADETO din que
a súa petición foi escoitada, e que logo de anos solicitándoo este ano ao fin
conseguiuse.
Por outra parte sinalan
dende ADETO que a asociación non é un partido político senón unha asociación de
empresarios, polo que consideran que as críticas feitas contra eles polo PP
están fóra de lugar.
Por este motivo dende ADETO non van permitir que se utilice á asociación nin a ningún dos membros da súa Xunta Directiva como instrumento de enfrontamento político. Xa que teñen claro que a asociación ten que estar ao marxe da política, o que non ten que ver co feito de que polo labor que realizan estean en continuo contacto con institucións públicas ou privadas, levando a cabo unha relación baseada na colaboración para lograr que as empresas e a economía de Tomiño mellore e creza.
Conclúen dende ADETO manifestando que coma asociación pretenden unir, agrupar e fortalecer aos empresarios, nunca separalos e é por iso que non cabe a opción de ideoloxías políticas persoais, movéndose sempre polos intereses comúns dos asociados.
Presentación de Ferramentas formativas para o comercio en Tomiño
Hoxe xoves, ás catro da tarde, terá lugar na Casa de Cultura de Tomiño a presentación das Ferramentas Formativas “Empresa familiar comercial, traspaso e venda” e a de “Marketing de venda”.
Esta xornada está organizada pola Federación Galega de Comercio e a Federación de Comercio de Pontevedra en colaboración coa Asociación de Comerciantes de Tomiño.
O obxectivo é achegar aos comerciantes unha ferramenta de axuda para a toma de decisións sobre o presente e futuro dos seus negocios. Aos asistentes ao acto entregáselles un cd-rom e manual destas dúas ferramentas.
Mércores, 12 de decembro de 2007
Entroido 2008: aberto o prazo de inscrición para comparsas
O vindeiro día 15 de decembro, abrirase o prazo de inscrición para todas aquelas comparsas que queiran participar no desfile do xa tradicional “Venres de Foliada”, que se celebrará o día 1 de febreiro de 2008 a partir das dez da noite.
Os interesados deben recoller a folla de inscrición no Departamento de Cultura do Concello de tomiño (Rúa Colón s/n), ou ben, chamar ao teléfono 986 622 988 en horario de mañá.
Segundo as axudas establecidas polo Goberno Local, as comparsas cun mínimo de 15 compoñentes e sen carroza, percibirán 150,25€, e as que teñan máis de 15 compoñentes e carroza, 240,40€.
As bases do concurso establecen un número máximo de comparsas de 25, non non admitíndose comparsas con cabalos. Terán preferencia ás agrupacións do concello de Tomiño.
En caso de choiva, o desfile se celebrará o venres seguinte.
Visita institucional do concello de Tomiño á escola superior Gallaecia, de Vilanova de Cerveira
Na mañá de onte a alcaldesa de Tomiño, Sandra González Álvarez, visitou acompañada do delegado municipal de Urbanismo e Patrimonio, Uxío Benítez Fernández, a Escola Superior Gallaecia de Arquitectura, Deseño e Ecoloxía, na localidade portuguesa de Vilanova de Cerveira.
Os representantes do Goberno Tomiñés foron recibidos pola directora da escola, Mariana Correia e o director de Relacións Nacionais e Internacionais, Rui Correia, acompañados tamén polo Presidente da Cámara Municipal de Vilanova de Cerveira, José Manuel Carpinteira.
Nun primeiro momento, realizouse unha visita guiada polas instalacións do centro, ao que asisten uns 250 alumnos e alumnas (40% deles, galegos). No transcurso da visita, a alcaldesa tivo oportunidade de coñecer a varios estudantes tomiñeses que cursan a súa carreira na Escola Superior Gallaecia, nunha das súas tres especialidades (Arquitectura e Urbanismo; Deseño (Gráfico e Industrial), e Ecoloxía e Paisaxismo.
Durante o encontro falouse da posibilidade de asinar un futuro convenio de colaboración que permita a ambas institucións realizar proxectos e actividades conxuntamente.
A alcaldesa de Tomiño, Sandra González Álvarez, salientou a importancia desta visita institucional, considerando as consecuencias positivas que a mesma pode ter no futuro. “É a primeira vez que se produce un encontro deste tipo entre ambas entidades, abríndose a partir de agora novas posibilidades de colaboración e traballo en común”, indicou a rexedora local.
A Escola Superior Gallaecia, comezou a súa andadura en 1992 da man da Fundaçao Convento de Orada para a Salvaguarda e Rehabilitaçao do Patrimonio Arquitectónico. Na actualidade, o centro ten un total de 250 estudantes procedentes do Norte de Portugal, Galicia e outros puntos da Península.
Este centro superior é un dos poucos que existen na zona cunha oferta conxunta das licenciaturas en Arquitectura, Deseño e Ecoloxía, polo que atrae moitos xóvenes dende todos os puntos da xeografía galega.
A preocupación pola conservación do patrimonio histórico é unha das características principais da entidade, o que lle converte en claro referente en toda a rexión, e tamén fora dos límites da Península Ibérica.
Martes, 11 de decembro de 2007
Nova reunión sobre o sistema Wimax en Tomiño
A Escola de Cristelos acolle mañá, mércores ás oito da tarde, unha reunión co obxectivo de informar sobre a implantación do sistema Wimax que permitirá o acceso a internet sen fíos nas parroquias de Barrantes e Pinzás.
A implantación deste sistema posibilitará que os máis de mil veciños destas dúas parroquias poidan ter acceso a internet.
A reunión informativa é a terceira que se celebra logo das dúas que na fin de semana tiveron lugar en Barrantes e Pinzás. O obxectivo é informar aos veciños sobre o funcionamento do WIMAX, cuestións técnicas de recepción, custes, axudas e outros aspectos relativos á implantación destas novas tecnoloxías. Durante a reunión, amosouse un modelo de pre-contrato co fin de coñecer o número de interesados, prevíndose axudas económicas para os primeiros cen usuarios.
Dende o Concello contemplan a posibilidade de ampliar este sistema de conexión a internet a outras zonas do municipio.
“Fonte dos Carreiros” programa diferentes actos co gallo das Festas de Nadal
A Asociación de Veciños “Fonte dos Carreiros” de Figueiró organizará, como tódolos anos polo Nadal, unhas xornadas de Actividades para Nenos con obradoiros onde poderán desenvolver as súas habilidades orais e manuais. Terán lugar, nas tardes dos días 26, 27 e 28 de Decembro no local da Asociación Centro Recreativo e Cultural de Figueiró, entidade que colabora activamente con “Fonte dos Carreiros”, na realización das devanditas actividades.
Como remate ás actividades do ano 2007, o sábado día 29 a partires das 6 da tarde, actuará na Praza do Telleiro a Rondalla Tradicional Navideña de Freixo (Vigo) con máis de 60 compoñentes.
A Asociación “Fonte dos Carreiros” adianta que o domingo, día 16 de decembro, recibirán á expedición de mais de 200 persoas da parroquia “irmanada” de Valladares (Vigo) que nese día, a partires das 11 da mañán, organizará parte dos actos deadicados a seus maiores no Santuario de San Campio “de Lonxe”. Haberá unha misa na honra do Santo e a Coral da Asociación Veciñal e Cultural de Valladares, organizadora dos actos, ofrecerá a tódolos asistentes un Concerto de Nadal onde os “villancicos e panxoliñas” serán as estrelas.
Sábado, 8 de decembro de 2007
ADETO pon en marcha o Punto Laranxa
Un punto laranxa en Tomiño indicará a partir de agora que hai actividades, promocións ou iniciativas por parte da Asociación de Comerciantes de Tomiño. A súa presidenta Belén Alonso explicábao na RMT
Todas estas iniciativas lévaas a cabo ADETO para promocionar o comercio local. Acaban de entregar 4 pagas extras de 500€ a Herminia González, de Sanomedio; Antonio Amado, de Goián; José Areal Pazo, de Currás, e Luciano Cruz da Costa.
Agora botan a andar o concurso de tarxetas de Nadal para nenos. O premio será unha bicicleta por cada nivel de estudos.
Amais dende a semana próxima repartirán entre os seus clientes rifas que darán opción a máis dun centenar de premios. Terán actividades os días de Nadal, Fin de Ano e logo colaborarán tamén co Concello na Cabalgata de Reis
Belén Alonso salientaba que hai que seguir loitando para facer fronte á crise e todos xuntos tentarán remontala.
Concertos e maxia esta fin de semana en Tomiño
A Concellaría de Cultura, Educación e Participación Veciñal dentro da programación do “Nadal Cultural” do Concello de Tomiño, organiza esta fin de semana varios actos culturais destinados a tódolos públicos.
Hoxe, día 8 de decembro, ás 19.00h, no auditorio de Goián, terá lugar o Circuíto de Maxia do IGAEM.
O domingo, día 9, celebrarase un concerto de acordeón a cargo do Grupo Mascarenhas da Guarda. No auditorio ás 17.00 horas.
Por outra banda, o vindeiro día 21 comezará a programación “Divírtete no Nadal”, organizada pensando nos máis pequenos do municipio. O primeiro dos actos previstos será a realización de obradoiros de gorros de Papá Noel e adornos para á tradicional árbore de Nadal, que terá lugar na Praza do Seixo, a partir das cinco da tarde.
Datas e horas:
Sábado 8 de decembro, ás 19.30 horas.
Domingo 9 de decembro, ás 17.00 horas
Día 21 de decembro, de 17.00 a 19.00 horas.
O PP rexeita que se contratase a unha empresa coruñesa o alumeado de Nadal
O Grupo municipal do Partido Popular de Tomiño emitiu un comunicado de prensa no que manifesta o seu rexeitamento á decisión do equipo de goberno (BNG, CdT. PSOE) en relación coa contratación dos servicios de alumeado do Nadal a unha empresa radicada na cidade da Coruña sen nin sequera tomar en consideración a empresa tomiñesa que habitualmente viña realizando estos servicios para o Concello.
Según relata o xerente da empresa, din os populares, dirixiuse en diversas ocasións –desde o mes de setembro- aos concelleiros de Vías e Obras e Promoción económica, así como á alcaldesa, que con moi boas palabras lle aseguraron que ían solicitar orzamento a varias empresas, incluída a súa, e que xa contactarían con el para tal fin, feito que nunca se materializou. Ante o silencio do concello, o luns 18 de novembro dirixiuse novamente ao concelleiro de Promoción Económica, quen manifestou que a contratación do servizo era inminente e que o asunto xa estaba zanxado, o que pón de relevo o engano do que este veciño foi obxecto por parte do goberno municipal.
Non menos indignante, continúa o comunicado asinado por César Pérez Ares, é o feito de que habendo en Tomiño unha asociación adicada á defensa do comercio local (ADETO, a súa presidenta enmudeza e adoptando unha actitude pasiva non saia en defensa do comercio tomiñés e dos seus asociados, poñendo así en clara evidencia o seu posicionamento político persoal ao frente dun colectivo que debe defender a tódolos industriais e comerciantes independientemente da súa ideoloxía. Neste senso, o PP quere lembrar as declaracións á prensa da propia presidenta de ADETO (Faro de Vigo, 27/10/05, acusando ao anterior goberno municipal de “no apostar por sus vecinos sean del “color” que sean” e engadindo que (o Concello) “debería velar por los intereses de todos los tomiñeses” por mor dunha celebración que o anterior goberno fixo fóra de Tomiño –coa salvedade de que, naquela ocasión sí se tivo a deferencia de pedir orzamento a comerciantes locais, aínda que por outras cuestións finalmente non fora posible chegar a un acordo-.
Por todo isto, o Partido Popular deplora a actitude da alcaldesa, Sandra González (BNG)que pón de manifesto a falta de sensibilidade e eficiencia á hora de defender os intereses dos autónomos que exercen a súa actividade no municipio, do que son contribuíntes; e insta á presidenta da Asociación de Comerciantes de Tomiño a defender o cometido para o que foi elexida polos integrantes do colectivo que representa, que en ningún caso ha de ter cor política.
Venres, 7 de decembro de 2007
Informa Gustavo González
Charla sobre teatro no centro goianés
O pasado martes, día 4 de decembro tivo lugar no Centro Goainés un obradoiro de teatro impartido polo actor e director teatral portugués Mário Moutinho, director artístico do Festival Internacional de Teatro de Expressão Ibérica (FITEI) celebrado no Porto.
Esta charla, patrocinada pelo Instituto Português da Juventude (IPJ) forma parte dun conxunto de actividades de carácter formativo desenvolvidas de maneira paralela á II Mostra de Teatro non Profesional do Miño que se cebrará na vindeira primavera. Dentro desta mesma programación xa foi celebrado durante os días 24 e 25 de novembro no IES da Sangriña un curso de Clown impartido polo actor Francisco Rei.
Mário Moutinho conversou cos escolares participantes, pertencentes ao CPI Manuel Suárez Marquier do Rosal e ao IES da Sangriña da Guarda, compartindo con eles as súas experiencias no ámbito teatral ben como actor, como director ou como organizador dun importante evento teatral como é o FITEI. Os alumnos tiveron oportunidade de facer calquera tipo de preguntas a este profesional, de quen tamén irían recibir importantes consellos e ánimos para continuaren adiante no apaixonante mundo do Teatro.
Xoves, 6 de decembro de 2007
Curso de Páxinas Web e Blogs en Tomiño
A Concellería de Mocidade e Promoción Económica organiza un curso de Iniciación á creación de páxinas web, contas de correo electrónico e blogs.
Esta actividade vai dirixida a mozos e mozas de entre 12 e 30 anos. Ofrécense 16 prazas e as clases serán nas instalacións da OMIX, no Campo da Feira . Os participantes recibirán un diploma ao rematar o citado curso.
A inscrición é gratuíta e pode facerse persoalmente na OMIX, por teléfono no 986 62 33 04, por fax no mesmo número ou por correo electrónico: omixtominho@yahoo.es.
O curso está previsto que comece o xoves día 13 en horario de 19 a 21h.
Tomiño modificará as ordenanzas municipais para mellorar a prestación de servizos sociais
A Concellería de Benestar prepara a modificación das ordenanzas municipais que regulan as prestacións sociais para acadar, segundo o Concelleiro, Pablo Baquero, un maior número de beneficiarios e dar resposta a problemas de exclusión que coa actual normativa quedan sen cobertura legal.
En canto o regulamento da Axuda no Fogar e Teleasistencia, ademais de rebaixar os requisitos de acceso ao servizo, preténdese que aquelas persoas que polo seu nivel de ingresos queden fóra das prestacións poidan, sen embargo, abonando a taxa correspondente, dispoñer das mesmas.
Explica o responsable municipal que hoxe en día moitas persoas están dispostas a costear os servizos e sen embargo non encontran no mercado quen llos preste, polo que o Concello síntese na obriga de darlles solucións.
A Ordenanza de Emerxencia Social tamén está sendo revisada para actualizar os baremos e facer fronte a situacións novas que non figuran contempladas. A situación de Tomiño, o igual co resto dos concellos do entorno, mudou notablemente nos últimos tempos; entre as novas circunstancias está o feito de ser receptores de emigración ou baleiros legais que impiden recibir axudas de infravivenda a quen non poida cofinanciar ou a quen non sexa titular de terreo edificable ou de vivendas.
Por outra parte Pablo Baquero informa da posta en funcionamento dende o mes pasado do “comedor sobre rodas”, que serve menús diarios as quince persoas maiores que o solicitaron.
Con esta medida dende a Concellería de Benestar queren garantir que ninguén pase sen “un prato de comida quente ao día”. Este departamento está a estudar a ampliación e financiamento do servizo a colectivos que teñan problemas de exclusión ou dificultades económicas”.
Nenos e nenas de Barrantes fan unha sementeira de carballos
Onte a mañá tivo lugar, na parroquia tomiñesa de Barrantes, unha sementeira de carballos a cargo dos nenos e nenas do colexio público de Barrantes e promovida pola Fundación Mátrix e Fundación + Árboles co patrocinio de Caixa Galicia e a Comunidade de Montes de Barrantes, e a colaboración do Laboratorio de Ecoloxía Aplicada da Universidade de Vigo.
A pesar da choiva, medio cento de nenos e nenas do colexio de Barrantes sementaron landras de carballo nunha parcela da comunidade de montes da parroquia situada xunto á estrada Tomiño-Cristelos.
Os alumnos, dos cursos superiores de Primaria, sementaron as landras baixo as indicacións de Javier Montalvo (director da Fundación Mátrix e patrono da Fundación + Árboles), e contaron coa axuda de seis estudantes de Bioloxía da Universidade de Vigo.
Polas malas condicións meteorolóxicas, non foi posible sementar todas as landras preparadas, aínda que máis de 200 foron colocadas baixo terra, con todos os coidados para que comecen a medrar nesta primavera.
A actividade foi cualificada de éxito polos organizadores do evento, a xulgar pola alegría dos cativos ao sementar árbores autóctonas coa finalidade de repoboar os montes. Para Javier Montalvo, cumpríronse os obxectivos do programa que son os de concienciar aos nenos sob