O turismo, un SEAT Ibiza de cor Branco matrícula PO-BJ, circulaba en dirección Tui-A Guarda, cando á altura da Avenida de Brasil en Goián, saíuse da vía, invadindo o carril contrario e chocando contra unha farola. Todo parece indicar que a saída da vía debeuse a que posiblemente o condutor quedou durmido, segundo a información da Policía Local de Tomiño. Trala colisión foi conducido ao Centro de Saúde de Tomiño, onde lle fixeron unha revisión, xa que tiña dor no peito.

Protección Civil de Tomiño contará cun can adestrado na busca de persoas

A Asociación de Protección Civil de Tomiño contará en breve cun can adestrado na busca de persoas, sendo esta unha das novidades para este ano.

Así se explicou o pasado sábado cando a Asociación de Voluntarios de Protección Civil de Tomiño celebrou a súa asemblea anual no salón de plenos de Tomiño. Na mesma, tratáronse temas relativos ao funcionamento da asociación, da que forman parte na actualidade 35 persoas.

Nesta reunión elixiuse nova Xunta Directiva que pasa a estar presidida por Sandra González Álvarez; o coordinador é Joaquín Da Cunha Martínez; segundo coordinador Delmiro González Bautista, e tesoureira Isabel Vilán Fernández.

Outra das decisións adoptadas foi solicitar unha subvención á Xunta de Galicia para a compra dun novo vehículo, cuxa necesidade vén dada polo volume de actividade da asociación, que colabora activamente en moitos dos eventos e accidentes que se producen no concello e na comarca.

Por outra parte a Asociación impartirá en breve, na sede da Escola Obradoiro de Goián, un Curso Básico de Protección Civil para os novos voluntarios.

A Asemblea foi aproveitada para presentar a memoria de intervencións do ano 2007, na que consta a asistencia da asociación en 112 accidentes, 68 operativos, 29 incendios, 9 casos de vertidos, 2 de persoas desaparecidas, traslados sanitarios, anegamentos, etc.

A concelleira de Seguridade, Tráfico e Transporte, Julia Cascón, asistiu á reunión acompañada do Concelleiro Santiago Vergara. Julia Cascón destacou o labor dos voluntarios que “moitas veces son os primeiros en chegar e prestar os primeiros auxilios”.

Martes, 19 de febreiro de 2008

Inaugurada a rede de acceso público a internet nas parroquias de Barrantes e Pinzás

Os veciños das parroquias tomiñesas de Barrantes e Pinzás, terán a partires de agora a posibilidade de conectarse a internet ou manter una video conferencia, a través do sistema Wimax.

Na mañá de onte, a directora xeral de Promoción Industrial e da Sociedade da Información, Mª Helena Veiguela Martínez, inaugurou a rede de telecomunicacións sen fíos de acceso público a internet, que dará cobertura a máis de 1.000 usuarios de ámbalas parroquias.

No acto, celebrado na Escola de Cristelos (Barrantes), Veiguela estivo acompañada pola delegada de Innovación e Industria, Mª Montserrat Prado Cores, a alcaldesa de Tomiño, Sandra González Álvarez, o concelleiro de Promoción Económica, Xaquín Villadangos, o xerente da empresa instaladora e outros responsables municipais.

A directora xeral explicou o proceso que fixo posible incluír a Tomiño dentro dos doce concellos que participan no proxecto piloto enmarcado dentro do Plano Estratéxico Galego da Sociedade da Información. O investimento, superior aos 83.000 euros, mellorará a calidade de vida dos veciños destas parroquias, que ata o de agora, carecían de cobertura para a conexión de banda ancha. “No século XXI as comunicacións a través das novas tecnoloxías son imprescindibles, tanto no ámbito das relacións persoais, como no mundo empresarial”, comentou Veiguela. A mandataria explicou que o proxecto inclúe tamén a creación de dúas aulas de dinamización, con ordenadores, impresoras e outros equipos que permitirán formar aos veciños no manexo das novas tecnoloxías. Lembrou que o custe deste servizo será de balde, o mesmo que a instalación para os primeiros cen veciños que soliciten o sistema wimax.

A directora xeral, ante a demanda da alcaldesa de Tomiño, admitiu que aínda que se trata dun proxecto piloto, existe a posibilidade de ampliar o servizo a outras parroquias do termo municipal. “En todo caso, esta actuación sirve de exemplo para reflexar cómo dende unha consellería nacionalista é viable e sostible levar as novas tecnoloxías a tódolos veciños, non só aos do casco urbano”, sinalou.

Pola súa banda, a alcaldesa destacou o feito de que este fora o primeiro proxecto do actual goberno que é inaugurado. “Esta acción reflexa o compromiso do goberno coas parroquias e a intención de que a xente do rural se forme tamén en novas tecnoloxías”, salientou a rexedora.

Roberto Valverde, xerente da empresa “Mira Servizos”, explicou os principais aspectos técnicos do sistema Wimax, destacando as súas vantaxes de maior calidade e acceso á telefonía con imaxe, O técnico asegurou que co repetidor do que dispón agora o concello, sería posible nun futuro dar cobertura a todo o termo municipal.

Tralos discursos, a directora xeral de Promoción Industrial mantivo unha video conferencia con Paco Blanco, un veciño da Alpuxarra (Pinzás), co que falou durante algúns minutos sen nengún tipo de problema ou interferencia. Blanco foi un dos primeiros veciños en solicitar a instalación do novo sistema no seu domicilio, polo que se amosaba moi satisfeito.

Trala conferencia, procediuse á visita da aula de dinamización de Cristelos, e logo á de Pinzás, sita na Casa do Pobo.

Ata o de agora, os veciños de Barrantes e Pinzás non tiñan liña telefónica, véndose obrigados a utilizar un sistema de telefonía por satélite cun custe maior que o de a conexión do sistema Wimax, e moitas menos prestacións.

A implantación do sistema Wimax, permitirá a máis de mil veciños das parroquias de Barrantes e Pinzás, ata agora sen cobertura por parte das grandes operadoras comerciais, beneficiarse do acceso a internet sen fíos, prevíndose axudas económicas para os primeiros usuarios.

Isto é posible despois de que se asinara o correspondente convenio de colaboración coa Consellería de Innovación e Industria, para levar adiante un proxecto piloto para a implantación dunha rede de telecomunicacións sen fíos de acceso público a internet, e de que o Concello de Tomiño, realizara a adxudicación á empresa Mira Servizos.

Sábado, 16 de febreiro de 2008

Tomiño inaugurará o luns o acceso público a internet e se instalará dúas "Aulas de dinamización"

O vindeiro luns, 18 de febreiro, a directora xeral de Promoción Industrial e da Sociedade da Información, Mª Helena Veiguela Martínez, e a delegada de Innovación e Industria, Mª Montserrat Prado Cores, visitarán Tomiño coa intención de inaugurar a rede de acceso público a internet que permitirá aos veciños de Pinzás e Barrantes (que así o soliciten) disfrutar do servizo de conexión a Internet sen fíos. No colexio de Cristelos (Barrantes) e na Casa do Pobo (Pinzás), instalaranse dúas "Aulas de dinamización", nas que se formará aos interesados para o uso das novas tecnoloxías.

A visita comezará ás 12.00 horas, con rolda de prensa no edifició coñecido como Escola de Cristelos (Barrantes), na que intervirá a Mª Helena Veiguela Martínez, alcaldesa de Tomiño, Sandra González Álvarez; o concelleiro de Promoción Económica, Xaquín Villadangos, e un membro da empresa instaladora.

A continuación, procederase a inaugurar o sistema Wimax e a realización dunha video conferencia entre a directora xeral e un veciño que xa ten instalado na súa casa o equipo receptor.

Antecedentes:

Isto é posible despois de que se asinara o correspondente convenio de colaboración entre o concello de Tomiño coa Consellería de Innovación e Industria, para levar adiante un proxecto piloto para a implantación dunha rede de telecomunicacións sen fíos de acceso público a internet, e de que o Concello de Tomiño, realizara a adxudicación á empresa Mira Servizos.

Pleno extraordinario en Tomiño

O vindeiro luns, 18 de febreiro, ás 20.00 horas celebrarase no concello de Tomiño unha sesión plenaria de caracter extraordinario, con cinco puntos na Orde do Día: 1. Aprobación Acta Sesión Anterior; 2. Proposta adxudicación concurso recollida de lixo; 3. Proposta subsanación deficiencias modificación puntual Nº4 do PXOM; 4. Dar conta situación parcelas Centro de Día; 5. Ratificación delegacións Xunta de Goberno Local.

Convocatoria dunha praza de persoal laboral

O concello de Tomiño anuncia a contratación dunha praza de persoal laboral temporal a tempo parical para a xestión do CEMP, xornada de 6 horas/día, de 14.00 a 20.00h.

As solicitudes deberán ser presentadas ata o 21 de febreiro, puidéndose consultar as Bases na Secretaría do concello.

Venres, 15 de febreiro de 2008

Educación inviste máis de 1,1 millóns de euros na ampliación do CEIP de Tebra de Tomiño

A conselleira de Educación e Ordenación Universitaria, Laura Sánchez Piñón, inaugurou onte as obras de ampliación e reforma do Colexio de Educación Infantil e Primaria de Tebra, de Tomiño, nas que a Administración educativa investiu un total de 1.108.416 euros.

Estas actuacións realizáronse co obxectivo de mellorar o acondicionamento do centro, e consistiron na ampliación do acceso principal do recinto, a eliminación de chanzos e diferenzas de cotas mediante a suba do terreo e colocación de ramplas de acceso, acondicionamento de zonas de xogos e do peche metálico do recinto. A superficie útil total resultante destas obras ascende aos 1.353 metros cadrados.

Ademais, realizáronse distintas obras de reforma e mellora nos tres edificios. Deste xeito, ampliouse a zona de administración e dirección, creouse unha sala de ordenadores independente, acondicionáronse as aulas, melloráronse os espazos comúns e substituíronse carpinterías, cubertas e chans.

Así, tras esta actuación, a distribución do centro queda do seguinte xeito: no edificio A, sitúanse a dirección, secretaría, arquivo, sala de profesores, 7 aulas, aseos, cuarto de limpeza e aula de informática; no edificio B, a biblioteca, taller polivalente e usos múltiples, aseos e cuarto de instalacións; e no edificio C, 3 aulas de infantil, almacéns e aseos.

No CEIP de Tebra cursan estudos 112 alumnos e alumnas. Este centro conta co programa de anticipación da primeira lingua estranxeira en educación infantil. En canto ao equipamento informático, a Administración educativa ten previsto dotar proximamente a este centro de 2 ordenadores de sobremesa, 1 portátil e 1 monitor, polo que pasaría a dispoñer de 26 equipos.

Xoves, 14 de febreiro de 2008

O concello de Tomiño, único da comarca que non presentou solicitude á Deputación provincial para acollerse ó plan de contratación de desempregados

O portavoz municipal do Partido Popular de Tomiño lamenta a “desidia e pasividade” do goberno tripartito de Tomiño, encabezado pola alcaldesa do BNG Sandra González, que non solicitou a incorporación de Tomiño ao Plan de Actividades da Deputación que permitiría a contratación de varios traballadores en situación de desemprego por un período de 5 meses e que tiña por obxecto a realización de diversas obras ou servizos municipais de interese xeral e social.

A través deste Plan, explica Pérez Ares, a Deputación financia o 75% do custe salarial total e o Concello o 25%. Nestes últimos anos o concello de Tomiño beneficiábase destas axudas o que permitía a contratación de 4 ou 5 desempregados que levaban a cabo diversas obras ou servizos destinados á reparación, construcción de instalacións, recuperación de espazos, axardinamento, reparación de centros educativos ou outras de interese xeral.

O concello de Tomiño é o único da Comarca, insiste o portavoz popular, que, adoptando unha actitude incomprensible –quizáis baseada na soberbia- permítese o ‘luxo’ de desprezar unhas axudas destinados a desempregados que, en parte permitiría paliar en certa medida a grave situación de desemprego que está afectando a varios sectores e que incide tamén moi negativamente no neste concello, aínda que o goberno tripartito parece ignorar tal situación a vista dos feitos.

Para o voceiro, Pérez Ares, “o goberno local demostra unha carencia de sensibilidade nun tema tan fundamental para moitos veciños que actualmente sofren as consecuencias dunha situación de desemprego.

Ata o 26 de febreiro pódese visitar a exposición “Máis que auga”

As concellerías de Medio Ambiente e Cultura, que presiden Santiago Vergara e Jesús Castiñeira, respectivamente, organizaron unhas xornadas sobre desenvolvmento sostible no marco da exposición “Máis que auga”, patrocinada por Caixa Galicia. Celebradas xa as mencionadas xornadas, no Casa da cultura pódese visitar, ata o próximo 26 de febreiro, en horario de mañá (10.00 a 13.00 horas) e tarde (16.30 a 19.30 horas), a exposición “Máis que auga”, coa posibilidade de organizarse visitas guiadas para escolares, os martes e xoves.

A exposición “Máis que Auga” ten como obxectivo pór de manifesto a importancia que ten a auga no entorno e a súa necesidade para a vida de animais, plantas e seres humanos.

Nesta exposición preséntanse 42 fotografías orixinais a cor, que recollen imaxes moi curiosas da vida do home en torno á auga. Pódense contemplar imaxes de fontes, presas, contaminación, incendios e cambio climático, entre outras. Outra parte da obra mostra o xogo da auga coa natureza, nubes, ríos e mares.

Información das actividades da Dirección Xeral de xuventude na Casa da Xuventude

A Dirección Xeral de Xuventude organiza o programa Primavera Activa co que promocionan as Casas de Turismo Rural. A información deste programa está xa na Casa da Xuventude e vai dirixida a mozos de 18 a 35 anos.

De marzo a maio poderanse disfrutar as fins de semana dunha Casa de Turismo Rural con diversas actividades, en toda a xeografía galega, con 13 programas distintos. O prezo é de 60€.

O prazo de inscrición abriuse o pasado luns.

Por outra banda lembramos que a Dirección Xeral de Xuventude oferta un curso de portugués on-line, baixo o título “Portugués para nós”. Vai dirixido a toda a poboación e pódese consultar na web www.portuguesparanos.com. Para incentivar a participación dos mozos de 18 a 30 anos, a Dirección Xeral de Xuventude sorteará unha fin de semana en Lisboa.

A Policía Local de Tomiño leva a cabo unha campaña informativa sobre tráfico e seguridade viaria

Dende este luns e ata o 29 de febreiro a Policía Local de Tomiño, en colaboración coa Concellaría de Tráfico e Seguridade de Tomiño, e a Xefatura Provincial de Tráfico de Pontevedra, que facilitou diverso material informativo, está a desenvolver unha Campaña de concienciación para respectar as normas de tráfico e seguridade viaria.

Durante esta campaña os axentes da Policía Local incrementarán a súa presenza nos centros escolares, onde informarán aos pais sobre as medidas de seguridade que deben adoptar á hora de levar nenos nos vehículos.
Os centros urbanos Tomiño e Goián tamén serán lugares nos que a policía local incidirá nesta campaña, co obxecto de que se respecten os pasos de peóns, beirarrúas, vados, zonas de carga e descarga, paradas de servizo público etc.

Amais a Policía Local de Tomiño adheriuse á campaña do uso do cinto de seguridade, establecida pola DXT entre os días 11 ao 24 de febreiro de 2008.

A Conselleira de Educación visita este mediodía as obras do CEIP de Tebra

A Conselleira de Educación, Laura Sánchez Piñón, vai visitar ás 12 deste mediodía as obras de ampliación e reforma do CEIP de Tebra en Tomiño.

Martes, 12 de febreiro de 2008

O PPdeG reclama a intervención das Consellería de Traballo e Vivenda para amparar aos traballadores e damnificados polo peche da empresa Marbar

O PPdeG rexistrou no Parlamento sendas iniciativas nas que reclama a intervención das consellerías de Traballo e de Vivenda da Xunta para amparar aos 56 traballadores e 300 damnificados afectados polo peche da promotora Marbar, de Tomiño, cuio propietario está desaparecido desde hai varias semanas.

O deputado popular César Pérez Ares, autor das iniciativas parlamentarias, xunto coa voceira de Vivenda, Pilar Rojo, entende que resulta imprescindible a intervención inmediata da Consellería de Traballo para axudar aos 12 operarios fixos e 44 eventuais cos que contaba Marbar e que, como consecuencia do peche da empresa, quedaron sen ingresos económicos, malia que boa parte deles teñan responsabilidades familiares e se enfrontan a serias dificultades económicas, entre as que se atopan hipotecas e outro tipo de compromisos financeiros.

Ingresos para os traballadores que perderon o emprego

Para canalizar esta axuda, o PPdeG considera que o correcto sería conceder aos traballadores afectados o denominado salario de tramitación, activando as posibilidades que outorga o Fondo de Garantía Salarial. asegurando que os afectados podan dispoñer de ingresos económicos mentres non se completan os trámites pendentes como consecuencia da situación sobrevida na empresa na que prestaban servizo. Ao mesmo tempo, que se active un Plan Especial de Emprego para recolocar a estes traballadores.

Outros afectados

Paralelamente, e tendo en conta que o peche de Marbar, S.L. podería deixar sen casas arredor de 300 persoas que tiñan apalabrada ou contratada a adquisición dunha vivenda coa promotora, Pérez Ares tamén insta á Xunta a tomar cartas no asunto. Para o PPdeG o desexable sería que, despois de estudar cada caso e as garantías legais que podan existir, a Consellería de Vivenda, de acordo cos afectados, busque posibles alternativas que permitan completar as obras pendentes e entregar as casas aos seus destinatarios.

En opinión de Pérez Ares, o elevado número de provedores afectados polo peche de Marbar, S.L., co que a empresa deixou contraídas débedas elevadas, unida á intensa crise que afecta ao sector da construción e que pode poñer ao borde da quebra a algunhas destas empresas tamén debería levar á Xunta a estudar medidas de apoio, con axudas e liñas de crédito específicas.

Reunión pola Concentración Parcelaria en Tomiño

Hoxe martes terán lugar tres reunións cos veciños das parroquias de Estás, Figueiró e Goián afectados polo proceso de concentración parcelaria.

O Concello de Tomiño informa que as reunións serán ás 19h en Estás, ás 20h en Figueiró, e ás 21h en Goián. Ás mesmas asistirá a alcaldesa de Tomiño, Sandra González Álvarez, xunto a outros representantes municipais e un membro da empresa que acondicionará as fincas.

O obxectivo das reunións é informar aos veciños/as sobre qué clase de acondicionamento e reformas poden solicitar para as súas fincas. Con este fin se entregará aos interesados/as un impreso no que constan os diferentes tipos de traballos que se poden solicitar en relación aos seus predios, como poden ser, por exemplo, ramplas de entrada, eliminación ou retirada de muros, desbroce de fincas de labradío, desvío de presas de rego e recheo de corredoiras, entre outras.

Visita do delegado de Medio rural en decembro

O delegado provincial de Medio Rural, Gonzalo Constenla, visitara Tomiño o pasado mes de decembro informado dos 41 recursos presentados ao acordo de concentración dos predios nas parroquias de Estás, Goián e Figueiró. Estes expedientes foran remitidos á Dirección Xeral de Infraestructuras e Estructuras Agrarias da Consellería do Medio Rural para a súa resolución para dar firmeza ao acordo.

En rolda de prensa, o delegado anunciba daquela un investimento 675.000 € no 2008, destinados ao acondicionamento de fincas, eliminación de accidentes naturais na zona de Estás-Goián-Figueiró e mellora de camiños nas zonas de concentración dos Panascos e Estás-Goián-Figueiró.

Esta cuantiosa inversión no Concello de Tomiño é o comezo dun proceso dinamizador, que en palabras do delegado provincial de Medio Rural, suporán un verdadeiro impulso do rural na comarca, que se sumará á serie de medidas co mesmo fin, como a incorporación de mozos e mozas como titulares de explotacións agrarias; plans de mellora das instalacións e equipamentos das explotacións; apoio ao sector transformador e comercializador e establecemento de plans de promoción e calidade dos productos agroalimentarios. Outras medidas que axudarán a dinamizar o sector, segundo precisou Gonzalo Constenla, son a declaración da comarca do Baixo Miño, como Zona de Especial Interese Agrario e zona piloto do Banco de Terras de Galiza; o plano de renovación do parque de maquinaria agrícola, e o Plan Estratéxico de Infraestructuras no Medio Rural.

Sobre este último, Uxío Benítez, concelleiro de Urbanismo e Patrimonio, lembrou que a Consellería de Medio Rural aportará outros 95.000€ que serán invertidos no camiño do Alivio e no que une Estás e Figueiró. O edil agradecera entón o interese do delegado provincial, afirmando que “esta actuación pon de manifesto unha vez máis, o compromiso da Consellería co concello de Tomiño”.

O concello organiza unhas xornadas sobre desenvolvemento sostible no marco da exposición “Máis que auga”

As xornadas, tituladas “O desenrolo sostible e a cultura da auga”, celebráronse o pasado sábado, 9 de febreiro, na Casa da Cultura tomiñesa, coa asistencia dun bo número de persoas.

Ás seis da tarde, tivo lugar a inauguración da exposición “Máis que auga”, presidida por Gloria Rodríguez López, xerente territorial da Fundación Caixa Galicia, Juan Francisco Froján Fontán, delegado provincial de Medio Ambiente e Desenvolvemento Sostible, e a alcaldesa de Tomiño, Sandra González Álvarez.

Esta última, agradeceu a asistencia dos presentes, e salientou a importancia de aprender a conservar e aforrar un recurso escaso como á a auga na actualidade. “O governo de Tomiño, comprometido coas causas ambientais e coa sostibilidade, viu nesta exposición que nos brindou Caixa Galicia unha oportunidade para reflexionar de xeito colectivo arredor da temática da auga e da súa xestión”, explicou. A rexedora cualificou de laborioso e exemplarizante o traballo dos veciños/as que organizaron as traídas de auga nas parroquias e barrios da localidade, e lembrou que “os desafíos que plantexa a crisis da auga a escala local, rexional e mundial só se poden resolver coa participación integrada de todos os actores implicados”.

O delegado provincial de Medio Ambiente, Juan Francisco Froján, pola súa banda, destacou a importancia de comezar a interesarse polo uso responsable da auga. “É necesario preguntarse qué uso facemos da auga dende a súa captación ata o seu consumo”, indicou. Respecto do uso que se fai da auga, dixo que non sempre é sostible e expresou a súa preocupación polas consecuencias do cambio climático.

Gloria Rodríguez López, xerente territorial da Fundación Caixa Galicia, agradeceu a disposición do Concello para acoller a mostra e resaltou o valor didáctico da mesma.

Tras unha visita guiada á exposición, comezaron as xornadas. A primeira conferencia: “Conservar a auga para ter máis auga”, estivo a cargo de Natalia Caparrini, xeóloga e profesora do Departamento de Inxeniería de Recursos Naturais da Universidade de Vigo.

Gemma Alonso Acuña, do Departamento de Medio Ambiente e Bromatoloxía do laboratorio Lema&Bandin, pronunciou a segunda e última charla, baixo o título “Auga saudable. Parámetros de Calidade”.

Os concelleiros responsables da organización das xornadas salientaron o seu ánimo de “contribuír á conservación e aforro de auga, fomentando unha maior e mellor cultura da auga, e promovendo a formación dos veciños e veciñas do noso concello”.

Visitas guiadas

A exposición “Máis que auga” permanecerá aberta ata o 26 de febreiro, en horario de mañá (10.00 a 13.00 horas) e tarde (16.30 a 19.30 horas).

Así mesmo, organizaranse visitas guiadas para escolares, os martes e xoves.

A exposición “Máis que Auga” ten como obxectivo pór de manifesto a importancia que ten a auga no entorno e a súa necesidade para a vida de animais, plantas e seres humanos.
Nesta exposición preséntanse 42 fotografías orixinais a cor, que recollen imaxes moi curiosas da vida do home en torno á auga. Pódense contemplar imaxes de fontes, presas, contaminación, incendios, cambio climático, etc. Outra parte da obra, mostra o xogo da auga coa natureza, nubes, ríos e mares.

Sábado, 9 de febreiro de 2008

O luns os traballadores de Marbar presentarán denuncia no xulgado por despido improcedente

Pasaron 19 días dende que de xeito totalmente inesperado se pechou a empresa Marbar en Tomiño deixando na rúa a 56 traballadores, e centos de persoas afectadas tanto por ser empresas subcontratadas, coma ás que mercaron algunha propiedade á promotora.

Dende entón pouco se sabe do propietario de Construcciones Marbar. La Voz de Galicia apuntaba hai uns días que a finais de xaneiro pernoctara unha noite nun hotel de Ciudad Rodrigo, pero non hai máis pistas polo momento do seu paradoiro. Entanto na zona os afectados vanse organizando para facer valer os seus dereitos e sobre todo para botar luz sobre unha situación xerada tras este peche patronal.

Os traballadores, superada en parte a incertidume dos primeiros días, van afacéndose a nova situación non sen preocupación, segundo explicaba Serafín Fernández, da CIG, na Radio Municipal de Tui.

Os traballadores teñen no seu poder unha acta presencial feita polo notario de Tui acompaña de case 200 fotografías na que se reflicten as urbanizacións e bens que tiña o dono de Marbar. Propiedades ás que hai que sumar outros inmobles noutros lugares do país, e maquinaria que tiña a empresa. O que Serafín Fernández calcula supera os 10 millóns de euros.

O próximo luns os traballadores presentarán no xulgado unha demanda por despido improcedente e na que figuran as cantidades que se lles adebedan. Pero a esas cifras haberá que engadir as diferenzas salariais, e as diferenzas provocadas pola mala aplicación do convenio.

Onte a mañá comezou unha auditoría da empresa que servirá para facerse unha imaxe precisa da situación de Marbar.

Dos 56 traballadores que tiña Marbar, hai xa 15 persoas que están recolocadas, e outro tanto que están en vistas de poder ser contratados por outras empresas.

Venres, 8 de febreiro de 2008

Hoxe o Desfile de comparsas pecha o Entroido en Tomiño

O Concelleiro de Cultura de Tomiño, Jesús Castiñeira, informa que despois de terse aprazado o tradicional desfile de Entroido por mor da choiva hoxe venres desfilarán as 40 comparsas inscritas, con máis de 800 compoñentes, que darán colorido durante máis de dúas horas ás rúas de Tomiño.

Entre as comparsas figuran algunhas noveis formadas por veciños e veciñas das diferentes parroquias do Concello pero tamén estarán outras xa tradicionais como Estrelas da Noite, Revolución, Virxe do Alivio ou Colores de Porriño, todas elas con motivos, música e vestiario renovado.

A comitiva sairá as nove e media da noite dende o Colexio Pedro Caselles e percorrerá a rúa Gondomar, A Guarda, rematando entre República Arxentina e o Instituto de Tomiño, polo que estas rúas quedarán pechadas á circulación.

O Concelleiro explica que “nesta ocasión optouse por mudar o percorrido, xa que o ano pasado producíronse algúns problemas o tratarse dun circuíto pechado e haber máis comparsas e compoñentes que espazo. Este venres prevése que o desfile sexa máis áxil e se eviten os atascos.

Para garantir a seguridade se reforzarán os Servizos de Policía Local e Protección Civil, xa que se espera unha importante afluencia de público, como xa ten acontecido noutras edicións.

A Concellería fai un chamamento para que se eviten os estacionamentos incorrectos, e os desprazamentos en vehículos ata o Centro se fagan coa anticipación axeitada.

Con este acto péchase o Entroido en todo o Concello despois de que remataran os actos do Entroido de Goián, organizado pola asociación veciñal en colaboración coa Concellería de Cultura igual que nos Centros Culturais.

Xornada sobre “O desenvolvemento sostible e a cultura da auga” en Tomiño

A Casa de Cultura de Tomiño acolle este sábado unha xornada titulada “O desenvolvemento sostible e a cultura da auga” organizada de xeito conxunto polas concellería de Medio Ambiente e Cultura e patrocinada por Caixa Galicia.

Ás seis da tarde está prevista a inauguración da exposición “Máis que auga” na que se contará coa presenza de Gloria Rodríguez López, xerente territorial da Fundación Caixa Galicia, Juan Francisco Froján, delegado Provincial de Medio Ambiente e de Sandra González, alcaldesa de Tomiño.

Unha hora despois o Concelleiro de Cultura, Jesús Castiñeira e o Concelleiro de Medio Ambiente, Santiago Vergara, farán a presentación da xornada e darán paso á primeira conferencia. Na mesma Natalia Caparrini, xeóloga e profesora do Departamento de Enxeñería de Recursos Naturais da Universidade de Vigo, falará sobre “Conservar a auga para ter máis auga”.

Ás oito menos vinte da tarde terá lugar a segunda conferencia titulada “Auga saudable. Parámetros de Calidade” a cargo de Gemma Alonso Acuña, do Departamento de Medio Ambiente e Bromatoloxía do Laboratorio Lema&Bandin.

A actividade rematará ás oito cun coloquio.

A exposición “Máis que auga” permanecerá na Casa de Cultura de Tomiño ata o 26 deste mes en horario de 10 a 13h e de 16.30 a 19.30h. O obxectivo desta exposición é pór de manifesto a importancia da auga no entorno e a súa necesidade para a vida das plantas, animais e para os seres humanos ao través de 42 fotografías. Dende o Concello informan que organizarán visitas guiadas para os escolares os martes e xoves.

Xoves, 4 de febreiro de 2008

Reunión dos prexudicados por Marbar na Cañiza

Os propietarios prexudicados polo caso Marbar na Cañiza decidiron reunirse por edificios, amais de continuar coas reunións da Asociación, para avaliar a situación particular de cada edificio.

A primeira reunión será a dos afectados do Edificio Centro (Lindo) na Cañiza. Será este sábado día 9, ás 12 do mediodía, no portal do bloque 1 de devandito edificio. Para identificarse, cada propietario deberá levar a copia do contrato de compravenda e o D.N.I.

Requírese a asistencia de todos os propietarios do Edificio Centro para poder decidir qué medidas se van tomar conxuntamente e coñecer o caso concreto de cada afectado.

Este sábado comezan os cursos de Primeiros auxilios e animación de rúa en Tomiño

Este sábado comezan os dous primeiros cursos organizados pola Concellería de Mocidade de Tomiño dirixidos a mozos e mozas de 12 a 30 anos, e con carácter gratuíto.

Canse impartir o curso de primeiros auxilios, cunha duración de 20 horas, a cargo da Cruz Vermella. Levarase a cabo todos os sábados de 10 a 14 horas na OMIX.

Por outra parte, tamén este sábado día 9, e o sábado 16, impartirase o Curso de Iniciación á Animación de Rúa no Centro Goianés. As clases serán de 10 a 14 horas. Os asistentes ao curso aprenderán a confeccionar xigantes e cabezudos, e a andar en zancos da man de Elías C. Araújo, ex-membro de Tanxarina.

Tamén se oferta un Curso de Mnemotécning, para mellorar a memoria. Terá lugar todos os martes de 20.30 a 22 horas na Casa de Cultura de Tomiño dende o 12 de febreiro até o 8 de abril.

Por último, ofertase un Curso de Fotografía e Photoshop, impartido por Jesús Pazo, fotógrafo tomiñés. Será os luns e mércores do 11 ao 27 de febreiro, de 20 a 22 horas. O sábado 23 de febreiro de 10 a 13 horas haberá unha saída para realizar fotografías (traballo de campo). Posteriormente, organizarase un concurso de fotografía no que poderán participar todos os asistentes. Este curso terá lugar na OMIX.

As inscrición nestes cursos poden facerse persoalmente na OMIX, no Campo da feira s/n 36740 en Tomiño, por teléfono 986 623 304, ou ben, por correo electrónico omixtominho@yahoo.es.

Luns, 4 de febreiro de 2008

O concello de Tomiño pon en marcha unha campaña de concienciación para aumentar a seguridade vial

A Concellería de Seguridade, Tráfico e Transporte, que dirixe Julia Cascón, pon en marcha unha “Campaña de concienciación para respectar as normas de tráfico e seguridade vial”, que procura un cambio de actitude na cidadanía.

A medida, primeira no seu tipo que impulsada dende o goberno local, consistirá en informar mediante un aviso impreso aos conductores que incumpran as normas de tráfico e aparcamento. Neste aviso, se comunicará ao suposto infractor que está infrinxindo as normas de tráfico e seguridade vial, e prexudicando coa súa acción aos demais usuarios das vías públicas. Así mesmo, se lle fará saber que o seu comportamento está tipificado no Código de Circulación como unha infracción que podería ser sancionada cunha multa de ata 300 euros, e por último, se lle convidará a cumprir as normas de circulación.

A campaña xurdiu despois de observar un importante número de infraccións ás normas de tráfico e seguridade vial, que se producen a diario na vila. “Cremos que é necesario informar e educar á xente neste tema, para evitar infraccións e aumentar a concienciación sobre o tema da seguridade vial”, comentou Julia Cascón, que é partidaria de fomentar un cambio de actitude antes de proceder directamente a multar aos veciños que cometan unha infracción.

A concelleira informou ademais, que se están estudando as necesidades das parroquias no tema de tráfico e seguridade (necesidade de espellos, pasos peonís elevados, reordenamento de rúas de dobre dirección, sinalización, etc.) para comezar a subsanalas. Neste senso, indicou que o regulador de velocidade de Vilar de Matos, que levaba varios anos estropeado, xa está funcionando, e o de Torrón o fará en breve.

Ademais, Cascón anunciou unha reorganización dos servizos da policía local, co fin de garantir unha maior eficacia con especial atención aos centros escolares e á seguridade do tráfico na vila.

Sábado, 2 de febreiro de 2008

Aplazado ata o vindeiro venres, 8 de febreiro, o “Venres de Foliada”

A Concellalía de Cultura do concello de Tomiño informa que o desfile de comparsas "Venres de Foliada" queda suspendido por mor das condicións climatolóxicas.

O desfile terá lugar o vindeiro venres día 8 de febreiro ás 21.30h.

Publicado no DOGA o anuncio de concurso público para o futuro Centro de Día de Tomiño

O Diario Oficial de Galicia, publicou o pasado 31 de xaneiro (nº 22), a resolución do Consorcio Galego de Servizos de Igualdade e Benestar, pola que se anuncia o concurso público para a elaboración do proxecto básico e de execución da obra de construcción dun centro de día para a atención a persoas maiores, situado na parcela Monte Pombal no barrio da Rocha (Tomiño).

O concurso realizarase por procedemento aberto e tramitación ordinaria. Segundo se recolle no DOGA, o Consorcio Galego de Servizos de Igualdade e Benestar, unha vez cumpridos os trámites administrativos correspondentes, resolve anunciar concurso para a contratación da obra, cun prazo de execución de 10 meses dende a sinatura do contrato, e un investimento total de 1.038.451,11 euros distribuídos en dúas anualidades (2008: 927.496,51€, e 2009: 110.954,60€).

Venres, 1 de febreiro de 2008

Celebracións do Entroido en Tomiño

Tomiño dá hoxe o pistoletazo de saída ás celebracións do Entroido no Baixo Miño co “Venres de Foliada”. Dende ás nove da noite as 38 comparsas participantes desfilarán polas rúas do centro dende o Colexio Pedro Caselles até a Praza do Seixo onde terá lugar o fin de festa. A comitiva estará formada por máis de 800 persoas. Esta alta participación consolida esta celebración do Entroido que este ano se pechará cun concerto baixo carpa a cargo do grupo folk Ardentía.

Precisamente debido á celebración do Desfile de Entroido a policía Local de Tomiño informa que hoxe dende ás catro da tarde non se poderá estacionar na rúa Gondomar, A Guarda, na Praza do Seixo, na Praza da Mina, nin na rúa República Arxentina. Amais o tráfico polo casco urbano permanecerá cortado dende ás nove da noite e até o remate do desfile entorno ás 12 da noite.