Sábado, 27 de febreiro de 2010    

Un grupo de xornalistas especializados en turismo visitará Tui os vindeiros luns e martes convidados polo concello

Arredor de vinte xornalistas pertencentes á Federación Española de Periodistas e Escritores de Turismo (FEPET), coñecerán o Camiño Xacobeo Portugués grazas á iniciativa da Asociación Galega de Xornalistas e Escritores de Turismo (AGATEX). Esta asociación, que preside Guillermo Campos, entregará os seus premios anuais na Gala do Turismo e a Gastronomía de Galicia que se desenvolve o martes 2 de marzo en Pontevedra.

Pero nas xornadas anteriores este grupo de arredor de vinte xornalistas especializados visitarán á cidade tudense, porta de entrada do Camiño Portugués a Santiago de Compostela. O luns, 1 de marzo, chegarán a Tui e serán recibidos polo alcalde tudense que os acompañará, de seguido, nunha cea de benvida. Ao día seguinte, martes, realizarán unha visita guiada á Catedral e ao conxunto monumental tudense, para a continuación dirixirse cara Pontevedra e Santiago.

Profesionais de Madrid, Barcelona, Bilbao, Las Palmas, Valencia, Zaragoza e outras capitais españolas daranse cita nesta visita, na que estarán acompañados amais de prestixiosos xornalistas galegos.

Para o concelleiro de cultura tudense, Moisés Rodríguez Pérez, a visita deste grupo de xornalistas, interesados no coñecemento da nosa cidade como porta de entrada do camiño portugués á Compostela, resulta de suma satisfacción para este Concello de Tui pois evidencia o interese que esta cidade e os seus recursos históricos e turísticos suscita nos medios xornalísticos especializados de España.

Por outra banda, esta visita, coincide co traballo que desenvolve o Concello de Tui para a promoción turística da localidade, especialmente neste ano Xacobeo, na que se agarda un importante número de visitantes. A inmediata edición de material informativo dirixido especificamente aos peregrinos, a apertura do Centro de Interpretación do Camiño Portugués, etc. son novas iniciativas que desenvolven os responsables municipais para a promoción do Concello de Tui neste Ano Santo Compostelá.

O PECH e o PXOM presentes no debate do pleno ordinario

Durante dúas horas reuniuse o xoves a corporación municipal de Tui no pleno ordinario de febreiro. Na mesma foron aprobadas por unanimidade as dúas propostas que se levaban.  Por unha parte a aprobación inicial da ordenanza reguladoras das axudas para a rehabilitación de dez vivendas no Casco Histórico de Tui na sétima fase da Área de Rehabilitación, contemplando a posibilidade de que se non houbese dez solicitudes no casco histórico se puidese rehabilitar tamén algunha no rural.  O outro punto aprobado por unanimidade foi a solicitude ao Ministerio de Fomento de instalación de pantallas protectoras nos lindes da A-55 ao seu paso por Tui, que o obxecto dunha moción presentada polo BNG.

Gran parte do debate, tanto nestes puntos, coma na quenda de rogos e preguntas centrouse no urbanismo de Tui, en dous puntos concretos a tramitación do Plan Especial do Conxunto Histórico, e na situación do Plan Xeral de Ordenación Municipal.

Con respecto ao PECH Manuel Freiría do PSdG-PSOE indicaba que o feito de non estar aprobado está a limitar a rehabilitación das casas neste ámbito a simples reparacións, e non establecéndose ningún criterio. Laureano Alonso do BNG insistía en que a aprobación deste plan é “primordial” engadindo que facilitaría a rehabilitación facendo o proceso administrativo máis doado e rápido.  Tamén dende Acción Tudense Miguel Capón insistiu en que o PECH é “o instrumento para conseguir axudas”. 

Pola súa parte o Alcalde, Antonio Fernández Rocha, expuxo que a aprobación inicial do PECH en 2001 contou co informe favorable da COTOP, pero co desfavorable de Patrimonio que quería que abranguese tamén a área de respecto, punto que non compartía o equipo de goberno.  Avanzaba que agora houbo un cambio de criterio e vaise pór en marcha un Plan Especial con dúas ordenanzas unha destinada ao conxunto histórico e outra para a coñecida coma zona de respecto. Por este motivo dicía que as zonas que antes se contemplaban coma PEMCU’s desaparecen ao quedar acollidas nesta segunda ordenanza.  Precisamente con ese obxectivo explicaba que nos orzamentos de 2010 incluirase unha partida para a redacción desta normativa urbanística.

Con respecto ao Plan Xeral de Ordenación Municipal que segue pendente do informe de Patrimonio para poder ser avaliado pola Xunta, explicaba  Fernández Rocha respondendo ao Partido Socialista que o equipo redactor manterá o martes unha última reunión cos técnicos de Patrimonio. O obxecto dese encontro será analizar un tramo que falta do Camiño de Santiago. Amais disto o equipo redactor ten pendente incluír no traballo complementario solicitado pola Dirección Xeral de Patrimonio 300 dos mil elementos a conservar.

Os grupos da oposición instaban a reunirse co Director Xeral de Patrimonio o co Conselleiro de Cultura, do mesmo xeito que fixeron co de Medio Ambiente e Infraestruturas, para tratar de desbloquear a situación do PXOM.

Amais destes asuntos sobre a mesa estivo tamén unha solicitude do Partido Socialista para que o concello inspeccione de xeito inmediato a situación dos parques infantís do municipio. Nese senso Manuel Freiría presentou unha detallada relación coas deficiencias que presentan estas instalacións co conseguinte perigo para os nenos.

Tamén dende o PSOE, Pablo Alonso, fixo fincapé no feito de que restan 500 persoas para que Tui chegue aos 20 mil habitantes o que conlevaría recibir máis cartos do Estado. Por este motivo expuña que é interesante que a xente se empadroe no municipio.

Por outra parte respondendo a preguntas de Juan Miguel Diz Guedes, de TUI, o rexedor tudense explicou que a próxima semana, martes ou mércores, arquitectos de Patrimonio achegaranse a Tui para facer o proxecto de rehabilitación de 4 ou 5 muíños no Tripes nunha primeira fase. Indicaba que a Dirección Xeral de Patrimonio fará a rehabilitación, e a Dirección Xeral de Conservación da Natureza unha senda.  Amais os técnicos de Patrimonio que a semana que vén estarán en Tui estudarán tamén a posta en marcha na cárcere vella a posta en marcha dunha Aula de Interpretación do Conxunto Histórico.

Tamén explicaba o rexedor que no mes de marzo o Concello asinará coa Consellería Traballo e Benestar un convenio para a construción da gardería e do centro de día, para o que nos orzamentos deste ano terá que ir unha partida de 60 mil euros. A gardería podería estar finalizada este ano, e o centro de día en 2011.

Amais na quenda de mocións foron presentadas 5.  A primeira do Partido Socialista propuña pór en marcha para esta temporada turística pda con gps con rotas e información turística da cidade.  O tema quedou sobre a mesa para o seu estudo en comisión.

O BNG solicitaba en sendas mocións revisar o tramo de beirarrúas dende Guillarei a Areas, especialmente nas Bornetas, para eliminar as barreiras arquitectónicas, así como a instalación dunha pantalla vexetal para minimizar o impacto visual da EDAR de Guillarei, outra moción sobre a fusión das caixas galegas. Todas quedaron sobre a mesa para ser levadas a comisión.

O BNG presentou outra moción sobre o Día Internacional da Muller que se celebra o 8 de marzo, que foi desestimada ao non prosperar a urxencia.

Samuel Diz participar no Guitar World Competition

O tudense Samuel Diz está a participar no Guitar World Competition cuxa primeira fase desenvólvese en on-line na internet. Á final que se disputará en Serbia o 21 e 22 marzo acudirán só dez dos vídeo seleccionados entre todos que participan nesta primeira fase. Unha parte dos que participarán na final serán seleccionados polo xurado, e outros polo propio público que visite a web www.worldguitarcompetition.com

Samuel Diz explicaba que para apoiar a súa actuación só teñen que acceder á web, darse de alta, e ver os vídeos. As explicacións están na súa web www.samueldiz.com

Samuel Diz enviou unha actuación propia interpretando o segundo e terceiro movemento da Sonatina Meridional de Manuel María Ponce, e a peza do compositor vigués Oswaldo Costal titulada “Labas”.

Os prestixiosos realizadores Jay Rosenblatt E Raymond Depardon protagonizan Play-Doc 2010

 Os afeccionados ao cinema teñen unha cita ineludible do 17 ao 21 de marzo en Tui, para acudir ao festival internacional de documental que prepara dúas retrospectivas dos dous autores máis influíntes das últimas décadas.

O norteamericano Jay Rosenblatt visita Tui por segunda vez logo de participar o ano pasado no concurso con Beginning Filmmaking. Presentará desta volta un total de dez pezas que realizan un percorrido por unha carreira marcada pola técnica do collage.

A combinación de tomas persoais con material rescatado de bibliotecas ou de arquivo, que no argot fílmico se denomina found footage (metraxe atopada, literalmente), centra o discurso destas pezas, moi na tradición do cinema-ensaio de Jean-Luc Godard e Chris Marker.

Así, o realizador reflexiona sobre as diferentes facetas da condición humana, sempre cun estilo arriscado, comprometido, evocador e dunha grande forza psicolóxica.

Grazas á súa inconfundible ollada, Jay Rosenblatt ten sido galardoado con preto de cen premios en festivais como Sundance e recibido bolsas de fundacións como a Rockefeller ou a Guggenheim. Licenciado en Psicoloxía, combina a súa produción artística impartindo clases no San Francisco Art Institute.

Raymond Depardon, da fotografía ao cinema con éxito

O francés Raymond Depardon é un dos nomes clave no cinema contemporáneo dos últimos trinta anos, un dos poucos artistas que ten transitado da imaxe estática ao movemento conservando a súa pegada autoral intacta.

Popular polas súas fotografías das guerras de Alxeria ou de Vietnam, presenta tamén unha filmografía extensa na que cunha ollada silenciosa, enigmática e inescrutable logra retratar colectivos tan diversos coma o dos tolos de San Clemente ou o día a día dos policías de París en Faits divers.

Estes dous filmes pasaranse xunto a outros tres nunha intensa retrospectiva que intenta capturar a esencia dunha filmografía que xa anda polos corenta títulos.

Venres, 26 de febreiro de 2010    

O Instituto de Estudios Tudenses presenta o segundo número da revista Castellum Tyde

O Instituto de de Estudios Tudenses presenta hoxe, venres, o segundo número da revista de estudos “Castellum Tyde” nun acto que terá lugar ás 20,00 horas na Sala “Fundación Felix Rodríguez” no edificio Área Panorámica de Tui. Este acto de presentación estará a cargo do investigador Clodio González Pérez, do Museo do Pobo Galego e un dos máis acreditados estudosos da cultura popular de Galicia.

Neste novo número de “Castellum Tyde” figuran un total de 13 traballos de investigación sobre aspectos da historia, da arte e da arqueoloxía de Tui e o ámbito da antiga provincia tudense. Abre esta revista unha lembranza a un membro do Instituto xa finado, Eliseo Alonso, un dos máis importantes escritores e investigadores do Baixo Miño.

O Instituto de Estudos Tudenses, presidido na actualidade por Juan Martínez González, ten como obxectivo básico a investigación e estudo dos diversos aspectos da cultura de Tui e o territorio da súa antiga provincia. Este novo número de Castellum Tyde dálle continuidade a esta publicación iniciada no ano 2007 e que aspira a converterse nun referente da investigación sobre este ámbito territorial tudense achegando os resultados das investigacións abertas por parte de todo tipo de estudosos.

Clodio González Pérez

Naceu en Cenlle-Rivadavia (1947). Foi secretario da Sección de Etnografía e Folclore do Instituto Padre Sarmiento de Estudos Gallegos, secretario da Xunta Rectora e do Padroado do Museo do Pobo Galego, membro da ponencia de Antropoloxia Cultural do Consello da Cultura Galega.

Obtivo as seguientes distincións: Premio Nacional de Periodismo no Certamen de Artes y Tradiciones Populares (Ministerio de Cultura, 1983, 84, 85 y 86), Premio de Investigación da Deputación Provincial de Pontevedra (1987 y 1992) y “Coruxa de Honra” do Museo do Humor (Fene,1999).

Entre as súas numerosas publicacións están artigos en revistas e numerosos libros: “Aproximación a la historia de Ponteareas”, “Castelao: caricaturas e autocaricaturas”, “Acoca”, “Xesús Ferro Couselo”, “Os Maios en Galicia”, “Eladio Rodríguez Gonzalez”, “Antonio Fraguas”, etc.

Sumario de Castellum Tyde, Revista do Instituto de Estudios Tudenses

nº 2 – 2008

1.- Estudo biográfico sobre Eliseo Alonso

Xoán Martínez Tamuxe

2.- “Limpeza, documentación e reproducción de dúas estacións de gravados rupestres no monte Tetón – Tomiño: Petroglifos de Portaxes e Real Seco”

Juan José Pérez Fontao

3.- “O Casino Vello de Tui: unha secuencia completa do Tude romano”

Soledad Prieto Robles

Juan José Perles Fontao

4.- “El mundo indígena y romano en la antigua provincial de Tui. Aproximación al tema”

José Manuel Hidalgo Cuñarro

5.- “Aportación ao estudo da identificación, antigüidade e cristianización das primeiras parroquias da sede episcopal de Tui citadas no II Concilio de Braga no 572 (2ª parte)”

Xoán Martínez Tamuxe

6.- “Santa María de Bongoi”

Suso Vila

7.- “Los milagros de San Telmo (1258): introducción y transcripción”

Manuel Martínez Fernández

8.-  “Traslados de las reliquias de San Pedro González Telmo en la Catedral de Tui”

Avelino Bouzón Gallego

9.- “Episcopologio tudense. D. Luis Marliano (1517-1521). Un obispo de su tiempo”

Antonio Hernández Matias

10.- “La obra de Joâo Fagundes, un pintor-dorador de Braga, en la Catedral de Tuy”

Xabier Añoveros y Trias de Bés

11.-  “Resumen histórico de los conflictos surgidos entre Portugal y Galicia a ambos lados del río Miño”

Jaime Garrido Rodríguez

12.- “Notas sobre la invasión francesa en la antigua provincia de Tui”

Ernesto Iglesias Almeida

13.- “Proyección pastoral del obispo García Benito y la invasión francesa”

Jesús Casás Otero

Nova visitas turísticas organizadas por ACITUI este domingo

    A Asociación de Comerciantes e Industriais de Tui, ACITUI e o Centro de Iniciativas Turísticas Terras do Baixo Miño coa colaboración do Coengo da Catedral de Tui, Ricardo García Fernández, organizan visitas guiadas ao conxunto histórico da Catedral de Tui gratuítas todos os domingos ás 17 horas.

    Estas rutas están abertas a todo o público en xeral e poderán participar todos os comerciantes, hostaleiros, veciños e visitantes que así o desexen.

    Os interesados en asistir poderán recibir mais información e anotarse no teléfono 986 60 75 56 en horario de luns a venres de 9 a 15 horas.

    Estas iniciativas teñen como obxectivo divulgar o patrimonio histórico tudense e da Comarca do Baixo Miño coa finalidade última de poder ofrecer unha información mais axeitada ós nosos visitantes. Deste xeito preténdese conseguir unha mellor e mais longa estancia dos visitantes na nosa comarca, podendo descubrir aspectos de historia do noso patrimonio histórico descoñecidos por gran parte dos habitantes, que son os que mellor poden divulgar os valores da nosa comarca.

Jesús González gañou un ouro e tres bronces na Fisa Team Cup

    O remeiro tudense do Club Remo do Miño Jesús González Álvarez gañou a pasada fin de semana a Fisa-Team Cup, a Regata Internacional de Sevilla, na que participaron máis de 20 países.

    O tudense saldou a súa participación nesta competición cun ouro e tres bronces. Jesús González, formou parte Catro sin, cos medallistas Europeos del equipo nacional Marcelo, Pau e Pedro. Fixéronse co ouro sobre a distancia de 1000 metros. E amais lograron o bronce no Catro sin en 500 metros, e o bronce no 8 con en 500 e mil metros.

Doazón de Sangue en Tui

    Unha unidade móbil do Centro de Transfusións de Galicia estará hoxe e mañá en Tui, na Praza de Galicia. Poderase doar hoxe venres de 16 a 21h e mañá sábado de 10 a 15h.

Xoves, 25 de febreiro de 2010    

Nova exposición na Galería de Arte “Trisquel e Medulio”

    A Galería de Arte “Trisquel e Medulio” na rúa Antero Rubín inaugura o sábado ás 20.30h unha nova exposición. Será unha mostra de pinturas titulada “Entrehuella” de Aormos.  Coincidindo coa inauguración haberá un miniconcerto de música tradicional a cargo do dúo Gaideón.

    A exposición permanecerá aberta ata o 28 de marzo de luns a venres de 17 a 21h e o sábados de 11 a 14.

Premio “Cumbres del Suído” ás Irmás do Anciáns Desamparados”

    Este sábado, 27 de marzo, no Castelo de Vilasobroso en Mondaríz, as Irmás dos Anciáns Desamparados de Tui recibirán o premio “Cumbres del Suído” 2010 aos valores humanos que anualmente convoca o Centro de Estudos da Paradanta e o Condado. Este colectivo reúne a algo máis de medio centenar de persoas. Con este premios buscan distinguir o labor de persoas e institucións cuxo traballo destaca en favor da comunidade.

    O director deste centro, Maximino Fernández Sendín, explicaba na RMT que o premio concédese polo labor humanitario que as Irmás da Residencia San Telmo realizan dende hai moitos anos.

    A superiora das Irmás dos Anciáns, Sor Concepción, recollerá persoalmente o premio este sábado, aínda que tiveron que convencela para que acudise persoalmente. O premio consiste nun diploma e unha escultura.

Un dos concertos do Xacobeo Raíces terá lugar en Tui

    O próximo 6 de marzo comeza o Xacobeo Raíces co ciclo Concertos Cantigas do Camiño. Vanse realizar 12 concertos en cidades e vilas galegas e un recital especial en Madrid, cun total de 25 artistas e agrupacións galegas.  Un destes concertos terá lugar en Tui.

    Os concertos vanse prolongar durante máis de 3 meses, cada sábado, dende o día 6 de marzo ata o día 6 de xuño. Xacobeo 2010 presenta o ciclo Xacobeo Raíces, unha escolma do mellor da música galega contemporánea no que participan 25 artistas e grupos galegos. Xacobeo Raíces é unha boa mostra do que está a acontecer hoxe en día na nosa cultura musical, propostas que beben da tradición, que evolucionan cos tempos que nos toca vivir e que se experimentan na creatividade vital do contemporáneo.Xacobeo 2010 pretende ofrecer unha serie de espectáculos de altísimo nivel, con producións técnicas exquisitamente coidadas. Os artistas que conforman o cartel de Xacobeo Raíces poden considerarse embaixadores da cultura galega, cunha recoñecida traxectoria da súa proposta musical en grandes festivais europeos, salas e teatros de toda América. Xacobeo 2010 posibilita este achegamento á música galega de exquisita riqueza nunha programación popular, atractiva e variada.

    Cada sábado, dende o día 6 de marzo ata o día 6 de xuño, poderemos asistir a unha programación ecléctica e diversa con prezos populares.

    En Tui a cita será o sábado 8 de maio ás 20.30h no Teatro Municipal da man de Berrogüeto acompañados por Lizgairo, Espido, Xabier Díaz e Talabarte. O prezo da entrada será de 4 euros e estarán á venda unha semana antes na web www.culturatui.info.

Mércores, 24 de febreiro de 2010  

Ata o venres está aberta a exposición “Ceibes no monte: patrimonio vivo na Terra de Turonio”

A exposición “Ceibes no monte: patrimonio vivo na Terra de Turonio” organizada polo Instituto de Ensino Secundario Terra de Turonio de Gondomar, e que está aberta ao público dende o pasado 29 de xaneiro no edificio “Area Panorámica” de Tui chega aos últimos días da súa estadía en Tui, pois será clausurada este venres, 26 de febreiro. Esta mostra está centrada no estudo dos “cabalos salvaxes” e a cultura asociada a esta vella tradición.

A exposición achéganos ao medio natural da Terra de Turonio, ao monte comunal da nosa bisbarra, aos cabalos de pura raza galega, aos curros da Terra de Turonio e aos cabalos na arte, cunha referencia á obra singular do escultor tudense Juan José Oliveira, contando con varios obras súas nesta mostra.

Na exposicións disponse de dous ordenadores para a mostra de: Webs de información sobre o tema, CDs con diversos labores relacionados co gando ceibe. Un ordenador para acceder á información de xeito interactivo e para a realización de xogos interactivos con preguntas e cuestións relacionadas. Outro ordenador máis para acceder aos arquivos sonoros e documentación de son recollida.

No acto de inauguración contouse coa presenza do escritor Xosé Luis Méndez Ferrín, recentemente electo presidente da Real Academia Galega, e experto coñecedor do mundo dos cabalos, que estivo acompañado polos responsables do IES Terra de Turonio e o presidente da Sociedade Hípica de Tui.

A exposición pode visitarse de 12.00 a 14.00 horas e de 17.30 a 19.30 horas.

Para o concelleiro de Cultura tudense a presenza desta exposición contribúe á valorización dunha manifestación da cultura tradicional da nosa terra e amplamente estendido na nosa bisbarra, especialmente no entorno do monte Aloia, onde os tudenses temos contemplado en numerosas oportunidades a presenza deste cabalos en liberdade.

Solicitude de axudas para a rehabilitación de edificios e vivendas no casco histórico de Tui

    Mediante un anuncio que apareceu publicado no BOP o Concello de Tui anuncia a apertura do prazo de presentación de solicitudes para a  adxudicación de axudas para a rehabilitación de edificios e vivendas no núcleo histórico de Tui.

    Segundo o disposto na Ordenanza reguladora das axudas para a Rehabilitación do Casco Histórico de Tui, as solicitudes presentaranse no Concello de Tui nun prazo máximo de cinco meses a contar dende o día seguinte á publicación no B.O.P., é dicir, dende hoxe.

    Na Oficina de Rehabilitación do Casco Histórico do Concello de Tui están a disposición de todos os interesados a información sobre os requisitos necesarios para solicitar estas axudas, así como os impresos normalizados para a presentación formal da solicitude.

Pleno Ordinario da Corporación Municipal de Tui este xoves

    A corporación municipal de Tui reúnese este xoves, ás oito da tarde, en sesión de pleno de carácter ordinario con oito puntos na orde do día. O Pleno comezará coa aprobación da acta anterior do 28 de xaneiro. O punto segundo é a aprobación inicial da Ordenanza Reguladora das Axudas de Rehabilitación de Edificios, Vivendas e Urbanización no ámbito da Área de Rehabilitación do Conxunto Histórico de Tui na súa sétima fase.

    No punto terceiro someterase a aprobación unha moción do BNG propondo a instalacións de pantallas de protección nos lindes da autovía ao seu paso por Tui.

    O punto cuarto é o de control aos órganos de goberno e inclúe as disposicións de interese, dar conta dos decretos da alcaldía, mocións, e a quenda de rogos e preguntas.

FEBAM sorteó los vales compra de la campaña de San Valentín

Ayer, martes 23 de febrero, a las 12.30 horas, tuvo lugar en la sede de la Federación de Empresarios do Baixo Miño – FEBAM, C/ Martínez Padín, 11 – Tui, el sorteo de los vales de compra de la  Campaña de Promoción de Comercio de SAN VALENTIN. Los establecimientos asociados que repartieron los premios con su clientes fueron:

          · Autoescuela San Telmo

          · KM peluqueria

          · Pleno modas

          · La bodega

          · Merca 99

          · Seguros La Estrella

          · Opticalia

          · Tu menu

          · Manualidades Efectos

Martes, 23 de febreiro de 2010  

Cata virtual no Telecentro de Tui o 11 de marzo

    Con motivo da celebración da Festa do Viño de Chantada, o Telecentro de Comunicación de Tui acollerá o 11 de marzo unha cata guiada a través dunha videoconferencia. Este evento, que se desenvolverá en horario de 20:00 a 22:00 horas no TC chantadino, poderá ser seguido tamén do mesmo xeito desde o propio Centro Multimedia de Galicia (CMG), en Santiago, e desde outros seis Telecentros de Comunicación situados nas catro provincias galegas.

    En total, no evento poderán participar 229 persoas: 40 en cada un dos TC de Chantada, Catoira, Carballo e Tui; 28 no do Barco de Valdeorras; 16 no de Monforte de Lemos; 15 no de Oroso, e outras 10 desde o Centro Multimedia de Galicia. A solicitude de participación nesta xornada pode formalizarse  desde o portal web do CMG, simplemente premendo no enlace http://reservas.centromultimedia.net/public/reservas.php.

    Todos os asistentes disporán do material necesario para a cata: cuspideira, caldos, copas… Desde o Telecentro de Comunicación chantadino, un enólogo será o encargado de abrir o acto e dar paso a unha  cata guiada, na que todos os participantes, desde os distintos TC, poderán plantexar as súas dúbidas e experiencias, valéndose das vantaxes das novas tecnoloxías.

    A primeira edición da Feira do Viño de Chantada desenvolveuse no ano 1983 e, segundo os datos da época, achegáronse ata ela preto de dez mil visitantes. Asentouse coma unha das feiras máis importantes da provincia, ata que a finais dos anos noventa, converteuse na Feira do Viño máis representativa do noroeste peninsular.

 Play-Doc proxectará 31 documentais do 17 ao 21 de marzo

    Coñécense xa os detalles do que vai ser a sexta edición do Festival Internacional de Documentais de Tui, Play-Doc. A cita lembramos que será do 17 ao 21 de marzo. Neses cinco días vanse proxectar 31 películas que conforman o programa deste ano.  Estes documentais foron seleccionados entre os máis de 800 chegados de todo o mundo tratando unha ampla diversidade temática.

    O Play-Doc contará de novo cunha sección competitiva na que se repartirán 9 mil euros en premios entre as tres categorías establecidas: Longametraxes, Curtametraxes e Documentais Galegos.

    Fóra de concurso establécese tamén nesta edición a sección informativa na que se recollen dúas importantes retrospectivas dedicadas o francés Raymond Depardon e o norteamericano Jay Rosenblatt,  dous realizadores de recoñecido prestixio internacional.

    En Play-Doc estarán tamén presentes os creadores da existosa web francesa La Blogotheque, unha das propostas audiovisuais máis interesantes que se poden atopar actualmente na rede.

    O Festival Internacional de Documentais de Tui ofrece máis que documentais xa que mestura o audiovisual con outras disciplinas artísticas. Así nos eventos paralelos prográmanse obradoiros ou exposicións e concertos a cargo dos protagonistas das películas presentadas no festival.

    Na parte expositiva compre salientar a presenza dos artistas Antón Lamazares, pintor, e Manolo Paz, escultor. Mentres no ámbito musical estarán en directo os norteamericanos The Spinto Band e os angolanos Batida.

    Play-Doc 2010 converterá de novo a cidade de Tui, do 17 ao 21 de marzo,  no eixo central do cinema máis independente, innovador e comprometido da actualidade, nunha cita ineludíbel para os amantes do documental.

Actividades de ACITUI

    A Asociación de Comerciantes e Industriais de Tui organiza tres cursos de formación dous dirixidos á hostalería e o terceiro para o comercio.

    Así para a hostalería organiza un curso de Corte de Xamón que se vai celebrar do 15 ao 18 e do 22 ao 25 de marzo de 17 a 19.30h,  outro de Talla de froitas que terá lugar do 8 ao 11 e do 15 ao 18 de marzo de 17.30h a 20h. O curso ten un custe de 420€ pero será gratuíto xa que se pode deducir no TC1 do mes en que se finalice.

    Mentres para o comercio ACITUI programa un curso de Contaplus e Facturaplus en colaboración coa Confederación de Empresarios de Pontevedra. As clases terán lugar do 20 de abril ao 25 de maio de luns a xoves de 20.30h a 22.30h. Este curso é gratuíto.

    Noutra orde de cousas a Asociación de Comerciantes e Industriais de Tui informa que este venres, 26 de febreiro, pola mañá farase na Radio Municipal de Tui  o sorteo da Campaña de Rebaixas de Inverno. Por este motivo solicitan aos comercios asociados que lles fagan chegar as rifas á oficina en horario de 9 a 15h.

    Outra das iniciativas de ACITUI son a visitas guiadas á Catedral que se realizan cada domingo ás 17h . As persoas interesadas deben anotarse na sé da Asociación de luns a venres de 9 a 15h.

    Por outra parte ACITUI informa que tras mantener varias reunións co Alcalde de Tui e coa Directora Xeral de Comercio sobre a solicitude de Zona de Gran Afluencia Turística para Tui, sinalan que ninguén lles soubo explicar o tipo de axudas ou subvencións que chegarían ao municipio con esta declaración. Sinalan dende a Asociación de Comerciantes que os únicos datos que puideron recompilar sobre as consecuencias de recibir este nomeamento foron os da liberdade de apertura para las grandes superficies.

    Por iso dende ACITUI consideran que sería máis beneficioso para Tui ter un bo plantexamento quen de cohesionar e coordinar a oferta turística e comercial da zona, así coma crear unha marca turística sólida que orixine unha sinerxía para absorber a máis visitantes que reactiven o comercio local.

    Como exemplo citan os Plans de Competitividade Turística que consisten en convenios de colaboración asinados entre as administracións local, autonómica e estatal. Nos mesmos comprométese a aportación dunha serie de beneficios para fomentar o desenvolvemento turístico dunha zona determinada.
 

 O Kaiak Tudense impúxose no control de inverno

    O Kaiak Tudense arrinca a tempada cun cómodo triunfo na xeral de clubs, no Control de Auga, competición que tradicionalmente marca o inicio oficial da tempada en Galicia.

    O club de Tui conseguiu sumar 3318 puntos, fronte aos 2022 do Club As Torres Romeria Viquinga e os 1448 do Club Náutico Rodeira de Cangas, clubs que foron segundos e terceiros respectivamente.

    Os padeeiros do Kaiak Tudense, ademais de conseguir unha folgada vitoria na xeral de clubs, tamén dominou o medalleiro, destacando a actuación do k1 senior, onde os padeeiros de Tui coparon o seis primeiras posicións, así, Iván Alonso conseguía o triunfo por diante dos seus compañeiros, Diego Piña, Jaime Sobrado, Roberto Rodríguez, Víctor Rodríguez e Óscar Carrera.

    Tamén na categoría senior, pero na modalidade de canoa, José Luís Bouza impúxose con claridade nunha regata que contou coa presenza inesperada do vento, que apunto estivo de arruinar a competición.

    Nas mulleres senior, Ana Varela e Leti Piña conseguiron a segunda e terceira posición respectivamente.

    Na categoría júnior, Adrián González impúñase na canoa xuvenil, mentres que Carla Pérez e Valeria Romero, conseguían o segundo e terceiro lugar na muller xuvenil.

    No kaiak júnior, esperábase unha mellor actuación de Rubén Millán, que se atopa concentrado co equipo nacional júnior na residencia Blume en Madrid, con todo uns problemas físicos impedíronlle render ao cento por cento das súas posibilidades.

    En cadetes tamén houbo presenza de padeeiros do Kaiak Tudense no podio, así Roi Rodríguez facíase coa primeira posición no k1 cadete. Mentres Andrea Fátima Porteiro,  padeeira procedente do Club Vilaboa e que esta tempada defenderá as cores do club de Tui, facíase coa primeira posición, e Mónica Araujo era segunda. 

    A seguinte cita terá no mesmo lugar, Castrelo de Miño, e coa disputa do Campionato Galego de Inverno, será dentro de 15 días, e o Kaiak Tudense ha presentado as súas credenciais para facerse cun novo título.

Hoxe inaugúrase a exposición “Olladas dunha época. Fotografias do fondo Blanco Ciceron”

A Sala Municipal de Exposicións do Concello de Tui acolle hoxe, ás 20.00 horas, a inauguración da exposición “Olladas dunha época: fotografías do fondo Blanco-Cicerón”  que contará coa presenza do Secretaria Xeral de Medios da Xunta de Galicia, un representante do Padroado do Museo do Pobo Galego, o alcalde Tui e descendentes do coleccionista tudense.

Esta exposición organizada polo Centro Galego de Artes da Imaxe e o Museo do Pobo Galego chega a Tui logo da súa presenza en Santiago de Compostela onde estivo aberta ao público nos meses de decembro e Xaneiro. Nela recóllese unha escolma da colección de fotografías do Fondo Blanco-Cicerón, que os seus herdeiros depositaron no Museo do Pobo Galego, e que conta con preto de 500 fotografías de mediados do século XIX das cales se seleccionaron 81 para esta exposición. A selección de imaxes inclúe instantáneas de paisaxes e monumentos de distintas cidades e vilas galegas, entre as que destacan Compostela e Tui, cidade natal do mecenas galego. Aínda que máis escasos, na exposición tamén están presentes os retratos, como o do inventor Isaac Peral no Castelo de Sobroso; e as fotografías de acontecementos relevantes, como a inauguración da Ponte Internacional de Tui en 1886.

Figura tamén na mostra unha selección de imaxes da Exposición Rexional Galega, da que o pasado ano se cumpriu o seu centenario e na que Ricardo Blanco-Cicerón foi un dos seus organizadores. Aquela primeira Exposición Rexional Galega, celebrada en 1909 en Santiago, supuxo un acontecemento sen precedentes na historia de Galicia, acollendo máis de 600 instalacións en 11 pavillóns nos que se expuxeron 10.000 pezas de arqueoloxía, obras de arte e historia. Agora, cen anos despois, o CGAI e mailo Museo do Pobo Galego recuperan nesta mostra fotográfica parte daquela exposición.

Para o Concello de Tui segundo sinala o seu concelleiro de Cultura, Moisés Rodríguez Pérez, a presenza desta exposición nesta cidade é un importante acontecemento por canto achega aos tudenses unha excepcional colección de fotografías antigas de Galicia, con especial mención a diversas imaxes de Tui e que contribúen á promover o valor histórico da fotografía pero, ao tempo, esta mostra permite a recuperación da á memoria colectiva da cidade, da figura de Ricardo Blanco-Cicerón, nado en Tui no ano 1844, e que, andando os anos, foi unha excepcional figura na cultura de Galicia pola súa afección ao coleccionismo que posibilitou a conservación ou recuperación de numerosos elementos do noso patrimonio cultural.

Rodríguez Pérez amosa a súa gratitude ao Centro Galego de Artes da Imaxe, dependente da Secretaria Xeral de Medios da Xunta de Galicia, e ao Museo do Pobo Galego organizadores desta mostra pola súa inestimable colaboración para lograr que esta exposición poida achegarse ata Tui.

A mostra estará aberta ao público na Sala Municipal de Exposicións do Concello de Tui, edificio Área Panorámica – rúa Colón 2, ata o vindeiro 14 de marzo de 2010.

Realizada a segunda visita guiada á Catedral de Tui como modo de promover os valores da comarca

A Asociación de Comerciantes e Industriais de Tui, ACITUI, e o Centro de Iniciativas Turísticas Terras do Baixo Miño coa colaboración do coengo da Catedral de Tui, Ricardo García Fernández, organizaron a segunda visita guiada ao conxunto histórico do principal templo da cidade.

            Esta segunda visita, que tivo lugar o pasado domingo, centruose na parte alta da catedral, nas súas torres e no mirador. Estivo dirixida tanto a empresarios da comarca como ao resto do público que desexase asistir e foi de carácter gratuito.

            Estas rutas repetiranse os próximos domingos á misma hora e centraranse, sobre todo, no turismo relixioso, coincidindo co Ano Xacobeo, aínda que tamén se ampliarán tanto a outros conxuntos de interese da cidade (o Monte Aloia e o casco histórico) como da comarca do Baixo Miño.

Estas iniciativas teñen como obxectivo divulgar o patrimonio histórico tudense e da comarca do Baixo Miño buscando que os comerciantes, hostaleiros e veciños da zona poidan ofrecer unha información máis axeitada aos visitantes. Deste xeito preténdese conseguir unha mellor e máis longa estancia dos visitantes na comarca, podendo descubrir aspectos de historia do noso patrimonio histórico descoñecidos por gran parte dos habitantes, que son os que mellor poden divulgar os valores do Baixo Miño.

Tódolos interesados en asistir a estas visitas guiadas poderán recibir máis información e anotarse no teléfono 986 60 75 56 en horario de luns a venres de 9 a 15 horas.

Luns, 22 de febreiro de 2010  

Mañá inaugúrase unha mostra fotográfica pertencente ao Fondo Blanco-Cicerón

            Mañá, día 23, será inaugurada na Sala Municipal de Exposicións do concello de Tui, no Edificio da Área Panorámica, a mostra “Olladas dunha época”, que recolle unha serie de fotografías do Fondo Blanco-Cicerón.

            A inauguración, na que estarán presentes o intelectual Isaac Díz Pardo, presidente do Padroado do Museo do Pobo Galego; Alfonso Cabaleiro Durán, secretario xeral de Medios, e Antonio F. Fernández Rocha, alcalde de Tui, terá lugar ás 20,00 horas.

Sábado, 20 de febreiro de 2010  

ACITUI e o CIT Terras do Baixo Miño organizan unha visita guiada á catedral de Tui

A Asociación de Comerciantes e Industriais de Tui, ACITUI e o Centro de Iniciativas Turísticas Terras do Baixo Miño coa colaboración do canónigo da Catedral de Tui, Ricardo García Fernández, organizan unha visita guiada ao conxunto histórico da Catedral de Tui.

            A visita terá lugar o vindeiro domingo dia 21 de febreiro ás 17.00 horas e estará guiada por José Ramón Fernández Fernández, Historiador de Arte e encargado da Catedral de Tui. Esta segunda visita, tamén de carácter gratuito, estará dirixida tanto a empresarios da comarca como ó resto do público que desexe asistir e centrarase na parte alta e nas torres da Catredral.

            Esta é a segunda iniciativa do CIT Terras do Baixo Miño para intentar dar un impulso ó desenvolvemento turístico de Tui e a comarca do Baixo Miño. Estas rutas repetiranse os próximos domingos á misma hora a partir do 21 de febreiro e centraranse, sobre todo, no turismo relixioso, coincidindo co Ano Xacobeo, aínda que tamén se ampliarán tanto a outros conxuntos de interese da cidade (o Monte Aloia, o casco histórico, etc.) como da comarca do Baixo Miño.

Estas iniciativas teñen como obxectivo divulgar o patrimonio histórico tudense e da comarca do Baixo Miño  buscando que os comerciantes, hostaleiros e veciños da zona poidan ofrecer unha información mais axeitada ós visitantes. Deste xeito preténdese conseguir unha mellor e mais longa estancia dos visitantes a esta comarca, podendo descubrir aspectos de historia do noso patrimonio histórico descoñecidos por gran parte dos habitantes, que son os que mellor poden divulgar os valores da nosa comarca.

Tódolos interesados en asistir poderán recibir mais información e anotarse no teléfono 986 60 75 56 en horario de luns a venres de 9 a 15 horas ou no teléfono 687 84 59 62 polas tardes de 16 a 19 horas e os sábados de 11 a 13 horas e de 16 a 19 horas.

Mañá domingo celébrase o Enterro do Bacallau

    Tui despide mañá domingo o Entroido de 2010 co tradicional Enterro do Bacallau que partirá ás 19.30h dende a Praza de San Fernando. A comitiva fúnebre será multitudinaria ao estar integrada polos grupos e comparsas que o pasado martes participaron no Desfile-Concurso de Entroido, xunto a todos aqueles que se queiran sumar nesta despedida.

    Dende a Praza de San Fernando irán ata o Paseo da Corredoira onde se dará lectura ao testamento do Bacallau. E amais este ano farase entrega neste lugar do premio á mellor Drag Queen, un concurso para o que non se require inscrición previa, basta con estar presente no momento da lectura do testamento.

    Logo a comitiva continuará ata a parte posterior da Área Panorámica, no aparcamento municipal, onde se procederá á incineración do Bacallau.

    Por mor desta celebración a Policía Local informa que non se poderá estacionar na rúa Seixas dende ás 16.30h ás 20.30h e non se poderá circular pola mesma a partir das 18.30h.

Feira de Antigüidades na Corredoira organizada por ACITUI

    O Paseo da Corredoira acolle hoxe sábado de dez da mañá a oito da tarde o VII Mercadiño de Antigüidades organizado por ACITUI.  Haberá obxectos antigos, de toda Europa, en exposición e venda.

Gumersindo Álvarez presentarase ás eleccións á Cámara de Comercio

    A Cámara Oficial de Comercio, Industria e Navegación de Tui están en proceso electoral para a renovación da súa Xunta Directiva. O próximo martes, 23 de febreiro, terá lugar na sé da Cámara a  constitución da Xunta electoral, que estará composta por tres representantes da Cámara e dous membros designados pola Dirección Xeral de Comercio. 

    Mentres o prazo para a presentación de candidaturas está aberto até o 5 de marzo.  Nas eleccións están chamados a votar 6.930 empresarios que conforman os distintos grupos electorais clasificados en función das distintas actividades económicas da demarcación cameral, que comprende os Concellos de Tui, Porriño, A Guarda, Tomiño, Salceda de Caselas, O Rosal e Oia. As eleccións serán o 22 de abril.

    Os 15 representantes que saian elixidos dos diferentes grupos terán que designar á súa vez a dous vogais da terna proposta pola Confederación de Empresarios. Así, os vogais saídos das urnas e os elixidos a proposta da organización empresarial formarán o Pleno da Cámara, que á súa vez, en sesión constitutiva elixirán o Comité Executivo e o Presidente da Cámara.

    Ante a convocatoria destes comicios Gumersindo Alonso, Director Xerente e Conselleiro Delegado de Granisa informa que presentará a súa candidatura á presidencia. Explica que a súa intención é continuar a política do actual presidente da Cámara, Carlos Dagá, de contar cunha cámara onde as empresas estean implicadas. Engade que “traballará para que as compañías máis dinámicas, innovadoras e netamente exportadoras acheguen a súa experiencia, o que levará a modificación na composición dos órganos de goberno da Cámara, Comité Executivo e vocais”.

    Gumersindo Alonso Gestoso é Licenciado en Enxeñaría Técnica Industrial, na rama de Métodos pola TEA (Técnicos Especialistas Americanos).

    É Director Xerente e Conselleiro Delegado da empresa elaboradora GRANISA, Granitos de Atios, S.A. Esta compañía dedícase á elaboración e transformación de granito natural procedente de distintos países. Alonso ten unha experiencia de máis de 30 anos no sector do granito e con anterioridade desempeñou varios cargos directivos en compañías líderes como Ramilo ou Granilouro.

    Gumersindo Alonso é Vicepresidente da Asociación Galega de Graniteiros (AGG).  Desde 2003 até 2008 foi Presidente da AGG, converténdose no único presidente da historia que foi reelixido durante  tres mandatos consecutivos.

    Ademais, Alonso forma parte de diversas institucións. É vogal da Fundación Centro Tecnolóxico do Granito e membro da Secretaría Técnica da Plataforma Tecnolóxica do Granito.

Play-Doc, festival internacional de documentales, se prepara para su sexta edición

Del 17 al 21 de marzo próximos, se podrán ver un total de 31 películas que conforman el programa de la nueva edición de este certamen que, además de haberse hecho un hueco entre el calendario internacional de festivales dedicados al género documental de autor, suscita el interés de profesionales y aficionados de todo el país y del resto de Europa.

Las 31 obras han sido seleccionadas de entre las más de 800 recibidas procedentes de los lugares más diversos del mundo; la misma diversidad que se refleja en las temáticas de las películas que los cineastas han ido enviando.

El programa del festival contará con una sección competitiva con tres categorías (Largometrajes Documentales, Cortometrajes Documentales y Documentales Gallegos) entre las que un jurado internacional repartirá un total de 9.000 € en premios.

Además, el festival presentará en su sección informativa dos importantes retrospectivas dedicadas a dos realizadores de reconocido prestigio internacional como son el francés Raymond Depardon y el norteamericano Jay Rosenblatt.

También destaca la presencia de los creadores de la exitosa web francesa  La Blogotheque, una de las propuestas audiovisuales más interesantes que se pueden encontrar actualmente en la red.

Play-Doc, mucho más que un festival de cine

Un año más, Play-Doc pretende demostrar la enorme capacidad que tiene  el documental para interactuar con otras disciplinas artísticas. Así, el programa de su sexta edición incluye importantes eventos paralelos como talleres o exposiciones y conciertos a cargo de los protagonistas de las películas presentadas en el festival.

Prestigiosos artistas como el pintor Antón Lamazares o el escultor Manolo Paz presentarán algunas de sus obras más representativas. Mientras, en el ámbito musical destacan los conciertos en directo de los norteamericanos The Spinto Band o los angoleños Batida.

Play-Doc 2010 convertirá de nuevo a la ciudad de Tui en un lugar centrado en el cine más independiente, innovador y comprometido de la actualidad, en una cita inexcusable para los amantes del  documental.

Venres, 19 de febreiro de 2010  

Última semana para participar no concurso de carteis das Festas de San Telmo 2010

A Concellería de Cultura do Concello de Tui, coa colaboración da Comisión de Festas, quere lembrar aos interesados en participar no Concurso para a elección do cartel anunciador das festas patronais de San Telmo 2010, que o prazo de presentación dos traballos remata o vindeiro 26 de febreiro. En 2009 a experiencia foi moi positiva, resultando gañador o cartel presentado pola tudense Silvia Villaverde Míguez.

Os participantes deben enviar ou entregar os traballos nun soporte ríxido, coa finalidade de organizar unha exposición pública dos mesmos. Nas bases establécese un único premio de 500 euros. O contido das obras presentadas deberá referirse ás Festas de San Telmo da cidade de Tui. O autor tentará plasmar referencias desta Festa e da cidade na súa proposta, destinada a ser utilizada como imaxe oficial deste evento. No cartel deberá figurar o texto: "Tui, festas de San Telmo 2010, 3 - 12 de abril. Festas de Interese Turístico Galego".

Para o concelleiro de cultura tudense, Moisés Rodríguez Pérez, con este certame preténdese dotar dunha imaxe artística e atractiva ao cartel anunciador das festas patronais tudenses, ao tempo que promove e valoriza a creatividade de artistas e deseñadores tanto tudenses como foráneos.

As bases poden consultarse na páxina web do Concello de Tui: www.concellotui.org.

Seminario sobre “Odontoloxía equina” no telecentro de Tui ao abeiro da exposición  “Ceibes no monte”

Co gallo da exposición “Ceibes no monte: patrimonio vivo na Terra de Turonio”, que acolle, ata o 26 de febreiro, o edificio da Área Panorámica (r/Colón nº2) organizada polo Instituto de Ensino Secundario Terra de Turonio de Gondomar coa colaboración da Concellería de Cultura de Tui, realizarase tamén un seminario de “Introducción a la Odontología Equina y su importancia en la Nutrición y Monta del Caballo de Deporte”. O ponente será o veterinario, especialista en odontoloxía e cirurxía maxilofacial Antonio Pedro da Silva Pereira. O acto será no Telecentro tudense, ubicado no mesmo Edificio Área Panorámica, o vindeiro luns, 22 de febreiro, entre as 19.30 e as 21.30 horas.

O seminario está organizado pola Federación Hípica Galega e a inscrición para todas aquelas persoas interesadas en asistir debe formalizarse no establecemento Hípica Marcos, no teléfono: 609.884.884

 “Ceibes no monte: patrimonio vivo na Terra de Turonio” trátase dun traballo interdisciplinar que aborda a realidade cultural dos cabalos salvaxes nos montes das nosas comarcas. Este patrimonio cultural ten a súa xénese nun marco xeográfico de referencia, a Terra de Turonio. Unha das manifestacións máis enraizadas na tradición dos seus habitantes é a gandería cabalar en liberdade nos seus montes, os cabalos “ceibes no monte”.

Nesta exposición podemos achegarnos ao medio natural da Terra de Turonio, ao monte comunal da nosa bisbarra, os cabalos de pura raza galega, os curros da Terra de Turonio e os cabalos na arte, cunha referencia á obra singular do escultor tudense Juan José Oliveira, contando con varios obras súas nesta exposición.

Comezan os traballos de conexión da EDAR de Guillarei

        Esta semana comezaron os traballos de conexións da Estación Depuradora de Augas Residuais de Guillarei. Por este motivo nas últimas semanas téñense convocado aos industriais dos catro concellos que verterán á EDAR, é dicir, Tui, Salceda, O Porriño e Mos, a distintas reunións informativas. Nas mesmas dáse conta do establecemento dun protocolo de conexión, segundo o cal as industrias interesadas en conectarse á Estación Depuradora deben comunicar á Empresa Pública de Obras e Servizos Hidráulicos os parámetros e caudais previstos que van incorporar á rede de saneamento, para que así poida haber un control da boa explotación da Depuradora. Así o explicaba a Presidenta de Augas de Galicia Éthel Vázquez no programa Día a Día da Radio Municipial de Tui.

        Arestora, segundo explicaba Ethel Vázquez, están incorporando progresivamente os caudais no colector xeral a medida que se van realizando as conexións dende Tui augas abaixo. Este proceso agardan que poida estar rematado en dous meses, é dicir que a mediados de abril deben estar finalizadas todas as conexións e o caudal  incorporado.

        Sinalaba que a posta en marcha da EDAR foi un esforzo importante pero que se solventou con traballo.

        A posta en marcha da EDAR vai supor un antes e un despois no vertido das augas residuais na zona supón unha mellora moi importante para o medio ambiente. Os vertido que até o de agora ían ao río Louro serán tratados a partir de agora na Estación Depuradora. O Miño serán tamén un dos beneficiados con este saneamento.

        Explicaba a Presidenta de Augas de Galicia que a Depuradora está perfectamente dimensionada dado o nivel de industriais que hai na zona, pero tendo tamén unha perspectiva de futuro para que non se quede obsoleta en poucos anos.

        A Xunta de Galicia está a estudar tamén as redes secundarias para incorporar maior caudal á Depuradora.

O Kaiak Tudense asiste na fin de semana ao Control de Auga de Inverno

        O Club Kaiak Tudense acode esta fin de semana ao Control de Auga de inverno co que se inicia a temporada en Galicia. Esta proba servirá para marcar o estado de forma no que están o club para afrontar a temporada.

        A cita será o sábado dende ás 10 da mañá no Encoro de Castrelo de Miño en Ourense. A competición farase sobre a distancia de 5 mil metros para embarcacións individuais.

        Os de Tui acudirán ao Control con 43 padeeiros co obxectivo de estar entre os primeiros postos, e mesmo repetir a primeira posición que logrou hai un ano.

        O Kaiak Tudense en kaiak senior competirá con Jovino González, Iván Alonso, Víctor Rodríguez, Roberto Rodríguez, Joan Ardit  ou Óscar Carrera, e José Luis Bouza, bronce do Europeo en 2009.

        No equipo feminino  senior Ana Varela, Leticia Piña ou Silvia Vázquez agardan repetir podium como o ano pasado.

        En junior parten con opción de medalla os padeeiros Rubén Millán, o canoista Adrián González, así coma Silvia Rodríguez, Carla Pérez ou Valeria Romero.

        Por último na categoría cadete destacan  os kaiakistas Roi Rodríguez e Mónica Araujo.  Sen descartar que calquera dos outros integrantes do equipo ocupen algún dos primeiros postos.

Xoves, 18 de febreiro de 2010  

Viravolta Títeres presenta “A Caixa de Música”, unha obra para público familiar

Viravolta Títeres presenta mañá, venres, ás 20 horas, no Teatro Municipal de Tui un espectáculo musical titulado “A caixa de música”. 

Viravolta mestura nesta representación os monicreques de mesa e luz negra con música para trío de piano, violín e clarinete nunha obra de creación propia con música feita especificamente para o espectáculo por Ermitas García Ríos. A obra vai destinada a público familiar. Está dirixida por Anxo García e interpretada por Pilar Álvarez, Xulio Balado e Anxo García coma manipuladores dos monicreques. Amais conta coa presenza dos músicos Xosé Manuel Yáñez, Mariola Gil Lago e Beatriz Rodríguez en directo.

 “A caixa de música” conta a historia de dous nenos, Cecilia e Salterio, que xogando estragan a pequena caixa de música de Calderón, un músico ambulante. Os nenos tentarán arranxala recuperando para iso os sons que escaparon da caixa.

Viravolta Títeres

Esta compañía creouse en 1982 desenvolvendo espectáculos de monicreques así coma cursos, exposicións e organizacións de festivais sempre relacionados co mundo da marioneta. Dentro de Viravolta xurdiu Títeres Seisdedos, outra compañía especializada en espectáculos de pequeno formato.

As entradas están xa á venda na web www.culturatui.info ata o venres ás 16.30h, e o venres dende ás 18.30h poderanse mercar no despacho de billetes da Área Panorámica. Os prezos das localidades son 3€ e 2 €.

Asemblea da Asociación de Veciños de Randufe este sábado

    A Asociación de Veciños de Randufe celebra o sábado, día 20, Asemblea Xeral Ordinaria. Será ás 20.30h en primeira convocatoria e ás 21 horas en segunda no Centro Cultural de Randufe.

    A orde do día comeza coa Lectura e aprobación da acta anterior, para seguir co Estado de contas, Actualización de socios, Memoria do exercicio 2009, Proxecto de orzamento para 2010 e rematar con Rogos e preguntas

Cocido Popular o domingo no Monte das Penizas

    Ata mañá poden anotarse os interesados en asistir ao Cocido Popular no Monte das Penizas que se celebra este domingo.  O programa comezará ás 12 cun concerto do grupo de gaitas San Xoán de Paramos. Ás dúas terá lugar o xantar para o que é preciso anotarse no 699 49 81 29 ou no 652 80 89 05. Pola tarde volverá actuar o grupo de gaitas San Xoán de Paramos. Esta actividade está organizada pola Comisión de Festas de San Caetano.

Concerto na Viñoteca de García

    A Viñoteca de García acolle ás nove e media desta noite un novo concerto. Correrá cargo de Frans Banfield Trío formado por Frans Banfield á guitarra e voz, Brian Moure ao contrabaixo e Nata Estévez ao saxo alto.

Martes, 16 de febreiro de 2010  

Reunión na EDAR

    A empresa pública de Obras e Servizos Hidráulicos vai realizar unha xornada explicativa sobre o Procedemento de conexión das industrias ao Sistema de Saneamento do Louro, e convoca aos industriais interesados do Concello de Tui a xornada divulgativa convocada para este xoves ás dez da mañá.

    A cita será na propia Estación Depuradora de Augas Residuais de Guillarei.

As consultas sobre a declaración de Zona de Gran Afluencia Turística é un proceso aberto segundo Moisés Rodríguez

    O Concello de Tui abriu un período de consulta antes de solicitar á Xunta de Galicia a declaración do municipio coma Zona de Gran Afluencia. Solicitáronse informes e o concello decidirá posteriormente o seu posicionamento. Así o explicaba o concelleiro de Cultura e tenente alcalde, Moisés Rodríguez, remarcando que se trata dun proceso aberto. Polo momento a Cámara de Comercio pronunciouse a favor, CCOO en contra e ACITUI non emitirá o informe por falta de información.

    Apuntaba que se a maioría da xente non está de acordo non se solicitará a Declaración de Zona de Gran Afluencia turística. Unha declaración que posibilitaría a chegada de axudas de diversa índole. Facía fincapé que non se pode centrar só na apertura dominical porque en Tui coma zona fronteiriza os comercios xa poden abrir os domingos.

Sábado, 13 de febreiro de 2010  

Máis de 600 persoas participarán no Desfile-Concurso de Tui o próximo martes

Todo está preparado en Tui para que o próximo martes, ás 17.30 horas, festivo local na cidade, se celebre o tradicional Desfile-Concurso de Entroido.

Máis de 600 persoas participarán nesta cita co Entroido Tudense que este ano incorpora coma principais novidades a apertura do concurso a grupos, que serán os encargados de abrir o desfile, seguidos das comparsas e carrozas.  Son dous grupos de Tui os inscritos “Polo puto aire” e “A choiva dos pequenos”. No apartado de comparsas participan un total de 12, das que 7 son de Tui, 2 de Tomiño, 1 de Redondela, 1 de Gondomar e outra de Salceda.  Nas súas recreacións haberá evocacións dos piratas somalís, o xacobeo, os vikingos, unha festa medieval, ou unha homenaxe a Michael Jackson.

O Concello de Tui vai repartir 4.500 euros en premios máis trofeos nas distintas categorías ao que se suman as cantidades fixan por participación que totalizan 6.100€. En conxunto o orzamento do Entroido acada os 21 mil euros.

En premios este ano introducíronse dúas novidades. Por unha parte creouse a categoría de “Parodia” buscando recuperar o espíritu do Entroido tudense. E por outra consígnase unha cantidade de 450€ que o xurado poderá repartir ao seu criterio.

As rúas por onde transcorre o desfile son Casal Aboy, Compostela, Betanzos, Irmáns Maristas, Ourense e A Guarda, que están convenientemente adornadas e iluminadas.

Participación do Enterro do Bacallau

Nas bases deste Desfile-Concurso recóllese que para que os premios e os accésit sexan abonados as comparsas e grupos deberán acudir na súa totalidade, de rigoroso loito, ao Enterro do Bacallau, a celebrar o domingo 21 de febreiro. O enterro partirá da Praza de San Fernando, ás 19.30 h.

Peche de rúas ao tráfico por mor do Desfile

A Policía Local informa que co gallo da celebración do tradicional Desfile de Comparsas e grupos o martes 16, dende ás dúas da tarde e ata ás dez da noite, estarán pechadas ao tráfico, non podendo estacionar nas mesmas, as rúas Casal Aboy, Compostela, Betanzos, Irmáns Maristas, Ourense, A Guarda e Mondoñedo.
 

Entroido en Rebordáns

    O Centro Cultural San Fins de Rebordáns organiza hoxe, a partir das dez da noite, un Baile de Entroido con premios para os participantes tanto en individuais coma en grupos. E o domingo pola mañá, ás 10.30h, sairán en bicicleta pola parroquia disfrazados. Haberá premios para os participantes e sortearán unha bicicleta.  Ás catro da tarde sairán as carrozas e haberá concurso de disfraces para os pequenos

Festival de Entroido en Pexegueiro

    A Asociación Socio-Cultural e Xuvenil “O Mosteiro” organiza un Festival de Entroido para mañá domingo dende ás 17h no Centro Cultural. Haberá desfile de comparsas e carroza, Playbacks e sketchs humorísticos. A entrada é de balde.

Baile de Entroido en Riomuíños

    A Asociación de Veciños de Riomuíños ten hoxe sábado ás seis da tarde un baile de entroido no seu local. Sorterán un disfraz entre todos os adultos disfrazados e haberá lambetadas para os nenos.

Venres, 12 de febreiro de 2010  

O Kaiak mellor club galego de piragüísmo

    O Club Kaiak Tudense foi designado pola Federación Galega de Piragüísmo como mellor club desta disciplina do ano 2009. Esta distinción vén resumir a estupenda tempada que fixo o Club Kaiak o ano pasado. Lembrar entre os logros alcanzados, os títulos de club campión de España de inverno, campión de España de Pista Senior, Júnior e Cadete, así como nos distintos campionatos autonómicos onde se alzou entre outros cos títulos de club campión de Galicia de Inverno e campión de Galicia en Pista de Senior, Júnior e Cadete.

    Asemade, entre outras distincións feitas por esta federación, outorgou un accésit como mellor padeeiro masculino ao tudense, José Luís Bouza Pregal pola súa medalla de bronce no campionato europeo absoluto de Brandemburgo no pasado ano. Tamén foi nomeado mellor promesa masculino o padeeiro, tamén do  club tudense,  Roberto Rodríguez Lechuga pola súa medalla de ouro no campionato de Europa sub. 23 en Polonia, na modalidade de K4,  onde formaba parte o padeeiro grovense Álvaro Bravo que actualmente adestra co equipo de Tui. O ano pasado os do club tudense tiveron a 24 dos seus deportistas competindo en campionatos europeos, logrando un total de 9 medallas.

    Estea premios serán entregados no Campionato Galego de Inverno que se celebrará o 6 de marzo.

Diz Guedes di que o seu grupo está centrado e preocupado pola vida municipal

    Tudenses Unidos Independentes está centrado e preocupado pola vida municipal. Así o afirmou esta mañá o seu voceiro, Juan Miguel Diz Guedes, na Radio Municipal de Tui. Indicaba que o seu compromiso é cumprir cos obxectivos marcados dende o inicio este mandato municipal, e están centrados no día a día do Concello e nos temas importantes que preocupan aos cidadáns de Tui. Por iso dicía as negociación do PP para integrar a AT no seu seo é unha cuestión de iniciativa e interese do PP, polo que nestes intres non está nin na súa axenda nin nas súas preocupacións.

    O voceiro de Acción Tudense, Miguel Capón, declarou esta semana que el persoalmente non entraría en ningún proxecto onde estivese Diz Guedes.  Preguntado a este respecto o voceiro de TUI indicaba que el en primeiro lugar respecta ás persoas, e comprende calquera decisión ou actitude que Capón poida adoptar, aínda que por “hixiene democrática” non comparte que se vete a ninguén para poder falar.

    Engadía que Capón Rey ten que explicar ao seu electorado e ao BNG e PSOE que o votaron na investidura porque hai un ano pactou con Fernández Rocha a gobernabilidade do Concello e en qué consiste o pacto ou negociacións para ingresar no PP, por iso dicía que no seu parecer o emprega a el coma cortina de fume. E sinalaba que non é bo nin para Tui nin para a convivencia política municipal de Tui que se vete a ninguén en ningún tipo de conversa, porque é importante respectar ás persoas, respectar as discrepancias e dialogar e falar para poder chegar a acordos.

    Preguntado Juan Miguel Diz Guedes sobre si tería algún problema para reunirse con Miguel Capón, dicía que o líder de AT cando lle interesou lle chamou para reunirse con el, dicía que sempre acudiu á súa invitación, polo que manifestaba que lle sorprende que “agora veña con este ataque tan visceral e tan persoal cando a el lle interesou ou lle interesa estar comigo me chama, polo que é unha incoherencia no seu comportamento”. Indicando amais que a relación na corporación é de cordialidade. A única explicación que atopa Diz Guedes é que con este ataque trate de xustificar a súa actitude política.

    Sobre a necesidade ou non do pacto do centrodereita para unificarse dicía que na vida política municipal é moi singular e suceden acontecementos que levan a presentarse varias candidaturas. Sinalaba que de cara a vida municipal tudense non ve que ese pacto sexa necesario.

    O que sí é necesario no seu parece é seguir co espírito de acordos e de consensos de todos os grupos para que nos temas importantes vaia todos unidos coma fixeron na reunión que mantiveron sobre o PXOM co Conselleiro de Medio Ambiente, Territorio e Infraestruturas.

    Polo momento Diz Guedes non quixo avanzar cal será a súa posición con respecto a presentarse ou non nos comicios de 2011, xa que manifestaba que a tomará chegado o momento. Sobre a posible volta as filas do PP dicía que non tería ningún problema en si mesmo porque non ten problemas con ninguén,  outra cousa é que se poida materializar esa posibilidade, segundo manifestaba.

Excelente acollida á campaña de reparto de bolsas reutilizables

    Unha excelente acollida tivo onte á mañá a campaña de consumo responsable desenvolvida entre o CEIP de Rebordáns e a Concellería de Servizos Sociais do Concello de Tui, coa colaboración de ACITUI. Na praza da Inmaculada o alumnado de Rebordáns estivo repartindo 500 bolsas reutilizables, bolígrafos, lapis e libretas, así coma folletos informativos sobre a reciclaxe.

    O director do Centro explicaba que o proxecto comezou hai un ano no centro co fin de eliminar o uso de bolsas plásticas, e buscaron o apoio do concello para facelo posible.

    Pola súa parte a Concelleira de Servizos Sociais, facía unha valoración moi positiva do desenvolvemento da Campaña.

    O Presidente de ACITUI, Jorge Álvarez, destacaba a importancia de coidado do medio ambiente.

    Os nenos de Rebordáns estaban encantados coa súa labor.

Nova conferencia no ciclo Calidade na Alimentación

    A sala axunta ao Museo Municipal acolle ás oito desta tarde a última conferencia do ciclo “Calidade na Alimentación” organizado pola Asociación Arcebispo Lago. A hortelá ecolóxica Ágatha Broeskamc fala sobre “Produción de alimentos sans”.
 

ACITUI  non emitirá informe sobre a declaración de zona de Gran afluencia Turística ao carecer de información. Inclínanse por outro tipo de plans

    A falta de información sobre as vantaxes ou desvantaxe que pode ter para Tui ser declarada zona de Gran Afluencia Turística leva á Asociación de Comerciantes e Industriais de Tui a non poder realizar un informe sobre este tema. Así o expón nun escrito que o mércores foi remitido ao Concello de Tui en resposta á solicitude da Alcaldía dun informe neste senso ante a intención de someter o asunto a consideración no pleno ordinario do 25 deste mes.

    O presidente de ACITUI, Jorge Álvarez, sinala no escrito dirixido a Fernández Rocha, que lles interesa un proxecto que beneficie a Tui e ao comercio local, xa que o nomeamento de zona de gran afluencia turística descoñecen qué repercusión terá sobre a cidade. Explica que tras ter solicitado información verbalmente sobre as vantaxes e desvantaxes non obtiveron resposta e por tanto non poden realizar un informe ao carecer de información que ofrecer en asemblea xeral aos seus asociados.

    En declaracións aos medios de comunicacións o Presidente de ACITUI manifestaba que non cren que esta decisión se deba facer de xeito unilateral, beneficiando só a unhas empresas e sen telos en consideración, xa que considera que esta declaración se traducirá só na posibilidade da apertura dominical.

    Engadía que dende ACITUI non queren “asinar un cheque en branco”, ao carecer de información ao respecto, e de si a declaración de zona de afluencia turística se vai traducir en subvencións ou non. Tentaron recadar tamén información coa Directora Xeral de Comercio, Nava Castro, quen tampouco lles aportou nada novo.

    Dende a Asociación de Comerciantes e Industriais de Tui apostan máis por acollerse á antiga declaración de Cidade de Excelencia Turística hoxe reconvertida en Plans de Competitividade que amais da apertura dominical posibilitaría tamén a chegada de axudas.

    Segundo a información á que tivo acceso a Radio Municipal de Tui o Concelleiro de Cultura e Turismo, Moisés Rodríguez, solicitou hai uns días unha entrevista coa Secretaria Xeral de Turismo para abordar precisamente o establecemento dun Plan de Competitividade na comarca do Baixo Miño. Parece ser que existía un Plan que inicialmente abranguía todos os concellos raianos pero que despois foi recurtado limitándose só a zona de Ourense. De aí a solicitude que presentará agora o Concello de Tui para este ano 2010.

Talía Teatro leva “Palabras encadeadas” ao Teatro Municipal

         Ás 21.30 horas de hoxe, venres, a compañía Talía Teatro de Santiago de Compostela, presentará “Palabras encadeadas”. A obra vai dirixida a un público de máis de 14 anos, con entradas a 6 e 4 euros, ata completar o aforo limitado a 200 espectadores.

            A obra ten unha duración de 75 minutos. Un final previsible tórnase inevitable nun espazo sen posibilidade de fuxida no que dúas persoas, un psicópata e a súa vítima, están atrapadas. A busca da verdade levounos a esta situación na que o papel de culpable vai de man en man, e onde o certo e o falso penden sempre dun fío.

Entroido en Tui con citas o martes, 16, e o domingo, 21

    O martes, 16 de febreiro, terá lugar, en Tui o desfile de Comparsas con hora de comezo ás 17.30.

Comparsas, grupos e carrozas de Tui e doutros concellos próximos, disfraces iindividuais, sátira e humor, estarán presentes nun percorrido que discorrerá polas rúas Casal Aboy, Compostela, Irmáns Maristas, Ourense e A Guarda, e que terá a súa continuidade o domingo, día 21, ás 19.30 horas, co Enterro do Bacallau.

    As comparsas e grupos participantes o martes congregaranse o domingo na Praza de San Fernando para despedir o entroido tudense, De rigoroso loito, o desfile dominical pasará polas rúas Seixas e Ordóñez ata o Paseo da Corredoira, onde se dará lectura ao testamento do Bacallau. O cadaleito continuará ata a traseira da Área Panorámica, onde no aparcamento procederase á incineración do finado, despedindo a festa ata o próximo ano.

O alcalde de Tui acompaña aos membros de Xuga.eu ao comezar o camiño de Santiago

O alcalde de Tui, Antonio F. Fernández Rocha, xunto ao Primeiro tenente de tlcalde, Moisés Rodríguez Pérez, acompañados de representantes da Dirección Xeral de Xuventude e Voluntariado da Xunta de Galicia e da Fundación Galicia-Emigración acompañaron aos membros da directiva da asociación “Xuventude Galega en Europa”, Xuga.eu (www.xuga.eu),  no inicio do seu percorrido cara a Santiago de Compostela a través do camiño portugués desde Tui.

Estes mozos procedentes de varios países europeos recibiron a benvida do alcalde tudense que os animou a realizar esta peregrinaxe e agradeceulles a elección da cidade como punto de partida do seu percorrido, pois evidencia a importancia que, cada día con máis evidencia, posúe Tui como porta de entrada en Galicia do camiño portugués.

A Asociación de Xoves Galegos (XUGA.EU), integrada por mozos galegos que residen en toda Europa, foi creada no pasado ano 2009 en Laussane coa intención de promover unha rede social entre mozos galegos espallados en toda Europa. Un dos seus obxectivos durante a peregrinaxe é achegarse á xuventude galega estando, se é posible, en contacto con asociacións e institucións de xoves para informarlles sobre as actividades e próximos eventos a realizar. Igualmente está previsto realizar  un documental con todo ese material obtido no decurso da súa peregrinación.

Servirá para a promoción e divulgación dub próximo evento que terá lugar en Santiago no mes de maio. A temática será a “formación para os xoves e as posibilidades do primeiro emprego”, contando as súas experiencias persoais  en diferentes países de Europa e contando coa presenza de institucións que ofrecen estes servizos. A organización desta peregrinaxe vén logo do éxito acadado na xuntanza celebrada por Xuga.eu en Lisboa no pasado novembro, na que contaron coa participación de máis de 50 mozos nas sesións de traballo e arredor de 300 nos programas culturais desenvolvidos.

Xoves, 11 de febreiro de 2010  

A Asociación de Xoves Galegos en Europa inicia hoxe en Tui o camiño de Santiago

            A asociación “Xuventude Galega en Europa”, Xuga.eu (www.xuga.eu),  comezará hoxe, xoves, en Tui a súa peregrinaxe polo camiño portugués, que realizarán entre os días 11 e 15 de febreiro, ao remate do seu percorrido está previsto que amais de achegarse á Catedral compostelá os mozos participantes asistan a unha recepción oficial no Pazo de Raxoi, sede da Presidencia da Xunta de Galicia.

 “Queremos demostrar que el espíritu del año Xacobeo fomenta la interculturalidad y la difusión de los valores gallegos en el mundo” defende o presidente de Xuga.eu, Matías Vazquez. “Y estos son valores que definen a la perfección la filosofia de nuestra asociación que pretende ser el nexo de unión de la juventud gallega en Europa”, engade Jacombo Camba, vice-presidente de Xuga.eu.

Asociación de Xóvenes Galegos (XUGA.EU) que residen en toda Europa, foi creada no pasado ano 2009 en Laussane coa intención de promover unha rede social entre mozos galegos espallados en toda Europa. Un dos seus obxectivos durante a peregrinaxe é achegarse á xuventude galega estando, se é posible, en contacto con asociacións e institucións de mozos para informarlles sobre as actividades e próximos eventos. Igualmente está previsto realizar  un documental con todo ese material obtido no decurso da súa peregrinación.

Servirá para a promoción e divulgación dun evento que terá lugar en Santiago no mes de maio. A temática será a “formación para os xoves e as posibilidades do primeiro emprego”, contando as experiencias persoais  en diferentes países de Europa co apoio e a presenza de institucións que ofrecen estes servizos. A organización desta peregrinaxe vén logo do éxito acadado na xuntanza celebrada por Xuga.eu en Lisboa no pasado novembro, na que contaron coa participación de máis de 50 mozos nas sesións de traballo e arredor de 300 nos programas culturais desenvolvidos.

O concelleiro de Cultura e primeiro tenente de alcalde de Tui, Moisés Rodríguez Pérez, estará presente ás 08,30 horas, no Albergue de Peregrinos, para saudar aos integrantes desta peregrinación e agradecerlles a elección de Tui coma punto de partida do seu camiño cara Compostela.

A Deputación adxudica a contratación da obra de mellora da Magdalena e variante Igrexa na E.P. 2502 Cerquido-Ribadelouro por 324.806 euros

A Deputación de Pontevedra, reunida o mércores en Xunta de Goberno, resolveu favorablemente a adxudicación definitiva do proxecto para a realización das obras de mellora na zona Magdalena e variante Igrexa na E.P. 2502 Cerquido-Ribadelouro, en Tui, á empresa Covsa.

As obras teñen por obxecto a urbanización deste tramo da estrada, na parroquia de Ribadelouro, mediante a dotación de beirarrúas e servizos. Concretamente, as melloras proxectadas inclúen unha rede de pluviais con colectores de P.V.C, beirarrúas, rede de abastecemento de augas, alumeado público, redes de media e baixa tensión, rede de comunicacións así como sinalizacións e balizamento.

Ademais, co fin de darlle unhas directrices básicas á empresa adxudicataria das obras, contémplase no proxecto un Estudo de Seguridade e Saúde, en cumprimento das obrigas no campo de prevención de riscos profesionais.

O importe total da obra ascende a 405.451 euros. Esta será financiada polo Concello de Tui e a Deputación de Pontevedra, en virtude dun convenio de colaboración asinado por ambas partes.

De acordo con este convenio o Concello local achegará un total de 80.645 euros e a Deputación un total de 324.806 euros. Estas cantidades repartiranse en entregas anuais sucesivas dende o 2010 ata o 2011.

O prazo de execución da obra establécese en 14 meses e comezará a contar dende o día seguinte á firma da acta de comprobación do repranteo.

Talía Teatro presenta “Palabras encadeadas”

Toño Casais e María Ordóñez son os dous actores que dan vida a un psicópata e a unha enfermeira, os protagonistas de “Palabras encadeadas”, que representa mañá, venres, Talía Teatro a partir das 21.30 horas no Teatro Municipal da Área Panorámica.

Baseada no texto homónimo do catalán Jordi Galcerán “Palabras encadeadas” narra a historia dun psicópata e a súa vítima, secuestradas nun espazo sen posibilidade de fuxida aparente. Este é un thriller psicolóxico no que o manexo do suspense e os xiros dramáticos irán sorprendendo ao espectador, levándoo a un lugar onde a liña divisoria entre a verdade e a mentira se dilúe.

Artur Trillo dirixe desta produción que foi estreada en abril do ano pasado en Cee.

Talía Teatro  dende a súa constitución hai vinte ano estreou vinte e cinco espectáculos, dos que actualmente mantén en repertorio sete de distintos formato.  A súa liña de traballo caracterízase por enfocar as súas montaxes para un amplo abano de público dende o infantil ao adulto.

Debido a exixencias da escenografía o aforo do espectáculo está limitado a 200 persoas.  As entradas están xa á venda na web www.culturatui.info ata o venres ás 18.30h, e o mesmo venres dende ás 20.00 horas poderanse mercar no despacho de billetes da Área Panorámica. Os prezos das localidades son 6 e 4 €.

Cores Tourís confirma que a ampliación de beirarrúas na PO-404 é un proxecto prioritario para a Delegación Territorial de Pontevedra

O delegado territorial da Xunta en Pontevedra, José Manuel Cores Tourís, visitou onte o concello de Tui onde, en compaña do xefe territorial de Medio Ambiente, Territorio e Infraestruturas, Evaristo Juncal, recolleu as demandas do alcalde, Feliciano Fernández Rocha, en relación a varias estradas e, en concreto, ás melloras da PO-404.

Deste xeito, o alcalde de Tui entregoulle ao delegado territorial o orzamento  para a conclusión das zonas que quedaron sen asfaltar entre o bordo e as beirarrúas no tramo entre Tui e Salceda de Caselas. “Trátase dun contrato menor que supera lixeiramente os 60.000 euros o que facilitará a súa execución”, explicou José Manuel Cores Tourís.

En concreto actuaríase sobre 3.500 metros cadrados de pavimento, o que suporá a creación de 1.000 metros de aparcamento. “Fixéronse as beirarrúas  e se retranquearon os peches pero algunhas zonas quedaron sen rematar. Os veciños colaboraron pero agora, precisamente, estas persoas son as que máis sufren os problemas de non concluír as obras”.

Segundo engadiu Evaristo Juncal, os traballos poderían realizarse de forma inmediata “xa que o alcalde conseguiu agilizar e presentar onte mesmo o orzamento de forma detallada”.

Por outro lado, o delegado territorial tamén tomou nota da necesidade da construcción da rotonda de Areas que facilitará o aceso á igrexa da parroquia. “Hai problemas técnicos coa memoria valorada fai uns anos polo que na actualidade estamos a estudiar as posibles solucións. A maiores tamén se está a modificar o orzamento”, explicou Evaristo Juncal.

Finalmente, tamén solicitou o alcalde ao delegado territorial que se prolonguen as beirarrúas na PO-404 e que, na mesma se faga unha nova glorieta. “Sen embargo, para estas obras é necesario levar a cabo expropiacións o que significará a aprobación da Dirección Xeral. Aínda así este asunto ten prioridade máxima na Delegación e eu persoalmente trasladaréilla ao conselleiro de Medio Ambiente, Territorio e Infraestruturas na reunión que manterei próximamente con él”, concluíu José Manuel Cores Tourís.

Os Servizos Sociais desenvolven unha campaña de consumo responsable

    A Concellería de Servizos Sociais do Concello de Tui está desenvolvendo unha Campaña de consumo responsable e outra de promoción do voluntariado. Das mesmas falaban onte no programa Día a Día, da Radio Municipal, a Concelleira Patricia Ricón, e a Traballadora Social, Carmen González.

    A campaña de promoción do voluntariado leva anos realizándose, e amais de captar voluntarios buscan tamén difundir a conciencia voluntaria en aspectos cotiás das nosas vidas.

    A outra campaña de Consumo Responsable xorde dunha proposta do colectivo educativo de Rebordáns, centrada no uso das bolsas de plástico, tentando minimizar o seu consumo e propondo a súa reutilización. Para iso van repartir bolsas reutilizables deseñadas polos alumnos do CEIP de Rebordáns.

    As bolsas reutilizables serán repartidas hoxe xoves na praza da Inmaculada, coincidindo co día de mercado semanal. Estarán as técnicas de Servizos Sociais e alumnos do CEIP de Rebordáns, propondo a corresponsabilidade social a nivel de voluntariado e de consumo responsable.

    Nesta campaña teñen tamén colabora ACITUI. E o lema que empregan é “Lévame de compras ao comercio tudense”.

Celebración conxunta do Día Internacional da Muller entre Tui e Valença

    O próximo 8 de marzo celébrase o Día Internacional da Muller. Unha data na que Tui e Valença do Minho van aunar esforzos nunha programación conxunta.  A Concelleira Patricia Ricón, explicaba que o programa que se desenvolverá do 5 ao 8 de marzo, está bastante avanzado.

Mércores, 10 de febreiro de 2010  

Detido por varios roubos en coches

    A Garda Civil de Tui detivo a  un mozo de 21 anos, FS.R.L., con domicilio en Viana do Castelo (Portugal), como suposto autor de, ao menos, sete roubos no interior de vehículos estacionados en distintas rúas de Tui e Vigo.

    No momento da súa detención fóronlle ocupadas varias tarxetas e obxectos pertencentes a distintos propietarios dos vehículos obxecto de roubo.

    O detido foi posto a disposición do Xulgado de Instrución número TRES dos de Tui, quedando en liberdade con cargos.

    Momentos despois da súa posta en liberdade foi sorpendido "in fraganti", por unha patrulla de Seguridade Cidadá do Posto da Garda Civil de Tui, no interior dunha furgoneta previo forzamento dunha das portas, polo que novamente procedeuse á súa detención.

A Biblioteca Municipal incrementou un 25% o número de usuarios e de empréstitos en 2009

    A Biblioteca Pública Municipal de Tui incrementou en 2009 un 25% o número de usuarios e de empréstitos segundo se recolle na Memoria de Actividades deste servizo público que vén de ser feita pública.  Deste xeito este servizo bibliotecario consolídase como un dos referentes culturais do Concello tudense. Así a Biblioteca tudense acadou en 2009  de 31.512 usuarios incrementándose nun 25% respecto ao ano 2008. Similar incremento experiméntase no número de libros retirados en empréstito domiciliario polos socios da Biblioteca que chegaron a 5.374 libros aumentando tamén arredor dun 25% en relación aos de 2008. Amais incorporáronse ao fondo bibliotecario 2.056 novos títulos co que a biblioteca acada os 28.552 volumesEntre os principais acontecementos da Biblioteca en 2009 compre salientar a  concesión por cuarto ano consecutivo dun dos Premios “María Moliner” no apartado de “labor bibliotecaria”. Tamén é de destacar a posta en marcha dunha “comiteca” cunha escolma de fondos de banda deseñada para todas as idades. Outro dos feitos salientables é a posta en funcionamento da páxina web da Biblioteca Municipal de Tui no portal de “bibliotecas publicas.es” aproveitando o programa que o Ministerio de Cultura ofrece ás bibliotecas españolas. Nos escasos tres meses en que funcionou ao longo do pasado ano tivo máis de 3.500 visitas.Ao longo do ano 2009 a Biblioteca Municipal de Tui desenvolveu diversas actividades de promoción da lectura. Por unha banda actividades de carácter permanente e estable como son:

-          Club de Lectura, integrado na actualidade por 13 persoas que se reúnen quincenalmente na Biblioteca para comentar os libros que previamente teñen escollido e lido.

-          Visitas escolares, que no pasado ano 2009 supuxeron a visita ao centro bibliotecario de 790 alumnos de diversos centros educativos de primaria e secundaria do concello tudense.

-          Bibliopiscina, como un servizo complementario nos meses estivais que este ano foi mellorado coa colaboración da Editorial Everest cun lote de 200 libros e unha carpa para á sua exposición na Piscina Municipal.

-          “Lendo espero” ou programa promovido pola Consellería de Cultura e Turismo que ofrece un espazo de lectura na sala de espera de pediatría no Centro de Saúde de Tui, en cuxa xestión participa a Biblioteca Municipal de Tui.

En canto a actividade de carácter periódico ao longo do ano 2009 foron realizadas un total de 23 actividades de animación á dirixidos especialmente aos nenos e nenas, pero por vez primeira neste pasado ano se organizaron tamén para outros segmentos de idade. Así houbo contacontos para adultos e mesmo unha sesión de formación para nais e pais e tamén obradoiros de banda deseñada para os mozos.

    Desenvolvéronse diversas actividades promovidas para os rapaces ao abeiro das campañas: “Mes dos libros”, “Día da Biblioteca”, “Outono na Biblioteca” e “Nadal con libros”.

Nesta memoria da Biblioteca salienta tamén a exposición temporal organizada no mes de maio que baixo o título de “Tui escríbese en versos” recollía 15 poemas de outros tantos poetas vinculados coa nosa cidade e que tivo unha moi positiva acollida.

    Outra importante actividade promovida pola Biblioteca Municipal foi a conmemoración o 24 de xuño do CXVIII aniversario da celebración dos Xogos Florais de Galicia que contou coa participación das poetisas Yolanda Castaño, Eva Veiga e Marga Romero e a colaboración especial do músico Tomás Camacho. Celebrado na igrexa de San Domingos este recital reuniu a máis de 80 persoas.

    Por ultimo, subliñar que a Biblioteca participou en actividades de presentación de libros ou de colaboración con entidades e colectivos tudenses.

    Para o concelleiro de cultura, Moisés Rodríguez Pérez, os datos desta Memoria acreditan o importante esforzo que o Concello de Tui está a desenvolver na promoción da lectura pública desde o convencemento que é unha ferramenta imprescindible para a formación no só dos rapaces senón de toda a sociedade e, ao tempo, unha alternativa de lecer de grande interese.

Visita do Delegado Territorial da Xunta a Tui

    O delegado territorial da Xunta en Pontevedra, José Manuel Cores Tourís, visitará ás doce deste mediodía xunto ao alcalde de Tui, Antonio Fernández Rocha,  varias melloras de infraestruturas. O punto de encontro será a casa do concello.

Os comerciantes de Tui interésanse polo patrimonio histórico da cidade

A Asociación de Comerciantes e Industriais de Tui, ACITUI e o Centro de Iniciativas Turísticas Terras do Baixo Miño coa colaboración do Canónigo da Catedral de Tui, Ricardo García Fernández, organizaron unha visita guiada ó conxunto histórico da Catedral de Tui.

A visita tivo lugar o domingo dia 7 de febreiro ás 17:00 horas e estivo guiada por José Ramón Fernández Fernández, Historiador de Arte e encargado da Catedral de Tui. Nesta primeira visita participaron os socios e os seus acompañantes, os cales mostraron un grande interese polo patrimonio histórico tudense.

            Esta é a primeira iniciativa do CIT Terras do Baixo Miño para intentar dar un impulso ó desarrollo turístico de Tui e a comarca do Baixo Miño. Estas actividades repetiranse ó longo do ano, centrándose, sobre todo, no turismo relixioso, coincidindo co Ano Xacobeo, aínda que tamén se ampliarán tanto a outros conxuntos de interese da cidade (o Monte Aloia, o casco histórico, etc.) como da Comarca do Baixo Miño.

            As próximas visitas, tamén de carácter gratuito, estarán dirixidas tanto a empresarios da comarca como ó resto do público que desexe asistir.

Estas iniciativas teñen como obxetivo divulgar o patrimonio histórico tudense e da Comarca do Baixo Miño  buscando que os comerciantes, hosteleiros e veciños da zona poidan ofrecer unha información mais axeitada ós nosos visitantes. Deste xeito preténdese conseguir unha mellor e mais longa estancia dos visitantes na nosa comarca, podendo descubrir aspectos de historia do noso patrimonio histórico descoñecidos por gran parte dos habitantes, que son os que mellor poden divulgar os valores da nosa comarca.

Con isto pretendemos fortalecer o noso Camiño de Santiago Portugués que ten máis de 2000 anos de historia formando parte da via XIX, a cal era utilizada polos peregrinos e para outras actividades, sobre todo comerciais, da época.

Martes, 9 de febreiro de 2010  

Charla sobre “Bos usos na alimentación”

    A Sala Félix Rodríguez da Área Panorámica acolle hoxe martes, ás seis da tarde, unha charla coloquio sobre “Bos usos na alimentación”.  Corerrá a cargo de Nicanor Floro Andrés, nutricionista e licenciado en farmacia.

    Esta actividade está organizada pola Asociación de Amas de Casa, Consumidores e Usuarios de Tui.

Convocatoria de catro prazas no Concello de Tui

    O Concello de Tui ten aberto ata este xoves, 11 de febreiro, o prazo para presentar as solicitudes para acceder aos procesos selectivos convocados para cubrir catro postos de traballo con carácter temporal.

    Trátase por unha parte dunha praza de peón operario do Punto Limpo do Concello de Tui, unha praza de auxiliar administrativo para o departamento de Tesourería, un operario de limpeza para a súa adscrición ao Servizo de Recollida de Lixo, e un Operario de Mantemento Electricista.

    As bases concretas da convocatoria de cada unha destas prazas pódese consultar no Concello de Tui ou na web http://www.concellotui.org/php/noticias.php?id=639

    Lembramos que o prazo para presentar as solicitudes remata este xoves día 11.

Non hai prazos para as conversas PP e AT

    Non hai prazos nin condicións nas conversas que o Partido Popular e Acción Tudense van manter co obxectivo de integrar a AT no PP de cara ás eleccións municipais de 2011.  Así o afirma o voceiro de Acción Miguel Capón, na Radio Municipal de Tui, días despois de que a executiva local do Partido Popular aprobase por unanimidade dar luz verde ao proceso negociador entre as dúas formacións.

    Miguel Capón de AT recoñece que houbo contactos xa, e referíase a unha reunión á que acudiu o presidente provincial do PP, Rafael Louzán, xunto a dous membros do PP e seis de Acción Tudense. Un encontro no que se acordou nomear unha comisión negociadora en cada partido para pór en marcha o proceso.

    Ao marxe do resultado destas negacións Miguel Capón explicaba que Acción Tudense manterase coma tal ata o final da lexislatura polo que en acción municipal seguirán defendendo o seu programa electoral.

    Outro tema distinto son as negociacións de cara á posible integración e á confección da posible lista unificada.

    O que si ten claro o responsable de AT é que el persoalmente nunca se integraría nunha lista co líder de Tudense Unidos Independentes, Juan Miguel Diz Guedes. E amais apuntaba que na medida en que coñece a opinión da xente de Acción Tudense de haber tamén negociación con Tui co seu partido non se iniciaría. Subliñada que son incompatibles Diz Guedes con Miguel Capón. Criticaba que Diz Guedes en Campaña dicía que se presentaba para botar fóra a Fernández Rocha, e logo na investidura non fixo posible iso co seu voto.

    Por outra parte Miguel Capón afirma que el en política xa demostrou que é un político honesto e honrado, sinalando que iso non vai cambiar en función do partido no que estea.

    Xa noutra orde de cousas o voceiro de Acción Tudense referíase á cuestión de Acción Municipal, coma as denomina, coma a aprobación do Plan Xeral.  Neste tema indicaba que a conclusión que sacou da reunión que mantiveron co Conselleiro de Medio Ambiente, Territorio e Infraestruturas foi que o Plan estaría  informado en tres meses dende a recepción do informe de Patrimonio. Nese senso preguntará esta semana ao Alcalde sobre si se emitiu o informe de Patrimonio, de non ser así solicitará que os voceiros políticos se reúnan co cirector Xeral de Patrimonio.

    Incidía na importancia de contar co PXOM sobre todo para poder construír no rural, e para sacar adiante outros temas importantes coma a apertura da rúa Ourense.

    Tamén apuntaba a necesidade de concluír a redacción do Plan Especial do Conxunto Histórico.

Éxito dos Bolechas que completaron o aforo do Teatro Municipal

    A programación cultural do primeiro semestre de 2010 arrancou o pasado venres no Teatro Municipal de Tui e non o puido facer con mellor pé. Vendéronse todas as entradas de tal xeito que no despacho de billetes houbo que colgar o cartel “Entradas esgotadas”.

    Isto foi así ante a gran expectación xerada pola posta en escena de “Os Bolechas” da man de Caramuxo Teatro que non defraudou aos máis pequenos. Todos disfrutaron coas aventuras desta familia creada por Pepe Carreiro e tiveron oportunidade de ver de preto a Tata, as xemelgas ou a Carlos.

    A programación continúa este venres con Talía Teatro coa obra de Jordi Galcerán “Palabras Encadeadas”. Por esixencias da escenografía o aforo está limitado a 200 espectadores.  As entradas están xa á venda en www.culturatui.info

Ata o 26 deste mes está aberto prazo para o Concurso do Cartel das Festas de San Telmo

    Ate o 26 deste mes está aberto o prazo para presentar os traballos que desexen participar no Concurso para a elección do cartel anunciador das Festas de San Telmo.

    O cartel debe medir 50 cm de ancho por 70 cm de altura e débese presentar sobre cartón pluma ou soporte ríxido sen cristal protector ou marco. A técnica a empregar é libre sempre que sexa posible a súa reprodución. No mesmo debe figurar “Tui, Festas de San Telmo 2010, 3-12 abril. Festas de interese turístico galego”.

    Os traballos deben ser orixinais e inéditos. Na parte traseira debe figurar un lema, e en sobre pechado acompañarase o nome e apelido do autor ou autores, DNI, enderezo e teléfono de contacto.

    Cada autor poderá presentar un máximo de dous traballos.

    Establécese un único premio de 500 euros.

    Os traballos débense enviar ata do 26 deste mes ao Concello de Tui ou á Biblioteca Municipal. As bases completas pódense consultar na web www.concellotui.org 

Luns, 8 de febreiro de 2010  

Play-Doc esperta o interese entre documentalistas de todo o mundo

O festival internacional de documentais galego confirma unha vez máis a súa proxección exterior, proba diso son as máis de 800 obras procedentes de todo o mundo inscritas para participar na sexta edición deste certame que terá lugar do 17 ao 21 de marzo de 2010.

Play-Doc fíxose un oco no calendario internacional dos festivais dedicados a este xénero grazas, entre outras cousas, á ampla lista de recoñecidos realizadores que xa pasaron por este evento, como Lech Kowalski, Victor Kosakovski, Avi Mogravi, Rithy Pahn, Carles Bosch, Audrius Stonys, e un longo etc.

Actualmente Play-Doc ultima os preparativos do seu programa de cara a esta vindeira edición na que se poderá gozar de novo dunha coidada selección de documentais de recente produción, e de traballos de coñecidos cineastas como Jay Rosenblatt, Raymond Depardon, ou Boris Mitin, entre outros, o que pon de manifesto a súa clara vocación internacional e o seu marcado carácter independente.

Destaca tamén a importante presenza de cineastas do noso país con especial atención ás producións galegas. Neste sentido Play-Doc, realiza ademais, un importante labor de formación a través de obradoiros, foros e seminarios, dotando de posibilidades aos novos cineastas para entrar en contacto con novas formulas cinematográficas da man de destacados profesionais.

Play-Doc máis que un festival de cinema.

Unha das peculiaridades do festival tudense é o seu carácter multidisciplinar, así, na súa programación ofrece exposicións e concertos a cargo dalgúns os protagonistas das películas que se exhiben durante o certame. Unha formula que permitiu contar coa presenza destacados músicos como Mad Professor, Rosenberg Trio, Thomas Truax, Mostar Sevdah Reunion, Dead Combo, e artistas plásticos tales como Ron English ou o iraniano Jamshid Aminfar.

Esta orixinal combinación entre cinema e outras artes serviu para que Play-Doc acadase a sorprendente cifra de 30.000 espectadores nas súas pasadas cinco edicións.

Moi pronto coñeceranse os contidos definitivos dunha edición que de novo aposta pola calidade.

Venres, 5 de febreiro de 2010  

Caramuxo Teatro abre a programación de 2010 con “Os Bolechas”

Hoxe, venres, comeza a programación do primeiro semestre de 2010 organizada pola Concellería de Cultura  no Teatro Municipal de Tui. Caramuxo Teatro presenta “Os Bolechas” unha obra de monicreques na que dan vida aos famosos personaxes creados por Pepe Carreiro. A cita será ás 20.00 horas no Teatro Municipal.

 “Os Bolechas” son un gran éxito editorial galego que agora chega en forma de comedia musical da man de Caramuxo Teatro.  Este é un espectáculo que nos amosa un día na vida desta divertida familia. Coñeceremos as ocorrencias do pequeno Tatá, as travesuras de Chispa, a Braulio e Sonia, as xemelgas Pili e Loli, e ao irmá máis vello Carlos. O texto está creado en colaboración entre a compañía e o autor dos Bolechas, Pepe Carreiro.

Coma antes se mencionada trátase dunha comedia musical cuxa banda sonora está creada pola compañía e interpretada por músicos da Xoven Orquestra Sinfónica de Galicia. A representación inclúe partes musicais cantadas e outras melodías que buscan crear diferentes ambientes na escena.

Os bonecos empregados no espectáculo son tipo Muppets tallados en gomaescuma por Marcelo Fernández, recoñecido titiriteiro arxentino, que ten realizados diferentes traballos para teatro, cinema e televisión en diferentes lugares do mundo.

A obra, cunha duración de 50 minutos, foi estreada no mes de outubro en Ames. Dende entón foi vista por máis de sete mil espectadores nas 35 funcións realizadas.

Darán vida aos personaxes coa manipulación dos monicreques Xosé Esperante, Juan Rodríguez e Laura Sarasola.

Caramuxo Teatro  

Caramuxo Teatro é unha compañía creada en 2003 na Coruña, dedicada ao público infantil e xuvenil. Realizan espectáculos para diferentes idades, dende bebés ata adolescentes, empregando técnicas diversas coma teatro de actor, monicreques de mesa, de luva ou teatro de rúa. Teñen participado en diferentes mostras, feiras e festivais con máis dunha ducia de montaxes.

As entradas para este espectáculo están xa á venda na web www.culturatui.info ata as 16.30h, e dende ás 18.30h poderanse mercar no despacho de billetes da Área Panorámica.

A Deputación de Pontevedra concede catro novas axudas como parte do Plan de Investimentos ó concello de Tui por valor de 348.538 euros

A Deputación de Pontevedra, reunida en Xunta de Goberno, aprobou a concesión de catro subvencións ao concello Tui para a realización de distintas obras de mellora, correspondentes ao Plan de Investimentos da Deputación 2009-2011, por valor total de 348.538 euros.

O abono destas subvencións servirá para sufragar as obras de mellora do campo de fútbol municipal de Guillarei, para acondicionar o acceso ao Parador Nacional e ao Paseo Fluvial e para mellora de vías nas parroquias de Guillarei e Paramos.

Ás axudas aprobadas súmanse as concedidas noutros concellos, que só na última Xunta acadaron os 6 millóns de euros, se ben Louzán recordou que “as actuacións que non chegan aos 50.000 euros apróbanse directamente, non pasan por Xunta de Goberno, adxudícanse segundo os convenios correspondentes cos concellos”.

Louzán recordou tamén que este Plan de Investimentos da Deputación axudará ós concellos cun total de 70 millóns de euros destinados a acometer máis de 520 obras en toda a provincia e que posibilitará máis de 3.000 postos de traballo.

O 24 de abril tomará posesión o bispo electo de Tui-Vigo

    O 24 de abril ás 16.30h tomará posesión coma bispo da diócese de Tui-Vigo Monseñor Luís Quinteiro Fiuza que  o pasado 28 de xaneiro era designado coma tal polo Papa Benedicto XVI.  O acto de toma de posesión desenvolverase na Catedral de Tui.

    Hai uns días o Colexio de Consultores de Tui-Vigo designou a Xesús Gago Branco, atá o de agora Vicario Xeral, coma Administador Diocesano. O seu papel será dirixir a Diócese ata a toma de posesión do electo novo Bispo de Tui-Vigo.
 

Conferencia “Cómo facer pan”

    A sala axunta ao Museo Municipal acolle hoxe ás oito desta tarde unha nova conferencia do ciclo organizado pola Asociación Arcebispo Lago sobre “Calidade na alimentación”. A dietista Cruz Sánchez del Hierro falará sobre “Os Cereais” e “Cómo facer un bo pan”

    Cruz Sánchez estivo hoxe de novo no programa Día a Día onde explicaba que a conferencia vai dirixida ao ámbito doméstico e explicaba qué é preciso para facer pan.

Medio Ambiente aproba unha modificación da Ordenación Urbanística Provisional en Tui, para aloxar un equipamento sanitario no concello

    O Consello da Xunta na reunión de onte aprobou a modificación do proxecto de decreto polo que se suspende a vixencia do Plan Xeral de Ordenación Urbana de Tui e se aproba a ordenación urbanística provisional, coa finalidade de ampliar o catálogo de usos a que se pode destinar unha parcela situada no número 4 da rúa Alcalde Casal Aboy do concello de Tui, para incorporar o uso sanitario.

    Así se recolle no proxecto de decreto polo que se modifica o Decreto 27/2006, do 16 de febreiro polo que se suspende a vixencia do plan xeral de Tui.

    A ordenación urbanística provisional ten carácter cautelar, coa finalidade de atallar consecuencias indesexables que se derivarían da aplicación do Plan Xeral de Ordenación Urbana, aprobado definitivamente en outubro de 1994, e garantir a viabilidade da futura ordenación urbanística definitiva.

    Por outro lado, este cambio na regulación dos usos permitidos en Tui non compromete a futura ordenación urbanística e resulta coherente coa estratexia,  as directrices e os obxectivos xerais do Plan Xeral de Ordenación Municipal, actualmente en elaboración polo Concello de Tui. Tamén se recoñece que as modificacións están fundamentadas en razóns de interese público debidamente xustificadas; son conformes coa Lei 9/200, do 30 de decembro, de ordenación urbanística e protección do medio rural de Galicia; son perfectamente compatibles coa finalidade da suspensión do planeamento urbanístico municipal e manteñen fielmente os criterios de ordenación urbanística provisional.

    Asemade, con esta modificación dáse cumprimento á sentenza do Tribunal Superior de Xustiza de Galicia en que se omite o recoñecemento da correspondente situación xurídica urbanística vinculada á existencia de solo urbano consolidado.

    En definitiva, con esta decisión determínase que a figura da suspensión do plan  ten carácter transitorio e cautelar, por tanto vixente ata a probación do novo plan, e trata de evitar a xeración de situacións que resulten indesexables e incompatibles coa nova ordenación fixada no plan que se elabore.

Tramitación previa

    A tramitación previa para acadar a aprobación desta modificación puntual e provisional foi a seguinte: o pleno ca corporación de Tui acordou solicitar –en setembro de 2009- á Consellería de Medio Ambiente, Territorio e Infraestruturas a realización dos trámites pertinentes para a modificación da ordenación provisional, limitándose esta a ampliar o catálogo de usos a que se pode destinar unha parcela situada no número 4 da rúa Alcalde Casal Aboy do concello de Tui, para incorporar o uso sanitario.

    Despois, a Consellería elaborou un proxecto de modificación parcial do decreto

27/2006 que é o que se somete á consideración da comisión celebrado a mediados de decembro do pasado ano, na cal acordaron informar favorablemente sobre este proxecto.

PXOM de Tui

    O planeamento vixente do Concello de Tui ten data de aprobación de outubro de 1994. O concello volveu a remitir o PXOM para aprobación definitiva en agosto de 2008, pero na actualidade – e dende outubro de 2008- está paralizado o prazo de resolución, pendente de emenda documental por parte do Concello. Este municipio debe revisar –a instancia dun informe desfavorable da Dirección Xeral de Patrimonio Cultural- a delimitación dos Camiños de Santiago respecto ás restricións dos usos e actividades nas zonas de protección.

Xoves, 4 de febreiro de 2010  

Inscrición para participar en “Música no claustro”

Dende a organización do Ciclo Música no Claustro 2010 que se vai celebrar do 24 ao 28 de agosto na Catedral de Tui informan da apertura do prazo de recepción de solicitudes para participar nesta actividade.

A convocatoria está aberta para propostas de música, danza, pintura, escultura, fotografía e deseño gráfico.

As persoas interesadas en participar en “Música no claustro” deben remitir un correo electrónico a musicaenelclaustro@gmail.com.

Proxecto obradoiro para lactantes (bebés, nenos e nenas ata 3 anos)

A Asociación de Lactancia Materna de Tui, Pinga Doce, organiza de novo o Proxecto Obradoiro para lactantes dirixido a bebés e nenos e nenas ata os tres anos.

O primeiro obradoiro sobre Masaxe-ioga terá lugar o luns 15 de febreiro ás 11.30h no Centro Ser de Tui. O segundo obradoiro de “Psicomotricidade” está previsto para o 17 de marzo na Escola de Danza Paula Cobián. Haberá dous grupos, o primeiro ás 11h para nenos que camiñan sós e ata os 3 anos, e o segundo ás 12h para nenos que aínda non andan.

Proximamente informarase de dous obradoiros máis a realizar que están por confirmar.

Os Obradoiros teñen carácter gratuíto e non é preciso anotarse previamente. As persoas que desexen máis información poden chamar ao 654 88 35 86 (Toñi).

O Kaiak Tudense foi terceiro na 15º Régata International de Pas de Calais

            A pasada fin de semana o Club Kaiak Tudense clasificouse en terceira posición  na 15º Régata International de Pas de Calais. O club tudense acudiu con tan só 17 padeeiros, e foi quen de facer un oco no podio por detrás dos locais do Club St Lauarent Blangy e os Belgas de Neerpelt, que foron primeiros e segundos respectivamente.

No plano individual Manuel Garrido, actual Campión do Mundo de Maratón, obtivo o sexto lugar na final despois de terse clasificado gañando aos locais Thomas Simart, Campión de Europa Sub 23 C1 1000 metros, e a Matthieu Goubel, actual subcampión do Mundo en C1 1000 metros. Nesta mesma categoría  Daniel Costa  obtivo un quinto posto na final b.

Na categoría junior os resultados máis destacados foron a terceira praza de Adrián González en C1 junior e a cuarta praza de Valeria Romero en k1 muller junior. Silvia Rodríguez, pese a uns problemas estomacais, logrou coarse na final b onde acabou en terceira posición.

En canto aos cadetes destacar a gran actuación de Mónica Araujo que tras un duro sprint final acabou en segunda posición, mentres que Roi Rodríguez obtivo un meritorio quinto lugar.

Os padeeiros tudenses tiveron que facer fronte ás baixísimas temperaturas que non superaron os 0º na fin de semana, mesmo chegando a nevar durante a competición. Esta circunstancia endureceu a proba para os deportistas tudenses xa que non están habituados a estas temperaturas. Aínda así esta foi unha boa toma de contacto coa competición, que oficialmente comezará  a finais de febreiro co Control Galego de Inverno sobre 5000 metros.

Teatro, música, danza e palabra na programación do primeiro semestre no Teatro Municipal

A programación cultural de Tui para o primeiro semestre do ano ten un orzamento de 90 mil euros, un 19% menos que en 2009. Deste total 24 mil euros son destinados pola Concellería de Cultura aos espectáculos que se van desenvolver no Teatro Municipal de Tui nos que se fai unha aposta pola calidade e variedade, destinados a todo tipo de público. Nesta ocasión faise un guiño especial cara aos espectadores da outra beira do Miño, que na actualidade representan o 5% do total, e inclúese a actuación dun afamado contacontos portugués coma é Jorge Serafím. Compre salientar tamén a presenza, nunha nova ocasión, do Centro Dramático Galego, coa súa última produción, recén estreada, “As actas escuras”.  Esta programación vén recollida no número 19 da Axenda Cultural Corredoira. Da mesma editáronse 15 mil  exemplares dos que 12 mil son distribuídos nos domicilios de Tui e Valença do Minho, e  3 mil en establecementos comerciais e no propio Teatro Municipal. En “Corredoira” amais dos espectáculos do Teatro Municipal inclúense as citas que figuran ao abeiro das Festas de San Telmo, a Feira de Artesanía e a do Libro, así coma o Festival Internacional de Documentais de Tui, Play-Doc e o Entroido. En “Corredoira” figura tamén a programación tanto da Sala de Exposicións Municipal coma do Anexo até o mes de xuño.

Os espectáculos comezan este mesmo venres, ás 20h,  da man de Caramuxo Teatro que presenta para os cativos “Os Bolechas”.  Os máis pequenos serán tamén os destinatarios das obras “A caixa de música” de Viravolta Títeres o 19 de febreiro, e “Cósima” da man de Sarabela Teatro o 14 de marzo.

O público adulto poderá gozar das representacións teatrais de Talía Teatro con “Palabras encadeadas” o 12 de febreiro, o Centro Dramático Galego con “As actas escuras” o 5 de marzo, e Teatro do Morcego presentará o 23 de abril “Kvetch, unha comedia americana sobre a ansiedade”.

A música ten cabida nesta programación da man do terceiro Certame de Bandas de Música do Sur de Pontevedra que organiza a Deputación o sábado 17 de abril. Así coma no espectáculo “Fisterránea. Músicas no cabo do mundo” que chega da man do Xacobeo. Este é un proxecto do grupo Berrogüeto xunto a outras agrupacións convidadas que encherán o Teatro o sábado 8 de maio.

A palabra estará presentes na “Noite de Contos” da man do afamado contacontos galego Quico Cadaval, e do portugués Jorge Serafím o 7 de maio.  E a danza chegará nunha reivindicación da tradición o 21 de maio coa compañía de Quique Peón no espectáculo “Ovay”.

A presentación desta programación tivo lugar onte a mañá por parte do alcalde de Tui, Antonio Fernández Rocha, e do Concelleiro de Cultura, Moisés Rodríguez.

Moisés Rodriguez salientou que se preparou unha programación acorde cos tempos “realista e ambiciosa” neste Ano Santo, indicando que Tui será unha das sedes do proxecto “Finisterrae” do Xacobeo.

O Concelleiro de Cultura destacou na súa intervención que “en sete anos o Teatro Municipal converteuse nun espazo vivo” salientando a media de 300 espectadores lograda en 2009, xunto ao éxito da venda de entradas por internet que superou todas as expectativas representando o 40% do total.

Pola súa parte o alcalde, Antonio Fernández Rocha, felicitou á Concellería de Cultura pola programación e polo deseño da Axenda Cultura. Engadía que hai que seguir mantendo a Tui coma referente cultura da contorna pese as dificultades económicas.

Apuntou o rexedor tudense varios proxectos nos que se están a traballar coma a posibilidade de editar unha axenda conxunta con Valença do Miño, que estudarán proximamente nunha reunión de traballo.

Mércores, 3 de febreiro de 2010  

Presentación do libro “As 55 mentiras sobre o galego”

    O primeiro andar da Área Panorámica acolle este venres, ás 20.30 horas, a presentación do libro “55 mentiras sobre o galego” da autoría de xente da cultura galega coma Agustín Fernández Paz, Francisco Fernández Rey ou Ana Iglesias.

    A presentación correrá a cargo de Elena Pousa e Alberto Valverde. O libro trata de desmontar as mentiras que se publicitan sobre o galego na sociedade actual.

    A presentación ten lugar de xeito simultáneo en distintas cidades e vilas.
 

Baile de Entroido en Riomuíños

    A Asociación de Veciños de Riomuíños informa que o sábado 13 deste mes organizan un baile de disfraces no local da asociación a partir das seis da tarde.

    Entre todos os adultos disfrazados farán o sorteo dun disfraz. E repartirán lambetadas entre os nenos.
 

Hoxe xornada sobre o “Procedemento de conexión das industrias ao Sistema de Saneamento do río Louro

    A empresa pública Obras e Servizos Hidráulicos vai realizar ás 11 desta mañá unha xornada explicativa sobre o “Procedemento de conexión das industrias ao Sistema de Saneamento do río Louro” na Estación Depuradora de Augas Residuais de Guillarei.

    Por este motivo convócase aos industriais interesados do Concello de Tui a asistir a esta xornada. Lembramos que será ás 11h na EDAR de Guillarei.

Martes, 2 de febreiro de 2010  

A Sala Municipal de Exposición acolle hoxe a inauguración das exposicións: “Arte con lapis” e “Maquila boutique”

A Concellería de Cultura do Concello de Tui continúa co seu labor de dinamización da Sala Municipal de Exposicións (ubicada no Edificio Área Panorámica) e hoxe, martes, procederá á inaugurar dúas exposicións temporais.

Por unha parte, abre unha mostra de debuxos da nova creadora tudense Belén Fernández Guisande que baixo o título de “Arte con lapis” recolle unha escolma da súa produción coma debuxante tudense que inicia con esta mostra a súa andaina expositiva. Para o concelleiro tudense Moisés Rodríguez Pérez, con esta nova exposición patentízase o compromiso da Concellería de Cultura pola difusión e promoción dos novos valores locais que atopan nesta Sala Municipal un lugar aberto para amosar o seu traballo creativo.

Por outra banda, no Anexo da Sala Municipal de Exposicións abre tamén ao público a exposición “Maquila boutique” organizada pola ONG “Implicadas/os no desenvolvemento”. Maquila Boutique é unha exposición de artistas plásticos na que se denuncia a explotación na industria téxtil e se presentan posibles alternativas a esa explotación.

Maquila Boutique é unha instalación a modo de tenda de roupa na que se expoñen 15 pezas creadas a partir de roupa usada de compañías sobre as que existen informes de explotación laboral nos países do Sur. Xunto coas pezas exporanse paneis con información sobre a explotación na industria téxtil e alternativas, entre elas o microcrédito, como fonte de xeración de ingresos. Nos paneis inclúense estudos de casos que contan a situación de traballadoras da industria téxtil e as beneficiarias dos grupos de aforro que apoia IND na India e Etiopía. Á parte dos paneis informativos, na exposición tamén hai 3 paneis con poemas do libro Moda Galega, de María Reimóndez (Edicións Positivas, 2002). A exposición Maquila Boutique está coordinada pola artista galega Mar Caldas e Andrea Abreu, voluntaria de IND. As artistas participantes na exposición son: Almudena Fernández Fariña, Andrea Costas, Berta Cáccamo, Carme Nogueira, Carmen Suárez, Itziar Ezquieta, Mar Caldas, Las Pingüinas (Natalia Umpiérrez e Sara García), Renata Otero e Rosalía Pazo Maside.

Constituída a Asociación Cultural e Xuvenil do Traxe Tudense

    O pasado sábado constituíuse en Tui a Asociación Cultural e Xuvenil do Traxe Tudense.  O seu presidente é Ángel Alonso quen explicaba que esta asociación levaba varios anos xestándose e que o ano pasado logo das Festas puxéronse a traballar para constituíla.

    Na reunión do sábado  estiveron presentes entre 30 e 40 persoas que teñen o traxe de Tui, que ratificaron o traballo desenvolvido até o momento, así coma a Xunta directiva con dúas novas incorporacións.

    Entre os obxectivos con que parte este novo colectivo está unificar os criterios de confección do traxe tudense organizando para iso unha xornadas de estudo.

    Outro dos obxectivo é crear no casco urbano un grupo folclórico. Arestora están traballando na confección do estandarte da Asociación para que estea listo de cara ás Festas de San Telmo. Tamén están traballando para facer unha ofrenda ao Apóstolo Santiago co traxe de Tui.

Presentación da programación cultural do primeiro semestre

Mañá, mércores, ás 11.00 horas, terá lugar na sala de reunión da Casa do Concello da presentación da programación cultural do primeiro semestre do ano en Tui.

Comparecerán ante os medios de comunicación o alcalde de Tui, Antonio Fernández Rocha, e o concelleiro de Cultura, Moisés Rodríguez.