maiotomino

O Grupo municipal do Partido Popular a través do seu voceiro César Pérez Ares considera inadmisible que os baños do actual Centro de Saúde atópense cerrados é dicir fora de servizo. Facultativos do Centro expresaron a súa indignación por unha situación que se esta prolongando e que lles impide desenvolver cas mínimas normas de hixiene as súas propias tarefas diarias.

Para os populares é lamentable que o goberno municipal sexa incapaz de resolver esta circunstancia que obriga a que as persoas que acoden ó Centro teñan que acudir aos montes próximos que rodean as instalacións para utilizalos como “baños públicos”.

Dende o PP cualifican esta situación de “tercermundista” e din que esta provocando gran indignación entre os usuarios e que pon de relevo a falta de operatividade do Concello. Rematan dicindo que o goberno municipal non so non é quen de rematar das obras do novo Centro -que xa acumula un gran retraso sobre a data prevista- senón que non son capaces nin de manter no actual os mínimos servizos básicos de hixiene e saúde pública.

Venres, 30 de maio de 2008

Acto de lembraza a Xosé María Álvarez Blázquez organizado polo Centro Social, Cultural e Deportivo de Estás

A directiva do Centro Social, Cultural e Deportivo de Estás organiza o sábado, 31 de maio a partir das 22.00h, o acto “Lembrando a un Miñoto”, onde se lerá a biografía do autor, Xosé María Álvarez Blázquez, a quen este ano se lle dedicou o Día das Letras Galegas, intercalado con recitais de poemas e actuacións musicais, no que participarán nenos da parroquia de Estás.

Exposición de antigüidades na Casa da Cultura de Tomiño

A Concellería de Cultura, Educación e Participación Veciñal do concello de Tomiño e o Centro Social de Estás manterán aberta unha exposición etnográfica de apeiros de labranza e outros oficios artesáns, na Casa da Cultura de Tomiño, dende o próximo sábado, 31 de maio ao domingo 8 de xuño.

A exposición confórmana máis de 500 pezas antigas pertencentes aos oficios máis representativos do Baixo Miño e poderanse visitar de luns a venres, de 17.00 a 20.00 horas, e sábados e domingos en horario de mañá, de 11.00 a 13.00 horas, e en horario de tarde, de 17.00 a 20.00 horas.

Os apeiros son propiedade de veciños de Tomiño que cederon de maneira desinteresada as pezas para esta exposición que leva por título “Lembranzas dun Pobo”.

Entre as pezas pódense ver apeiros de labranza, fotos relacionadas coas actividades do campo e unha gran colección de pezas de menaxe, na que podemos atopar ferros de repasar a roupa de carbón, lámpadas antigas e mobles.

A coordinadora Andrea Pousa, presidenta do Centro Social de Estás, ten feito un importante labor de fotografado e catalogación o que facilitou a recompilación e montaxe da mesma e coa que pretende “espertar os sentimentos máis profundos dun pobo e acercar a cultura tradicional, sobre todo ós máis cativos”.

Segundo o concelleiro, Xesús Castiñeira, “é unha oportunidade única para coñecer e observar pezas de considerable valor que son difíciles de atopar incluso nos museos de etnografía da zona. É unha extraordinaria mostra da historia das artes e oficios no Baixo Miño”.

A exposición se dinamizará mediante o ofrecemento de visitas aos colexios do entorno.

Este domingo comezan as II Xornadas da Cultura da Auga en Estás

As comunidades de augas de Estás en Tomiño organizan, do 1 ao 8 de xuño, as II Xornadas da Cultura da Auga cuxo obxectivo é servir de punto de unión e cooperación, e de marco para presentar proxectos e plans ás distintas administracións, empresas e universidades para xestionar o medio ambiente e a calidade da auga.

Estas xornadas servirán para divulgar a xestión e servizo da auga, da importancia dos retos que se plantexan en materia e auga e os cambios que leva.

Os organizadores agardan crear nestas xornadas a Comunidade Xeral de Augas de Pontevedra dende Estás, co obxectivo de que se converta nunha importante vantaxe para todas as comunidades, usuarios, e para aportar solucións, respostas e novos servizos.

A inauguración destas segundas xornadas terá lugar o domingo, 1 de xuño, ás 12 do mediodía, a cargo da alcaldesa de Tomiño, contando coa presenza dun representante da Deputación, e dos concelleiros de Cultura e Medio Ambiente entre outros.

Até o próximo día 8 no marco destas xornadas haberá visitas escolares aos mananciais, así coma unha exposición sobre a rabilonga reflectindo o seu beneficio nos mananciais. E o venres día 6 ás 22.00h celebrarán unha asemblea para unificar as comunidades de augas.

Sandra González valora positivamente o primeiro ano de mandato

Onte á mañá a Radio Municipal de Tui iniciou unha rolda de entrevistas que os levará a falar cos alcaldes do Baixo Miño para valorar o primeiro ano de mandato desta corporación.

A primeira conversa foi coa alcaldesa de Tomiño, Sandra González, que resumía este primeiro ano de goberno con dúas palabras: ilusión e satisfacción, e con moita esperanza posta no futuro, estando dispostos a defender os intereses de Tomiño onde faga falta. Engadía que este primeiro ano foi de reflexión, de traballo duro e intenso cara adentro, e de moitas visitas á Xunta para defender os proxectos para Tomiño.

Sandra González facía deste primeiro ano un balanzo positivo, de moitos proxectos presentados que agardan executar de aquí en diante. Explica que agora as cousas virán xa máis soas xa que os proxectos vanse comezar a realizar.

Sandra González destacaba que en xeral as Consellerías danse conta do atraso de investimento que tiña Tomiño, e da débeda histórica que ten a administración co municipio ante a falta de gobernantes que saísen a defender Tomiño.

O saneamento do municipio é quizais o proxecto que vai máis lento dado o importante de investimento que require, nese ámbito avanzaba que están a facer un Plan Director de Saneamento. Pero explicaba Sandra González que as prioridades para Tomiño están indo adiante coma o Centro de Día ou a piscina municipal.

Outros proxectos realizados que destacaba era a implantación da WIMAX, a creación da oficina de igualdade, cursos de formación, ou o Plan Experimental de Emprego para ex empregados de Marbar, Obradoiro de Emprego.

Con respecto ás críticas que se escoitaron ao longo deste tempo de que o goberno tripartito non ía durar, Sandra González dicía que “o movemento se demostra andando” e que os tres grupos están de acordo no fundamental para Tomiño.

Por último sinalaba a rexedora de Tomiño que o saneamento, o Parque Empresarial, o sector estratéxico do campo e as pequenas obras do día a día, fomentando o deporte e a cultura, son os grandes retos deste mandato.

Xoves, 29 de maio de 2008

Valoración da I Festa do Kiwi de Tomiño

O Concelleiro de Cultura, Educación e Participación Veciñal de Tomiño, Jesús Castiñeira, coma responsable da organización da “I Festa de exaltación do Kiwi Galego” vén de cualificar de “rotundo éxito” esta actividade celebrada na fin de semana.

Segundo estimacións da Policía Municipal, pasaron pola Festa máis de 10.000 persoas, superando as expectativas máis optimistas que se fixeran dende a Concellería e dende as entidades colaboradoras. Consumíronse preto de 1.000 quilos de kiwi, entre produtos elaborados e consumicións en fresco.

A Concellería de Cultura anunciou a elaboración dunha publicación con todas as receitas presentadas ao Concurso de Kiwi, promovendo tamén, entre as sobremesas de doada comercialización, como poden ser as Kiwitas (almendrados de kiwi), unha marca de “Feiro en Tomiño”, que permita potenciar a gastronomía local.

Jesús Castiñeira destaca “a ilusión das entidades e asociacións que participaron nos stands da Festa” indicando que moitas están xa pensando na edición do próximo ano.

O éxito acadado garante, segundo Castiñeira, a continuidade e permanencia da Festa como algo singular e independente.

Martes, 27 de maio de 2008

Teatro e tenis ofertados polas concellarías de Cultura e Deportes

Dende a Concellería de Cultura do concello de Tomiño informan que o vindeiro mércores, 28 de maio, ás 17.30h, terá lugar no Auditorio de Goián, a representación "O libro Máxico", da compañía Migallas Teatro. Unha obra cómica de teatro infantil onde o argumento principal convida aos máis cativos a vivir grandes aventuras lendo nos libros. Ademáis trátanse temas como a discrimincación, o exceso de autoridade, as relacións entre pais e fillos, o compañerismo e a importancia da imaxinación.

Por outra banda, dende a Concellería de Deportes organízase un Curso de Tenis, para participantes de 7 a 18 anos. Para as inscricións, que rematan o 31 de maio, e demais información os interesados dirixiranse ao departamento de Cultura, na rúa Colón s/n ou chamando ao teléfono 986 622 988.

Cea Baile benéfica a prol do Pobo Saharauí en Tomiño

Este sábado, ás 21.30h, terá lugar no Pavillón Municipal de Tomiño unha Cea Benéfica a prol do Pobo Saharauí organizada pola Asociación de Solidariedade Galega co pobo Saharauí.

O prezo para os adultos é de 16€ e para os menores de 10 anos 8€. Os tickets están á venda en Ferretería Bouzada, Confecciones Isabel, Floristería Trébol, Bar Nuevo de Piñeiro e Bar Avelleira de Amorín, ou no teléfono 699 097 009.

Os cartos que se recaden son para sufragar os gastos das viaxes dos nenos que este verán virán á comarca.

Actividades da OMIX de Tomiño

A Concellaría de Mocidade de Tomiño vai impartir hoxe, martes, e o xoves un Curso de Técnicas de Busca de Emprego cuxo obxectivo é axudar aos participantes a elaborar o seu propio C.V. e diferentes modelos de cartas de presentación. Ademais falarase de cómo comportarse nunha entrevista de traballo. Terá lugar en horario de mañá.

Por outra parte mañá comeza o Curso de iniciación á Escultura que impartirá Nando Álvarez. Terá lugar os martes e mércores de 19 a 22h até o 25 de xuño na escola obradoiro de Goián.

Amais até este venres está aberto o prazo de entrega de traballos para o 1º Certame de recolla de tradición oral. O seu obxectivo é que os mozos e mozas se relacionen interxeracionalmente cos veciños/as avós/oas para investigar e tomar nota sobre lendas, contos, refráns, adiviñas... do concello. O obxectivo é recuperar a nosa tradición, e coa traballos recollidos elaborarase un libro que recolla os nomes dos participantes.

Finalmente dende a Concellería de Mocidade avanzan os cursos previstos para o mes de xuño:

- Curso de masaxe (probablemente será impartido os sábados pola mañá)

- Paintball en Goián (un sábado de tarde a mediados de xuño)

- Curso de Deseño Gráfico por Ordenador (dous días á semana en horario de tarde)

As persoas interesadas nalgunha destas actividades débense inscribir na OMIX de Tomiño no Campo da Feira ou no teléfono 986 62 33 04.

Premios da I Festa Exaltación do Kiwi en Tomiño

Esta fin de semana celebrouse con éxito en Tomiño a I Festa Exaltación do Kiwi en Tomiño.

O domingo á tarde tivo lugar a entrega de premios distinguíndose á restauradora tomiñesa Toñi Vicente co Kiwi de Ouro de Honra polo “seu constante labor de embaixadora da gastronomía galega e do Baixo Miño”.

Mentres o Kiwi de Ouro foi outorgado a Antonio Estévez Garrido pola súa traxectoria profesional e persoal de máis de 25 anos na promoción do cultivo deste froito.

O premio á Mellor Caseta foi para a Asociaçao de Agricultores de Monçao, e ao Mellor Stand á Asociación de Veciños de Pinzás.

En canto ao concurso de sobremesas a receita de Tarta de Kiwi de Raquel Casaleiro Gavín de Pedra do Couto de Tomiño levouse o primeiro premio. O segundo premio foi para Ana Belén Iglesias Trigo de Vilameán pola Tarta de Tres Chocolates ao kiwi, e o terceiro premio correspondeu á Xose Carlos Farina Pousa de Vigo pola Tarta de Mirabeis ao oruxo con xelatina de kiwi do Rosal, salsa de frambuesas e iogurt grego.

Sábado, 24 de maio de 2008

A conselleira Ánxela Bugallo anuncia a construción dunha piscina climatizada en Tomiño

A conselleira de Cultura e Deporte, Ánxela Bugallo, anunciou onte a construción dunha piscina cuberta e climatizada no concello de Tomiño, durante unha visita oficial realizada a este municipio pontevedrés.

A conselleira, acompañada pola directora xeral para o Deporte, Marta Souto, foi recibida na casa consistorial de Tomiño por unha delegación do goberno municipal, coa alcaldesa Sandra González, ao fronte e o concelleiro de deportes Fernando Álvarez. Nesa reunión falouse sobre temas de cultura e deporte municipal e ao seu remate tivo lugar unha rolda de prensa, na que a conselleira anunciou a concesión deste importante proxecto para Tomiño.

A piscina irá construída nunha parcela situada preto dun instituto e dun campo de fútbol, co obxectivo de crear no lugar unha área deportiva estratéxica, con posibilidades de seguir medrando con novas instalacións. Ademais esta piscina dará servizo tanto ao concello de Tomiño, como aos municipios limítrofes, sobre todo porque non hai outra piscina destas características na comarca.

A piscina terá un orzamento aproximado de 3 millóns de euros e na súa construción a Dirección Xeral para o Deporte contará coa colaboración económica do concello, quen tamén cederá os terreos. A previsión é que o proxecto estea finalizado durante o verán, a licitación da obra teña lugar no outono do presente ano e as obras comecen antes de finais de ano. Os espazos da piscina están divididos en zona de acceso, área do vaso, vestiarios, ximnasio e unha área de servizo.

Trala rolda de prensa, a comitiva desprazouse ata a parcela onde estará ubicada a piscina de Tomiño, para coñecer in situ o terreo e as posibilidades de crecemento desta área deportiva.

Venres 23 de maio de 2008

Cursos de búsqueda de emprego e iniciación á escultura para mozos e mozas de Tomiño

A Concellaría de Mocidade do Concello de Tomiño, oferta para este mes de maio os seguintes cursos:

1º Certame de Recolla de Tradíción Oral. Trátase de que todos os mozos e mozas se relacionen interxeracionalmente cos veciños avós para investigar e tomar nota sobre lendas, contos, refráns, adiviñas... do concello. O obxectivo é recuperar a tradición. Elaborarase a posteriori un libro que recolla os nomes dos participantes. Prazo de entrega dos traballos: ata o 30 de maio.

Curso de Técnicas de Búsqueda de Emprego: Trátase de axudar aos participantes a elaborar o seu propio C.V. e diferentes modelos de cartas de presentación. Ademais falarase de como comportarse nunha entrevista de traballo. Martes 27 de maio e xoves 29 de maio en horario de mañá.

Curso de Iniciación á Escultura impartido por Nando Álvarez. Comeza o 27 de maio e remata o 25 de xuño (martes e mércores de 19 a 22 horas). Será impartido na escola obradoiro de Goián.

A Concellaría de Mocidade tamén informa que xa está aberto o prazo de inscrición para os cursos de xullo:

. Curso de masaxe (probablemente será impartido os sábados pola mañá)

. Paintball en Goián (un sábado de tarde a mediados de xuño)

. Curso de Deseño Gráfico por Ordenador (dous días á semana en horario de tarde)

Inscricións na OMIX. Tel./Fax 986 623 304.

I Festa de exaltación do kiwi galego Tomiño, 24 e 25 de maio de 2008

A Concellaría de Cultura, Educación e Participación Veciñal do concello de Tomiño, informa que coa participación de 15 empresas do Baixo Miño e máis de 20 asociacións relacionadas coa cultura da nosa zona, celebrarase a I Festa de exaltación do kiwi Galego en Tomiño, na praza do Seixo, os vindeiros 24 e 25 de maio.

Nesta festa preséntase tanto a profesionais coma ó público en xeral, unha actividade que proporciona un importante desenvolvemento económico na nosa comarca, en especial, no concello de Tomiño, sendo unha importante fonte de emprego.

No acto inaugural, que dará comezo ás 12.00h., agárdase a asistencia dun representante da Consellería de Medio Rural, así coma a Presidenta da Asociación Profesional de Kiwicultores de Galicia e a alcaldesa de Tomiño, entre outras autoridades.

Tamén se suman á Festa do Kiwi en Tomiño os kiwicultores de Portugal, contando coa presenza da súa presidenta.

Durante os dous días de festa, contarase con diversas actividades coma obradoiros para os máis cativos, actuacións de grupos folclóricos, animación de rúa, concursos de debuxo e sobremesas, sorteos, agasallos para os cativos, degustacións gratuítas de kiwi, exposicións fotográficas e de obxectos antigos e tamén xornadas técnicas sobre o kiwi e visitas a unha plantación deste froito.

Dende a Concellaría de Cultura, Educación e Participación Veciñal quérese facer especial mención ó domingo, día 25, xa que ás 17.00h. farase entrega dos premios e distincións da festa na carpa da praza do Seixo. As distincións e premios outorgados serán os seguintes:

Kiwi de Ouro: que se outorgará a D. Antonio Estévez Garrido, pola súa traxectoria persoal e profesional na promoción do cultivo deste froito.

Kiwi de Ouro: que se outorgará a Dna. Toñi Vicente, pola seu constante labor de embaixadora da gastronomía galega e do Baixo Miño.

Premio á Mellor Caseta

Premio ao Mellor Stand

Premios do Concurso de Sobremesas

Premios do Concurso de Debuxos

(Ver triptico)

A Conselleira de Cultura e Deporte Ánxela Bugallo visita hoxe os terreos da piscina

A Conselleira de Cultura e Deporte, Ánxela Bugallo, visita hoxe o concello de Tomiño acompañada pola directora xeral para o Deporte, Marta Souto, e pola delegada da Consellería, María Xesús López Escudeiro.

Na visita, prevista para ás 17.00 horas, as mandatarias, acompañadas pola alcaldesa de Tomiño, Sandra González, e o concelleiro de Deportes Fernando Álvarez, percorrerán os terreos da futura piscina municipal e, posteriormente, celebrarán unha reunión para debater temas e proxectos das áreas municipais de cultura e deporte.

A Visita da Conselleira xurde polo interese amosado polo goberno local de Tomiño, para a construcción dunha piscina municipal que incremente as posibilidades de ocio e hábitos saudables entre os veciños da localidade.

Xoves, 22 de maio de 2008

A Conselleira de Cultura e Deporte Ánxela Bugallo visita mañá os terreos da piscina

A Conselleira de Cultura e Deporte, Ánxela Bugallo, visita mañá o concello de Tomiño acompañada pola directora xeral para o Deporte, Marta Souto, e pola delegada da Consellería, María Xesús López Escudeiro.

O concello de Tomiño pon en práctica un programa experimental para a recolocación dos ex-traballadores de Marbar

O Concello de Tomiño convoca a contratación de dous técnicos en orientación e inserción socio laboral para o programa experimental de recolocación dos ex-traballadores de Marbar e Outros.

Este programa obedece ao compromiso que o concello adquiriu cos traballadores afectados polo peche da empresa Marbar. Segundo a alcaldesa, Sandra González, “estamos a dar cumprimento aos compromisos coas familias e cos afectados para buscar unha salida laboral a aqueles traballadores que aínda non teñen solucinada a situación laboral”.

Estes dous orientadores estarían contratados a tempo completo e financiados pola Consellería de Traballo. A principal función sería a creación de itinerarios individualizados e integrais de inserción para ditos ex-traballadores.

Ao posto poden aspirar os licenciados en Psicoloxía, Pedagoxía, Psicopedagoxía, Socioloxía, Educación Social, Traballo Social e Diplomados en Relacións Laborais.

Os interesados poden dirixirse á secretaría do concello de Tomiño. O prazo límite para a presentación da documentación remata o vindeiro venres, 23 de maio. As bases facilitaranse por correo eléctronico a quen o solicite no teléfono 986 622 001.

Mércores, 21 de maio de 2008

Día grande en Figueiró có motivo do “Día das Letras Galegas”

O pasado sábado, Día das Letras Galegas, coa presenza de numeroso público, tivo lugar na Praza do Telleiro de Figueiró a exposición e entrega de premios do 3º Concurso de redación e debuxo para escolares, organizado pola Asociación de Veciños Fonte dos Carreiros. A opinión expresada polas persoas asistentes, resaltaba o bo nivel dos traballos expostos, xa que correspondían a nenos con idade non superior aos 12 anos. O acto de entrega de premios comenzou cunhas palabras do presidente da Asociación, animando a todos a respectar a língua galega e agradecendo ao xurado, mestres e patrocinadores, a súa colaboración. A continuación, unha nena leu uns poemas do escritor homenaxeado este ano 2008 (Xosé María Alvarez Blázquez). O momento máis esperado e emotivo da xornada, chegou coa entrega dos agasallos aos nenos gañadores; as súas caras expresaban satisfación e ledicia polos premios conqueridos, algo que debería servir de estímulo no seu futuro escolar. Tódolos nenos presentes no acto recibiron un agasallo conmemorativo. Neste concurso participaron os alumnos matriculados no CEIP Antonio Fernández, de Goián, e na Aula de Educación Infantil, de Figueiró.

Para remata-lo evento, e organizado polo Centro Recreativo e Cultural de Figueiró co patrocinio da Concellería de Cultura, Educación e Participación Veciñal, actuou o grupo de Animación Infantil “Llilla e Paspallás” que colleitou grandes aplausos, tanto dos nenos como dos maiores.

Sábado, 17 de maio de 2008

O IES Tomiño conmemorará o Día das Letras Galegas e o Día Solar Europeo

Esta semana no IES Tomiño realizaranse varias actividades para conmemorar o Día das Letras Galegas, adicadas este ano a X. M. Álvarez Blázquez, defensor do patrimonio cultural-histórico e arqueolóxico de Galicia.

Durante esta semana e ata o día 23 de maio haberá unha exposición de reproduccións de material prehistórico, realizado polos alumnos de 1º da ESO, exposición que estará aberta ao público dentro do horario lectivo

Ademais estanse a organizar varias actividades sobor a enerxía solar, aproveitando a coincidencia do Día das Letras Galegas co I Día Solar Europeo. Este centro é un dos 50 centros de toda España que colabora coas actividades propostas pola Asociación Solar da Industria Térmica. Entre as actividades realizadas atópase unha chocolatada solidaria, que se desenvolve en tres fases:

1) Realización na aula dunha unidad didáctica (de propia creación) para traballar o tema da cociña solar.

2) unha exposición de inxenios solares (xoguetes, lanternas, cargadores de teléfono e pilas,...) acompañada de carteis explicativos.

3) cociña solidaria, cedida polo IES Escolas Proval, centro que dispón dunha aula de enerxías renovables.

Venres, 16 de maio de 2008

Tomiño pon en marcha unha campaña de reciclaxe de CD’s e DVD’s dirixida especialmente á mocidade

O Concello de Tomiño, a través da Concellaría de Medio Ambiente que dirixe Santiago Vergara, pon en marcha unha iniciativa pioneira na comarca do Baixo Miño coa recollida e reciclaxe de CD’s e DVD’s. Trátase de levar adiante unha campaña co fin de promover a reciclaxe partindo da recuperación de obxectos de uso habitual entre a xuventude.

A campaña comezará coa instalación de dous colectores de CD’s e DVD’s que se instalarán no IES de Tomiño e na sala de ordenadores municipal, no Campo da Feira.

Para garantir a confidencialidade dos datos gravados nos discos, colocarase unha destrutora que poderá utlizar o usuario que o desexe e que impedirá a lectura de calquera información que puideran conter os CD’s ou DVD’s.

A Concellería de Medio Ambiente asinou un contrato coa empresa Sarbide para incorporase ao proxecto Cederika que comezou no País Vasco, para logo implantarse en noutras Autonomías. Cun custe económico simbólico para o concello, este novo servizo permitirá recoller e reciclar un produto que aínda que non é tóxico, é considerado un residuo inerte, que dana o medio ambiente polo desaproveitamento da súa materia prima, xa que esta é reciclable practicamente na súa totalidade.

Por outra banda, a Concellaría de Medio Ambiente informa que xa está funcionando, de xeito experimental, o servizo de recollida selectiva de plásticos de invernadoiros, tanto ríxido (macetas, etc.) como flexible (cubertas). Foron colocados dous colectores específicos para estes residuos e estase valorando a futura ubicación doutros así como as súas dimensións para dar o mellor servizo aos productores de planta

A concellería invita a tódolos propietarios de invernadoiros a informarse no Concello, ou chamando ao teléfono 986 62 20 03.

Xoves, 15 de maio de 2008

O colexio Pedro Caselles de Tomiño celebra a súa Primavera Cultural coa participación de cinco escultores da localidade

Continuando a liña dos cursos anteriores o CEP Pedro Caselles Beltrán (Tomiño) celebra a súa Primavera Cultural como parte da conmemoración do Día das Letras Galegas.

Os actos previstos terán lugar durante a semana do luns, 19, ao venres, 23 de maio, e contan coa colaboración da Concellaría de Cultura, Educación e Participación Veciñal.

As actividades foron presentadas onte a mañá nunha rolda de prensa que tivo lugar no CEP Pedro Cáselles Beltrán, coa presencia do subdirector xeral de Centros da Consellería de Educación, Carlos Encisa; o director do CEP Pedro Caselles Beltrán, Fernando Garrido, e o concelleiro de Cultura, Educación e Participación Veciñal do Concello de Tomiño, Jesús Castiñeira. Tamén estiveron presentes catro dos artistas participantes nas actividades: os escultores Xuxo Vázquez, Magín Pícallo, Nando Álvarez e a artista en fundición Cuqui Piñeiro.

O director do centro educativo, Fernando Garrido, presentou as actividades, entre as que destacou o Simposio de escultura a cargo dos escultores Antúnez Pousa, Magín Picallo, Nando Álvarez e Xuxo Vázquez (esculpirán obras en pedra que quedarán logo no colexio), e o Obradoiro de fundición impartido por Cuqui Piñeiro, para os nenos/as do centro durante a mañá do luns 19, e no que se realizarán pequenas esculturas fundidas en chumbo.

O concelleiro de Cultura, Educación e Participación Veciñal do Concello de Tomiño, Jesús Castiñeira, pola súa banda, felicitou aos organizadores e reiterou o apio do Concello, resaltando a calidade dos artistas participantes. “En Tomiño estamos vivindo nestes anos unha Idade de Ouro na arte, e temos os mellores e máis representativos artistas”, comentou.

Carlos Encisa, subdirector xeral de Centros da Consellaría de Educación, agradeceu o esforzo do profesorado e equipo directivo do centro pola iniciativa, a que “dá un valor engadido á educación dos nosos fillos e amosa que os centros da zona son capaces de estar á cabeza de proxectos pioneiros no ámbito da cultura e da educación”.

Pola súa parte, o escultor Xuxo Vázquez, salientou o feito de completar o proceso educativo cun tipo de formación “que por desgracia é minoritario, xa que xeralmente, se potencian disciplinas máis pragmáticas”. O artista explicou que o que se pretende coa actividade é “abrir unha porta á creatividade e á imaxinación aos máis pequenos”.

Nando Álvarez engadiu que como escultores, “gústanos moito a idea de facer esta actividade nun colexio, e sobre todo, no meu caso, que fun alumno deste centro”.

Cuqui Piñeiro salientou que no obradoiro de fundición que impartirá o vindeiro luns, “os verdadeiros protagonistas serán os nenos, que realizarán todo o proceso como se estivesen nunha fundición de verdade”. Neste senso, explicou que se farán moldes de cera e logo se pasarán a chumbo, de maneira que os rapaces visualicen todo o traballo.

Completarán os actos da Primavera Cultural dúas exposicións:

A Aula da Natureza: ubicada no 2º andar do edificio escolar. Nesta exposición poderase atopar información xeral sobre plantas e animais, diversos terrarios, gaiolas, acuarios e outros receptáculos con insectos, réptiles, anfibios, aves e mamíferos.

A exposición Arte na Escola: onde se poderán apreciar as pequesculturas realizadas polos alumnos.

Estas actividades están dirixidas ao alumnado de Primaria do CEP Pedro Caselles Beltrán, así como aos dos demais centros educativos do concello, que realizarán visitas previamente organizadas, dentro do horario lectivo. Así mesmo, o centro permanecerá aberto para visitas do público en xeral, fóra do horario escolar (luns, martes e mércores a partir das 17.30 h, e xoves e venres a partir das 16.30 h).

O acto de Clausura terá lugar o luns 26 de maio.

O concello de Tomiño convoca unha praza de normalizador lingüístico coincidindo coas letras galegas

Coincidindo coa celebración do Día das Letras Galegas, o Departamento de Política Lingüística do concello de Tomiño, convoca unha praza de Técnico Superior de Normalización Lingüística, co obxecto de que se ocupe de supervisar o uso do galego tanto nos escritos administrativos, como en actividades de dinamización do uso do idioma. A alcaldesa de Tomiño e responsable do citado departamento, Sandra González Álvarez, entende que o mellor xeito de homenaxear e respectar á lingua, é con actos concretos como este. “Esto é exemplo do compromiso firme e decidido deste goberno co noso idioma, xa que o consideramos parte fundamental da nosa identidade”, explicou a alcaldesa.

Trátase dunha praza temporal, a primeira no seu tipo no concello, aínda que a intención do Departamento de Política Lingüística é que se poda consolidar de cara ao futuro.

As bases poden consultarse na Secretaría do Concello, e o prazo para presentar a documentación remata o día 30 de maio.

Tomiño celebra as Letras Galegas cunha feira do libro, obradoiros de animación á lectura, marcapáxinas e xogos

O vindeiro sábado, 17 de maio, Día das Letras Galegas, celebrarase en Tomiño a Feira do Libro coa participación das librerías da vila. Os volumes poranse á venda cun 10% de desconto, na céntrica Praza do Seixo, entre as 10 e as 14 horas e onde non faltarán publicacións da vida e obra de Xosé María Álvarez Blázquez.

Ás 11 da mañá actuará a Escola de Danzas e Gaitas Virxe do Alivio, e a partir das 12.30, a Agrupación Musical de Goián ofrecerá un concerto.

Pola súa banda, a Oficina Municipal de Información Xuvenil, organiza entre as 12 e as 14 horas, ese mesmo día, obradoiros de elaboración de marcapáxinas, animación á lectura en galego e xogos.

A estas actividades súmanselles as organizadas en distintas parroquias por asociacións veciñais e culturais en colaboración coa Concellaría de Cultura, Educación e Participación Veciñal.

O concelleiro, Jesús Castiñeira, anima a todos os veciños e veciñas a sumarse a esta celebración “por ser un dos días máis importantes para a nosa Cultura pero tamén pola figura do homenaxado, un baixo miñoto, que se formou como poeta, arqueólogo, historiador moi apegado a esta Comarca, entre Tui e a Guarda. Un traballador, un poeta, un home comprometido coa súa terra”.

Mércores, 14 de maio de 2008

O concello de Tomiño pon un autobús gratuíto para a manifestación do domingo, día 18, en Santiago

O Concello de Tomiño porá un autobús de balde para as persoas que desexen participar na manifestación a prol da Lingua Galega, organizada pola Mesa pola Normalización Lingüística, o vindeiro domingo 18 de maio en Santiago de Compostela.

O autobús sairá da Praza do Seixo ás 9.30 horas. A manifestación “Polo dereito a vivirmos en Galego”, sairá ás 12.00 do mediodía da Alameda e rematará na Praza da Quíntana, onde se dará lectura ao manifesto. As persoas interesadas en asistir á manifestación, poden apuntarse chamando aos teléfonos 986 62 33 04 ou 986 62 20 03.

Espectáculo de Animación Infantil “Llilla E Paspallás ” em Figueiró co gallo do Dia das Letras Galegas

A Xunta Directiva do Centro Recreativo e Cultural de Figueiró comunica que o vindeiro sábado, día 17 de maio (Día das Letras Galegas) ás 18.3º horas, terá lugar na Praza do Telleiro (en caso de choiva no Salón de Actos do Centro), a actuación do Espectáculo de Animación Infantil “Llilla E Paspallás ”.

Esta actuación está patrocinada pola Concellalía de Cultura, Educación e Participación Veciñal do Concello de Tomiño.

Concurso de redacción organizado por Fonte dos Carreiros

A Asociación de Veciños Fonte dos Carreiros de Figueiró organiza, co gallo da celebración do Día das Letras Galegas, o 3º Concurso de redación e debuxo para escolares. Neste concurso participan tódolos alumnos matriculados/as no CEIP Antonio Fernández de Goian e na Aula de Educación Infantil de Figueiró.

Dende a Xunta Directiva desta Asociación engaden que o sábado, día 17 de maio, a partires das 12.30 horas, exporanse os debuxos e redacións na Praza do Telleiro de Figueiró.

Ás 17.30 horas terá lugar a entrega de premios.

Un xurado formado por mestres, artistas, periodista e concelleiro de cultura do Concello de Tomiño foi o encargado de decidir, entre os taballos presentados, ós gañadores das distintas categorías.

A organización expresa a sinceira gratitude á dirección e corpo docente do colexio de Goián e unitaria de Figueiró pois, din, sen a súa axuda este concurso non sería posible.

Tamén extenden o agradecemento á editorial Edicións Xerais de Galicia, Xunta de Galicia, Concello de Tomiño, Centro Cultural de Figueiró e a todos os membros do xurado.

Con este concurso, a Asociación desexa contribuír no fomento da difusión da cultura galega e promocionar a lectura en galego: “Un Libro, a túa mellor Compaña”.

Martes, 13 de maio de 2008

O conto audiovisual “O Principiño en Madagascar” represéntase mañá, mécores, no Auditorio de Goián

Dentro do Maio Cultural que organiza a Concellería de Cultura, Educación e Participación Veciñal do Concello de Tomiño, celébrase este mércores, día 14 de maio, a obra “O Principiño en Madagascar”. A función, en conmemoración das Letras Galegas, comezará ás cinco e media da tarde no auditorio municipal de Goián.

A obra está especialmente indicada para maiores de 5 anos. "O Principiño en Madagascar" é un conto audiovisual que narra a aventura do escalador Toni Arbonés na súa busca por Madagascar dun exemplar do libro de “El Principito”, de Saint Exúpery, escrito en lingua Malgache, a lingua falada nese país africano. Durante a súa viaxe, Toni irá descubrindo a cultura, as cores, a infancia, os valores, o sistema laboral, e demais características deste país africano, ofrecéndo un relato cheo de tenrura, emoción e imaxinación. É de resaltar a importancia da música, a imaxe e a cor do proxecto, e sobre todo, a presenza dun narrador-contacontos de excepción: o pequeno principiño, que irá introducindo os diferentes clips visuais, á vez que interaccionará co público infantil.

Os responsables deste orixinal traballo son Álvaro Sanz e Raquel Galavís. O primeiro é profesor titular da Universidade Ramón Llull e Elisava de Barcelona, así como coordinador de Máster en deseño gráfico en TV, na Universidade Pompeu Fabra. Como realizador, dirixiu máis de 40 videoclips recibindo premios dentro e fóra de España. Os seus documentais foron seleccionados en festivais internacionais e emitidos en varias televisións autonómicas.

Raquel Galavís é actriz e presentadora de televisión con ampla experiencia no sector audiovisual.

Sábado, 10 de maio de 2008

Do 19 ao 23 de maio o CEP Pedro Caselles Beltrán e o concello de Tomiño organizan a Primavera Cultural co gallo do Día das Letras Galegas

A Concellería de Cultura, Educación e Participación Veciñal do concello de Tomiño e a dirección do CEP Pedro Caselles Beltrán, de Tomiño, presentarán en rolda de prensa, o vindeiro mércores, día 14, os actos da Primavera Cultural organizada polo centro educativo coa colaboración do concello como parte da conmemoración do Día das Letras Galegas.

Na rolda de prensa, que terá lugar ás 13 horas no propio colexio, daranse a coñecer as actividades e obradoiros que desenvolverán, durante a semana do 19 ao 23 de maio, cinco escultores da zona coa participación do alumnado.

Na convocatoria estarán presentes o subdirector xeral de Centros da Consellería de Educación, Carlos Encisa; o director do CEP Pedro Caselles Beltrán, Fernando Garrido Figueras, o concelleiro de Cultura, Educación e Participación Veciñal do concello de Tomiño, Jesús Castiñeira Diz, e algúns dos artistas participantes nas actividades.

Estás celebra a XIII Festa da Empanada

Estás celebrará mañá, domingo, a XIII Festa da Empanada que dará comezo ás 10.00h. Ademais de distintas variedades de empanadas, poderán degustarse callos e viños.

O tiket ten un prezo de 15 euros para unha consumición de churrasco, empanada, bebida, rosca e café.

A XIII Festa da Empanada está organizada pola Comisión de Festas Virxe Peregrina, coa colaboración do Centro Social de Estás, o concello de Tomiño e a Concellaría de Cultura, Educación e Participación Veciñal.

Venres, 9 de maio de 2008

PSOE e BNG néganse a apoiar a creación dunha indicación xeográfica protexida para o kiwi de Galicia, segundo manifesta o PP

Os deputados dos grupos socialista e do BNG rexeitaron onte a tarde, na Comisión de Agricultura do Parlamento, unha proposición non de lei na que o deputado popular César Pérez Ares reclamaba unha indicación xeográfica protexida para o kiwi galego. Das 500 hectáreas dedicadas actualmente ao cultivo do kiwi, a comarca do Baixo Miño concentra 350 hectáreas.

O deputado popular acudiu á Comisión de Agricultura do Parlamento cun lote de kiwi do Baixo Miño, que distribuíu entre deputados e xornalistas para que puidesen comprobar, en primeira persoa, as virtudes dunha froita que reúne numerosas propiedades nutricionais, entre as que destacou a elevada achega de vitaminas. Para Pérez Ares, o kiwi pode considerarse a “aspirina natural galega”, dadas as numerosas propiedades que posúe.

Pérez Ares considera contraditoria a postura mantida na Cámara autonómica por socialistas e nacionalistas, que mesmo chegaron a recoñecer a relevancia da produción e a calidade do kiwi galego. Ante a negativa de PSOE e BNG a apoiar a proposta defendida, Pérez Ares anuncia que en datas próximas formulará unha nova iniciativa para demandar que o kiwi galego sexa recoñecido cunha marca de calidade, a través do Instituto Galego de Calidade, ao abeiro do Lei de Promoción e Defensa da Calidade Alimentaria Galega.

O deputado popular considera que a actitude mantida polos socios do bipartito constitúe un duro golpe para os produtores de kiwi de Galicia, que o pasado outono perderon arredor do 70% da colleita anual por unha xeadas temperás, a escasos días da recolección da froita. Algúns produtores chegaron a perder o 100% da plantación.

O delegado de Medio Rural e a alcadesa de Tomiño reúnense esta fin de semana coa asociación de viveiristas novos “Mala Herba”

Mañá, sábado, a Asociación Mala Herba, recentemente formada en Tomiño, recibirá a visita do delegado de Medio Rural, Gonzalo Constenla, e da alcadesa de Tomiño, Sandra González.

Guiados polos membros da asociación, os mandatarios percorrerán algún dos viveiros relacionados coa mesma, continuando deste xeito o programa de visitas que veñen desenvolvendo polos viveiros vencellados os socios de Mala Herba.

A visita aproveitarase para presentar ao delegado e alcaldesa o programa de actividades previstas pola asociación ao longo deste ano.

A Asociación de Productores de Planta Ornamental Mala Herba, vén de constituírse como resultado da inquietude dun grupo de xente nova, pequenos agricultores e técnicos vinculados á producción de planta ornamental no Baixo Miño, que traballan para medrar como profesionais no sector, acadando un maior grado de coñecemento sobre a actividade que desenvolven. Deste xeito, asócianse para intercambiar experiencias, coñecementos e, ao mesmo tempo, estar presentes como colectivo ante a sociedade.

A idea foise forxando nunha viaxe a Pistoia (Italia), na que coincidiron os actuais fundadores da asociación, a alcaldesa de Tomiño e o delegado de Medio Rural. Esta viaxe puxo o punto e final a un curso de viveirismo levado a cabo na zona do Baixo Miño, organizado pola Oficina Agraria Comarcal. Durante a mesma, produciuse un achegamento do grupo que derivou no fortalecemento dos vínculos profesionais que ata o momento, nalgúns casos, eran inexistentes.

O nome apareceu a partires dunha brincadeira que se fixo na Galeria da Academia en Florencia durante a visita ó David de Miguel Anxo, onde no libro de visitas a dedicatoria que se deixou foi a seguinte: “A Asociación Mala Herba estivo aquí”, deste xeito institucionalizouse o nome antes que a asociación en sí.

A orixe do nome da Asociación Mala Herba parte dunha comparativa feita coas características positivas da mala herba, que ten un papel protagonista no sector, xa que está presente onde menos se agarda e en calqueira momento, tratándose dun elemento que consume moitos recursos nun viveiro para controlalo. Deste xeito, o principal obxetivo da asociación é estar presentes no sector e na sociedade como colectivo, e agrupados, facer fronte ás dificultades que poidan xurdir durante a súa andaina como profesionais.

Mércores, 7 de maio de 2008

O PPdeG promove unha iniciativa para que o kiwi galego dispoña dunha indicación xeográfica protexida

Conseguir que o kiwi galego dispoña dunha indicación xeográfica específica, como distintivo de calidade deste produto, é o obxectivo dunha proposición non de lei promovida polo PPdeG e que se debatirá este xoves no Parlamento de Galicia, xusto cando se cumpren 30 anos da introdución das primeiras prantacións desta froiteira de orixe chinesa.

A proposta foi elaborada polo deputado popular César Pérez Ares, que argumenta que nun mercado internacional aberto e competitivo, o sector agrario debe fomentar produtos agroalimentarios de calidade diferenciada. Esta –entende o deputado- constitúe a estratexia axeitada para atender as demandas dos consumidores, cada vez máis sensibilizados respecto a calidade, seguridade salubridade dos produtos alimentarios.

Nas tres décadas transcorridas desde a implantación do cultivo do kiwi en Galicia, as plantacións desta especie acadan xa unha superficie de arredor de 500 hectáreas a día de hoxe. O feito de que esta pranta requira climas temperados, explica que a maior parte das parcelas de cultivo esteas asentadas na comarca do Baixo Miño, que concentra arredor de 350 hectáreas.

Con todo, a maior concentración rexístrase no concello de Tomiño, onde ten a súa orixe o 45% da produción de kiwi de Galicia. A elevada produtividade das explotacións galegas dedicadas a esta froita, xunto coa calidade dos froitos e as súas excelentes cualidades nutricionais fan que o cultivo desta especie continúe espertando un crecente interese para o sector primario das comarcas galegas que presentan un clima suave.

Ademais de Pérez Ares, a proposición non de lei tamén está asinada polo voceiro de Medio Rural do Grupo Popular, Roberto Castro García.

A cita previa para a obtención do DNI en tomiño atenderá a 30 persoas ao mes

Lembramos que en Tomiño funciona o sistema de cita previa para a solicitud do DNque atenderá a 30 persoas por mes.

A Concellería de Seguridade do Concello de Tomiño foi a encargada de poñer en marcha este servizo de cita previa para a obtención do DNI con obxecto de organizar e regular o número de consultas para obter o documento nacional de identidade.

Os interesados deben chamar aos teléfonos 986 62 2001 / 03 para solicitar unha cita previa cos funcionarios da Policía Nacional dos equipos móbiles para a obtención do DNI, que unha vez ao mes, se desprazan ata Tomiño.

Martes, 6 de maio de 2008

Audivisual galego e porugués do 22 ao 27 de xullo en Goián e vila Nova de Cerveira

Do 22 ao 27 de xullo vai vai ter lugar unha festa de convivio entre o audiovisual galego e portugués. Un evento que acollerán as localidades de Vila Nova de Cerveira e Goián (Tomiño).

Esta festa do audiovisual galego e portugués está organizada pola asociación cultural Morraceira, a Câmara Municipal de Cerveira e o Concello de Tomiño. Unhas institucións que apostaron decididamente por unirse neste proxecto de enormes posibilidades culturais e sociais.

O Filminho ten como obxectivo principal promover o coñecemento do moito que une ás xentes que separa o Miño. Para iso recórrese ao audiovisual, testemuño sen igual de realidades. A esta necesidade responde a organización, xunto con Ponte nas Ondas, do certame audiovisual “Conta onde vives”. En segundo lugar o Filminho está chamado a ser o baluarte co que defender o audiovisual galego e portugués, propiciando producións invisíbeis, con mirada propia e de carácter “non reconciliado”, é decir, afastados da ortodoxia industrial.

A programación do Filminho estructúrase en dúas categorías: “Grande Premio” e o “Cinema Minhoto”. Na primeira poderán concorrer todo tipo de produción (duración e xénero) de Galicia e Portugal. Mentres, no Cinema Minhoto vai ser a sección anfitriona destinada a acoller todos os filmes realizados nas terras do Miño ou que teñan unha clara vocación transfronteiriza.

Ademáis das proxeccións o Filminho albergará un curso de verán da Universidade de Santiago de Compostela enfocado cara a mocidade. Unhas actividades complementarias de formación completadas cun Fórum de Criadores co que se pretende fomentar a realización de filmes no Miño.

O Filminho quere convidar a galegos e portugueses a combinar na raia este verán para disfrutar do seu audiovisual.

Sábado, 3 de maio de 2008

Tomiño contará con dous coordinadores de voluntarios para a prevención de incendios forestais

Tomiño contará cun dispositivo de vixilancia disuasoria do Voluntariado en Defensa do Monte Galego para evitar a aparición de incendios forestais a través da implicación activa da cidadanía.

A Dirección Xeral de Xuventude e Solidariedade en colaboración coa Concellería de Mocidade do concello de Tomiño, vén de poñer en marcha dito dispositivo, para o que destinará a Tomiño dous coordinadores que dirixirán aos voluntarios do Baixo Miño nas tarefas preventivas.

Os traballos comezarán nestas semanas e estenderanse ata o mes de setembro, garantindo que durante o verán, estación de máximo risco de lumes, un amplo número de efectivos realicen a vixilancia do monte.

Dende a Concellería de Mocidade do Concello de Tomiño, anímase a todas as persoas preocupadas polo coidado do medio ambiente e do monte galego, a apuntarse como voluntarios. Os interesados poden apuntarse chamando aos teléfonos: 900 400 800 e 981 57 76 37, ou ben, consultar as páxinas web www.voluntariadomontegalego.org; www.voluntariadogalego.org; ou www.xuventude.net

Tomiño pon en marcha o servizo de cita previa para a obtención do DNI

A Concellería de Seguridade do Concello de Tomiño vén de poñer en marcha o servizo de cita previa para a obtención do DNI. Con esta medida inténtase organizar e regular o número de consultas co fin de obter o documento nacional de identidade.

Os interesados deben chamar aos teléfonos 986 62 2001/03 para solicitar unha cita previa cos funcionarios da Policía Nacional dos equipos móbiles para a obtención do DNI, que unha vez ao mes, se desprazan ata Tomiño.

Estes equipos atenderán unha media de 30 persoas por mes, xestionando as solicitudes para a obtención do DNI, polo proceso antigo, é dicir, que non tramitarán o DNI electrónico.

Venres, 2 de maio de 2008

Festas na honra á Virxe da Milagrosa en Hospital

Dende hoxe e até o domingo celébranse festas na honra á Virxe da Milagrosa en Hospital, Tomiño. Hoxe a primeira verbena será amenizada por Abanico e Gran Parada e mañá correrá a cargo de Alkar e Paraíso. O domingo ás 12 haberá misa solemne acompañada pola Agrupación Musical de Goián. E a última verbena será amenizada por Samba e Nueva Generación.

Tiro ao prato na modalidade de percorrido de caza en Figueiró

No Campo de Tiro das Fonteiriñas en Figueiró, celébrase esta fin de semana un Campionato de Tiro ao prato na modalide de percorrido de caza organizado pola Comisión de Festas de San Campio de Lonxe.

Mañá, sábado, dende ás 9 desenvolveranse os adestramentos, e á mesma hora o domingo, dará comezo a tirada oficial.

Festa Gastronómica da Costela e Lamprea en Amorín

A parroquia tomiñesa de Amorín celebra este domingo a Festa Gastronómica da Costela e a Lamprea dende ás10 da mañá e até ás once da noite. Os asistentes poderán degustar costela a 7€ e lamprea a10€ con viño branco ou tinto. Todo amenizado polo dúo Vero e Fede. Este festexo está organizado pola Comisión de Festas Amigos das Carrozas de Amorín e colabora a Deputación de Pontevedra, Concello de Tomiño e Asociación de Pescadores do Miño.

Xoves, 1 de maio de 2008

Tomiño celebra a finais de mes a I Festa Exaltación do Kiwi Galego

O Concello de Tomiño vai celebrar a finais de mes, os días 24 e 25 de maio, a I Festa de Exaltación do Kiwi Galego. Reunirá a máis de 35 expositores, entre os que se atoparán os principais produtores e comercializadores da zona.

A I Festa de Exaltación do Kiwi Galego foi presentada o pasado mércores coa presenza do delegado provincial de Medio Rural, Gonzalo Constenla, o concelleiro de Cultura, Educación e Participación Veciñal, Jesús Castiñeira; a alcaldesa de Tomiño, Sandra González; a presidenta da Asociación de Kiwicultores de Galicia, Dolores Muñoz Sánchez-Roda; a presidenta de ADETO (Asociación de Comerciantes e Empresarios de Tomiño), Belén Alonso; e o Presidente da Federación de Asociacións de Veciños Terra Miño, Modesto Rouco.

A festa, cun nutrido programa de actos, é organizada pola concellería de Cultura, Educación e Participación Veciñal e a Asociación Profesional de Kiwicultores de Galicia, co patrocinio Consellería de Medio Rural e a colaboración de ADETO, Obra social de Caixa Galicia, e Kiwi Atlántico, S.A.

Jesús Castiñeira explicou, con respecto á mesma, que “sempre quixemos, dende un enfoque cultural e gastronómico, organizar unha festa de exaltación dun produto con peso específico no noso concello, e o kiwi, parécenos que reúne as mellores condicións ao ser Tomiño un dos principais produtores deste froito”.

Dende a concellería “queremos agradecer á Asociación de Kiwicultores de Galicia por apostar por nós e por esta festa, e á Asociación de Veciños de Sobrada pola cesión da súa idea, proposta e colaboración prestada, ao igual que a todos os demais colaborares e patrocinadores”.

Pola súa banda, o delegado de Medio Rural, Gonzalo Constenla, destacou a calidade do froito que se produce en Tomiño debido a unha terra e un clima únicos e tamén ao “caracter emprendedor dos seus agricultores”.

Tamén asegurou non ver esta festa do kiwi como un evento gastronómico máis, senón como unha proba “da innovación e modernización deste sector e deste Concello”. Constenla salientou a gran calidade dos kiwis producidos na comarca do Baixo Miño, e especialmente en Tomiño, “xa que pasan todos os controles, parámetros e condicións para ser uns dos mellores do mercado”.

A alcaldesa de Tomiño, pola súa parte, indicou que o propósito principal desta festa é a de pór en valor os produtos da zona, así como promocionar os recursos económicos do municipio de cara a unha maior produción e comercialización.

A I Festa de Exaltación do Kiwi Galego contará coa presenza de 35 postos ou casetas, entre os que estarán empresas produtoras e comercializadoras como Kiwi Atlántico ou Kiwi España.

O programa inclúe, ademais, catas e degustación de kiwi e doutros produtos novos como augardente e marmelada a base de kiwi. Haberá tamén xornadas técnicas, visitas guiadas ás plantacións, concursos de repostería, obradoiros de sobremesas, exposicións fotográficas e vinculadas á labranza, etc.

Kiwi Atlántico será a firma encargada de doar os kiwis que se consumirán durante a festa, que se calculan entre 500 e 1.000 quilos.

Outro obxectivo dos organizadores é conseguir, coa colaboración dos comerciantes e empresarios e a través dun concurso, unha receita inédita dunha sobremesa a base de kiwi, que permita ofertala nun futuro como “Sobremesa feita en Tomiño”.

(Concurso de sobremesas na Festa do kiwi)

Mocidade organiza un curso de búsqueda de emprego e un certame de recolla de tradicións orais

A Concellaría de Mocidade informa que xa está aberto o prazo de inscrición para participar nas seguintes actividades:

Curso de técnicas de búsqueda de emprego: días 20 e 22 de maio, de 9:30 a 12:30 hs. na Omix (Campo da Feira s/n)

I Certame de recolla de tradición oral no concello de Tomiño: recollida de refráns, contos, lendas, rimas... do noso municipio. Prazo de entrega: 30 de maio.

Curso de escultura+concurso: comezo a finais de maio, data e horario por confirmar.

Curso de malabares: 10 e 11 de maio. Sábado de 11 a 14 horas e de 16 a 19 horas, e domingo de 11 a 14 horas na Omix (campo da feira s/n)

Todos estes cursos son gratuítos. Os interesados poden facer a inscrición pasando pola OMIX, chamando por teléfono, enviando un fax ou por correo electrónico.

O partido popular solicita que o Seprona e a Consellería de Medio Ambiente inicien as dilixencias por un vertedoiro incontrolado

O Grupo municipal do Partido Popular de Tomiño solicitará ante o SEPRONA e a Consellería de Medio Ambiente da Xunta de Galicia que se inicien as dilixencias oportunas para determinar o grao de responsabilidade por parte do concello e moi especialmente do concelleiro de Medio Ambiente, Santiago Vergara, na existencia dun vertedoiro ilegal na zona da Carballa -preto do Instituto de Tomiño-, tal como evidencian as fotografías que acompañan a recente denuncia ante os medios de comunicación por parte dun veciño de Tomiño onde se pode apreciar a suciedade que impera neste lugar con vertidos de todo tipo.

O concello, din desde o PP, debe ser o garante de que a xestión dos residuos sólidos urbáns sexa levada a cabo sen prexudica-lo medio ambiente e, en particular, impedindo o abandono, os vertidos e, en xeral calquera depósito inadecuado dos residuos, tal como establece a Lei 10/1997 do 22 de Agosto.

Para o voceiro municipal do P.P., César Pérez, esta situación é consecuencia da desidia do concelleiro de Medio Ambiente que recorcorda que ten dedicación exclusiva polo que cabería esperar unha maior dilixencia no cumprimento da súa obligación, e é, engade, unha proba máis da parálise que afecta a este concello xa que os veciños do lugar levan denunciando reiteradamente que dende fai tempo se veñen realizando vertidos de todo tipo sen que por parte do concello se tomase ningunha medida tendente a correxir e evitar esta situación.

Este vertedoiro ilegal atópase moi preto de instalacións deportivas e de ensino; circunstancia que nada axuda a que os xoves que transitan polas proximidades acaden un grao de sensibilización e concienciación na preservación do medio ambiente que faga posible evitar estas actuacións totalmente rexeitables. Alcanzar esta sensibilidade no cuidado e protección do noso contorno é o principal obxectivo dos programas de formación ambiental que se veñen desenvolvendo tanto no ensino primario como no secundario.