|
|
MAIO |
Sábado, 31 de maio de 2008
A Radio Municipal de Tui celebra o seu XV Aniversario cun mes de actividades
A Radio Municipal de Tui vai celebrar o seu XV Aniversario cun programa de actividades a desenvolver ao longo do mes de xuño. A emisora municipal iniciou as súas emisións o 16 de abril de 1993, e dende entón tense consolidado coma un dos medios de comunicación de referencia na comarca. Durante estes quince anos máis de 150 persoas, a meirande parte deles colaboradores, fixeron posible tanto da RMT, coma da Televisión Municipal de Tui que realizou as súas emisións durante oito anos.
Precisamente un dos obxectivos deste aniversario é reunir a todos aqueles que aportaron o seu gran de area para facer posible tanto a Radio coma a Televisión, por este motivo o día 20 de xuño ás 21.00h, no Teatro Municipal, vaise desenvolver un acto aberto ao público en xeral no que se reunirá máis dun centenar de colaboradores. No mesmo contarase coa actuación do Cuarteto Caramuxo creado en Vigo en 1990, e proxectarase un vídeo con imaxes destes 15 anos.
O programa de actos comezará o próximo mércores día 4 de xuño, ás 20.30h, no Teatro Municipal de Tui, cunha conferencia a cargo da xornalista Ángeles Caso titulada “Las olvidadas. Una historia de mujeres creadoras”. Esta actividade desenvólvese grazas a colaboración entre Caixanova e o Concello de Tui.
Ángeles Caso fixo xornalismo escrito, radiofónico e televisivo, presentando os informativos da TVE. Traballou posteriormente en institucións coma a Fundación Príncipe de Asturias. Realiza tamén unha inxente produción literaria sendo finalista en 1994 do Premio Planeta con “El peso de las sombras” e en 2000 gañou o premio Fernando Lara de novela con “Un largo silencio”.
Na conferencia que ofrecerá o mércores en Tui abordará a vida dun grupo de mulleres que escaparon ás normas e trataron de desenvolver a intelixencia e o talento. A entrada será libre até completar o aforo.
O programa de actos completarase cunha Xornada de Portas Abertas o venres 13 de xuño. Nesa data aquel que o desexe poderá visitar as instalacións da Radio Municipal de 9 a 14 e de 16 a 20h. E por último o venres 27 de xuño a revista radiofónica “Día a Día” farase en directo dende o Paseo da Corredoira.
Amais destas actividades concretas, ao longo de todo o mes na Radio Municipal de Tui iranse emitindo fragmentos de entrevistas e programas que conforman o arquivo sonoro destes quince anos.
Dende a Radio Municipal de Tui quérese facer unha invitación especial aos oíntes a participar en todos estes actos, xa que sen eles tampouco tería sido posible ter cumprido estes 15 anos.
Todo este programa de actos era presentado esta mañá nos estudos por José Prada, concelleiro de Medios de Comunicación, Moisés Rodríguez, Concelleiro de Cultura, e Jose Font, director da RMT.
Moisés Rodríguez manifestou que “é importante para o Concello ter unha emisora municipal, que se consolidou coma unha radio punteira, de feito chegou aos 12 mil oíntes que é unha cifra histórica para unha radio municipal”. Ao tempo agradeceu a labor tanto do persoal contratado coma dos colaboradores, xa que estes 15 anos son mérito de todos, dicía.
Jose Prada pola súa banda destacaba que “este é un día importante para Tui porque ter unha radio coma ésta é un prestixio.
Jose Font, director da RMT manifestou pola súa banda que o gran éxito desta radio é o seu capital humano con máis de 200 colaboradores ao longo destes quince anos.
Tamén quixo amosar o seu agradecemento tanto a Jose Prada coma a Moisés Rodríguez polo seu interese nesta celebración e por facer doado o seu traballo
Venres, 30 de maio de 2008
Contratación laboral temporal dun auxiliar administrativo
O concello de Tui convoca proceso selectivo para a contratación laboral temporal dun auxiliar administrativo por un periodo máximo de tres meses.
Os interesados poderán presentar as súas solicitudes no Rexistro Xeral do concello, no prazo determinado nas bases da convocatoria contados desde o 30 de maio. Para máis información poden dirixirse ás oficinas do concello.
Ciclo de concertos “Fin de Curso” do Conservatorio
O Conservatorio Profesional de Música de Tui organiza un ciclo de concertos “Fin de Carreira” que se van celebrar na sala de audicións do centro dende hoxe, venres, até o xoves, día 5 ás 20.45h.
O primeiro concerto, hoxe estará a cargo de Vanesa González Nunes, ao clarinete, e Rasa Jakukyte, ao piano.
O próximo luns actuará José Paredes Gomez ao piano, e o martes Uxía Rodríguez Maneiro á viola e Pablo Alonso Martínez ao saxofón.
O mércores o concerto correrá a cargo de Noelia Rodríguez Martínez á guitarra e de Adriana Carrera Carrera ao clarinete.
E por último o xoves día 5 o concerto será ofrecido por Adela González Fernández ao piano e Noelia Carrera Carrera ao clarinete.
Vagalume celebra o Día Mundial do Medio Ambiente cunha rota guiada de sendeirismo e piragüísmo
A Asociación de Monitores de Tempo libre “Vagalume” de Tui vai celebrar o Día Mundial do Medio Ambiente, que ten lugar o día 5 de xuño, cunha Rota Guiada de Sendeirismo e Piragüísmo que se vai desenvolver o domingo 8 de xuño.
Nestas actividades os participantes realizarán o sendeiro de Tui a Caldelas e a baixada en piragua polo río Miño de Caldelas a Tui.
A saída será ás 10.00 horas desde a praia da Mariña en Tui. A chegada está prevista, no mesmo punto, ao redor das 19.00 horas. Cada participante deberá levar a súa comida. A actividade ten un prezo de 12 euros.
As inscricións poden realizarse na Casa da Xuventude de Tui no teléfono 986.60.05.68 ou en Nauticalia no 986.60.32.87, ata o día 5 de xuño.
Dez padeeiros do Kaiak participan no Campionato de España por autonomías
Esta fin de semana dispútase en Castrelo de Miño, Ribadavia, o Campionato de España por Comunidades autónomas, onde o club Kaiak Tudense con dez piragüístas dun total de dezaseis, será o soporte do equipo autonómico de Galicia.
O grupo de piragíistas de Tui estará representado por catro kaiakistas, tres canoístas e tres damas.
En kaiak, os convocados son: Jovino González que competirá en k1 1000 metros e k2 500 metros co seu compañeiro de club, Diego Piña, mentres que Iván Alonso, Diego Piña e Roberto Rodríguez xunto ao padeeiro de Aldán Roberto Abal farán o k4 1000 metros.
No equipo de canoas, debutará coa selección galega José Luís Bouza que competirá en c1 1000 e 500 metros, para cubrir a baixa do campión olímpico David Cal, que despois do frouxo resultado do Campionato de Europa decidiu apurar a súa preparación de cara aos JJ.OO. Tamén en canoa pero na modalidade de C2 e sobre a distancia de 1000 metros, competirán os irmáns Costa Bouzada, David e Daniel.
En mulleres o Kaiak Tudense estará representado por Ana Varela e as júnior Silvia Vázquez e Leti Piña. As tres mozas do club de Tui, formarán o k4 xunto coa padeeira de Aldán Teresa Portela, mentres que Ana Varela e Silvia Vázquez serán as encargadas de facer o k2.
A presenza destes dez piragüístas do Kaiak Tudense no selección galega, vén demostrar o enorme potencial do equipo de Tui, e que a aposta decidida do club por este grupo de deportistas, que fóra de Jovino e Ana, son todos sub23 e ata júnior, deberían garantir a presenza destes deportistas no próximo ciclo olímpico.
Hoxe presentaranse os actos do XV Aniversario do Radio Municipal de Tui
Hoxe, ás 12 do mediodía, serán presentados en rolda de prensa os actos conmemorativos do XV Aniversario do Radio Municipal de Tui que se van desenvolver ao longo de todo o mes de xuño.
Comparecerán ante os medios de comunicación o concelleiro de Medios de Comunicación, José Prada Álvarez, o concelleiro de Cultura, Moisés Rodríguez, e o director da RMT, José A. Font Moldes.
A rolda de prensa terá lugar nos estudos da RMT, no primeiro andar da Área Panorámica.
Xoves, 29 de maio de 2008
Escola de Nais e Pais para o CRA de Tui hoxe xoves
A Sala Félix Rodríguez da Área Panorámica acollerá hoxe, xoves, ás 7 da tarde unha nova sesión da Escola de Nais e Pais, dirixida neste caso aos pais e nais do Colexio Rural Agrupado.
A psicóloga Betina Represas
abordará o tema “Establecemento de pautas, normas e límites: Cómo exercer
unha autoridade positiva”.
Os veciños piden unha solución ao Cruce das Olivas en Tui
Os veciños e veciñas das rúas afectadas polo cruce das Olivas solicitan que se regule o tráfico deste cruce, que non sexa marxinado nin penalizado, e piden que se estuden as solucións posibles, de carácter provisional ou permanente, para solucionar os problemas de perigosidade deste cruzamento.
Así o expoñen en nota de prensa onde sinalan da importancia deste cruce que comunica a Avenida da Concordia co vello camiño da Senra e a coa rúa Calzada, e dan conta dos diversos servizos que comunica tanto educativos coma de ocio e transporte.
Explican os veciños que “os problemas no cruce das Olivas se provocan a diario” engadindo que “este é un dos puntos máis conflitivos de tráfico en Tui” e que ante falta dunha regulación efectiva do tráfico, provoca accidentes e molestias.
Instan ao concello a que dea unha solución para rematar con este problema, sen aprazalo vinculándoo ao PXOM e sen dar respostas ambiguas. Conclúen indicando que é obriga do concello de Tui “examinar, estudar e poñer en práctica as medidas necesarias para solucionar este tema”.
Prazas no curso de Percusión Africana na Casa da Xuventude
A Casa da Xuventude comezou a impartir, o pasado sábado, un novo curso de percusión africana para o que hai prazas vacantes. Así o explicaba a directora deste Centro Xuvenil, Mónica Bugarín, na súa comparecencia semanal na sintonía da RMT. A segunda sesión será este sábado pola mañá.
Non é preciso ter coñecementos previos para participar no curso.
Mónica Bugarín continuou o repaso polos certames do Galiza Crea, cuxo prazo de presentación de traballos remata o 30 de xuño e daba conta das bases do certame de grafitti.
A Directora da Casa da Xuventude informaba, tamén, dos cursos intensivos de Monitores de Tempo Libre que se celebrarán no verán. Na casa teñen xa tres ofertas, un deles é o que imparte Fervenza en Santa María de Oia.
Toda esta información pódese ampliar na Casa da Xuventude de Tui, na rúa Sanz ou no teléfono 986.60.05.68.
O Pleno de Tui reclamará á Confederación que remate as obras do proxecto do Saneamento da Conca do Louro
A corporación municipal de Tui reúnese hoxe, ás 20.00h, en pleno de carácter ordinario con seis punto na orde do día.
Un dos asuntos a tratar será reclamar á Confederación Hidrográfica do Norte que realice a totalidade das obras contempladas no proxecto de Saneamento da Conca do río Louro.
A este pleno van tamén dúas solicitudes á Consellería de Política Territorial, unha para que conecte o Parque Empresarial de Areas coa futura Vía de Alta Capacidade Tui- A Guarda, e outra para que faga unha rotonda na estrada PO-404 que vai a Paramos e Baldráns coa pista de Areeiros.
Outros dos asuntos a tratar será a aprobación definitiva, se procede, da ordenanza reguladora das axudas á rehabilitación de edificios, vivendas e urbanización no ámbito da Área de Rehabilitación do Conxunto Histórico de Tui.
O proxecto SIGN II supuxo un investimento de 2 millóns de euros
Onte á mañá foi presentado no Teatro Municipal de Tui o proxecto SIGN II, Infraestrutura de Datos Espaciais para o territorio rural de Galiza – Norte de Portugal. Este é un proxecto que se desenvolveu no marco da iniciativa comunitaria Interreg III A España-Norte de Portugal, entre xaneiro de 2006 e xuño de 2008.
O equipo encargado do seu desenvolvemento estivo formado por dous socios galegos e cinco socios portugueses.
O obxectivo do proxecto é a creación dunha infraestrutura de datos espaciais quen de integrar información que poida ser empregada como apoio para a toma de decisións relacionadas coa xestións do mundo rural.
A zona de intervención do proxecto abrangue seis comarcas galegas, cun total de 40 concellos de Pontevedra e Ourense e 14 cámaras municipais de Portugal entre o Minho-Lima e o Cávado, cun total de 6.307 quilómetros de territorio.
A inauguración estivo a cargo do secretario xeral do departamento do Medio Rural, Alberte Souto Souto, xunto aos outros socios do proxecto. Destacaba na súa intervención que “Tui convértese hoxe en símbolo de confraternización galego-portuguesa”
Ao termo deste acto explicaba en que consiste este proxecto que continúa a tarefa feita no SIGN I, e busca crear un sistema de sistematización de información xeográfica para despois poder analizar o territorio e determinadas políticas económicas e sociais.
Engadía que os datos tratados teñen unha homoxeneización de información xeográfica baseada nas TIC’s e cunha utilidade moi ampla, xa que amais serve coma modelo que extrapolar a outras zonas.
Toda a información do proxecto está xa accesible na web www.proyectosign.org. O orzamento do proxecto ascende a 2.228.413€ cunha aportación do 75% do FEDER e das institucións do 25%.
Os outros socios destacaban que este proxecto permitirá coñecer mellor a rexión e valorizala. Ao tempo salientaban que é un exemplo óptimo porque xunta dúas zonas da Eurorrexión que hai que considerar dende o punto de vista agrícola, político e tamén de formación. E indicaban que foi pioneiro en borrar as barreiras que existían entre as dúas rexións.
O proxecto SIGN II, financiado pola iniciativa comunitaria Interreg III A, está liderado pola Sociedade para o Desenvolvemento Comarcal e conta coa participación da Universidade de Santiago de Compostela (USC). Complementan o proxecto os cinco socios portugueses que son o Instituto Politécnico de Viana do Castelo (IPVC), o Instituto para o Desenvolvemento Agrário da Região Norte (IDARN), a Associação Forestal de Portugal (FORESTIS), a Direcção Regional de Agricultura e Pescas do Norte (DRAPN) e a Comissão de Viticultura da Região dos Vinhos Verdes (CVRVV).
Recepción ao Kaiak Tudense polo Campionato de España de Maratón
Mañá xoves ás 19.00 horas no Centro Galego de Tecnificación de Pontevedra, terá lugar unha recepción oficial por parte da Conselleira de Cultura e Deporte, Anxela Bugallo, e da Directora Xeral de Deportes, Marta Souto, na que tamén estará presente o presidente da Federación Galega de Piragüísmo, Modesto Teijeiro Valledor.
O motivo da recepción é homenaxear ao Club Kaiak Tudense por terse proclamado Campión de España de Maratón, así como aos 13 piragüístas que obtiveron medalla no devandito campionato.
Foron 3 ouros: Joan Ardit e Oscar Carreira en k2 júnior, Diana Freiría e Leti Piña en k2 muller júnior e o k2 das mozas cadetes Valeria Romeu e Silvia Rodríguez.
3 pratas: Iván Alonso k1 senior, José Luís Bouza c1 senior e o C2 cadete de Luís Morais e Carlos Méndez
E 2 bronces : Carla Pérez en k1 muller cadete e o C2 senior dos irmáns Costa Bouzada, David e Daniel.
Mércores, 28 de maio de 2008
Conciertos Fin de Carrera del Conservatorio de Tui
El Conservatorio de Música de Tui comunica que la Sala de Audiciones de este centro acogerá el viernes, día 30, y de lunes a jueves (2, 3, 4 y 5 de junio), el ciclo de conciertos de fin de carrera de los alumnos que terminan el Grado Profesional.
La hora de comienzo de los concierto, que estan organizados por el ayuntmaiento de Tui a través de la Concejalía de Cultura, será a las 20.45 horas.
Acto público do BNG o venres, 30 de maio
O vindeiro venres, 30 de maio de 2008, ás 20.30 horas, na sala Félix Rodríguez (na traseira da Área panorámica), o Bloque Nacionalista Galego de Tui organiza un Acto público no que intervirán Laureano Alonso, voceiro do BNG de Tui; Olaia Fernández Davila, Deputada no Congreso, e Mª Xesús Lago Vilaboa, xecretaria xeral de Benestar Social da Vicepresidencia da Xunta de Galicia.
Martes, 27 de maio de 2008
Samuel Diz terceiro nun concurso de Guitarra en Roma
O guitarrista tudense Samuel Diz vén de recibir o 3º premio no XV Concorso Internazionale “Anemos”, celebrado en Roma os días 16 e 17 de maio. No mesmo participaron guitarristas de diferentes nacionalidades ata a idade de 30 anos. Recibiu o primeiro premio o guitarrista italiano Francesco Reale.
Este novo galardón serve de estímulo ao traballo realizado por Samuel Diz. Hai que destacar que nos últimos meses Samuel tamén foi premiado co 2º premio no XVII Concurso de guitarra per a joves “Francesc Tárrega” de Vilareal, en Castellón e co 1º premio no I Concurso Nacional de guitarra “Cincilia” (Albacete).
Samuel Diz Sierpes, naceu en Tui en 1986. Tras estudar no Conservatorio da súa cidade natal e no Conservatorio Superior de Música de Vigo, recibe consellos actualmente da concertista internacional Gaëlle Solal (Francia), no Conservatorio Superior de Música "Manuel Castelo", de Sevilla, cidade na que reside actualmente.
Conclusión da reunión de Medio Ambiente cos Concellos sobre a EDAR
A Consellería de Medio Ambiente e Desenvolvemento Sostible e os alcaldes dos concellos pontevedreses de Mos, Porriño, Tui e Salceda de Caselas constituirán unha mesa técnica co obxectivo de unificar criterios para conseguir a posta en marcha da EDAR de Guillarei no vindeiro outono. Este foi un dos acordos acadados na reunión que mantiveron o venres o conselleiro, Manuel Vázquez, o director xeral de Augas de Galicia, José Luis Romero, cos catro alcaldes, co fin de garantir a entrada en funcionamento da EDAR.
O conselleiro adiantou que no vindeiro mes de xuño constituirase unha mesa de traballo da que formarán parte o director xeral de Augas de Galicia e representantes dos concellos, co obxectivo de acadar un acordo de carácter técnico. O punto de partida desta mesa técnica será un estudo de costes, que hoxe lle foi presentado aos alcaldes polo conselleiro e o director de Augas de Galicia.
Así, no mes de xullo, unha vez pechado o acordo técnico, “poranse en marcha as negociacións coa Confederación Hidrográfica para a entrega da depuradora nas condicións óptimas”, co obxectivo de que “entre en carga a comezos de setembro ou outubro”.
O conselleiro recordou que deste xeito quedaría desbloqueado este proxecto, que se iniciou coa construción da depuradora pola Confederación Hidrográfica, que a declarou de interese xeral no ano 96, cun investimento de 100 millóns de euros, e mediante un convenio no que se acordou que a Confederación realizaría o proxecto e os concellos constituirían un consorcio para a súa xestión, pero o proxecto está bloqueado dende o 2006.
Manuel Vázquez tamén confirmou que se solicitará á Confederación Hidrográfica unha moratoria nas sancións aos empresarios, e manifestou a súa confianza en que se conceda, xa que é unha solicitude que definiu como “razoable” e que está sustentada “no traballo rigoroso realizado para solucionar o problema”, do que forma parte un exhaustivo estudo de custes para o funcionamento da EDAR, que será o punto de partida do traballo que desenvolverá a mesa técnica.
O conselleiro apostou por realizar un sistema xusto de reparto das cargas económicas, e enviou unha mensaxe de tranquilidade aos empresarios e aos cidadáns, xa que esta obra garantirá o saneamento do río Louro e implicará que conte cun sistema de depuración avanzado, con capacidade para 150.000 habitantes, e que terá en conta o futuro desenvolvemento urbanístico e industrial da zona e co cumprimento das garantías ambientais.
O empresariado demanda a solución de necesidades importantes en Tui
Onte ao mediodía reuníronse no concello de Tui o Alcalde, Antonio Fernández Rocha; o Presidente da Confederación de Empresarios de Pontevedra, José Manuel Fernández Alvariño, e o Presidente de ACITUI, Jorge Álvarez, xunto a comerciantes e industriais de Tui para analizar as necesidades das empresas que conforman o tecido industrial de Tui.
Ao termino da reunión, Jorge Álvarez, o Presidente de ACITUI, explicou que dende o colectivo que preside transmitiron ao Presidente da CEP unha serie de necesidades que consideran importantes para o desenvolvemento do tecido empresarial de Tui, que consideran importante darlle solución.
Os puntos destacados son a necesidade de aprobación do PXOM de Tui, vías de comunicación coma a Vía de Alta Capacidade, ou a comunicación con Salceda, o dragado selectivo do río Miño, a comunicación do Polígono de Area, a posta en marcha da EDAR de Guillarei, e tratar de eliminar os obstáculos para a chegada da ADSL, o gas natural, e tamén incidiron no transporte público apostando polo tren de cercanías.
Outro dos asuntos demandando é solicitar axilidade á Dirección Xeral de Patrimonio no referente aos proxectos que debe informar.
José Manuel Fernández Alvariño, presidente da CEP, agradeceu a receptividade por parte do Alcalde, para manter o encontro, que dicía se prolongou incluso máis do previsto. Salientaba que non hai política empresarial se non hai empresarios, e destacaba que Tui ten que empezar a asumir lideratos para aglutinar unha área poboacional importante coma é o Baixo Miño, algo ao que os empresarios están dispostos a axudar.
Era tallante ao afirmar que “se Tui non esperta pode perder oportunidades de negocio moi importantes”.
Índo a temas concretos o Presidente da CEP sinalaba que a aprobación do Plan Xeral abrirá a Tui moitas chaves coma o desenvolvemento urbanístico, empresarial e tamén dotalo dun aparcamento.
Asemblea Xeral Ordinaria da Asociación de Amas de Casa, Consumidores e usuarios de Tui
A Asociación de Amas de Casa, Usuarios e Consumidores de Tui celebra este venres Asemblea Xeral Ordinaria na Casa da Xuventude. Será ás 18.00h, en primeira convocatoria, e ás 18.30h, en segunda convocatoria. A orde do día é a seguinte: 1. Lectura e aprobación da acta anterior; 2. Balance e estado de contas; 3. Memoria e actividades do ano 2007; Carta de dimisión da Presidenta Rosa Mª Ramírez; 5. Renovación da Xunta Directiva; 6. Revisión dos Estatutos de Réxime Interno; 7Rogos e preguntas.
Coincidindo coa asemblea, de mañá, mércores, e até o venres haberá unha exposición dos traballos realizados nos distintos cursos.
Prazos de inscrición no Conservatorio Profesional de Música de Tui
O Conservatorio Profesional de Música de Tui informa que até este venres, 30 de maio, está aberto o prazo de inscrición para realizar as probas de acceso ao 1º Curso de Grao do Conservatorio.
Tamén até este venres está aberto o prazo de reserva de Matrícula tanto para a Escola de Música coma para o Conservatorio.
O Monte Aloia verá ampliada a súa superficie coma Parque Natural
O pasado sábado tivo lugar no Parque Natural do Monte Aloia a celebración do Día Europeo dos Parque Naturais. O acto contou coa Presenza do Conselleiro de Medio Ambiente, e dos alcaldes de Tui, Gondomar, Mos e Vigo. No mesmo anunciouse a ampliación do Parque Natural cara Gondomar, Mos e Vigo, nun proxecto que será froito do consenso e do diálogo.
Sobre esta cuestión falaba na RMT Gonzalo Puerto, Director de Conservación do Aloia, quen explicaba que esta proposta no é nova xa que fora elevada hai anos polos concellos de Tui e Gondomar. Trátase de ampliar a superficie deste espazo a toda a dorsal do Galiñeiro.
Coma paso previo á ampliación hai que elaborar o plan de ordenación dos recursos naturais, segundo explicaba Gonzalo Puerto. No mesmo terán voz todos os interesados.
No acto contouse tamén coa presenza de Mª Angeles Areses, filla do enxeñeiro Rafael Areses, de quen se tivo unha lembranza especial. A súa filla fixo entrega ao Parque dos últimos artigos do seu pai, e de fotografías.
O pasado sábado coincidindo coa celebración do Día Europeo dos Parque Naturais, constituíuse no Monte Aloia a nova Xunta Consultiva do Parque Natural do Monte Aloia. Un organismo que varía con respecto a súa predecesora a Xunta Rectora xa que conta con maior representación.
Sábado, 23 de maio de 2008
O Kaiak participará con 27 palistas no Campionato de España de Maratón
O Club Kaiak Tudense participa esta fin de semana no Campionato de España de Maratón en Banyoles en Girona, cun equipo de 27 piragüístas.
O Club de Tui que xa se fixo con este
título o ano pasado, tratará nesta tempada de reeditar éxito, xa que desde a
dirección deportiva do Club, fixouse esta competición como un dos obxectivos
importantes da tempada.
Os de Tui, acudirán cunha gran
base de piragüístas na categoría senior, onde Iván
Alonso, actual campión de España desta especialidade, partirá con opcións de
estar entre os primeiros clasificados, do mesmo xeito que o k2 de Roberto
Leituga e Diego Piña, en C1 José Luís Bouza, logo de dominar a tempada en
España nas distancias olímpicas, afrontará o reto de enfrontarse á maratón.
Tamén en canoa pero en modalidade de C2 os irmáns Costa Bouzada, Daniel e
David deberían de situarse nas primeiras posicións.
Pecha a participación na categoría senior,
Ana Varela, que por primeira vez na súa carreira deportiva competirá na
modalidade de maratón.
No que respecta aos júnior, os de
Tui, competirán con tan só 4 embarcacións, o k2 de Óscar
Carreira e Joan Ardit, o k1 de Luís Branco, e en damas o k2 de Leti Piña e
Daina Fritiría, mentres que en k1 será Sabela Castro.
Para finalizar na categoría
cadete, os de Tui presentarán a Rubén Millán en k1
cadete, a Carla Pérez en dama cadete, Valeria Romeria e Silvia Leituga en k2
dama cadete, e en canoa, serán Adrían González en C1 e Carlos Méndez con
Luís Morais en C2 cadete.
O mércores preséntase en Tui o proxecto SIGN II
A Consellaría do Medio Rural, a través da Sociedade para o Desenvolvemento Comarcal de Galiza, presentará os resultados do proxecto SIGN II, Infraestrutura de Datos Espaciais para o territorio rural de Galiza – Norte de Portugal, durante un seminario que terá lugar o próximo mércores, 28 de maio, no Teatro Municipal da Área Panorámica de Tui.
Durante a xornada, que será inaugurada polo secretario xeral do departamento do Medio Rural, Alberte Souto Souto, expertos afondarán nas características e funcionamento deste proxecto que contempla o uso da información xeográfica como ferramenta de cooperación transfronteiriza entre Galiza e o Norte de Portugal, co obxectivo de mellorar a xestión e a análise da información do medio rural de ambos os dous países.
O proxecto SIGN II, financiado pola iniciativa comunitaria Interreg III A, está liderado pola Sociedade para o Desenvolvemento Comarcal e conta coa participación da Universidade de Santiago de Compostela (USC). Complementan o proxecto os cinco socios portugueses que son o Instituto Politécnico de Viana do Castelo (IPVC), o Instituto para o Desenvolvemento Agrário da Região Norte (IDARN), a Associação Forestal de Portugal (FORESTIS), a Direcção Regional de Agricultura e Pescas do Norte (DRAPN) e a Comissão de Viticultura da Região dos Vinhos Verdes (CVRVV).
Os interesados en participar no seminario deberán inscribirse no seguinte enderezo: sign@comarcasdegalicia.com
Hoxe sábado celébrase a V Andaina Tudense
Hoxe, sábado, celébrase a V Andaina Tudense organizada polo Club Atletismo Tui. Partirá ás 10 da mañá do Paseo da Corredoira para realizar un percorrido até o Viveiro Forestal de Areas, entrando ao Parque Natural por Matelo, en Randufe, e xantando no alto do Aloia. Trala comida retomarase a andaina polo muíños do Tripes e A Lagarteira en Pazos de Reis, para rematar no Paseo da Corredoira.
Na Corredoira actuará o grupo Muiñeiros do Tripes e logo haberá a carreira de aros tradicional.
Este ano coma novidade na Carreira de Aros regalarán libros para os nenos que participen doados pola Concellería de Cultura, lambetadas doadas por Mel, e os correspondentes Trofeos.
Hoxe clausúrase a Semana do Libro e a Lectura co espectáculo “A rúa das pantasmas” de Títeres Cascanueces
Dende o pasado domingo 18 de maio a Biblioteca Pública Municipal de Tui ten acollido a celebración, por vez primeira na cidade, da Semana do Libro e Lectura realizando numerosas actividades de achegamento á lectura para todas as idades, pero especialmente para os tudenses máis pequenos.
Ao longo destes días 1.200 alumnos dos centros educativos do municipio teñen participado, en horario de mañá, en diversos obradoiros (plástica, danza, monicreques, ilustración, cantigas, música, expresión escrita, teatro).
Pola tarde, un total de 48 profesores da comarca asistiron ao curso de formación, esencialmente práctica que fornecía aos mestres ferramentas para a promoción lectora entre os seus alumnos.
Tamén en horario de tarde houbo cada día un contacontos aberto ao público xeral que contou cunha abondosa participación de nenos e nenas tudenses que disfrutaron coas narracións de Manolo Vázquez, Marisa Irimia, Servando Barreiro, Charo Pita e Chuz Ferrin. Foron aproximadamente 400 nenos os que se achegaron a estas sesións de contacontos ao longo da semana.
Completaban o programa de actividades diversas exposicións de ilustradores galegos, unha exposición homenaxe ao escritor Xabier P. Docampo e una exposición dos materiais aportados á Semana polos centros educativos de Tui.
Como clausura desta intensa semana hoxe, ás 12.30 horas, o Teatro Municipal acollerá a representación da obra “A rúa das fantasmas” de Títeres Cascanueces. Obra de títeres con música en directo baseada no clásico de títeres do mestre e titiriteiro Javier Villafañe. Os personaxes orixinais da obra convértense no elenco dunha compañía de teatro que debe representar unha función para o público -"Público, respectable público! Damas, cabaleiros, nenos e nenas, preséntolles a María"-, introducindo o teatro dentro do teatro. Nesta aventura o valente Xoanciño e a astuta María enfróntanse ás pantasmas e ao mesmísimo demo. Ocorre que a casa de María está sendo visitada por estas tenebrosas figuras e só co enxeño de María unido ás picardías de Xoanciño lograrán vencelas e desenmascaralas.
O Concelleiro de Cultura tudense amosa a súa gran satisfacción polo desenvolvemento desta Semana do Libro e a Lectura e a importante participación nas súas diversas actividades. A celebración desta Semana tenta promover a lectura entre os diversos sectores sociais da cidade, dende o convencemento de que a lectura é unha ferramenta imprescindible para o desenvolvemento persoal e comunitario. Esta Semana veu reforzar o importante traballo que o concello de Tui realiza neste ámbito a través da Biblioteca Municipal, entendida como o servizo público que garante aos cidadáns o acceso á cultura e á información.
Moisés Rodríguez Pérez agradece á Consellería de Cultura e Deporte o feito de ter escollido a Tui como unha das 10 cidades galegas onde se celebrou esta Semana do Libro e a Lectura, agradece aos mestres a súa implicación no desenvolvemento da mesma e aos cidadáns a participación nas súas actividades.
30 de maio finaliza o prazo de inscrición para as probas de acceso ao 1º curso de Grao Profesional de Música
O director do Conservatorio Municipal de Tui lembra que o vindeiro venres, 30 de maio, remata o prazo de inscrición para as probas de acceso ao 1º curso de Grao Profesional para o ano académico 2008/2009.
Por outra banda infórmase que o prazo para presentar a reserva de matrícula da Escola e do Conservatorio ten como derradeiro día tamén o venres, 30 de maio.
Empresarios e alcalde reúnense para analizar as necesidades das empresas
O presidente da Asociación de Comerciantes e Industriais de Tui, ACITUI, Jorge A. Álvarez Bautista o presidente da Confederación de Empresarios de Pontevedra, José Manuel Fernández Alvariño, o alcalde de Tui, Antonio F. Fernández Rocha, e empresarios tudenses, reuniranse para analizar as necesidades das empresas que conforman o tecido industrial de Tui.
Esta xuntanza celebrarase o luns, día 26, ás 13.00 horas na sala de plenos da Casa Consistorial.
Xoves, 22 de maio de 2008
Os alcaldes de Tui, Salceda, O Porriño e a alcaldesa de Mos reúnense mañá co Conselleiro de Medio Ambiente para falar da EDAR de Guillarei
A Estación Depuradora de Augas Residuais de Guillarei, volveu a semana pasada, a primeira páxina da actualidade informativa. A EDAR que dará servizos aos concellos de Tui, Salceda, O Porriño, e Mos, supuxo un investimento de case 100 millóns de euros, e está pensada para dar servizo a unha poboación de 80 mil habitantes.
Antes de que comece a funcionar parece que quedan algúns flecos por definir. Coma o estudo de custes ou o remate das obras que demandan os alcaldes afectados.
Precisamente este venres, ás 11 da mañá, terá lugar en Santiago unha reunión entre os alcaldes de Tui, Salceda, O Porriño e Mos, e o conselleiro de Medio Ambiente sobre a EDAR de Guillarei. A Consellería está a realizar un estudo dos custes que suporía a súa posta en marcha, segundo avanzaba o rexedor tudense, que dicía que ese estudo se non está terminado debe estar moi avanzado.
Por outra parte o concello de Tui tratará no pleno deste mes de maio de formular unha petición á Confederación Hidrográfica do Norte para que remate as obras conforme ao proxecto e arranxe as partes que están deterioradas, xa que tal e coma están non se van recepcionar. Engadía que hai colectores que co paso do tempo poden estar en mal estado ou atascados, ou hai colectores xerais, principalmente do río Louro, sen acabar ao igual que os do río Caselas. O mesmo acontece co colector que conectaría a actual depuradora de Areas coa EDAR.
Por outra parte o alcalde de Tui manifestaba que baixo ningún concepto vai permitir que os cidadáns de Rebordáns e Ribadelouro non poidan verter, porque nestes momentos o colector está sen facer e é inviable para o concello porque hai moitas expropiacións e hai que cruzar o río Louro. Ese era un proxecto da Confederación, explica, que agora di que non vai facer máis colectores, polo que sinalaba que terá que facelo a Consellería, xa que se trata dun proxecto que supera o millón e medio de euros. Tamén falta a malla vexetal que se quedou de pór para tapar en parte a Depuradora, que era un compromiso do propio presidente da Confederación.
Fernández Rocha indicaba que coma a EDAR está pensada para 80 mil habitantes e para dar servizo ao Porto Seco, algo que non se cumpre na actualidade polo que os custes se van disparar.
No
que
se refire á posta en marcha da
EDAR de Guillarei o alcalde
pensa que é cuestión de meses e que o ano que vén
estará en funcionamento. Unha vez se saiba o estudo de custes
débese
reflectir nas ordenanzas municipais, que suporá un cambio no canon de
vertido.
A parcela da vella praza de abastos perfílase coma novo emprazamento para o novo Centro de Saúde de Tui
O Alcalde de Tui, na súa comparecencia na sintonía da Radio Municipal de Tui, referiase ao novo Centro de Saúde. Sobre a parcela de cam-fran explicaba que está libre de cargas segundo consta na escritura que está a nome do Concello de Tui. Polo que isto non sería un problema, si o sería a edificabilidade.
Fernández Rocha sinalaba que o que quere é buscarlle unha solución ao novo centro de saúde.
Por iso os grupos políticos reuníronse en Comisión Informativa na que xurdiron varias propostas para unha nova ubicación.
O PP, AT, PSOE e BNG parecen estar de acordo en que sexa na traseira da Área Panorámica, mentres que TUI aposta pola parcela da Lagarteira, segundo explicaba Fernández Rocha, quen matiza que este último emprazamento tería que ser de futuro xa que está condicionado ao PXOM, a expropiacións de terreos e urbanización do mesmo.
Afirmaba Fernández Rocha que neste momento o terreo que se pode pór xa a dispor do SERGAS é a parcela da antiga praza de abastos que xa foi examinado por unha técnica de Sanidade.
Con isto restaríase sobre mil metros ao futuro parque soterrado que aínda así tería 12 mil metros cadrados en dúas plantas.
De elixir este emprazamento o edificio tería que estar de acordo co entorno con catro fachadas.
Noutra orde de cousa Fernández Rocha explicaba que algúns proxectos que se van acometer sufriron un retraso derivado da demora na aprobación dos orzamentos. Avanzaba así que están a piques de comezar as obras da Praza de Galicia, e outras de saneamento na Avenida de Portugal que terá que ser soterrada cun investimento de 60 mil euros.
O CDG estrea en Tui a súa última montaxe “Estigma”
O Centro Dramático Galego inicia en Tui a xira do seu último espectáculo desta temporada “Estigma”. Será con dobre función, a primeira hoxe xoves para os escolares, e a segunda mañá venres ás 21h para o público en xeral. A obra foi presentada en rolda de prensa por Cristina Domínguez, Directora do CDG, Xabier Deive e Clara Gayo, dous dos actores da peza, Isabel Bilbao da Fundación Caixa Galicia, e Moisés Rodríguez, Concelleiro de Cultura.
Cristina Domínguez explicou coma “Estigma” é froito dun compromiso do CDG coa escrita galega cunha autoría residente, na que se están a realizar obradoiros de escrita dirixidos por Cándido Pazó. É unha aposta polas novas xeracións, dicía, dándolles oportunidades. Este espectáculo é froito do compromiso de escrita de Drama A3 integrado por Jacobo Paz, Vanesa Soutelo e Javier Ruibal, este último Premio Nacional de Literatura dramática en 2007. Igualmente apostouse por un elenco de actores novos que traballaron arredor do suspense.
“Estigma” é o último espectáculo desta temporada, a primeira na que se puxeron en marcha os Espazos CDG, que segundo Cristina Domínguez resultou unha experiencia moi positiva e lograron afianzar espazos de exhibición dos espectáculos nas mellores condicións.
En “Estigma” a acción transcorre nunha illa onde os personaxes están solos, e onde a soidade, as relacións, a violencia... se mesturan dando coma resultado unha obra divertida, doada de levar e con suspense o que resulta atractivo sobre todo para o público máis novo. Igualmente destacou a importancia do espazo sonoro e das proxeccións audiovisuais.
Xabier Deive, actor de “Estigma”, salientou da obra que “ten unha linguaxe agresiva, moita forza en escena en a que pasan cousas constantemente”. Explicaba ao tempo que funciona moi ben con público novo, engadindo que “o importante da peza son os climas que se xeran dentro, as esperas, as relacións entre os personaxes” polo que dicía “cada espectador pode sacar as súas conclusións”.
Clara Gayo, que forma tamén parte do reparto desta montaxe, explicou que este espectáculo brindou “a oportunidade de atoparse autores, directores e actores novos, con novas formas de traballar”. Ao tempo salientaba que na obra “é o tratamento das personaxes femininas onde se pode ver un exemplo de coma comezan a variar os roles da presenza feminina”.
Isabel Bilbao, da Fundación Caixa Galicia que apoia a xira de “Estigma” con 300 mil euros, salientou na súa intervención que para esta entidade “é unha gran satisfacción participar neste proxecto e vincularse co IGAEM e o CDG co que cumpren os obxectivos fomentar e apoiar as artes escénicas”. Ao tempo que agardaba que “esta colaboración fluída e constante permaneza no futuro”.
O Concelleiro de Cultura de Tui, Moisés Rodríguez, destacaba que “este espectáculo para nós é un premio, co que culmina un semestre moi intenso de programación cultural”.
Engadindo que o Teatro Municipal sen os actores, os directores, o público, e os traballadores “non podería funcionar as mil marabillas”.
“Estigma” está dirixida por Dani
Salgado, e forman o elenco Anabel Gago, Clara Gayo, Xosé Manuel Esperante,
Xabier Deive e Vicente de Souza. A representación para público en xeral terá
lugar mañá venres, 23 de maio, ás 21h, no Teatro Municipal de Tui. As
entradas poranse á venda ás 16.30h ao prezo de 5€, 4€ con desconto, e 3€
para os menores de 12 anos.
Citas para hoxe na Semana do Libro e a Lectura
Continúa hoxe xoves a Semana do Libro e a Lectura que ata este sábado se está a celebrar na Área Panorámica.
Esta mañá os alumnos de 5º de primaria dos centros de Tui participarán nun obradoiro de música e romances a cargo de Antón Castro, e tamén nun obradoiro de expresión escrita que impartirá Lucía Rodríguez Fernández.
Pola tarde, e para o público en xeral, ás 18.30h na Biblioteca haberá unha sesión de contacontos a cargo de Charo Pita.
Corenta e cinco profesores participan no curso de formación da Semana do Libro e a Lectura
Un total de 45 profesores, tanto de Tui coma doutros concellos da comarca, dos diversos niveis educativos participan ao longo desta semana no curso de formación que no marco das actividades da Semana do Libro e a Lectura desenvólvense na Biblioteca Pública Municipal de Tui.
O programa abrangue unha formación esencialmente práctica, con obradoiro de ilustración a cargo da editorial OQO, celebrado o luns. O martes foi un obradoiro de danza dirixido por Mercedes Prieto, o mércores estivo Marta Dacosta cun obradoiro de escrita creativa sobre novos xeitos de comunicar as nosas historia,; o xoves Antón Castro dirixe un obradoiro de música e finalmente será Carolina Ramón quen o venres forneza aos asistentes de recursos didácticos de utilidade vinculados ao teatro.
As exposicións completan o programa da Semana do Libro e a Lectura
O programa da Semana do Libro e a Lectura que se está a desenvolver en Tui complétase cunha serie de exposicións que se poden ollar na Área Panorámica.
Son as seguintes:
· Vai de mar, organizada por Galix (Asociación Galeda de Amigos do Libro Infantil e Xuvenil) recolle os máis recentes traballos dos nosos ilustradores. Anxeles Ferrer, Óscar Villán, Suso Cubeiro, Xan López Domínguez, Andrés Meixide, Manuel Uhía, Federico Fernández, Kiko da Silva, Xosé Cobas, Irene Fra, Enjamio, X. Balboa, Miguelanxo Prado, Pepe Carreiro, Noemí López, Lázaro Enríquez e máis Fino Lorenzo foron os autores escollidos para este mostra, na que se expoñen debuxos inéditos.
· O camiño de Anxo, que recolle unha escolma das últimas ilustracións realizadas por Anxo Fariña para libros infantís.
· 12 ilustracións para 12 libros, da escritora e ilustradora Gabriela Rubio, gañadora do Premio Lazarillo de ilustración e do Premio Apel.les Mestres de Literatura Infantil Ilustrada.
· Galiza en negro e azul, que recolle unha selección de fotografías relacionadas co desastre do Prestige nas costas de Galicia e que está organizada pola Asociación Socio-Pedagóxica Galega.
· Finalmente esta Semana do Libro e a Lectura realiza unha homenaxe a un dos principais escritores galegos para nenos Xabier P. Docampo, que ten acadado numerosos premios nacionais e internacionais. Xabier P. Docampo, tecedor de contos realiza un percorrido pola biografía persoal e literaria do autor galego.
Xunto a estas mostras pódese contemplar tamén na Biblioteca Pública Municipal unha exposición co material elaborado polos alumnos e alumnas de diversas centros educativos tudenses que participan deste xeito na programación desta Semana do Libro Infantil e Xuvenil. En concreto, amosan os materiais os colexios de Rebordáns, Randufe, Guillarei, Pazos de Reis e o IES San Paio. Unha mostra colorista e rebosante de imaxinación centrada en temas vinculados ao mundo do mar, eixo temático da Semana do Libro e a Lectura deste ano 2008.
A visita a estas exposición é libre ate este sábado 24 de maio.
Prazas vacantes no Curso de Electricista de mantemento do Plan FIP
O Centro de Formación do Concello de Tui informa que quedan prazas vacantes para alumnos no curso Electricista de Mantemento que impartirán do 2 de xuño ao 25 de novembro de 15.00 a 21.00 horas.
As persoas interesadas, deben estar inscritas no servizo público de emprego, e ter experiencia en electricidade ou ter feito algún curso de electricista
Para calquera información poden chamar ao 986 60 39 49 ou para inscribirse deben pasar polo centro de formación en A Gándara, Guillarei.
Mércores, 21 de maio de 2008
Curso de Manipulador de Alimentos impartido por FEBAM con listas abertas para os que desexen asistir
A Federación de Empresarios do Baixo Miño – FEBAM, organiza hoxe un novo Curso de Manipulador de Alimentos para todo aquel que queira asistir.
O horario é de 17.00 horas a 20.00 horas.
Para máis información poden visitar a sede social de FEBAM, na rúa Martínez Padín, número 11, de Tui, ou chamar ao número 986 60 50 84, onde se lles facilitará máis información.
As listas seguen abertas para acudir a este Curso.
Presentación de “Estigma” obra que vai representar en Tui o Centro Dramático Galego
Hoxe, mércores, ás 11.30h, vaise presentar na sala de reunións da Casa do Concello de Tui, o espectáculo “Estigma” que o Centro Dramático Galego presenta esta semana en Tui.
A este acto acudirán Antonio Feliciano Fernández Rocha, alcalde do concello de Tui; Moisés Rodríguez Pérez, concelleiro de Cultura do concello de Tui; Cristina Domínguez Dapena, directora do CDG, e Xabier Deive e Clara Gayo, actores da obra
“Estigma” representarase no Teatro Municipal, con dúas sesións: a primeira o xoves, ás 11.00h para escolares, e a segunda o venres, ás 21.00h, para o público en xeral.
Celebración do Día Europeo dos Parques Naturais no Monte Aloia
O sábado o Parque Natural do Monte Aloia acollerá o acto institucional de celebración do Día Europeo dos Parques. O Conselleiro de Medio Ambiente, Manuel Vázquez Fernández, presidirá este acto.
O Día Europeo dos Parques
Naturais está organizado pola Federación Europarc que acolle os espazos
naturais protexidos de 38 países. O lema deste ano é “Natureza sen
fronteiras”.
Case un millar de escolares participaron nas visitas guiadas ao Conxunto Histórico de Tui
Este luns tivo lugar a última visita ao Conxunto Histórico de Tui ao abeiro do programa que puxo en marcha o Concello de Tui para os alumnos dos centros de ensino do concello.
Ao longo dos últimos meses foron un total de 950 rapaces que participaron nestas actividades que tiñan como obxectivo achegar ao coñecemento do noso conxunto patrimonial aos rapaces de Tui para que o coñecesen e valorizasen, ao tempo que se promovían valores de respecto polo patrimonio cultural.
As visitas estaban guiadas por unha licenciada en Historia da Arte, Sara Quintana Vila, que acompañada por unha auxiliar, Virgina López Zabala, artellaron tres posibles percorridos polo conxunto histórico tudense para que os diversos grupos escollesen en función das súas necesidades de aprendizaxe e idades.
Ao través dos cuestionarios de avaliación da visita realizados de xeito anónimo polos profesores puidemos coñecer que esta iniciativa é valorada moi positivamente, existindo unha unánime petición de continuidade deste programa.
Para o Concelleiro de Cultura tudense este programa de visitas guiadas ao conxunto histórico tudense era unha vella aspiración que neste curso foi posible poñer en marcha, cunha positiva resposta dos centros educativos. Moisés Rodríguez expresa a súa satisfacción porque case un milleiro de nenos e nenas tudenses se teñan achegado ao seu patrimonio, coñecéndoo máis polo miúdo o que de seguro implica a súa valorización por estes rapaces.
Con esta experiencia o Concello de Tui continúa impulsando accións que contribúen á posta en valor do noso patrimonio, entendido como o principal recurso da nosa cidade, tamén neste ámbito educativo.
Dende a Concellería de Cultura agradécese a participación dos diversos grupos escolares e as súas suxestións que contribuíron ao enriquecemento deste programa educativo.
Martes, 20 de maio de 2008
O domingo foi inaugurada a Semana do Libro e a Lectura de Tui
O pasado domingo, 18 de maio, foi inaugurada a Semana do Libro e lectura, que organiza ao longo dos vindeiros días a Dirección Xeral de Creación e Difusión Cultural da Consellería de Cultura e Deporte coa colaboración da Concellería de Cultura do Concello de Tui.
No acto inaugural interviron a delegada Provincial da Consellería de Cultura e Deporte, María Xesús López Escudeiro, e o alcalde de Tui, Antonio F. Fernández Rocha. Nas súas breves intervencións ambos resaltaron as actividades desta semana como una aposta pola promoción da lectura entre os tudenses. López Escudeiro explicou o desenvolvemento da Semana e como Tui é unha das 10 cidades de Galicia onde esta actividade lévase adiante. Fernández Rocha, pola súa banda, agradeceu á Consellería esta elección de Tui que consolida o traballo que o Concello leva adiante dende a Biblioteca Municipal. De seguido o grupo “Migallas” presentou o seu espectáculo “Canta conosco!”.
Dende o luns, e ata o venres, serán máis de 1.300 escolares dos centros de ensino do concello de Tui os que participarán nas actividades da Semana do libro e a lectura, que abrangue obradoiros de plástica, de monicreques, de ilustración, de contos e cantigas, de expresión escrita, teatro, etc, a cargo de recoñecidos profesionais como Mercedes Prieto, Marisa Irimia, Servando Barreiro, Antón Castro, Carolina Ramos e Tokio.
De luns a venres ás 18.30 horas haberá una sesión de actividades abertas ao público a cargo de Manolo Vázquez, de Berrobambán Teatro, o luns 19; de Marisa Irimia, o martes 20; Servando Barreiro, o mércores 21; Charo Pita o xoves 22 e Chus Ferrín o venres 23 de maio.
Ao longo da semana desenvolvérase un curso de formación para o profesorado entre as 18.00 e as 20.00 h. na que participaran os profesionais que realizan os obradoiros para os cativos.
Tamén o martes, 20 de maio, ás 18.30 horas realizarase unha actividade para as familias, denominada “Animación á lectura dende a casa” dirixida a pais e nais sobre dinámicas de animación á lectura a desenvolver no fogar, sobre a importancia de contarlles contos e lerlles aos nenos desde as idades máis temperás como forma de estimular a imaxinación así como proporcionarase información sobre as lecturas máis recomendadas segundo as idades.
Todas estas actividades terán lugar na Biblioteca Municipal de Tui, no edificio Área Panorámica.
Amais haberá diversas exposicións de libros, ilustradores e materiais elaborados polos alumnos dos centros educativos do concello tudense.
Finalmente a clausura terá lugar o sábado, 24 de maio, cunha nova actuación no Teatro Municipal ás 12.30 horas, desta volta coa actuación de Títeres Cascanoces que porá en escena a obra “A rúa das pantasmas”.
Programa para os vindeiros días
MARTES 20 de maio, 3º DE PRIMARIA
Obradoiro de danza. MERCEDES PRIETO
Embarcamos rumbo a ritmos galegos... ou non? As mareas de Galicia lévannos ao son de diferentes danzas; temos a tarefa de identificar as propias e bailar as doutras culturas. Neste obradoiro aprenderemos as diferenzas ou semellanzas entre a cultura e o baile tradicional galego e outras culturas e danzas do mundo.
Obradoiro de ilustración. MARISA IRIMIA
Destacada ilustradora do panorama galego que alén de amosarnos que hai un mar de maneiras coñecidas de ilustrar, demostrará que hai moitas outras co mesmo fin: que o pasemos ben debuxando e que vexamos un novo mundo a través da ilustración. O mar de recordos de cada un sairá flote nunha sesión onde se mesturan a fantasía, o xogo, a irrealidade e todo coa intención primeira de divertirnos.
ACTIVIDADES COAS FAMILIAS
Animación á lectura desde a casa. 18.30 h.
Proposta para pais e nais de dinámicas de animación á lectura. Falarese da importancia de contarlles contos e lerlles desde as idades máis temperás como forma de estimular a imaxinación e de facer animación previa á lectura cos nenos e nenas. Tamén se dará unha orientación das lecturas máis recomendadas segundo as idades.
ACTIVIDADES ABERTAS AO PÚBLICO. A CONTAR! 18.30h
Marisa Irimia
O mar de recordos de cada un sairá a flote nunha sesión onde se mesturan a fantasía, o xogo, a irrealidade e todo coa intención primeira de divertirnos.
ACTIVIDADES PARA O PROFESORADO 18.00h a 20.00h
* Solicitada a homologación á Consellaría de Educación por 10 horas lectivas
Obradoiro de danza. Mercedes Prieto
Vai ser unha función de varios contos, uns tradicionais e outros de autor, algún poema e varios cantos acompañados de “instrumentos peculiares”, todo isto dentro dunha única historia. Haberá un apéndice de Romances de Cego, que é outro xeito de contar historias. E propoñémosvos dar uns pasiños de baile...
MÉRCORES 21 de maio, INFANTIL
Obradoiro de CONTOS e cantigas. Servando Barreiro
Este obradoiro consistirá primeiramente en fornecer ao neno ou nena unha variada selección de contos e cantigas, algúns tradicionais e outros de autor, axeitados á súa idade para que mediante a participación nos mesmos e dando outros modelos, se animen a contalos e cantalas de forma diferente, ou incluso a elaborar outros orixinais, estimulando así a súa imaxinación e creatividade.
Obradoiro de monicreques. TÍTERES CASCANUECES
Calquera de nós quixo ser algunha vez outro: disfrazarse dunha personaxe que nos permita dicir e facer máis alá do cotián, como no entroido. Aquí poderedes comezar a desenvolver a vosa expresividade, o que levades oculto dentro e non coñecedes. E tamén o lado máis divertido da interpretación, aquel que nos leva aos territorios da infancia.
ACTIVIDADES ABERTAS AO PÚBLICO. A CONTAR! 18.30h
Servando Barreiro
Este contador e animador demostraranos como os contos, ademais de contalos, se pode cantalos. Só fai falta imaxinación e ganas de pasalo ben. Animádevos a descubrir outro xeito de oír contos.
ACTIVIDADES PARA O PROFESORADO