Índice

www.galiciasuroeste.info

 

TOMIÑO

 

Xoves, 29 de marzo de 2018  

Tomiño organiza obradoiros onde aprender estratexias para afrontar a crianza dun xeito positivo

A Concellería de Servizos Sociais, a través do Departamento de Educación Familiar, organiza o programa “Benestar en Familia”, entre os días 4 de abril e 9 de maio. A actividade consiste nunha serie de encontros (charlas) e obradoiros dirixidos a familias con nenos de até 6 anos, que desexen aprender estratexias e pautas para afrontar a crianza dun xeito positivo.

A primeira das actividades programadas é o obradoiro “Medrando co meu bebé” (para familias con fillos de entre 3 e 12 meses, que terá lugar o vindeiro mércores 4 de abril, na Escola Infantil Galiña Azul de Tomiño, entre as 17.30 e 18.30 horas. Impartida por persoal técnico de ADIAF (Asociación de Desenvolvemento Infantil e Atención Familiar), a actividade terá coma obxectivo principal “acompañar ás familias no crecemento, proporcionándolles estratexias, ferramentas e recursos de apoio ao longo da primeira etapa de vida dos seus cativos”, explicou a concelleira Cristina Martínez, sinalando ao mesmo tempo, a intención de tender unha rede de apoio e intercambio de experiencias entre familias e profesionais.

Asemade, traballarase co “Libro Blanco da Atención Temperá”, a prevención e detección de necesidades nas áreas de linguaxe, psicomotricidade, áreas cognitiva, sensorial, etc.

Por outra banda, o vindeiro xoves 5 de abril terá lugar na Casa da Cultura, ás 17.30 horas, a primeira das charlas programadas, titulada “Como protexer sen protexer”, e impartida polo psicólogo e terapeuta familiar José Cardama Barrientos. Haberá servizo de canguros, pero é preciso anotarse previamente, chamando ao Concello en horario de mañá (986 62 20 01/03).

  

Tomiño celebra con diferentes actos o Día Mundial de Concienciación sobre o Autismo

O Concello de Tomiño e o Mercado Municipal colaboran, un ano máis, na celebración do Día Mundial de Concienciación sobre o Autismo, que terá lugar o 2 de abril.

A Asociación "1 Máis", formada por pais e familiares de personas con autismo do Baixo Miño, colocará un stand informativo con folletos, haberá unha solta de globos na Praza do Seixo e lectura dun manifesto, o mendionado día, a partir das 19.00 horas. Asemade, está prevista a proxección dunha película/documental alusiva ao tema do autismo, os días 3 e 5 de abril, na Praza do Seixo, a partir das 17.00 horas. Tamén está prevista a iluminación da Casa Consistorial.

A concelleira de Cultura e Servizos Sociais, Cristina Martínez, salienta a vontade do Concello de colaborar coa Asociación “1 Máis”, a prol da concienciación da poboación sobre as enfermidades do espectro autista; unha doenza que afecta a moitas persoas e aos seus familiares na comarca.

 

Os campos de fútbol de Tomiño contarán con novos desfibriladores

Na tarde do pasado martes, a alcaldesa de Tomiño, Sandra González, e o concelleiro de Deportes, Ismael Troncoso, fixeron entrega de dous desfibriladores a responsables dos clubs de fútbol tomiñeses  AD Tomiño e Goián CF.

Os equipos foron adquiridos con cargo a subvencións da Deputación de Pontevedra para este fin, e servirán para cubrir a actividade realizada polos equipos que adestran nos campos de fútbol da Carballa (Tomiño) e do Regatiño (Goián).

O concelleiro de Deportes salientou  tras a entrega dos desfibriladores, que varios membros dos clubs realizaron os cursos necesarios para saber manexar os aparatos en caso de necesidade. “Deste xeito, incrementamos a seguridade dos nosos xogadores, no fútbol base e tamén noutras categorías”, comentou Ismael Troncoso.

 

Mércores, 28 de marzo de 2018  

"A nena que quería navegar" comedia para a toda a familia no auditorio de Goián

Dentro da programación cultural de primavera, o concello de Tomiño ten prevista, ofrecer o 1 de abril ás 18 horas, no auditorio de Goián, a comedia musical para toda a familia de Redrum Teatro "A nena que quería navegar".

Esta comedia familiar trata de previr situacións de acoso escolar a través de técnicas de reforzo positivo e mellora da autoestima dos menores. Está protagonizada pola actriz Laura Míguez e os actores Guillermo Carbajo e Carlos Álvarez-Ossorio.

“A Nena” está farta de ser o centro das mofas dos seus compañeiros e, por iso, foxe da escola coa intención de non volver nunca máis. Na súa aventura toparase co Xeadeiro, un ser máxico e vital, que a base de contos, adiviñas, xogos e cancións, devolveralle a autoestima perdida. Ensinaralle que dentro de cada persoa agóchase un un ser máxico, único e especial, e que só crendo en nosas capacidades seremos quen de conseguir todo o que nos propoñamos.

Se puede ver el traile en https://vimeo.com/190733658

 

Martes, 27 de marzo de 2018  

A asociación Vontade elabora un plan estratéxico para poder dar servicio a persoas con discapacidade da comarca e concellos limítrofes

A sociación de Persoas con Discapacidade Vontade celebrou a súa XVI Asemblea Xeral Ordinaria no CRD Vontade. Nesta asemblea acordouse a elaboración do Plan Estratéxico 2018-2021, para dar servizos ás persoas con discapacidade da comarca do Baixo Miño e concellos limítrofes.

O obxectivo principal deste novo Plan Estratéxico é dar cobertura e cubrir as necesidades das persoas con discapacidade que, aínda que non precisan de atención terapéutica diúrna nun Centro de día, non teñen as súas necesidades básicas cubertas.

Á asemblea e presentación do novo Servizo de Transporte Adaptado, asistiron en representación do Concello de Tomiño, Cristina Martínez e Ismael Troncoso, concelleiros de Cultura e Servizos Sociais e Deportes, respectivamente, así coma dous representantes da Obra Social La Caixa. Cristina Martínez informou que ca adquisición destes dous vehículos, a Asociación aumentará os seus servizos de transporte para que ningunha persoa usuaria permaneza en ruta máis de 55 minutos.

No ano 2017 a Asociación adquiriu dous vehículos adaptados grazas ao financiamento da Fundación ONCE, do Ministerio de Sanidade, Servicios Sociais e Igualdade e da Axencia Galega de Desenvolvemento Rural.

Segundo os datos facilitados pola Conselleira de Inclusión, na Comarca do Baixo e Concellos limítrofes, no ano 2017 hai censadas 14.542 persoas con discapacidade física. Moitas destas persoas, aínda que non se consideren persoas con grande discapacidade, atópanse nunha situación de vulnerabilidade, están coma nun baleiro onde non pertencen a ningures, non son persoas con necesidade de Centro de Día, pero si presentan dificultades que se non son tidas en conta, impídelles acadar unha verdadeira inclusión na sociedade. Esta situación agrávase no Rural, onde a falta de recursos comunitarios e un transporte público  precario, leva consigo o illamento das persoas con discapacidade e a sobrecarga das súas familias.

Na actualidade, a Asociación atópase na fase de diagnóstico e estudo de necesidades, mantendo reunións con servicios socias de base e grupos de interese, co fin de coñecer de primeira man as necesidades que teñen sen cubrir as persoas con discapacidade da Comarca e zonas limítrofes, para así abrir novas liñas de actuación que lle permitan traballar tanto cas persoas con discapacidade, coma ca sociedade en xeral, co propósito de acadar a plena inclusión das persoas con discapacidade.

A Asociación Vontade abriu no ano 2012 o único Centro de Recursos para persoas con discapacidade física da Comarca do Baixo Miño. Neste Centro de Recursos atópase o Centro de Día para Persoas con Discapacidade Física, centrando a atención e servizos ofertados dende a Asociación a persoas con grande dependencia.

 

Unha victoria e unha derrota para o Spartan Team Tomiño esta fin de semana en Cerceda

No segundo combate da velada celebrada en Cerceda a pasada fin de semana,o Goianés David López non conseguiu impoñerse ao seu rival que gañou aos puntos.

Darío Ferradás, recentemente afincado no clube Spartan Team, disputaba o quinto combate da velada conseguindo unha clara victoria que se decidia aos puntos.

 

Luns, 26 de marzo de 2018 

Viveiros Río Tollo colabora con Cogami y Activa Social para incorporar trabajadores y trabajadoras a su plantilla

Viveiros Río Tollo, situado en la parroquia tomiñesa de Goián, quiere colaborar de forma activa con el desarrollo económico y social de la comarca del Baixo Miño. Por ese motivo, desde hace algunos años el vivero colabora con la Confederación Galega de Persoas con Discapacidade, Cogami, y con Activa Social para incorporar nuevos trabajadores y trabajadoras a su plantilla. Esta colaboración se realiza a través del programa Incorpora de ‘la Caixa’, un programa de intermediación laboral que combina de una forma óptima las necesidades del tejido social y empresarial para garantizar el éxito en la integración laboral.

En un sector en el que el 90% de los puestos de trabajo están desempeñados por mujeres, las dos nuevas incorporaciones a la plantilla de Viveiros Río Tollo este año a través de este programa también tienen nombre femenino: Carmela Domínguez y María Ángeles Martínez.

Carmela es la más veterana, lleva en el vivero desde febrero y acude ilusionada todos los días a su puesto de trabajo. “Me gusta el trabajo, me he adaptado bien, estoy cómoda y muy contenta con mis compañeros. Poco a poco voy aprendiendo los distintos aspectos del trabajo, desde cortar, abonar esplantar” explica Carmela, para quien lo más duro hasta ahora no ha sido la adaptación ni el trabajo, sino la climatología. “La lluvia da igual, te tapas, pero el frío en las manos…”, reconoce.

En este momento Viveiros Río Tollo cuenta con alrededor de 60 trabajadores, alguno de ellos antiguos empleados del programa Incorpora.

 

Sábado, 24 de marzo de 2018 

O deportista do Spartan Team de Tomiño Charly López, subcampión galego de Full Contact

O goianés do Spartan Team de Tomiño, Charly López, participou no Campionato Galego de Full Contact celebrado a pasada fin de semana no pavillón Óscar Pereiro de Mos, onde acadou o título de subcampión de Galicia tras caer na final nun axustado combate ante Aarón González, actual campión de España de Boxeo.

Non é a primeira vez que o deportista do Spartan Team de Tomiño consigue este título na categoría dos 71 kg, xa que fíxose co subcampionato tamén no ano 2011. O obxectivo era tentar revalidar o título de campión galego de Full Contact que xa conseguira nos anos 2009 e 2010.

López leva 10 anos practicando artes marciais e deportes de contacto, dende o sanda ata o full contact pasando polo muay thai, polo kick boxing, do que foi campión galego en 2012 e subcampión de España en 2011 e 2015, ou polo boxeo do que foi subcampión galego en 2012 e campión en 2017.

A este campionato tamén acudiu o vigués aínda afincado no club tomiñés Xavier Cacheiro, que disputou os seus combates na categoría dos -75 quilos e que caeu en cuartos de final.

O responsable de Deportes do Concello de Tomiño felicitan a Charly López por ese novo título e eloxian o traballo de todo o equipo tomiñés nas distintas competicións nas que está a participar.

 

Aberto o prazo de inscrición para as 102 prazas das dúas escolas infantís públicas de Tomiño

Xa está aberto o prazo de inscrición para acceder ás dúas escolas infantís para nenos de 0 a 3 anos do concello de Tomiño, o único municipio da comarca que conta con dous centros de educación infantil públicos. O concello conta con dúas escolas Galiña Azul pertencentes á rede do Consorcio Galego de Servizos de Igualdade e Benestar, unha en Tomiño e outra en Goián. Dende o Concello de Tomiño quérese animar a todas as familias con nenos desta idade a anotar aos seus fillos a inscribilos nestas escolas públicas, coas vantaxes que iso conleva. 

Ata o 9 de abril os pais poden solicitar algunha das 102 prazas (61 en Goián e 41 en Tomiño) que se ofertan nas dúas escolas, tanto de renovación como de novo ingreso. Este prazo ampliarase ata o 8 de maio para casos extraordinarios, como novos nenos nados nesas datas ou cambios de domicilio, o que terá que ir acompañado da documentación que xustifique.

Ademais, cada curso resérvase unha praza por aula para nenos derivados dende os Servizos Sociais previa aprobación do Consorcio. A lista provisional con lista de inscritos e lista de agarda será publicada o 9 de maio.

Requisitos

Os interesados deberán entregar toda a documentación no centro escolar que queiran escoller como primeira opción e na propia solicitude se marcan varias escolas por orde de preferencia, para que en caso de que non haxa prazas na primeira opción poidan derivarse a outros centros. Darase prioridade aos nenos empadroados e, se sobran prazas, repartiranse entre os que o seu pai ou nai traballa no municipio e, por último, para cativos de concellos limítrofes.

Tras esta primeira criba teranse en conta o baremo da Xunta de Galicia, no que se puntúa segundo situación familiar, laboral e económica. Aquelas familias que quedan en lista de agarda poden solicitar o Bono Concilia, unha axuda económica para poder matricular aos nenos noutros centros e que xa se pode solicitar nestes intres.

Con horario de 07.30 a 17.30 horas, os pais poden elixir se ir en media xornada (catro horas) ou en xornada completa (máis de catro horas), que poden estenderse ata en dúas horas a maiores en casos moi concretos por incompatibilidade horaria das familias. Ambas as dúas contan con servizo de comedor.

Dous centros, sete aulas

Na escola situada no centro de Tomiño sete persoas (dúas mestras, catro educadoras e unha persoa de servizos xerais) se encargan de atender aos 41 nenos matriculados nas tres aulas coas que conta (0-1, 1-2 e 2-3 anos). “Eu recomendaríalle aos pais que se animasen a vir, que moitas veces tense medo ao que se fai ou non na escola, pero os nenos veñen moi contentos e as familias teñen sempre as portas abertas”, explica a directora, Belén Domínguez.

Con metodoloxías de traballo “que se van adaptando aos novos tempos”, o alumnado que entra novo cada ano pasa un período de adaptación para que os nenos non acusen tanto o cambio.

En Goián, o total son 9 traballadores e unha cociñeira os que se encargan dos 61 nenos que teñen matriculados cada ano. Neste centro ademais dunha aula por idade, dispoñen dunha aula extra.

 

Liliya Pobornikova experimenta coa cerámica para mergullar ao Mercado de Tomiño lugares inesperados

Un experimento, “un primeiro paso e bosquexos para as vindeiras  esculturas grandes” é a exposición ‘Lugares inesperados’, coa que a artista Liliya Pobornikova explora as formas que xorden da imprevisibilidade orgánica e que encherán a primeira planta do Mercado de Tomiño ata o vindeiro 1 de abril. “É un sitio moi agradable para estar, facer a compra ou tomar un café e eu paso tempo alí case todos os días. Algunhas das esculturas expostas empezaron xusto alí como idea ou debuxo e para min é unha forma natural de pechar o círculo de idea, realización e final, compartindo con amigos e veciños o resultado do meu traballo”, salienta a escultora.

A artista búlgara mostra 19 esculturas e 4 relevos que supoñen para ela un experimento xa que normalmente as súas esculturas están feitas de materiais duros, tallando pedra ou madeira, e nesta ocasión fai unha incursión na cerámica, “un material moi distinto, porque as formas fanse modelando”. “É un xeito máis rápido de ver as ideas en tres dimensións. A maioría do tempo me dedico á escultura monumental, pero para facer unha obra grande antes soe pasarse por varias versións pequenas, buscando as proporcións, as formas e as texturas. E as esculturas de ‘Lugares inesperados’ son para mi un primeiro paso, bosquexos para as próximas esculturas grandes”, explica Pobornikova.

Afincada hai moitos anos en Tomiño, para as súas obras a artista inspírase “na natureza, na beleza das formas orgánicas, os contrastes de formas suaves e as redes xeométricas abrazándoas, os reflexos do mundo mariño, os recordos de viaxes en sitios afastados”. Estas obras seguen a busca de traballos anteriores da escultora, xa que algunhas xa existen en versións de pedra o madeira, “pero o material diferente achega novas posibilidades e ideas”.

Aínda que Pobornikova non é capaz de quedarse cunha soa peza da exposición porque “son os meus fillos e están feitas con igual amor e coidado”, si que lle chama a atención que todas aquelas persoas que visitan a exposición acaben tendo a súa obra preferida.

Liliya Pobornikova naceu en Bulgaria en 1979 e na actualidade vive e traballa en Tomiño. Finalizou os seus estudos na National Academy os Art, en Sofía, especializándose en esculturas de madeira. Forma parte da Unión de Artistas de Bulgaria e participou en máis dun cento de simposios de escultura en Austria, Arxentina, Brasil, China, Dinamarca e Xapón. Conta ademais con varios premios polos seus traballos en simposios e competicións.

 

Venres, 23 de marzo de 2018 

Tomiño participa no III Encontro da Rede Nacional da Cidade das Nenas e dos Nenos

Tomiño quere deseñar o seu futuro á medida dos nenos e das nenas, para que poidan fomentar a súa participación e involucralos no devir de políticas públicas que permitan aumentar a autonomía de rapaces e rapazas, tanto desde o punto de vista educativo como do espazo urbano. Por este motivo, acudiu estes días ao III Encontro da Rede Nacional da Cidade das Nenas e Nenos que se celebrou en Huesca e que reuniu a representantes de concellos e de diferentes entidades xunto ao creador do proxecto, o pedagogo Francesco Tonucci.

Durante dous días a alcaldesa de Tomiño, Sandra González, e o concelleiro de Planificación Territorial, Uxío Benítez, formaron parte dos grupos de traballo para poñer traballo en común e analizar as políticas públicas desde a participación infantil, as experiencias, a investigación e a innovación para crear un proxecto de cidade para toda a cidadanía. “Estamos aprendendo cos mellores, como o ideólogo do proxecto. Cidades, vilas e pobos de todo o estado traballando xuntos para aprender a darlle aos nosos nenos e nenas participación, para crear espazos urbanos de calidade e para seguir recollendo ideas”, salientou a alcaldesa.

O Concello de Tomiño xa ten avanzado moito neste eido coa posta en marcha en decembro do Consello da Infancia e da Adolescencia, no que 10 rapaces e rapazas da vila traballan xuntos para mellorar as condicións de vida dos nenos, nenas e adolescentes ao tempo que se fomenta a súa participación activa na vida municipal e a promoción de políticas locais que garantan o seu desenvolvemento integral.

Nestes dous días, os participantes neste terceiro encontro reflexionaron sobre as diferentes liñas de innovación en participación infantil que se levan a cabo e sobre a formación centrada na transversalidade do proxecto e participaron na charla sobre ‘A autonomía dos nenos e nenas, un dereito e necesidade para eles e un recurso para a escola e a cidade’ impartida polo propio Francesco Tonucci.

 

A asociación Vontade levará á asemblea a elaboración dun novo Plan Estratéxico 2018-2021

A Asociación de Persoas con Discapacidade Vontade celebrará a súa XVI Asemblea Xeral Ordinaria mañá, sábado, ás 11:30 horas en primeira convocatoria e as 12:00 horas, en segunda no Centro de Recursos Vontade, situado no Barrio A Rocha 19B, coa seguinte orde do día:

1.         Lectura e aprobación, se procede, da acta anterior.

2.         Cambios na Xunta Directiva.

3.         Informe de Xestión do ano 2017.

4.         Proposta para o ano 2018.

5.         Información sobre as prazas concertadas.

6.         Plan Estratéxico 18-21.

7.         Informacións varias.

8.         Rogos e Preguntas.

Destácase o punto 6 desta Asemblea, que tratará sobre a elaboración dun novo Plan Estratéxico 2018-2021, para tratar de dar a máxima cobertura ás necesidades das persoas con discapacidade da comarca do Baixo Miño e concellos limítrofes, facendo unha proxección de futuro que permita crear novas liñas de traballo. Este Plan Estratéxico é un pequeno paso adiante cara a total inclusión das persoas con discapacidade en tódolos sectores da sociedade.

No remate da Asemblea presentarase o Novo Servizo de Transporte Adaptado, financiado polo Ministerio de Sanidad, Servicios Sociales e Igualdad, con cargo á asignación tributaria do imposto sobre a renda das persoas físicas (IRPF); a Fundación Once, a Asociación de Desenvolvemento Eu Rural entidade colaboradora de AGDER, para o desenvolvemento da medida Leader do Plan de desenvolvemento Rural de Galicia 2014-2020, e a Obra Social La Caixa, financiando o mantemento dos vehículos.

 

Tomiño participa no III Encontro da Rede Nacional da Cidade das Nenas e dos Nenos

Tomiño quere deseñar o seu futuro á medida dos nenos e das nenas, para que poidan fomentar a súa participación e involucralos no devir de políticas públicas que permitan aumentar a autonomía de rapaces e rapazas, tanto desde o punto de vista educativo como do espazo urbano. Por este motivo, acudiu estes días ao III Encontro da Rede Nacional da Cidade das Nenas e Nenos que se celebrou en Huesca e que reuniu a representantes de concellos e de diferentes entidades xunto ao creador do proxecto, o pedagogo Francesco Tonucci.

Durante dous días a alcaldesa de Tomiño, Sandra González, e o concelleiro de Planificación Territorial, Uxío Benítez, formaron parte dos grupos de traballo para poñer traballo en común e analizar as políticas públicas desde a participación infantil, as experiencias, a investigación e a innovación para crear un proxecto de cidade para toda a cidadanía. “Estamos aprendendo cos mellores, como o ideólogo do proxecto. Cidades, vilas e pobos de todo o estado traballando xuntos para aprender a darlle aos nosos nenos e nenas participación, para crear espazos urbanos de calidade e para seguir recollendo ideas”, salientou a alcaldesa.

O Concello de Tomiño xa ten avanzado moito neste eido coa posta en marcha en decembro do Consello da Infancia e da Adolescencia, no que 10 rapaces e rapazas da vila traballan xuntos para mellorar as condicións de vida dos nenos, nenas e adolescentes ao tempo que se fomenta a súa participación activa na vida municipal e a promoción de políticas locais que garantan o seu desenvolvemento integral.

Nestes dous días, os participantes neste terceiro encontro reflexionaron sobre as diferentes liñas de innovación en participación infantil que se levan a cabo e sobre a formación centrada na transversalidade do proxecto e participaron na charla sobre ‘A autonomía dos nenos e nenas, un dereito e necesidade para eles e un recurso para a escola e a cidade’ impartida polo propio Francesco Tonucci.

 

Xoves, 22 de marzo de 2018 

As historias de mulleres enchen esta fin de semana o Mercado de Tomiño

A Programación de Primavera do Concello de Tomiño presenta esta fin de semana, no Mercado do Seixo, teatro para adultos e contacontos.

A Cooperativa Galega de Artistas Charlatana presenta o sábado ‘Matrioskas’, un espectáculo dirixido por Brais Hortas no que a contadora Marta Ortiz e a cantante Sofía Espiñeira se subirán ao escenario para poñerlle voz a historias de vida de diferentes mulleres que foron “pasando dunhas a outras nun fío invisible, coma os puntos que se soltan dun tecido, coma a onda do mar que morrendo se xunta coa seguinte”. Esta obra teatral, recomendada para maiores de 15 anos, comezará ás 18.00 horas no Mercado de Tomiño, con entrada de balde.

Para toda a familia

A tarde de domingo en Tomiño estará dedicada ao público familiar. Raquel Queizás, considerada unha das mellores narradoras galegas do momento, chegará ao Mercado para abrir as portas a un mundo de contos e fantasías nunha tarde de tradicións e ocio con moitas sorpresas. A contadora levará con ela ‘A maleta da avoa’, unha maleta que representa a memoria e na que a protagonista garda todos os contos que a súa avoa lle contaba cando era unha nena á hora de comer, cando ían lavar a roupa ao río ou traballando no campo.

Queizás chegará coa maleta cargada de pequenos tesouros, libros, culleres, bonecas de millo, sombreiros... e monicreques e adiviñanzas cos que entreter aosenos. Este espectáculo familiar, dirixido especialmente a cativos a partir dos tres anos, comezará ás 18.00 horas no Mercado. A entrada, de balde.

Estas dúas obras forman parte da Programación de Primavera do Concello de Tomiño e enmarcase na serie de actividades organizadas ao longo de marzo como Mes da Muller, no que todas as accións programadas teñen un claro protagonismo feminino e de loita pola igualdade.

 

Sofía Areal presidirá o Consello da Infancia e da Adolescencia, que se chamará Voces Novas de Tomiño

O Consello da Infancia e da Adolescencia continúa a traballar para mellorar as condicións de vida dos nenos e adolescentes e a súa participación activa na vida municipal e a promoción de políticas locais que garantan o seu desenvolvemento integral. Esta folla de ruta iniciada o pasado mes de decembro continuou coa celebración de sucesivos consellos nos que se decidiron o nomeamento da súa presidenta, Sofía Areal, e que a organización leve o nome de Voces Novas de Tomiño. Ademais, crearase un enderezo electrónico, vocesnovas.tomino@gmail.com, que servirá de canle de comunicación co resto dos veciños e veciñas do municipio.

O Consello celebrará unha nova convocatoria este venres, 23 de marzo, ás 18.30 horas no salón de plenos do Concello. Nesta reunión os integrantes do consello aprobarán o regulamento interno e valorarán os documentos do V Encontro de Consellos de Infancia e Adolescencia, que se celebrará en Oviedo en maio e ao que Tomiño non poderá asistir pola grande afluencia de solicitudes que recibiu a organización do evento.

Nestes intres 10 mozos integran o Consello tomiñés, aínda que a participación continúa aberta a todos os rapaces interesados en formar parte desta iniciativa, que soamente teñen que encher un formulario de inscrición (http://tomino.gal/wp-content/uploads/2018/01/Autorizacion.pdf) no que os pais ou titores legais dan o consentimento de participación ao ser todas as persoas integrantes menores de idade.

Cidade Amiga da Infancia

A posta en marcha deste Consello é un dos pasos que está a dar o concello de Tomiño para conseguir o selo de Cidade Amiga da Infancia concedido por Unicef, que recoñece o labor dos municipios a prol de mellorar as condicións de vida dos nenos e adolescentes, a súa participación activa na vida municipal e a promoción e implantación de políticas locais que garantan o seu desenvolvemento integral cun enfoque de dereitos.

 

Mércores, 21 de marzo de 2018 

A OMIX convoca unha nova edición do concurso de deseño da camiseta do Día das Letras Galegas

Un ano máis a OMIX de Tomiño conmemorará o 17 de maio convocando unha o concurso de deseño da camiseta do Día das Letras Galegas 2018.

O deseño será libre e aberto e valorarase que sexa atractivo, inspirado e que busque a promoción do uso e normalización o galego en todos os ámbitos. Deberá colocarse unicamente na parte dianteira da camiseta cunha soa cor a estampar sobre fondo branco.

Como novidade, todas as persoas que participen enviando as súas creatividades serán agasalladas cunha camiseta co modelo gañador. Ademais, o autor da camiseta elixida para representar ese día será premiado con dúas camisetas coa imaxe, un libro escrito pola autora homaxeada este ano, María Victoria Moreno, e coa difusión tanto nas redes sociais como nos diferentes medios de comunicación da súa obra.

Todas as persoas interesadas en participar poderán enviar a súa proposta ata o vindeiro 7 de maio ás 12.00 horas.

 

Martes, 20 de marzo de 2018 

O OPT Cerveira-Tomiño, entre as cinco mellores prácticas de participación cidadá en Portugal

O Orzamento Participativo Transfronteirizo (OPT) Cerveira-Tomiño foi elixido entre as cinco mellores prácticas de participación cidadá en Portugal de entre un total de 19 iniciativas presentadas como candidatas ao Premio de Boas Prácticas de Participación 2017. Este certame, posto en marcha pola Rede de Autarquias Participativas lusas, busca incentivar a implementación, difusión e posta en valor de prácticas innovadoras da democracia participativa a nivel local.

“Unha vez máis Tomiño e Cerveira están a destacar no ámbito da colaboración transfronteiriza, algo que nos alegra moito porque non se trata dunha cooperación que xurde agora, senón que levamos traballando nela man a man moitos anos”, explica a alcaldesa de Tomiño, Sandra González. A alcaldesa salienta ademais que “froito dese traballo conxunto son as subvencións acadadas por parte da Unión Europea e nese camiño é no que queremos continuar, para seguir conseguindo melloras para a cidadanía”.

Tras a avaliación do xurado, as cinco prácticas mellor clasificadas foron o Orçamento Participativo Jovem de Cascais, que obtivo unha puntuación de 8,87; o OPT Cerveira-Tomiño (8,27); o Plano Municipal de Juventude de Vila Nova de Gaia (8,01); Momentos i de Viana do Castelo (7,99) e o Orçamento Participativo de Funchal (7,77). Agora iniciarase unha fase de votación pública que arrancará o vindeiro 26 de marzo e na que o público poderá elixir o seu proxecto favorito ata o 22 de abril na web www.portugalparticipa.pt.

I Fórum Rexional en Braga

Os municipios de Tomiño e Vila Nova de Cerveira participaron o pasado venres no I Fórum Rexional do Ciclo de Formacións Rexionais da Rede de Autarquias Participativas (RAP), celebrado en Braga, para achegar o seu testemuño sobre a posta en marcha do Orzamento Participativo Transfronteirizo Cerveira-Tomiño, que acaba de rematar o período de votación das actividades que se levarán adiante en ambos os dous municipios dentro da segunda edición do proxecto.

As técnicas responsables da Axenda de Cooperación Estratéxica entre Tomiño e Cerveira, Elísabet de Santiago e Sónia Antunes, explicaron ao público participante no foro como se desenvolve o proxecto en ambos os dous lados do río Miño e o que supón para cada municipio a participación nunha iniciativa desta entidade que permite “deseñar e executar políticas públicas para a desfronteirización”, así como os resultados das primeiras actividades conxuntas celebradas ao longo do 2017 e das votacións desta segunda edición.

O OPT trátase dunha iniciativa pioneira na Eurorrexión Galicia-Norte de Portugal que busca implicar á poboación de Tomiño e Cerveira na definición de solucións para necesidades comúns. Trátase dun proxecto integrado na Axenda Estratéxica para a Cooperación Transfronteiriza Amizade Tomiño-Cerveira, cofinanciado ao 75% polo programa INTERREG VA POCTEP, fondos FEDER da Unión Europea.

 

Luns, 18 de marzo de 2018 

Tres medallas para o Club Deportivo miño na 2ª Copa de España de Slálom

Informa Rosa Fernández Carrera

Esta fin de semana celebrouse en Mondariz-Balneario, nas augas do río Tea, a segunda das competicións da Copa de España de Slálom. O bo tempo acompañou a esta celebración na que se deron cita máis de 200 participantes, os mellores do slálom español. So faltou a olímpica Maialen Chorraut, por lesión.

O club Deportivo Miño inscribiu a 15 deportistas, pero so 10 participaron na competición oficial, os outros cinco foron en calidade de abridores.

Na categoría absoluta, sénior feminino, Laura Alonso foi a mellor no décimo cuarto lugar cun recorrido sen penalizacións, Laura Soutelo e Marina Ruedas decimo oitava e décimo novenas respectivamente.

Na categoría cadete, Ariadna Pereira, baixou en canoa e caiac. En canoa rematou quinta, non entrando en finais por non superar o tempo de corte, na categoría k1, conseguiu facer final, rematando cuarta e rozando a medalla de bronce.

En C1 sénior tanto Brais Castro como Luís Fernández superaron as clasificatorias do sábado, entrando  en semifinais. Xa na mañá do domingo Luís conseguiu pasar a finais mentres que Brais Castro quedou fóra por apenas dous segundos, rematando finalmente nun envexable  sexto posto. Na final Luís Fernández fixo unha baixada impresionante que lle valeu a medalla de prata por detrás de Dani Marzo e por diante do olímpico Ander Elosegui. Esta é a segunda medalla para o deportista de Salceda na Liga Española de Slálom Olímpico, o que da fe do seu bo momento esta tempada.

En K1 sénior, a categoría máis numerosa e igualada, Manuel Ochoa fixo unha boa clasificatoria na mañá do sábado, pasando a semifinais co quinto mellor tempo. A primeira hora do domingo cunha baixada rápida e sen penalizacións conseguiu entrar en finais. Xa na final, Manuel fixo unha baixada limpa e moi rápida que lle valeu unha medalla de bronce a apenas un segundo do segundo clasificado Unai Nabaskues e a tres do gañador Joan Crespo.

En K1 veterano, Emilio Rodríguez, fixo finais e na mañá do domingo foi quen de facer o mellor tempo da súa categoría, por diante de Raúl Barba e de Juan Segundo, o que o fixo merecedor da medalla de ouro.

Na clasificación final por equipos o Club Deportivo Miño-Teixugos remataron sétimos. Destacar o segundo lugar conseguido polos galegos do Penedo e o quinto lugar do club organizador do evento, o Tea de Mondariz.

Non puido ir mellor o evento para os teixugos, coas súas tres medallas. O seguinte reto para este deportistas será superar os selectivos para formar parte do equipo español sénior e sub-23 de slálom, que se celebraran en abril e maio nas localidades de Pau e Seu D´Urgell, e para os que están clasificados Brais Castro e Luís Fernández en canoa, e Manuel Ochoa en caiac.

 

Sábado, 17 de marzo de 2018 

Talía Teatro combate en Tomiño os estereotipos coa súa obra ‘Rosa Caramelo e outras historias’

A Programación de Primavera do concello de Tomiño trae á localidade á compañía Talía Teatro esta fin de semana cun espectáculo que pretende darlle a volta aos roles e estereotipos de xénero. Será coa representación de ‘Rosa Caramelo e outras historias’, unha obra dirixida pola autora teatral e actriz Paula Carballeira que a través da palabra e da música en directo tratará de crear unha atmosfera axeitada para axudar aos nenos a desmontar unha serie de “ideas impostas e fortemente asumidas sobre as actitudes e aptitudes de mulleres e homes”.

A representación, recomendada para cativos de 4 a 8 anos, terá lugar o vindeiro domingo 18 de marzo na Casa da Cultura de Tomiño a partir das 18.00 horas. O prezo da entrada será de 3 euros para público adulto e de balde para nenos. Todas as persoas interesadas poderán adquirir a súa entrada no despacho de billetes dende unha hora antes do inicio da obra.

Talía Teatro recolle nesta ocasión catro coñecidos relatos da escritora italiana Adela Turín, unha referencia internacional para a educación en igualdade, para construír un espectáculo no que os roles de xénero deixan de existir. O actor Artur Trillo, acompañado en escena polo acordeonista Fernando Fraga, recreará os mundos de ‘Rosa Caramelo’, ‘A historia dos bonobos con lentes’, ‘Unha feliz catástrofe’ e ‘Atur e Clementina’, contos nos que elefantes, chimpancés, tartarugas e ratos serán os protagonistas.

A obra forma parte da Programación de Primavera do Concello de Tomiño e enmárcase na serie de actividades organizadas ao longo de marzo como Mes da Muller, no que todas as accións programadas teñen un protagonismo feminino e de loita pola igualdade.

 

Venres, 16 de marzo de 2018 

O Spartan Team de Tomiño ponse a proba na velada de boxeo Stars Battle 2 de Vigo

O Spartan Team de Tomiño participou esta pasada fin de semana na velada de boxeo Stars Battle 2, celebrada no pavillón de Bouzas, en Vigo, regresando con sabor agridoce.

O inicio da velada arrancaba de cara para Ismael Pérez, que conseguía unha nova vitoria por puntos no primeiro combate da noite, impoñéndose de xeito contundente ao seu rival, e volvendo a demostrar o seu potencial nun bonito combate.

Non tivo tanta sorte Fabio Montenegro no seu debut, que foi derrotado por KO técnico no terceiro asalto a apenas trinta segundos do remate do combate despois de que o árbitro decidira deter o asalto por superioridade do seu rival. Derrota “con orgullo e valentía” deste boxeador que leva apenas uns meses de adestramento e que se enfrontaba a un contrincante do que o separaba unha considerable diferencia de peso.

O Concello de Tomiño que dar a noraboa a estes dous campeóns e a todos os deportistas do Spartan Team de Tomiño polo gran papel desempeñado nesta proba e por todo o esforzo dedicado a este deporte.

 

Gondomar acolle unha exposición sobre a dimensión máis humana de Antón Alonso Ríos

Unha mostra coa que “chegar ao ser humano, á persoa que hai detrás desa figura mítica”. Así explica a súa comisaria, Natalia Jorge, como será a exposición sobre Antón Alonso Ríos que chega este sábado 17 de marzo ao auditorio Lois Tobío de Gondomar. “Búscase amosar outra dimensión de Alonso Ríos, descubrir á persoa que había detrás das súas publicacións, e desvelar ao público esas tres etapas polas que pasou e que tan ben reflexadas están en tres cadros que se poden ver na exposición: como mestre e a nivel político, como esmoleiro para escapar da represión franquista e xa maior, co seu fillo nas mans, a un nivel máis persoal”, salienta Jorge.

Organizada polo concello tomiñés, onde a mostra estivo aberta ao público o pasado mes de outubro, a exposición fai un percorrido polo periplo vital e a longa traxectoria do mestre, político e escritor silledense, que desenvolveu unha gran labor docente en Tomiño nos anos 30 do século pasado.

A mostra recrea unha aula da época, con mobles e instrumental orixinais, así como obxectos documentais cedidos pola Fundación Peirópolis de Estás. Ademais o público poderá atopar libros relacionados coa biblioteca persoal de Alonso Ríos durante a súa estadía en Bos Aires, todo cedido pola propia familia do autor. Nesta biblioteca o poderá atopar exemplares de filosofía, orixinais de publicacións súas ou a correspondencia enviada a Isaura Gómez Pérez, veciña de Tomiño, a quen escribiu dende 1975 atan o seu pasamento en 1980 e na que se reflicte o pensamento do autor nos anos posteriores á ditadura franquista.

Alonso Ríos foi un dos persoeiros máis destacados na historia galega do último século polo seu labor pedagóxico, político e pola súa implicación no movemento agrarista. A súa obra máis emblemática, ‘Siñor Afranio, ou como me rispei das gadoupas da morte’, trátase dunha obra descatalogada e moi demandada polo público.

A mostra, que poderá visitarse ata o 31 de marzo (de 16.00 a 20.00 horas), inaugurarase coa conferencia de Carlos Méixome, profesor e membro do Instituto de Estudos Miñoranos, institución que garda documentos orixinais relativos á figura do Siñor Afranio, dende manuscritos orixinais do libro ata unha fotografía orixinal, a única existente deste personaxe, a correspondencia cruzada con Álvarez Blázquez e Alonso Ríos ou unha novela inédita mecanografada titulada ‘Nidia’.

 

Xoves, 15 de marzo de 2018 

A XIX Concentración Clásicos Baixo Miño adiántase ao 27 de maio

            A XIX Concentración Clásicos Baixo Miño, sinalada para o día 3 de xuño, adianta a súa celebración para o 27 de maio por xurdir algún problemas de organización, festa do Corpus e lugar para o xantar. Pode participar neste encontro calquera vehículo histórico, aínda que sexa sen restaurar pero documentado e seguro, pode ser coche de cabalos ou tractor, evitando vehículos moi grandes tipo autobús, camión ou limusinas.

A Concentración terá lugar en Tomiño, cun percorrido de 10 Km para acudir á romaría  con misa, foguetes, charanga e procesión, nunha carballeira da capela.

O encontro continuará con comida social e festa, polo que animan a que os participantes acudan con vestimenta de romaría

            A Asociación Clásicos Baixo Miño disporá de pinchos e bebida, pero se alguén quere pode levar unha carabela por grupos.

O custo pode aproximarse a 20 € persoa

 

O Concello de Tomiño  traballa para a creación dunha senda peonil e ciclista que mellore a seguridade en Forcadela

O Concello de Tomiño segue a traballar para mellorar as rúas do municipio e a seguridade dos peóns que se moven pola vila, nesta ocasión na parroquia de Forcadela. O goberno municipal vén de chegar a un acordo coa Consellería de Infraestruturas para a cesión ao concello dunha das rúas da parroquia, agora de titularidade autonómica, a cambio de que a Xunta de Galicia se encargue das obras para a creación na zona dunha senda peonil e ciclista que sirva “para facilitar o acceso aos veciños e, sobre todo, para mellorar a súa seguridade”, explica o concelleiro de Obras e Saneamento, Francisco Campo

Para levar adiante o proxecto, o concello necesita a disposición de arredor dunha vintena de terreos, todos eles “fincas pequenas de entre 4 e 6 metros de ancho”. Campos e a concelleira Ana Cristina Martínez reuniranse hoxe, xoves, na Casa dos Mestres cos preto de 20 propietarios dos terreos afectados para explicarlles o proxecto e falar da cesión dunhas propiedades que ocuparían en total arredor de cen metros cadrados.

Dende a Casa dos Mestres ao CRA

O proxecto contempla a creación dunha senda peonil e para ciclistas sinalizada que vaia dende a antiga Casa dos Mestres ata a Aula do CRA Mestre Manuel Garcés en Forcadela, o que deixaría todo o centro da parroquia ben comunicado e melloraría os accesos e a seguridade para os peóns. A senda podería estenderse ata a igrexa, aínda que esa zona xa conta con beirarrúas para garantir a seguridade dos veciños.

 

A Aula CeMIT de Tomiño acolle un exame para obter o certificado de competencias dixitais

A Aula CeMIT de Tomiño acolle unha nova proba de avaliación de carácter libre para a obtención da certificación galega de competencias dixitais en ofimática (CODIX), que se realizará o vindeiro 25 de abril, ás 10.00 horas, e na que poderá participar toda a cidadanía en xeral que, ben pola súa experiencia ou pola súa formación adquirida por diferentes medios, xa posúe os coñecementos necesarios das aplicacións informáticas que compoñen o módulo formativo de Ofimática baixo o paquete de LibreOffice.

As persoas interesadas poden facer a súa inscrición ata o vindeiro martes, 20 de marzo, inclusive, sendo necesario estar dado de alta como usuario na rede CeMIT para formalizar a matrícula. Aqueles interesados en recibir máis información ou solucionar dúbidas poden facelo enviando un correo electrónico a cemit.tomino@xunta.gal, chamando ao 986 62 33 04 ou pasando pola aula situada no Campo da Feira.

A inscrición será por orde de chegada da solicitude e soamente poderá presentarse unha solicitude por persoa, sendo excluídas as que figuren inscritas en máis dunha localidade ou en máis dun horario.

Rematado o prazo de inscrición realizarase o sorteo das letras do apelido para establecer a orde de inscritos con dereito a matriculación e configurar a listaxe de reservas por localidades. O resultado publicarase na páxina web do CeMIT e se lles enviará ás persoas seleccionadas un correo coas instrucións e prazo para a realización da súa matriculación, que se realizará mediante o pagamento da taxa de 10,20 euros ou a xustificación da súa exención.

 

Mércores, 14 de marzo de 2018 

O programa ‘Cos pés na terra’ desvela os segredos sobre os enxertos en plantas de inverno

Durante horas os participantes no programa “Cos pés na terra” aprenden os segredos sobre os enxertos en plantas de inverno, a súa finalidade, tipos, límites e incompatibilidades, así como a preparar as xemas, ferramentas e material vexetal para poñelos en práctica. Esta foi a última actividade das accións informativas e demostrativas postas en marcha pola Asociación de Desenvolvemento EU Rural que dende o pasado mes de agosto realizou oito accións centradas no sector agrario.

Durante catro xornadas, o profesor Santiago Ramos ensinou ás 20 persoas participantes no curso a teoría e sobre todo a práctica de como facer os enxertos nas plantas de inverno en Viveiros Nilo. Trátase da actividade con máis éxito de todas as realizadas ata o de agora, xa que ademais de cubrir as prazas totais contaba cunha lista de agarde de preto de 50 persoas. O motivo, que moitos das persoas participantes acudiran ao curso de enxertos de verán co que arrancou o programa ‘Cos pés na terra’ e buscaban a continuidade dos coñecemento. Aceptados por rigorosa orde de inscrición, a maior parte dos participantes son de Tomiño, seguidos do Rosal.

            ‘Cos pés na terra’ é un programa que busca fomentar o desenvolvemento do medio rural por medio da formación e sensibilización en materia agrícola. Por este motivo dende o pasado mes de agosto realizáronse cursos e conferencias sobre a preparación de solos, podas e variedades en especies froiteiras atlánticas; sobre pragas, sistemas de control e novas tecnoloxías no emprego de produtos fitosanitarios ou sobre o uso eficiente da auga nas explotacións e tamén se achegou ao público a experiencia de especies froiteiras noutros territorios, se lle amosou novas alternativas para o agro cun netwworking sobre ventas ou se lle ensinaron as ferramentas necesarias para emprender.

Todas estas accións contaron coa financiación ao 75% polo FEADER no marco do PDR de Galicia 2014-2020 e coa colaboración do concello de Tomiño e da Asociación de Cultivos do Baixo Miño (acuBam).

Con este ciclo rematado, a organización do programa xa está a pensar na posta en marcha da convocatoria de novos cursos para continuar na senda da formación da poboación sobre aspectos do rural.

 

Tomiño comeza a Programación de Primavera, que por primeira vez aglutina cultura, deporte, mocidade e voluntariado

Un programa de actividades transversal e integrador, no que se lle dá acollida a todas as citas de cultura, deporte e voluntariado, así como as dirixidas á mocidade, recóllense na Programación de Primavera do Concello de Tomiño, que por primeira vez aglutina todas as actividades realizadas no municipio nun só programa para o vindeiro trimestre co obxectivo de “facilitar a difusión e traballar dun xeito planificado para conseguir que toda as actividades que levemos a cabo sexan un éxito”, como asegura a alcaldesa, Sandra González.

Precisamente coa intención de facer chegar a información de todo o que se realice en Tomiño ao longo dos vindeiros meses, o Concello editou unha axenda en papel que recolle as preto de 30 actividades que se levarán a cabo entre marzo, abril e maio. Esta axenda está a ser colocada en lugares de moito tránsito para difundir as actividades e facer chegar o programa a todos os veciños da vila, pero tamén pode consultarse directamente na web do concello (http://tomino.gal/axenda-primavera-2018/).

A programación arrancou a pasada semana coa inauguración no Mercado de Tomiño da exposición ‘Lugares inesperados’, unha mostra cerámica na que a artista Liliya Pobornikova explora as formas que xorden da imprevisibilidade orgánica, e coa obra de teatro ‘Té con Kant’, de Teatro Inversa.

Por primeira vez marzo é o Mes da Muller

Dentro da axenda, estas dúas actividades forman parte da programación especial de marzo, que por primeira vez foi declarado polo concello tomiñés como Mes da Muller e no que todas as actividades teñen un claro protagonismo feminino, como por exemplo os dous cursos de pilates para avoas, nais e fillas, cun grande éxito de acollida.

A oferta en clave feminina continuará co obradoiro ‘Mulleres artistas por descubrir’, que dende o 14 de marzo dá a coñecer a grandes mulleres artistas que permanecen no anonimato e co mural feminista ‘Anónimas’ que a artista Gemma Marqués está a crear no campo de fútbol de Goián, que pretende poñer en valor o labor e esforzo diario familiar e laboral das mulleres.

Ao abeiro deste Mes da Muller, marzo acollerá outras tres obras de teatro no que as mulleres son as protagonistas. O público infantil poderá desfrutar con ‘Rosa Caramelo e outras historias’, de Talía Teatro, o 18 de marzo na Casa da Cultura ás 18.00 horas, e con ‘A maleta da avoa’, de Raquel Queizás, o 25 de marzo no Mercado de Tomiño ás 18.00 horas, mentres que para o público adulto representarase ‘Matrioskas’, de Charlatana, o vindeiro 24 de marzo no Mercado de Tomiño ás 18.00 horas.

Unha trintena de actividades

O mes de marzo completarase con tres cursos dirixidos á mocidade, de Francés Básico, de Radio e de Poesía e Rap. Para abril hai sete actividades programadas. Xunto con un curso de repostería creativa, terá lugar tamén a Gala do Deporte, o 14 de abril, no auditorio de Goián, na que se premiarán aos deportistas tomiñeses máis destacados neste último ano, e o Desafío Terras de Turonio, unha proba de BTT de longa distancia que terá lugar o 22 de abril.

O 9 de abril chegará a Tomiño unha nova edición de Reptigalia, con exposicións, obradoiros e conferencias sobre insectos, réptiles, anfibios e artrópodos, e se representarán outras tres obras de teatro: ‘A nena que quería navegar’, de Redrum Teatro, o 1 de abril, dirixida a público infantil; ‘Na butaca’, de ButacaZero, para público adulto, o 7 de abril, e ‘Sen remite’, de Jean Philippe Kikolas, circo, teatro e humor para toda a familia, o 29 de abril.

En maio as Letras Galegas terán importante protagonismo, con actividades lúdicas e educativas pola vila o propio día 17, con obradoiros e Feira do Libro na praza do Seixo, música e o espectáculo ‘Bicos de papel’, de Talía Teatro, na Casa da Cultura. Será tamén o mes do curso de xaponés e de tai-chi chuan, dun obradoiro de canto ‘Cantares do Brueiro’ e tres concertos: ‘A gramola gominola’, de Kandengue Arts o 5 de maio para público infantil; a actuación do coro galego Cantares de Brión, o 12 de maio no auditorio de Goián, e o concerto de ‘De outra margem’, o grupo musical formado por profesorado de primaria e secundaria que realizará unha actuación en colaboración co alumnado e ex alumnado do IES Antón Alonso Ríos e membros da Agrupación Musical de Goián, o 19 de maio.

Maio será tamén o mes das Barferencias, unha iniciativa a través da que se leva as conferencias ao Mercado de Tomiño para falar cada sábado de varias iniciativas emprendedoras relacionadas co rural: CdM Couso, innovación no agroalimentario, a minaría e os montes e o asociacionismo e a educación ambiental con A Jalleira.

 

Martes, 13 de marzo de 2018 

O Concello de Tomiño destinará 95.000 euros á subvención de asociacións deportivas e actividades sociais e culturais

Xa están publicadas no Boletín Oficial da Provincia de Pontevedra (BOPPO) as bases para as subvencións municipais dirixidas a entidades sen fin de lucro que desenvolven ao longo de 2018 actividades sociais, culturais e deportivas, así como para deportistas individuais.

A través destas axudas, o Concello de Tomiño investirá 95.000 euros para apoiar e promover todas aquelas actividades que repercutan no desenvolvemento do municipio e que contribúan ao fomento dos intereses dos veciños, en especial ao benestar social da cidadanía, á promoción da cultura e ao fomento do deporte.

40.000 euros en axudas deportivas

O goberno municipal destinará 40.000 euros a entidades sen fin de lucro e deportivas individuais coa finalidade de fomentar a práctica deportiva, a participación en competicións oficiais e o desenvolvemento de actividades deportivas durante todo o ano. O prazo de presentación de solicitudes permanecerá aberto no Concello de Tomiño durante 30 días despois da súa publicación, rematando o 2 de abril.

Neste caso serán subvencionales os gastos federativos correspondentes á tempada, os gastos de arbitraxe, os de transporte e aloxamento relacionados coa asistencia a competicións deportivas, os de mutualidades e seguros, os de material deportivo de carácter funxible ou de carácter inventariable e os gastos de equipamento e vestimenta deportiva. Cando a subvención sexa solicitada para deportistas individuais de Tomiño estes terán que ser recoñecidos a nivel galego, estatal ou internacional.

Orzamento de 40.000 euros para subvencións culturais

Pola súa banda, o Concello de Tomiño tamén destinará un orzamento de 40.000 euros a axudas municipais para entidades sen fin de lucro para a realización de actividades culturais durante o ano 2018, coas que se busca contribuír ao desenvolvemento de proxectos ou actividades culturais que fomente os intereses xerais ou sectoriais dos veciños, con especial atención á promoción ou recuperación da cultura e tradicións locais. O prazo para a presentación de solicitudes empezará ao día seguinte á súa publicación no BOPPO, o 12 de marzo, e finalizará no prazo dun mes natural.

As axudas neste eido estarán destinadas á realización de actividades por asociacións culturais, veciñais e xuvenís, a actividades de recuperación e difusión do patrimonio cultural, de promoción dos produtos agrícolas e gastronómicos da zona, á recuperación de espazos naturais ou de lecer e a outros proxectos de especial interese cultural e social.

Quedan especificamente excluído o uso destas axudas para a adquisición, reparación ou mantemento de bens de inmobilizado; para o consumo eléctrico, telefónico e similares; para a celebración de festas parroquiais; para gastos derivados de comidas ou que non estean directamente vinculados á actividade obxecto da subvención; así como para saldos debedores das contas bancarias, de procedementos xudiciais, impostos, recargas e sancións administrativas.

15.000 euros para actividades sociais

O Concello destinará 15.000 euros para subvencións a entidades sen fin de lucro para a realización de actividades que promovan o benestar social da cidadanía a través de accións de prevención, asistencia, incorporación social, fomento e sensibilización da participación cidadá dentro do ámbito dos Servizos Sociais durante o 2018. As solicitudes poden presentarse dende este 13 de marzo, día despois da publicación no BOPPO, e finalizará no prazo dun mes natural.

A través destas axudas o Concello quere axudar a financiar os gastos de proxectos de atención á discapacidade e aos menores, de apoio á dinámica familiar, de voluntariado social, de atención á toxicomanía, de prevención de situacións de violencia intrafamiliar, de promoción da igualdade de oportunidades entre homes e mulleres, de atención á inmigración e a minorías étnicas e outros proxectos de especial interese social nos que estea xustificada a financiación municipal.

 

As antigas xeracións de panadeiros de Tomiño reuníronse por primeira vez

O pasado domingo reuníronse en Tomiño, nun primeiro encontro, panadeiros e pasteleiros da localidade, maiormente xubilados, nunha convivencia na que compartiron experiencias e, sobre todo, lembranzas.

Arredor de 25 persoas de entre 60 e 80 anos déronse cita no Candil durante a cal xurdiron “anécdotas e rememoraron como funcionaba todo antes, hai anos, cando todo se facía a man”, conta Marcos Castro, terceira xeración de panadeiros de Camiño Novo e organizador desta xuntanza. A idea era “xuntalos porque algúns fai moitos anos que no se vén” e que pasasen un tempo entretido xuntos.

Aínda que moitos deles xa non están a traballar, si que viviron de primeira man a evolución no funcionamento da panadaría e da pastelaría, onde pasaron de facer todo a man a utilizar máquinas, ou de repartir o pan polas casas en burro a empregar coches e furgonetas, que fan o traballo máis rápido e cómodo. “Moitos deles viviron épocas duras, como a da posguerra, e aínda que tiñas un negocio daquela non sempre pagaban con cartos, as veces o cobro era en fariña que logo ti empregabas para facer máis pan”, explica Castro.

 

Sábado, 10 de marzo de 2018 

O río da Pedra acolle este domingo a I Copa de Promoción da Liga Galega de Slálom

O Club Deportivo Miño-Os Teixugos será o anfitrión esta fin de semana na I Copa de Promoción da Liga Galega de Slálom en augas bravas, que se celebrará este domingo, 11 de marzo, no río da Pedra, en Tomiño, a partir das 11.00 horas.

Trátase da primeira proba das oito que conforman o calendario da liga galega de promoción de slálom e que se celebrarán ao longo do ano en Salvaterra, Mondariz, Ribadumia, Monforte ou Dumbría. “Todos os equipos tentamos organizar algunha proba para conseguir facer unha liga aberta”, salienta Pablo Pousa, presidente do club. O equipo colaborará tamén en setembro na organización da Regata Internacional Ponte da Amizade, que reúne cada ano a máis de 400 atletas en Vila Nova de Cerveira.

Nesta ocasión o club de piragüismo tomiñés participará nesta proba con 12 deportistas das categorías infantil e alevín en K1, C1 e C2. A organización espera que arredor de 100 piragüistas de Galicia e Portugal acudan a esta cita en Tomiño.

O Club Deportivo Miño-Os Teixugos leva dende o ano 1998 dedicándose ao piragüismo de augas bravas. As e os deportistas que adestran no club comezaron o ano con importantes vitorias, como as 12 medallas na IX Taça Ibérica de Slálom, da que formaron parte como organización, ou os 15 podios na II Copa Galega de Slálom celebrada en Salvaterra en distintas categorías.

 

Venres, 9 de marzo de 2018 

O que se enchufa Tomiño recíclao

O Concello de Tomiño súmase á campaña posta en marcha pola Consellería de Medio Ambiente da Xunta de Galicia en colaboración con Ofiraee, “O que se enchufa recíclase”, que ten coma obxectivo informar e sensibilizar para a correcta xestión de residuos de aparellos eléctricos e electrónicos (RAEE) a través dos puntos de venta dos mesmos. Para a concelleira de Medio Ambiente, María Xosé Vázquez, a participación de Tomiño en iniciativas como estas “é fundamental para fomentar entre a poboación a xestión de residuos de xeito responsable”.

Ata hoxe, venres, dous asesores teñen un punto informativo nos soportais ou dentro do Mercado de Tomiño no que os interesados recibirán unha breve explicación sobre o que son e onde se poden depositar os RAEE e poderá participar nun sinxelo xogo de ruleta co que marcharse para a casa.

Os RAEE son televisores, frigoríficos, tablets e planchas, entre outros aparellos, que cando xa non serven e calquera persoa quere desfacerse deles deben ser levados aos establecementos adheridos ou aos puntos limpos dos concellos para reciclalos do xeito correcto. Os aparellos eléctricos ou electrónicos son produtos moi complexos, con moitos materiais (metal, madeira, plástico, cartón, cristal líquido) e distintos tipos de pezas. Por exemplo, nun móbil hai ata 40 tipos de materiais e terras raras que teñen un alto valor, polo que recuperalos é unha forma de minería urbana, respectuosa coa contorna e que favorece o aforro dos recursos naturais.

Estes aparellos poden ter un uso particular ou profesional, xa que non só se reciclan os aparatos eléctricos e electrónicos que se teñen na casa. Ademais, os aparellos necesarios para xerar, transmitir e medir as correntes e campos electromagnéticos tamén se deben reciclar.

Esta campaña ten por obxectivo fomentar a correcta xestión destes residuos e formar e informar aos consumidores dos dereitos e obrigas que establece o real decreto 110/2015 tanto para á cidadanía como consumidora como para os distribuidores deste tipo de aparellos. A iniciativa, que se leva a cabo en 138 concellos galegos de máis de 4.000 habitantes, complétase coa instalación de máis de 1.000 contedores en puntos de venta de electrodomésticos nos que depositar estes residuos.

 

A OMIX de Tomiño oferta un obradoriro de ‘Chupipostres: cupcakes e galletas de mantequilla’

A Oficina Municipal de Información Xuvenil (OMIX) de Tomiño  abre o prazo de inscrición para participar nun obradoiro de ‘Chupipostres: cupcakes e galletas de mantequilla’. O curso, dirixido a mozos maiores de 12 anos, celebrarase do 9 ao 30 de abril nas instalacións do Mercado Municipal, con clases os luns de 20.00 a 22.00 horas.

A través deste curso, todos os participantes aprenderán todo o relacionado co mundo dos cupcakes e da repostería creativa con decoracións inspiradas na época do ano e partindo desde cero, o que abre as portas a todas aquelas persoas que se acheguen por primeira vez a este tipo de postres.

Dun xeito divertido, o alumnado aprenderá que é un cupcake e como se elabora, ademais de recibir consellos e trucos para cociñalos. Tamén descubrirán como elaborar frosting e achegaranse á decoración con pasta de azucre ou fondant e á elaboración de figuras en formatos 2D e 3D. Outro apartado do obradoiro será a creación de galletas de manteiga, coa correspondente decoración; o uso da manga pasteleira e a conservación de produtos.

O curso custará 18 euros e necesitarase un mínimo de 15 persoas para impartilo. Pode facerse a inscrición en http://tomino.gal/curso-chupipostres-2018/.

Éxito do curso de pilates

Pola súa banda, aínda está aberto o prazo de inscrición para participar no Curso de Francés Básico, que arrancou este mércores 7 de marzo e para o que aínda queda algunha praza dispoñible. O curso celebrarase ata ao 23 de maio na Escola Obradoiro de Goián. Neste caso, unha profesora nativa encargarase de impartir o curso, de 24 horas de duración e que se desenvolverá todos os mércores de 20.00 a 22.00 horas.

A inscrición pode facerse en: http://tomino.gal/cursos-de-radio-y-frances-omix-2018/

E éxito rotundo do curso de pilates para avoas, nais e fillas, que comezou este mércores as clases no auditorio de Goián e que arrancará o venres 9 de marzo as da Casa da Cultura de Tomiño. Máis de 80 mulleres inscribíronse para participar neste curso no que ademais dos beneficios desta disciplina tamén traballará o fortalecemento entre o grupo.

 

O Concello de Tomiño parou en defensa da igualdade

 “Hoxe, con este xesto de busca dunha sociedade máis xusta e igualitaria, decidimos parar”. Con estas verbas da alcaldesa de Tomiño, Sandra González, arrancaba a mobilización celebrada na praza do Seixo con motivo do Día Internacional da Muller e no que se chamaba á folga feminista para reivindicar a igualdade para todas as persoas, a “igualdade para a metade da poboación que vive en este planeta e que aquí e en tantas partes do mundo padece discriminación. Comezo polas mulleres que loitan todos os días en calquera lugar do mundo por subsistir, por comer, por protexer aos seus fillos e fillas en condicións de guerra, de opresión ou de fame. Penso hoxe nas mulleres sirias, nas refuxiadas, nas saharauís, nas mulleres de África e América Latina, que sofren esa dobre discriminación: polas súas circunstancias e por ser mulleres”.

Así, ante unha praza do Seixo ateigada, a alcaldesa recordou que a busca da igualdade debe ser “un afán internacional que non se importe de nacións, de bandeiras, de relixións nin de partidismos. Na defensa da igualdade cabemos todos e todas porque soamente buscamos unha sociedade máis xusta. Nada máis e nada menos”.

Entre consignas como ‘Contra a violencia nin un gramo de paciencia’, ‘Ante a discriminación, mobilización’ ou ‘Somos a voz das que non teñen voz’, varias mulleres, entre elas as concelleiras Ana Cristina Martínez e Fátima Rodríguez, participaron na lectura do manifesto co gallo do Día Internacional da Muller, no que “miles de mulleres abandonaron hospitais, aulas e fogares para demostrar que se nós paramos o mundo para” e para denunciar “o alto valor que representamos en todas as esferas, moitas veces oculto e non retribuído”.

Unha fenda salarial do 28%

As cifras non deixan dúbida á desigualdade. No pasado 2017 en Galicia a fenda salarial entre homes e mulleres foi do 28% en detrimento delas que, ademais de cobrar menos perderon un 9,3% do poder adquisitivo. Cunha taxa de emprego temporal feminino do 27% e un 40% de paradas de longa duración, a precariedade cébase coas mulleres: o 21,8% das galegas teñen contratos a xornada parcial, fronte ao 6% dos homes, e o 35% dos contratos a mulleres o ano pasado foron de menos dunha semana de duración.

E a fenda salarial continúa na xubilación, onde elas cobran pensións un 35,4% máis baixas, “disque porque as nosas nais e avoas non cotizaron. Como ían cotizar se estiveron facendo tarefas na casa polas que nunca se lles pagou, pero vaia se traballaron. Moitas familias saíron adiante grazas ás mans das mulleres nas leiras, co leite das vacas, cosendo, indo á resina e traballando arreo para criar tantas veces moreas de fillos e fillas”, recordou Sandra González.

“Non queremos seguir aturando que case o 70% das horas dedicadas ao traballo doméstico o realicemos as mulleres, sendo responsables da maioría dos coidados de nenos, nenas e tamén de maiores dependentes”, recalcou a alcaldesa, quen fixo fincapé tamén na importancia da loita contra a violencia machista que deixa en Galicia 15 denuncias diarias por violencia de xénero ou unha denuncia semanal por violación.

Sandra González amosouse “convencida e esperanzada con que estamos nun momento de cambio porque a igualdade é unha reivindicación que pasou a ser transversal. Se seguimos na loita seremos capaces de mudar as cousas, de conseguir avances para a igualdade sen esquecer nunca que os dereitos non se regalan, senón que se conquistan”.

 

Xoves, 8 de marzo de 2018 

Tomiño nomea marzo como Mes da Muller

O Concello de Tomiño dedicará o mes de marzo ás mulleres e o fará a través dunha programación transversal na que as actividades culturais, deportivas ou artísticas terán unha clara clave feminina e a visibilización do labor diario das mulleres e da loita pola igualdade como fío condutor. “Queremos dar visibilidade a todo o traballo que realizan as mulleres no eido familiar, laboral e social. Un traballo que en moitas ocasións pasa desapercibido. E queremos facelo ao tempo que se reivindica a igualdade de oportunidades e de condicións laborais, a igualdade na esfera social e o dereito a vivir sen violencias”, salienta Sandra González, alcaldesa de Tomiño.

A programación arrancou traballando co futuro da sociedade, os nenos e a mocidade. Así, o IES Antón Alonso Ríos énchese ata o 13 de marzo de ‘Cartas de Amor’ para fomentar a reflexión entre os mozos sobre o mito do amor romántico e os estereotipos de xénero, a desigualdade nas relacións de parella e a crueldade que moitas veces vai asociada a ela, ao tempo que se promove o respecto e a educación en igualdade e se traballa na prevención da violencia de xénero.

Trátase dunha exposición de pinturas realizadas por coñecidos artistas do cómic galegos, como Miguel Calatayud, Patricia Castelao, Fausto Isorna, Pirusca, José Luís Méndez, Jack Mircale ou Javier Olivares coa se buscar fomentar entre a poboación máis nova modelos de convivencia igualitarios. A exposición complétase cunha unidade didáctica para que o alumnado do instituto tomiñés traballe sobre estes aspectos e cun obradoiro participativo.

Esta mostra forma parte dunha serie de actividades organizadas pola Oficina de Igualdade de Tomiño con centros educativos da localidade para rachar cos estereotipos de xénero e afondar en aspectos como a igualdade laboral e social ou a corresponsabilidade. Pola súa banda o alumnado de infantil e 1º, 2º e 3º de primaria participaron no contacontos ‘Contos vellos, novos finais’ e os de 4º, 5º e 6º están a preparar novas actividades para este mes, sen prexuízo das que se poidan seguir organizando ao longo do ano.

Teatro, deporte e arte

Xunto con todas estas actividades para traballar a igualdade coa infancia e a mocidade, poranse en marcha exposicións, cursos, actividades deportivas e de lecer cunha clara clave feminina. Ademais do curso de pilates para avoas, nais e fillas posto xa en marcha, tamén está aberta a inscrición para participar no obradoiro ‘Mulleres artistas por descubrir’, que dará a coñecer a grandes mulleres artistas que permanecen no anonimato. Ademais, a artista Gemma Marqués está a cear no campo de fútbol de Goián o mural feminista ‘Anónimas’, que pretende poñer en valor o labor e esforzo diario familiar e laboral das mulleres.

Por outra banda o Mercado de Tomiño recibe mañá, venres, a exposición de Liliya Pobornikova co título ‘Lugares inesperados’, unha mostra de cerámica que explora as formas que xorden da imprevisibilidade orgánica.

E dentro deste Mes da Muller, marzo haberá catro obras de teatro nas que as mulleres son as protagonistas. Para público infantil ‘Rosa Caramelo e outras historias’ (18 marzo), de Talía Teatro, e ‘A maleta da avoa’, de Raquel Queizás (25 marzo), mentres que para público adulto chegará ‘Té con Kant’ (10 marzo), de Teatro Inversa, e ‘Matrioskas’ (24 marzo), de Charlatana.

 

Mércores, 7 de marzo de 2018 

O Tomiño FC organiza a I Festa dos Callos

O Tomiño FC organiza este domingo, 11 de marzo, a I Festa dos Callos da localidade, unha festa gastronómica que nace coa intención de recadar fondos para o club á vez que busca ampliar a oferta de actividades no concello e formar parte do calendario de eventos habituais do concello tomiñés. “Nace con idea de continuidade, de que este sexa o primeiro paso, xa que todas estas festas van gañando participantes a medida que van sumando edicións”, salienta Manuel Vila, presidente do club de fútbol.

Esta festa é “unha forma de encher de vida e de dinamizar o centro da vila ao tempo que se apoia ao deporte tomiñés”, como explicou a alcaldesa Sandra González durante a presentación da I Festa dos Callos nas dependencias do concello. Nesta presentación tamén participaron o concelleiro de Deportes, Ismael Troncoso, e do cociñeiro que preparará as racións que se venderán na festa, Alejandro Alonso.

Esta primeira edición levarase a cabo coa colaboración do Concello de Tomiño e de Coren, ademais de coa da Comunidade de Montes VMC Barrantes, coa das panaderías Manuel López, Camiño Novo, Parroquiñas, Currás e Tomipan Flor y Nata e coa de MRDixital, Día Tomiño e Quicelco.

800 quilos de callos

A organización espera repartir sobre 2.000 racións durante a festa, arredor de 800 quilos de callos, que poderán empezar a degustarse o domingo 11 de marzo dende as 09.00 horas. Para maior comodidade do público e garantir o benestar de todos os que se achegue a probar os callos en caso de que o tempo non acompañe, a organización habilitará unha carpa no centro de Tomiño, fronte ao ximnasio (Seixo).

A festa terá prezos populares e dará a posibilidade de comer os callos na propia carpa ou de compralos para levar. En caso de degustar alí, o prezo será de 7 euros a ración en venta anticipada e de 8 euros en taquilla e cada unha destas racións incluirá pan, callos, viño ou auga, ademais da cazola e a taza de barro conmemorativa. As e os que prefiran tamén poderán coller callos para levar, a 5 euros a ración.

 

Martes, 6 de marzo de 2018 

A Mostra de Cultivos pechou as súas portas co dobre de visitas de profesionais do sector

Éxito da décimo quinta edición da Mostra de Cultivos do Baixo Miño que pechou este pasado domingo as súas portas despois de tres días de expositores, novidades, obradoiros, mesas técnicas, exposicións e actividades cunha grande afluencia de público. Tratábase dunha edición na que a Asociación de Cultivos do Baixo Miño (acuBam), organizadora do evento xunto co Concello de Tomiño, apostaba de cheo pola profesionalización do sector, creando por primeira vez un espazo que xiraba arredor do emprego no agro, cun taller de empregabilidade e cunha mesa técnica centrada no modelo de negocio no agro, no que se abordaron distintas perspectivas do sector e diversas fórmulas de éxito tamén a través do testemuño de empresas da comarca.

Ademais, por primeira vez a Mostra de Cultivos abría as súas portas un día antes para abrir o abano do público profesional, unha decisión que resultou “moi favorable, xa que duplicamos as visitas recibidas de profesionais do sector e xeramos dúas xornadas de negocio, aumentando así o volume de intercambios comerciais”, salientou a presidenta de acuBam, Patricia Rodríguez.

A este incremento súmase a ampliación da fronteira xeográfica dos visitantes, xa que houbo moitos procedentes de todos os puntos de Galicia e de Portugal. “Estamos moi satisfeitos, aínda que non conformes, xa que sabemos que temos que seguir traballando e debemos de facelo con tempo para conseguir mellores resultados”, asegurou Rodríguez.

Venta con fondo social

A organización amosouse moi contenta non soamente coa afluencia do público profesional, senón tamén do público xeral, un éxito avalado pola gran xornada de ventas realizadas polo centro de educación especial San Xerome. Por primeira vez, a Mostra daba resposta a unha demanda reiterada por parte dos visitantes, que buscaban poder comprar produtos durante o evento.

E o facía ao tempo que reforzaba a súa responsabilidade social coa contorna, firmando un convenio de colaboración con este centro educativo de A Guarda, que durante todo o domingo contou cun punto de venta de produtos doados polo resto de expositores, arredor de 30, para recadar fondos para a reforma dunha bañeira terapéutica. “Tratábase non só de comprar, senón de facelo cun marcado fondo social”, explica Rodríguez, quen asegura que “foi unha experiencia que funcionou moi ben, polo que a repetiremos en vindeiras edicións”.

Premios Xardín Galego

Entre as novidades presentadas este ano na Mostra estivo a presentación e posta en marcha dos I Premios Xardín Galego, cos que acuBam e a Asociación Galega de Empresas de Xardinería (Agaexar) buscan recoñecer e difundir actuacións exemplares na execución de traballos de xardinería pública e privada realizados en Galicia por empresa e autónomos. Dende esta mesma fin de semana e ata o 31 de xaneiro de 2019 os interesados poderán presentar os seus traballos, nos que o xurado valorará a prioridade de uso de material vexetal fronte a materiais inertes, a preferencia de material vexetal producido en Galicia e os criterios de sustentabilidade aplicado á obra, así como o deseño, a creatividade, a orixinalidade ou a composición vexetal, combinación de especies, textura e cor.

Os interesados en participar deberán enviar un correo electrónico a info@agaexar.gal coa ficha de inscrición cos datos do candidato, a declaración escrita que garanta a autoría da obra presentada, fotografías xerais e de detalle co antes e o despois da intervención e unha memoria descritiva do proxecto realizado. O gañador coñecerase durante a celebración da próxima edición da Mostra, en 2019, na que tamén se montará unha exposición coas fotografías dos proxectos participantes.

 

Concello e IES Antón Alonso Ríos crean un programa de boas prácticas na convivencia escolar

Promover as boas prácticas en materia de convivencia escolar é o obxectivo principal do Programa de Habilidades Sociais, que o Concello de Tomiño e o IES Antón Alonso Ríos porán en marcha para axudar aos mozos escolarizados neste centro educativo a reflexionar e traballar para mellorar a súa conducta. “Estamos preocupados pola educación dos nosos mozos e queremos facilitarlles ferramentas para mellorar as súas habilidades en comunicación e relacións sociais”, explica a concelleira de Cultura e Servizos Sociais, Ana Cristina Martínez.

Esta iniciativa vai levarse adiante a través da colaboración do Departamento de Orientación do IES Antón Alonso Ríos, do Programa de Educación e Apoio Familiar, posto en marcha polos Servizos Sociais do Concello de Tomiño, e a Asociación para o Desenvolvemento Infantil e Atención Familiar, que serán os encargado de traballar coa poboación escolar aspectos como o autocontrol, a intelixencia emocional ou as relacións e a comunicación social.

Pero dende o Concello enténdese a educación dos nenos tomiñeses como algo integral no que se deben ver integrados todos os actores implicados, dende os centros educativos ou as familias ata as institucións públicas. Por este motivo, de xeito paralelo ao traballo co alumnado, o programa establecerá un espazo que se denominará Círculo de Confianza, no que os especialistas abordarán coas familias do alumnado participante solucións e estratexias para promover unha óptima integración social dos seus fillos.

Este programa xurde para dar resposta á necesidade de traballar por unha boa convivencia escolar e como froito da constante colaboración entre o IES Antón Alonso Ríos e o Programa de Educación e Apoio Familiar dos Servizos Sociais municipais, que traballan creando sinerxías para unha mellor integración de cara a acadar o éxito escolar do alumnado.

 

Luns, 5 de marzo de 2018 

acuBam e San Xerome asinan un convenio de colaboración para a venta de produtos na XV Mostra de Cultivos

A Mostra de Cultivos do Baixo Miño acolleu a sinatura do primeiro convenio de colaboración de contido entre o centro San Xerome e acuBam, coa intención de fomentar a responsabilidade social da entidade e dar un paso máis alá do mundo profesional e achegarse a toda a cidadanía.

A través deste convenio o alumnado deste centro vendeu durante toda a xornada do domingo os produtos doados polo resto de expositores da décimo quinta edición da Mostra para recadar fondos destinados á reforma dunha bañeira terapéutica.

Deste xeito, acuBam trata de dar cabida dentro da asociación non soamente a todas as entidades profesionais e empresariais do sector, senón tamén a todas aquelas entidades e asociacións da comarca, favorecendo a unión e o traballo conxunto a prol do futuro do Baixo Miño.

A sinatura deste convenio constituíu “un momento importante que afianza ese labor social de acuBam, pero tamén dá solución a unha demanda histórica da poboación xeral, que pedía poder comprar os produtos nunha mostra na que polo seu carácter profesional non se podía vender mercancía”, explicou a presidenta de acuBam, Patricia Rodríguez, durante a firma do convenio, no que estivo acompañada pola presidenta do centro San Xerome, Asunción Dacuña.

 

A Deputación acurta os prazos para construír a nova variante de Tomiño

A Deputación de Pontevedra está a acurtar os prazos para construír a nova variante de Tomiño. O deputado de Mobilidade Uxío Benítez anunciou que a Xunta de Goberno provincial aprobou a licitación da obra cun orzamento de 2.612.403, 62 euros, e que a publicación do anuncio no Boletín Oficial da Provincia (BOPPO) está prevista para o hoxe luns, de xeito que as empresas poderán presentar as súas propostas ao longo de todo o mes de marzo.

As ofertas terán que ser analizadas tecnicamente valorando o programa e equipo de traballo (15 puntos), o plan de control de calidade (10 puntos), a memoria de traballo (15 puntos), e o plan de actuación ambientais (9 puntos). As empresas que acaden un mínimo de 25 puntos na parte anterior pasarán á valoración económica, onde o menor prezo ofertado obterá un máximo de 51 puntos. Unha vez estudiados todos estes criterios, realizarase unha proposta de adxudicación, que deberá ser aprobada en Xunta de Goberno. A partir de aí formalizarase o contrato e presentarase a acta de replantexamento da obra.

O prazo de execución dos traballos está fixado en doce meses de máximo polo que, se a tramitación administrativa non se complica e a climatoloxía o permite, a actuación estará finalizada, segundo asegura o deputado, na primavera de 2019. “A nosa intención é realizar todos os trámites do xeito máis áxil posible, xa que é unha obra impulsada por tres institucións, Deputación, Concello e Xunta, e cada parte debe ser dilixente para que o proxecto sexa unha realidade”, asegurou Benítez.

A nova variante de Tomiño denominada oficialmente como ‘Mellora da conexión entre a estrada provincial EP-3102 (Tomiño-Sabarís) e a estrada autonómica PO-344 ao seu paso polo núcleo urbano de Seixo (Tomiño)’, suporá a construción dunha nova estrada con tipoloxía de avenida que exercerá de rolda e permitirá a mellora da mobilidade peonil no núcleo urbano derivando o tráfico rodado que actualmente pasa polo núcleo da vila. 

Por outra banda, e dado que a Xunta de Galicia ten aprobado o proxecto da vía de alta capacidade (VAC) Tui-A Guarda que contempla un acceso ao núcleo de Tomiño, ese enlace realizarase a través da nova avenida. O Concello, como contraprestación, farase cargo da transferencia dun treito de aproximadamente un quilómetro da antiga estrada autonómica.

A estrada enlazará polo sur a EP-3102 e polo Norte a PO-344 (Rúa Gondomar), proporcionando unha saída natural á rúa da República Arxentina, e conecta cos novos equipamentos como o centro de saúde, a residencia asistida, e mesmo o IES de Tomiño.

O convenio para facer a obra asinouse en agosto do pasado ano. Dende entón a Xunta de Galicia realizou as expropiacións correspondentes, orzamentadas en 933.219,98 euros. Unha vez realizado ese trámite, que rematou no mes de febreiro, foi a Deputación a que iniciou todos os trámites burocráticos para a contratación.  A obra será financiada con 2.351.163,26 euros investidos pola Deputación provincial e 261.240,36 euros do Concello de Tomiño.

 

O brazo dun nadador que supera a fronteira, un camiño quebrado e unha estrutura aérea e curvada compiten para unir Tomiño Premer na foto

O concurso internacional para o deseño da ponte peonil sobre o Miño entre Tomiño e Cerveira organizado pola Deputación de Pontevedra conseguiu acadar a trascendencia internacional que se propoñía. Unha vez comprobada toda a documentación, certificouse que entre os 24 anteproxectos admitidos existían propostas tanto de Galiza e Portugal, tal e como se agardaba pola cercanía e coñecemento do territorio, como de enxeñeiros e arquitectos de Stuttgar e Berlín (Alemania), Buckinghamshire e Londres (Reino Unido), Vanves (Francia), e do resto do Estado Español: Valencia, Madrid, Toledo, Barcelona, Málaga, Asturias ou Cantabria.

Segundo explica o deputado de Cooperación Transfronteiriza Uxío Benítez, dende o inicio, a Deputación traballou para crear un concurso internacional que espertase interese de arquitectos, enxeñeiros ou equipas profesionais estranxeiras, publicando o anuncio incluso no Diario Oficial da Unión Europea e dándolle difusión a través dos colexios oficiais, que trasladaron a convocatoria aos seus homólogos doutros países.  A intención era a mesma que persegue todo o proxecto Visit_Rio_Minho: atraer visitantes internacionais e que o territorio do Miño se convirta nun punto de referencia coñecido alén das fronteiras.

A resposta ao concurso foi maior da esperada xa que os requisitos para presentarse foron duros: os aspirantes debían demostrar un amplo grao de coñecemento e unha traxectoria profesional destacada no ámbito do deseño estrutural e desenvolvemento de pontes ou pasarelas singulares, tendo realizado nos últimos 15 anos deseños e proxectos e direccións de obra de alomenos dous viadutos cun van superior a 75 metros. As esixencias, de feito, tiveron que ser suavizadas a petición dos colexios de arquitectos e enxeñeiros galegos e lusos co fin de abrir as posibilidades de presentación á xente moza.

Foi a unión temporal de empresas (UTE) formada por Álvaro Siza e a Sociedade GOP representada por Jorge Amorin Nunes da Silva a que acadou a maior puntuación co seu deseño, titulado ‘Raia’, sendo unha proposta íntegramente portuguesa. No segunte lugar o xurado escolleu o deseño ‘Caminñho do rio’, presentada por unha UTE de empresas viguesa (pola sociedade de Javier Zubia) e portuguesa (Paula Teles). Finalmente, a terceira proposta finalista, ‘Una línea sobre el  Miño’, chegou de dous gabinetes madrileños. Agora, estas tres propostas terán que ser desenvolvidas polos seus autores para despois, nun procemento negociado, escoller a máis puntuada segundo criterios técnicos e económicos de forma oficial.

Hai que lembrar que na reserva o cuarto posto foi para o deseño baixo o lema ‘Lazos’, chegado dende Valencia; o quinto para ‘Euroconverxencia Natural’, chegado dende unha sociedade creada por técnicos de Madrid, Alemania e Francia’; mentres que o sexto lugar foi para ‘Fado’, unha proposta integramente coruñesa.

            “Sempre entendemos que dado o valor simbólico da ponte, tanto polas características ambientais da contorna como polos obxectivos estratéxicos que persegue -crear un espazo común a dous países-, era preciso darlle un carácter internacional, con profesionais españois, portugueses ou estranxeiros para acadar o mellor proxecto, polo que estamos satisfeitos do resultado”, explicou o deputado de Cooperación Transfronteiriza.

AS PROPOSTAS

Raia:  O brazo de Álvaro Siza que supera a liña de fronteira

O arquitecto portugués Álvaro Siza foi o vencedor do concurso de ideas aberto para deseñar a ponte que comunicará de xeito peonil Tomiño e Vila Nova de Cerveira e crear o primeiro europarque peninsular. No seu haber conta con ducias de recoñecementos polos seus traballos arquitectónicos que, na Galiza, se resumen no edificio do Centro Galego de Arte Contemporánea (CGAC) no 1993, e no ano 2000 no proxecto da Facultade de Ciencias da Comunicación de Santiago de Compostela e na rehabilitación do Café Moderno en Pontevedra.

Na memoria do proxecto ‘Raia’ para a ponte peonil entre Tomiño e Cerveira, o Siza explica que cando se decide intervir a través da disciplina arquitectónica nun territorio non é posible que o construido pase físicamente desapercibido. Por este motivo plantexou que a peza proxectada para o Miño debía ter a dignidade formal e material necesaria para convivir harmónicamente coas preexistencias sen deixar de posuír un carácter propio: sen renunciar ao seu tempo.

 “Quixemos atender ao patrimonio histórico, natural e construido do lugar, preservar a totalidade de vexetación de ribeira, a continuidade espacial da superficie de auga do río sen obstáculos e respectar os ecosistemas e monumentos de ambas as dúas marxes. (…) Este fin conséguese dispondo dous elementos, soporte e taboleiro, un pendurado do outro e pousando somente en terrra, sen tocar a auga, ligando por cima do río as dúas redes de camiños en ambas marxes e manifestándose como unha forma de continuidade de ambos parques”.

Deste xeito, no  proxecto habilítase “un arco complementado por dous apoios en piares en forma de V e un taboleiro que risca no aire un xeito sinuoso, unha S que se alonga erguida enriba do río para deitarse nas dúas ribeiras con naturalidade. O primeiro de sección cadrada e o segundo con sección en U, por dentro da que pasan peóns e bicicletas, conformando un conxunto entrelazado no que o arco lembra o brazo dun nadador xigante que teima por axudar a superar a liña da fronteira”.

Con este deseño, di Siza, non hai competencia da ponte coa naturalidade da contorna: “A arquitectura destas xeometrías que vibran nos reflexos do río non compite coa escala do Forte de San Lorenzo, apenas convida a visítalo. O mesmo acontece coa vila de Cerveira, que mostra o seu tecido urbano tranquilo a gatexar pola topografía en pendente dende a beira do río ata cotas máis altas. Hai aí nesa arquitectura de xeometrías entrelazadas unha suxerinte metáfora simbólica do acontecer social que con gusto se dan as caras e non as costas (a liña de fronteira ficaría afogada polo río e remitiría só aos despachos administrativos)”.

Ficha:

As sociedades Álvaro Siza (do arquitecto homónimo) e a GOP (representada por Jorge Amorín Nunes) acadaron a maior puntuación do xurado: 90 puntos. A proposta plantexa unha ponte tipo arco cunha forma de ‘S’ en planta de 300 metros de lonxitude. A súa estrutura en horizontal distínguese por ser metalica, ter un largo útil de catro metro, pavimento sintético de poliuretano e unha varanda metáliza. En canto á estrutura vertical, ten un gálibo de 9,20 metros e dous apoios na ribeira do río en forma de pilas metálicas en V e en arco. O encontro cos espazos lindeiros prodúcese ao leste do Espazo Fortaleza de Tomiño, na zona próxima ás vivendas, e ao sur do illote do Parque do Castelinho en Vila Nova de Cerveira, sen afección nin á praia nin ao propio illote. O orzamento construtivo previsto é de 3,38 millóns de euros.

Camiñho do rio: Un sendeiro que persegue vistas e paisaxes

A proposta ‘Camiñho’ do Rio de Javier Zubia e Paula Teles propón unha estrutura orgánica de relación entre a función e a paisaxe que caracteriza a contorna. Trátase, nas súas propias palabras “dunha estrutura que excede a mera función de unir, que forma parte activa da función do espazo, un elemento dinámico do parque que interactúe co usuario, que propoña dinámicas, que transgreda a súa función e se transforme en espazo. Unha forma sobre a paisaxe que busca e se apoia no relevo do val, que absorbe a súa sinuosidade e que se manifesta, que se asume e revela como parte do mesmo. Un sendeiro que persegue vistas e paraxes, un trazo que se debuxa na contorna de forma aparementemente improvisada, que non prioriza a inmediatez da liña recta, que provoca descansos, espazos de permanencia, puntos de fuga e flexións. Un camiño que propón un novo relevo, que suxire diferentes perspectivas , que pretende a convivencia de peatóns e ciclistas a través dun sendeiro distendido de articulación”.

Na memoria do deseño explícase que a ponte é un camiño quebrado que pretende unificar as sendas existentes, separadas polo río a través da nova pasarela que se entende como unha unidade formal e material, unha estrutura que simboliza os valores de unión, solidaridade, pluralismo, igualdade e tolerancia que o parque internacional Castelinho-Fortaleza pretende representar.

O percorrido da ponte, de feito, propón un traxecto informal, un percorrido que suxire descanso, permanencia e contemplación e propón novas experiencias da canle do río na contorna natural que configuran Vila Nova de Cerveira e Goián e do conxunto defensivo que as unifica.

Ficha

O deseño que quedou en segundo lugar no concurso de ideas da Deputaciíon de Pontevedra foi o titulado ‘Caminho do rio’, da Sociedade Proyectos y Obras de Estructuras e Instalaciones, representada polo vigués Francisco Javier Zubia, e a sociedade Mobilidade e Planeamento do Territorio, representado pola enxeñeira Paula Teles. Propoñen unha  planta de directriz quebrada de 323 metros de lonxitude cun taboleiro metálico antideslizante de entre catro e seis metros de largo, cun vano central de 123 metros (con gálibo de 9,50 m) e dous vanos laterais de entre 90 e 110 metros, que se apoia en dous pilares de formigón armado no leito do río. O encontro da plataforma coas ribeiras prodúcese na zona sur da Fortaleza –ao carón do auditorio- e ao sur do Parque do Castelinho, non tendo tampouco nin afección á praia de Tomiño nin ao illote en Vila Nova, cuestión ambas as dúas que foron fundamentais para o xurado. O custe estimado da construción do viaduto, de chegar a escollerse definitivamente a proposta é de 3,35 millóns de euros.

Unha liña sobre o miño. Un lugar propio transparente e aéreo

A nova ponte Goián-Cerveira proponse por parte das sociedades autoras de ‘Unha liña sobre o Miño’ como unha construción extremadamente lixeira e aérea, cuxa posición e estrutura preserva as vistas cruzadas das fortalezas situadas a un lado e outro do Miño. “Respecta as delicadas ecoloxías do río e a súa xeometría de doble curvatura fará da súa travesía unha experiencia intensa, profunda e memorable na que a paisaxe sempre variable que se abre cara o Atlántico, ao sur, e ao valioso patrimonio histórico, ao norte, é o máis importante”, din.

Por outra parte, a ponte proposta distínguese claramente da estrutura da Ponte da Amizade situada augas arriba a menos de 1.500 metros. O seu uso exclusivamente ciclista e peatonal permite empregar, aseguran os autores, unha estrutura máis audaz, maiores luces e un planeamento estratéxico no que a experiencia do cruce e a relación coa paisaxe son “determinantes e ineludibles”, polo que é o máis transparente e aéreo posible. Créase un “lugar propio” que desvela unha paisaxe inédita “que alonxándose das edificacións de Vila Nova de Cerveira e das fortalezas, descubre a inmensidade do estuario do río Miño con toda a súa potencia natural fronte ao silencio formal e expresivo da ponte”.

Ficha

O último proxecto que pasou a liña de corte do xurado foi o titulado ‘Una línea sobre el Miño’, das sociedades Burgos y Garrido, representada por Ginés Garrido Colmenero, e Bernabeu Ingenieros, representado por Alejandro Bernabeu Larena. Estes propoñen unha ponte colgante de directriz recta e 330 metros de lonxitude e 9,20 metros de gálibo. A estrutura horizontal está composta por unha plataforma de catro metros de largo cun pavimento de madeira e de formigón e lastro portugués nos extremos, completada cunha varanda de malla metálica con pasamán de aceiro.  A estrutura vertical está composta por dous apoios de aceiro na ribeira, que enlazan ao sur do Espazo Fortaleza, tamén na zona do auditorio, e ao sur do Parque do Castelinho. Igualmente non terá afección nin á praia nin ao illote e tería un valor construtivo de 3,38 millóns de euros.

A redacción do deseño da nova ponte peonil e ciclista sobre o Miño está encadrada nunha das actividades do proxecto VISIT_RIO_MINHO presentado á primeira convocatoria do Programa Operativo España-Portugal (POCTEP) 2014-2020 Interreg V-A nunha candidatura conxunta da Deputación de Pontevedra coa CIM Alto Minho, os concellos do norte de Portugal, a Fundación CEER, o Centro Tecnolóxico do Mar e a Universidade de Vigo. Este proxecto obtivo un cofinanciamento do 75% de fondos FEDER no marco da referida convocatoria do POCTEP 2014-2020 Interreg V A, cun orzamento total aprobado de dous millóns de euros, cunha achega da Unión Europea que ascende a 1.500.000 euros.

 

Domingo, 4 de marzo de 2018 

A XV Mostra de Cultivos pon en valor a agricultura empresarial, eixo vertebrador da economía no rural

            “Só a lembranza de onde veño me axuda a saber cara onde vou…”, así citando a Rosalía de Castro, a presidenta de acuBam, Patricia Rodríguez, explicaba ao público asistente á inauguración oficial da XV Mostra de Cultivos do Baixo Miño a “importancia do pasado” e volver a vista cara “aqueles pioneiros que arriscaron e viron as posibilidades infinitas da nosa comarca, debuxaron os inicios dos distintos camiños e cores dos nosos sectores” que deron lugar a aparición de novas oportunidades de emprendemento no agro.

Rodríguez quixo resaltar a importancia desa evolución daquela agricultura de subsistencia a unha agricultura empresarial, unha agricultura “que actúa como vertebrador da economía no rural, unha agricultura sustentable, respetuosa co seu medio, que xenera riqueza a través dos proxectos vinculados co aproveitamento dos recursos locais”. E a Mostra cumpre ese papel de “fiestra cara ao público e á sociedade en xeral, pero tamén interior, que implica a posta en común entre os produtores e a totalidade da cadea de valor que engloba as empresas auxiliares” para ser capaces de adaptarse aos cambios e ás novas esixencias do mercado.

A presidenta de acuBam tamén quixo resaltar a importancia que ten neste salto adiante a aposta dos poderes públicos, polo que quixo agradecer publicamente “o apoio recibido e a capacidade de escoita e prodisposición á búsqueda conxunta de solucións”. Un apoio que se reflectíu na presenza durante a inauguración dun importante número de autoridades, como o Xefe Territorial en Pontevedra da Consellería de Medio Rural da Xunta de Galicia, Antonio Crespo; o deputado Uxío Benítez; a alcaldesa de Tomiño, Sandra González, e gran parte da corporación municipal; a alcaldesa do Rosal, María del Carmen Alonso; o alcalde de A Guarda, Antonio Lomba e o alcalde de Tui, Carlos Vázquez Padín, entre outras personalidades.

O Xefe Territorial en Pontevedra da Consellería de Medio Rural, Antonio Crespo, aproveitou a inauguración para transmitir unha mensaxe positiva de ánimo e felicitación “polo que se está facendo, cousas importantes das que non sempre se teñen coñecemento, un empuxe ao sector que é digno de agradecer e apoiar”.

Pola súa banda, a alcaldesa de Tomiño Sandra González quixo salientar o bo traballo que se está a facer no agro e todo o que “se ten avanzado por aunar esforzos”, como coa posta en marcha do Plan Estratéxico do Agro, un reto no que os implicados “tiveron que mirar cara adentro, desnudarse, para ver quen somos e o que se ten que facer”. González recalcou a importancia das xornadas técnicas que acolle a Mostra e abarca importantes eixos do sector e agradeceu a presenza nesta edición do ciclo medio de Aproveitamento e Conservación do Medio Rural do IES Antón Alonso Ríos, xa que “eles son os futuros traballadores e empresarios do sector na comarca. Sodes a nosa esperanza”.

A alcaldesa tamén quixo dar protagonismo á exposición fotográfica que acompaña este ano á Mostra de Cultivos, unha exposición que recupera un arquivo histórico da comarca “que nos lembra de onde vimos e a quen llo debemos, xa que é un sector moi feminizado no que o 80% da man de obra son mulleres, o que demostra o gran papel que cumpren no campo tendo en conta neste sector feminizado a traballadoras, empresarias e técnicas”.

Para todos os públicos

A xornada do domingo 4 de marzo está pensada para o público familliar, xa que durante todo o día haberá actividades lúdicas para desfrutar en familia, como talleres ecolóxicos, probas físicas, obradoiros de reciclaxe e xogos tradicionais, cos que se tentará espertar entre os e as participantes a curiosidade polo agro. Esta mesma xornada tamén terá un marcado tinte social, coa posta en marcha dun stand na que o alumnado do centro de educación especial San Xerome, de A Guarda, venderá os produtos doados polo resto de participantes para recadar fondos para a reforma dunha bañeira terapéutica da entidade. A Mostra rematará ademais cun concerto do grupo Rock Percusión (18.00 h), integrado por alumnado deste mesmo centro.

 

Sábado, 3 de marzo de 2018 

Nacen os premios Xardín Galego, cos que acuBam e Agaexar buscan promocionar e dignificar este sector en Galicia

Para recoñecer e difundir actuacións exemplares na execución de traballos de xardinería pública e privada realizados en Galicia por empresas e autónomos galegos. Eses son os obxectivos cos que nacen os I Premios Xardín Galego, postos en marcha pola Asociación Galega de Empresas de Xardinería (Agaexar) e a Asociación de Cultivos do Baixo Miño (acuBam) para dignificar e promocionar o sector da xardinería na comunidade autónoma. “Son un paso máis neste camiño de colaboración que comezou fai ano e medio, cando Agaexar e acuBam vimos que tiñamos problemáticas parecidas e logros comúns aos que queriamos chegar”, explicou Óscar Vaquero, secretario de acuBam, durante a presentación dos premios este venres 2 de febreiro na XV Mostra de Cultivos do Baixo Miño, organizada de forma conxunta por acuBam e polo Concello de Tomiño e que estará aberta ao público profesional e ao público en xeral ata o domingo 4 de marzo no pavillón municipal de Goián.

O xurado valorará todos aqueles traballos realizados en Galicia e finalizados en 2018 tendo en conta que dean prioridade de uso do material vexetal fronte a materiais inertes, que teña preferencia polo material vexetal producido en Galicia e os criterios de sustentabilidade aplicados á obra, así como o deseño, creatividade, orixinalidade ou composición vexetal, combinación de especies, textura e cor.

Os interesados poderán presentar os seus traballos ata o 31 de xaneiro de 2019, un único traballo por participante, enviando ao enderezo electrónico info@agaexar.gal a ficha cos datos do candidato, a declaración escrita que garanta a autoría da obra presentada, fotografías xerais e de detalle co antes e o despois da intervención e unha memoria descritiva do proxecto realizado. O gañador coñecerase durante a celebración da vindeira edición da Mostra, en 2019, onde tamén haberá unha mostra coas fotografías dos proxectos participantes. Trátase dun premio co que “potenciar o sector”, como asegurou o presidente de Agaexar, Víctor Pérez, e un xeito máis de “camiñar cara a profesionalización do sector, poñéndoo en valor”, salientou a presidenta de acuBam, Patricia Rodríguez.

acuBam Innovación

Para non quedarse atrás e seguir camiñando cara o futuro, a Mostra aposta dende hai tres anos pola innovación cun espazo dedicado aos novos produtos, proxectos e maquinaria que as empresas da comarca introducen no sector. Este ano, entre as innovacións presentáronse novas variedades como a Ficinia Truncata Ice Crystal, a hortensia Little XS, a Carex Ribbon Falls, a Distylium myricoides Blue Cascade,  a Tibuchiana urvilleana Peace Baby ou a Lomandra longuifolia Tanika, todas con características que as fan sobrevivir ao cambio climático e a temperaturas baixas ou épocas de sequía.

Entre a tecnificación, presentouse unha máquina que facilita a clasificación de kiwi segundo a súa calidade interna mediante tecnoloxía óptica penetrante e non destrutiva, un novo cortacéspede silencioso, un xerador de micro burbullas ou unha aspiradora que recolle as sementes que se coan entre as mallas nos viveiros. Tamén presentaron un proxecto sobre a xestión sostible dos recursos naturais mediante o cultivo e análise da maceira e o aguacate no Baixo Miño.

Para todos os públicos

O eixo central da décimo quinta edición da Mostra de Cultivos xira arredor da historia do agro na comarca e nela se fai un percorrido polo que é, o que representa e cara onde camiña con actividades como unha exposición forográfica das principais épocas do sector, o que permite apreciar a súa evolución ata hoxe en día. Os preto de 30 expositores que estarán na mostra supoñen unha radiografía do presente e a terceira edición de acuBam Innovación do futuro.

O sábado, 3 de marzo, celebrarase o acto inaugural, que dará paso pola tarde a unha xornada sobre a auga no rural da man da asociación Coxapo. Esa mesma tarde tamén se poderá participar nun obradoiro de empregabilidade e noutro de xardinería ecolóxica impartido pola Fundación Sales e a Asociación de Jardinería Ecológica e dirixido a público de todas as idades.

Para todos os públicos será tamén a xornada do domingo 4 de marzo, na que durante todo o día haberá actividades lúdicas para desfrutar en familia, como talleres ecolóxicos, probas físicas, obradoiros de reciclaxe e xogos tradicionais, cos que se tentará espertar entre os e as participantes a curiosidade polo agro. Esta mesma xornada tamén terá un marcado tinte social, coa posta en marcha dun stand na que o alumnado do centro de educación especial San Xerome, de A Guarda, venderá os produtos doados polo resto de participantes para recadar fondos para a reforma dunha bañeira terapéutica da entidade. A Mostra rematará ademais cun concerto do grupo Rock Percusión (18.00 h), integrado por alumando deste mesmo centro.

 

O programa É Aprender reactiva a súa web co material realizado polo alumnado participante

O programa É Aprender continúa co seu traballo co alumnado de Tomiño para mellorar as súas capacidades, habilidades e rendemento escolar, nesta ocasión implicando aos rapaces e rapazas na difusión do que se traballa en cada sesión. A través da súa páxina web eaprenderblog.wordpress.com os responsables do proxecto achegan á cidadanía os temas nos que se afondaron coas e cos participantes, reactivando o blog á vez que fan visibles tamén os seus traballos dos nenos. 

Cada sesión do É Aprender “é un fervedoiro de ideas onde aprendemos desde o descubrimento e reflexionamos sobre distintos temas que nos preocupan e que están de actualidade”. Así, ao longo deste curso irán compartindo nese blog os avances e actividades realizadas ao abeiro do programa, uns contidos que irán divididos en temas de actualidade sobre os que se está afondando, entrevistas a persoas de interese, as actividades do programa para dar a coñecer en detalle todo o que se fai e o espazo creativo, con todos os debuxos ou redaccións dos nenos que participan.

Ata o  momento, no blog xa se poden ver as redaccións dos rapaces e rapazas sobre música falando da música de bandas e do hip hop ou sobre gustos literarios, coas recomendacións dos seus libros favoritos, así como debuxos nos que se reflexiona sobre o acoso e o cambio climático ou nos que comparten os seus gusto polo deporte.

Programa É Aprender

O programa É Aprender do Concello de Tomiño chega este ano a súa quinta edición dando un paso máis na implicación de todos os axentes relacionados coa educación dos rapaces e rapazas, dende as familias ata o centro escolar, pasando polos Servizos Sociais municipais en caso de ser necesario.

O programa arrancou este ano unha fase de reunións trimestrais da educadora social, a psicóloga e a mestra coas familias dos e das participantes para facer unha avaliación de cada alumno e alumna, o que permite ter unha atención individualizada adaptada ás necesidades de cada neno e nena e facendo este programa moito máis útil. Estas xuntanzas complétanse cunha posta en común cos outros dous axentes implicados na educación dos menores, os centros escolares e os Servizos Sociais municipal naqueles casos que veñan derivados do programa de educación familiar municipal.

Un 20% máis de inscritos

Este curso 2017/2018 inscribíronse no programa 58 nenos, un 20% máis que na edición anterior. Ademais, fronte aos seis grupos do ano pasado, nesta edición organizáronse oito grupos en seis parroquias diferentes distribuídos da seguinte forma: na parroquia de Currás hai un grupo de primaria con 9 nenos; na de Piñeiro un de secundaria con 5 mozos nas de Barrantes e Estás un grupo de primaria e secundaria simultáneo, con 8 e 5 rapaces respectivamente. Pola súa banda, en Tomiño e Goián hai un grupo de primaria e secundaria diferenciados, con 5 e 7 nenos na primeira parroquia e con 12 e 5 na segunda.

As cifras deste ano melloraron de forma significativa dende o curso pasado, xa que incrementouse en máis dun 39,2% o número de participantes iniciais, pasando de 46 no curso 2016/2017 a 56 no actual. O prazo de inscrición para participar neste programa non pecha, polo que todos os mozos dende 5º de primaria a 2º da ESO e o alumnado de FP básica censados en Tomiño poden anotarse enchendo un formulario de inscrición e entregándoo en Servicios Sociais e Cultura, no Concello ou nos propios centros educativos ou envialo por correo electrónico a aprender.tomino@gmail.com.

 

Venres, 2 de marzo de 2018 

O Concello leva a pleno unha moción de apoio á folga internacional feminista do 8 de marzo

O Concello de Tomiño levará á sesión plenaria que se celebrará hoxe, venres, ás 20.00 horas, unha moción de apoio á folga de reivindicación feminista prevista para o vindeiro 8 de marzo no marco dunha xornada internacional de paros e mobilizacións para reivindicar a igualdade de oportunidades nas condicións de traballo, na esfera social e no dereito a vivir sen violencias.

Nesta moción recóllese que a folga do 8 de marzo pretende ser unha chamada de atención dende o ámbito local sobre a desigualdade e a invisibilidade “que historicamente sofren as mulleres, co obxectivo de esixir a mellora das súas condicións sociais e laborais” e para combater as discriminacións. Así, por exemplo, a fenda salarial en Galicia é do 23% e, soamente en Tomiño, hai un 13% máis de mulleres desempregadas que de homes (617 mulleres rexistradas no paro fronte aos 461 homes). Ademais, as traballadoras galegas padecen a inexistencia dun marco autonómico que axude a negociar melloras para os traballos feminizados en Galicia, como a conserva, e teñen que enfrontarse a máis atrancos na conciliación da vida familiar e laboral.

Por todos estes motivos, o Concello de Tomiño tamén fará un chamamento a participar nas mobilizacións convocadas polo movemento feminista galego e a secundar a manifestación nacional unitaria. En Tomiño convocouse para ese día unha mobilización ás 12.30 horas diante do Concello.

Orde do día

Xunto con esta moción, a esta sesión ordinaria do pleno tamén se levará unha moción dos representantes dos traballadores de Maderas Iglesias na que se insta á inmediata intervención da Xunta de Galicia para garantir os postos de traballo na empresa e evitar as graves consecuencias socioeconómicas que causarían tanto no concello como na comarca.     Nos últimos oito anos a empresa acudiu a dous procesos concursais, realizou sete expedientes de regulación de emprego consecutivos e acumulou unha débeda que ronda os 40 millóns de euros.

A orde do día tamén recolle unha moción para a sinatura urxente coa Xunta de Galicia dun convenio para a convocatoria de prazas e accesos ás diferentes categorías dos corpos de Policía Local e auxiliares. Ademais, nesta sesión plenaria celebrarase a toma de posesión de Germán Castro como concelleiro do Partido Popular no goberno municipal en substitución por renuncia de Raquel Silva.

 

Xoves, 1 de marzo de 2018 

A Mostra de Cultivos chega á súa XV edición apostando pola profesionalización no agro

A Mostra de Cultivos do Baixo Miño chega á súa décimo quinta edición apostando pola profesionalización do sector, para o que crea, por primeira vez, un espazo que xirará arredor do emprego no agro, cun punto dedicado á recollida de currículos e coa presenza de varios asesores laborais especializados que estudarán e orientarán a todas aquelas persoas interesadas en desenvolver a súa carreira profesional en distintas áreas deste sector.

Estas dúas iniciativas completaranse coa celebración dun obradoiro de empregabilidade o sábado 3 de marzo,  aberto a todos os públicos e do que se pode recibir máis información escribindo un correo electrónico a acubam@mostradecultivos.eu. Ademais, afondando nesa necesidade de potenciar a profesionalización do sector a través da mellora das competencias, o venres 2 de marzo (16.00 horas) celebrarase unha mesa técnica sobre o modelo de negocio no agro no que se tratarán distintas perspectivas da realidade do sector e diversas fórmulas de éxito que se poderían desenvolver no ámbito da xestión empresarial con empresas reais que falarán das súas experiencias.

Para todos os públicos

A XV Mostra de Cultivos do Baixo Miño celebrarase do 2 ao 4 de marzo no pavillón municipal de Goián, organizada de forma conxunta pola Asociación de Cultivos do Baixo Miño (acuBam) e o Concello de Tomiño. O eixo central desta nova edición xirará arredor da historia do agro na comarca, facendo un percorrido polo que é, polo que representa e cara onde camiña o sector a través de diversas actividades para profesionais e público en xeral.

A Mostra “xurde como un escaparate do que se fai no sector, pero tamén como punto de encontro e fortalecemento entre as empresas. Por iso gustaríame convidar a todo profesional ligado co agro a visitarnos durante a xornada do venres ou o sábado esperando atopar unha mostra consolidada, fortalecida e integradora, pero tamén invitar a todos os pais e nais para que o domingo se acheguen a desfrutar con nos das distintas propostas lúdicas que temos organizadas”, salienta Patricia Rodríguez, presidenta de acuBam.

Pola súa banda, a alcaldesa de Tomiño, Sandra González, destaca a importancia do agro tanto na comarca do Baixo Miño como no propio concello, “un sector estratéxico que emprega a moitísima xente” e entendido “de maneira moderna, non como un agro de subsistencia, senón do que se pode vivir dignamente e con calidade de vida”.

Tres días cheos de actividades

A mostra achegará ao público participante aos inicios do agro no Baixo Miño cunha exposición fotográfica das principais épocas do sector que permitirá apreciar a súa evolución ata hoxe en día e servirá para facer unha radiografía do presente a través dos preto de 30 expositores que estarán na mostra. O futuro chegará un ano máis da man de Acubam Innovación, un certame que chega á súa terceira edición recollendo innovacións tecnolóxicas aplicables a calquera elo da cadea de valor do agro na comarca.

Entre as novidades desta nova edición tamén destaca a presentación dos Premios Xardinería 2018, organizados por primeira vez por Acubam e pola Asociación Galega de Empresas de Xardinería (Agaexar), e a realización dunha xornada de carácter máis solidario o domingo 4 de marzo, día no que o centro de educación especial San Xerome, de A Guarda, contará cun posto de venta de produtos cedidos polo resto de expositores para recadar fondos para a reforma dunha bañeira terapéutica na entidade.

Ademais, o público poderá asistir a calquera das tres mesas técnicas organizadas para a ocasión, na que se tratarán dende a importancia da diagnose e a definición dos protocolos de actuación na loita contra pragas, prestando especial atención ao caso Xylella, ata o tema da auga no rural, abordando cuestións como os plans hidrolóxicos, as regulacións nos plans de seca, a garantía sanitaria do recurso ou o problema do radón en Galicia.

A última xornada da mostra, o domingo 4 de marzo, estará máis centrada en actividades para toda a familia, coa celebración dun obradoiro lúdico con talleres ecolóxicos, probas físicas, obradoiros de reciclaxe e xogos tradicionais para espertar entre os participantes a curiosidade polo sector. A mostra rematará cun concerto do grupo Rock Percusión, integrado por alumnado do centro San Xerome, a partir das 18.00 horas.

Ao longo dos tres días que dura a mostra, o público tamén poderá desfrutar dunha exposición de arte do Colectivo Somosarte, composto por artistas, escultores e pintores locais que amosarán as súas obras vinculadas á temática do agro no Baixo Miño. 

 

Contos vellos con novos finais para os máis de 400 estudantes do Concello de Tomiño

 ‘Contos vellos, novos finais’, de A Trastenda dos Contos, é unha actividade posta en marcha pola Oficina de Igualdade do Concello de Tomiño para sensibilizar a todos os estudantes de infantil e de 1º, 2º e 3º de primaria do municipio sobre actitudes discriminatorias dun xeito lúdico, tendo como obxectivo rachar cos estereotipos de xénero e afondar en aspectos como a igualdade no ámbito laboral ou a corresponsabilidade.

Máis de 400 escolares de todos os centros educativos de Tomiño participaron ao longo desta semana nesta actividade na que se traballou cos rapaces a través dos contos e dos monólogos pero tamén da interacción co público, sempre reforzando os aspectos positivos dunha boa práctica. Así, por exemplo, a través da historia de Laura, unha rapaza á que lle daba vergoña confesar que de maior quería ser pirata, os nenos traballan a igualdade no ámbito laboral ao tempo que se fomenta a lectura como camiño cara unha aventura trepidante e a imaxinación como unha ferramenta imprescindible na casa. Mentres, A Trastenda dos Contos aborda os estereotipos de xénero co Carapuchiña Vermella e, sobre todo, co lobo, que ao longo da historia ameaza con chegar a casa causando o pánico entre o público, pero que cando chega realmente descubre que as súas supostas vítimas, os porquiños e os cabritiños, lle organizaron unha festa sorpresa de aniversario.

Participaron nesta actividades o CRA Mestre Manuel Garcés, CEIP Pintor Antonio Fernández, CEIP Tebra, con escolares do CEIP Barrantes, e CEP Pedro Caselles Beltrán, que tamén acolleu ao alumnado do CEIP Sobrada.

Dende a Oficina de Igualdade xa están a traballar ademais na organización de varios obradoiros con estes mesmos obxectivos dirixidos a rapazas e rapaces de 4º, 5º e 6º de primaria.