www.galiciasuroeste.info

Sábado, 28 de novembro de 2009 

Antonio Benítez gaña o certame “Relación home-muller 100% positiva”

    O sevillano Antonio Benítez Barrios é o gañador do certame fotográfico “Relación home-muller 100% positiva” convocado pola Concellería de Muller e Servizos Sociais do Concello de Tui co gallo do Día Internacional contra a violencia de xénero.  Antonio Benítez presentou unha serie de tres fotografías baixo o lema “Algunas Parejas” que o xurado eloxiou pola súa calidade. O premio foi para a segunda fotografía desta serie na que se retrata a unha parella ao final da súa vida nun anden de metro onde mentres el toca o violín ela lle suxeita a partitura.  Coma premio recibirá 350€ en metálico e dúas noites de estancia no Parador de Turismo San Telmo de Tui.

    Na categoría de adultos presentáronse un total de 14 fotografías procedentes de Tui, A Coruña, Mondaríz Balneario, Granada, Girona e Sevilla.

    Na categoría de menores de 16 anos presentaron unha serie de 13 fotografías os alumnos de 6º da ESO do CEIP de Rebordáns sobre a educación e o feito de crecer en igualdade. Por este traballo o xurado, composto por Clara Torres, Manuel Martínez, Jose Font e Mónica Bugarín, decidiu premiar a toda a clase.

    A exposición coas fotografías presentadas pode visitarse na planta baixa da Área Panorámica, a carón da oficina de turismo.

    A Concelleira de Muller, Patricia Ricón, amósase satisfeita da participación lograda, superior á do ano pasado e con máis calidade. E salientou o traballo realizado en equipo polos alumnos e alumnas de 6º da ESO de Rebordáns que dicía terán premio para toda a clase.

O Conselleiro Agustín Hernández visitará Tui para presentar á empresa que se encargará do mantemento da EDAR de Guillarei e dar conta da situación do PXOM

    En quince días o Conselleiro de Medio Ambiente, Territorio e Infraestruturas, Agustín Hernández, visitará o Concello de Tui para presentar oficialmente a UTE que se encargará do mantemento e funcionamento da Estación Depuradora de Augas Residuais de Guillarei, EDAR. Estes traballos foron adxudicados pola Xunta á unión temporal de empresas formada por Acualia e Movexvial.  Así o informou no pleno do pasado xoves o Alcalde de Tui, Antonio Fernández Rocha, quen expuxo que amais o conselleiro informará das obras que a Consellería levará a cabo no que se refire a colectores xerais, e do tipo de obra que é preciso realizar para realizar a conexión cos colectores xerais.

    Nesa mesma visita á cidade Agustín Hernández informará da situación na que se atopa a tramitación do Plan Xeral de Ordenación Urbana de Tui.

    Así o explicaba Antonio Fernández Rocha contestando á pregunta formulada por Juan Miguel Diz Guedes sobre o estado do PXOM na quenda de rogos e preguntas.

    Nesa mesma quenda o voceiro do BNG, Laureano Alonso, preguntaba sobre a tramitación dos orzamentos municipais para 2010, indicando que non estarán aprobados en tempo. O rexedor tudense explicaba que non se poden confeccionar os orzamentos ao completo mentres non se saiba a cantidade que se vai recibir de Tributos do Estado, porque mentres non se teña esa cantidade non se pode facer un orzamento real, dicía.  Indicaba Fernández Rocha que nestes momentos se está a falar dun descenso nun 19% do que Tui recibirá dos Tributos do Estado, pero a cifra aínda non está confirmada. Engadía que a cantidade que se recibirá do Plan Provincial de Cooperación da Deputación baixa nun 17%, mentres que se manteñen os cartos do Fondo de Cooperación Local da Xunta de Galicia.

    Nestes intres dicía o Alcalde que os orzamentos están avanzado a espera da cifra dos Tributos do Estado, e tamén dun informe do ORAL sobre a previsión do Concello  de incremento de taxas ou de previsión do ICIO.

Aprobada por unanimidade a solicitude de cesión dun tramo da A-55 ao Ministerio de Fomento

    Por unanimidade aprobou a corporación municipal de Tui solicitar ao Ministerio de Fomento a cesión, sen custe económico, dun tramo de 920 metros da autovía A55 no enlace da Gándara-Guillarei  Pese a ese voto unánime non todos os corporativos estiveron de acordo no fondo deste tema, pero recoñecían que neste momento é a única saída que queda.

    Previo ao debate o Alcalde de Tui, Antonio Fernández Rocha explicaba que Fomento ía executar unha obra na saída da Gándara en Guillarei que impediría o acceso dos veciños a este lugar.  Engadindo que tras pórse en contacto cos técnicos de estradas a única solución é que o concello solicite esta cesión e tome logo as medidas de seguridade viaria oportunas, para o que terá que facer un proxecto. Apuntaba amais Fernández Rocha que se construirá no lugar unha rotonda que dará acceso ao barrio de Albelos, ao Cerquido e a Sobredo.

    Dende o Partido Socialista, o seu voceiro Manuel Freiría, sinalou que non entende porque non se solucionou este tema con anterioridade, engadindo que neste momento é a única opción que queda. Dixo amais non comprender porque se solicitan 900 metros cando con 400 bastaría para os enlaces, e criticou que o concello renuncie a cobrar case 188.272 euros que segundo os seus cálculos feitos en base as normas publicadas no BOE, lle corresponderían por facerse cargo desta estrada.

    Laureano Alonso, do BNG, expuxo o voto a favor do seu grupo “ante o interese dos veciños”. Puntualizaba que o concello vai asumir unha estrada cunha alta densidade de tráfico e cun cruce perigoso polo que dicía habería que buscar unha solución o antes posible. Criticaba igualmente que o Concello non vai recibir nada do Ministerio pola cesión deste tramo da A-55

    Miguel Capón Rey, de Acción Tudense, avanzou tamén o voto favorable do seu grupo, solicitando ao Alcalde que lle faga constar aos veciños de Guilalrei que “este é un exemplo de solidariedade de todo o concello cos veciños dun determinado barrio, para que teñan a mesma solidariedade por exemplo co cemiterio municipal ou co Centro de Formación”.

    Por último o Alcalde, Fernández Rocha, sinalou que tamén lle gustaría a el que pagasen 188 mil euros pola cesión, pero que os termos do acordo non o recollen así. Engadiu que ao recibir este tramo de estrada se incrementa o patrimonio municipal.  Concluíndo que “entre todos imos darlle unha solución á saída de Vigo para que ninguén se confunda, e tamén aos veciños de Guillarei”.

Aprobadas as mocións do BNG sobre financiamento dos concellos e sobre o Centro de Día

    O pleno aprobou por unanimidade unha moción do BNG sobre o financiamento dos concellos instando á Xunta a garantir as cantidade previstas para os concellos ao través do Fondo de Cooperación Local, non recortando as súas cantidades para 2010.  Así coma demandar ao Goberno do Estado que garanta o gasto corrente aos concellos e un sistema de moratorias no suposto de liquidacións negativas das cantidades recibidas da Participación de Ingresos do Estado durante 6 anos. Tamén se pide demandar do Goberno do Estado a reforma urxente do financiamento local, de xeito que o novo modelo incremente a contía da participación nos ingresos do Estado, e esa participación dos concellos galego se integre plenamente nos orzamentos da Xunta. E demandarase que o novo modelo teña en conta o maior custo dos servizos en Galicia, derivado da dispersión dos núcleos e do envellecemento da poboación.

    Tamén por unanimidade saíu adiante outra moción dos nacionalista na que se propuña que o pleno inste á Xunta á que proceda a licitar a construción do centro de día, que informe sobre o orzamento, o prazo de execución da obra e a posta en funcionamento do centro, así como os servizos que prestará, número de prazas e cadro de persoal.

    No debate a nacionalista Carmen Verde explicaba que o sentido da moción “é que o goberno do Concello se comprometa a que o concello teña centro de día”. Dende o PSOE Manuel Freiría expuña que este servizos é de máxima urxencia polo que hai que instar á Xunta a iniciar as obras o antes posible. Mentres dende AT Capón Rey formulouse unha serie de preguntas dende qué é un centro de día, até quen paga o persoal especializado. No final do debate o Alcalde, Fernández Rocha, explicaba que o Concello tanto para o centro de día coma para a gardería infantil terá que aportar o 20% do custo da obra e o 30% dos gastos de mantemento, polo que dicía que “o concello algún día terá que subir os impostos”. Sobre o caso concreto do centro de día indicaba que os terreos que están a carón do Centro Sociocomunitario cumpren cos requisitos esixidos pola Consellería coma comprobaron os técnicos deste departamento, que xa estiveron realizando as medicións para elaborar un anteproxecto.

    Xa no punto quinto foron presentadas outras mocións que quedaron sobre a mesa para ser levadas a comisión.

    O PSOE presentou tres mocións unha sobre as obras do novo Plan Estatal de Investimento, outra sobre o reparto de fondos da Deputación, e unha terceira para debater o posicionamento sobre a ameaza dos encoros.

    Dende o BNG presentábanse seis mocións. Solicitan o soterramento do cableado no casco histórico con cargo ao novo Plan E, outra demandando a fusión de Caixa Galicia e Caixanova,  tamén pedían que o Estado trate de buscar medidas paliativas ante o incremento do IVE previsto xa que afectará negativamente ás vendas en zonas de fronteira coma Tui . Os nacionalistas piden tamén á Consellería de Sanidade que contrate un pediatra para o centro de saúde de Tui e que cubra as baixas de persoal médico, outra moción é para defender o mantemento das oficinas de Igualdade e Benestar, e por último instar á Xunta ao pagamento en prazo ás persoas beneficiarias da Lei de Dependencia.

Tui crea un perfil en Facebook do Camiño Portugués a Santiago

    O Concello de Tui pon en marcha unha serie de iniciativas para promocionar o Camiño Portugués a Santiago ao seu paso por Tui, e ao tempo reivindicar a importancia da cidade coma porta de acceso do Camiño Portugués en Galicia, o que está documentado historicamente dende o século XII.

    Unha das primeiras iniciativas presentadas busca aproveitar todas as potencialidades das novas tecnoloxías para a promoción desta ruta xacobea. Deste xeito dende a Concellería de Cultura vense de crear un perfil en Facebook do Camiño de Santiago ao seu paso pola cidade que en quince días sumou xa 118 amigos.  Trátase dun perfil interactivo no que os internautas poden plantexar as súas preguntas ou dúbidas sobre o Camiño de Santiago, sendolles respondidas ao través do mesmo Facebook.  Ofrécese tamén un albume de fotografía do tramo do Camiño Portugués ao seu paso pola cidade. Amais no “muro” os visitantes poden deixar os seus comentarios, fotografías e opinións.

    Amais da posta en marcha deste perfil en Facebook dende o Departamento de Cultura realizouse tamén un análise da información existente sobre o Camiño Portugués a Santiago na internet obtendo coma resultado que é bastante precaria e deficiente. Por este motivo estanse a pór en contacto cos administradores de distintas webs para corrixan os erros detectados ou amplíen a información que aparece.

    Outra das iniciativas para promocionar o Camiño Portugués é a creación dun Centro de Interpretación do Camiño no Museo Municipal que se porá en marcha en breve.  Tamén foi solicitado á Consellería de Cultura a posta en marcha dun albergue provisional ante o aluvión de peregrinos previsto para 2010.

    Estas iniciativas foron presentadas onte á mañá no Telecentro polo Concelleiro de Cultura, Moisés Rodríguez, acompañado do Director da Biblioteca, Rafael Sánchez Bargiela, e da técnica deste servizo, Cristina Sanjurjo.

    Moisés Rodríguez fixo unha defensa do Camiño Portugués a Santiago ao seu paso por Tui indicando que “está documentado historicamente, queremos potencialo, e imos facer moitas actividades”.  Engadiu que a axilidade na información e na resposta é unha das demandas de hoxe en día algo que na información sobre o Camiño Portugués se logra co perfil de Facebook.

    Rafael Sánchez Bargiela salientaba a importancia de Tui coma o principal núcleo do Camiño Portugués, indicando que lugar de entrada do Camiño a Galicia foi sempre e segue sendo Tui. Polo que queren manifestar que o Camiño de Santiago ten historicamente o seu paso por Tui e non por outros lugares, engadindo que as distintas rutas do Camiño Portugués conflúen en Valença e Tui.

    Por último Cristina Sanjurjo foi a responsable de explicar os contidos do perfil en Facebook, co número de usuarios e información accesible.

    Para acceder a este perfil dende a nosa conta en Facebook temos que buscar “Tui Camino de Santiago” e elixir o que aparece coma persoa.

Cursos organizado polo Servizos Galego de Igualdade

    Onte  tivo lugar no Telecentro de Tui un curso sobre “Sostenibilidade e aforro en tempos de crise” organizado polo Servizo Galego de Igualdade coa colaboración da Concellería de Servizos Sociais e Muller do Concello de Tui.

    O próximo xoves, 3 de decembro,  de 16 a 20h impartirase un obradoiro sobre “Consumo responsable” organizado tamén polo Servizo Galego de Igualdade en colaboración coa Concellería de Servizos Sociais. O prazo para anotarse neste curso está aberto até o próximo mércores nos Servizos Sociais do Concello de Tui.

    Estas actividades forman parte das iniciativas organizadas para conmemorar o 25 de Novembro, o Día Internacional contra a Violencia de Xénero.

Remata o Outono Cultural en Areas

    Mañá domingo remata o Outono Cultural organizado pola Asociación Cultural “Seixos Albos” de Areas. Ás once da mañá celebrarán misa no Centro Cultural acompañada pola Coral do Centro Sociocomunitario de Tui. A continuación terán xogos populares. Pola tarde, ás cinco, o grupo de teatro Mesturanza da Asociación Cultural “Seixos Albos” porá en escena a obra “As fillas do taberneiro”. Logo está prevista a actuación do grupo de música folk Meigallo da Asociación Cultural Xuntanza de Randufe.

Festa do socio e do magosto en Rebordáns

    O Centro Cultural San Fins de Rebordáns celebra mañá domingo a súa Festa do socio e magosto. Será a partir das cinco da tarde. Haberá castañas e viño gratis e animación musical. Sortearase entre os socios unha cea para dúas persoas.

As previsións meteorolóxicas adversas obrigan a trasladar a IX Edición dos Nosos Fariñeios, Burros e Muiños

Non teñen os deuses da súa parte os membros da Asociación Asociación Cultural Muiñeiros do Río Tripes convocantes de “Os nosos Fariñeiros Burros e Muíños” pois as chuvias que se anuncian, unha vez máis, para o sábado e domingo obrigan a un novo aprazamento das actividades previstas, tras repetidos traslados desde a data inicial.

           A IX Edición dos Nosos Fariñeiros, Burros e Muíños, se o tempo non o volve impedir, celebrarase o domingo 6 de decembro

A asociación de discapacitados Vontade presenta a curta “Para cando conten comigo”, dirixido por Xes Chapela e cun reparto integramente de persoas con algún tipo de discapacidade

A asociación de discapacitados do Baixo Miño Vontade presenta o xoves 3 de decembro a las 20.00h – Día Internacional de la Discapacidade – nol Museo Municipal de Tui, a curta “Para cando conten comigo”- dirixido por Xes Chapela de Zoa Media e interpretado integramente por persoas con algún tipo de discapacidade, todos eles membros da asociación.

Con este novo reto Vontade quere acercar ó público a realidade social e as barreiras coas que se encontran día a día as persoas nesta situación. É por isto que elixiron o Día Mundial da Discapacidade para facer a gran estrea desta peza cinematográfica rodada no supermercado Eroski Center de Sanguiñeda (Mos) no mes de outubro.

Susana Barbosa, Raquel Daponte, Sergio Fernández, Isabel Gómez, Luciano Iglesias, Mercedes Lago, Santiago Lorenzo, Jose Antonio Mariño, Mar Méndez, Mari Carmen Pellón, Joaquín Pérez, José Seoares Julio Vicente, Araceli Vila, Antonia Fernández, entre outros son os personaxes principais da trama, que narra unha situación que para moitos podería ser cotiá pero que para eles e elas se converte en toda unha aventura. Una mirada máis alá da discapacidade na que encontramos capacidades e cualidades que para moitos/ no discapacitados podan pasar desapercibidas.

Será tan só un dos actos conmemorativos que organiza Vontade para celebrar este día. As 18.00h, no Paseo da Corredoira, os membros da asociación realizarán unha “liberación” simbólica de globos que esperan, aterren noutras localidades da comarca, con mensaxes sobre a importancia de eliminar as barreiras que os separan dunha vida más fácil.

Vontade

A Asociación Vontade foi formada por un grupo de persoas con discapacidade da zona do Baixo Miño o día 8 de outubro do 2003.Contou na súa Asemblea Constituinte co aval de 79 socios fundadores. Baseando as actuacións destes anos nos seguintes puntos:

Transporte adaptado.

Formación específica.

Integración no mundo laboral.

Eliminación das barreiras arquitectónicas.

Nestes momentos a asociación esta formada por máis de173 socios con discapacidade cun servicio de centro de día onde realizan actividades formación, ocio e tempo libre. Presta servizo de  psicología, terapia ocupacional e traballo social.

Venres, 27 de novembro de 2009 

Case 800 escolares asisten a unha representación teatral coa que a DXT quere incidir sobre a Educación e a Seguridade Vial

    O Teatro Municipal de Tui acolle onte á mañá dúas representacións teatrais da obra “Un soño fantástico” organizada pola Dirección Xeral de Tráfico no marco das súas campañas de Educación Vial.

    Ás dez e media desta mañá tivo lugar unha primeira función á que asistiron 100 alumnos do CEIP nº1, 90 do CEIP de Caldelas, 57 do CEIP de Rebordáns, 40 do Colexio O Pelouro, 60 do CEIP de Guillarei e 95 do Colexio Maristas.

    Na segunda función, ás doce e cuarto, estiveron 35 alumnos de Pazos de Reis, 32 do CEIP de Randufe, 224 do CEIP nº2, e 50 do CEIP Antonio Blanco Rodríguez de Covelo.

    En total ao longo da mañá asistiron a esta representación  783 alumnos e alumnas.

    Con esta obra a DXT quere achegar de xeito lúdico, ao alumnado de 2º e 3º ciclo de Educación Primaria contados relacionados coa Educación e a Seguridade Vial.

Presentación do perfil en Facebook do Camiño de Santiago ao seu paso por Tui

    Hoxe venres, 27 de novembro, ás 11.30h, terá lugar no Telecentro de Tui, a presentación do perfil en Facebook do Camiño de Santiago ao seu paso por Tui. Esta é unha das iniciativas promovidas dende a Concellería de Cultura do Concello de Tui para promocionar o Camiño Portugués de Santiago ao seu paso pola cidade.

    A presentación correrá a cargo do Concelleiro de Cultura, Moisés Rodríguez, xunto a Rafael Sánchez Bargiela, Director da Biblioteca, e Cristina Sanjurjo, técnica deste departamento.

Xoves, 26 de novembro de 2009 

A Compañía de Susi Lillo presenta “La mar de cuentos”

Os máis pequenos da casa son os destinatarios do espectáculo que maña, venres, ás 20 horas, terá lugar no Teatro Municipal de Tui dentro da programación organizada pola Concellería de Cultura. Será “La Mar de Cuentos” que chega a Tui da man da compañía madrileña de Susi Lillo.

As entradas están xa á venda na web www.culturatui.info até o venres ás 17h, ou o venres dende ás 18.30h no despacho de billetes da Área Panorámica. Teñen un prezo de 3€, 2€ con descontos e para os menores de 12 anos.

 “La mar de cuentos” é un espectáculo familiar especialmente indicado para nenos de 1 a 5 anos, cunha duración de 45 minutos. É unha viaxe ao fondo do mar conducida por Serruchín, o peixe protagonista da historia que nos vai presentar aos seus amigos Tibur, Socorro e Tío Pulpo. Eles achegaranos nunha viaxe divertida e sorprendente polas profundidades mariñas para coñecer miles de contos que levan moito tempo agochados. Cantarán cancións e nos farán disfrutar dun ledo mundo submarino, amosándonos gran parte dos tesouros que ten agochados.

Últimos días para visitar a exposición do gravador tudense Xabier de Sousa

A Sala Municipal de Exposicións do Concello de Tui acolle a exposición dos gravados do artista tudense Xabier de Sousa que realiza esta primeira exposición individual na cidade. A mostra poderá ser visitada na Sala Municipal de Exposicións /Edificio Área Panorámica, c/ Colón 2) ata o vindeiro día 29 en horario de apertura da Sala Municipal de Exposicións, de 09:00 a 14:00 horas e de 16:30 a 20:30 horas. Os sábados pódese visitar de 09:00 a 13:00 horas.

Xabier de Sousa naceu en Tui no ano 1960 e posúe unha formación autodidacta no mundo da arte, ten realizado estudios de gravado en diversos talleres de Arte Gráfica da provincia de Pontevedra e de Lugo. Imparte cursos monográficos de gravado. Membro do grupo “Graph” (gravadores do sur de Galicia); impulsor e co-director do centro de gravado “+Obra gráfica galega” de Vigo e tamén do grupo de gravadores “Escara” (con sede en Lugo). Na actualidade é director do estudo de gravado “Chicorio” de Vigo.

Na súa longa traxectoria de exposicións, tanto individuais como colectivas, poderíamos destacar a súa participación en “Estampa” o Salón Internacional do Gravado de Madrid en varias edicións, ou na Bienal Internacional de Vilanova de Cerveira, foi seleccionado e certames artísticos en Europa e América, realizando numerosas exposicións en varios países europeos.

Obtivo o 1.º premio na VII Bienal do Eixo Atlántico. Foi seleccionado no VI Premi de Gravat Ciutat de Lleida, e participou no 1.º Salón Internacional de Arte Contemporáneo «Puroarte» (Vigo), na XIV Estampa (Salón Internacional do gravado e edición de arte contemporánea, Madrid). En 2007 foi seleccionado no Certame de Gravado «Máximo Ramos» (Ferrol), no Premio Nacional de Pintura «El Primero de Fariña» (Toro) e no I Premio Nacional de Gravado «Ciudad de Valladolid». As súas obras figuran no Museo Nacional do Gravado de Bos Aires (Arxentina), no Museo Municipal de Ourense, no Museo de Belas Artes «Lucas Braulio Areco» (Municipalidad de Posadas, Arxentina), no Museo San Telmo de Donostia (Guipúscoa), na Biblioteca Nacional (Madrid), na Deputación de Ourense e na Fundación Caixanova (Vigo). Foi finalista dos premios de artesanía 2008 e 2009 entre outras moitas distincións á súa obra.

Nesta exposición Xabier de Sousa realiza un percorrido pola súa traxectoria artística dende a súa primeira exposición no ano 1989, amosando a súa evolución e a calidade do seu traballo. Para o concelleiro de cultura do Concello de Tui, Moisés Rodríguez Pérez, esta exposición de Xabier de Sousa é unha das grandes citas artísticas desta temporada na cidade de Tui, e resulta unha satisfacción para o Concello exhibir a obra dun importante artista tudense, de consolidada traxectoria, que enche coa súa capacidade creativa a Sala Municipal de Exposicións, cumprindo así un dos obxectivos desta Sala como é promover aos artistas locais. Pero, ao mesmo tempo neste oportunidade, a obra de Xabier de Sousa posúe unha alta calidade e capacidade de comunicación que suscitará, de seguro, o interese dos espectadores.
 

A Asociación de Amas de Casa participa na preparación do Nadal de El Corte Inglés

    A Asociación de Amas de Casa, Consumidores e Usuarios de Tui vai participar un ano máis na actividade de El Corte Inglés para preparar o Nadal. Será o próximo mércores 2 de decembro.

    As persoas interesadas en participar deben anotarse este venres, 27 de novembro, de 17 a 18h na Casa da Xuventude.

Mércores, 25 de novembro de 2009 

Xornadas de emancipación xuvenil nas Casas da Xuventude

A Casa da Xuventude de Tui ofrecerá, o venres,  18 de decembro, de 18.00 a 20.00 horas unha Xornada de emancipación xuvenil, organizada pola Dirección Xeral de Xuventude e Voluntariado nos seus centros.

Durante esta xornada trataranse contido como a elaboración de curriculums e cartas de presentación, entrevista de traballo e recursos para a procura de emprego.

Esta acción vai dirixida á mocidade de 16 a 35 anos, sendo o número de prazas limitadas a 16 que se cubrirán por orde de inscrición.

            Para obter máis información ou inscribirse os interesados poderá acudir á Rúa Sanz, 28 de Tui, ou poden chamar ao teléfono 986 60 05 68. Tamén poderán enviar un correo electrónico a informacionxuventude@yahoo.es

Martes, 24 de novembro de 2009 

Acto en Tui o 24 de novembro con motivo da loita contra a violencia de xénero organizado pola Comisión Comarcal da Muller do BNG no Baixo Miño

A Comisión Comarcal da Muller no Baixo Miño continúa a campaña que desenvolve co lema “Contra a violencia de xénero: máis sensibilización, máis medios, máis recursos”.

           O próximo acto que celebrará o BNG terá lugar hoxe, martes ás 20.30h no Museo Municipal de Tui (antigo convento de San Domingos), presentado por Ofelia Chicote de Miguel responsable Local da Muller de Tui, quen estará acompañada pola responsable Comarcal da Muller do BNG, Carme Verde Diego. No acto intervirá a Concelleira de Igualdade no concello de Vigo, Iolanda Veloso, proxectaranse tres curtas: “Tirapuxa” (1996), “Meniña” (2006) e “Amelia e as Sereas” (2006) e rematará cun Cine Forum en torno a violencia de xénero.

Os Phantom Club ofreceron toda unha festa en “Mucha noches, buenas gracias”

Gran éxito do concerto ofrecido o pasado venres polo grupo Phantom Club no Teatro Municipal de Tui. Esgotáronse todas as entradas postas á venda, a meirande parte delas adquiridas ao través da internet, e incluso houbo persoas que non puideron asistir ao evento ao non quedar localidades.

Foi unha noite moi especial tanto para os Phantom Club coma para o público que enchía a  sala. A gravación do disco “Muchas noches, buenas gracias” foi unha auténtica festa conducida por Frans Banfield, o líder dos Phantom, que se gañou ao público dende o escenario. Arrincou tamén moitos aplausos Seilaesencia a voz feminina do grupo, así coma o resto dos integrantes, entre eles Charlie Hermida, a quen lle cantaron o Cumpreanos Feliz xa que era o seu aniversario.

Houbo momentos moi agardados coma a presenza de Ariel Rot sobre o escenario, ou a colaboración de Claudio Gabis que deu unha auténtica lección de guitarra. Aportaron tamén o seu gran de area Pablo Novoa, ex Golpes Bajos, e Andy Chago, así coma Nillo Nández e os Licor Café  que se moveron coma peixes na auga no concerto.

Foi unha semana intensa de traballos previos para instalar a escenografía, a iluminación, e lograr que a calidade de son fose a precisa para quedar inmortalizado no que será o novo traballo dos Phantom Club. Un nutrido grupo de persoas traballaron arreo durante as xornadas previas ao concerto con Gus Abreu na parte técnica, e Javier Abreu coma técnico de son.  Na recta final do concerto non faltaron os agradecementos a todos aqueles que contribuíron a facer realidade o soño deste grupo, con especial mención ao Concello de Tui dende a Concellería de Cultura, e ao seu persoal.

 “Muchas noches, buenas gracias” foi un concerto moi especial, un soño feito realidade arroupado polos artistas convidados e pola calor do público, e tocado e cantado a pleno pulmón por Frans Banfield, Seilaesencia, Brian Moure, Juanma Ons, Charlie Hermida, Vitorio. Nata Estévez e Sutta, os integrantes de Phantom Club.

O Concelleiro de Cultura de Tui, Moisés Rodríguez, quere felicitar especial aos Phantom Club pola magnífica acollida do concerto, e polo excelente resultado acadado. Lembra o edil que dende o seu departamento “apostamos polos novos valores, polos novos artistas que comezan”.  Por outra parte destacou o éxito da iniciativa, sendo a primeira vez que no Teatro Municipal, se realizaba un evento desta características, amosándose moi satisfeito da resposta obtida.

Peche o aparcamento municipal por obras

    Hoxe martes e mañá mércores vaise proceder ao arranxo do firme do aparcamento municipal da Área Panorámica. Farase en dúas fases, unha cada día. Por este motivo non se poderá estacionar nesta zona dende ás oito desta mañá.

O pleno trata o xoves a solicitude ao Ministerio de Fomento de cesión do tramo da A-55 do enlace A Gándara-Guillarei

    Cinco puntos na orde do día ten o pleno que este xoves, ás oito da tarde, vai celebrar a corporación municipal de Tui. É unha sesión de carácter ordinario. Comezará coa aprobación dos borradores das actas anteriores do 22 e do 29 de outubro.

    No punto segundo vai unha solicitude ao Ministerio de Fomento da cesión, sen custe económico, do tramo da autovía A-55, no enlace A Gándara-Guillarei.

    A continuación debaterase unha moción do BNG sobre medidas para mellora o financiamento dos concellos. O punto cuarto é tamén unha moción do BNG sobre a construción do Centro de Día.

    O punto quinto e último é o control aos órganos de goberno coas disposicións de interese, dar conta dos decretos da Alcaldía, mocións, e a quenda de rogos e preguntas.
 

Conferencia sobre Micoloxía en Malvas

    A Asociación de Veciños “Santiago de Malvas” organiza unha conferencia sobre micoloxía este venres ás oito da tarde no local da asociación, no edificio das escolas.  Será impartida por Purificación Lorenzo. O sábado ás dez da mañá farán unha saída ao monte.

    O prezo por participar para socios é de 6€, para non socios 12€ e para nenos 5€.

    Os interesados poden inscribirse na sede da Asociación Vontade no Centro de Formación Ocupacional ou no teléfono 986 62 30 44, en calquera directivo da Asociación de Veciños, ou no Bar Nancy fronte á igrexa de Malvas.

Inauguración da Exposición Colectiva de Nadal en Trisquel e Medulio

    A Galería de Arte “Trisquel e Medulio” inaugura o sábado ás 20.30h a XIII Mostra Colectiva de Nadal. Coincidindo coa inauguración haberá un miniconcerto de música de corda a cargo de Saraquel.

    A mostra permanecerá aberta até o 24 de xaneiro, pudendo visitarse de luns a venres de 17 a 21 e os sábados de 11 a 14 e de 18 a 21h.

    Lembramos que a Galería de Arte “Trisquel e Medulio” está na rúa Antero Rubín fronte á Igrexa de Santo Domingo.

Luns, 23 de novembro de 2009 

Acto en Tui o 24 de novembro con motivo da loita contra a violencia de xénero organizado pola Comisión Comarcal da Muller do BNG no Baixo Miño

A Comisión Comarcal da Muller no Baixo Miño continúa coa campaña na que co lema “Contra a violencia de xénero: máis sensibilización, máis medios, máis recursos”, pretende concienciar á poboación de que aínda queda moito por facer para erradicar a violencia, a discriminación e a subordinación das mulleres e para acadar unha sociedade igualitaria.

Aínda que na antiga lexislatura en Galiza se fixeron grandes avances neste sentido coa aprobación dunha Lei específica para a prevención e tratamento integral da violencia de xénero (Lei 11/2007) e con recursos sociais para todas as mulleres con independencia de que contasen cunha orde de protección ou non, faltan medios e quedan por desenvolver recursos como garantirlles ás mulleres vítimas de violencia de xénero atención psicolóxica pública, pór en marcha o Centro de recuperación integral ou desenvolver o Observatorio galego da violencia de xénero.

O próximo acto que celebrará o BNG será presentado por Ofelia Chicote de Miguel responsable Local da Muller de Tui, quen estará acompañada pola Responsable Comarcal da Muller do BNG, Carme Verde Diego. No acto intervirá a Concelleira de Igualdade no Concello de Vigo, Iolanda Veloso, proxectaranse tres curtas: “Tirapuxa” (1996), “Meniña” (2006) e “Amelia e as Sereas” (2006) e rematará cun Cine Forum en torno á violencia de xénero.

A Comisión Comarcal da Muller no Baixo Miño reitera a súa invitación a todas aquelas persoas, homes e mulleres, ás que lle preocupe a violencia de xénero a que participen desta actividade. Nomeadamente fai un chamamento as diferentes asociacións de mulleres do Baixo Miño, as mulleres que traballan en contacto con outras mulleres nos centros de saúde, nos centros sociais, nos servicios sociais, en definitiva a todas as mulleres que de xeito directo ou indirecto teñan contacto cos problemas que provoca a violencia de xénero.

Sábado, 21 de novembro de 2009 

A Deputación adianta 208.983 euros ó concello de Tui para a merca de 5 vehículos con fins públicos

A Deputación de Pontevedra anunciou que axudará ao concello de Tui con 208.983 euros dos fondos da Caixa de Anticipos reintegrables para a merca de cinco vehículos para a prestación de servizos públicos.

A finalidade deste anticipo atópase entre os primordiais da Caixa: facilitar ás entidades locais, con poboación de dereito non superior ós 25.000 habitantes, anticipos reintegrables destinados a financiar, con carácter preferente, a achega dos concellos en obras incluídas nos Plans Estatais de Investimento así coma as propias inversións en obras e servizos.

O prazo de amortización desta cantidade será de 10 anos. A amortización das cantidades dispostas comezará no exercicio no que remate a disposición do anticipo ou no que finalice o prazo para a súa disposición, ou, de ser o caso, cando finalice o período de carencia.

O pago do anticipo farase a medida que se xustifique a realización das inversións que se financian có mesmo, abonándose para cada xustificación que se presente a parte proporcional do anticipo en relación co custe da inversión.

Programa de anticipos

Estes anticipos correspóndenlle a aquelas entidades locais da provincia cun número de habitantes de dereito igual ou inferior a 25.000, durante o exercicio anterior para investimentos.

Con cargo a este programa concédense anticipos con carácter preferente, para facer fronte á achega dos entes ós investimentos incluídos en plans provinciais de cooperación, en investimentos financiados con Fondos FEDER ou outros fondos comunitarios, así como naqueloutros financiados pola Administración do Estado ou a Comunidade Autónoma; para o resto de investimentos en obras e servizos dos entes locais, ou, con carácter excepcional, anticipos para operacións de tesourería para facer fronte a situacións transitorias ou de emerxencia dos entes locais.

Estes anticipos poden acadar un importe máximo do 75% do custo do investimento, sen superar os 300.000 euros. En casos especiais, poderase incrementar a porcentaxe e o importe absoluto. Así mesmo, cando trala asignación de acordo coas límites anteriores haxa excedente de crédito poderanse incrementar os importes inicialmente concedidos ata o esgotamento do crédito sobrante ou proceder a unha nova convocatoria.

A Biblioteca presenta o Obradoiro de contacontos para pais “Contamos todos”

A escritora e ensinante Amalia Pérez Otero analizará os aspectos positivos da lectura e dos libros na casa. Así as nais e os pais poderán adentrarse no mundo que a literatura actual ofrece no tocante aos libros para nenos. O obxectivo do obradoiro é realizar unha aprendizaxe, dun xeito divertido, do que é contar e inventar contos aos fillos coa finalidade de que sexa un momento de encontro entre eles e os pais e, asemade, a iniciativa pretende fomentar o gusto pola lectura.

O obradoiro terá lugar na Biblioteca Pública Municipal de Tui (Edificio Área Panorámica) o vindeiro luns 23 ás 18.30 horas e terá unha duración aproximada de 90 minutos. Para facilitar a asistencia dos pais a esta actividade, a Biblioteca proxectará unha película dirixida aos cativos, para que os seus pais poidan aisistir ó obradoiro.

Esta nova actividade da Biblioteca Municipal de Tui enmarcase dentro do seu programa para abordar actividades de animación e promoción da lectura, e xunto con espectáculos de diversa índole a Biblioteca tudense desexa ofrecer aos pais e nais ferramente para que a lectura resulte un elemento básico para o desenvolvemento dos rapaces e un xeito divertido de encontro familiar.

Achegamento á lectura

A actividade enmárcase dentro do programa “Letras Vivas” da Dirección Xeral de Promoción e Difusión da Cultura da Consellería de Cultura e Turismo. As actividades que se ofrecen a través deste programa caracterízanse por procurar un achegamento á lectura desde un enfoque interactivo que, sen esquecer nunca a diversión, axude a transmitir a paixón polos libros como fonte de goce e coñecemento. Neste caso, os pais de nenos pequenos son o obxectivo fundamental, xa que neles reside gran parte da responsabilidade á hora de trasladar o amor pola lectura ós seus fillos.

As propostas tampouco esquecen ningún sector do público. Moitas das accións están pensadas para os nenos e nenas, por ser esta unha etapa chave para a formación lectora das persoas, mais tamén hai alternativas para calquera outro sector de idade. De igual forma, atoparemos accións tanto destinadas a un público carente do hábito lector coma outras máis acaídas para as persoas xa amantes dos libros.

IV Mercadiño de Antigüidades

    Hoxe sábado ten lugar no Paseo da Corredoira o cuarto Mercadiño de Antigüidades organizado por ACITUI. Dende ás dez da mañá e até ás oito da tarde poderanse visitar os distintos postos con obxectos antigos. Colabora o Concello de Tui.

Remata a programación de teatro en Guillarei

    Remata a programación teatral en Guillarei. Este domingo ás cinco e media da tarde no Centro Veciñal e Cultural de Guillarei o grupo Lohegrín Teatro porá en escena “La perle de la sortie”. Organiza esta actividade a Asociación Cultural Virxe das Dores.

Nova cita este domingo no Outono Cultural de Areas

    A Asociación Cultural “Seixos Albos” de Areas prosegue co seu Outono Cultural. O domingo ás dez da mañá terán futbito parroquial. Xa pola tarde ás cinco contarán coa actuación das Pandereteiras “Cacharela” de Taborda, o grupo de Playbacks “O Mosteiro” de Pexegueiro, e as Pandereteiras de Goián.

Magosto en Pazos de Reis

    A Asociación Cultural Aloia de Pazos de Reis celebra este domingo ás cinco da tarde o seu magosto. Será na Casa Cultural de Pazos de Reis.

Festival de música en Rebordáns

    O Centro Cultural San Fins de Rebordáns acolle hoxe sábado ás 21.30h un Festival de Música co gallo das 24 horas sen alcohol na Comunidade Galega.  Está organizado pola Asociación de Alcohólicos Rehabilitados do Baixo Miño.

    Actuarán o grupo de pandereteiras “E dalle” do Centro Sociocomunitariode Tui, o grupo de cantareiros “Os que somos” do Centro Cultural San Fins de Rebordáns, a Coral Ponte das Febres de Ribadelouro e o grupo de gaitas “San Xoán” de Paramos.

Partido do Tyde

    O domingo ás 16.15 xógase no Campo Álvarez Durán o encontro entre o Tyde e o Ribadelouro. Ao remate do partido haberá un magosto para os socios. 

Venres, 20 de novembro de 2009 

Miguel Capón de AT di que é preciso ter noticias de primeira man sobre a situación do PXOM

    O Voceiro de Acción Tudense, Miguel Capón, estivo onte no programa Día a Día da RMT dentro da rolda de conversas que veñen mantendo cos distintos grupos presentes na corporación municipal.

    En primeiro lugar referiuse ao novo centro de saúde de Tui que trala adxudicación da redacción do proxecto agarda que estea listo nun ano.  Indicaba que este inmoble ten que estar acorde co entorno no que se vai emprazar.

    Sobre a mesa estivo tamén a situación do Plan Xeral de Ordenación Municipal. Nese senso referíase ás declaracións do alcalde no último pleno sobre a aprobación do Plan antes de finais de ano. Miguel Capón indicaba que neste momento o que se precisa é ter noticias de primeira man, de aí dicía a importancia da reunión prevista coa Directora Xeral de Urbanismo, así coma o informe favorable que se ten xa da Dirección Xeral de Estradas.

    Noutra orde de cousas o emprazamento provisorio do terceiro xulgado de instrución no antigo local de Rogelio na Corredoira dicía que lle parece unha solución para non perder esta terceira sala. A provisionalidade deste emprazamento dependerá da execución do novo edificio, e de cando a Xunta teña cartos para executalo, no antigo edifico de Camfran na Avenida da Concordia. Un emprazamento que Capón Rey considera idóneo porque ten a extensión suficiente, e terá unha zona verde á carón que permitirá unha zona de estacionamento, e podería construírse un aparcamento soterrado para o propio xulgado.

    A ano e medio das próximas municipais Miguel Capón avanzaba cal é a súa visión de coma estará a situación neses próximos comicios. Indicaba que ao mellor hai un grupo máis, logo da intención manifestada publicamente por Carlos Vázquez Padín de concorrer con Converxencia Galega, pero dicía que ao mellor tamén hai un partido menos en liza. Valoraba positivamente que se presenten grupos e que haxa idea de presentarse.

Accidente Laboral no Parque Natural do Monte Aloia

    Onte a tarde produciuse un accidente laboral no Parque Natural do Monte Aloia. O 112 recibiu ás 17.29h unha alerta dun particular avisando que a un operario que estaba a cortar madeira caéralle unha árbore enriba. Dende o 112 mobilizaron a emerxencias médicas, a Protección Civil de Tui e a Guarda Civil. Até o lugar achegouse tamén a Policía Local e o garda forestal.

    Segundo a información facilitada por Protección Civil e a Policía Local de Tui trátase dun traballador duns 51 anos dunha empresa portuguesa que estaba a realizar tarefas de corte de madeira na estrada que vai de Rebordáns até a Capela de San Fins. Cando se produciu o accidente estaba a cortar madeira, sen percatarse de que se lle caía unha rama enriba. Os efectivos de Protección Civil mobilizados até o lugar liberaron ao traballador que sufriu golpes na cabeza, no ombreiro, nas costas e nas costelas. Segundo expuxeron ía consciente e orientado cando foi trasladado ao Hospital do Meixoeiro.

O Telecentro de Tui presenta hoxe un titorial informativo sobre a TDT

O Titorial pretende dar a coñecer aos usuarios que é a Televisión Dixital terrestre (TDT), como se realizou o cambio de televisión analóxica a dixital, e en definitiva, servir de guía para que os cidadáns coñezan que pasos deben seguir e como atopar información sobre este tema. A iniciativa desenvólvese dentro o proxecto multimedia de formación da campaña “Comunícate” que a Secretaría Xeral de Medios desenvolve para dar a coñecer a Rede de Telecentros de Comunicación de Galicia (RTC). 

 “A TDT” é o quinto dunha serie de doce titoriais interactivos  nos que o Concello de Tui leva participado activamente. A presentación deste titorial terá lugar mañá venres 20 de novembro ás 12:00 horas no Telecentro de Tui (Edificio Área Panorámica, 1º andar). O acceso é libre.

Os titoriais foron creados dentro do programa Comunícate, co obxectivo de facilitar aos usuarios dos telecentros de comunicación (colectivos, asociacións, etc…) determinadas funcionalidades e potencialidades que se poden realizar dende os mesmos.  A xornada poderase seguir a través de videoconferencia nos Telecentros de Comunicación de varios puntos de Galicia, Tui entre eles, onde os interesados  poderán traballar co titorial, que  queda así accesible, a partir do venres, nos distintos Telecentros da Rede de Telecentros de Comunicación para o seu uso. 

Participantes

Os participantes no titorial serán Alfonso Cabaleiro Durán, secretario xeral de Medios, Xosé  Manuel García, Comunicador, e José  Pereira Fariña, decano da Facultade de Ciencias da Comunicación da USC. José  Pereira Fariña é profesor titular do Departamento de Ciencias da Comunicación da Universidade de Santiago de Compostela e membro do grupo de investigación Novos Medios da USC, acaba de ser nomeado decano da Facultade de Ciencias da Comunicación da universidade compostelá. Entre as súas publicacións, figuran varios artigos en revistas internacionais e participou na redacción de varios libros sobre o ciberxornalismo, como o Manual de Redacción Ciberperiodística (Ariel, 2004) e Sistemas dixitales de información (Pearson, 2006). Na actualidade, traballa en varios proxectos de investigación vinculados á análise de contidos e á converxencia dixital entre os diferentes soportes de comunicación.

Hoxe ábrese un novo prazo para a adxudicación das Vivendas Sociais de Caldelas

    Hoxe ábrese un novo prazo para adxudicar as Vivendas Sociais do Antigo Cuartel da Garda Civil de Caldelas.

    Os interesados teñen un mes de prazo para presentar as súas solicitudes no rexistro de entrada do Concello de Tui, en horario de oficina, no modelo normalizado que será facilitado no propio concello.

    Saen a concurso 15 vivendas e unha máis adaptada para persoas con discapacidade. As bases poden consultarse na web www.concellotui.org ou na secretaría do Concello.

Doazón de Sangue esta tarde en Tui

    Esta tarde unha unidade móbil do Centro de Transfusións estarán na Praza de Galicia. Poderase doar de catro a nove da tarde. Lembramos que dende o centro de tranfusións fan un especial chamamento aos doantes A+, ante a escaseza deste tipo de sangue.

Hoxe é o concerto dos Phantom “Muchas noches, buenas gracias”

    Todo está preparado no Teatro Municipal de Tui para o concerto desta noite. Sobre o escenario estarán case unha vintena de músicos reunidos para dar voz e música a “Muchas noches, buenas gracias”, o que será o segundo traballo discográfico dos Phantom Club.

    Esta banda está formada por por Frans Banfield (voz), Seilaesencia (voz), Brian Moure (bajo), Juanma Ons(guitarra), Charlie Hermida (guitarra), Vitorio (batería), Nata Estévez (saxo alto) e Sutta (sampler e voces). Pero non van estar sos sobre o escenario xa que terán a colaboración de artistas de renome coma Ariel Rot, Andy Chago, Pablo Novoa, Claudio Gabis, Puto Coke, Nillo Nández, de Pacifico, e os rapeiros Licor Café.

    O disco incluirá 18 temas propios.  O son deste directo será logo mesturado en Bos Aires e remasterizado en Los Ángeles, agardando que o resultado en formato DVD e CD poida estar no mercado en marzo de 2010.

    O grupo promete que o concerto desta noite “será unha festa con ritmos moi variados que van do funky, ao rock, con hip hop, e rap”.

    A apertura de portas da Área Panorámica terá lugar ás oito desta tarde, onde para a ocasión ábrese hoxe unha cafetería. Amais poderase visitar a exposición de 24 fotografías de concertos en directo realizadas pola viguesa Queca Juárez.

    O concerto durará preto de 100 minutos, e por cuestións técnicas, haberá un descanso de 10 minutos.

    As entradas á venda na web www.culturatui.info ata as seis desta tarde, e a partir das oito pódense mercar o propio venres no despacho de billetes da Área Panorámica ao prezo de 5 e 3€.

    Os Phantom Club contan neste concerto coa colaboración da Concellería de Cultura do Concello de Tui xunto a outras entidades e casas comerciais. 

Feria de Antigüedades

La Asociación de Comerciantes e Industriais de Tui, ACITUI, en colaboración con el  ayuntamiento, organiza mañana sábado, en el Paseo de la  Corredera de Tui, el “ IV Mercadiño de Antiguidades” a partir  de las 10.00 horas y hasta las 20.00 horas.

Los objetos antiguos cobrarán protagonismo en este mercadillo, donde además de estar expuestos se podrán comprar gran variedad de antigüedades venidas de distintos puntos de toda Europa.

Acitui anima a todos a que este fin de semana se acerquen a Tui y curioseen por el mercadiño, y disfruten de la ciudad.

En caso de lluvia  el mercadillo se suspenderá.

Xoves, 19 de novembro de 2009 

O Alcalde de Tui di que o proxecto do novo centro de saúde estará acorde co entorno

Está xa adxudicado o proxecto de redacción do novo Centro de Saúde de Tui que duplicará en superficie ao actual.  A empresa adxudicataria ten que presentar o proxecto en dous meses, é dicir a mediados de xaneiro. Tras a súa revisión o proxecto quedará definitivamente aprobado para saír a licitación na primavera de 2010. Así o explicaba o alcalde de Tui, Antonio Fernández Rocha, na RMT onde manifestaba que se trata dun bo proxecto, do que quedou gratamente sorprendido. Estará acorde co entorno no que se emprazará na parte posterior da Área Panorámica.

A semana pasada estiveron no Concello o equipo redactor do proxecto que se reuniu coa arquitecta municipal e co alcalde a quen espuxeron o tratamento especial que o centro recibirá no seu exterior. Será un centro, segundo Fernández Rocha, digno da cidade de Tui e cunhas dotacións superiores ao que estaba previsto, e estará equipado con aire acondicionado. Superará os 4 mil metros cadrados de superficie construída.

Onte mesmo o rexedor tudense estivo coa Consellería de Sanidade a quen manifestou a súa satisfacción. Agarda que a adxudicación da obra sexa canto antes, e que nun ano poida estar listo este novo centro de saúde.

Fernández Rocha afirmaba que o 2010 será un ano importante para Tui polas prestacións que se van pór en marcha.

Noutra orde de cousas o alcalde confirma que esta semana comezaron as obras no antigo local de Rogelio na Corredoira para acoller o 3º Xulgado tudense.  E agarda que o próximo ano se poña tamén en marcha un novo edificio xudicial en Tui.
 

Actos co gallo do 25-N en Tui

A Concellería de Muller e Servizos Sociais do Concello de Tui organiza unha serie de actividades para conmemorar o Día Internacional contra a Violencia de Xénero, o 25 de novembro. Para avanzar este programa estiveron en “Día a Día” na Radio Municipal de Tui, a Concelleira Patricia Ricón, e a traballadora social, Carmen González.

A Concelleira Patricia Ricón, daba conta da importancia do 25-N, indicando que é fundamental que na rúa estea o debate e a problemática sobre a violencia de xénero. Apuntaba as actividades que promoven coma o Concurso Fotográfico e iniciativas dirixidas ás mulleres para dotalas de ferramentas e proporcionando a interrelación.

Carmen González apuntaba que este mes de novembro céntranse na formación específica para mulleres en dúas áreas: cociña e repostería; e  calidade de vida en tempos de crise.

Dentro destas iniciativas están a realizar un curso de cociña e repostería de intercambio intercultural. Era un curso do programa Actívate da Deputación de Pontevedra ao que non chegaban ao mínimo de alumnos, propuxeron un cambio que foi ben aceptado polo organismo provincial, abríndoo a mulleres de distintas nacionalidades no que participan magrebís, mexicanas, brasileiras e galegas.

No marco da calidade de vida en tempos de crise farán dous obradoiros, un o 25 de novembro de 10 a 14h na Área Panorámica sobre  “Sostenibilidade e aforro en tempos de crise” e o 3 de decembro de 16 a 20h sobre “Consumo responsable”. En ambos casos o obxectivo é concienciarnos do excesivo consumo e axudarnos a reciclar.

A inscrición debe facerse nos Servizos Sociais do Concello de Tui, até o 24 para o primeiro curso e até o día 2 para o segundo.

Con respecto ao Concurso fotográfico “Relación home/muller 100% positiva” tivo segundo a Concelleira unha aceptación moi positiva, con maior calidade e con traballos que chegan incluso de Granada, Sevilla, ou Barcelona.

Xa con respecto aos casos de violencia de xénero Carmen González, traballadora social, explicaba que hai que seguir traballando mentres  haxa un caso, engadindo que algo se está a facer ben cando se denuncian os casos, hai un aumento de denuncias, co que no seu parecer estanse a por as ferramentas para solucionalos.

Inauguración da sala de audicións do Conservatorio de Tui

Este venres ás oito da tarde terá lugar a inauguración da Sala de Audicións do Conservatorio de Grao Medio de Tui cun concerto a cargo da Orquestra de Saxos do Conservatorio Profesional de Música Víctor Ureña de Redondela.

A sala de audicións é unha das obras de mellora acometidas no Conservatorio con cargo ao Plan E. Precisamente o concerto inaugural pospúxose mentres non estivo todo rematado segundo explicaba Patricia Ricón, Concelleira de Educación, quen facía unha invitación ao concerto para disfrutar do mesmo e para que coñezan estas instalacións.

Avanzaba que este ano van establecer unha colaboración con ACITUI de tal xeito que os alumnos do Conservatorio e da Escola de Música participen nas actividades de “Vida nas rúas”.

Por outra parte Patricia Ricón avanzaba que tras a reunión que tivo onte co Xefe Territorial de Educación, César Pérez Ares, onde lle confirmaron un investimento de 12 mil euros para cambiar a recollida de pluviais no CEIP de Pazos de Reis, e 11 mil para o pechamento do CEIP nº1

Charla Coloquio sobre a política económica do goberno

Hoxe ás 20.30h na sala Félix Rodríguez na Area Panorámica terá lugar unha Charla-coloquio sobre a política económica do goberno e medidas ante a crise. Está organizada polo Partido Socialista e correrá a cargo dos deputados socialistas Mª José Caride e Guillermo Meijón.

Concerto na Viñoteca de García

A Viñoteca de García acolle esta noite, ás 21.30h, un novo concerto. Correrá a cargo dos Cool Hamsters formado por Michel González, guitarra; e Ramón Orencio, guitarra, trompeta e voz.

Doazón de Sangue en Tui

Unha unidade móbil do Centro de Tranfusións de Sangue de Galicia estará hoxe e mañá en Tui. Poderase doar na Praza de Galicia de 16 a 21h tanto hoxe xoves coma mañá venres.

Dous detidos por suposto delito de estafa

O equipo da Policía Xudicial da Gardia Civil de Tui detivo este martes a S.A.C., de 36 anos de idade e a J.A.C., de 29, ambos veciños de Mos, coma supostos autores dos delitos de estafa e roubo con forza.

O pasado 28 de outubro JAC presentou unha denuncia  na Gardia Civil de Tomiño manifestando que autor/es descoñecidos  logo de forzar a verxa metálica e a porta de acceso ao bar que ten neste municipio, penetraron no interior sustraendo a recadación dunha máquina recreativa e de dúas máquinas musicais, así como unha pantalla de plasma. O denunciante dixo ter seguro que cubría estes feitos.

As investigacións realizadas determinaron que non se produciu o roubo no citado establecemento, senón que, coa suposta intención de estafar á compañía de seguros, o denunciante en conivencia co seu irmán, SAC, simularon o roubo con forza e substraeron a máquina recreativa, da que con anterioridade ao roubo simulado, impediron que os responsables da mesma puideran recoller a súa recadación.

Os detidos foron postos o martes a dispor do Xulgado de Instrución número Un de Tui, quedando en liberdade con cargos.

Mércores, 18 de novembro de 2009 

Adxudicado o proxecto do novo centro de saúde de Tui

    A empresa Diaz&Diaz Arquitectura será a responsable de redactar o proxecto básico e de execución do novo centro de saúde de Tui.  O contrato de redacción foille adxudicado por parte da Dirección de Recursos Económicos do Servizo Galego de Saúde por un importe de 76.270 euros. Así o publicaba o luns o Diario Oficial de Galicia.

    O novo centro de saúde contará cunha superficie construída de 2.806 metros cuadrados, o que practicamente duplica a superficie do actual edificio sanitario.

    O programa funcional do novo centro prevé un importante incremento espacial e funcional das súas dependencias.

    A área de atención aos nenos e nenas contará cunha zoa específica, con sala de espera infantil, tres consultas de pediatría -na actualidade hai dúas-, e tres de enfermería pediátrica, fronte a unha única actual.

    Outra das áreas prioritarias no novo centro de saúde será o Punto de Atención Continuada, o PAC, que disporá doutra área específica e diferenciada do resto do centro. Estas instalacións disporán de dous consultas de medicina, unha de enfermaría, dúas salas de Reanimación e Observación, sala de espera e ampla zoa de estar dos profesionais, con catro dormitorios e vestiarios.

    Ademais,  contará con trece consultas de medicina xeral e enfermería; unha área de educación maternal -con consulta de matrona e sala de educación sanitaria-; consulta de farmacia; consulta de odontoloxía e consulta de traballador social.  As instalacións acollerán tamén unha área de fisioterapia con dúas consultas de fisioterapeutas e un ximnasio; área de Radioloxía; sala de toma de mostras; sala de procedementos técnicos e dúas salas polivalentes.

    Tamén está prevista unha área específica na que se ofertará a atención especializada con dúas consultas médicas, unha de enfermería e sala de espera.

    Nas súas dependencias administrativas haberá unha área de admisión e arquivo de historias clínicas, despachos, sala de estar de persoal, sala de xuntas e Biblioteca.

Charla en Túi: “O goberno fronte a crise con novas enerxías”

Mañá, xoves, a sala Félix Rodríguez, no edificio da Area Panorámica en Tui, acollerá unha charla-coloquio sobre a política económica do goberno e medidas ante a crise.

Intervirán os deputados do partido Socialista Mª José Caride e Guillermo Meijón.

Martes, 17 de novembro de 2009 

Actividades en novembro da Biblioteca Municipal: maxia para nenos e obradoiro de contacontos para nais e pais

A Biblioteca Pública Municipal de Tui continúa desenvolvendo o seu programa de actividades de animación e promoción da lectura, ofertando neste mes de novembro dúas actividades para distintos destinatarios.

Por unha banda mañá, mércores, ás 17.30 horas, ofrece un espectáculo de maxia para os máis pequenos titulado “Ledicias”, a cargo do grupo “A ill@ dos nen@s”, no que un mago fará as ledicias dos cativos cos seus xogos máxicos.

Por outra banda, o luns 23 de novembro de 18.30 a 20.00 horas desenvolvérase un obradoiro de contacontos para nais e pais a cargo de Amalia Perez Otero, unha docente experta nestes temas de animación á lectura. Analizaranse os aspectos positivos da lectura e dos libros na casa, os libros que a literatura actual ofrece no tocante a libros para nenos. Asimesmo, os pais poderán aprender dun xeito divertido a contar e inventar contos aos fillos coa finalidade de que sexa un momento de encontro entre eles, fomentando ao mesmo tempo o gusto pola lectura.

Para o concelleiro de cultura tudense, Moisés Rodríguez Pérez, con esta nova oferta de actividades a Biblioteca Municipal continúa a traballar a prol da proxección da lectura coma unha das ferramentas básicas para a formación da persoa e coma unha oferta para o lecer.

Estas actividades realízanse ao abeiro do programa Letras Vivas que promove a Dirección Xeral de Promoción e Difusión da Cultura da Consellería de Cultura e Turismo da Xunta de Galicia.

Sábado, 14 de novembro de 2009 

O BNG coida que as obras para habilitar o local de Rogelio como Xulgado incumplen a normativa

BNG de Tui amosa, a través dun escrito, a súa preocupación pola situación na que se atopa a futura creación do 3º Xulgado en Tui e alude á sinatura que o alcalde vén de facer para comezar as obras no antiguo local de Rogelio, na Corredoira de Tui, previstas para a vindeira semana.

Os nacionalistas, que cualifican de atrevimento esa sinatura, lembran que debe terse en conta que para respetar a legalidade da cesión (gratuíta), esta ten que ser aprobada polo Pleno da Corporación e ademais son precisos os informes dos Arquitectos Municipais e os Informes Xurídicos pertinentes. Desde o BNG “non entendemos esa irresponsabilidade por parte do alcalde e da propia Xunta de Galicia que acepta facer unha inversión nun local sen nengunha garantía legal”.

A posible cesión deste local aínda non foi votada nin sequera en Comisión Informativa. Lamentando o BNG que Fernández Rocha “teña tanta présa en facer algo do que xa é coñecedor desde hai anos e non fixo absolutamente nada. Os cidadáns deben saber que o único responsable de que a día 1 de xaneiro non teñamos este 3º Xulgado e o Sr. Alcalde e o PP”.

Ariel Rot  e Claudio Gabis participarán na gravación de “Muchas noches,  buenas gracias” de Phatom Club

Ariel Rot, Andy Chago, Pablo Novoa e Claudio Gabis serán algúns dos artistas convidados que acompañen ao grupo tudense Phantom Club no concerto que ofrecerán o venres 20 de novembro, ás 21.30h, no Teatro Municipal de Tui.  Será un directo especial xa que servirá para gravar o seu segundo traballo discográfico titulado “Muchas noches, buenas gracias” no que de novo recorren ao xogo de palabras coma fixeran xa con “Funksiona” o seu primeiro disco do que venderon 2 mil copias.

O concerto foi presentado onte a mañá por Frans Banfield, Juanma Ons e Charlie Hermida, membros de Phantom Club, acompañados polo concelleiro de Cultura, Moisés Rodríguez.

Trátase dun proxecto ambicioso xa que inclúe 18 temas propios, nos que repasan a súa carreira que comezou precisamente cun concerto en Tui en 2002.  O son deste directo será logo mesturado en Bos Aires e remasterizado en Los Ángeles, agardando que o resultado en formato DVD e CD poida estar no mercado en marzo de 2010.

O grupo promete que o concerto do próximo día 20 “será unha festa con ritmos moi variados que van do funky, ao rock, con hip hop, e rap con músicos en directo”. Con eles estarán tamén Nillo Nández, de Pacifico, o Puto Coke, e os rapeiros de Licor Kafé. En total en escena haberá catorce músicos. A apertura de portas terá lugar ás oito da tarde, e dende ese momento o público poderá compartir a previa ao concerto na cafetería que se instalará para a ocasión no vestíbulo da Área Panorámica. Alí poderán ollar unha exposición de 24 fotografías de concertos en directo realizadas pola viguesa Queca Juárez. O concerto durará preto de 100 minutos, e por cuestións técnicas, haberá un descanso de 10 minutos. As entradas están xa á venda na web www.culturatui.info, ou pódense mercar o propio venres no despacho de billetes da Área Panorámica ao prezo de 5 e 3€.

Phantom Club está formado por Frans Banfield (voz), Seilaesencia (voz), Brian Moure (bajo), Juanma Ons(guitarra), Charlie Hermida (guitarra), Vitorio (batería), Nata Estévez (saxo alto) e Sutta (sampler y voces).

Os integrantes de Phantom Club tiñan claro que este concerto queríano facer en Tui porque segundo explica Frans Banfield “o grupo naceu aquí hai sete anos, isto gústanos, é a nosa casa”. Mentres Charlie Hermida explica que “o traballo facémolo a pulmón” indicando que se encargan de todo o proceso xa que non teñen manager nin produtor nin editorial, feito polo que queren amosar o seu agradecemento tanto ao Concello de Tui comas as distintas empresas que lles apoian nesta aventura. Un agradecemento que queren facer extensivo a Javier Abreu que será o enxeñeiro de son no concerto, a Gus Abreu que se encarga da parte técnica, e a Víctor Coyote que deseñou a imaxe e que sempre lles ten apoiado incondicionalmente.

Os Phantom Club avanzaron amais que dous temas seus formarán parte da película “Mandioca, la madre de todos” que homenaxe a Jorge Álvarez cun percorrido polos grupos arxentinos de todos os tempos até a actualidade.

Moisés Rodríguez destacou que se trata dun concerto moi especial, xa que é a primeira vez que se grava un disco en directo no Teatro Municipal. Subliñou a importancia que os Phantom Club ten para Tui e para a Música, e encadrou o apoio a este proxecto na liña establecida dende o seu departamento para promocionar aos novos artistas da cidade.

Venres, 13 de novembro de 2009 

A exposición “Onde as rúas non teñen nome” achéganos ao pobo Gumuz, Etiopía, para entender o pasado a través dos restos arqueolóxicos

A Sala de Exposicións Municipal de Tui acolle estes días (ata o día 11 de decembro) a exposición "Onde as rúas non teñen nome: unha mirada etnoarqueolóxica ao pobo Gumuz (Etiopía Occidental)". A entrada é de balde e os interesados poden contemplar a exposición en horario de apertura da Sala Municipal de Exposicións, de 09.00 a 14.00 horas pola mañá, de 16.30 a 20.30 horas pola tarde e os sábados permanecerá aberta de 09.00 a 13.00 horas. A mostra, programada pola Concellería de Cultura do Concello de Tui, está ubicada na sala anexa á Sala de Exposicións (rúa Colón nº2).

Os Gumuz son unha sociedade premoderna que mantén unha tecnoloxía e unha forma de estar no mundo que nos poden servir de modelo para tentar entender outras sociedades do pasado. As imaxes descúbrennos unha sociedade que habita cabanas circulares, fabrica útiles como machadas, moe o cereal nos muíños barquiformes e cociña nos cacharros de barro co lume dos fogares. Móstrase así a importancia da cultura material como ferramenta para a construción da realidade social e da identidade nunha comunidade premoderna e ágrafa.

O traballo de campo consistiu na realización de prospeccións e escavacións arqueolóxicas, así como no estudio etnoarqueolóxico, é dicir, o da cultura material das comunidades tradicionais vivas co fin de interpretar mellor ás sociedades coñecidas unicamente a través do rexistro arqueolóxico. Con motivo da presenza desta mostra en Tui haberá, durante o período de permanencia da exposición, unha mesa redonda na que os participantes neste proxecto explicarán como se levou a cabo e os resultados máis destacados.

A mostra componse de 46 fotografías e nace tralo traballo etnoarqueolóxico levado a cabo no seo da misión española no Nilo Azul, comandada dende o Centro Superior de Investigacións Científicas (CSIC). A campaña desenvolveuse na rexión de Metekel, ó norte do Nilo Azul, entre os meses de febreiro e marzo de 2006. Os autores da mostra son Xurxo M. Ayán Vila do Laboratorio de Patrimonio do Consello Superior do CSIC – Centro Superior de Investigacións Científicas (LaPa–CISC) e Alfredo González Ruibal (Universidade Complutense de Madrid) e ten por comisaria a Sonia García Rodríguez (LaPa – CISC).

O  obxectivo do estudo era o de observar como cambia a cultura material e o espazo doméstico en comunidades Gumuz que viven en distinto grao de contacto con outros grupos e analizar as relacións interétnicas entre este pobo coas comunidades das Terras Altas de Etiopía. Este proxecto foi encamiñado ó rexistro sistemático das manifestacións materiais  da cultura tradicional Gumuz, un pobo prenilótico, marxinal e marxinado historicamente polos estados de Sudán e Etiopía, marcado polo trauma da escravización até a época recente (mediados do século XX).

Teatro en Guillarei

    Mañá sábado ás 19.30h haberá unha nova representación teatral no Centro Veciñal e Cultural de Guillarei. O grupo Metátese Teatro porá en escena “Nós”. A organización corresponde á Asociación Cultural Virxe das Dores.

Prosegue o Outono Cultural en Areas

    Este domingo prosegue o Outono Cultural de Areas. As actividades comezarán ás 12.30h cunha Carreira de bicicletas pola parroquia. Xa pola tarde, dende ás 17h terán actuación dos grupos folclóricos Seixos Albos de Areas, Airiños da Lagoa de Baíña, Cultural de Xinzo, Ondiñas do Mendo de Salvaterra e Galiñeiro de Vincios de Gondomar. Organiza a Asociación Cultural Seixos Albos.

Celebración do San Martiño 2009 en Ribadelouro

    A  Asociación Cultural Santa Columba de Ribadelouro celebra mañá sábado o San Martiño. Ás oito da tarde no Centro Cultural de Ribadelouro actuará o Grupo Cacharela de Taborda, o Grupo Axóuxeres de Tomiño e o Grupo Xente Nova Leña Verde de Tui.

Magosto en Randufe

    A Asociación Cultural “Xuntanza” celebra este domingo ás 18h o seu magosto. Terán castañas asadas e viño.

Festas de San Martiño en Caldelas

    A parroquia de Caldelas celebra esta fin de semana festas na honra a San Martiño organizadas pola Asociación Sociocultural e Deportiva “A Ínsua”. O recinto estará cuberto por unha carpa. 

    Mañá sábado terán verbena amenizada por Costa Blanca e Sabrosito, e haberá castañas asadas de balde toda a noite.

    O domingo ás 12h entrarán no recinto de festa as tradicionais Espadanas acompañadas pola Banda de Gaitas San Xoán de Paramos. Media hora despois celebrarase misa solemne cantada pola Coral Peña +45 de Arentei.

    A unha e media actuará a Banda de Gaitas e terá lugar a subhasta das espadanas. Xa pola tarde, dende ás seis está prevista a actuación da Charanga Divertida de Salceda e a treboada Muimenta de Sobrada. Haberá durante toda a tarde polbo á Feira a cargo da polbeira “Tere” do Rosal.

I Festas de San Martiño en Malvas

    Mañá, sábado, celébrase a I Festa de San Martiño que organiza a Asociación de Veciños de Santiago de Malvas. Haberá empanadas, polbo á feira, carne ao caldeiro, rosca, café e licores, viño ou refrescos. O prezo por persoa é de 18€  para maiores de 12 anos, e de 10€ para nenos de 4 a 12 anos. Queda algunha invitación pode reservarse no 638 04 92 08

    Amais do xantar ás 16h actuarán centros culturais, unha hora despois terán xogos populares, e haberá premios ao mellor viño tinto do país e á castaña máis grande e á mellor presentada que será unha escultura de Rai. Ás 19h terán castañada e a actuación do dúo Marema.

Magosto Popular en Pexegueiro

    En Pexegueiro celebran esta fin de semana o Magosto Popular a partir das oito da tarde. Terán a actuación do grupo de Playbacks do Centro Cultural de Parderrubias e o Rancho Folclórico de Correlha de Ponte de Lima de Portugal

    Haberá castañas asadas, chourizos asados, pan, viño novo e queimada, gratis para os socios do Centro Cultural.

Xoves, 12 de novembro de 2009 

Presentación do concerto de Phatom Club no que se gravará  “Muchas noches, buenas gracias”

O venres, día 20, ás 21.30 horas, o Teatro Municipal de Tui acolle un concerto moi especial do grupo Phatom Club. Trátase da gravación do seu segundo traballo discográfico “Muchas noches, buenas gracias”. Este concerto, no que estarán acompañados doutros artistas recoñecidos a nivel nacional e internacional, será presentado o mesmo veres, ás 11.30 horas, na Sala de Reunións da Área Panorámica (1º Andar).

Os membros de Phantom Club estarán acompañados polo concelleiro de Cultura, Moisés Rodríguez.

“Glass City” de Teatro do Noroeste representarase en Tui mañá, venres

O Teatro Municipal de Tui acolle este venres un musical integrado por 14 actores, bailarís e músicos dirixidos por Eduardo Alonso, que dan vida a todos os entresixos necesarios para crear este espectáculo que dende a súa estrea a finais de setembro está a colleitar unha excelente acollida por parte da crítica e do público. Trátase de “Glass City” de Teatro do Noroeste.

 “Glass City” foi presentado onte polo director da obra Eduardo Alonso, e a actriz Luma Gómez, que da vida a Carmen Polo, xa que o musical está ambientado no ano 1958, nunha das visitas que o Xeneral Franco realizaba á cidade da Coruña. Estiveron respaldados polo concelleiro de Cultura, Moisés Rodríguez, quen destacou que esta “é a maior produción do teatro galego neste semestre” salientando que nestes tempos “non é doado ter a 14 actores en xira”.

Neste espectáculo lógrase integrar coma un todo a 8 actores, 2 bailarinas e 4 músicos, que interpretan, cantan e bailan conseguindo que “todas as disciplinas se intercalen” segundo explicaba a actriz Luma Gómez.

O nome do musical vén da denominación que os ingleses que chegaban por mar daban á Coruña pola súas galerías cara ao mar, segundo expñlicaba o explicaba  o director Eduardo Alonso. A compañía aproveitou a obra para presentar unha visión a través dun cristal do microcosmos dunha cidade, apostando por facer un musical, en galego e en Galicia.

Eduardo Alonso manifestaba que o público é o obxectivo final do espectáculo, xa que ao longo de todo o proceso creativo e de montaxe tiveron en conta que o público o pase ben, que se divirta, que coñezan unha nova historia, todo presentado dende un prisma histórico e de feitos que aconteceron na realidade.

Trátase dunha montaxe amena que capta a atención do espectador dende o primeiro minuto con cancións pegadizas, coreografias, historias de amor, conspiracións e rock and roll.

A obra, que dirixe Eduardo Alonso recolle o ambiente da Coruña de finais dos anos 50. Bernardo Martínez é o encargado da composición e dirección musical, Chedes Súarez asina a coreografía e Paco Conesa a escenografia e o vestiario deste espectáculo ao que dan vida: Xan Casas, Fernando Tato, Julia Méndez, Julia Sánchez, Christian Escuredo, Fernando González, Brandán Lourenzo, Ramón Orencio, Brais Morán, Xavier Estévez, Maxo Barjas, Monti Castiñeiras, Luma Gómez e Carlos Mosquera ‘Mos’.

A acción transcorre durante as vacacións no Pazo de Meirás do xeneral Francisco Franco e a súa familia; o concurso de cancións Trampolín de Estrelas, a chegada da música moderna á Coruña grazas ás ‘juke box’ ou un plan para atentar contra Franco son algúns dos feitos que se narran neste espectáculo, que aínda que non é unha obra histórica si fai referencia á historia recente da cidade herculina.

A obra foi estreada no Ferrol o pasado mes de setembro con gran éxito de público.

As entradas están xa á venda na web www.culturatui.info até o venres ás 19h, ou pódense adquirir o venres dende ás 20h no despacho de billetes da Área Panorámica. Teñen un prezo de 6€, 4€ con desconto e 4€ para os menores de 12 anos.

Manuel Freiría, voceiro do PSOE, non se amosa optimista sobre a aprobación do PXOM de Tui

    Manuel Freiría, voceiro do grupo municipal Partido Socialista, compareceu na Radio Municipal de Tui dentro da rolda de conversas cos distintos grupos políticos que se están a manter para tratar distintos temas de actualidade.

    En primeiro lugar o voceiro socialista pronunciábase sobre a posible ubicación do terceiro xulgado tudense no coñecido coma antigo local de Rogelio na Corredoira de propiedade municipal.

    Explicaba Manuel Frería que este non é un tema novo porque xa dende o 2007 se vén demandando un novo edificio para os xulgados tudenses, sen que se dese solución a este tema dende o Concello. Por iso sinala que “agora veñen as présas” xa que o novo xulgado debe comezar a traballar en xaneiro. Por iso, di, non lles gusta o emprazamento de Rogelio, pero non queda outro remedio. Esta ubicación provisoria obrigará ao persoal do terceiro xulgado a ir andando pola Corredoira até a sala emprazada na Praza da Inmaculada cando se realice unha vista.

    Sobre a posible ubicación do novo edificio dos xulgados no antigo inmoble de Camfran explicaba que este non ten terreo ao redor, e a cota de edificabilidade quedaría reducida, sinalando que a actual estrutura pode estar deteriorada e non vale.

    Outro asunto é o novo centro de saúde de Tui, cuxo retraso Manuel Freiría achaca a unha estratexia do goberno popular de durante os catro anos en que Emilio Pérez Touriño presidiu a Xunta, non quixo sacar adiante nada.

    Con respecto a situación do Plan Xeral de Ordenación Municipal manifestaba Manuel Freiría que as modificacións indicadas pola Xunta cando se enviou o documentou foron só feitas nun 80% segundo tiña recoñecido o anterior Concelleiro de Urbanismo, engadindo que o 20% restante son as cuestións importantes coma a edificabilidade na Finca Patazumba e outras. Freiría non se amousou nada optimista con respecto á aprobación do PXOM, e repasou as veces en que a Xunta dixo non a este planeamento. Engadía que o PSOE ten moi interese en que o Plan se aprobe.

    Con respecto ao novo Plan E no que a Tui lle corresponde 1.834.798 euros explicaba o voceiro socialista que de novo van realizar reunións nas parroquias para coñecer as necesidades e a partir de aí facer unha proposta coas obras a realizar.  Iso si con respecto a estes fondos alertaba Freiría en que se están a perder cartos porque o censo non está actualizado, xa que aínda que no padrón figura 19 mil persoas, estatisticamente aínda se contabilizan pouco máis de 20 mil.

    Noutra orde de cousas informa que nunha reunión mantida onte sobre os acceso ao barrio de Albelos en Guillarei, acordouse que o Ministerio ceda ao Concello 920 metros de estrada, cando no seu parecer coa metade sería suficiente, xa que de agora en diante o mantemento irá con cargo ás arcas municipais, porque para axilizar o tema renúnciase á partida que o Ministerio tería que dar ao Concello. Insiste Manuel Freiría en que este tema non é novo, e tería que terse pensando nunha solución con tempo.

    Por último preguntado polas próximas eleccións municipais sinalaba que son un reto porque terán que dar conta aos electores. Engadía que é desesperante porque en Tui avanzouse moi pouco nos últimos vinte anos. Sinalaba que máis que as eleccións o que lle preocupa é rematar o traballo no ano e pico que resta para os comicios, e que algo do que levaban no programa avance. 

Mércores, 11 de novembro de 2009 

Exito de público e participantes no I Trofeo Concello de Tui de baile deportivo

O pasado domingo, celebrouse no novo pavillón polideportivo da cidade tudense a primeira edición do Trofeo Concello de Tui de baile deportivo, ante preto de oitocentas persoas, que enchían a bancada central das instalacións municipais.

Este éxito de público, segundo palabras de Moisés Rodríguez, primeiro tenente de alcalde e concelleiro de Cultura, "vén certificar que a diversificación das actividades que se organizan desde o concello, teñen o respaldo do público e anímanos a ser máis esixentes e intentar que Tui sexa sede dos próximos Campionatos de España de Baile Deportivo", manifestou o edil ao finalizar o campionato.

A participación, que tamén superou as expectativas iniciais, foi de moi alto nivel. Entre outros, este certame contou coa presenza dos actuais campións de España na modalidade de dez bailes, Adrián Esperón e Patricia Martínez, aos que hai que sumar os actuais campións da categoría Junior de Standar e Latinos Fernando Lareu e Noelia Pintos; así como os campións junior do 2008, os cataláns Xavi Fonollá e Carolina Sánchez.

Cómpre destacar, tamén a participación de parellas de Portugal, sendo esta a competición na que maior número delas se inscribiron de toda a xeografía nacional, demostrando que o nivel do baile deportivo do país veciño é moi alto, proclamándose vencedores nas súas categorías, as parellas formadas por Antonio Ribeiro-Alicia Bianchesi, Bernardo Venceslau-Jessica Silva e Rubén Neves-Filipa Batista, entre outros.

A organización deste certame correu a cargo da Academia Pasos, que con Miguel Abreu o seu director á cabeza, demostrou unha vez máis, como se ten que organizar este tipo de eventos. Ao finalizar o certame, Miguel Abreu manifestou a súa satisfacción polo desenvolvemento da competición e indicou que "estas instalacións son perfectas para acoller calquera campionato do máis alto nivel, ben sexa nacional ou internacional".

Noutro apartado, resaltar o apoio prestado polo Centro Comercial Ouletui que á hora da entrega de premios estivo representado por Tamara Senin que acompañou aos membros da corporación municipal, Moisés Rodríguez, Manuel Freiría e Pablo Alonso. O máximo mandatario tudense, Antonio Fernández Rocha, que foi o encargado de facer a entrega de trofeos das primeiras finais da competición, manifestou a súa satisfacción pola organización do evento e o alto nivel dos participantes.

A Biblioteca de Tui premiada por cuarto ano consecutivo nos Premios María Moliner

    A Biblioteca Pública Municipal de Tui vén de recibir, por cuarto ano consecutivo, un dos premios “María Moliner” ao abeiro da convocatoria efectuada para as bibliotecas municipais das entidades locais menores de 50.000 habitantes convocado polo Ministerio de Cultura, a Federación Española de Municipios e Provincias e a Fundación Coca-Cola España.

    Este premio consiste nun lote de mais de 200 obras que incrementarán a oferta bibliográfica da Biblioteca e que axiña estarán a disposición dos usuarios. A Biblioteca tudense foi unha das 350 de toda España galardoadas cun destes premios nesta convocatoria correspondente ao ano 2009; compre subliñar que foron  753 os proxectos presentados a esta convocatoria.

    O proxecto “Un río de libros e de actividades” presentado pola Biblioteca Municipal tudense no que se recollían as actividades desenvolvidas por este centro bibliotecario nos últimos meses resultou, por cuarta vez consecutiva, recoñecido pola súa calidade.

    Para o concelleiro de cultura tudense, Moisés Rodríguez Pérez, este novo recoñecemento a labor que a Biblioteca Municipal tudense ven desenvolvendo no ámbito da promoción do libro e a lectura pública nos últimos tempos e que atopa unha positiva resposta por parte dos cidadáns tudenses. Sinala Rodríguez Pérez o compromiso da Concellería de cultura tudense por consolidar este servizo municipal como un referente que facilite aos veciños o acceso á cultura e á información nos seus variados soportes, promovendo estes valores mediante un amplo programa de actividades diversificado para os diversos sectores de idade. 

Aberto o prazo para a posible ampliación do cemiterio de Randufe

    A Comisión do Cemiterio Parroquial de Randufe informa que os interesados poden inscribirse coma novos socios para a posible ampliación do cemiterio.

    Os interesados teñen até o 30 de decembro deste ano para anotarse contactando con Antonio Castro en Arcos, Olga Montes e Telmo Martínez en Cruceiro, Telmo González en Chans, Erundino Silva en Abelleira ou Juan Luis Gómez en Montiño.
 

Tres mozos con síndrome de Down traballarán nos paradores de Tui, Baiona e Pontevedra

    Tres mozos con síndrome de Down incorporaranse a traballar en Paradores das localidades de Tui, Baiona e Pontevedra a finais deste mes. Deste xeito súmanse ás 131 persoas que, en toda a comunidade, participaron no programa 'Emprego con apoio'  entre agosto de 2008 e agosto de 2009.

    En virtude dun convenio entre Down Galicia e Paradores, esta empresa hostaleira comprométese a ir incorporando ao seu persoal traballadores con síndrome de Down, nun número que dependerá dos "criterios marcados por un grupo de traballo" integrado por membros de ambas as entidades.

    Ao Parador de Tui incorporarase Cristina de 37 anos,  e veciña de Tui, segundo relata a axencia Europa Press. 

Martes, 10 de novembro de 2009  

Actividades de Outono no CEIP nº2 de Tui

    O CEIP nº2 de Tui celebra ao longo desta semana unha serie de actividades de outono.

    Hoxe, martes, terán unha Xornada de Xogos Populares e Magosto. Ás dez comezarán con xogos populares, e ás doce celebrarán a segunda Baixada de Carrilanas. Ás 12.45 celebrarán o tradicional magosto con degustación de castañas asadas.

    Xa o mércores dende ás dez terán xogos populares para o alumnado de Educación Infantil. Ás 12.30h celebrarase o I Cross de San Martiño.

    Amais estes días no centro pódese visitar unha exposición de froitos e aparellos de outono e outra de xogos populares.

Presentación de Glass City

    Mañá mércores, 11 de novembro, ás 11.30h na Sala de Reunión da Área Panorámica (1º Andar) será presentada a obra de teatro “Glass City” que este venres representará Teatro do Noroeste na cidade.

    Comparecerán ante os medios de comunicación o Concelleiro de Cultura, Moisés Rodríguez, xunto a Eduardo Alonso, director da obra, e Luma Gómez, unha das actrices da compañía.

Acampada organizada pola Vogalía de Xuventude de Xuntanza

    A Vogalía de Xuventude de Xuntanza organiza a “Acampada novembro” para este sábado, 14 de novembro, na Casa Cultural.  Para participar é preciso ter máis de 13 anos e anotarse hoxe martes no 687 897 351 de 20 a 21h.

    A acampada realizarase dende ás cinco da tarde do sábado o domingo ás 11.30h.

Levada Libre resume as Xornadas sobre a Recuperación da Memoira Histórica e o desexo de recuperar o busto de ‘Sócrates’

O pasado 29 e 30 de outubro Levada Libre celebrou no Museo de Santo Domingo de Tui as Xornadas sobre a Recuperación da Memoria Histórica centradas no artista D. Benito Prieto Coussent, quen impartiu docencia no Vello Instituto de Secundaria de Tui durante os últimos anos da II República. O propósito principal destas xuntanzas foi a presentación, ó pobo tudense,  do interesante proxecto de recuperación do busto do enigmático Sócrates (elaborado por Coussent e os seus alumnos)  que foi esnaquizado e tirado o río Miño no ano 1936 polas tropas franquistas.

Levada Libre suxeriu ós asistentes a necesidade dunha iniciativa popular para a restitución da escultura do filósofo nos xardíns de Santo Domingo. Para a presentación deste proxecto, Levada Libre contou coa inestimable colaboración de convidados tan relevantes como o galerista tudense Manuel Martínez ou escritor Xesús Alonso Montero. Como broche final, fíxose unha merecida e emocionante homenaxe a Adelina Fernández, madriña de Terri, preso do Campo de Concentración de Camposancos durante o franquismo, quen encontrou naquela muller a forza para seguir vivindo. Os convidados foron agasallados cunha escultura “O Exiliado” doada desinteresadamente polo artista vigués, pintor e escultor, X. Antón Varela. Ademais, nunha das salas do museo de Santo Domingo fíxose unha exposición fotográfica das pezas máis relevantes elaboradas por D. Benito Prieto Coussent e os seus alumnos nos anos da II República. Nesta colección tamén podíanse atopar fotografías do ano 36 do desaparecido busto de Sócrates.

É de destacar que ó programa fixado por Levada Libre uníronselle outras participacións espontáneas como o grupo “La comandancia”, o cantautor “Tino Baz” ou familiares de represaliados que a viva voz recitaron versos ou leron documentos epistolares dos seus ancestros.

Levada Libre valora coma un éxito as Xornadas, tanto en asistencia do público como no contido dos temas que trataron. As Xornada finalizaron achegándose ao Monumento dos Represaliados na Alameda de Tui onde se leron poemas e se fixo unha ofrenda floral.

           Levada Libre quere agradecer a colaboración na celebración das Xornadas ó catedrático granadino D. Luis Ruiz Rodríguez; extensivas ao pintor tudense D. Xosé Luis de Dios, ó Concello de Tui, á Concellería de Cultura, en especial ó responsable da bilioteca Rafael Bargiela, así como ós medios de comunicación: Radio Tui, Faro de Vigo e galiciasuroeste.info, representados por José Font, Eva González e Bety Rei.

Sábado, 7 de novembro de 2009  

As inclemencias do tempo obrigan a un novo aprazamento da IX Edición dos Nosos Fariñeios, Burros e Muíños

Pois non será posible tampouco desta vez. As desfavorables condicións meteorolóxicas que se anuncian para o domingo obrigan á Asociación Cultural Muiñeiros do Tripes a trasladar a IX Edición dos Nosos Fariñeios, Burros e Muíños para o domingo 15 de novembro.

Hoxe teatro en Guillarei

    A Asociación Cultural Virxe das Dores  organiza hoxe sábado, 7 de novembre, ás 19.30h no Centro Veciñal e Cultural de Guillarei a actuación do grupo de teatro Fontevella que  presentará “Para que viría eu ao médico”.

Magosto en Riomuíños

        A Asociación de Veciños de Riomuíños organiza hoxe sábado un magosto. Terán castañas, pan, viño e refrescos

II Serán de San Martiño en Caldelas

        A parroquia de Caldelas celebra hoxe o seu segundo Serán de San Martiño organizado pola Asociación Cultural, Xuvenil e Deportiva “A Insúa”. A cita será dende ás 20.30h na Carballeira da Igrexa, con recinto cuberto por unha carpa Haberá pandereteiras, charangas, gaiteiros, treboadas, cantareiras`. Ao longo da noite está prevista unha esfollada popular con degustación de pan e tortas de millo. Tamén haberá chourizos asados, chocolate, castañas, viño novo e queimada

Máis de cen parellas participan no I Trofeo Concello de Tui de Baile Deportivo este domingo

    O novo pavillón de deportes de Tui acolle mañá domingo o I Trofeo Concello de Tui de Baile Deportivo organizado pola Escola de Baile Pasos coa colaboración do Concello de Tui.

    Esta actividade foi presentada onte venres en rolda de prensa polo tenente de Alcalde de Tui, Moisés Rodríguez, e  o director da Academia Pasos, Miguel Abreu.

    A cita será a partir das dúas da tarde coas clasificacións, e logo iniciarase a competición por categorías comezando por xuvenil, cos menores de 12 anos, até Senior III que agrupa a parellas de máis de 55 anos. Haberá amais dúas modalidades Standard que agrupa o vals inglés, vals vienés, tango, slow fox, e quick step e Latino con Samba, Cha-cha-chá, rumba, pasodoble, e jive.

    Máis de cen parellas teñen xa confirmada a súa participación entre as que se atopan os Campións de España, os galegos Adrián Esperón e Patricia Martínez, así coma os Campións de España junior deste anos Fernando Lareo e Noelia Pintos, que son galegos, así coma a parella gañadora de 2008 que veñen de Barcelona.  Na competición haberá unha boa representación de parellas galegas, pero tamén de Madrid e Asturias. Cómpre destacar amais que se trata dunha proba internacional que bate record de participación de parellas portuguesas nunha competición desta clase en Galicia ao acadar as 40 parellas lusas, algo que se viu favorecido pola situación estratéxica de Tui, segundo explicaba Miguel Abreu.

    O tenente de Alcalde, Moisés Rodríguez, indicou que é moi interesante que Tui acolle esta actividade cultural, deportiva e de lecer, lembrando que con anterioridade fixéranse exhibicións de baile, pero esta é a primeira competición.  Suxeriu amais a posibilidade de que Tui poida albergar un Campionato de España de Baile Deportivo, xa que o novo pavillón reúne as condicións idóneas.

    Miguel Abreu coincidiu en sinalar que Tui reúne as condicións para facer unha competición importante porque as instalacións son boas, comprometéndose a pelexar por un Campionato de España na cidade.

    Lembramos que a cita é este domingo no novo Pavillón de Deportes, dende ás catro da tarde e até aproximadamente ás 8. O prezo da entrada é de 6€ para os maiores de 12 anos.

    Toda a información desta competición está na web www.bailegalicia.net

O domingo celébrase a novena edición de “Os nosos fariñeiros: burros e muíños”

Este domingo celebrarase a novena edición de “Os nosos fariñeiros: burros e muíños”, trasladada a esta xornada debido a que as inclemencias do tempo impediron a súa celebración o pasado mes de outubro.

Trátase dunha iniciativa da Asociación de Muiñeiros do río Tripes que busca recuperar e pór en valor estes elementos da nosa cultura tradicional. E, ao parecer, téñeno logrado xa que creceu o interese polos muíños e hoxe son xa catro os que están restaurados e moendo o gran. Outros agardan a posta en marcha dun proxecto presentado polo concello á Consellería de Medio Ambiente para a restauración, concretamente de 11 dos 23 muíños do río Tripes, ademais da habilitación dunha senda nesta contorna cun orzamento superior aos 200 mil euros.

A cita de mañá iniciarase ás 10.30 horas no parque infantil de Circos, en Pazos de Reis, para continuar ata os muíños onde varios estarán moendo, promocionándose, ao mesmo tempo, a vestimenta tradicional e a espiga do país.

Non faltará tampouco a faceta gastronómica con papas de millo ou castañas asadas.
Os asistentes a esta festa adoitan repetir dunha edición a outra, pero tamén hai xente nova cada ano, algúns procedentes doutros concellos.

O Ceip nº 2 de Tui realizará o martes e o mércores as Actividades de Outono

A Vindeira semana van dar comezo as "Actividades de outono" no Ceip Nº2 de Tui que se iniciarán cunha exposición de froitos, enseres e obxectos relacionados co outono e unha mostra de Xogos Populares, xunto cun Magosto, que se celebrarán o martes día 10 de novembro, a partires das dez da mañá. Ás 12.00 do mediodía levarase acabo a 2ª Baixada de Carrilanas, coa que os escolares están moi ilusionados despois da experiencia do ano pasado.

 Ás 12.45 horas terá lugar a degustación de castañas asadas e o Tradicional Magosto.

O mércores, a partires das 10.00 horas, vanse celebrar os Xogos Populares para o alumnado de Educación Infantil e a partires das 12.30 horas disputarase o  "I Cross de San Martiño, Ceip Nº2 de Tui".

Venres, 6 de novembro de 2009  

II concurso fotográfico “Relación Home Muller 100% Positivo” da Concellería de Cultura de Tui pecha a recepción de orixinais o día 14

A Concellería de Servizos Sociais do Concello de Tui segue e recibir fotografías para participar no II Concurso fotográfico conmemorativo do Día Internacional contra a violencia de xénero. O concurso mantén este ano, coma na anterior edición, a temática deste certame: “Relación Home Muller 100% positivo”. Para a concelleira Patricia Ricón este tema “Relación Home/Muller 100% positivo”, quere facer fincapé na relación entre a muller e o home, resaltando dunha forma positiva a relación de parella, amizade, convivencia no traballo...é dicir, en todos os ámbitos da vida. “Con este concurso, -engade a concelleira-, queremos resaltar que aínda que, desgraciadamente, existan vítimas de violencia de xénero, afortunadamente, a maioría de relacións entre homes e mulleres son relacións non violentas”.  Con esta campaña quérese fomentar este tipo de relacións e que se acabe entre todos coa violencia machista.

Logo da positiva acollida desta iniciativa o pasado ano, convócase esta nova edición con dúas categorías: para menores de 16 anos e maiores desa idade, que poderán presentar ata 3 fotografías antes do 14 de novembro nas dependencias do Concello de Tui. Coas obras presentadas organizarase unha exposición pública. Os premios son de 350 euros para o gañador da categoría de maiores e tamén haberá un premio especial para os menores de 16 anos de idade consistente nun agasallo por valor de 100 euros.

Cada participante poderá enviar un máximo de 3 obras. Aceptaranse obras con retoque fotográfico sempre que non se trate de fotomontaxes. As fotografías poderán ser en color ou en branco e negro e deben cumprir as seguintes características: presentarse en papel, cun tamaño mínimo de 20cmx15cm e un tamaño máximo de A3. Os interesados poden acceder ó resto das bases do concurso na páxina web do Concello de Tui (http://www.concellotui.org)
 

O Alcalde de Tui di que nos orzamentos da Xunta de 2010 van 3 millóns de euros para o novo Centro de Sáude de Tui

    Nos orzamentos da Xunta de Galicia para 2010 van 3.030.048€ para o novo centro de saúde de Tui segundo o alcalde, Antonio Fernández Rocha. Así o espuxo na Radio Municipal de Tui saíndo ao paso das declaracións feitas nesta emisora polos representantes do BNG onde afirmaban que non había partida orzamentaria para esta obra. Manifestaba que Tui é o único centro que teña toda a consignación no próximo orzamento.

    Fernández Rocha amosou a súa preocupación pola información difundida pola Bloque que cualificou de “mentira” e que causa malestar e alarma entre a poboación.  Acusaba tamén ao BNG de non querer que se leve a cabo o novo centro de saúde, porque no seu parecer “non lles valía ningunha das ubicacións posibles” e dicía “sempre lle puxeron pegas”.

    Afirmaba o rexedor tudense que Tui terá un centro de saúde digno, incluso de maior tamaño que o previsto inicialmente. A próxima semana os técnicos que están a traballar na redacción do proxecto achegaranse ata Tui para ensinarllo ao alcalde.

    Os nacionalistas denunciaban tamén se o centro ía ter financiamento público-privado, punto que o rexedor tudense dixo que non lle preocupa coma se vai pagar a obra, porque é un problema da administración autonómica.

    Sobre os prazos indicaba que a obra comezará en 2010.
 

Nats Nus Dansa hoxe no Teatro Municipal

    Ás 20h, o Teatro Municipal de Tui acolle a presentación de “Momentari”. É unha obra de danza para público familiar que chega da man da compañía Nats Nus Dansa. É unha proposta visual que mestura a danza co vídeo, e a música, creando un fermoso espectáculo recomendado a partir de 5 anos. A obra foi galardoada co premio FETEN 2009 ao Mellor espectáculo de Danza

    As entradas están xa á venda na web www.culturatui.info ou hoxe dende ás 18.30h no despacho de billetes. Os prezos son 3€ adultos, e 2€ nenos e persoas con dereito a desconto.

Xoves, 5 de novembro de 2009  

Nats Nus Dansa volve a Tui co seu espectáculo “Momentari”

A compañía catalá Nats Nus Dansa regresa este venres ao teatro municipal de Tui para presentar un espectáculo para toda a familia: “Momentari”, co que obtivo o premio FETEN 2009 ao mellor espectáculo de danza.

Momentari é unha fermosa viaxe chea de sensacións, coros, sons e imaxes protagonizada por Toni, un coleccionista de momentos simples e sinxelos que foi recompilando ao longo dos anos. Coa axuda das seis caras dun cubo irá percorrendo eses momentos da man de catro personaxes que viven no interior. Coas paredes do cubo crean espazos para cada historia, escóndense dentro de proxeccións de vido, e constrúen un verdadeiro inventario de momentos.

Nats Nus Dansa creouse en 1987 baixo a dirección de Toni Mira explorando a interacción da danza con outras linguaxes escénicas. Once anos máis tarde, con Claudia Moreso ao fronte, xurde Nats Nens dedicada a espectáculos de danza para público infantil. Na súa longa traxectoria estas compañías produciron 18 espectáculos cos que realizaron máis de 2.000 representacións en máis de vinte países de catro continentes.

A cita con estas obra de danza contemporánea para público familiar a partir de 5 anos será o 6 de novembro, ás 20h, no Teatro Municipal. As entradas están xa á venda na web www.culturatui.info ou pódense adquirir o venres dende ás 18.30h no despacho de billetes da Área Panorámica. Teñen un prezo de 3€, 2€ con desconto e 2€ para os menores de 12 anos.

Durante o mes de outubro máis da metade das entradas vendéronse por internet

A Concellería de Cultura salienta o éxito que está a ter a venda de entradas por internet nos espectáculos do Teatro, xa que durante o mes de outubro máis da metade das entradas foron vendidas ao través da web www.culturatui.info.  Por outra parte cómpre destacar tamén o éxito de público rexistrado nas catro representación ofrecidas o mes pasado onde houbo unha media de 333 espectadores. Dende o Departamento de Cultura quérese agradecer a fidelidade do público que acode ao teatro.

Hoxe inaugúrase a exposición “Onte e hoxe” do gravador tudense Xabier de Sousa

A Sala Municipal de Exposicións do Concello de Tui acolle hoxe, xoves, 5 de novembro, ás 20.30 horas a inauguración da exposición dos gravados do artista tudense Xabier de Sousa que realiza esta primeira exposición individual na cidade.

Xabier de Sousa naceu en Tui no ano 1960 e posúe unha formación autodidacta no mundo da arte, ten realizado estudos de gravado en diversos talleres de Arte Gráfica da provincia de Pontevedra e de Lugo. Imparte cursos monográficos de gravado. Membro do grupo “Graph” (gravadores do sur de Galicia); impulsor e co-director do centro de gravado “+Obra gráfica galega” de Vigo e tamén do grupo de gravadores “Escara” (con sede en Lugo). Na actualidade é director do estudo de gravado “Chicorio” de Vigo.

Na súa longa traxectoria de exposicións, tanto individuais como colectivas, poderíamos destacar a súa participación en “Estampa” o Salón Internacional do Gravado de Madrid en varias edicións, ou na Bienal Internacional de Vilanova de Cerveira, foi seleccionado e certames artísticos en Europa e América, realizando numerosas exposicións en varios países europeos.

Obtivo o 1.º premio na VII Bienal do Eixo Atlántico. Foi seleccionado no VI Premi de Gravat Ciutat de Lleida, e participou no 1.º Salón Internacional de Arte Contemporáneo «Puroarte» (Vigo), na XIV Estampa (Salón Internacional do gravado e edición de arte contemporánea, Madrid). En 2007 foi seleccionado no Certame de Gravado «Máximo Ramos» (Ferrol), no Premio Nacional de Pintura «El Primero de Fariña» (Toro) e no I Premio Nacional de Gravado «Ciudad de Valladolid». As súas obras figuran no Museo Nacional do Gravado de Bos Aires (Arxentina), no Museo Municipal de Ourense, no Museo de Belas Artes «Lucas Braulio Areco» (Municipalidad de Posadas, Arxentina), no Museo San Telmo de Donostia (Guipúscoa), na Biblioteca Nacional (Madrid), na Deputación de Ourense e na Fundación Caixanova (Vigo). Foi finalista dos premios de artesanía 2008 e 2009 entre outras moitas distincións á súa obra.

Nesta exposición Xabier de Sousa realiza un percorrido pola súa traxectoria artística dende a súa primeira exposición no ano 1989, amosando a súa evolución e a calidade do seu traballo. Para o concelleiro de cultura do Concello de Tui, Moisés Rodríguez Pérez, esta exposición de Xabier de Sousa é unha das grandes citas artísticas desta temporada na cidade de Tui, e resulta unha satisfacción para o Concello exhibir a obra dun importante artista tudense, de consolidada traxectoria, que enche coa súa capacidade creativa a Sala Municipal de Exposicións, cumprindo así un dos obxectivos desta Sala como é promover aos artistas locais. Pero, ao mesmo tempo neste oportunidade, a obra de Xabier de Sousa posúe unha alta calidade e capacidade de comunicación que suscitará, de seguro, o interese dos espectadores.

    A exposición permanecerá na sala Municipal de Exposicións do Concello de Tui (Edificio Área Panorámica – rúa Colón, 2) ata o 29 de novembro, puidendo visitarse de luns a venres de 09.00 a 14.00 horas e de 16.30 a 20.30 horas, e os sábados de 09.00 a 13.00 horas.

O concello de Tui promoverá o I Trofeo Cidade Tui de Baile Deportivo

Mañá, venres, ás 12 horas, vaise presentar na Sala de Concelleiros da Casa Consistorial o I Trofeo Cidade Tui de Baile Deportivo durante un acto no que participarán o primeiro tenente de alcalde, Moisés Rodríguez Pérez, e o director da “Academia de Baile Pasos”, Miguel Abreu Fernández.

O BNG presentará mañá a Comisión Comarcal da Muller creada no seo desta formación

A Comisión Comarcal da Muller do BNG no Baixo Miño convoca unha rolda d eprensa, que se celebrará mañá, día, 6, ás 11.30 horas no Hotel Colón de Tui.

            Nesta xuntanza o Bloque Nacionalista Galego presentará a Comisión Comarcal da Muller do BNG así como a campaña de actos que se desenvolverán no Baixo Miño ao longo de novembro co gallo da celebració do Día contra a vilencia de xénero.

Inservirán Carme Verde Diego, responsábel comarcal de Muller do BNG; Mª Fe González Pérez, responsábel local de Muller, do BNG en Oia; Hortensia García Díaz, responsábel local de Muller, do BNG na Guarda; Noemí Baz Rodríguez, responsábel local de Muller do BNG no Rosal; Ofelia Chicote de Miguel, responsábel local de Muller do BNG en Tui;

Ermelinda Granada Diogo, responsábel local de Muller do BNG en Tomiño, e Carme Mª Baz Alonso, responsábel comarcal de Muller de Galiza Nova.

O BNG de Tui di que non hai partida orzamentaria para o novo centro de saúde da cidade

    Continuando a rolda de conversas iniciadas co alcalde de Tui, Antonio Fernández Rocha, onte estiveron no programa Día a Día da Radio Municipal de Tui os representantes do BNG, Laureano Alonso, voceiro do grupo municipal, e José Martínez Tato, responsable Local.

    Os nacionalistas pronuncíabanse sobre o posible emprazamento do 3º xulgado para Tui indicando que o BNG votou en contra en Comisión Informativa de ubicalo no local de Rogelio no Paseo da Corredoira. Argumentan a súa posición manifestando que ten que ter un edificio propio e digno. Eles propoñen ubicar alí unha Oficina de Turismo.

    Fixo repaso Laureano Alonso da demanda dun novo edificio para os Xulgados Tudenses que é xa histórica, xa que as instalacións quedaron obsoletas, polo que aposta por unha nova ubicación.

    Lembrou o líder nacionalista que a orde de creación do novo xulgado tudense é do 17 de xullo deste ano, polo que no seu parecer houbo tempo de abondo, e acusa ao goberno local de “imprevisón e ineficacia”

    Dende o BNG referianse tamén a que nos orzamentos de 2010 da Xunta de Galicia non figuran, segundo dín, partida para o novo centro de saúde de Tui. O responsable local, José Martínez Tato explicaba que figuran só como investimento público-privado.

    Con respecto ao Plan Xeral de Ordenación Municipal. Laureano Alonso explicou que o seu grupo está disposto a ir a Santiago, xunto cos outros grupos, e reunirse coa Directora Xeral de Urbanismo para escoitar de primeira man coma está o PXOM. Sinalaba que nesa reunión de producirse o que teñen que preguntar é porque onde hai un ano os técnicos dicían non, por qué agora van dicir que sí, xa que os problemas seguen a existir.

    Apostan por tanto pola aprobación do Plan para que os veciños poidan construír pero deixando pendentes “aquelas partes escuras pendentes de modificación”

O Concello de Tui abre o prazo para solicitar becas de estudo no Conservatorio e na Escola de Música da cidade, e na Escola Superior Gallaecia

    O Concello de Tui ten aberto até o 16 de novembro o prazo para solicitar becas de estudo nos dous centros de ensinanza musical da cidade, e bolsas para cursar estudos na Escola Superior Gallaecia de Vila Nova de Cerveira.

    No primeiro dos casos as becas van dirixidas a alumnos e alumnas do Conservatorio de grao medio de Tui e da Escola de Música que estean matriculadas neste curso 2009/2010. Para acceder á beca deben estar empadroados no Concello, e a familia non debe superar os 20.966,40€ de ingresos brutos anuais, así coma non ser beneficiaron de becas por parte doutras entidades ou organismos. Tamén é requisito ter aprobado o curso completo no período 2008/09 salvo en caso de que se inicien.

    A solicitude debe presentarse no rexistro xeral do concello no modelo oficial establecido acompañado da documentación requirida coma a fotocopia do DNI, do libro de familia, dos ingresos mensuais de 2008, da declaración da Renda e da matrícula no Conservatorio ou na Escola de Música. 

    As bases completas pódense consultar no taboleiro de anuncio do Concello de Tui ou na web www. concellotui.info

    Por outra parte o Concello convoca tamén dúas bolsas de 3.600 euros cada unha para alumnos da Escola Superior Gallaecia de Vila Nova de Cerveira que residan en Tui cunha antigüidade mínima de dous anos no Padrón do Concello. Para obter a bolsa é preciso que o alumno teña superado 20 créditos o curso anterior. Non poderán solicitala aqueles que estean en posesión do título de Licenciado, Enxeñeiro ou Arquitecto.  A solicitude deben presentarse no rexistro xeral do Concello onde se pode ampliar esta información e consultar as bases desta convocatoria.

Mércores, 4 de novembro de 2009  

O saneamento será un dos obxectivos do novo Plan E en Tui

    Hai un días que saíu publicado o decreto polo que se fai público o novo Plan Estatal de Investimento. En Tui eses cartos serán empregados prioritariamente para rematar o saneamento e o abastecemento de auga. Isto é así ante a próxima posta en marcha da EDAR de Guillarei, para que todos os veciños poidan verter aí. De aí os cartos que se van executar xa no colector do San Simón e o Furnia ao que se suman saneamentos dende Frixo á Macoca, entre outros.  Un tema ao que se destinará medio millón de euros, e que co que o saneamento quedará listo case ao 100% e se culminará un traballo de moitos anos. Así o explicaba na RMT o Alcalde, Antonio Fernández Rocha.

    Agora o seguinte paso é a posta en marcha da EDAR de Guillarei, que en breve deben comezar as probas e tras adxudicarse a xestión debería estar en marcha antes de fin de ano.

    Noutra orde de cousas o rexedor tudense recoñecía que o PXOM é unha materia pendentes, engadindo que había cuestións que lle preocupaban pero que se resolveron en relación a afección de estradas.

    Tamén foi subsanado o informe de Costas que tamén era problemático segundo explicaba. Agora resta solucionar o de Patrimonio, algo que agardan poder ver cuns técnicos deste departamento que virán a ver temas do Camiño de Santiago. Aludía que de aquí a finais de ano todo quede listo.

    Aínda así recoñecía que é posible que haxa que realizar unha modificación que non conleve unha nova exposición. Indicaba que foi moi proveitosa unha reunión que mantivo cos Conselleiros de Cultura, Presidencia e Infraestruturas.

    Agarda que ben este mes ou o próximo se poida reunir coa Directora Xeral de Patrimonio, Encarna Rivas, unha xuntanza a que solicitará que tamén vaian os representantes dos outros grupos políticos.

    Fernández Rocha referiuse tamén ao emprazamento do 3º xulgado de Tui  que dende o equipo de goberno se propón no local de Rogelio na Corredoira. Neste senso explicaba que a Consellería de Presidencia precisa antes de fin de ano un local para este novo xulgado, para iso sacou un concurso ao que se presentaron distintos locais de particulares, un que reunía as condicións, foi finalmente alugado por unha entidade bancaria por 25 anos, por iso dende a Consellería púxose en contacto co Concello para preguntarse por un local.  O rexedor advertía que se Tui non ten emprazamento para o 3º xulgado pode perdelo.

    O emprazamento no local de Rogelio sería provisional en tanto a Consellería de Presidencia non constrúe un novo edificio para albergar os tres xulgados tudenses.

    Por outra parte as obras rúa Lugo debe estar rematadas entorno ao 20 de decembro, aínda que o Alcalde de Tui confía que incluso poidan acabar antes se o tempo acompaña. Sobre todo buscan que rematen a finais deste mes para que non entorpezan as compras de Nadal.

    Esta rúa no seu día quedará ao lado da apertura da rúa Ourense que se converterá nun dos viais importantes do municipio, acollendo tráfico pesado polo que debe levar asfaltado. Precisamente de cara a ese proxecto futuro, Fernández Rocha, explicaba que estase  a buscar que a Compostela e  a Lugo queden xa en perfecto estado.

3 de Novembro de 2009  

A Quiniela deixa en Tui 886 mil euros nun boleto premiado co Pleno ao 15

    A Quiniela de fútbol deixou esta fin de semana en Tui un premio de 886.212,57euros, ao selarse besta cidade un dos dous boletos acertantes do Pleno ao 15. O premio cos acumulados pode superar os 900 mil euros.

    O boleto foi selado no Despacho receptor 86.180 de Alejandro Pardo Martínez, na Avenida de Portugal.

    Polo momento descoñécese a identidade do gañador ou gañadora, e se se trata dun particular ou unha peña.
 

Xantar na I Festas de San Martiño en Malvas

    Ata este domingo, 8 de novembro, pódense adquirir os tíckets para participar no xantar da I Festa de San Martiño que organiza a Asociación de Veciños de Santiago de Malvas para o día 14. Haberá empanadas, polbo á feira, carne ao caldeiro, rosca, café e licores, viño ou refrescos. O prezo por persoa é de 18€  para maiores de 12 anos, e de 10€ para nenos de 4 a 12 anos. Pódense adquirir na Asociación de Veciños de Malvas, no Bar Buraquiño e Bar Nacy, no Bar Ideal, Bar Metro e Cafetería Boulevard.

    Amais do xantar o día 14 haberá actuación dos centros culturais, xogos populares, premios ao mellor viño tinto do país e á castaña máis grande, castañada e a actuación do dúo Marema.

Cea baile para os socios da Asociación Cultural Xuntanza

    A Asociación Cultural “Xuntanza” de Randufe celebra este sábado a cea-baile para os seus socios. Terá lugar na Casa Cultural ás 21.15h. O menú consta de pescada á romana, carne asada, sobremesa variada, bebidas, café e licor café. O prezo por persoa é de 20€. Logo terán baile amenizado por Kiko Carballo.

    As persoas interesadas en asistir á cea deben anotarse até mañá mércores no 646 646 500.

    Por outra parte Xuntanza avanzan que o 15 de novembro ás 18h van celebrar o seu tradicional magosto.

    Amais a Vogalía de Xuventude de Xuntanza organiza a “Acampada novembro” para o 14 deste mes na Casa Cultural.  Para participar é preciso ter máis de 13 anos e anotarse o luns 9 ou martes 10 no 687 897 351 de 20 a 21h.

    A acampada realizarase dende ás cinco da tarde do sábado 14 até o domingo 15 ás 11.30h.

A campaña “Non te consumas” chega hoxe ao instituto San Paio de Tui

    Solidariedade Internacional de Galicia realiza este mes de novembro a súa nova campaña educativa “Non te Consumas”, que terá lugar en varios centros de ensino de toda Galicia.

    Hoxe mesmo educadoras de Solidariedade Internacional de Galicia realizaran obradoiros educativos no IES San Paio de Tui, co alumnado de 2º da ESO dende as 8:45 ata as 14:25.

    As mozas e mozos de Tui xunto co seu profesorado, traballaran  a través de diferentes dinámicas o concepto de consumo responsable.

    Os obradoiros continuaran durante o mes de novembro traballando o tema da contrapublicidade de tal xeito que as mozas e mozos participen da creación dos seus propios anuncios de denuncia.

    Estes anuncios formarán parte dun concurso no que participarán centros de toda Galicia e que permitirá a edición dos tres mellores proxectos presentados.

    A campaña “Non te Consumas” pretende sensibilizar ao alumnado e o profesorado sobre as consecuencias que ten o noso consumo a nivel social e medioambiental,  mostrando as desigualdades e os desequilibrios que crea un modelo de consumo sen límites e sen prantexamentos éticos. Buscan tamén concienciar sobre a importancia que ten o papel do consumo na economía e no noso entorno, a nosa responsabilidade como consumidoras/es e a nosa capacidade  para incidir no mercado  e na sociedade.

    Así mesmo, dende esta campaña se ofrecen alternativas para un consumo máis responsable, xusto, social e ecolóxico: entre elas,  o Comercio Xusto. Un sistema de comercialización promovido en Galicia por distintas entidades, entre elas, Solidariedade Internacional de Galicia.
 

Novas xornadas de portas abertas no Telecentro de Tui

    Onte comezaron unhas novas xornadas de portas abertas no Telecentro de Tui  dirixidas a toda a poboación maior de idade. Polas tardes, de 17  a 19.30h, os interesados poden achegarse até este servizo, no primeiro andar da Área Panorámica, e acceder os recursos que oferta coma consultas de carácter informativo, cultural, etc. en ningún caso para xogos, descargas, etc.

    Esta apertura ao público está condicionada pola impartición de cursos e accións formativa neste Telecentro o que obrigaría, se fose o caso, a unha limitación do horario de apertura pública. O acceso é, de momento, para persoas maiores de idade.

    Por outra banda, mañá comeza no Telecentro un curso sobre “Creatividade e intelixencia emocional”. Esta actividade está organizada polo Consello da Xuventude de Galicia, co obxectivo de ensinar a manexar a forza das emocións para converter as mellores ideas en realidade. Este curso está preferentemente dirixido a moz@s interesados na creatividade e no traballo da intelixencia emocional como vehículo para a mellora persoal, laboral e social.

Comeza o Outono Cultural de Areas

    Esta fin de semana comeza a programación do Outono Cultural de Areas que cada domingo de mes ofrecerá variadas actividades deportivas, musicais e culturais. Está organizado pola Asociación Cultural Seixos Albos.

    Este domingo, 8 de novembro, ás 12.30h terán unha carreira popular pola parroquia. Xa pola tarde, ás 17h, o grupo de teatro “San Fins” de Rebordáns porá en escena a obra “A clave rosa”. E por último ás 18.30h actuará o grupo de playbacks de Areas.

    A programación continuará o día 15 cunha carreira de bicicletas pola mañá e a actuación de grupos folclóricos pola tarde. O domingo 22 terán futbito, pandereteiras e playbacks. E por último o domingo 29 celebrarán unha misa no Centro Cultural e pola tarde terán teatro e a actuación do grupo folk Meigallo.
 

Teatro en Guillarei

    A Asociación Cultural Virxe das Dores programou para este mes de novembro tres representacións teatrais. A primeira delas terá lugar este sábado, 7 de novembre, ás 19.30h no Centro Veciñal e Cultural de Guillarei. O grupo de teatro Fontevella presentará “Para que viría eu ao médico”.

    O sábado 14 será a quenda de Metátese Teatro con “Nós”, e por último o 21 Lohengrín Teatro representará “La perle de la sortie”.