Xoves, 31 de xaneiro de 2008

Escolares da Guarda celebran o Día Escolar da Paz e a Non Violencia cunha concentración na Praza do Reló

            Escolares da Guarda concentráronse onte na Praza do Reló para cantar á Paz. Ás once da mañá,  precedidos pola Policía Local chegaron primeiro os alumnos máis pequenos do colexio dos PP. Somascos, aos que seguiron os de Primaria, e de seguido San Xosé das HH. Carmelitas, Centro San Xerome, A Sangriña e a Unitaria de Sete Camiños.

            Foron alumnos dos Somascos e de Carmelitas quen leron as mensaxes que elaboraron os respectivos colexios nunha xornada na que se pediu pola Paz, con lemas, debuxos e as propias voces infantís.

            A concelleira de Facenda, que actuou de presentadora e moderadora neste acto do Día Escolar da Paz e a Non Violencia, estivo acompañada, entre outros concelleiros, polo primeiro tenente alcalde, Miguel Español, Teresa Vicente e Paulino Rodríguez.

            Magallanes Álvarez xustificou a ausencia do alcalde por atoparse en Santiago, realizando precisamente xestións da Axenda 21, xurdida do Pleno Infantil celebrado nas vésperas do Día da Constitución.

            Dous alumnos do colexio dos PP. Somascos leron ao unísono un texto no que rexeitaron calquera forma de violencia apostando polo diálogo, amizade, axuda e o esforzo para conseguir mellores condicións de vida no mundo enteiro e abogaron “non por un só día da paz, senón porque haxa 365 días cada ano” rematando a sú intervención con berros de “que bonito! Qué bonito!” coreados por todos os nenos e nenas presentes na Praza do Reló.

            Ao balcón da Casa do Concello asomáronse de seguido os representantes do colexio San Xosé das HH. Carmelitas que desexaron sementar a Paz en moitos lugares “primeiro nos nosos corazóns e logo no mundo enteiro” e convidaron a todos “a unir as nosas forzas para construír un mundo no que a violencia, o terrorismo, o racismo, os atentados contra a natureza a tantas outras barbaries non teñan cabida” e pediron por un mundo de igualdade “en definitiva, un mundo mellor”.

            Contra a violencia e en contra da desigualdade, a colaboración de todos, e o respecto pola natureza foron peticións saídas das gorxas deste nenos.

            Finalmente foron os representantes do colexio da Sangriña quen pecharon as intervencións escolares, nun canto lírico, rexeitando o emprego das armas para loitar pola Paz que se debe construír coa palabra. “Fundiremos en cánticos de amor continentes e razas, para construír os mundos do futuro con palabras, soamente con palabras”.

            E collidos das mans todos os nenos cantaron a canción popularizada por Antonio Flores “Si pudiera olvidar todo aquello que fui / si pudiera borrar todo lo que yo vi / no dudaría, no dudaría en volver a reír / Si pudiera explicar las vidas que quité / si pudiera quemar las armas que usé / no dudaría, no dudaría en volver a reír...”.

            Acto seguido Miguel Español dirixiuse a todos desde o bancón do concello para destacar a xornada que se celebraba, especialmente importante, dixo, para a comunidade educativa porque “a declaración deste día tivo e ten, como obxectivo, a educación en e para a tolerancia, a solidariedade, a concordia, a liberdade, a paz, a non violencia, a xustiza e a convivencia”.  

            Como fondo das palabras que pronunciaba Español Otero, a voz de Antonio Flores con “No dudaría”. O concelleiro extendeu a toda a sociedade “afondar nestes valores que son os piares de calquera sociedade realmente avanzada” e que se posibilite cambiar odio por amor, cuarteis por universidades, escravitude por traballo.

            Finalizou o primeiro tenente alcalde desexando “que este Día da Paz veña seguido de moitos Días en Paz”, e pediu gardar un minuto de silenzo “en memoria de todos aqueles cidadáns do mundo aos que non se lles permite vivir en paz”.

            E rematou este acto a prol da paz coa solta de pombas e a repetición da canción que entusiasmou aos alumnos. “No dudaría”.

Xoves, 31 de xaneiro de 2008

A Guarda terá no primeiro trimestre de 2008 un Plan Director de Turismo para o desenvolvemento deste sector

            A concelleira de Turismo, Montserrat Magallanes, sinala que o departamento que preside ten claras as necesidades da Guarda para animar o sector turístico. Entre esas necesidades sinala que o concello precisa contar con persoal dedicado ao sector turístico do que di que, ata agora se carecía del agás na época estival que se ocupaba da información turística desde as oficinas de información.

            Magallanes Álvarez destaca que o pasado verán, non obstante, se iniciou unha nova experiencia que tivo unha boa acollida: as visitas guiadas que permitiron mostrar as singularidades do casco urbano guardés.

            A edil de Turismo mencionou, ademais, que nos últimos meses xa se puxo en marcha o Plan Director de Turismo, que vai ter, engade, unha prolongación no tempo ata o 2010-2011.

            Este Plan, explica Montserrat Magallanes, permitiranos, por unha banda, “coñecernos a nós mesmo; cales son as nosas aventaxes e cales os nosos inconvintes. En segundo lugar o Plan permitirá establecer unha programación que impida que unhas actuacións pisen a outras”. Pon como exemplo “que se hai que crear unha rotulación, que sexa duradeira e que non haxa que retirala ou cambiala dentro de dous anos porque contradí un pouco todo o que debe ser unha marca, un estilo, unha tipoloxía” de letras, cores ou formas.

            Engade a concelleira de Turismo que tiveron en conta, e así se recolle nos orzamentos de 2008, mellorar a páxina web do concello e,tamén “a creación duns routeiros no concello para que a xente que nos visita poida facer unhas rutas ben sinaladas, ben coñecidas e ben publicitadas”. Percorrido e duración, serán tidos en conta nestes routeiros da Guarda.

            Volvendo ao Plan Director de Turismo, Montserrat Magallanes explica que está desenvolvéndoo a empresa Trivium, da Coruña, por encargo do concello da Guarda, tendo mantido reunións con distintos colectivos de diferentes sectores económicos e organizacións sociais, e mesmo cos propios responsables municipais “para pór de manifesto cales son as eivas e os valores que se trasladarán ao Plan Director”. Este Plan permitirá, por outra parte, precisar se é, ou non, convinte, a creación dun ente a xeito de Padroado de Turismo ou Centro de Iniciativas Turísticas, que podería englobar parte pública e parte privada, que permita coordinar e representar aos distintos sectores, incluído o concello. Pero estas posibilidades se coñecerán unha vez elaborado o Plan Director de Turismo, que se prevé no primeiro trimestre de 2008.

Mércores, 30 de xaneiro de 2008

Hoxe presentarase no IES A Sangriña unha páxina dedicada á auga e ás súas aplicacións

            “A auga. Aplicacións enerxéticas na Galicia preindustrial”, é un traballo realizado desde o IES A Sangriña para dar a coñecer o uso da auga como fonte de enerxía empregada en Galicia antes da industrialización.

            Trátase dunha páxina web, que contou coa colaboración de profesores e alumnos, sobre a auga, as súas propiedades, estructura, estados, ciclo; dos ríos e as súas características, cuncas, vales, vertentes e fervenzas; das máquinas hidráulicas tradicionais, muíños, batáns, ferrarías e serrarías, da súa historia, funcionamento, partes e tecnoloxía, e recóllese tamén a literatura popular, acuática, paisaxística; refráns, romances de cego e a pintura galega.

“A auga. Aplicacións enerxéticas na Galicia preindustrial”, que se pode consultar no enderezo http://centros.edu.xunta.es/iesasangrina/auga, vai ser presentada, hoxe, no salón de actos do IES ás seis da tarde.

Os maiores que asisten a un Curso de Introducción a Internet elaboran un blog que xa teñen colgado na rede

As oito persoas maiores que asisten, no Telecentro da Guarda, ao Curso de Iniciación a Internet xa teñen na rede un blog que están dispostos a manter e que se pode consultar no enderzo http://www.lastortugaslentas.blogspot.com/
            O curso, con cargo a Consellaría de Innovación e Industria, que ten unha duración de 12 horas e que está impartido por Rubén Hermida, introduce a un sector da poboación que non tivo acceso, pola súa idade ás novas tecnoloxías, nos coñecementos básicos que lles permitirán navegar na rede e ata darse a coñecer con blogs que, sen dúbida, irán mellorando coa práctica como o que veñen de colgar na rede.

Mañá inícianse as actividades formativas  do  proxecto europeo  Comenius no que participa  o Centro San Xerome

O Centro San Xerome inicia mañá a súa participación no Proxecto Europeo Comenius, que traerá á Guarda, ata o 4 de febreiro, especialistas de diferentes áreas da  educación especial, representantes  dos Centros: Sepherd School de Nottingham (Reino Unido),  I.M.E Claude Monet de Lorraine (Francia) e   Kivenpuiston Koulu de Nurmijarvi (Finlandia). Este intercambio pedagóxico, no que participan 15 especialistas en Educación Especial, extenderase ata xullo de 2009, o que vai permitir que profesores do San Xerome devolvan a visita aos centros antes mencionados, ademais de elaborar programas conxuntos, intercambiar experiencias e poñer en práctica  novas técnicas  pedagóxico- terapéuticas cos nosos alumnos das respectivas institucións de discapacitados.

Mércores, 30 de xaneiro de 2008

Davila critica “o oportunismo do PSOE” no tema da circunscripción electoral para os emigrantes e lembra que “o goberno aínda non reformou o sistema de voto emigrante que é o prioritario”

      A cabeza de lista do BNG por Pontevedra ás Elecións Xerais 2008, Olaia Fernández Davila, criticou este serán na Guarda “o oportunismo do PSOE” cando estes días ofertou a circunscripción electoral única para os emigrantes.

     “Lembro ao Executivo español que aínda non reformou o sistema de votación dos residentes no exterior que é o prioritario a pesar das iniciativas do BNG aprobadas nun Pleno do Congreso dos Deputados”. Tamén subliñou que para levar a cabo a circunscripción electoral única para os residentes no estranxeiro ten que levar a cabo unha reforma da Constitución.

Expediente de sobresaliente en defensa da pesca galega

     Davila lembrou que “ao longo da lexislatura que se acaba de pechar, o BNG preocupouse en todo momento por defender os intereses do noso sector pesqueiro. “O BNG traballou arreo polo sector pesqueiro, que o sabe de primeira man. Con maior ou menor fortuna pero aí estivemos e estaremos ao lado dos seus intereses”.

     Neste sentido, subliñou que “levamos á Cámara os problemas da frota de cerco. As deficiencias relativas á normativa de seguridade no mar para as embarcacións. Demos a batalla no Parlamento do Estado cando se estaba negociando con Marrocos un novo Acordo de Pesca, alí fomos a voz dos nosos pescadores e reivindicamos a permanencia dos nosos barcos no banco Canario Sahariano. Pedimos ao Goberno medidas para paliar os efectos desastrosos que a suba dos prezos dos combustíbeis ten na economía do sector pesqueiro”.

     Respeito ao Acordo de Pesca con Mauritania, subliñou que “agora está de moda nos medios de comunicación falar dos problemas do Acordo de Pesca con Mauritania. Teño que lembrar que xa en decembro do ano 2005, o BNG se preocupou por trasladar ao Executivo a necesidade de renovar este Convenio de pesca e realizar melloras no mesmo, sobre todo despois do fracaso que o Tratado de Marrocos supuxo para a frota galega. E cando a UE acordou a prohibición de utilizar as artes de enmalle en augas comunitarias, quen avisou das consecuencia negativas de tal medida para os 70 buques galegos? Quen se preocupou de debater esta cuestión no Congreso dos Deputados? Dígovolo rapidamente, o BNG que sacou adiante unha proposición para que o Goberno contrastara os informes na UE e batallar pola supresión desta veda”.

     Ademáis, recalcou Davila, “quen levou unha e outra vez o problema con Noruega polo apreixamento de barcos galegos en augas de Svalbard? De novo o BNG que, até o último día se preocupou por este tema dirixindo iniciativas ao Goberno para que se resolva o problema co Estado noruego na UE”.

     Rematou ao recalcar que “hoxe podedes ver na prensa como novedoso o tema dos aranceis sobres as conservas de atún que proveñen de terceiros paises. Ese tema traballouno o BNG hai xa máis dun ano. Así podería seguer, enumerando moitos outros problemas que afectan á nosa pesca, e voltaría a aparecer o BNG polo medio”, salientou a cabeza de lista por Pontevedra.  Concluiu que “os nacionalistas galegos temos un expediente de sobresaliente na defensa da pesca galega mentras outros non chegan nen ao aprobado raspado”.

Rodríguez: “a xente non debe esquecer que ao Presidente do Goberno o escollemos no Congreso”

     Pola súa parte, Francisco Rodríguez aproveitou o feito de “estarmos en A Guarda” para enfatizar a necesidade “de construir unha identidade galega, unha personalidade para Galiza que percorra o camiño cara unha ósmose con Portugal”. Ademáis de salientar que por vez primeira, e grazas á negociación do BNG co Goberno, “Galiza acadou un estatus aceptábel nos Orzamentos Xerais do Estado pero esta posición debe manterse durante dez anos para superar os atrasos do pasado”. Advertiu asemade que “a cidadanía non debe esquecer que ao Presidente do Goberno o escollemos e o votamos no Congreso dos Deputados”.  E subliñou a necesidade de contar cun BNG máis forte nas Cortes do Estado para enfrontar os reptos do futuro.

Martes, 29 de xaneiro de 2008

Érguete Baixo Miño inicia hoxe un Programa para deixar de fumar

Hoxe comezará, na Guarda,  o programa de deshabituación tabáquica que pon en marcha a Asociación de Prevención en Drogodependencias, Educación e Promoción da Saúde, Erguete Baixo Miño, na sede deste colectivo social, e no que participarán trece persoas.

 O programará desenvolverase desde as 17.30h e constará de sete sesións , unha por semana, dirixidas pola sicóloga da Asociación Española Contra o Cancro Elisa Alonso.

Curso de Manipulador de Alimentos

            O concello da Guarda organiza un Curso de Manipulador de Alimentos que se vai impartir o 12 de febreiro, ás catro da tarde.

            As persoas interesadas poden informarse ou formalizar a inscrición no Departamento de Desenvolvemento Local do concello. Tamén poden chamar ao teléfono 986 61 00 00

Davila e Rodríguez falarán hoxe nun acto público na Guarda ás 20.30 horas

A cabeza de lista do BNG por Pontevedra ás Elecións Xerais 2008, Olaia Fernández Davila, e o actual portavoz nacionalista no Congreso, Francisco Rodríguez, falarán hoxe, martes día 29 de xaneiro, nun acto público na Guarda, onde tamén participará a alcaldesa de Tomiño e candidata á Cámara Baixa por Pontevedra, Sandra González.

O acto público terá lugar ás 20.30 horas na Casa de Cultura.

Martes, 29 de xaneiro de 2008

Os socialistas aproban, inicialmente, o Orzamento Municipal co voto en contra da oposición

Entre os puntos tratados pola Corporación da Guarda no Pleno Ordinario de xaneiro, debateuse o orzamento municipal que se eleva a 7.355.173 euros, e que foi aprobado co voto maioritario do grupo socialista, que goberna, votando en contra os 8 concelleiros da oposición.

Celso Fariñas, de TEGA, e que iniciou a quenda de intervencións, limitouse a dicir que “estes son os seus presupostos e polo tanto van a aprobalos vostedes, nós non imos facer ningunha intervención por partidas”

Xan Lois Lomba Alonso, do BNG, comezou por dicir que os Orzamentos de 2008 foron presentados fóra de data. Achacou ao grupo de goberno que presuma de contar coa oposición, segundo manifesta o alcalde nos medios de comunicación, pero a realidade, dixo o portavoz nacionalista, “e que non se contou con nós absolutamente para nada (...) seguimos igual que os gobernos anteriores”.

Xan Lois Lomba referiuse aos impostos de construcción, instalacións e obras, coas que o goberno local pretende recadar 516.000 euros, e de licencias urbanísticas e primeira ocupación, 216.000 euros, cantidades superiores aos orzamentos do ano 2007. En 2006, continuou o edil do BNG, o concello non chegou a recadar máis do 85 por cento das licencias de obras, e en canto aos impostos de licencias urbanísticas e de primeira ocupación, un 74 por cento. A día de hoxe, e coa crise no sector inmobiliario, vostedes non só non reducen as cantidades en comparación ao ano 2007, senón que as aumentan, non sendo consecuentes coa situación existente. Referiuse Xan Lois Lomba ao informe de Intervención “que acredita que existe un excesivo optimismo recadatorio”.

Mencionou tamén o edil do BNG o Plan Xeral de Ordenación Municipal, do que dixo ter “serias dúbidas, por non dicir practicamente seguro, de que o PXOM, non vai ser aprobado nesta lexislatura, grave problema para A Guarda e que fai preguntarse cales son as prioridades políticas”.

Botou en falla o portavoz do BNG as partidas específicas para un Plan de Tráfico; non dá localizado nos presupostos unha asginación orzamentaria para a apertura de Inguieiros, algo, engadiu, que fóra moi criticado polo actual grupo de goberno en etapas anteriores, e que parece que agora renuncia á súa apertura; non se recolle a construcción dun auditorio para unha poboación que supera os 10.000 habitantes, logo de perder a oportunidade de intentar mercar o Cine Avenida coa iniciativa presentada polo BNG na anterior lexislatura, votada en contra polo grupo que hoxe goberna, por Iniciativa Veciñal e polo Partido Popular. Tampouco se ve nada do que pretenden facer co R. Sinde ou coa Casa dos Alonso, decindo desta última que “o goberno anterior encargouse de soterrala e vostedes dá a sensación de que lle están dando o remate definitivo”.

Continuou a súa intervención Xan Lois dicindo que o goberno socialista incumpre un acordo plenario de habilitar un fondo específico de emerxencia social, considerando vagas as explicacións recibidas, segundo as cales este fondo vai asociado a outras partidas de carácter social.

Criticou que a rede Wifi vaia ser costeada na súa totalidade con recursos propios, por contía de 40.000 euros, sen acudir á súa cofinanciación por parte do Ministerio de Industria, que ten competencias nesta materia e posúe liñas de financiamento, como o Proxecto Avanza.

Non existen partidas para a normalización lingüística na administración local, e no Padroado Monte Santa Trega, non se recollen inversión reais agás unha partida para pequenos arranxos.

Con estes argumentos, Xan Lois Lomba Alonso xustificou o seu voto en contra dos orzamentos.

Na súa intervención o portavoz do PP, José Alberto González Vicente, criticou que os Orzamentos se tratasen nun Pleno Ordinario e non se levasen, como considerou que era práctica no concello da Guarda, a un Pleno Extraordinario. Coincidiu co BNG, ao dicir que non se contou coa súa formación, que representa a un sector importante da Guarda, para elaborar os Orzamentos, que contradí “o talante dialogante e que contan con todos nós, segundo din vostedes na prensa”.

Botaron en falla inversións para facer fronte a contidos recollidos na propaganda electoral, e citou a ausencia de partidas destinadas á Casa dos Alonso, a apertura da rúa Inguieiros, mantemento do Castelo de Santa Cruz, beirarrúas do Castro e do empalme de Camposancos e mantemento de bens inmobles do concello.

Da partida da rede Wifi, sinalou que é algo programático, dependendo de se chegan ou non subvencións externas. Resumiu as carencias como “algo que todos dabamos por feitas hai uns meses, pero a realidade parece que é un pouquiño diferente”.

Resúltalle chocante, e considerou unha modificación importante nos Orzamentos, que en retribución para altos cargos en gastos brutos se consignen 200.000 euros, cando antes estas cantidades non chegaban a un cuarto.

Lembrou a aprobación dunha moción, contra a violencia de xénero, que conlevaba un fondo de emerxencia social, vendo con sorpresa, dixo González Vicente, que na Comisión de Contas só se sinalaron 6.000 euros, que ían destinados, tamén, a outras necesidades que puidesen xurdir.

Considerou o portavoz dos populares, que aínda que as subvencións a distintos colectivos soben ou se manteñen “cremos que só nun caso diminúen. A do Sporting Guardés, a quen se lle reduce en 3.000 euros a axuda que estaba recibindo”. Alberto González Vicente asegurou que a directiva do Guardés quedou decepcionada cando lles comunicou esta reducción, cando, segundo lle explicaban, dispoñen de oitenta fichas federativas, que están en expansión e que o ano que vén disporán dunhas 130 fichas, e desdobrarán as categorías co que supón de máis adestradores, máis desprazamentos, equipaxes e outros gastos.

Rematou o portavoz do PP adiantando que non “imos aprobar os Orzamentos para protestar, dalgunha forma, porque non hai tanto como se prometera”.

A concelleira de Facenda, Montserrat Magallanes respondeu as distintas intervencións. Respecto á rúa Inguieiros, asegurou que desde o goberno local se continúa a tramitación do expediente de apertura, e xustificou a ausencia de partidas no 2008, porque “os pasos que se van dar están cubertos polas cantidades que aparecen no Decreto de incorporación de remanentes; é dicir, hai cantidade consignada para Inguieiros”. Respecto ao Auditorio, explicou que están na fase de idear o proxecto, “tendo o equipo de goberno visualizado onde vai localizar o Auditorio, e unha vez teñamos a idea do que queremos buscaranse os apoios das diferentes consellarías para lograr a súa colaboración”. Explicou que no Castelo de Santa Cruz a Consellaría de Cultura comprometeuse a creación dun Centro de Interpretación das Fortalezas, e sobre o PXOM, asegurou que, como a Corporación xa sabe, se lle abonou á empresa redactora unha cantidade que supera os 200.000 euros, e as cantidades que restan son menores, aparecendo consignado no Orzamento o abono dos traballos que se realizarán no presente ano.

Montserrat Magallanes respondeu ás críticas sobre unha partida destinada a Emerxencia Social dicindo aos concelleiros que “non lles quede ningunha dúbida de que este equipo, coa sensibilidade que xa ten demostrado en moitos ámbitos, trata de cubrir esa necesidade que sabemos que existe, e para eso se dotou partida no Orzamento que cubrirán eses casos de emerxencia social”.

Sobre a rede Wifi, explicou que a partida que se reflicte no Orzamento é a aportación municipal, e están traballo na procura de cofinanciación para este proxecto.

Rexeitou que se diga que non existen partidas para mantemento dos bens inmobles, e tamén que non se dera opcións á oposición de colaborar na redacción dos presupostos porque houbo dúas Comisión de Contas “onde se poden facer aportacións e tratar temas de interese para a cidadanía, e eu aínda estou esperando algunha mínima aportación ou suxerencia”. Finalmente restou importancia que os Orzamentos se leven a un Pleno Ordinario ou Extraordinario, e que o importante era levalos, lembrando que en 2007 o anterior equipo de goberno non os presentou, e cando se levaron en anos anteriores, viñan desfasados.

Nun turno de réplica, Xan Lois Lomba insistiu en que nou houbo vontade política de pedir a colaboración da oposición para redactar os Orzamentos, e que na Comisión de Contas o que se fai é informar sobre os Presupostos. Calificou de falla de transparencia o Plan Xeral, e falta de criterios obxectivos a concesión de subvencións, ao non existir unha ordenanza ao respecto. Nos demais temas, Lomba Alonso repetiu os argumentos manexados na intervención inicial.

Interviu Miguel Español para recordar algunhas actuacións e outras que se acometerán. Senda litoral, beirarrúas do Castro, para as que se solicitou a redacción dun proxecto que comezará a elaborarse esta semana; depósito de abastacemento en Zamar, no que participará o concello con case cen mil euros este ano e outros cen mil no vindeiro exercicio, que son infraestruturas que este concello precisa. Aínda sendo necesario o Auditorio, dixo Español Otero, hai que priorizar as necesidades. Citou o primeiro tenente alcalde outras obras, como o depósito de abastecemento en Camposancos, as obras en Outeiro-Castiñeiras, e calificou de prioritaria a apertura de Inguieiros asegurando “que imos abrir Inguieiros nesta lexislatura”, e dirixiuse a José Alberto para dicirlle que “ti non tes moito interese na apertura porque cando se trouxo a Pleno, ti non votaches favorablemente”, non lembrando o aludido terse levado a Pleno este asunto desde que é concelleiro.

Martes, 29 de xaneiro de 2008

O “Guardés” enfrontarase ao Portonovo nos cuartos da Copa de Fútbol da Deputación de Pontevedra

O Deputado Provincial do Morrazo e delegado de Deportes da Deputación de Pontevedra, José Enrique Sotelo, reuniuse no Pazo Provincial cos clubs que participan na Copa de Fútbol da Deputación para decidir as datas en que terán lugar os encontros de cuartos de final, semifinal e final respectivamente da competición.

Na xuntanza os clubs acordaron que os partidos de cuartos de final se disputarán entre os días 26 e 27 de marzo, os de semifinais, entre os días 16 e 17 de abril, e a final, o 1 de maio.

Os encontros de cuartos de final enfrontarán ao Coruxo C.F. co Pontevedra B, o Sporting Guardés co Portonovo C.F., e o Moaña C.F. có Arousa S.C. O Alondras, exento de participar nesta rolda por sorteo, entrará en xogo nos encontros de semifinais contra o equipo que se proclame vencedor do enfrontamento entre o Moaña e o Arousa.  

Luns, 28 de xaneiro de 2008

Cursos de formación que se impartirán na Guarda

    Na Guarda o concello oferta un curso de Formación Básica para Adultos destinado a  maiores de 18 anos con carácter gratuíto. Os interesados deben inscribirse no departamento de Desenvolvemento Local do Concello de luns a venres de 9 a 13h. 

    E a Cruz Vermella impartirá, dende o 9 de febreiro, un curso de Cambios Posturais para o coidado de persoas dependentes. Será os sábados pola mañá e pola tarde. Ten un custo de 60€. Máis información no teléfono 986.61.46.09.

Luns, 28 de xaneiro de 2008

Prospera una moción de apoyo al sector palangrero presentada en el Pleno Ordinario celebrado por la Corporación de A Guarda

La Asociación Empresarial Espaderos Guardeses informa que los armadores asociados asistieron el pasado 25 de enero, al Pleno del ayuntamiento de A Guarda,  ya que se debatía una moción con carácter de urgencia por instando a la administración local para que realizase gestiones ante las administraciones competentes  con el objeto de promover medidas de apoyo al sector pesquero tales como mecanismo de compensación del precio de gasóleo, campaña de promoción para frenar la depreciación, medidas fiscales y sociales, y plan de viabilidad para la flota en el futuro.

Los armadores con su presencia querían testimoniar la grave situación por la que atraviesan, tanto por los precios en primera venta del pez espada y afines, como por la situación del incremento del precio del combustible.

Así mismo se congratulan del resultado de la moción presentada por el Partido Popular pero  que prosperó por el voto favorable de tres partidos que componen la Corporación PSOE, PP y Terra Galega. Además, añaden en un comunicado, como guardeses  celebran que ante la grave e insostenible crisis del sector se dejaron al margen las diferencias políticas y las tres fuerzas  tuvieron especial interés en apoyar con su voto favorable a un sector tan importante para la economía guardesa. Este ejemplo, dicen, sería deseable que se repitiese más o menudo en otros ámbitos y administraciones, ya que apoyar a un sector en crisis pidiendo medidas urgentes y concretas,  no debe ser patrimonio de ningún partido político sino de todos.

En el seno del debate previo a la moción, se propuso una enmienda por parte del grupo municipal del PSOE que fue aprobada con el resto de la moción, sobre la petición a la administración competente del incremento de medidas de control de la importación de pez espada de dudoso origen, moción que desde espaderos guardeses apoya firmemente.

Una vez más, Espadero Guardeses recuerda a la opinión pública, que si piden estas medidas de urgencia, se debe al aumento de costes de explotación, en este caso por el combustible, que no pueden repercutir  en los precios del pescado, los cuales, en el caso del pez espada siguen una bajada desde el año 2005, agravada en el 2007, con un descenso de precio en lonja del 38% durante el año. Estos hechos  han llevado a la flota de la Asociación Empresarial Espaderos Guardeses, a una pérdida total de la competitividad.

Evolución dos prezos do peixe espada entre xaneiro-2005 e decembro 2007:

Sábado, 26 de xaneiro de 2008

Acto Público do BNG o vindeiro martes na Guarda

O Bloque Nacionalsita Galego no Baixo Miño celebrará o vindeiro martes día 29, ás 20.30 horas, un acto público no Centro Cultural da Guarda, iniciando así a precampaña das eleccións Xerais que se celebrarán o vindeiro mes de marzo na comarca.

No acto intervirán Olalla Fernández Davila, candidata e actual parlamentaria no Congreso dos Deputados; Francisco Rodríguez Sánchez, actual portavoz do BNG no Congreso, Sandra González Álvarez, alcaldesa de Tomiño e candidata, e Xan Lois Lomba Alonso, portavoz municipal do BNG no concello da Guarda.

O BNG inicia na Guarda unha serie de actos no Baixo Miño que servirán para pór de manifesto a necesidade de que o nacionalismo galego acade máis representantes en Madrid co fin de condicionar o futuro goberno central e para que Galiza ocupe o papel que lle corresponde na futura configuración plurinacional da que se ten que dotar o estado.

Sábado, 26 de xaneiro de 2008

A concelleira de Turismo mantivo un encontro co sector da restauración do que xurdirá unha comisión para impulsar o turismo local

            A concelleira de Turismo, Motserrat Magallanes, mantivo recentemente unha reunión co sector da restauración da Guarda que, segundo explicou, serviu, por unha banda, para coñecer desde o propio sector cal é a problemática que lles pode afectar, polo que, engadiu, reunións deste tipo deben manterse con maior asiduidade. Pero tamén serven estes encontros para poder levar a cabo iniciativas.

            A reunión fora solicitada polo xerente de Catamaranes del Miño, José Espada, co obxectivo de elaborar un produto turístico en colaboración cos restaurantes da localidade.

            Destacou, Montserrat Magallanes, que esta iniciativa serviu, tamén, para poñer en contacto ao concello co sector “que era unha necesidade que ao longo destes anos non se tiña conseguido plasmar”.

            A responsable da Concellería de Turismo ten moi claro que o futuro do turismo local pasa pola colaboración mutua entre o sector que vive do turismo e o concello.

            Aínda que non estiveron presentes todos os restaurantes, si se presentou un importante número deles. O resultado foi iniciar a creación dunha comisión, constituída por una representación da restauración e a empresa de catamaráns, coa participación do concello, a través da Concellaría de Turismo, como ente de mediación e de impulso desta iniciativa que permita elaborar un paquete turístico, e que Magallanes Álvarez considerou necesario como primeiro paso “porque hai que empezar a traballar en publicitacións conxuntas; realización de actos que permitan crear unha semana gastronómica, e outras iniciativas que xurdan, para dinamizar o sector do turismo local que está un pouquiño parado”.

Venres, 25 de xaneiro de 2008

Ás 20.00h, sesión Ordinaria da Corporación da Guarda con nove puntos na Orde do Día

            A Corporación da Guarda celebra, hoxe, Sesión Ordinaria do Pleno con nove puntos na Orde do Día, que comezarán a discutirse ás oito da noite.

            1. Aprobación da acta da sesión anterior (ord. 30/11/07); 2. Dar conta de decretos e ordes de pago.3. Proposta da Alcaldía para a posta a disposición de terreos á Consellería de Medio Rural (Mellora das infraestructuras de abastecemento en Outeiro e saneamento en Castiñeira); 4. Dar conta do convenio de  colaboración entre a Fundación para o fomento da calidade industrial e o desenvolvemento tecnolóxico de Galicia e o concello da Guarda para o proxecto da “Rede de dinamización da sociedade da información en Galicia”; r. Ratificación do acordo da xunta de goberno local de 30 novembro de 2007 correspondente ao programa operativo rexional  de Galicia (FEDER); 6. Proposta da Alcaldía de adhesión ao Proxecto desenvolvemento sostible “Axenda 21 local”; 7. Aplicación dende xaneiro do 2008 das novas retribucións que se contemplan no proxecto de orzamento xeral do concello para o persoal; 8. Orzamento 2008; 9. Mocións. Do BNG: sobre os orzamentos da Deputación de Pontevedra; do Partido Popular: Sobre medidas para o sector pesqueiro da Guarda; do BNG: Sobre a prestación eficaz do servizo de correos, Sobre colocación de varandas, e Sobre o transporte colectivo do concello da Guarda;9. Rogos e preguntas.

Venres, 25 de xaneiro de 2008

Cinemas Dixitais inicia o segundo ciclo de proxeccións na Guarda

Hoxe, día 25 de xaneiro, comeza a segunda  parte das proxeccións cinematográficas no  Centro  Cultural da Guarda.

Segundo adiantou a Concellaría que dirixe Antonio Lomba Baz, as proxeccións previstas seguirán o seguinte calendario: A  Atlántida, o venres, 25 de xaneiro; Condenado a vivir, o 8 de febreiro; Jalisco, o 15 d e febreiro; Mentíndolle  á  vida, o 22 de febreiro; Pataghorobi, o 29 de febreiro; Secuestrados en Xeorxia, o 7 de marzo, e Autopsia, o 14 de marzo.

Todas as proxeccións comezarán ás nove da noite.