|
|
XULLO |
Martes, 31 de xullo de 2007
Carmen Adán comprometeuse a dotar a Tomiño dunha nova galescola e un servicio de atención á muller nos orzamentos de 2008
A Secretaria Xeral de Igualdade, Carme Adán, entrevistouse onte a mediodía coa Alcaldesa de Tomiño, Sandra González, no marco da visita institucional que realizou a este municipio.
Carmen Adán asumiu neste encontro o compromiso de incluír nos orzamentos de 2008 a partida necesaria para dotar a Tomiño dunha nova galescola, para atención de nenos de 0 a 3 anos, que posiblemente se emprazará en Goián. Ao tempo tamén adquiriu o compromiso de establecer no municipio un punto de información á muller, xa que esta foi outra das demandas da Alcaldesa, quen explicou que ata o momento o concello carece deste servizo que si está a rexistrar demanda e que considera necesario ante os casos de malos tratos ou ordes de afastamento que existen no municipio.
Sábado, 28 de xullo de 2007
I Festa Solidaria Galega co Pobo Saharauí en Tomiño
O Pavillón Municipal de Tomiño acolle hoxe, sábado, ás cinco da tarde a I Festa Solidaria Galega co Pobo Saharauí. Haberá actuacións de magos, dj’s, malabaristas, x4 espectáculos, espuma, inchables e baile. Teñen a colaboración da Concellería de Cultura de Tomiño.
Festas en Carregal
En Carregal, Tomiño, celébranse festas esta fin de semana. Hoxe sábado a verbena será con Solara e Amadeus, e mañá domingo pecharán a última verbena Estrella e Supremos.
Festas de San Campio de Lonxe en Figueiró
Esta fin de semana celébranse festas na honra a San Campio de Lonxe en Figueiró que comezaron xa onte. Hoxe, ás dez da mañá, a Agrupación Musical de Goián fará un pasarrúas, e a verbena da noite estará amenizada por Lamas e Embajadores. O domingo a mañá haberá un pasarrúas do Ateneo Musical de Bembrive, quen actuará tamén na verbena xunto á orquestra 5ª Avenida. Ás 12 da noite actuará o humorista Farruco.
Venres, 27 de xullo de 2007
A Coral Casablanca actúa hoxe en Goián
Hoxe, venres, ás 21.30h actuará na Igrexa de Goián a Coral Casablanca do Círculo Mercantil de Vigo, dentro da programación que organiza a Concellería de Cultura de Tomiño.
Esta masa coral está a celebrar os seus cincuenta anos cunha longa relación de premios, tanto a nivel estatal como internacional, sendo a coral máis laureda de Galicia.
Nestes 50 anos de vida a coral actuou en diferentes puntos de España, e levou a súa música a grandes cidades europeas como Bruxelas ou Estrasburgo. A Coral Casabranca posúe numerosas gravacións discográficas en colaboración coa orquestra que habitualmente lles acompaña e que está integrada por profesoras e profesores procedentes de Letonia, Lituania, Chequia, Cuba, Rusia, Portugal e Moldavia, e galegos.
Está dirixida polo vigués Óscar Villar Díaz.
A Orquestra Sinfónica de Acordeóns de Bilbao presenta en Tomiño un avance do seu novo disco
A Orquestra sinfónica de Acordeóns de Bilbao presentará este domingo, no Auditorio Municipal de Goián, ás 21.00h, un avance do seu novo disco “...E de leste a oeste”. Este concerto forma parte da programación Cultural da Concellería de Cultura e conta coa colaboración de Caixanova.
A Orquestra Sinfónica de Acordeóns de Bilbao, fundada no ano 1963 chega a Tomiño no marco da súa xira 2007 por Galicia.
No concerto, de hora e media de duración, interpretarán Negra Sombra de Xose Montes; o pasodobre Ponteareas de Reveriano Soutullo ou o intermedio da Lenda do Bico tamén de Soutullo e Juan Vert.
Tamén haberá a oportunidade de escoitar outras coñecidísimas composicións como "Auga, azucarillos e augardente", de Federico Chueca, ou os temas de Pablo Sorozábal, e Carmen de Bizet, entre outros.
Mércores, 25 de xullo de 2007
Festas en Carregal
En Carregal, Tomiño, celébranse festas esta fin de semana. O venres a verbena estará amenizada por Embajadores e Avenida. O sábado a verbena será con Solara e Amadeus, e o domingo pecharán a última verbena Estrella e Supremos.
Martes, 24 de xullo de 2007
O Concello de Tomiño aposta pola compostaxe doméstica
O concello de Tomiño será pioneiro no Baixo Miño na compostaxe doméstica . O goberno tomiñés informa da intención de implantar o vindeiro ano un sistema de promoción da compostaxe no fogar.
O concelleiro de Medio Ambiente, Santiago Vergara, di que este tipo de iniciativas “conseguen aforrar en grande medida o gasto que os concellos afrontan para o tratamento dos residuos, e dar pasos importantes no obxectivo de reducir, reciclar e reutilizar”. A medida consistiría, ademais dunha campaña informativa, na distribución de composteiras nos fogares, para que a materia orgánica se deposite nelas e deste modo se produza o compós, de gran utilidade como fertilizante da terra.
Na mellora do servizo, o edil anuncia que para o vindeiro mes de agosto empezará a funcionar en Tomiño un punto controlado de baleirado de fosas sépticas que posibilitará que un gran número de vivendas de Tomiño cumpran a lexislación medioambiental a este respecto. Asemade tamén anuncia unha campaña de control de vertidos ilegais deste tipo de residuos, e ofrece os teléfonos do concello para calquera dúbida que puidera producirse sobre o novo servizo.
A alcaldesa, Sandra González, manifesta o compromiso do goberno tomiñés coa reciclaxe, como se demostra en medidas como esta. Respecto das intencións da Consellería de Medio Ambiente de crear varias plantas de compostaxe na provincia, Sandra González comunica que o goberno tomiñés non se ten pronunciado sobre o posible emprazamento dunha planta na comarca, xa que non hai ningunha información relativa ás zonas concretas onde se colocarían estas instalacións por parte da Consellería. En todo caso a alcaldesa comunica que unha acción deste tipo sería estudada con moita cautela chegado o caso.
Día da música portuguesa na Semana Cultural de San Campio
Continua a Semana Cultural de San Campio. Hoxe é o Día da Música Galego-Portuguesa e a partir das 22h actuarán os bombos de Sao Tiago de Sopo de Cerveira, o Rancho folclórico Infantil de Gondarem de Cerveira, o Grupo de música tradicional Galega de Valadares.
Mañá mércores, día 25, festivo, penúltimo día da Semana Cultural, celebrarase a partir das 19.00h a Festa do Socio coa animación da charanga os Charanjeiros do Rosal, ás 22h actuarán os grupos da AA.VV. Fonte dos Carreiros de Figueiró, Grupo de aerobic mixto, Grupo de Aerobic “Bailas Moza?” e Grupo de bailes de salón.
A Semana Cultural rematará o xoves día 26 co Día dos Veciños e a actuación do Mariachi Internacional Mexicano “Garibaldi” a partir das 22h.
O Delegado de Medio Rural reúnese cos afectados pola parcelaria en Tomiño
O Delegado Provincial da Consellería de Medio Rural, Gonzalo Constela, manterá esta mañá unha xuntanza cos propietarios dos terreos afectados pola concentración parcelaria de Estás-Goián-Figueiró. O obxectivo é informarlles do próximo paso no proceso da parcelaria. A cita é ás 11 desta mañá no Centro Goianés
Luns, 23 de xullo de 2007
Sesión de educación vial para alumnos da escola infantil “Buxaina” de Tomiño
A escola infantil "Buxaina", do Concello de Tomiño, organizou o pasado venres, día 20, unha sesión de educación vial para os seus alumnos con idades comprendidas entre os 0 e os 3 anos, como remate da quincena dedicada a actividades deste tipo. A clase práctica foi impartida polo cabo da policía local, José Ramón Álvarez Riveiro, e contou coa presencia da alcaldesa de Tomiño, Sandra González, e o concelleiro de seguridade e tráfico, Carlos Encisa. Ademais da identificación dos sinais máis habituais, o cabo da policía local falou da importancia do uso do cinturón de seguridade e dos adaptadores para nenos nos coches. Finalmente os nenos puderon coñecer en vivo o coche patrulla da policía local, e se repartiron uns carnés acreditativos da sesión, no que aparecía a foto de cada neno.
A escola infantil municipal "Buxaina", dirixida por Ana Mª García Carnero, organiza ao longo do ano diversas actividades temáticas para os seus alumnos. Nesta ocasión, organizouse esta actividade porque segundo di a directora "se ten detectado que todavía non se xeralizou o uso do cinturón de seguridade cos nenos que acuden ó noso centro".
Sábado, 21 de xullo de 2007
Prosegue a Semana Cultural de San Campio
Na Semana Cultural de San Campio hoxe sábado estará dedicado á Música Folk galega, e ás dez da noite os grupos Deixandar do Rosal e Na Revolta da Guarda protagonizarán o Festival da música folk do Baixo Miño .
Os nenos terán o seu día mañá domingo, cando a partir das 7 da tarde poderán disfrutar coa actuación do Mago Antón.
Os actos continuarán ata o próximo xoves.
I Romaría na beira do Miño en Sobrada
A AAVV de Veciños de Sobrada organiza para este domingo, día 22, a I Romaría na beira do Miño. Comezará ás 12 do mediodía e prolongarase ao longo da xornada. Haberá actuacións de Grupos de pandereteiras e gaitas da parroquia, Xantar campestre, e xogos populares e baile. O obxectivo é propiciar unha xornada de encontro e confraternidade entre os veciños.
Venres, 20 de xullo de 2007
Piñeiro celebra este domingo a XII Romaría do Cabalo
Por mor do mal tempo tivo que ser aprazada para este domingo a XII Romaría do Cabalo que se ía celebrar a fin de semana pasada en Piñeiro.
A cita, segundo informaban dende a Asociación Cultural e de Festas de San Lorenzo de Piñeiro, organizadora do evento, será pois o domingo. Contan coa colaboración da Comunidade de Montes e veciños de Piñeiro.
Ás10.30 realizarase a apertura de inscricións, e pola mañá haberá concurso de saltos, Exhibición de doma, proba técnica e de habilidade. Ao mediodía haberá Xantar campestre, e continuará a actividade pola tarde coa Exhibición de doma, Xincana en paralelo a cabalo, Proba de velocidade, e ás 19.30 entrega de premios e sorteo dun potro. Rematarase cun espectáculo final.
Xoves, 19 de xullo de 2007
Exposición sobre María Mariño
Dende onte e até finais de mes pódese visitar no Campo da Feira, en Tomiño, unha exposición sobre a figura e obra de María Mariño, a quen se lle dedicou o Día das Letras Galegas este ano. A mostra está organizada pola Concellería de Cultura do Concello de Tomiño en colaboración coa Consellería de Cultura e Deporte da Xunta de Galicia.
Encontro dos Pobos en Tomiño
Ao abeiro da programación cultural en Tomiño este domingo, ás 21.30 horas, na praza da Mina, celebrarase o “Encontro dos Pobos”. Está organizado en colaboración co grupo “Do Lusco Fusco” da Guarda. Participarán grupos de baile tradicional procedentes de Andalucía e Bolivia e coa actuación do grupo de gaitas Airiños de Tebra e do Grupo de Baile Virxe do Alivio.
Figueiró inicia este xoves a Semana Cultural de San Campio con pregón a cargo de Jose Font, director da RMT
Hoxe, ás dez da noite, comeza a Semana Cultural de San Campio organizada pola AAVV “Fonte dos Carreiros” de Figueiró. O Director da Radio Municipal de Tui, José Font será o responsable de dar lectura ao pregón e logo actuará o grupo Seixos Albos de Areas.
Mañá venres será o Día da Xuventude e da Integración. Ás 22.00h celebrarase o Festival Fronteirizo de Ronck’n Roll “O son de San Campio 2007” cos grupos Lost Psychotics de Valdoviño, The Tumbitas de Vigo, Alison Bentley de Braga e Green Machine de Barcelos.
A semana cultural continua ata o xoves día 26.
A Alcaldesa de Tomiño e o Concelleiro de Sanidade recibiron a unha representación do pobo saharauí
A alcaldesa de Tomiño, Sandra González, e o concelleiro de Sanidade e Benestar Social, Pablo Baquero, recibiron onte no concello a unha representación dos rapaces e rapazas saharauís e ás súas familias de acollida que un ano máis están neste concello grazas ao traballo da organización Solidariedade Galega co pobo Saharauí, no seu proxecto "Vacacións en paz".
Esta iniciativa desenvolvese dende 1994 propiciando que rapaces de entre 8 e 12 anos que pertencen ao grupo de refuxiados dos campamentos de Tinduf en Arxelia viaxen a Galicia para pasar o verán lonxe das inhóspitas condicións do deserto no que viven.
A Asociación está composta por 100 membros e conta tamén con numerosos simpatizantes pertencentes ás familias de acollida, que soen repetir ano tras ano na acollida de novos rapaces.
Na recepción de onte a alcaldesa manifestou a intención do goberno tomiñés de facer unha aposta por defender e difundir a tarefa desta asociación, así como de solidarizase e reivindicar os dereitos políticos do pobo saharauí.
Por outra banda, Sandra González destacou o importante papel da muller nese pobo, como eixo e soporte da familia e da sociedade saharauí.
Mércores, 18 de xullo de 2007
Figueiró inicia mañá, xoves, a Semana Cultural de San Campio con pregón a cargo de José Font, director da RMT
O Director da Radio Municipal de Tui, José Font, será o responsable de dar lectura ao pregón da Semana Cultural de San Campio que comeza este xoves, ás 20.00h. Ese día, estará dedicado ao emigrante e ao folclore galego, e logo do pregón actuará o grupo Seixos Albos de Areas.
O venres será o Día da Xuventude e da Integración. Ás 22.00h celebrarase o Festival Fronteirizo de Ronck’n Roll “O son de San Campio 2007” cos grupos Lost Psychotics de Valdoviño, The Tumbitas de Vigo, Alison Bentley de Braga e Green Machine de Barcelos.
O sábado estará dedicado á Música Folk galega, e ás dez da noite os grupos Deixandar do Rosal e Na Revolta da Guarda protagonizarán o Festival da música folk do Baixo Miño .
Os nenos terán o seu día o domingo, cando a partir das 19.00h poderán disfrutar coa actuación do Mago Antón.
Xa o luns da próximo semana, día 23, dedicarase a música tradicional universal coa actuación do grupo escola de acordeóns de Valadares. O martes será o Día da Música Galego-Portuguesa e a partir das 22.00h actuarán os bombos de Sao Tiago de Sopo de Cerveira, o Rancho folclórico Infantil de Gondarem de Cerveira, e o Grupo de música tradicional Galega de Valadares.
O mércores día 25, festivo, penúltimo día da Semana Cultural, celebrarase a partir das 19h a Festa do Socio coa animación da charanga os Charanjeiros do Rosal, ás 22h actuarán os grupos da AA.VV Fonte dos Carreiros de Figueiró, Grupo de aerobic mixto, Grupo de Aerobic “Bailas Moza?” e Grupo de bailes de salón.
A Semana Cultural rematará o xoves, día 26, co Día dos Veciños e a actuación do Mariachi Internacional Mexicano “Garibaldi” a partir das 22h,
Estas actividades están organizadas pola AA.VV Fonte dos Carreiros.
Martes, 17 de xullo de 2007
Novo coche para a policía de Tomiño cofinanciado entre a Xunta e o concello
A alcaldesa de Tomiño, Sandra González, recibíu o pasado venres en Santiago de Compostela, un novo vehículo para a policía local, de mans do presidente da Xunta de Galicia, Emilio Pérez Touriño.
O vehículo, un todoterreo marca Ssangyong Actyon, foi mercado entre a Consellería de Presidencia e o Concello de Tomiño, aportando este último 8.900 euros, correspondentes ao 30% do seu valor. Esta subvención fora solicitada polo anterior governo municipal, pero non contaba con respaldo orzamentario, polo que o novo governo presidido por Sandra González estivo a piques de non poder facer fronte á parte correspondente ao concello. Finalmente foi posible conseguir o crédito suficiente para afrontar este gasto.
O Concelleiro de Seguridade, Carlos Encisa, dixo que “o governo anterior pediu a subvención e non se preocupou de reservar no orzamento a parte correspondente, esto é, o 30%, o que contrasta co desembolso feito no 2006 para mercar outro vehículo afrontando ao 100% do seu prezo, a pesares de que son coñecidas polas administracións locais este tipo de subvencións que aforran cartos dos orzamentos municipais.”.
O novo vehículo substituirá a un dos dous cos que conta actualmente a flota da policía local, con máis de 9 anos de antigüidade.
Corrección da información sobre Carlos Encisa ao que atribuímos unha delegación que non ten
Por un erro na elaboración da información, atribuímos a Calos Encisa unha responsabilidade que non ten, xa que lle adxudicamos que "será o xefe de prensa do concello de Tomiño", cando esta figura non se recolle no organigrama do mencionado concello.
Pedimos disculpas por este erro que correximos con esta nota de rectificación.
A tala dunha oliveira centenaria causa malestar entre os veciños de Vilar, en Tomiño
A tala dunha oliveira centenaria que estaba en vía pública, no barrio de Vilar en Tomiño, causou un gran malestar entre os veciños deste lugar, segundo onte manifestaban á Radio Municipal de Tui.
Os veciños denuncian que foron uns novos veciños os que talaron a árbore con máis de cen anos, polo que puxeron os feitos en coñecemento das autoridades. Piden agora que se tomen medidas e se actúe contra as persoas que cortaron a oliveira, para que non se volvan producir feitos coma estes.
A policía local confirmaba os feitos así coma a identificación da persoa que talou a árbore, así coma que o informe correspondente foi transmitido ao Concelleiro de Medio Ambiente, Santiago Vergara. O propio concelleiro explicaba que hoxe mesmo dende o Concello enviarán un oficio á persoa que cortou a árbores para que xustifique documentalmente a tala da mesma, xa que alega que estaba na súa propiedade. Se no prazo de catro días non presenta a documentación precisa o Concello presentará denuncia nos xulgados por estes feitos.
|
Anxo Quintana estará na Festa Nacionalista do Baixo Miño en Goián O BNG organiza a IX Festa Nacionalista do Baixo-Miño o próximo sábado, 21 de xullo, na Alameda de Goián a partir das 20.00 horas. No acto intervirán Anxo Quintana, portavoz nacional do BNG e vicepresidente da Xunta de Galicia; Sandra González, alcaldesa de Tomiño, e Alberte Alonso, Responsábel comarcal do BNG. Na alameda haberá un espazo adicado a actividades para nenos e nenas e diversos postos de comidas (polbo a feira, churrasco, filloas a pedra). A partir das 11 da noite, a parte musical estará animada polo grupo Festicultores Troupe. |
Sábado, 14 de xullo de 2007
A agrupación Musical de Goián despide cun concerto ao que foi Director fundado durante 13 anos
Hoxe, sábado, ás 21.30 horas no Auditorio do Multiusos de Goián a Agrupación Musical de Goián ofrecerá un concerto con motivo do IX Aniversario desta banda de música.
Neste concerto a Agrupación Musical de Goián despedirá ao que foi o seu director, Xoán Carlos Díaz Álvarez, que dirixiu a banda de música como Director fundador, dende xaneiro de 1994 ata abril do 2007. A Xunta Directiva da Agrupación Musical desexa agradecer a Xoán Carlos, o seu esforzo que conseguiu en pouco tempo facer unha gran banda de música. Ao mesmo tempo váiselle dar a benvida ao novo director Cesar Núñez Pérez.
Número premiado nas Festas de San Bieito en Vilameán
A Comisión de Festas de San Bieito de Vilaméan informa que o número premiado no sorteo que realizaron foi o 6.837.
Venres, 13 de xullo de 2007
Para o Partido Popular as dedicacións exclusivas en tomiño representan un verdadeiro “asalto” ás arcas municipais
O Partido Popular cualifica de “auténtico fraude e tomadura de pelo ós cidadáns” a aprobación por parte do actual grupo de goberno de seis adicacións exclusivas propostas pola actual alcaldesa do BNG Sandra González Álvarez e aprobadas no pasado Pleno.
O gasto total destas seis adicacións vai a supoñer ó Concello un custe anual de 260.000 € (43 millóns das antigas pesetas) fronte ós 108.000 € (18 millóns de pesetas ) da anterior corporación, o que vén a significar un incremento de 25 millóns de pesetas.
Para o grupo municipal do Partido Popular isto representa un verdadeiro “asalto” ás arcas municipais e é unha primeira mostra do cinismo ou dobre linguaxe da alcaldesa e do BNG que esixen austeridade no gasto cando están na oposición pero que cando teñen acceso ó sillón fan uso do seu poder de decisión tomando deste xeito a súa primeira “idea innovadora” incrementando o gasto en adicacións exclusivas nun 140%, o que lle vai supor unha importante limitación ó Concello en inversións futuras tanto en temas sociais e educativos, como en infraestruturas.
Para o grupo municipal do Partido Popular a primeira “mostra de firmeza” da alcaldesa foi ceder ás presións dos seus socios (PSOE e CdT) para que lle permitiran o acceso ó sillón da Alcaldía.
Non cabe outra explicación cando se conceden adicacións a concelleiros que van a ostentar unha única delegación e noutros casos compartila.
A concellalía de Cultura oferta teatro, música, exposicións, danza e baile
A Concellalía de Cultura, Educación e Participación Veciñal fai pública a programación de actos para os meses de xullo e agosto:
O próximo 14 de xullo, ás 20.00 horas, na Casa da Cultura, terá lugar unha exhibición de danza a cargo da School Dance de Baiona.
Do 18 ó 31 de xullo, en colaboración coa Consellería de Cultura e Deporte da Xunta de Galicia, no Campo da Feira, terá lugar unha exposición sobre a persoa e obra de María Mariño, muller á que se adicou este ano o día das letras galegas.
O día 22 de xullo, ás 21.30 horas, na praza da Mina, en colaboración co grupo “Do Lusco Fusco” da Guarda terá lugar o “Encontro dos Pobos”, coa participación de diferentes grupos de baile tradicional procedentes de Andalucía e Bolivia e coa actuación do grupo de gaitas Airiños de Tebra e do Grupo de Baile Virxe do Alivio.
O día 27 de xullo, ás 20.00 horas, na igrexa de Goián esta prevista a actuación da Coral Casablanca, composta por cerca de 100 voces e de recoñecido prestixio internacional.
O día 29 de xullo, ás 21.30 horas, en colaboración con Caixonova, no auditorio de Goián, terá lugar a actuación da Orquestra Sinfónica de Acordeóns de Bilbao.
O día 10 de agosto, ás 22.30 horas, no mesmo Auditorio, nesta ocasión en colaboración coa Consellería de Cultura e Deporte, terá lugar unha exhibición de Tango Arxentino.
O día 14 na Praza do Seixo de Tomiño e o día 22 na Praza da Igrexa de Goián, a partir das 22.00 horas, en colaboración con Caixanova proxección de Cine na Rúa (A Incrible Historia de Caperucita e Scoop, a derradeira película de Woody Allen).
O 24 de agosto péchase esta programación no Auditorio de Goián, a partir das 22.30 horas, coa obra de teatro “O Avaro de Molière”, a cargo do Grupo Galileo, tamén en colaboración coa Consellería de Cultura e Deporte da Xunta de Galicia.
Segundo o Concelleiro de Cultura, Educación e Participación Veciñal, Jesús Castiñeira, trátase de ofrecer unha oferta variada que incide nos distintos xéneros, co que se pretende dar un pulo ó arte e a cultura tradicional sen esquecer as interpretacións clásicas. Esta programación completarase cunha serie de colaboracións puntuais nas distintas parroquias no marco das celebracións patronais con grupos de música e baile tradicional nalgúns casos e actividades de animación para nenos noutros.
Xoves, 12 de xullo de 2007
Piñeiro celebra este domingo a XII Romaría do Cabalo
Este domingo, dende ás 10.30 da mañá, celébrase en Piñeiro a XII Romaría do Cabalo organizada pola Asociación Cultural e de Festas de San Lorenzo de Piñeiro coa colaboración da Comunidade de Montes e veciños de Piñeiro.
Ás10.30 realizarase a apertura de inscricións, e pola mañá haberá concurso de saltos, Exhibición de doma, proba técnica e de habilidade. Ao mediodía haberá Xantar campestre, e continuará a actividade pola tarde coa Exhibición de doma, Xincana en paralelo a cabalo, Proba de velocidade, e ás 19.30 entrega de premios e sorteo dun potro. Rematarase cun espectáculo final
Mércores, 11 de xullo de 2007
Tomiño solicitará a Medio Ambiente o saneamento integral do Furnia
O Concello de Tomiño vaise dirixir á Consellería de Medio Ambiente para solicitar un proxecto de saneamento do Río Furnia, co obxectivo de que este río sega a ter as augas limpas, e non se estraguen con saneamentos parciais. Así o acordou onte o pleno de Tomiño, segundo explicaba a Alcaldesa, Sandra González, quen incidía en que a proposta é levar o saneamento a EDAR de Guillarei, co que se consegue un dobre obxectivo, dunha banda manter o Furnia no seu estado actual, e doutra darlle máis caudal á EDAR e que así poida entrar xa en funcionamento.
Sandra González amosou amais a súa disposición a falar co outro concello implicado no saneamento do Furnia, o concello de Tui, e abordar o proxecto de xeito conxunto. Puntualizaba iso sí que non se lles pode pedir que fagan en 14 días o que o anterior goberno non fixo en 14 anos.
A Alcaldesa de Tomiño explicaba tamén que na moción que presentaron para o saneamento do Furnia está de fondo un tema mías amplo coma o saneamento de todo o Concello que será unha prioridade para o goberno tomiñés, xa que lamentaba que o 80% do concello careza de saneamento.
No pleno de onte acordábase tamén a periodicidade das sesións plenarias. Até finais de ano será cada dous meses os venres ás oito da tarde, e xa a partir do ano que vén terán lugar cada mes. Sandra González explicaba que ao estar traballando cos orzamentos do anterior equipo de goberno, que “xa rompeu a bolsa” no capítulo de investimentos e vías e obras. O ano que vén a nova dinámica municipal terá contidos suficientes para convocar un pleno por mes.
Onte amais designábase a Sandra González coma representante do concello de Tomiño na Mancomunidade do Baixo Miño, e a Jesús Castiñeira coma suplente. Mentres que Santiago Vergara, concelleiro de Medio Ambiente, será o representante no Consorcio contra incendios do Baixo Miño.
A Plataforma en Defensa do río Furnia felicítase polo acordo do pleno de Tomiño
A Plataforma en Defensa do río Furnia vén de amosar nun comunicado a súa satisfacción polo acordo adoptado esta semana polo pleno de Tomiño que din “encamiña a solución do saneamento integral do río Furnia” pola vía da Consellería de Medio Ambiente.
Lembran dende este colectivo que hai dous meses o Concello de Tui tomara unha decisión similar, polo que sinalan que entre ambas institucións “Axudan a arredar o perigo que para a pureza das augas do río e o valor dos eidos cercanos representaban as dúas minidepuradoras que se pretendían instalar na parroquia de Pexegueiro”.
Sinalaba por último dende a Plataforma que resta que os dous concello actúen con “dilixencia” procurando que os orzamentos da Xunta para 2008 recollan a redacción deste proxecto. E sinalan que hai uns meses na visita a Tui o Conselleiro de Medio Ambiente manifestouse interesados por este tema e disposto a consideralo.
Martes, 10 de xullo de 2007
ADETO comeza hoxe as actividades de verán
Hoxe, ás dez da mañá, comezan as actividades de verán organizada para os meses de xullo e agosto pola Asociación de Comerciantes de Tomiño, ADETO. Van ter lugar no campo da feira. Serán os martes e xoves até o 23 de agosto, de 10 a 14. Débese ter un mínimo de 6 anos.
Belén Alonso, presidenta de ADETO destacaba que necesita a participación da xente nestas actividades, e animaba tamén a que lles fagan suxestións para os próximos anos.
Sábado, 7 de xullo de 2007
ADETO fai hoxe sábado exhibicións das actividades que impartirá este verán
A Asociación de Comerciantes de Tomiño, ADETO, realiza hoxe a presentación dunha serie de actividades con exhibicións da mesmas, coma anticipo da programación que vai pór en marcha este verán.
Mañá no Campo da Feira, de 4 a 9, haberá un Campionato de Xadrez entre os equipos Info Tui e Albatros da Guarda.
Na praza da Mina a partir das 9 da noite haberá exhibición de Break-Dance, Hip-hop, Aerobic, Step e danza oriental.
Serán en Amorín hoxe sábado
Hoxe, ás once da noite, terá lugar un serán na ribeira do río en Amorín. Haberá grupos de música tradicional galega e portuguesa. Os interesados pódense inscribir no teléfono 618.717.179. Esta actividade está organizada pola Comisión de Festas e Amigos da Carrozas de Amorín.
Pablo Baquero reuniuse co Delegado de Vicepresidencia e Igualdade ao asumir a Concellería de Benestar Social en Tomiño
Pablo Baquero Álvarez, que asumirá a Concellería de Benestar Social por Centristas de Tomiño (CdT), reuniuse onte co Delegado da Consellería de Igualdade e Benestar Social para tratar distintos temas que preocupan ao goberno municipal.
Na orde do día, entre outros asuntos, estudouse a integración do Concello de Tomiño no Consorcio Galego de Igualdade e Benestar, algo que agardan facer nas próximas semanas.
Tamén se espuxo, como asuntos prioritarios, a creación dun Centro de Día e unha segunda gardería municipal, que contarían co cofinanciamento da Xunta de Galicia e cuxas obras poderían iniciarse o próximo ano.
Segundo Baquero o Concello de Tomiño analizará este mesmo mes as localizacións destas instalacións. A Gardería instalarase, en principio, en Goián e o Centro de Día nas proximidades de Tomiño, aínda que, neste último caso, dependerá do informe técnico correspondente.
O mesmo Concelleiro valorou positivamente a actitude da Xunta que cualificou de “sintonía plena”, considerando que o encontro superou as expectativas inicialmente previstas.
Por outra banda, esta mesma semana tamén desde a Concellería de
Benestar empezáronse a estudar as distintas solicitudes realizadas polos veciños
interesados en acollerse, a través do Concello, ás axudas de Infravivenda Rural,
cuxo prazo, para este exercicio, termina o próximo 31 de agosto.
Neste senso volverase a reabrir o
expediente que trata de solucionar o problema de vivenda que padecen dous irmáns
de Currás, que actualmente viven nunha caravana, aínda que é posible que non se
poida pechar de todo o asunto, segundo Baquero, ata que se dea forma ao Fondo
de Inclusión social que o goberno municipal pretende crear antes
de finalizar o ano e que vai destinado a afrontar, coa celeridade oportuna,
calquera situación de urxencia que non se poida resolverse a través dos actuais
instrumentos ou liñas de axuda.
Pleno o luns en Tomiño para fixar as delegacións e retribucións do equipo de goberno
A corporación municipal de Tomiño reunirase o próximo luns, ás 8 da tarde, en pleno de carácter extraordinario para tratar 7 puntos na orde do día referidos principalmente á establecer as delegacións e as retribucións do equipo de goberno.
A orde do día é a seguinte: Dar conta da constitución e funcionamento da xunta de goberno local; Dedicacións exclusivas; Nomeamentos de tenente alcalde e delegacións; Proposta da periodicidade de sesións do pleno e composición das comisións informativas; Designación de membros deste concello na mancomunidade; Designación dos representantes no consorcio contra incendios e salvamento; Actas de arqueo de marzo a maio do 2007.
Neste pleno darase conta das seis dedicacións exclusivas que haberá para a Alcaldesa Sandra González que cobrará 14 pagas de 2.082 euros, ao igual que o primeiro tenente de Alcalde, Jesús Castiñeira. Santiago Vergara, concelleiro de Medio Ambiente percibirá 1.938 euros, e os concelleiros Uxío Benitez, Xaquín Villadangos e Pablo Baquero 1,736 euros.
Mentres as asistencias a plenos e comisións fíxanse en 180 euros.
En canto ás Delegacións nos concelleiros son as seguintes:
Os concelleiros do BNG:
Uxío Benítez é o Concelleiro Delegado de Urbanismo e Patrimonio.
Xaquín Villadangos é o Concelleiro de Promoción Económica e Xuventude.(AD)
Francisco Campo é o Concelleiro de Obras e Acción Rural.
Os edís de CdT
Jesús Castiñeira Diz é o Concelleiro de Cultura, Educación e Participación Veciñal.
Pablo Baquero, Concelleiro de Sanidade e Benestar Social.
Fernando Álvarez, Concelleiro de Lecer e Deportes.
Os do PSOE:
Santiago Vergara; Concelleiro de Medio Ambiente
Carlos Encisa; Concelleiro de Seguridade, Tráfico e Transporte.
A Alcaldesa Sandra González levará directamente Igualdade e Política Lingüística.
Venres, 6 de xullo de 2007
Festa de Homenaxe aos maiores en Currás, Tomiño
A Asociación de Veciños de Currás, en Tomiño, organiza para este domingo unha Festa de Homenaxe aos maiores. Haberá polbo, empanada e carne ao caldeiro. A partir das seis da tarde haberá un bingo.
A Delegada de Industria realiza unha visita oficial ao Concello de Tomiño
A Delegada Provincial da Consellería de Innovación e Industria, Montserrat Prado Cores, realiza ás 11.30h desta mañá unha visita oficial ao Concello de Tomiño, onde será recibida pola Alcaldesa, Sandra González.
Xoves, 5 de xullo de 2007
Festas de San Bieito das Marabillas en Areas-Sobrada
Este domingo nas Marabillas, entre Areas en Tui e Sobrada en Tomiño, celébranse festas na honra a San Bieito.
Dende ás dez da mañá terá lugar a Festa gastronómica da Empanada Caseira. No recinto da capela celebrarase á unha misa solemne. E pola noite actuará un grupo musical. Non faltarán tampouco as tradicionais poxas.
O mércores día 11, día de San Bieito, ás 12.30h haberá misa na honra a San Bieito. E a noite verbena con Mar Azul e Niebla.
Festas na honra a San Bieito en Vilameán, Tomiño
O mércores da próxima semana, o día 11, celébranse en Vilameán Festas na honra a San Bieito.
Comezará á unha do mediodía con misa solemne, actuando a continuación o grupo Brisas de Tomiño. Pola noite amenizarán a verbena Brisas e a orquestra Salsa Rosa.
Mércores, 4 de xullo de 2007
Diversos roubos rexistráronse a pasada noite en Tomiño
A policía Local de Tomiño e as forzas de seguridade afánanse na localización dun vehículo todo terreo marca Sanyón de cor negro e matrícula 5225DHT que foi roubado a pasada noite no centro de Tomiño, empregándose para facer unha alunizaxe nun establecemento comercial, dándose posteriormente os ladróns á fuga.
Os feitos aconteceron entre ás 12.30 da noite e as 5 da madruga, e amais do coche, os ladróns entraron tamén noutros 3 ou 4 vehículos roubando obxectos no seu interior. Amais no establecemento onde romperon a luna do escaparate roubaron diverso material de electrónica valorado entre 12 e 20 mil euros.
O feito de que o todo terreo roubado tivese pouco combustible, fai pensar que puido ser abandonado nos municipios do arredor ou mesmo en Portugal. Atopalo podería dar máis pistas para dar cos autores dos diversos roubos rexistrados en Tomiño, segundo informa a Policía Local de Tomiño.