|
|
Xoves, 8 de xullo de 2010 Goián celebra o XX Aniversario das Trincadeiras A Comunidade de Montes de Goián vai celebrar o sábado 17 de xullo o vinte aniversario da Defensa das Trincadeiras, e con este motivo van facer amais unha sardiñada. Por iso lembran a todos os veciños que desexen asistir que se teñen que anotar ata este sábado día 10 nos comercios de Marga e Martín en Goián.
Mércores, 7 de xullo de 2010 O IVº Triatlo da Amizade celebrarase o domingo 11 de xullo entre Vila Nova de Cerveira e Tomiño Onte, 6 de xullo, ás 12.00 do mediodía tivo lugar na Biblioteca Municipal de Vila Nova de Cerveira o acto de presentación do IVº Triatlo da Amizade que se celebrará o domingo 11 de xullo entre as localidades fronteirizas de Vila Nova de Cerveira e Tomiño. Esta proba deportiva conta coa colaboración da Concellería de Deportes e Lecer do Concello de Tomiño, a Câmara Municipal de Vila Nova de Cerveira e as Federecións de Triatlón de Galicia e Portugal. A proba, na que os atletas terán que nadar 750 metros, andar en bici case 20 km e correr 5 km, comezará ás 17.00 horas (16.00 hs. hora portuguesa) con saída dende o cais de Vila Nova de Cerveira. Como novidade deste ano, celebrarase o mesmo día un triatlo para categorías menores, con probas adaptadas ás idades dos participantes. Este certame comezará ás 11.45 horas (unha hora menos en Portugal) cun circuíto diferente. A organización establece tres categorías; Alevín (11 e 12 anos); Infantil (13 e 14 anos) e Cadete (15 e 16 anos). As distancias serán para os primeiros de 100 metros de natación, 5 km. de bici e 1 km. de carreira. Os infantís deberán nadar 300 metros, andar en bici 10 km e correr 2 km., e os cadetes terán que facer 500 metros de natación, 12,5 km. de bici e 3 km. de carreira. No acto de presentación participaron Sandra González e Fernando Álvarez, alcaldesa e o concelleiro de deportes do Concello de Tomiño, Jose Manuel Carpinteira, presidente da Cámara de Vila Nova de Cerveira, e os representantes das Federacións galega e portuguesa de triatlón. Fernando Álvarez, concelleiro de deportes do Concello de Tomiño, destacou, ao igual que os outros membros da mesa, “a importancia desta proba deportiva que transcorre en plena fronteira e que, como o seu propio nome indica, ademais da competitividade deportiva pretende fomentar o achegamento e colaboración entre institucións e persoas de ámbalas beiras do Miño”.
Os Socialistas de Tomiño lamentan e rexeitan a actitude do PP no Pleno Municipal A Agrupación Socialista de Tomiño lamenta profundamente a actitude que adoptou o PP, a través da súa voceira, no transcurso do Pleno Municipal celebrado o pasado luns. Violeta de Santiago Moure, secretaria de Política Municipal do PSdG-PSOE, manifesta a súa perplexidade e incredulidade ante a negativa reiterada de Esperanza Calzado a apoiar unha moción do Goberno Municipal, na que se insta á Xunta de Galicia a non paralizar o proxecto do parque empresarial de Tomiño. Os argumentos esgrimidos para defender a súa postura, non se poden calificar máis que de infantís e demagóxicos, din os socialistas, posto que alegaron a falta de tempo para poder ler o documento. Ante esta actitude inexplicable, as demais forzas políticas intentaron que rectificase ofrecéndolle un receso e remataron por cambiar a totalidade do texto por unha sinxela frase, que, engaden desde a formación do PSdeG, ata un neno de tres anos entendería perfectamente “o concello de Tomiño insta á Xunta de Galicia a non paralizar o parque empresarial de Tomiño” Aínda así o Partido Popular continuou na súa postura e rematou absténdose para que este proxecto de vital importancia para Tomiño sexa unha realidade. Violeta de Santiago coida que o PP deixou en evidencia que non lle preocupa o máis mínimo o interese xeral das tomiñesas e tomiñeses, que os obxectivos que persiguen céntranse única e exclusivamente nos procesos de fusión que están levando a cabo e que a Louzán non se lle escape o sillón da Deputación. Para os socialistas quedou demostrado que a voceira Popular obedece á voz “do seu amo”, ao ser incapaz de tomar unha decisión sen consultar ós seus asesores, que son, conclúen, os que sistemáticamente anulan e paralizan proxectos estratégicos para o Concello.
Luns, 5 de xullo de 2010 Non prospera unha proposta non de lei do PSdG-PSOE para crear un distintivo de calidade para o meixón, lamprea e sábalo do Baixo Miño O pasado 25 de xuño foi debatida en comisión parlamentaria unha proposta non de lei do PSdG-PSOE para crear un distintivo de calidade que identifique os produtos da pesca non Baixo Miño, concretamente meixón, lamprea e sábalo. A deputada socialista, Carmen Gallego, sinalou na súa exposición que na actualidade 250 persoas teñen na pesca fluvial un complemento para as súas economías e nalgún caso, obteñen a totalidade dos seus ingresos dunha actividade que ten un volume de negocio de 3 millóns de euros ao ano. Na proposta socialista incluíase a redacción dun estudo previo que aportara datos sobre características das especies, a súa comercialización e outros factores que puidesen influír na actividade. A pesar de que a proposta foi feita con vocación de consenso, aceptando o PSdG-PSOE dúas emendas do BNG, o Partido Popular votou en contra polo que a proposición non de lei foi desestimada O portavoz socialista de Tomiño, Santiago Vergara, lamentou que o Partido Popular impedise, unha vez máis, unha opción de desenvolvemento económico para o Baixo Miño: “Un distintivo de calidade axudaría aos nosos produtos a posicionarse mellor nun mercado no que se están a introducir lampreas doutras rexións. Ademais tería unha influencia moi positiva sobre a hostalería da zona, poidendo ser un factor dinamizador da economía do Baixo Miño.
Sábado, 3 de xullo de 2010 O concello de Tomiño organiza xornadas festivas e lúdicas na Praza da Mina Desde que hai un ano foron acometidas as obras de humanización da Praza da Mina, os comerciantes de Tomiño mostraron grande interese por visibilizar e poñer en valor as diversas actividades comerciais desenvolvidas nesta zona así como as súas futuras potencialidades. Coa finalidade de respaldar ao tecido comercial neste seu esforzo, o concello de Tomiño, en colaboración con ADETO, organiza ao longo desta fin de semana na propia Praza da Mina unhas xornadas nas que terán lugar diferentes actuacións e actividades de caracter lúdico e festivo. O sábado, día 3, ás 11.30 horas, a Treboada Baixo Miño percorrerá as rúas anexas á praza. Ás 20.00 horas a actuación infantil de “Roi o Cagabolas” fará as delicias dos pequenos e ás 22.30 horas gran concerto de “Los gatos y el sexo” e “Mr. Whiz”. O domingo 4, segunda xornada de celebración, comezará tamén coa Treboada da Muimenta (Sobrada). A partir das 20.30 horas terá lugar a actuación das "Pandereteiras de Estás”. Unha hora despois a Agrupación Musical de Goián ofrecerá un concerto. Durante toda a fin de semana estarán cortadas ao tráfico de vehículos as rúas do Rosal e Buenos Aires, co obxecto de deixar todo o espazo humanizado a disposición dos veciños. Haberá diferentes postos de artesanía, comercio ambulante, polbeiro e outros postos de comida.
Venres, 2 de xullo de 2010 A liña do Noitebús percorrerá por primeira vez todas as parroquias do concello de Tomiño A concellaría de Tráfico do concello de Tomiño anuncia a posta en marcha da liña de transporte nocturno Noitebús durante todos os sábados, desde o 3 de xullo ata o 31 de decembro. Este servizo subvencionado pola Dirección Xeral de Transportes da Xunta de Galicia ofrece unha alternativa de transporte para todas as persoas que desexen realizar desprazamentos nocturnos por motivos de ocio, apostando pola seguridade viaria e a reducción da sinestralidade nas estradas, principalmente entre a xente nova. Esta é a terceira tempada na que o concello de Tomiño dispón desta liña de transporte. Ao longo deste tempo este servizo foi experimentando melloras e ampliacións conforme a demanda existente. Este ano, a liña do Noitebús contará con dúas rutas coas que, por vez primeira, se dará cobertura á totalidade das parroquias de Tomiño beneficiando así a un maior número de persoas. A Ruta-1 sairá de Tebra pasando por Vilameán, Hospital, Taborda, Piñeiro, Sobrada, Torrón, Tomiño (Seixo), Vilar de Matos, Estás, Figueiró e Goián. A Ruta-2 sairá de Pinzás, pasando por Cristelos, Barrantes, Vilachán, Tomiño (Seixo), Vilar de Matos, Estás, Figueiró e Goián. O horario de saída de ambas rutas será ás 23.45 horas, e o regreso desde a Guarda ás 6.00 horas. O prezo do billete do NOITEBÚS é de 2,50 €, ida e volta. Ademais de todos os sábados destes seis meses, a liña do Noitebús funcionará tamén durante a semana das Festas do Monte na Guarda, do luns 9 de agosto ao venres, 14.
Xoves, 1 de xullo de 2010 Tomiño rexistra nos últimos tres meses a maior baixada do paro no Baixo Miño Tomiño é o concello que rexistrou a maior baixada do paro na comarca do Baixo Miño durante os tres últimos meses. Así o corroboran os datos estatísticos publicados pola Consellería de Traballo e Benestar sobre a variación do desemprego. Segundo estes datos, Tomiño é o concello do Baixo Miño que presentou con diferenza unha maior baixada do desemprego, cunha variación do -91 persoas desde o mes de marzo: Nas mesmas datas, o concello de Tui rexistrou +20 persoas; O Rosal -17; A Guarda -15 e Oia -12. Por meses, Tomiño rexistrou unha baixada do -53 en marzo, mentres que en abril houbo unha subida de 36 persoas, volvendo a baixar o desemprego en maio con -74. No concello de Tomiño todos os sectores da economía experimentaron unha notable baixada do paro e en especial o sector servizos, cun total de 41 desempregados menos desde o mes de marzo de 2010. Ademais, 34 persoas empregáronse na construción e o resto na agricultura, pesca e industria. Servizo de Orientación Laboral O Servizo de Orientación Laboral do Concello de Tomiño, dependente da Concellaría de Promoción Económica, atendeu a un centenar de persoas só nos dous últimos meses de funcionamento, das cales xa se insertaron 21. A maioría das persoas que solicitaron axuda para atopar un emprego proceden do sector da construción e da industria e teñen idades comprendidas entre os 35 e os 55 anos. O servizo proporciona información e asesoramento ás persoas desempregadas que se atopan á procura dun novo posto de traballo, guiándoas e tendo en conta por unha parte, o perfil profesional, e por outra, a situación actual do demandante. Concretamente, os técnicos prestan axuda para facer un currículum, unha carta de presentación ou preparar unha entrevista de traballo. Asemade, facilítanse listados de empresas onde acudir, información sobre anuncios de traballo ou sobre cursos de formación impartidos na zona. A maioría das persoas que acoden ao servizo de orientación chegan a el con moita necesidade de traballar, polo que agradecen toda a axuda que se lles poida prestar neste senso. A meirande parte delas teñen poucos recursos formativos, polo que dende o Concello inténtase tamén asesorarlles para mellorar a súa formación a través de posibles cursos e actividades. A alcaldesa de Tomiño, Sandra González Álvarez, salienta sobre este servizo de orientación que “para o goberno local é unha prioridade atender aos veciños e buscarlles saídas laborais e formativas”. Nesta liña enmárcase un novo curso de Graduado en ESO que se organizou con éxito dende o Departamento de Igualdade, o Obradoiro de Emprego que se levou a cabo durante 12 meses, o segundo Plan Experimental de Emprego, ou o curso de Empregado de Oficina que se desenvolve na actualidade cunha duración de 800 horas de formación. As persoas interesadas en conseguir información e orientación poden pedir a súa cita no Concello, ou chamando aos teléfonos 986-622 001/002/003 en horario de mañá (08.00 a 14.00 horas). Tamén poden consultar a páxina web do Concello (www.concellotomino.com), no apartado de “Emprego”, ou escribir un correo electrónico ao enderezo: orientación@concellotomino.com Oficina de Emprego e Desenvolvemento Local O departamento de Emprego do Concello de Tomiño tamén conta coa Oficina de Emprego e Desenvolvemento Local; un departamento que ten coma finalidade facilitar a través da promoción e dinamización, á implantación de novas actividades económicas no municipio. Entre as súas principais funcións pódense destacar as seguintes:
• Información e axuda para a
tramitación de subvencións: para vivendas, pequenos comercios,
artesanía, programas de desenvolvemento rural, etc. |
|
|