Xoves, 15 de xullo de 2010

OAP Galicia organiza xornadas sobre a lei de protección de datos

A Federación de Profesionais e Autónomos de Galicia, OAP GALICIA, co ánimo de manter informados aos seus asociados e en xeral a todos os autónomos e microempresarios do Baixo Miño e Val Miñor organiza unhas xornadas informativas nas localidades de Tui, A Guarda e Nigrán. Estas xornadas van dirixidas a informar a todos os autónomos e microempresas de como lles afecta e qué deben facer para cumprir a lexislación vixente, en canto á protección de datos.

As xornadas realizaranse segundo o seguinte calendario:

Día 19 de xullo          Tui                  Área Panorámica                20.30 horas

Dia 20 de xullo          A Guarda       Salón plenos concello         20.30 horas

Dia 21 de Xullo         Nigrán                        Centro Antena                      20.30 horas

En todas as xornadas estarán presentes representantes da Federación OAP GALICIA, ademais dos técnicos da empresa especializada Norsecurity, que informarán aos presentes sobre o cumprimento da protección de datos. Prevese unha gran afluencia de interesados xa que o non cumprir adecuadamente a lexislación, pode supor sancións desde 600 a 600.000 €.

Festividade da Virxe do Carme en Tui

Este venres celébrase a festividade da Virxe do Carme en Tui organizada pola Comandancia Naval do Miño. Segundo o programa previsto ás sete da tarde celebrarase misa na igrexa de Santo Domingo, ao remate sairá a procesión cara ao embarcadoiro da Comandancia Naval onde a imaxe da patroa dos mariñeiros embarcará no Cabo Fradera e dará inicio a procesión fluvial.

Visita a Tui de 60 alumnos dos cursos organizados pola RAG

Este sábado ás doce menos cuarto do mediodía está prevista á chegada á Catedral de Tui de 60 alumnos que están a participar nos cursos organizados pola Real Academia Galega, o Instituto da Lingua Galega  da USC e a Secretaría Xeral de Política Lingüística da Xunta de Galicia.

Esta actividade académica comezou o pasado 5 de xullo, e na mesma participan máis de 2.200 alumnos de Alemaña, Arxentina, Brasil, Reino Unido, República Checa, Chile, Costa Rica, Croacia, Cuba, Estados Unidos, Finlandia, Francia, Grecia, Hungría, Indonesia e Xapón entre outros países.

Os alumnos que visitarán Tui serán recibidos na Catedral pola Concelleira de Educación, Patricia Ricón, que lles entregará información turística do municipio.

Presentación Programación Cultural

Está xa establecida a programación cultural de Tui para o segundo semestre do ano organizada pola Concellería de Cultura. Estas actividades recóllense nun novo número da Axenda Cultural “Corredoira”

A presentación desta programación e da axenda terá lugar hoxe ás 11 horas na Sala de Reunións da Casa do Concello. Comparecerán antes os medios o alcalde de Tui, Antonio Fernández Rocha, e o concelleiro de Cultura, Moisés Rodríguez.

ACITUI propón o Festival de Jazz do 16 ao 18 de xullo

A Asociación de Comerciantes e Industriais de Tui, ACITUI, propón un Festival de Jazz para os próximos días que se celebrará no Paseo da Corredoira e que hoxe, ás 12 do mediodía será presentado na Casa do Concello.

O venres, día 16, actuación do combo de Jazz “Quenllazz” entre as 20.30 e as 22.00 horas

O sábado, de 10.00 a 13.30 horas, será Master Class de Jazz, co pianista Xan Campos, que levará esta proposta ao Conservatorio de Tui, e de 21.00 a 22.30 horas será Xan Campos Group quen ofrecerá un concerto.

O domingo pechará estas propostas coa música o Concerto dos alumnos da Master Class, de 20.00 a 21.00 horas.

Mércores, 14 de xullo de 2010

Presentación do Curso de Canto Coral en Tui

A sala de reunións do concello de Tui vai acoller maña, xoves, ás 11.30 horas, a presentación do Curso de Canto Coral que do 19 ao 31 deste mes vai impartir na cidade a Agrupación Coral Camerata Ad Libitum.

A presentación correrá a cargo de Julio Domínguez, director de Camera Ad Libitum, xunto a outros membros desta agrupación, acompañados polo alcalde de Tui, Antonio Fernández Rocha, e os concelleiros de Educación, Patricia Ricón, e de Cultura, Moisés Rodríguez.

Martes, 13 de xullo de 2010

Os empresarios de Pontevedra e o norte de Portugal estudan denunciar ao Goberno luso se prospera o sistema de cobro con telepeaxe autovías do país veciño

    Os representantes empresariais da provincia de Pontevedra e o presidente da Associaçao Empresarial de Viana Do Castelo expresaron o pasado venres de xeito oficial e conxunto o seu rexeitamento á proposta do Executivo portugués de impor peaxes nas autovías do norte e centro do país. Todos coincidiron nas graves consecuencias que esta medida tería para as empresas, o comercio e o turismo de ambas as marxes do río Miño.

    José Manuel Fernández Alvariño, presidente da CEP; José García Costas, presidente da Cámara de Comercio de Vigo; José Manuel Seoane García, vicepresidente 2º Cámara de Comercio de Pontevedra; Gumersindo Alonso, presidente da Cámara de Comercio de Tui; Carlos Oubiña Portas, presidente da Cámara de Comercio de Villagarcía, e José Luís Ceia, presidente da Associaçao Empresarial de Viana Do Castelo, mostráronse partidarios de tomar “todas as medidas que podamos ao máximo nivel” para que a decisión non se leve adiante.

    Neste sentido, Fernández Alvariño sinalou que os empresarios están a estudar denunciar ao Goberno luso se finalmente prospera o cobro co sistema de telepeaxe. Así, os empresarios consideran “inconstitucional” que un país da Unión Europea non admita unha moeda de curso legal para realizar un pago. O colectivo oponse non só ao sistema senón tamén ao propio cobro, xa que se trata dunha medida “discriminatoria con respecto a outras rexións do país veciño”. Ademais, cren que se trata dun “paso atrás” no desenvolvemento empresarial da zona e lembran que o Plan de Mobilidade da Eurorrexión avoga polo tránsito libre.

    Para os empresarios, a posta en marcha deste gravame suporá unha importante perda de competitividade empresarial. Alvariño deu algúns exemplos lembrando que máis de 100 empresas galegas están instaladas en parques empresariais portugueses, que o 51% das mercadorías con destino a España desde Portugal entraron o pasado ano por Galicia ou que o 65% das mercadorías transportadas por estrada no norte luso cárganse en Galicia, entre outros moitos.

    Na actualidade existen tres maneiras de chegar ao Porto desde Valença de Minho: a autoestrada A3 que percorre unha distancia de 112 km (1 hora de traxecto) e cuxo custo ascende a 15,10 euros ida e volta; a autovia A-28 que percorre unha distancia de 126 km (1 hora 24 minutos de traxecto) e que pasará a incrementar a súa costa actual e a N13, que triplica a duración da viaxe (2 horas 45 minutos), ten un alto índice de sinistralidade e percorre 128 km.

    Sobre estas alternativas, o presidente da Cámara de Comercio de Vigo, José García Costas lembrou que os camións non poden circular por esta última infraestrutura e que na actualidade a maioría das empresas evitan a A3 polo seu elevado custo.

    García Costas lembrou que, aínda que se opoñen ao cobro da peaxe, os empresarios non poden decidir o que ditamina o Goberno luso, polo que se finalmente apróbase esta medida, demandan que non se aplique a todo o movemento que hai desde o punto de vista industrial (empresas, mercadorías e traballadores). O responsable da institución cameral viguesa explicou que son moitas as empresas auxiliares instaladas en Portugal que serven á factoría viguesa PSA- Peugeot- Citroen.

    Nesta mesma liña continuou dando exemplos o presidente da Cámara de Comercio de Tui, Gumersindo Alonso, quen argumentou que o Porto de Vigo funciona como infraestrutura prioritaria para a entrada de mercadorías, como o granito que ten como destino Portugal. Igualmente ocórrelle ás empresas galegas cuxa entrada de mercadorías realízase a través do Porto de Leixoes.

    Os empresarios demandaron tamén a unificación do sistema de telepeaxe proposta polo Goberno luso, xa que na actualidade é incompatible co do resto da Unión Europea. Todos coincidiron nesta necesidade, de modo que poida viaxarse por toda Europa cun único sistema. En calquera caso, matizaron, ese sistema só sería aceptable nas autoestradas, pero non nas autovías que non teñan alternativa gratuíta.

    Outro dos aspectos destacados polos empresarios ante a entrada en vigor destas medidas foron o sector comercial e o turismo. E é que son moitos os cidadáns galegos que viaxan ao Porto e os seus arredores a realizar as súas compras (Ikea e os centros comerciais). No que ao turismo refírese, o colectivo explicou que Portugal é un destino turístico de proximidade, polo que haberá menos galegos que se despracen ao país veciño os fins de semana. A obrigatoriedade do uso do chip dificultará tamén estas viaxes esporádicas, xa

    que se considera difícil que os automobilistas se presten a comprar ou alugar os dispositivos. Finalmente lembraron que cada vez son máis os galegos que recorren ao aeroporto de Sá Carneiro polas súas conexións internacionais Así, calcúlase que o pasado ano 420.000 galegos utilizaron este aeroporto.

Prazas libres no programa de termalismo no IMSERSO en Tui

    A Concellería de Servizos Sociais do Concello de Tui informa da existencia de prazas libres para o programa termalismo social do IMSERSO no Balneario de Laias Caldaria en Ourense.

    As prazas libres son para ir do 11 ao 22 de agosto, en réxime de aloxamento e pensión completa 11 noite, con tratamento termal dez días, e actividades de animación todos os días coma ximnasia, manualidades, xogos, excursións… O prezo por persoa os 11 días é de 438,86 euros. Poden optar a esta prazas persoas xubiladas que estean cobrando unha pensión.

Jazz na Fronteira este mércores na Praza de San Fernando

    A praza de San Fernando acolle este mércores ás 21.30h o espectáculo Jazz na Fronteira organizado pola Vinoteca de García coa colaboración do Concello de Tui.

    Actuarán Richard Okkerse Quartet e Károlis Biveinis  ofrecendonos a súa particulares propostas jazzísticas.

    Amais a música maridarase coa presentación oficial dunha cervexa galega chamada Saramagal da clase Stipe. Será a súa presentación pública logo de dous intensos anos de traballo neste proxecto, tal e coma explicaba Quique Rodríguez, un dos socios desta micro-cervexería tradicional. Sinalaba que a empresa vai pouco a pouco e que son tres as empresas deste tipo en Galicia, sendo importante a colaboración entre elas porque poderían reducir custes de produción. En principio van elaborar tres tipos de cervexa.

    Amais da cervexa poderase degustar tamén dous viños, o tinto Ribeiro Cuñas Davia, e o branco Quinta de Couselo.

75 anos do Monte Aloia coma sitio natural de interese

    O pasado sábado tivo lugar a celebración dos 75 anos do Monte Aloia coma sitio natural de interese. No acto desenvolvido no centro de interpretación estivo o Director Xeral de Conservación da Natureza, Ricardo García Borregón, e o Alcalde de Tui, xunto a outra autoridades e a familia do parque.

    O Alcalde de Tui, Antonio Fernández Rocha na súa intervención destacou a importancia desta declaración,e lembro que a mesma non sería posible sen o esforzo e empeño do enxeñeiro tudense Rafael Areses.

    Felicitaba Fernández Rocha a todos os que traballaron no Aloia xa que dicía que grazas a eles o Parque Natural é “unha marabilla”.  Animaba amais aos responsables do Parque a seguir traballando nos próximos anos, aínda que dicía serán difíciles a o perder en 2013 os fondos europeos, a amosou a disposición do Concello de botar unha man.

    O Director Xeral de Conservación da Natureza fixo na súa intervención una agradecemento especial  ao profesor López Lillo, Presidente de honra de Europarc España, pola súa presenza e pola conferencia que ía pronuncia a continuación. Tivo tamén palabras de recoñecemento para o enxeñeiro Rafael Areses que lembrou a principios do século XX pediu autorización para a reforestación do Monte, ata chegar en 1935 a súa declaración de sitio natural de interese nacional, unha declaración que solicitou o pai do actual Director Xeral.

    Por último puña os eu convencemento en que o Parque Natural do Monte Aloia é unha parte fundamental d apolítica de conservación, e dicía que contribuirá a seguir mantendo a biodiversidade do Baixo Miño. 

    García Borregón tiña un recordatorio especial para todas as persoas que traballaron para que o Aloia sexa hoxe o que é.

Sábado, 10 de xullo de 2010

Hoxe celébranse os actos do 75º Aniversario do Parque Natural do Monte Aloia

O director xeral de Conservación da Natureza, Ricardo García-Borregón, asistirá hoxe, ás 11.45 horas, aos actos conmemorativos do 75º Aniversario da declaración do Monte Aloia como Sitio Natural de Interese Nacional, que teránb lugar na casa forestal Enxeñeiro Areses do Parque Natural do Monte Aloia.

Hoxe continúa o 2 Marxens Rock

“2 Marxens Rock” é título do festival que dende onte se celebra a ambos lados da fronteira. Onte actuaron na ex-alfándega de Valença os grupos Run Zhora Run de Tui e Rit&Cencias  de Valença. Mentres hoxe ás once da noite na Praza de San Fernando será a quenda de Copycat de Valença e The Cillit Band de Tui. Este evento está organizado polo Concello de Tui e Cámara de Valença.

Copy Cat de Valença cumpre este mes de xullo catro anos e esta será a terceira vez que actúan en Tui xa que o fixeron con anterioridade na sala Metropol e no café Central, con moi boa acollida por parte do público. André Coelho, baixo do grupo, explicaba que as inquietudes musicais dos cinco integrantes levounos á creación desta banda. Mentres Miguel Serra, batería, explicaba que o seu estilo vai do rock ao alternativo pasando polo pop.

E por último actuará neste 2 Marxens Rock o grupo tudense The Cillit Band integrado por catro membros entre eles Fofi Dorado e Ramón Corral que estiveron no programa Día a Día. Explicaban que levan dous anos facendo cancións e a penas un ano cos catro integrantes. O seu estilo vai do rock, ao blues, pasando polo funki interpretando temas propios

IV Festa gastronómica da empanada caseira

Este domingo celébrase entre Areas e Sobrada en San Benito das Marabillas a cuarta Festa Gastronómica da empanada caseira. Será dende ás 10h no recinto da capela. Ás 12.45h celebrarase misa solemne na honra a San Benito das Marabillas.

O Concello de Tui conta xa co informe favorable de Patrimonio sobre o PXOM con tres

O Concello de Tui conta xa co informe favorable da Dirección Xeral de Patrimonio sobre o Plan Especial do Conxunto Histórico. Este documento recolle aínda así tres matices: que os PERI’s de San Bartolomé as zonas verdes teñen ser paralelas ao Camiño de Santiago, que hai que respectar a mámoa existente en Cotarel, Randufe, polo que haberá que desprazar a rotonda prevista para a intersección coa VAC Tui- A Guarda, e por último que será Patrimonio quen terá que informar sobre o traslado do hórreo na Finca Patazumba, polo que a apertura da rúa Ourense queda supeditada a este informe. Así o explicaba o Alcalde de Tui, Antonio Fernández Rocha, na RMT.

O Alcalde amosouse satisfeito con este informe, aínda que recolle que todo é mellorable. É aludía ao anterior informe de Patrimonio que cualificaba de “demoledor” e que considera non é de recibo. Lembraba que había un documento anterior xa favorable que non recollía por exemplo a protección do Camiño de Santiago.

Tras recibir o informe de Patrimonio o equipo redactor do PXOM está traballando para introducir no Plan os cambios suxeridos por Patrimonio, e poder levar así o documento final a pleno para a súa aprobación. O Alcalde agarda que poida ser levado xa a sesión ordinaria deste mes, e logo será remitido á Dirección Xeral de Urbanismo para que se pronuncie sobre a aprobación do Plan Xeral de Ordenación Municipal de Tui nun prazo máximo de tres meses. Fernández Rocha calcula que poida haber unha resposta en setembro ou outubro.

O rexedor tudense confía na aprobación da plan xa que aceptaron máis do 80% das recomendacións feitas por Urbanismo e outras que se aceptaron parcialmente.

Venres, 9 de xullo de 2010

Tui e Valença únense no “2 Marxens Rock” e a participación de 4 grupos das dúas beiras do Miño

O alcalde de Tui, Antonio Fernández Rocha; o presidente da Cámara de Valença, Jorge Mendes, o concelleiro de Cultura, Moisés Rodríguez, e o Vareador de Cultura de Valença, José Temporão Monte, xunto a un representante de cada un dos grupos que vai actuar neste festival,  presentaron onte o “2 Marxens Rock”, un festival rock que hoxe, venres,  e mañá, sábado, se vai celebrar nas dúas cidades con grupos tudenses e valencianos.

Ás once desta noite, actuarán na antiga alfándega de Valença do Miño, os grupos Run Zhora Run de Tui e Rit&Cencias de Valença. Mañá o concerto terá lugar, tamén ás once da noite, na Praza de San Fernando a cargo de Copy Cat de Valença e The Cillit Band de Tui.

O Concelleiro de Cultura de Tui aludiu na súa intervención á  colaboración iniciada con Valença e que se materializou anteriormente na primeira Cabalgata de Reis Internacional ou na celebración de actos conxuntos co gallo do Día da Muller. Considerou Moisés Rodríguez que este é o camiño acertado porque os dous municipios teñen unha forza que hai que saber aproveitar.  Anunciaba tamén que continuarán esta liña de traballo conxunto que están a realizar.

Pola súa banda o Vareador de Cultura de Valença apuntaba que sempre foi a intención do seu municipio implementar e crear actividades cos grupos e bandas locais, sinalando que este evento, o 2 Marxens Rock, serve para promover e divulgar o traballo destes grupos musicais. Desexou José Temporão Montes que esta primeira edición sexa o inicio dun festival que poida ter carácter nacional. Ao tempo amosaba a súa disposición a seguir colaborando con Tui noutras iniciativas.

Nesa mesma liña pronunciouse o presidente da Cámara de Valença que puxo de relevo o establecemento dunha maior cooperación con Tui, indicando que o río separa pero que tamén “nos ten unido por diversos motivos”. Aludiu ao programa “Valença, cidade activa” establecido para este verán no que presenta un programa de actividades para todas as idades no que os grupos locais teñen protagonismo destacado.

O alcalde de Tui manifestou na súa intervención que este festival brinda aos grupos das dúas beiras a posibilidade de coñecerse, ao tempo que lles ofrece unha posibilidade para a súa promoción. Sinalaba amais o seu desexo de que o 2 Marxens Rock sexa o punto de partida dunha serie de intercambios que teñan continuidade incluso cos grupos das asociacións culturais das parroquias tudenses e das freguesía valencianas.

Os representantes dos grupos Cillit Band, Copy Cat, Rit&Cencias, e Run Zhora Run agradeceron ao concello de Tui e á Cámara de Valença ter contado con eles para esta iniciativa, da que se congratularon, xa que entenden que é un apoio para estas bandas. Agardan que o 2 Marxens Rock poida ser unha rampla de lanzamento para eles para ter maior visibilidade e proxección, ao tempo que amosaron a súa ilusión co festival que se celebra venres e sábado.

Actividades de ACITUI

    Esta mañá continúa a ludoescola co Rei Midas no Paseo da Corredoira para  nenos a partir de 5 anos. Será de 11 a 13h dentro da programación de Vida nas rúas de ACITUI. E esta tarde, de 20 a 22h, o profesor Vladimir impartirá clases de Street Dance tamén na Corredoira.

    Por outra parte mañá sábado e o domingo de 12 a 22h ACITUI organiza coma cada segundo fin de semana de mes unha Feira de Artesanía. Será no Paseo da Corredoira.

Xuntanza informativa para facer o Camiño de Santiago

        A Asociación Cultural Xuntanza celebra mañá sábado, ás 21.30h na Casa Cultural de Randufe, unha xuntanza Informativa sobre o Camiño de Santiago que van facer do 9 ao 12 de outubro.

Festas do Cristo da Agonía en Baldráns, Tui

        A parroquia tudense Baldráns celebra esta fin de semana Festas na honra ao Santo Cristo da Agonía.  Mañá sábado no torreiro de Festas de Baldráns celebrarase a partir das oito da tarde a VII Romaría do polbo á feira, terán amais unha pantalla xigante para ver o partido  Uruguai-Alemaña do Mundial.  O grupo Xuntanza amenizará a verbena dende ás dez da noite, e ás doce e media comezará a discoteca móbil.

    O domingo ás once da mañá entrará a Banda de Música Cultural de Salceda, e ás doce  e media celebrarase Misa solemne con sermón e procesión. Pola noite a verbena será amenizada por Super T e Canela. Xa o luns ás once a mañá entrará no recinto da festa a Banda de música popular de Tui. A última verbena correrá a cargo de Trébol e Capitol.

Misa e procesión de San Cristóbal en Guillarei

        Mañá sábado hónrase a San Cristóbal en Guillarei. Ás 20h haberá Misa cantada na capela da Virxe das Dores con procesión e bendición do coches, tamén poden ir camións.

Festas na honra á Virxe do Carme en Pexegueiro

        En Pexegueiro comezan esta noite as festas na honra á Virxe de Fátima con verbena con Capitol e Trébol. Mañá sábado ás doce celebrarase misa solemne coa actuación da Banda de Música Popular de Tui ao finalizar. Pola noite amenizarán a verbena Los Satélites da Coruña e Compostela.  

Xoves, 8 de xullo de 2010

O Paseo da Corredoira de Tui acolle a Feira do Libro de Verán esta fin de semana

O céntrico Paseo da Corredoira acolle esta fin de semana a  Feira do Libro de Verán. Este evento vai celebrarse este sábado 10 de xullo e o domingo día 11 no Paseo da Corredoira.

A feira foi presentada esta mañá na Casa do Concello polo Alcalde de Tui, Antonio Fernández Rocha, o Concelleiro de Cultura, Moisés Rodríguez, e Cris García e Maruchi Valverde representación das librarías Byblos, Iris e Valverde.

A feira comezará o sábado ás 19h prolongándose ata última hora da tarde, e continuará o domingo ás 12h. Os dous días ás 20h está previsto a actuación dun grupo folclórico tudense. Serán un total de 21 postos de exposición e venda de libros tanto en galego coma en castelán nos que as tres librarías presentarán as últimas novidades editoriais para todos os públicos, abranguendo dende novela a libros de viaxes, ou literatura infantil.  En todos estes exemplares haberá un 10% de desconto, e amais os nenos e nenas serán agasallados con lambetadas.

En representación das libreiras Cris García indicou que están contentas de ter neste evento tanto a colaboración do Concello coma de FEBAM. Salientou que coma novidade sortearán vales de compra. Mentres Maruchi Valverde incidiu na importancia de sacar o libro á rúa e achegalo a xente.

O Concelleiro de Cultura, Moisés Rodríguez, na súa intervención lembrou que esta feira do verán xurdiu o ano pasado debido a que por mor da choiva non se puido celebrar a do libro galego o 17 de maio. Tralo éxito obtido optan por repetir nesta ocasión ante o interese das libreiras na realización deste evento. Salientaba que o Paseo da Corredoira, onde tamén este fin de semana ten lugar a feira de artesanía organizada por ACITUI, converterase nun fervideiro de xente con todas as actividades previstas.

Pola súa parte o Alcalde de Tui, Antonio Fernández Rocha, puxo de manifesto a importancia do libro, apuntando que é un bo compañeiro para o verán, do que sempre se aprende algo.

AAVV de Randufe pregunta para cando a rehabilitación da Casa Escola

    A Asociación de Veciños de Randufe pregúntase para cando a rehabilitación da Casa Escola da Parroquia que veñen reclamando dende hai anos. Con respecto a este edificio veñen de congratularse de que o Concello tapiase as portas de ventas do inmoble hai uns días tal e coma reclamaron en novembro do ano pasado ante o estado de semirruína que presenta e o perigo que supón, alertan aínda así que o aparcamento da escola segue en uso. Daquela, hai sete meses, os veciños interesábanse tamén polos posibles proxectos que o concello podía ter para a súa utilización ou cesión a outros organismos.

    A este respecto a Asociación de Veciños indica que chegou as súas mans un decreto da Alcaldía onde se dá conta da recepción dunha subvención de 43.118,70€ para a contratación de persoas para a rehabilitación da escola, que se ingresaron eses cartos o 3 de decembro de 2007, e que o concello tivo que devolver 296,36 euros por producirse un gasto menos.  Esta nova foi unha sorpresa para os veciños que xa que a Casa Escola segue en semirruína e non teñen noticias de que fose rehabilitada. Por este motivo dirixíranse ao Concello solicitando as explicacións pertinentes.

Mércores, 7 de xullo de 2010

A Biblioteca Pública Municipal achega a lectura aos espazos de lecer coa “Bibliopiscina”

A Concellería de Cultura a través da Biblioteca Pública Municipal ten renovados nestes días a “Bibliopiscina” que ofrece os seus servizos nas instalacións das Piscinas Municipais tudenses. Este servizo de extensión bibliotecaria leva funcionando dende o ano 2006 cunha moi positiva acollida por parte dos usuarios destas instalacións de lecer veraniego.

Agora a Concellería de Cultura ten promovido unha renovación deste servizo bibliotecario da “Bibliopiscina” cunha anovada oferta bibliográfica que está ao dispor dos usuarios e que será renovada no vindeiro mes, para que esta escolma de títulos manteña o seu interese para os lectores. Esta iniciativa presentada baixo o lema “Mergúllate nos libros” tenta achegar o libro e a lectura como unha oferta para o tempo de lecer para todas as idades e para todos os sectores sociais, así na escolma que se presenta se buscan unha grande diversidade de títulos e de formatos e temáticas.

Para acceder a este servizo bibliotecario non cómpre ningún tipo de carné da Biblioteca senón que posúe un acceso libre e gratuíto, e tampouco supón custe adicional algún para as persoas que acceden ás Piscinas Municipais.

Para o concelleiro de cultura tudense, Moisés Rodríguez Pérez, a instalación, por quinto ano consecutivo, deste servizo de “Bibliopiscina” testemuña o importante compromiso que leva adiante o concello de Tui pola promoción do libro e da lectura pública como ferramentas imprescindibles para o desenvolvemento persoal e social e como unha alternativa enriquecedora para o tempo de lecer que promove este Concello de Tui a través da Biblioteca Pública Municipal.

Achegar os libros aos lugares onde está a xente e ofertalos como un elemento normalizado da vida persoal e colectiva contribúe de xeito eficaz a acadar unha normalización da lectura entre os nosos veciños, incrementando a súa afección polo libro.

Feira do Libro de Verán en Tui

Hoxe, mércores, ás 11.30 horas será presentada na sala de reunión da Casa do Concello de Tui a Feira do Libro de Verán. Este evento vai celebrarse este sábado 10 de xullo e o domingo día 11 no Paseo da Corredoira.

A presentación correrá a cargo do Alcalde de Tui, Antonio Fernández Rocha, o Concelleiro de Cultura, Moisés Rodríguez, e unha representación das librarías Byblos, Iris e Valverde.

Presentación de “2 Marxens Rock”, un festival de música nos concellos de Valença e Tui

Dentro da liña de colaboración establecida entre o concello de Tui e a Cámara Municipal de Valença, esta fin de semana vaise celebrar nos dous municipios o “2 Marxens Rock”, un festival de música que vai reunir a grupos tudenses e valencianos.

A presentación desta primeira edición do “2 Marxens Rock” terá lugar mañá, xoves, ás 11.30h no Centro Interfederado de Remo e Piragüísmo en Tui. Comparecerán ante os medios de comunicación o alcalde, Antonio Fernández Rocha, o presidente da Cámara de Valença, Jorge Mendes, así coma o concelleiro de Cultura, Moisés Rodríguez, e o vareador de Cultura de Valença, José Temporão Monte. Tamén estarán presentes un representante de cada un dos grupos que vai actuar neste festival.

O Concello está procedendo á limpeza das praias de Areeiros e A Mariña

O Concello de Tui iniciou as tarefas de limpeza na praia de Areeiros en Guillarei consistentes no cortado da herba en boa parte da praia e a retirada do lixo alí acumulado. Así o confirmaba o Alcalde de Tui, Antonio Fernández Rocha, na RMT, onde lembraba que xa en anos anteriores tiveran advertencia sobre o xeito de facer a limpeza nestes lugares.

Fernández Rocha solicitaba amais a colaboración dos usuarios da praia para mantela limpa. Pregaba que o lixo se deposite nos contedores que se colocaron na parte superior da praia.

Máis aló da limpeza a praia non contará este ano con chiringuito xa que ao non ser permitido por Costas tivo que ser retirado, o mesmo que aconteceu cos aseos que había no lugar, que de cara a vindeiros verán estudarán a posibilidade de poder colocar outros portátiles. O único que permanecerá na praia son as mesas e os bancos de pedra.

Con respecto á praia da Mariña só se permite a súa limpeza pero non o cortado da herba, o rexedor tudense agarda que estea limpa tamén de cara a fin de semana.

Converxencia XXI presentarase ás elección municipais en Tui

Converxencia XXI, un partido galego de centro democrático e liberal, vaise presentar ás elección municipais de Tui en 2011. Así o anunciaba o seu candidato á Alcaldía Carlos Vázquez Padín o pasado sábado en rolda de prensa, onde compareceu acompañado por Xaime Manuel Requeixo Souto, afiliado de Converxencia XXI e profesor de Dereito na Universidade de Santiago.

Carlos Padín anunciou a súa intención de presentar candidatura ás eleccións municipais de 2011 en Tui indicando que parten co obxectivo de servir a Tui. Engadía que o municipio ten un enorme potencial polos recursos con que conta, e sinalaba que se deben á xente e se comprometen para lograr o mellor futuro para Tui.

Indicaba a continuación que as súas propostas baséanse en catro piares fundamentais: urbanismo, infraestruturas, comercio e turismo e administración eficiente.

No primeiro deles, urbanismo, fíxanse coma prioridades a aprobación do Plan Xeral de Ordenación Municipal sobre o que dicía que son os intereses do actual alcalde os que o teñen paralizado, e apostaba tamén pola aprobación do Plan Especial do Conxunto Histórico xa que sinalaba que esta zona pode ser fonte de moita riqueza.

En infraestruturas as súas prioridades son un aparcamento municipal subterráneo, finalizar o saneamento, e a instalación de fibra óptica de “R” e rede wifi para zonas con servizo deficiente, así coma o asfaltado de pistas e puntos de luz no rural.

No apartado de comercio e turismo dende Converxencia XXI inclínase por promover a Candidatura de Tui-Valença a Patrimonio da Humanidade xa que a súa consecución indican que suporía a chegada de millóns de euros anuais creando postos de traballo en rehabilitación nunha primeira fase, e despois na hostalería. Insistía en que a cidade conta con recursos para xerar emprego e riqueza que están sen explotar.

O cuarto apartado das súas propostas é unha administración eficiente  co respecto dos dereitos dos cidadáns, e o traballo na mellora da administración local, así coma coa implantación de criterios de transparencia, eficiencia e axilidade nos servizos administrativos, pondo fin á arbitrariedade no cobro de impostos e taxas e comprometéndose a conxelar as taxas municipais cando menos en 2011 e 2012.

De cara ás eleccións do próximo ano explicaba Carlos Vázquez Padín que para dar a coñecer as súas propostas veñen de establecer unha interlocución coa cidadanía co reparto de folletos informativos, ao que suman a labor de difusión do partido que están realizando xa ao través da internet apoiándose nas novas tecnoloxías.  Arestora están traballando na configuración dunha candidatura con certo secretismo, porque segundo dicía hai temor de que xente con poder tente evitar que Converxencia XXI chegue ás eleccións.

Paseos turísticos polo Miño con Aquamiño

Hai unha semana que a empresa Servizos Turísticos do Baixo Miño ao través da súa firma comercial Aquamiño comezou a realizar paseos turísticos polo Miño nunha embarcación tipo catamarán con todas as comodidades para os usuarios. O porto base está no Porto Deportivo de Tui e ofrecen distintas modalidades de paseo nas que combinan a oferta cultural e a gastronómica.

Para falar desta iniciativa estaban no programa “Día a Día de verán” Javier Dopico e Manuel Guerreiro responsables de Aquamiño. Explicaban en primeiro lugar que se decidiron a montar esta empresa para promocionar o turismo no Baixo Miño a través de distintas propostas dado o escaso aproveitamento do río que existía ata o momento.

Explicaban que no paseo polo Miño pódese disfrutar de fermosas vistas,e tamén do pleno contacto coa natureza. Presentan distintos programas e prezos totalmente competitivos.

Os paseos realízanse nun catamarán moderno e perfectamente acondicionado que pode navegar tranquilamente polo Miño, conta tamén con acceso para discapacitados. Ten con 12 prazas, establecéndose un mínimo de 6 persoas por paseo.

Dende Aquamiño ofrecen tres viaxes distintas en función da súa duración, o máis curto de hora e media, outro de medio día e outro de día completo. Inclúese un refrixerio a bordo, e nalgúns casos o xantar nun restaurante da zona. Pódese combinar amais con outras actividades.

Os interesados en realizar algún destes paseo pode atopar toda a información en www.aquamiño.es ou nos teléfonos 628 26 35 75 e no 628 55 27 10.

Esta empresa de Servizos Turísticos do Baixo Miño conta tamén con outra firma comercial que é Tamuxe Kaiak na que van explotar paseos en piragua, bicicleta, rotas de sendeirismo no entorno do río Tamuxe.

Martes, 6 de xullo de 2010

No pasado mes de xuño iniciaron en Tui o camiño de Santiago 1.621 peregrinos

Veñen de ser publicados os datos da Oficina de Peregrinacións da Arquidiócese de Santiago de Compostela sobre o número de peregrinos que obtiveron a “Compostela” no pasado mes de xuño de 2010. En total 33.721 peregrinos, superior en case trece mil peregrinos ao mesmo mes do pasado ano santo de 2004, en que foran un total de 14.259 os peregrinos acreditados.

É interesante comprobar nestes datos como o camiño portugués está consolidado como o segundo itinerario de peregrinación  con 4.248 peregrinos, que representa unha porcentaxe do 12,60%. Destes peregrinos comezaron en Tui a súa peregrinación 1.621 peregrinos, que corresponde a unha porcentaxe do 4,81% do total de peregrinos xacobeos, repetíndose a mesma cifra de peregrinos que no pasado mes de maio.

Con estes datos resulta evidente a importancia de Tui no fenómeno da peregrinación a Santiago, pois ocupa o quinto lugar de inicio da peregrinación logo dos destinos clásicos do camiño francés (Sarria, S. Jean P. Port, Cebreiro e Roncesvalles), mentres que no mes de abril ocupaba o terceiro lugar con 1.500 peregrinos logo de Sarria e o Cebreiro. Tui é pois o primeiro lugar de inicio do camiño xacobeo fóra do camiño francés, mantendo esta consideración  en todos os meses deste ano santo 2010.

Cómpre lembrar que este datos reflicten unicamente aos peregrinos que realizan este camiño portugués coa súa credencial e que logo reciben a “Compostela” que acredita a realización deste itinerario. Este número temos de multiplicalo para recoller a realidade de moitos peregrinos que se achegan a Tui en vehículo, tanto particulares como en medios de transporte colectivo, no seu itinerario a Compostela, así como numerosos peregrinos que realizan o camiño sen a devandita credencial.

Para o concelleiro de cultura tudense, Moisés Rodríguez Pérez, estes datos permiten constatar a importancia do camiño de Santiago na nosa cidade a e súa positiva repercusión que produce na sociedade tudense. Estas datos amais evidencian como o camiño portugués, cuxo tránsito está historicamente documentado polas cidades irmás de Valença e Tui –fronte a intentos reformuladores actuais deste itinerario histórico- , é valorado polos peregrinos como a segunda ruta de peregrinación elixida polos seus valores culturais, naturais e mesmo espirituais. Tui segue consolidando o seu lugar central no itinerario xacobeo portugués e así é evidenciado por todas as estatísticas existentes.

Rodríguez Pérez salienta tamén o importante esforzo que o Concello tudense ven realizando a prol da promoción deste roteiro xacobeo, como é a creación do Centro de Interpretación “Tui porta do camiño portugués”, o perfil “Tui camino de Santiago” na rede social Facebook con case 2.300 seguidores, e a edición de material informativo en seis idiomas.

Luns, 5 de xullo de 2010

“Galicia en foco: o fotoxornalismo galego” na Sala Municipal de exposicións ata o 25 de xullo

            A zona Anexo da Sala Municipal de Exposicións do Concello de Tui acolle unha nova mostra, trátase neste caso da exposición de fotoxornalismo galego “Galicia en foco” que acada neste ano a súa vixésima edición.

        Esta concurso e exposición itinerante está organizado polo Club de prensa de Ferrol

        Participan nesta edición os fotoxornalistas: Álvaro Ballesteros, Amador Lorenzo, Andrés Fraga, Ángel Manso, Antonio Hernández, Francisco Puñal... ata un total de 44 fotógrafos que abranguen co seu traballo a práctica totalidade da prensa galega. Entre os participantes foi elixida a foto do ano 2009 que correspondeu a unha obra do fotografo Miguel Riopa cunha imaxe da folga do metal en Vigo publicada na Agence France-Press.

        A produción e creación de “Galicia en foco” xa é unha parte da historia da comunicación e a fotografía en Galicia ao encher un baleiro nos eidos da promoción, divulgación e mostra da fotografía de prensa. Esta exposición visita na súa itinerancia diversas cidades e vilas de Galicia así como Porto, Santander e Madrid.

        O escritor Xosé A. Ponte Far na presentación desta nova edición de Galicia en Foco escribe: “Hoxe xa non cabe ningunha dúbida de que o fotoxornalismo é unha maneira de informar totalmente arraigada na nosa sociedade. Porque a través da fotografía dásenos unha visión real do que está a pasar e unha información simbólica ou metafórica do que iso significa (...) a fotografía ten un compoñente informativo, periodístico e outro artístico (...). Así pois o noso país que sae aquí retratado é un espello do real, sen ningunha adulteración, que ademais é o que cada un de nós queiramos que sexa”.

        Para Moisés Rodríguez Pérez, concelleiro de cultura tudense, a presenza, un ano máis, desta exposición de fotoxornalismo na Sala Municipal de Exposición evidencia o traballo que se desenvolve dende esta concellería por ofrecer neste espazo expositivo unha programación diversificada que amose a diversidade da oferta artística de Galicia. Así xunto á exposición “En clave de pedra” do escultor tudense Rosendo podemos contemplar ao longo do mes de xullo esta nova exposición de carácter fotográfico que suscitará o interese e curiosidade nos visitantes que se acheguen ata o edificio “Área Panorámica”.

Fotoxornalistas participantes

        José Luiz Oubiña. (Brasil, 1959). Licenciado en Educación Artística —especialidade Artes Plásticas—. Redactor gráfico de Faro de Vigo. Profesor de Artes e Fotografía na International School of Curitiba.

        Álvaro Ballesteros. (Madrid, 1969). Estudiou xornalismo en Madrid e abandonou para incorporarse a La Voz de Galicia despois de unhas prácticas de verán no ano 1996. Dende 1997 traballa como fotoxornalista na delegación de Santiago de Compostela de La Voz de Galicia.

        Amador Lorenzo Blach. (A Coruña). Técnico Superior en Imaxe, cursado na Escola de Imaxe e Son de A Coruña entre os anos 2001-2002. En 2005 comeza a traballar de fotoxornalista para o Grupo Capital, colaborando ao mesmo tempo co diario Marca. Dende 2007 colabora co diario El País e en 2008 comeza a traba­llar co Xornal de Galicia. É finalista no VII Premio de Creación Fotográfica Luis Ksado e recentemente premiado nos premios ÑH de diseño periodístico con unha medalla de ouro á mellor portada de suplementos e con unha prata ao mellor porfolio.

        Andrés Fraga Pérez. (Panxón, 1982). Estudou fotografía en Barcelona, na antiga Escola de Fotografía da UPC (agora CITM). De alí a Finlandia, onde, ademais de rematar o seu proxecto final, coñeceu a un puñado de grandes fotógrafos e unha maneira moi diferente de traballar a imaxe. Agora colabora con El País en Galicia e sigue a traballar con revistas finlandesas na península Ibérica e en Sudamérica.

        Ángel Manso Fernández. (Ferrol, 1975). Graduado en Artes Gráficas na especialidade de Deseño Gráfico na Escola de Artes Ramón Falcón, Lugo no ano 2000. Estudos de Fotografía Artística na escola de Artes Pablo Picasso de A Coruña no ano 2003.

        Dedicouse ao deseño gráfico e a fotografía cómo «freelance» e dende xaneiro de 2009 colabora cómo fotógrafo para o xornal La Voz de Galicia.

        Antonio Hernández Ríos. (Santiago de Compostela, 1965). Redactor gráfico de El Correo Gallego.

        Francisco Puñal Suárez. (Cuba, 1950). Licenciado en Xornalismo pola Universidade de La Habana. Traballou como director de documentais para o Instituto Cubano de Cine. Ten acadado importantes premios internacionais entre eles o Photo Award de Panasonic. Colabora co xornal galego A Peneira.

        Jorge Meis. (Ferrol, 1967). En 1991 gradúase na Escola de Artes e Oficios Pablo Picasso de A Coruña na especialidade de Fotografía Artística. Dende entón traballa como fotógrafo de prensa autó­nomo, presentando os seus traballos en xornais como o Ideal Gallego ou Diario de Ferrol, así coma noutras publicacións: Ecce Homo, Revista Puzzle,… Acadou varios galardóns entre os que podemos destacar o Premio especial nos Premios Internacionais Hofmann de Fotografía na súa VI edición. Na actualidade colabo­ra coa axencia Laotrafoto.

        Kiko Delgado. (Ferrol, 1968). Estudou fotografía na Escola Pablo Picasso de A Coruña. Traballa como fotoxornalista para diversos medios de comunicación entre eles o periódico El Mundo na súa delegación de Galicia. Publica fotos en El Correo Gallego e na súa versión en galego (O Correo Galego e Galicia Hoxe), tamén realiza colaboracións coa Axencia Gráfica Cover. Participa con fotografías en traballos da editorial ferrolá Embora.

        Luis Polo. (Ferrol, 1974). Colaborador habitual de Diario de Ferrol desde 2004.

Moncho Fuentes García. (A Coruña, 1965). Fotoxornalista que cola­bora con 20 Minutos e Diario As.

        Olalla Lojo Ríos. (Santiago de Compostela, 1979). Licenciada en Belas Artes pola Universidade de Pontevedra. Colabora con xor­nais aportando os seus traballos fotográficos: El País, Xornal de Galicia, Faro de Vigo.

        Óscar Corral. (Santiago de Compostela, 1981).Fotoxornalista dende 2003. Colaborou con La Voz de Galicia ABC e Faro de Vigo. Na actualidade compaxina tareas de cobertura gráfica para o execu­tivo galego con colaboracións para distintos medios galegos.

        Susy Suárez. (A Coruña, 1984). Técnico Superior en fotografía artísti­ca poa Pablo Picasso da Coruña. Leva tres anos traballando en El Ideal Gallego. Ademais colabora con diversas publicacións.

        Xabier Quintana. (A Coruña, 1976). Licenciado en Ciencias do Mar e Técnico Superior en Imaxe. Fotoxornalista de El Ideal Gallego dende 2004.

        Xoan A. Soler. (Teo, 1966). Coordinador da sección de fotografía da delegación en Santiago de Compostela de La Voz de Galicia onde traballa como fotoxornalista dende 1993.

        Guillermo Sotelo Rodríguez. (Monforte, 1971). Realizou estudios na Escola de Artes de Ourense e completou a súa formación de forma autodidacta. É colaborador de La Voz de Galicia na súa edición de Terra de Lemos. Ten publicado reportaxes en revistas como O Regate, Probike, Bike ou Bicisport.

        Jesús Rodríguez Montero. (Monforte de Lemos, 1956). Introduciuse no mundo da fotografía no ano 1987 como autodidacta. Realizou reportaxes para revistas, catálogos, libros, guías, postais, etc. Realiza exposicións e acumula algún que outro premio. Actualmente colabora coa revista Líneas de ADIF, con El Progreso, El Correo Gallego e La Voz de Galicia.

        Nacho Gómez. (Monforte, 1967). De formación autodidacta, traballou de fotoxornalista en La Voz de Galicia dende o 1993 ata o 1999. Membro fundador do colectivo Foco Libre. Ten colaborado con diversos medios, El Mundo, Faro de Vigo, As, Marca. Publicou nas revistas Geo, Traveler, Así son las Cosas, DeViajes, Eco­dixital, Andares. Na actualidade colabora con El País e Xornal de Galicia.

        Pedro Eliseo Agrelo Trigo. (Palas de Rei, Lugo, 1973). Deseñador gráfico pola Escola de Artes e Oficios Ramón Falcón de Lugo. Fotógrafo autodidacta que publica en diferentes medios. Colabora co diario El País e Axencia EFE.

Carlos García Hervella. (Ourense, 1955). Redactor gráficoCoordinador de fotografía do xornal O Sil.

        Santiago Míguez Amil. (Ribadavia, Ourense, 1967). De formación autodidacta. En 1994 comezou en La Región e pasou logo a La Voz de Galicia, primeiro na edición de O Ribeiro e despois na de Ourense, onde desenvolve o seu labor de fotoxornalista.

        Xesús Fariñas Navarro. (Xinzo de Limia, Ourense, 1978). Estudou Deseño Gráfico e Fotografía Artística na Escola de Arte Antonio Failde de Ourense. Complementou a súa formación con diversos cursos con diferentes profesionales: Antonio Ansón, Oscar Molina, Manuel Villarino, Chus Gutiérrez entre outros. Na actualidade desempeña a laboura de redactor gráfico no xornal La Región de Ourense.

        Juan Marcos Míguez Cortizo. (A Estrada, Pontevedra, 1975). Realizou os estudos de fotografía na Escola de Artes e Oficios Mestre Mateo de Santiago de Compostela. Dende 2001 traballa para La Voz de Galicia na súa edición de Deza e Tabeirós.

        Martina Oubiña Miser. (Pontevedra, 1980). Corsou estudos de Ciclo Superior en Imaxe en A Coruña entre 1998 e 2000. Dende abril de 2005 traballa como fotoxornalista na edición de Arousa de La Voz de Galicia.

        Sonia Daponte Buján. (Vigo, 1978). Fotoxornalista do Xornal de Galicia. Ten publicado traballos en Atlántico Diario, El Mundo, Rock DeLuxe, Faro de Vigo e AGN.

        Riobó Prada. (Bos Aires, 1967). Xornalista e licenciado en Historia da Arte. Redactor e fotógrafo do xornal A Peneira dende 2004. De formación autodidacta, realiza traballos temáticos centrados na paisaxe e o retrato. Ten participado en varias exposicións.

            Antón García Freire. (A Coruña, 1968). Graduado en Artes Plásticas, na especialidade de Fotografía, na Escola de Artes Mestre Mateo de Santiago de Compostela. Traballa como fotoxornalista para distintos medios dende 1996.

        Diego Villar Santiso. Técnico Superior en Imaxe (Escola de Imaxe e Son de A Coruña). Dende 2006 realizou múltiples traballos nos eidos da publicidade e prensa. É colaborador de La Voz de Galicia.

        José Pardo. (Ferrol, 1969). Fotoxornalista de La Voz de Galicia.

        Miguel Gómez Muñiz. (Santiago de Compostela, 1966). Cursou estudos

de fotografía na Escola de Artes Aplicadas de Ourense e na Escola Mestre Mateo de Santiago de Compostela. É xefe gráfico da delegación de ABC en Santiago de Compostela. Colabora con Eco, Expansión, Destino Galicia, Revista AG.

        Jesús Rey Roca “Otto”. (A Coruña, 1976). Iníciase na fotografía dun xeito autodidacta. No ano 2003 decide trasladarse a Compostela para tentar conseguir unha base académica. A finais do 2004 comeza a traballar como fotoxornalista na Axencia Galega de Noticias. No ano 2008 desvincúlase deste medio e comeza a traballar de xeito independente.

        Santy López. (Sarria, 1966). Iniciou o seu contacto co fotoxornalismo fai unha década. traballou como reporteiro gráfico nas cabeceiras de La Voz de Galicia e O Progreso de Lugo. Colabora en publicacións e catálogos desenvolvendo traballos de fotografía editorial e publicitaria. Do mesmo xeito, continúa a súa relación co ámbito expositivo desenvolvendo proxectos de fotografía comercial e de autor.

        Vanessa Casteleiro Martínez. (A Coruña, 1978). Fotoxornalista de Xornal de Galicia.

        Xosé Marra. (Lugo, 1956). Colaborou dende o ano 1982 en diversos medios (A Nosa Terra, El Ideal Gallego, El Correo Gallego, Diario 16 de Galicia, Axencia EFE, La Voz de Galicia, El Mundo de Galicia) e actualmente no diario El País.

        Carlos Folgoso Sueiro. (Verín, Ourense, 1982). Diplomado en fotografía e tecnoloxía multimedia pola Universidade Politécnica de Catalunya. Colabora con Diario de Arousa, La Voz de Galicia e revista Xente de Verín.

        Jesús Regal Rodríguez. (Ourense, 1974). De formación autodidacta é fotoxornalista de Faro de Vigo edición Ourense dende 2004. Ocasionalmente colabora co diario La Opinión de A Coruña e os suplementos Ourense en Vivo e Estela.

        Carlos Puga. (Pontevedra). Dende 1990 traballa como fotógrafo para a prensa diaria, editoriais, moda e publicidade. Os seus traballos ven a luz en publicacións como Viajar, Deviajes, Geo, Traveler, Altair, Maxim, Cambio 16, Paradores, Nova actualidade, Andares Gozosos, Hostelería Gallega, Marco Ferial, Pueblo Gallego y Mar. En 2001 recibiu o premio «José Aurelio Carracedo de periodismo de Galicia» concedido pola Deputación de Ourense.

        Gonzalo Salgado. (Pontevedra). Técnico en laboratorio de imaxe, completou a súa formación na escola Grisart de Barcelona. Comezou como fotoxornalista no Diario de Pontevedra e na revista ECO. Na actualidade traballa no Diario de Arousa.

        Jessica Barcala. (Pontevedra, 1986). Fotoxornalista que colabora coa Axencia Galega de Noticias.

        Miguel Riopa. (Campo Lameiro, Pontevedra, 1967). Formado na Escuela de Arte Maestro Mateo e no Centro de Estudios de la Imagen, en Santiago de Compostela. Traballou como fotoxornalista en Xornal Diario, Diario de Pontevedra, Diario 16 de Galicia, La Voz de Galicia e El Mundo. Foi corresponsal da Agencia EFE e de Associated Press. Na actualidade desenvolve a súa actividade profesional na Agence France-Presse, ademais de colaborar con varias editoriais e empresas dedicadas a comunicación empresarial. En 2004 gañou o premio de fotografía Luis Ksado cunha reportaxe

sobre os incendios forestais. En 2008 foi galardoado co segundo premio da categoría “Sport Features” no certame World Press Photo. Durante os años 2008 e 2009 codirixe o Festival Proxecta de fotografía en Vilagarcía de Arousa.

        Mónica Ferreirós. (Pontevedra, 1975). Realizou os estudos de fotografía na Escola de Artes e Oficios de Santiago de Compostela e de Imaxe na Escola de Imaxe e Son de A Coruña. Como fotoxornalista traballa para varios medios de comunicación galegos, Diario de Arousa, La Voz de Galicia, etc.

        Xan Xiadas. Fotógrafo freelance. Na actualidade colabora co Diario As, Axencia Área 11.

Sábado, 3 de xullo de 2010

493 peregrinos pernoctaron no Albergue de Tui no pasado mes de xuño

O Albergue de Peregrinos de Tui acolleu no pasado mes de xuño un total de 493 peregrinos, logrando neste Ano Santo Compostelán unha nova cifra récord de ocupación en relación cos anteriores anos xacobeos, pois no mes de xuño de 2004 a ocupación do albergue foi de 312 peregrinos mentres que no pasado ano 2009 o número de peregrinos acollidos acadou os 365.

Con esta cifra de case 500 peregrinos no pasado mes de xuño o nivel de ocupación do albergue tudense acada un 78% de media ao longo do mes. No que vai de ano o Albergue tudense ten acollida xa a 1828 peregrinos.

A procedencia dos peregrinos é maioritariamente española e portuguesa pero en menores números o albergue tudense acolleu a peregrinos procedentes de numerosos países europeos (Alemaña, Francia, Italia, Bélxica, Finlandia) e tamén doutras nacionalidades máis aloxadas que evidencia o poder de convocatoria que posúe o camiño de Santiago: Guinea, Xapón, Nova Zelanda, Estados Unidos, México, Cuba, Brasil, Arabia, Corea do Sur e Turquia.

O Albergue de peregrinos de Tui, ubicado na rúa Párroco Rodríguez Vázquez, ao carón da Catedral no corazón do conxunto histórico tudense,  posúe unha capacidade de 36 prazas para peregrinos en liteira e abre todos os días ás 13.00 horas e pecha as súas portas ás 22.00 horas. Para máis información os interesados poden chamar ao teléfonos: 986 600 729 - 638 962 806.

Para o concelleiro de Cultura tudense estes niveis tan elevados de ocupación evidencian os esforzos que está a desenvolver  este Concello de Tui arredor da promoción do camiño portugués entendido como un investimento de futuro pois resulta cada vez máis evidente que os camiños de peregrinación é un fenómeno, vinculado ao turismo cultural e relixioso, que adquire progresivamente maior relevancia. E na nosa cidade á converxencia co importante patrimonio cultural e natural da cidade, do que o camiño é unha referencia excepcional, converten a Tui nunha etapa de referencia nas rutas xacobeas.

En canto aos traballos de promoción, cabe lembrar segundo Moisés Rodríguez Pérez, a edición de folletos informativos, con información específica de interese para o peregrino en seis idiomas, ou a presenza en Tui de diversos grupos de xornalistas de España e Europa especializados en turismo, a acollida a peregrinacións como a das Cámaras e Concellos do camiño portugués celebrada o pasado sábado, etc. O perfil de Facebook “Tui camino de Santiago” é outro dos referentes desta promoción da cidade como destino turístico, así como en numerosos foros, páxinas e blogs nos que se debate sobre o roteiro portugués. O funcionamento do Centro de Interpretación do Camiño Portugués no antigo convento de San Domingos é outro dos fitos do traballo que desenvolve a Concelleria de Cultura tudense pola promoción e posta en valor do camiño de Santiago.

Estatística anual de ocupación do Albergue de Tui – Ano 2010

Rolda prensa Converxencia XXI

Converxencia XXI vai ofrecer hoxe sábado ás 12.30h unha rolda de prensa na Sala Félix Rodríguez da Área Panorámica co gallo celebración en Tui da executiva nacional do partido.

Comparecerá ante os medios o Secretario Xeral e candidato a alcaldía de Tui para as próximas eleccións municipais, Carlos Vázquez Padín, acompañado de algún membro da executiva.

O Club de Actividades subacuáticas logra tres ouros e dous bronces no Campionato de España  

O Club de Actividades Acuáticas do Baixo Miño participou no Campionato de España Infantil e Catedral de natación subacuática celebrado os días 26 e 27 de xuño en Barcelona, con 7 representantes.

Nesta proba Iván España Lado    proclamouse Campión de España ao lograr dúas medallas de ouro na categoría masculina cadete en 400 metros superficie e 400 metros escafandra.

Andrés Touza Blanco, tamén masculino cadete, é tamén Campión de España en 50 metros bialetas ao lograr a medalla de ouro, ao que sumou dous bronces en 100 metros bialetas e 50 metros apnea.

O resto dos participantes do club clasificáronse entre os dez primeiros postos nas probas nas que participaron.

Moisés Rodríguez, Concelleiro de Cultura fixo balance da actividade cultura

O Concelleiro de Cultura, Persoal e Facenda, Moisés Rodríguez, estivo onte no programa “Día a Día” da RMT para facer un repaso aos últimos acontecementos culturais da cidade a avanzar tamén algo dos preparativos para este verán.

Referíase Moisés Rodríguez a peregrinación das Cámaras Municipais portuguesas e os Concellos galegos que o pasado sábado chegou a Tui. Un acto que dicía foi importante polo número de personalidades que reuniu e tamén para defender a importancia do Camiño Portugués a Santiago.

En canto a programación cultural indicaba que o seu departamento está a xa a ultimar os detalles dos espectáculos que conformarán a oferta do segundo semestre do ano. Uns eventos que serán presentados en breve e cos que se busca satisfacer a todo o público. Avanzaba que entre as actividades que o Xacobeo presentará en Tui estarán sendos concertos de Dulce Pontes e Cristina Pato.

Con respecto a programación desenvolvida nos primeiros seis meses do ano facía unha valoración moi positiva porque indicaba que se mantén unha liña ascendente. Aludía tamén aos primeiros postos que Tui ocupa a nivel de público na Rede Galega de Teatros e Auditorios.

Noutra orde de cousas e con respecto á Concellería de Facenda indicaba que o orzamento que foi aprobado hai unha semana está moi axustado á realidade e acorde cos tempos que estamos a vivir.

Por outra parte Moisés Rodríguez referíase tamén a situación que se presenta nas praias de Areeiros e A Mariña onde Costas non permite levar a cabo o seu mantemento. Explicaba o edil que non entende esta decisión.

Venres, 2 de xullo de 2010

Bouza e Piña do Kaiak Tudense compiten hoxe no Europeo de Piragüismo

    Os  padeeiros do Club kaiak Tudense José Luís Bouza e Diego Piña están xa na nova pista de Trasona, en Avilés, onde a partir de hoxe competirán no Campionato de Europa de Piragüísmo.

    José  Luís Bouza participará no C1 1000 metros, mentres que Diego Piña formará parte do K4 1000 metros. Estes dous padeeiros estarán acompañados por Esteban Alonso, adestrador do Kaiak Tudense e tamén do k4 español.

    O primeiro en ter contacto coa competición será José Luís Bouza hoxe venres coa eliminatoria  ás 9:30 horas mentres que o seu compañeiro Diego entrará en competición tamén mañá venres ás 11:30 horas.

    O obxectivo dos padeeiros tudenses, ao tratarse dun campionato de Europa en España será ambicioso, así Diego Piña tratará de meterse na final, o cal sería un gran resultado xa que España leva anos sen estar nas finais en K4 1000 metros homes. Mentres que  José Luís Bouza, que o ano pasado foi medalla de bronce no Europeo, tentará sen dúbida, loitar polas medallas.

Ángel Vázquez de la Cruz presenta o libro “Luz de tebra”

    O pediatra tudense Ángel Vázquez de la Cruz vén de editar en Xerais o seu primeiro libro titulado “Luz de tebra”, que se pode atopar xa na meirande parte das librarías.

    Explicaba o autor na RMT que o título do libro vén do que acontecía nos anos 50 en Tui cando ao marchar a luz de Fenosa conectábase a do salto de Tebra que era mortecina. O título indicaba que é unha paradoxa da luz de tiniebla.

    O libro recolle unha serie de historias que naceron na súa infancia contadas pola súa nai e pola súa familia, xa que cando marchaba a luz contabas precisamente nos relatos.

    Ángel Vázquez de la Cruz ten previsto presentar o libro en Tui en outono.

Romaría das Angustias no Monte Aloia este domingo

    Este domingo celébrase no Parque Natural do Monte Aloia a Romaría das Angustias que ten lugar cada primeiro domingo de xullo. Haberá misas ás 9.30, 10.30 e ás 12.30 celebrarase a misa solemne con procesión

Continúa a programación de “Vida nas rúas”

        Continúa a programación de “Vida nas rúas” organizada por ACITUI. Hoxe de 11 a 13h volverá a haber Ludoescola co Rei Midas no Paseo da Corredoira. Esta tarde, tamén na Corredoira haberá Street Dance de 20 a 22h co profesor Vladimir.

Gran Polbada no Club Náutico

        O Club Náutico San Telmo ten mañá sábado dende ás doce do mediodía nas súas instalacións un polbeiro do Carballiño para quen desexe disfrutar dunha tapa de polbo á feira. Estára ata última hora da tarde.

Reunións para crear Comisións de Festas en Randufe e San Bartolomé

    A Comisión de Festas da Virxe da Guía convoca a todos os veciños de Randufe a unha reunión ás 21 horas no Palco da Guía.  O obxectivo é nomear unha comisión para as festas patronais deste ano.

    Por outra parte ás 21.30h hai unha reunión xunto ao palco da música de San Bartolomé para constituír tamén unha nova comisión de festas.

Proba de habilidade en Areas

        O Campo de fútbol de Areas acolle mañá sábado e o domingo a partir das 17h unha proba de habilidade. Haberá trofeos e premios en metálico para o 1º, 2º, 3º e 4º clasificado Amais sortearán unha cea para dúas persoas entre todos os participantes. 

Xoves, 1 xullo de 2010

O Servizo de Costas non permite ao concello de Tui o mantemento das praias de Areeiros e A Mariña

O alcalde de Tui informou na Radio Municipal de Tui que o Servizo de Costas non permite ao concello a limpeza e mantemento das praias de Areeiros, en Guillarei, e A Mariña, no Paseo Fluvial. Sinalaba nese senso Fernández Rocha que dous operarios municipais dispúñanse a facer estes traballos cando dende Costas advertiron ao Concello que se abstivese de facer calquera tipo de intervención nestes espazos, aténdose no caso de executar algún tipo de traballo ás consecuencias.

O rexedor tudense sinalaba que xa en anos anteriores Costas puxera bastantes pegas ás limpezas que o concello realizaba nestas dúas praias, sobre todo ao cortado da herba en Areeiros, e que xa o ano pasado lles advertiran que era o último en que lles permitían realizar este mantemento.

Fernández Rocha indicou que son moitas as chamadas que se están a recibir no concello ante o mal estado que presenta a praia de Areeiro onde a herba está xa moi alta, lamentando que o concello non poda facer nada para arranxalo.

Por outra parte Rocha informaba que Costas obrigou tamén a retirar a infraestrutura do chiringuito que outros anos había na Praia de Areeiros, non permitindo a súa colocación.

Amplo programa de actividades de ACITUI para este verán con oportunidades de lecer para todos

A Asociación de Comerciantes e Industriais de Tui, ACITUI, Informou aos seus asociados da posibilidade de acudir a subvencións para a mellora dos establecementos comerciais e da súa imaxe, así como das propostas deste colectivo para dinamizar o comercio local, tales como a Feira de oportunidades e a Programación de “Vida nas Rúas 2010”

Respecto á subvención da mellora dos establecementos comerciais e da súa imaxe, desde ACITUI explican que son axudas destinadas á reforma dos locais comerciais, mellora da imaxe comercial, e cambios de rótulo ou toldos.

No comunicado aos asociados, o colectivo empresarial tudense relaciona os códigos CNAE (4511, 4519, 4532, 4540, 4711, 4719, 4721, 4722, 4723, 4724, 4725, 4729, 4774, 4775, 4751, 4771, 4772, 4753, 4759, 4742, 4743 4754, 4763, 4752, 4761, 4762, 4778, 4777,4764, 4765, 4753, 4776, 4778, 4719, 4741, 4742, 4778 ou 4779) que poden acollerse a estas subvencións, e resume a contía das axudas que se conceden pola Administración autonómica que son, para reformas ou ampliacións de locais: 20.000 euros ao 70% (subvención ata 14.000 euros); as medidas orientadas á mellora da imaxe: 12.000 euros ao 50% (subvención ata 6.000 euros), e a creación, implantación e expansión de cadeas sucursalistas e comercios de téxtil, calzado ou xoiaría en locais desocupados de conxuntos históricos: 20.000 euros ao 50% (subvención ata 10.000 euros).

Feira de oportunidades e Vida nas Rúas

A Asociación de Comerciantes e Industriais de Tui ten previsto realizar a feira de oportunidades os días 31 de xullo e 1 de agosto, polo que solicitan a todos os interesados que se poñan en contacto coa dirección de ACITUI.

ACITUI tamén lembra que desde o 28 de xuño puxo en marcha a súa programación de Verán, “Vida nas Rúas 2010”, que se prolongará durante os meses de xullo e agosto, co obxectivo principal de animar as rúas da cidade con actividades ao aire libre para atraer ao público a cidade de Tui.

Este ano ACITUI segue  apostando por fórmulas que tiveron éxito noutras edicións, pero tamén introduce novas alternativas.

Na programación de “Vida nas Rúas 2010”, figuran a Ludo-escola, ata o 31 de xullo, de luns a venres, agás os xoves, dende as 11.00 ás 13:30 horas, con actividades variadas: o Profesor Vladimir: do 1 ao 31 de xullo; Street Dance, os luns e venres.(de 20.00 a 22.00 horas); Xadrez, os martes e xoves.(de 20.30 a 22.30 horas), e Xogos tradicionais con batuka, os mércores.(de 20.00 a 22.00 horas).

Outras alternativas serán o V Encontro de Teatro e Artes de Rúa Cidade de Tui, os días 6, 7, 8 e 13, 14 e 15 de agosto; e o Festival de Jazz os días 16, 17 e 18 de xullo coa actuación, o venres, día 16, do combo de Jazz “Quenllazz” entre as 20.30 e as 22.00 horas; o sábado, 17,

Class de Jazz a cargo de Xan Campos (pianista), de 10.00 a 13.30 horas, e  un concerto a cargo de Xan Campos Group ás 21.00 horas. E o domingo, día 18, concerto dos alumnos da Master Class a partir das 20.00 horas.

En agosto terá lugar un Festivalde percusión. O venres, día 27, Taller de Percusión Perciclando, trátase de facer percusión con materiais reciclados, comezando ás 20.00 horas; e concierto del grupo Reagee-Ská “La vagabanda“ de Redondela, ás 22.00 horas.

O sábado,  día 28, Taller de Escola de Samba, desde as 10.30 horas, e ás 20.00 horas, actuación e pasarrúas do bloco de samba “ Cencerro Nejro “.

O domingo, día 29, concerto e pasarrúas coa Treboada do Baixo Miño, desde as 20:00 horas.

Ademais todas as segundas fins de semana de cada mes, celebrarase a Feira de Artesanía, e os terceiros fins de semana, a Feira de Antigüidades.