Índice

www.galiciasuroeste.info

 

XUÑO

 

Xoves, 30 de xuño de 2016

Exposición de pintura do Grupo Impás no Centro Goianés, do 1 ó 14 de xullo

O Grupo Impás inaugura hoxe, ás 20.30 horas, a súa exposición colectiva, que se poderá visitar no Centro Goianés do 1 ó 14 de xullo, de 11 a 14 horas e de 17 a 22 horas.

As obras que se expoñen son da autoría de Pilar López, José Luís Rodriguez, Charo Trigo, María Rodríguez, Fini Mauri, Laura Baz, Daniel Vicente, Nacho Martínez, Paula Vicente e Mario Vicente.

O Grupo Impás naceu no ano 1990 baixo a dirección da pintora guardesa Alicia Alonso, e está formado por homes e mulleres do Baixo Miño, de idades e profesións variadas, e que para as súas creacións utilizan técnicas variadas: óleos, pastel, debuxos de carboncillo e grafito.

Teñen exposto nos cinco concellos do Baixo Miño con gran aceptación do público.

 

O programa de reforzo escolar “É aprender” pecha a súa cuarta edición con boa nota

A cuarta edición do programa de reforzo escolar gratuíto “É Aprender”, impulsado desde o Concello, chegou ao seu fin con bos resultados.

Coordinados pola mestra Silvia Loureiro e voluntarios, máis de cincuenta estudantes de Primaria e ESO, desenvolven ás súas capacidades e destrezas, ao tempo que atopan motivación no estudo.

O programa “É Aprender” un proxecto educativo integral, pioneiro, que foi premiado por UNICEF no 2014 no VII Certame de Boas Prácticas. Un programa de reforzo escolar no que participan (en total) uns 50 alumnos de 5º e 6º Primaria e primeiros cursos da ESO, que estreou este curso metodoloxía e ideas.

Impártese de luns a xoves en seis lugares diferentes: no Centro Social de Estás, Casa Cultural de Currás, Casa Cultural de Santa María de Tebra, OMIX de Tomiño, Escola Obradoiro de Goián e pavillón de Barrantes, dúas horas á semana en cada espazo.

É de salientar neste sentido, que o programa “É Aprender” conta ademais cun servizo de apoio psicolóxico, subvencionado polo Concello, para aqueles alumnos con dificultades de aprendizaxe ou adaptación, e polo que pasaron máis de 20 nenos durante todo o curso.

Durante o acto de clausura, Silvia Loureiro, fixo un balance positivo, indicando que “a maioría dos nenos veñen contentos e melloraron o seu rendemento académico, ademais de tratar en clase temas de actualidade que poden afectarlles, coma o bullying, os trastornos alimenticios, etc.”.

Xornal educativo

O acto de clausura, que contou coa presenza da alcaldesa, Sandra González, aproveitouse para facer a presentación oficial dun xornal no que o alumnado traballou durante este curso.

Carmen e Ana, de 1º da ESO, por exemplo, foron as encargadas de exercer de xornalistas ante a xefa de estudos do IES de Tomiño, á que entrevistaron. A mesma tarefa desempeñaron por un día Alejandra, Alín e Ari, todas de 5º de Primaria do colexio de Goián, que entrevistaron á directora do centro, xunto a Claudia, que fixo as fotos.

Lucas, 1º da ESO, realizou debuxos, chistes e sopa de letras.

Outras accións formativas

Ao programa “É Aprender”, súmanse varias accións educativas máis, destinadas a persoas con diferentes idades e nivel de estudos, como é o caso dos cursos para o Graduado en ESO; os cursos AFD para desempregados/as; a Aula Cemit, con distintos cursos de informática, os cursos de fitosanitarios e as actividades extraescolares solidarias dentro e fora do horario lectivo.

En canto a infraestruturas relacionadas coa mellora educativa, figuran a nova escola infantil de Goián, con 61 prazas de 0 a 3 anos; a futura biblioteca e a ampliación do CEIP de Sobrada, con tres novas aulas de Infantil.

 

Mércores, 29 de xuño de 2016

Primeira velada de boxeo en Tomiño, o sábado, no Pavillón Polideportivo de Goián

A Concellería de Deportes organiza, co club Spartan Team Tomiño, a primeira Velada de Boxeo Concello de Tomiño, que terá lugar este sábado, 2 de xullo, ás 21.30 horas no Pavillón Polideportivo de Goián.

A velada contará con espectáculos de boxeo tradicional, boxeo francés (Savate) e “Muay Thai”, con recoñecidos deportistas destas disciplinas.

O presidente do club Spartam Team, informou que o custe das entradas será de 7 euros, se a compra é anticipada, e 10 euros en taquilla, poidéndose adquirir en “Vaya Punto” (Goián); “A Riña” (Oia); “VIP” (Tomiño); “Pool Chaos” (A Guarda) e “LVE Padel Box” (Vigo).

 

Éxitos de Piragüístas da comarca na Copa de Europa disputada en Eslovenia

Informa Rosa Fernández Carrero

Durante o sábado e o domingo celebrouse na canle de augas bravas de Solkan en Eslovenia a Copa Europea de slálom júnior e sub-23 coa participaron de 370 piragüistas de 23 países. Catro foron os galegos que acudiron a esta proba formando parte da selección española júnior e sub-23: Luís Fernández, Brais Castro e Manuel Ochoa dos Teixugos e Ainhoa Lameiro do Club Penedo de Caldelas.

Durante a mañá do sábado tiveron lugar as probas clasificatorias, os catro galegos entraron nas finais que se celabraron pola tarde. Luis Fernández acabou primeiro en C1 sub-23, Brais Castro sétimo en C1 sub-18, Manuel Ochoa tamén sétimo en K1 sub-18 e Ainhoa Lameiro cuarta en C1 sub-16.

Durante o domingo repetiuse o sistema de competición, pola mañá clasificatorias e pola tarde finais. Outra vez os catro galegos foron quen de entrar nas finais das súas categorías. Xa pola tarde, Luís remataría de novo primeiro, Brais duodécimo, Manuel octavo e Ainhoa primeira.

Os resultados das probas dos dous días sumáronse para obter os postos finais dos participantes.

Finalmente só subiron ao podio Luís Fernández do Club Deportivo Miño-Teixugos cunha medalla de ouro, e Ainhoa Lameiro, do Penedo, que acadou a prata.

Aínda que Luís Fernández xa leva varios anos formando parte do equipo español, este ano ademais entrou no absoluto; para os outros tres, esta foi a súa primeira experiencia internacional. Este é un éxito sen precedentes para o slálom galego, grazas en boa parte ao bo facer do Centro Galego de Tecnificación Deportiva no que están becados 6 palistas de slálom adestrados por Ekhi Díez.

A seguinte cita será no Campionato do Mundo que terá lugar, entre o 14 e o 17 de xullo, en Cracovia (2016 ICF Junior&U23 Canoe Slalom World Championships)

 

Tomiño acollerá o remate do proceso participativo do Grupo de Desenvolvemento Local 14 cun concerto e solta de farolillos de ceo

Este xoves, 30 de xuño, a Praza do Seixo de Tomiño será o escenario para a presentación da candidatura final do Grupo de Desenvolvemento Local GDR 14, que aglutina a 13 concellos e que opta a xestionar entre 3 e 5 millóns de euros do Porgrama LEADER Galicia 2014-2020.

Nos últimos 3 meses a poboación volcouse na elaboración participativa da estratexia que define como se priorizará a inversión dos fondos para o desenvolvemento do territorio, cuxo resultado final deste proceso de participación é o documento que se presenta nun acto que quere ser unha celebración polo traballo realizado mediante un concerto a cargo do grupo Weli Kings, que fará un percorrido musical a través de éxitos de todos os tempos, e tamén das cancións tradicionais de Galicia revisadas, fusionadas e reinventadas.

Ademais, ao caer a noite, e como acto simbólico da finalización do proceso

Participativo, o público asistente terá a misión de facer unha solta de farolillos de ceo, que iluminarán durante uns minutos o ceo de Tomiño.

 

Martes, 28 de xuño de 2016

O concello destina dúas persoas para limpar e manter as sendas próximas ao Miño e o Espazo Fortaleza durante o verán

 

O Concello de Tomiño vén de acondicionar a senda pola beira do Miño para o seu disfrute de cara ao verán. Os labores de limpeza e mantemento leváronse a cabo nos dous tramos da senda, é dicir, tanto no que une a zona da Ponte da Amizade co Espazo Fortaleza, coma a que se estende dende este último ata a praia de Eiras, no Rosal.

Ambas sendas suman uns catro quilómetros de percorrido, cun alto valor paisaxístico, histórico e turístico, que moitos veciños e veciñas transitan xa a pé ou en bicicleta.

Francisco Campo Lago, concelleiro de Vías e Obras, salienta o traballo que dende o Concello están levando a cabo co fin de abrir Tomiño ao río. “Esta senda permite a nosa veciñanza, coma así tamén aos que nos visitan nestes meses, camiñar, andar en bici ou correr por un espazo válido para facer deporte pero tamén para apreciar a beleza do noso territorio”, afirma.

Con este fin, o Concello dispuxo dúas persoas que de forma permanente levarán a cabo tarefas de limpeza e mantemento, tanto nas sendas coma no propio Espazo Fortaleza, durante os vindeiros meses

O próximo tramo no que se está traballando, enlazará este enclave coa antiga comandancia de Forcadela, sumando máis quilómetros de cara a Tui.

Esta obras foron financiadas en parte con fondos europeos, así coma parte dos paneis interpretativos cos que contan as sendas, xa que a sinalización e interpretación é outro dos propósitos do goberno local, preocupado por pór en valor o patrimonio ambiental do municipio.

 

Sábado, 25 de xuño de 2016

Tres Teixugos na Eca Junior Cup de Solkan, Eslovenia

Esta fin de semana dispútase na canle de Solkan, en Eslovenia, a Copa Europea de slálom júnior e sub-23, coa participación de tres piragüistas do Club Deportivo Miño formando parte do equipo nacional.

En canoa sub-23 estará Luís Fernández,  de 19 anos, piragüista de Salceda de Caselas, que ten o mérito engadido de formar parte do equipo nacional absoluto.

Na selección júnior estarán os tomiñeses Brais Castro e Manuel Ochoa de 17 anos. Esta é a primeira competición internacional para os dous. Brais Castro en canoa e Manuel Ochoa en kayak.

Destacar tamén a presenza doutra galega, Ainhoa Lameiro, do Club Penedo de Caldelas.

Todos eles levan uns días adestrando na canle de Solkan, que ademais lles sirve de preparación para o Campionato do Mundo a disputar en Cracovia nun par de semanas.

Este sábado e domingo teñen lugar as competicións que contan cun total de 370 participantes de 23 países.

 

Venres, 24 de xuño de 2016

A Banda de Música de Goián celebra este domingo o seu aniversario cun encontro na praza da parroquia

A Banda de Música de Goián celebra o seu aniversario o domingo, 26 de xuño, ó mediodía, cun encontro na Praza de Goián, no que participarán as agrupacións infantil, xuvenil e sénior.

A celebración completarase cunha churruscada para os compoñentes da agrupación musical, alumnos da escola e profesorado.

 

Tomiño organizou nove cursos de fitosanitarios, polos que pasaron 270 persoas

No primeiro semestre do ano, o concello de Tomiño, en colaboración cun centro homologado da comarca, organizou nove cursos de  Aplicador e Manipulador de Produtos Fitosanitarios, polos que pasaron unas 270 persoas, cunha media de idade das de 60 anos, sendo a maioría xubilados ou pensionados.

Dada a alta demanda por parte da poboación, foi necesario organizar diferentes quendas en horarios de mañá e tarde.

A duración da actividade foi de 25 horas repartidas en sesións de tres horas diarias, de luns a venres. O último día, a academia encargada dos cursos realizou o exame que lles dá dereito á obtención do carné, obrigatorio para poder adquirir ou aplicar produtos fitosanitarios de uso profesional.

 

A alcaldesa de Tomiño solicita á Xunta a financiación do colector xeral que daría saneamento a 3500 habitantes das parroquias de Amorín, Currás, Sobrada e Piñeiro

A alcaldesa de Tomiño, Sandra González, reuniuse co presidente de Augas de Galicia, Roberto Rodríguez Martínez, en Santiago de Compostela, co fin solicitar unha vez máis, que a Xunta de Galicia, permita levar a cabo, tal como estaba previsto en anteriores lexislaturas, o treito 3 do colector xeral, que posibilitaría solucionar a situación  das parroquias de Amorín, Sobrada e Currás, tres das parroquias máis afectadas, pola falta de saneamento.

A rexedora tomiñesa agradeceu a boa disposición do director do organismo, que se comprometeu a estudiar en profundidade o caso para ver a súa viabilidade, a través dalgunha liña de programas europeos que permita financiar este tipo de obras.

Durante a reunión, a alcaldesa presentoulle un resumo das actuacións levadas a cabo en temas de saneamento nos últimos anos, nos que se pasou das 1020 vivendas que había en 2007 ás 2822 que na actualidade contan con este servizo.

O investimento total para conseguir este cambio supera os 5 millóns de euros, investidos durante as tres últimas lexislaturas, completándose este ano o saneamento dos barrios próximos ao casco urbano, que dará servizo a 160 novos fogares.

O “III Tramo do Colector Xeral Torrón-Carregal” é un proxecto que conta con todos os informes e autorizacións sectoriais necesarios e con compromiso de financiamento de 1,5 millóns de euros por parte do goberno da Xunta de Galicia dende o ano 2007.

A pesar de ter todos os permisos e informes preceptivos e de aprobar o inicio do expediente de expropiación, no ano 2009, a Confederación Hidrográfica Miño-Sil traslada a competencia do proxecto a Augas de Galicia. E dous anos despois ocorre xustamente o contrario, declarando no 2012 a Confederación Hidrográfica a imposibilidade de realizar o colector.

No 2014 trasládase novamente a Augas de Galicia a competencia do proxecto, mantendo a alcaldesa de Tomiño sendas reunións cos directores deste organismo para tentar reflotar a obra, de momento, sen éxito.

A materialización do mencionado colector Torrón-Carregal significaría dotar do servizo de saneamento a máis de 3500 veciños das parroquias de Amorín (Carregal de Arriba, Carregal de Abaixo, Arrotea, Outeiro, Baceiro); Currás (Estrada, Monte, Cruceiro, Barral); Sobrada (Aldea, Torrón, Escampados, Outeiro, Gandariña, Monte, Portela, Cruceiro, Gándara) e Piñeiro (Bouzón, Bouzada, Riás). A zona máis próxima ao termo municipal de Tui e a que na actualidade non posúe alcantarillado, tendo que asumir altos custes de baleirado de foxas sépticas, con riscos de contaminación de augas e do entorno ambiental.

 

Mércores, 22 de xuño de 2016

Aínda quedan prazas para as actividades de verán organizadas polo concello de Tomiño

O concello de Tomiño informa de que aínda quedan prazas vacantes nalgunhas das actividades deportivas, culturais e medio ambientais, que se desenvolverán durante o verán, e que comezarán o 28 de xuño co cursiño de promoción do piragüismo para nenos de entre 8 e 14 anos, sendo requisito fundamental saber nadar, sendo o seu custe de 15 euros en total.

Saber nadar e ter alo menos 14 anos, é requisito para poder participar nas “Rutas ambientais de descenso en kayak polo río Miño”, que se desenvolverá os sábados de xullo e agosto, cun prezo de 5 euros por cada xornada na que se participe, actividade que conta co maior número de prazas vacantes.

Tamén quedan algunhas prazas para os campus de fútbol, tenis e pádel, impartíndose o primeiro, que conta coa colaboración do Goián F.C. e A.D. Tomiño, entre o 18 e o 30 de xullo dirixido ás idades de 5 a 16 anos, e un prezo de 55 euros.

Os campus de tenis e pádel, desenvolveranse durante os meses de xullo e agosto, para as idades de 6 a 16 anos, e un custe mensual de 20 euros por participante.

Campamento Urbano

O Campamento Urbano, diríxise aos nenos nados entre os anos 2004 e 2011, desenvolvéndose do 4 ao 29 de xullo en horario de mañá, cun custe de 25 euros, coas prazas xa cubertas e lista de agarda.

Por último, o programa ofrece tamén clases de Ioga tibetano e taichi para persoas de máis de 18 anos de idade, terá lugar nos meses de xullo, agosto e setembro, cun custe total de 15 euros por participante.

Para máis información e inscricións, é necesario contactar co servizo de Mocidade, Cultura e Deportes, no teléfono 986 62 20 01; pasar pola OMIX (A Rocha, 8) en horario de mañá, ou ben enviar un correo ao enderezo omix@concellotomino.com

 

O Colexio Público de Sobrada poderá por fin  ter as aulas de infantil no mesmo edificio que as de primaria

O colexio público de Sobrada, verá materializada unha vella aspiración, que vén demandando á Xunta hai varios anos.

Onte, martes, o xefe territorial de Educación, César Pérez Ares, visitou o centro para anunciar o investimento de 250.000 euros na construción das aulas de Educación Infantil no mesmo edificio en que están as de Primaria. Até o de agora, os máis pequenos tiñan que asistir a clase na antiga escola unitaria, situada en fronte do CEIP, e tendo que cruzar a estrada que as separa para realizar varias das actividades, como educación física e visitas á biblioteca. O que resulta incómodo en días de chuvia e reviste certa perigosidade.

Segundo explicou Rafael Bouzas, arquitecto xefe da Unidade Técnica, a obra consistirá en utilizar un dos patios cubertos do centro para construír, nos seus 230 metros cadrados de superficie, tres aulas de Infantil cos seus respectivos aseos adaptados; unha sala de psicomotricidade e usos comúns e un pequeno almacén.

Desta nova instalación, que estará dotada de iluminación de aforro enerxético e dúas ramplas de acceso, beneficiaranse cincuenta nenos de Educación Infantil que, na actualidade asisten ao colexio regularmente.

Durante a visita ao centro, acompañaron ao xefe territorial os concelleiros de Obras e Medio Rural, Francisco Campo Lago e Lois Vázquez, respectivamente, xa que a alcaldesa, Sandra González, asistía a esa mesma hora a unha cita en Augas de Galicia.

A rexidora local agradeceu este novo investimento, pero lamentou que non se fixese antes, xa que deste xeito, o Concello non tería investido importantes partidas en acondicionar a escola unitaria á que asiste o alumnado de Infantil na actualidade.

 

Martes, 21 de xuño de 2016

O concello de Tomiño organiza un curso de formación de adultos co fin de preparar ao alumnado para obter o graduado da ESO por libre

O Concello de Tomiño organiza un curso de formación de adultos co obxectivo de preparar ao alumnado para obter o graduado da ESO por libre, debendo cumplir os interesados requisitos coma estar empadroados en Tomiño, non estar matriculado oficialmente en ningún curso da ESO, en ningún centro educativo de Galicia, e ter cumpridos 18 anos antes do 8 de setembro de 2016.

Os interesados poderán inscribirse oficialmente no rexistro municipal do Concello, entre o 21 e o 25 de xuño (ata as 13:00 horas), presentando o modelo de solicitude dispoñible no rexistro do concello xunto cunha fotocopia do DNI.

Ademais os interesados terán que acudir ás probas do proceso de selección que se celebrarán o martes, 28 de xuño, as 19:00 horas no Edificio da Escola Obradoiro de Goián.

Durante o curso de verán 2016, as clases terán lugar os martes, mércores e xoves de 19:00 a 22:00 horas no Edificio da Escola Obradoiro de Goián.

                                                                                            

A Axenda Estratéxica Cerveira-Tomiño avanza co “Orzamento Participativo Transfronteirizo” e “Deporte para todos”

O Comité de Xestión Estratéxica (CGE) da Amizade Cerveira-Tomiño, reunido a semana pasada en Vila Nova de Cerveira e constituído polos alcaldes, Fernando Nogueira e Sandra González, e respetivo secretariado técnico de ambos os concellos, vén de aprobar, con aplicación en 2017, a realización do primeiro Orzamento Participativo Transfronteirizo e a dinamización do proxecto interxeracional “Deporte para Todos”.

Está dado un paso máis na consolidación da cooperación transfronteiriza Cerveira-Tomiño. O Comité de Xestión Estratéxica (CGE, trazou un conxunto de medidas concretas que, alén de afondar as relacións institucionais, busca envolver os cidadáns dos dous concellos veciños na formulación de solucións para necesidades comúns.

Baseado no concepto da “desfronteirización”, en 2017 vai avanzar o proxecto-piloto do Orzamento Participativo Transfronteirizo Cerveira-Tomiño, cun importe global de 20 mil euros, repartido a partes iguais entre os dous municipios, nas áreas de intervención Cultura/Xuventude, Educación e Acción Social.

Neste encontro, o Comité de Xestión Estratéxica tamén deu luz verde ao proxecto “Deporte para Todos” que propón unha oferta de actividade deportiva saudábel, controlada e adaptada ás poboacións de Cerveira e Tomiño con máis de 55 anos de idade.

Será aplicado un plan de adestramento que busca o benestar psicolóxico e físico, a evolución e mantemento da motricidade, e a convivencia e o intercambio cultural entre as dúas comunidades veciñas.

Outra das medidas que está aínda a ser analizada é a creación da figura do Provedor de Cidadanía Transfronteiriza, exercendo funcións de interlocutor entre as poboacións e os propios gobernos autónomos. Neste momento, os responsábeis definiron o perfil ideal, quedando por determinar a metodoloxía de selección e divulgación nas próximas reunións.

É de subliñar que, desde a súa constitución formal en 2014, a cooperación transfronteiriza Cerveira-Tomiño, está a desenvolver un traballo dinámico entre entidades e poboacións, procurando coñecer e recoller suxestións, para a concreción da Axenda Estratéxica.

Así, na actualidade, están a reunirse tres grupos de traballo temáticos Cultura/Xuventude, Educación e Acción Social.

Asemade, a celebración dunha programación cultural conxunta de oito eventos tamén está a ser levada adiante; así coma a presentación do Parque Transfronteirizo Cerveira Tomiño Travesía Peonil, que unirá ambas beiras nun futuro próximo.

O Comité de Xestión Estratéxica (CGE) da Amizade Cerveira-Tomiño reúnese novamente a finais de xullo, en Tomiño, para dar seguimento a máis accións comúns.

 

Copa Galega de Promoción de Slálom en Tui

Informa Rosa Fernández Carrera

Este pasado domingo o Club Deportivo Miño-Teixugos acudiu ao Porto Deportivo de Tui, onde se celebraba a Copa Galega de Promoción de Slálom e o Campionato Nacional Portugués de esperanzas de piragüismo.

Ao logo da mañá nenos e nenas de 8 a 14 anos, as pequenas promesas de cada club, fixeron dúas mangas. Na Liga Galega de promoción tense en conta o mellor tempo das dúas mangas para facer a clasificación final.

Os Teixugos, como xa é habitual non volveron de baleiro. En K1 Alevín Ainhoa Barreiro foi ouro e Alba Soutelo prata, os mesmos postos que acadaron en C1, volvendo cada unha con dúas medallas. En K1 Infantil Ariadna Pereira conseguiu a medalla de prata e en C1 foi ouro. Sergio Martínez foi ouro en K1 Alevín e prata en C1, modalidade esta última na que Samuel Castro foi ouro. Marco Patiño acadou a prata en K1 Cadete. Tamén o deron todo, aínda que sen medalla, Valentina Feijoo, Cristian Vicente e Adrián Lluch, porque o importante é o esforzo e as ganas de facer deporte.

Na clasificación final por equipos impúxose o Club Penedo de Caldelas, o segundo posto foi para o Club Tea de Mondariz e o Club Deportivo Miño quedou en terceiro lugar.

FOTOS: https://picasaweb.google.com/109529194923691483792/6297913494409908977

 

Luns, 20 de xuño de 2016

Luís Bará: “Galiza precisa forzas que aposten polos recursos desta terra: o viño, a horta, a planta ornamental... O BNG é a única garantía”

 “Nesta terra somo potencia no viño, na horta, na planta ornamental... e para desenvolver todas estas potencialidades precisamos forzas galegas que aposten polos recursos de Galiza. O BNG así o fará en Madrid, igual que o está a facer o goberno de Tomiño aquí no Baixo Miño: defenderá os intereses do país. É a única garantía”. Así o indicou en Tomiño o cabeza de lista do BNG-Nós para o Congreso pola provincia de Pontevedra, Luís Bará, que estivo acompañado no mitin central da comarca de cara ás xerais do 26X pola portavoz nacional do BNG, Ana Pontón.

Bará subliñou o traballo feito na comarca pola diversificación de cultivos e pola formación de asociacións e cooperativas coa finalidade de chegar a mercados novos para xerar riqueza e traballo. “Temos que defender e desenvolver os nosos recursos. Neste país sabémolo facer ben se nos deixan”, subliñou, para engadir que a día de hoxe o principal problema dos emprendedores da zona é a falta de terreos para ampliar a súa produción, que está tendo demanda internacional. Neste sentido volveu a lembrar o proxecto do banco de terras que puxera en marcha o BNG cando estivera na Xunta de Galiza e que o Partido Popular botou abaixo. “Ese era outro dos moitos proxectos que podían desenvolver as riquezas do noso país, pero quedou no caixón. Canto o botan de menos agora os produtores... !”, sinalou.

“Galiza ten futuro se a deixan, xa que a pesares das limitacións que nos impoñen dende Madrid ou Europa as xentes do país conseguimos ser innovadores e levar proxectos adiante. Aquí en Tomiño hai moitos exemplos”, sinalou, para destacar a grande produción de camelia que se exporta a diario a toda centroeuropa. “Aquí unha camelia medra nun ano o que tarda tres anos en medrar en Alemaña. Temos que aproveitar estas potencialidades e poñer Galiza a producir para sacar o país adiante. Como dicía Celso Emilio, ‘non virá de fóra remedio ou esperanza’”, asegurou.

O candidato nacionalista lembrou que as eleccións do vindeiro domingo non son unha segunda volta nin unha reválida, senón  a segunda oportunidade para que Galiza poida ser protagonista na formación de Goberno en Madrid. “Dous deputados do BNG poden marcar políticas favorables aos intereses dos galegos e galegas xa que non haberá mariorías absolutas e os pactos serán fundamentais. E quen defenderá aos galegos e galegas senón o BNG? Quen vai falar do viño galego? Quen vai falar do noso campo? Da nosa pesca? Os únicos seremos nós”, finalizou.

Deputados cautivos

Pola súa banda, a portavoz nacional, Ana Pontón, fixo un chamamento á mobilización nesta recta final de campaña “petando en todas as portas en todos os corazóns”, sen “arrugarse” ante as enquisas e explicando as propostas do BNG desde o convencemento de que o voto realmente útil en Galiza é o voto á candidatura nacionalista. Porque é garantía de cambio, garantía de suma para finiquitar ao PP pero, ao mesmo tempo, é garantía de que este país volve recuperar unha voz propia no Congreso”, argumentou.

En Galiza o voto realmente útil é o voto ao BNG porque sen maiorías absolutas é clave ter representantes capaces denegociar a favor de Galiza, que non vaian coas man atadas a partir do 26X”, explicou. Outros votos poden ser útiles para Rajoy, Sánchez ou Iglesias, pero inútiles para os galegos e as galegas porque non van defender os nosos intereses, non van defender o traspaso da AP-9, nin unha tarifa eléctrica galega ou saneamento das rías. Son votos cautivos que non van negociar nada para Galiza”, alegou a portavoz do Bloque.

A portavoz do Bloque fixo fincapé en hai enquisas que mesmo colocan a maioría absoluta ao borde dun escano. Nun escenario no que un só deputado pode ter a chave do próximo Executivo, o voto máis útil en Galiza é ao BNG porque non ten que pedir permiso a Rajoy, Sánchez ou Iglesias senón que pode negociar con ese goberno. Por que ese deputado que condicione ten que ser vasco, catalán ou valenciano, por que non vai ser galego?”, dixo.

 

Sábado, 18 de xuño de 2016

Acto público aberto do BNG- Nós-Candidatura Galega en Tomiño

Mañá, domingo, ás 21:00 horas, o BNG convoca un acto aberto na Praza do Seixo (en caso de choiva realizaráse na Casa da Cultura de Tomiño), no que intervirán Sandra González (alcaldesa de Tomiño), Míriam Rodríguez  (candidata nº 4 ao Congreso), Ana Pontón (Portavoz Nacional do BNG) e Luis Bará (candidato ao Congreso por Pontevedra).

 

Acto socialista en Tomiño

Este domingo, a las 19.30 horas, en el Centro Tomiñés (antiguo Casino), habrá un acto público del PSOE de Tomiño en el que intervendrán Mónica Hermida, portavoz municipal y concejala; Lola Galovart, número 1 para el Congreso, y Abel Losada, diputado autonómico y número 1 para el Senado.

  

O Concello organiza o programa de maiores coa colaboración de Vontade, COGAMI e gabinetes pedagóxicos

O programa de maiores da Concellaría de Servizos Sociais do Concello de Tomiño, que dirixe Cristina Martínez, organiza unha serie de actividades, totalmente gratuítas, co obxectivo de promover o envellecemento activo da poboación.

Tres grandes liñas de traballo forman parte do programa levado adiante polo Concello coa colaboración das entidades para persoas con discapacidade Vontade e COGAMI e gabinetes pedagóxicos, e que permiten ás persoas de idade avanzada a manter áxil as áreas cognitiva, física e social.

O obradoiro “Activa a túa mente”, ten coma finalidade estimular e manter as capacidades mentais e retardar o avance de enfermidades neuro dexenerativas. “Tratamos de mellorar as capacidades cognitivas dos usuarios co fin de mellorar a súa calidade de vida”, explica Bibiana Álvarez, psico- pedagoga encargada.

Por outra banda, estes talleres funcionan coma un espazo de ocio e distracción “no que se fomenta a relación interpersoal e o traballo en equipo, logrando reducir os niveis de ansiedade e depresión”.

Actividades relacionadas coa linguaxe, exercicios de vocabulario, frases e refráns, lectura, etc., intercálanse coa resolución de problemas da vida diaria, xogos de cálculo mental, sudokus, tarefas para exercitar a atención, a concentración, a memoria, a planificación, etc.

A metodoloxía que se emprega tenta ser o máis dinámica posible, buscando a participación e a integración de todos os asistentes. 

“Dende o comezo da actividade, a melloría que se notou nos usuarios do taller é asombrosa, tanto no seu nivel cognitivo persoal coma na integración grupal que se alcanzou”, asegura Bibiana Álvarez.

Por outra banda, os maiores realizan diferentes exercicios de “movemento terapéutico”. A idade e patoloxías dos participantes non é un problema, xa que o nivel de esforzo está regulado e adaptado ás capacidades de cada quen.

Movemento das articulacións, exercizos de coordinación, psicomotricidade , reforzo da musculatura, axilidade, equilibrio, e forza son outras actividades físicas que tamén se realizan dentro do programa municipal.

Por último, dentro da denominada “educación non formal”, desenvólvense actividades para fomentar a integración e participación social, proporcionando recursos e estratexias que permitan un desenvolvemento individual equilibrado. Con este fin, organízanse obradoiros manipulativos (masa de sal, flores de papel reciclado) xogos populares, pasatempos, roteiros e saídas; visitas culturais, actividades puntuais en datas sinaladas (Letras Galegas, Día da Muller Traballadora), encontros interxeracionais, etc. Esta terceira área está a cargo de Marta Moure, educadora social de COGAMI.

Outros talleres que se están levando a cabo con carácter experimental, son musicoterapia, bailoterapia, risoterapia (Venres Saudables), impartidos pola psicóloga Mercedes Rodríguez de COGAMI.

 

Venres, 17 de xuño de 2016

O xefe territorial de Medio Rural inaugurou en Tomiño as xornadas de traballo entre grupos de desenvolvemento de España e Portugal

Organizado pola Red Rural Nacional e o Grupo de Desenvolvemento Rural GDR 14, Tomiño acolle o III Intercambio de experiencias Leader no territorio, no que participa unha trintena de técnicos de grupos de desenvolvemento local de España e Portugal.

Onte tivo lugar o acto de benvida aos participantes do “III Intercambio de experiencias LEADER en el territorio”, que se celebra en Tomiño, con persoal técnico de máis de 10 grupos de desenvolvemento rural de todo o territorio español (Badajoz, Sevilla, Asturias, Cáceres, Cantabria, Valladolid e Galicia) e 2 de Portugal.

Os expertos, ademais de intercambiar experiencias de cooperación, traballarán na posta en marcha do proxecto de cooperación “Potenciando capacidades no rural”, que ten coma obxectivo crear un sistema de formación en competencias crave para persoas adultas con risco de exclusión social e baixo nivel de formación (baseado nas tecnoloxías da información e comunicación e no software libre), que permita dotarlles desta cualificación para posteriormente acreditarlles profesionalmente, coa finalidade da súa incorporación ao mercado laboral.

O acto de benvida e inauguración contou coa presenza do xefe territorial da Consellería de Medio Rural, Antonio Crespo Iglesias e a alcaldesa de Tomiño e presidenta do GDR 14, Sandra González, acompañados ademais polo vicepresidente de COGAMI Pontevedra, Paulo Fontán, e o presidente da asociación de persoas con discapacidade “Vontade” e da mesa de Acción Social do GDR14, Miguel Pazo.

Na súa intervención, Antonio Crespo, salientou a labor levada a cabo nos últimos anos polos grupos de desenvolvemento local, que fan o papel de “bisagra” entre o rural e a Administración, cubrindo -segundo o xefe territorial- un espazo que quedou baleiro tras a crise económica e no que a normativa non sempre é todo o flexible que sería desexable.

Pablo Fontán, en nome de Cogami, resaltou a importancia do desenvolvemento de accións formativas para persoas con discapacidade que habitan no rural, co fin de axudar a paliar as grandes dificultades de inserción laboral deste colectivo, motivo polo cal agradeceu especialmente a idea de levar a cabo o proxecto “Potenciando capacidades no rural”.

Na mesma liña, manifestouse Miguel Pazo, referíndose á complicada situación das persoas con mobilidade reducida que, a partir de agora, terán unha ferramenta que lles permita acceder á formación e ao mercado laboral.

Pola súa banda, a alcaldesa de Tomiño e presidenta do GDR14, Sandra González, agradeceu o traballo desenvolto polos técnicos nos últimos anos para sacar adiante moitos proxectos de dinamización económica e social na zona de influencia, fomentando a creación de novas empresas e brindando formación a emprendedores.

Os participantes realizarán varias reunións de traballo, que combinarán con algunhas saídas culturais e turísticas e visitas a empresas da comarca creadas con achegas de fondos Leader.

 

Xoves, 16 de xuño de 2016

Tomiño acolle o III Intercambio de Experiencias Leader no territorio “Potenciando capacidades no rural”

Organizado pola Red Rural Nacional / ADR Maiv – Baixo Miño, Tomiño acollerá os días 16 e 17 de xuño o III Intercambio de experiencias Leader no territorio  “Potenciando capacidades no rural”, no que participarán grupos de diferentes puntos España e Portugal, coma Badajoz, Sevilla, Asturias, Cáceres, Cantabria, Valladolid, Galicia e Portugal.

“Potenciando Capacidades no Rural” é un proxecto que ten coma obxectivo crear un sistema de formación en competencias crave para persoas adultas con risco de exclusión social e baixo nivel de formación, (baseado nas tecnoloxías da información e comunicación e no software libre) que permita dotarlles desta cualificación para posteriormente acreditarlles profesionalmente, coa finalidade da súa incorporación ao mercado laboral.

 “Trátase dun intercambio Leader no territorio, no que traballaremos sobre unha proposta de proxecto de cooperación, “Potenciando Capacidades no Rural”, que foi presentado pola ADR MAIV Baixo Miño o pasado mes de novembro na reunión sobre proxectos de cooperación Leader da Rede Rural Nacional en Madrid. Na devandita reunión mostraron o seu interese en participar no noso proxecto”, explica Sandra González, alcaldesa de Tomiño e presidenta do GDR 14.

Hoxe, xoves, ás 12:00 horas, no Concello de Tomiño, terá lugar a reunión de benvida, presentación dos participantes, e exposición do proxecto, comezando logo o programa de traballo, que se estenderá ata o día 17.

 

Mércores, 15 de xuño de 2016

O concello de Tomiño acondiciona a praia de Goián con 1000 metros cúbicos de area procedente da desembocadura do Miño

Mil metros cúbicos de area, foron necesarios para acondicionar a Praia de Goián, situada á beira do Espazo Fortaleza, despois dos danos ocasionados polos temporais e aumento desmesurado do caudal do río Miño durante os últimos meses, sendo unha actuación de carácter excepcional, que conta con todos os permisos e autorizacións necesarios dos organismos correspondentes: Dirección Provincial de Patrimonio, Rede Natura e Costas.

Francisco Campo Lago, concelleiro de Vías e Obras, explica que se trata de obras de carácter excepcional, xa que o estado en que quedaron as instalacións imposibilita totalmente o uso das mesmas por parte da veciñanza.

A intervención consistiu concretamente, en reconstruír os accesos ás praias e a zona de duchas, por afundimento, cun investimento que rolda os 20.000 euros.

A area necesaria para rechear a praia, é de balde, xa que procede da zona da desembocadura do Miño, onde era necesario dragar o canal do ferry entre A Guarda e Caminha.

Por outra banda, será necesario reconstruír tamén o pantalán, que foi seriamente danado e desprazado do seu lugar orixinal varios metros.

Paralelamente, o Concello está a acondicionar o Espazo Fortaleza de cara ao verán, procedendo á limpeza, corte da herba, e outras tarefas de mantemento e conservación.

 

Martes, 14 de xuño de 2016

O mercado de Tomiño medra con novas ofertas gastronómicas no segundo andar

Tres novos postos de venda abrirán as súas portas a finais deste mes de xuño no Mercado Municipal de Tomiño, aumentando e diversificando a oferta da praza recentemente remodelada.

            “O Fogón do mercado”, ofrecerá comida caseira para levar ou para comer no propio mercado, no segundo andar do edificio. Tania  Alves e Chelo Rubial, veciñas de Tomiño, prepararán pratos caseiros utilizando produtos frescos de mercado e menús especiais para dietas, comida vexetariana e ofrecerán tamén a posibilidade de cociñar os produtos mercados polos clientes no mercado.

“Petiscos” é outra das firmas que se incorporan á praza tomiñesa, con elaboración e envasado de produtos vexetais, froitas confeitadas, patés e cremas, conservas agridoces e salsas. Amparo Grandío, unha lucense afincada en Vila Nova de Cerveira, Portugal,  estará ao fronte deste obradoiro de conserva artesanal, no que cada mañá se fará a compra no mercado tendo en conta a calidade da materia prima.

María Luisa Baquero Da Silva, da Guarda é a propietaria da nova florería, que contará cunha gran selección de produto local;  flor cortada e plantas e que elaborará tamén centros, ramos e outros traballos florais, etc.

A alcaldesa de Tomiño, Sandra González, manifestou a súa satisfacción pola incorporación destas novas empresas que veñen a ampliar e diversificar a oferta de calidade do Mercado Municipal, contribuído, ademais, á dinamización do comercio e da vida social da vila.

 

Venres, 10 de xuño de 2016

Aberta a inscripción para a IV Carreira Popular de Tomiño

                A Asociación de Autónomos de Comercio, Hostalaría e Industria de Tomiño (ADETO) organiza, en colaboración co Concello, a IV Carreira Popular de Tomiño que se celebrará o sábado  9 de xullo a partir das 18.30 horas polas rúas do centro urbano. Haberá cinco categorías (pitufo, prebenxamín, benxamín, alevín, cadete, infantil e absoluta) e poderán participar todas as persoas, federadas e non federadas, tendo que inscribirse on-line a través da páxina web www.adeto.org con prazo ata o mércores 6 de xullo.

 

Tomiño e Irlanda comparten coñecementos para mellorar as traídas de augas comunais

Técnicos de Irlanda e Escocia, viaxaron a Tomiño para coñecer, in situ, o sistema de traídas de augas da zona, co fin compartir experiencias comúns neste eido. Ás 20 horas foron recibidos de forma oficial na Casa de Cultura, pola alcaldesa de Tomiño, Sandra González, e os concelleiros de Vías e Obras, Francisco Campo Lago, e de Medio Ambiente, María Xosé Vázquez.

Entre outras autoridades presentes, atopábanse en calidade de convidados, Roberto Arias, subdirector de Augas de Galicia, e Manuel Álvarez, xefe do servizo de Sanidade.

A alcaldesa foi a primeira en tomar a palabra para agradecer a presenza dos expertos estranxeiros, salientando a gran labor levada a cabo por COXAPO (Asociación de traídas de auga de Galicia), no tema das traídas de augas no municipio.

José Mª Albán Laguardia, presidente de COXAPO, comentou as orixes da asociación e asegurou que comparten aspectos e realidades moi similares coas comunidades irlandesas, chegando a falar incluso, de irmandamento e traballo conxunto.

Tamén os concelleiros Francisco Campo Lago e María Xosé Vázquez, tomaron a palabra para agradecer a presenza dos expertos. A concelleira de Medio Ambiente y profesora de Economía Ambiental en la Universidade de Vigo, cualificou o proxecto posto en marcha por COXAPO como “básico e imprescindible”, asegurando todo o apoio do goberno local. Referiuse asemade a importancia de aprender da experiencia de outros, co fin de mellorar a calidade de vida dos veciños/as.

Caridad de Santiago, técnica en Saúde Ambiental de COXAPO, referiuse ás principais problemáticas coas que se atopan diariamente na xestión da auga e as solucións alcanzadas. Entre os primeiros salientou o abandono das instalacións, a resistencia ao cambio por parte das directivas, o descoñecemento da normativa e do valor da auga coma recurso de vida. Entra as solucións que tentan dar dende a asociación, con sede en Estás (Tomiño) figuran o asesoramento, auditoría técnicas, charlas informativas e formativas e, sobre todo, moita concienciación sobre a importancia da auga e o risco de contraer enfermidades.

Pecharon o acto dous integrantes do continxente irlandés, Paddy Ward e Brian MacDonhnaill, agradecendo a benvida e hospitalidade dos organizadores e asegurando que a clave do éxito no tema das traídas é a colaboración e o traballo conxunto das comunidades, entidades políticas, , federación de augas, etc. Coma exemplo do camiño andado en Irlanda, comentaron que na actualidade as traídas serven a 80.000 vivendas. “Houbo que traballar moito e concienciar sobre a necesidade de protexer o investimento realizado e ao mesmo tempo, facelo sostible e viable económicamente”, explicaron.

O programa da xornada contemplou visitas ás traídas de Amorín, O Barro e Tomiño, co fin de coñecer o estado das instalacións e a forma de xestión veciñal.

 

Xoves, 9 de xuño de 2016

Os socialistas levan ao Parlamento as deficiencias no cátering do Centro de Día de Tomiño e reclaman unha inspección do goberno galego

A portavoz de Política Social do Grupo Socialista, Carmen Gallego, presentou unha batería de iniciativas no Parlamento de Galicia sobre as novas deficiencias denunciadas con relación ao servizo de cátering do Centro de Día de Tomiño. A deputada socialista reclámalle á Xunta unha inspección nas instalacións para testar a calidade da comida servida aos usuarios.

Gallego advirte que a Xunta está obrigada a tomar as medidas oportunas con respecto á empresa que presta o servizo de cátering no centro e que vén de recibir reiteradas denuncias pola calidade deficiente dos alimentos que lles son servidos ás persoas maiores que acubilla.

A deputada socialista alerta de que a alimentación que reciben os usuarios están en ocasións “medio crúa”, e chega a presentar “síntomas de manipulación indebida na súa conservación”. Sinala que os propios responsables da empresa de cátering “están indo ao centro a rexenerar a comida”.

Carmen Gallego lembra que o Centro de Día tivo durante tempo a unha cooperativa da zona como prestador do servizo, e “os problemas se presentan dende que a comida se entrega por unha empresa cuxa sede operativa a efectos de cociña está en Santiago de Compostela”.

 

Actividades do IES de Tomiño cara ó final de curso

Entre os días 17 e 24 de xuño, o alumnado de 4º de ESO realizará a súa viaxe de estudiosm desprazándose a Barcelona, e a súa área, acompañados de tres profesores.

bullet

O alumnado de latín de 1º de bacharelato vai a Roma de viaxe. Sairán na madrugada do día 22 e estarán de volta o día 25.

bullet

día 20 de xuño a partir das 12:00 da mañán: O alumnado de 1º e 2º de ESO participará  nun acto que terá lugar na Casa da Cultura, consistente en:

                      a) O alumnado de inglés, porá en escena unha serie de sketches en inglés, nos que tentan representar situacións cotias nas que teñen que desenvolverse.
                      b) Alumnado de varios cursos porá en escena un "musical" con música en directo.

bullet

Día 21 de xuño. Un grupo de alumnos de 1º de ESO participantes do Clube de Lectura Código Cero do noso centro,  e un grupo de 2º de ESO irán de excursión á península do Morrazo. Farán unha visita guiada ao casco histórico de Cangas e pasarán o resto do día na praia.

bullet

día 22 de xuño: último día lectivo: haberá clases normais ata as 11:30. A partir das 11:30 terá lugar a Xornada Deportiva de Fin de curso, coas seguintes actividades:

                        - Final do campionato de balonmán
                        - Final do campionato de fútbol
                        - Exhibición de acrosport e bailes de salón por parte do alumnado de educación física
                         - Xogos populares (Chave, petanca, pións, etc)
                         - Entrega de trofeos

 

Mércores, 8 de xuño de 2016

El PSOE de Tomiño presenta alegaciones contra la implantación “dramáticamente inoportuna” del impuesto de plusvalía

Mónica Hermida, portavoz del PSOE en el Concello de Tomiño, ha calificado de “dramáticamente inoportuna” la implantación de este nuevo impuesto, al tiempo que reitera su exigencia al equipo de gobierno para que retire la propuesta. Entre los razonamientos que sustentan esta postura mantenida en la primera alegación figura el criterio de los Tribunales cuando en sus sentencias dejan sin efecto las liquidaciones de la plusvalía, en aquellos casos en los que no existiera un incremento real del valor del inmueble, tal y como ocurre en los últimos años a consecuencia de la crisis económica. Esgrime además que la saneada situación de tesorería del Concello revela que no hay ninguna necesidad imperiosa de incrementar las arcas municipales con un nuevo impuesto injusto, dada la realidad en la que nos encontramos.

Desde el grupo socialista se considera que la falta de bonificaciones potestativas que plantea la nueva ordenanza es “insensible a la realidad socioeconómica de la gente que vive en Tomiño” y reprocha al BNG que no hayan hecho uso de las potestades que les brinda la Ley de Haciendas Locales en el artículo 108, concretamente en los puntos 4 y 5, para plantear al menos una serie de bonificaciones que alivien la carga de este impuesto a las familias.

En este sentido, la segunda alegación que la concejala socialista plantea a la ordenanza, en caso de no ser aceptada su propuesta inicial de dejarla sobre la mesa, propone que se incluyan diversas modificaciones, como aumentar la bonificación del 50% de la vivienda habitual hasta el 95% en el caso de ser también la vivienda habitual del sujeto pasivo, bonificar el 95% de la cuota íntegra del impuesto en caso de que los sujetos pasivos queden en situación de orfandad, añadir una bonificación de la cuota íntegra del impuesto (del 50% para el grado I, 70% grado II y 95% grado III) si el sujeto pasivo es dependiente, además de una bonificación del 60% al 95% para personas con discapacidad (aplicando el 60% con discapacidades hasta el 64% y para una discapacidad superior al 64% , el 95%), así como la bonificación del 95% de la cuota íntegra en caso de que el sujeto pasivo estuviese inmerso en un proceso de violencia de género, una bonificación del 95% en casos de riesgo de exclusión social, y por último que en las empresas familiares haya una bonificación del 80%, siempre y cuando se mantenga la actividad durante al menos 5 años.

La portavoz y concejala socialista Mónica Hermida considera “absolutamente necesarios los impuestos, pero nunca pueden ser abusivos, como es el caso. Este impuesto se formula de tal modo que no es justo, equitativo, ni progresivo. No nos olvidemos del momento que estamos viviendo: el supuesto incremento continuado del valor que tenían los bienes inmuebles es una falacia que ha tenido ya bastantes víctimas. Continuamente vemos ventas que se producen muy por debajo del valor de compra, ventas que son el último recurso de las familias para que no se produzca el desahucio, el embargo o simplemente,  porque han de deshacerse del capital que tengan para poder sobrevivir”.

 

A Aula Cemit Tomiño organiza na primeira metade de ano 12 actividades das que se beneficiaron máis de cen persoas

Nos primeiros seis meses do ano 2016, a aula CeMIT de Tomiño organizou 12 actividades que suman máis de 300 horas formación, e polas que xa pasaron máis de 100 persoas.

Entre as máis destacadas o curso organizado polo Concello, a asociación Vontade e o Centro de Día de Tomiño, no que un grupo de 25 persoas maiores aprenden a utilizar o ordenador.

Tamén se fixo un primeiro exame para a obtención do CODIX (competencias dixitais en ofimática) con un considerable éxito tanto de participación, como en aprobados.

O resto de actividades estiveron orientadas a diversa temática como retoque fotográfico, edición de vídeos ou uso da tablet.

Por outro lado, nestas semanas abrirase o prazo de inscrición nunha nova convocatoria de 180 prazas do curso de teleformación titorizado para a obtención da certificación galega do CODIX. 

Segundo informa o concelleiro de Promoción Económica, Antonio Tartaglione, está previsto comezar o período de inscrición o día seguinte ao da súa publicación no DOG, que se colgará na web do CeMIT. Para a xente que prefira obter o CODIX preparándose pola súa conta ou asistindo aos cursos presenciais que se realizaran na aula de Tomiño, existirá unha nova convocatoria en setembro.

Durante os meses de xullo e agosto a aula modificará o seu horario pasando a ser os luns e venres de 9 a 14 horas, e os martes, mércores e xoves, de 16 a 21 horas.

Nos meses de verán impartiranse cursos de informática de diferentes temáticas dirixidos a mozos e mozas de todas as idades.

Para ampliar esta información chamar ao teléfono 986623304 ou pasarse pola aula Cermit sita no Campo da Feira de Tomiño. Tamén é posible solicitar información no correo electrónico cemit.tomino@xunta.gal.

 

Martes, 7 de xuño de 2016

Tomiño organiza dous cursos “AFD” para persoas desempregadas

A Consellería de Economía, Emprego e Industria vén de subvencionar ao Concello de Tomiño dous cursos AFD para persoas preferentemente desempregadas.

O primeiro destes cursos é “Actividades de Xestión Administrativa” e ten 898 horas de duración, dando dereito ao correspondente certificado de profesionalidade.

A segunda acción formativa é a de “Instalacións de mantemento de xardíns e zonas verdes”, de 508 horas de duración.

A data prevista de inicio dos cursos é o día 1 de xullo, finalizando o de xestión administrativa o 15 de decembro, e o de xardíns, o 17 de outubro.

 

Expertos de Irlanda e escocia visitarán as tráidas veciñais de auga de Tomiño

Mañá, mércores, técnicos de Irlanda e Escocia, chegarán a Tomiño para coñecer, in situ, o sistema de traídas de augas de Galicia, co fin compartir experiencias comúns neste eido.

A visita conta coa colaboración do Concello de Tomiño, e encádrase dentro da 4ª Xornada de Abastecemento Rural, do programa europeo Life Rural Supplies (Life12 env/es/000557 "Solucións sostibles para pequenas redes de abastecemento"), no que participa Coxapo Galicia (Comunidade Xeral de Augas de Galicia), con sede na parroquia tomiñesa de Estás e o Concello de Abegondo.

Deste xeito, esta semana, dentro dunha rede sobre abastecementos de auga en diferentes países europeos, un grupo de expertos internacionais visitará traídas de auga do concello de Tomiño, acompañados por técnicos de COXAPO e comunidades de augas locais de Abegondo (municipio que comezou con este proxecto europeo no ano 2013).

Programa

O mércores día 8 de Xuño terá lugar a recepción no Concello de Tomiño por parte da alcaldesa e da corporación municipal, e o xoves 9 visitaranse as comunidades de augas de Amorín, Barro, Estás e Tomiño-Forcadela.

 “Para o Concello de Tomiño ten grande interese, tanto expoñer as nosas experiencias, pois temos traídas comunitarias pioneiras en xestión e tratamento, coma aprender doutras maneiras de organización e xestión”, explica María Xosé Vázquez.

“Un ben de gran importancia social e ambiental como é a auga debe ter un enfoque prioritario dende as institucións públicas, e neste sentido o Concello de Tomiño quere participar neste e nos proxectos europeos, nacionais e autonómicos que aborden esta cuestión. Os modos tradicionais de autoxestión dos recursos poden e deben manterse, e son compatibles con acadar elevados estándares de calidade sanitaria”, engade a concelleira.

Para pechar as xornadas, o último día está prevista a celebración dunha conferencia na capital de Galicia, na que se tentará contextualizar a situación actual da dotación dos servizos da auga no rural e darase a coñecer a estratexia levada a cabo en Irlanda como posible modelo a seguir.

 

Sábado, 4 de xuño de 2016

Un millar de estudantes tomiñeses fórmase en valores e aprende a ser máis sociable e comunicativo

Co obxectivo de fomentar a calidade da ensinanza en todos os centros educativos do municipio, o Concello de Tomiño, organizou ao longo do curso distintas actividades extraescolares dentro do horario lectivo, que abarcaron dende o nivel de Infantil ao de Bachalarato, aos que concorre perto dun millar de estudantes.

O amplo programa elaborado pola Concellería de Educación rematou hoxe coa actuación do grupo Migallas Teatro, e o seu espectáculo para nenos e nenas de 0 a 3 anos “Entre arrolos e contiños”, que tivo lugar este mediodía na Escola Infantil do Seixo.

Precedéronlle “As andanzas de Paio”, do grupo Oviravai, para alumnado de educación infantil dos coles públicos da vila un proxecto que integra a ensinanza e a aprendizaxe da lingua con contidos curriculares e temas transversais que son traballados en Infantil e Primaria: a granxa, os animais domésticos e salvaxes, as especies ameazadas, os medios de transporte, a protección dos hábitats naturais, o coidado da saúde, a alimentación, os diferentes tipos de familias, outras culturas e linguas, etc.

En Educación Primaria traballouse coa actividade “Dobraxe na escola”; un cursiño de locución e dobraxe, no que os estudantes aprenderon técnicas de lectura en galego, manexo da voz dobrando a diferentes personaxes, coa finalidade de favorecer a súa capacidade de expresión na lingua galega, a súa relación coas demais persoas, perfeccionar a súa dicción, enriquecer o seu léxico e potenciar a seguridade en sí mesmos/as.

Outra das actividades para Primaria foi “A ritmo de corazón”, un obradoiro no que o alumnado aprendeu ritmos de diferentes instrumentos de percusión, a través de fábulas. Tamén aprenderon algúns pasos de danza africana e cancións infantís propias dese continente, da man dun músico senegalés, co fin de traballar o ritmo e a psicomotricidade e adquirir conciencia corporal, a través dunha cultura diferente e educando en valores coma o multiculturalismo, a mestizaxe e o respecto.

Por último, destinado ao sector de Educación Secundaria e Bachalarato, organizouse no IES de Tomiño en colaboración co Fondo Galego de Cooperación, unha exposición sobre o tema “Os nenos e nenas soldados” e una charla alusiva a cargo de Roberto Mansilla, analista do Instituto Galego de Análise e Documentación Internacional (Igadi), quen falou da utilización de menores en conflitos armados, etc.

A alcaldesa e responsable de Educación, Sandra González, explica que dende o Concello de Tomiño existe un compromiso coa educación da cidadanía. “O noso obxectivo é fomentar a calidade educativa, ofertando actividades e programas gratuitos para mellorar a aprendizaxe formal e non formal”, informa.

Un claro exemplo de acción educativa non formal é o programa municipal É Aprender dirixido a alumnado de primaria e ESO, que ten entre os seus fins, paliar o fracaso e abandono escolar así como motivar ás persoas participantes.

Alén diso, o Concello oferta de xeito gratuito durante todo o curso actividades extraescolares en todos os centros educativos do municipio: francés, multideporte, xadrez, elaboración de vídeo e teatro de sombras.

 

Venres, 3 de xuño de 2016

Aberta a inscrición para as actividades deportivas de verán organizadas polo concello de Tomiño

O concello de Tomiño abriu a inscrición nas diferentes disciplinas deportivas, culturais e medio ambientais, que se desenvolverán durante o verán, e que segundo o calendario, a primeira das actividades será un Curso de Promoción do Piragüismo destinado a nenos de 8 a 14 anos, que terá lugar do 28 de xuño ao 8 de setembro, sendo obrigatorio saber nadar. O custe da actividade é de 15 euros en total.

O mesmo requisito, saber nadar, e ademais ter alo menos 14 anos, é necesario para poder participar na actividade denominada Rutas ambientais de descenso en kayak polo río Miño, que se desenvolverá os sábados de xullo e agosto, cun prezo de 5 euros por cada xornada na que se participe.

A Concellaría de Deportes organiza os campus de fútbol, tenis e pádel. O primeiro terá lugar entre o 18 e o 30 de xullo e poderán participar nenos de entre 5 e 16 anos. Sendo o prezo desta actividade, que conta coa colaboración do Goián F.C. e A.D. Tomiño, de 55 euros.

Pola súa banda, os campus de tenis e pádel, desenvolveranse durante os meses de xullo e agosto, destinados a nenos de entre 6 e 16 anos, cun custe mensual de 20 euros por participante.

Outra das actividades que volve a estar na programación de verán é o Campamento Urbano, para nenos nados entre os anos 2004 e 2011. A actividade terá lugar do 4 ao 29 de xullo en horario de mañá, e o seu custe é de 25 euros.

Por último, o programa ofrece tamén clases de Ioga tibetano, destinado, neste caso, a persoas a partir dos 18 anos de idade. O curso desenvolverase nos meses de xullo, agosto e setembro, cun custe total de 15 euros por participante.

Para máis información e inscricións, é necesario contactar co Servizo de Mocidade, Cultura e Deportes, no teléfono 986 622001; pasar pola OMIX (A Rocha, 8) en horario de mañá, ou ben enviar un correo ao enderezo omix@concellotomino.com

 

Vindeiros cursos formativos en Tomiño

"Obradoiro práctico de reparacións domésticas": fontanería, carpintería e albanelería para principiantes. A partir de 16 anos e sen límite de idade. Horario: martes e xoves de 20 a 22h na escola obradoiro de Goián. Duración: 20h Prezo total: 15€ comezo en xuño.

Aberto o prazo de inscrición para o curso de Mecánica Básica do Automóbil. Aprender a localizar as avarías máis usuais, realizar pequeñas reparacións e efectuar un axeitado mantemento para evitar o desgaste. A partir de 16 anos e sen límite de idade. Horario: de luns a venres de 10 a 14h. Duración: 40h Prezo total: 30€ comezo en xullo

Este mes de xuño tamén comeza o curso de cociña vegana e vexetariana  “Cociña en verde” dentro do programa da deputación “Deporruárte”.  O  curso é de balde e ten unha duración total de 25 horas nas que o alumnado asistente poderá adquirir coñecementos, habilidades e destrezas para a elaboración de pratos vexetariano e/ou veganos, aprendendo a diferenza entre ambos e distintas técnicas culinarias.

 

A Plataforma de Emigrantes Retornados do Baixo Miño convoca unha asemblea informativa este sábado en Tomiño

A Plataforma de Emigrantes Retornados do Baixo Miño fai un chamamento aos veciños da comarca que nalgún  período da súa vida estiveron na emigración, a asistir á asemblea informativa que terá lugar este sábado, 4de xuño ás 17:00 horas, na Casa de Montes de Tomiño (antiga casa sindical), na que se dará información de tódolos pasos que se estiveron a dar até o de agora, e, a súa vez decidiráse en asemblea as pautas a seguir  en adiante.

Por outra banda abrirase un listado para todas aquelas persoas que queiran reservar praza de autobús para acudir á manifestación nacional  que se vai celebrar o 10 de xuño en Compostela baixo o lema "Xustiza e igualdade".

Esta manifestación ten como finalidade solicitar ao governo da Xunta de Galicia que defenda os dereitos dos retornados e reclame ao governo español a modificación da lei 35/2006 do IRPF que segue tachando de defraudaores a este colectivo.

Pódese reservar praza nos seguintes contactos: 616 090 632 / 620 892 262.

 

Xoves, 2 de xuño de 2016

O Concello e o Fondo Galego dan a coñecer a grave situación dos nenos soldados

Dar a coñecer a grave problemática da utilización de menores en conflitos armados é o obxectivo das charlas e a exposición que baixo o título ‘As nenas e nenos soldados’ está a desenvolver o Concello como socio do Fondo Galego de Cooperación e Solidariedade. Na actualidade calcúlanse nuns 250.000 os cativos e cativas que son explotados nas guerras de 18 países.

Estes son algúns dos datos que Roberto Mansilla, analista do Instituto Galego de Análise e Documentación Internacional (Igadi), lle achegou esta mañá en senllos encontros ao alumnado do IES Tomiño. A utilización de menores de idade en conflitos armados non se reduce a envialos á fronte de batalla, senón tamén a labores de vixilancia, mensaxería e mesmo espionaxe. As nenas tamén son a miúdo empregadas como cociñeiras e escravas sexuais.

A vulnerabilidade psicolóxica das rapazas e rapaces predisponos ao adoutrinamento e ao cumprimento de ordes. O recrutamento forzoso impídelles acceder á educación e obrígaselles a cometer atrocidades, xerando consecuencias que persisten unha vez rematada a guerra, pois a falta de investimento na rehabilitación fai que moitas e moitos menores rematen por recorrer logo á delincuencia e á prostitución.

Sobre estas situacións chama tamén a atención a mostra ‘As nenas e nenos soldados’ que ata finais desta semana se amosa no IES Tomiño. O artista senegalés Momar Badiane denuncia a través dunha serie de debuxos a situación das nenas e nenos combatentes e convida a reflexionar sobre ela. A ONU, apoiándose na campaña da Coalición para acabar co uso das nenas e nenos soldados, adoptou no ano 2000 un tratado internacional que establece como idade mínima de recrutamento os 18 anos, así como a obriga por parte dos Estados de axudar á reinserción. Ata hoxe foi ratificado por 120 países.

O Fondo Galego

O Fondo Galego de Cooperación e Solidariedade está integrado por 85 concellos e as deputacións da Coruña e Lugo, que concentran a través desta rede os seus esforzos no eido da cooperación ao desenvolvemento. Garántese deste xeito unha xestión profesional e transparente, así como a realización de proxectos con impacto nos países do Sur e a sensibilización da sociedade galega a prol da solidariedade internacional. Desde a súa fundación en 1997, o Fondo Galego ten desenvolvido máis de 150 proxectos en 25 países e promove numerosas actividades e materiais en relación aos desequilibrios Norte-Sur.

 

Mércores, 1 de xuño de 2016

O Partido Popular de Tomiño desmente rotundamente as acusacións levadas a cabo polo BNG de Tomiño

O portavoz municipal do PP de Tomiño, Esteban González, desmente rotundamente as acusacións levadas a cabo polo BNG de Tomiño e mostra a súa repulsa a este tipo de actos. Por este motivo cabe aclarar os seguintes puntos:

1º O PP de Tomiño non era coñecedor ata o momento do conflito existente co parque de maquinaria da Deputación de Pontevedra.

2º O comentario no Facebook persoal é referido a temas municipais, despois de que semanas atrás, simpatizantes do BNG enfadados, se dirixisen ao portavoz municipal, Esteban González, e comunicarlle certas actuacións que se estaban levando a cabo e pedirlle que as denunciase; ao que o portavoz contesta que  “ata non ter confirmación dos feitos non levaría tales denuncias”. No  momento que recibe as fotos das pintadas como a coroa ameazante, relaciona tal acto coas supostas actuacións anteriores.

Esteban González mostra a súa sorpresa á actuación do BNG, ao acusar de forma directa a o PP da autoria destes actos; o que cualifica de autentíca “propaganda política e a dobre moral á hora de actuar, e lembra que o Partido Popular non se sente identificado con esta forma de actuar”. Lembrándolle ao BNG cando estaban na oposición e o PP gobernaba e recibía ameazas e pintadas continuamente. “Se en algo se diferencia o Partido Popular é en saber respectar o público, estando no goberno ou na oposición e en non practicar a dobre moral”, aclara o portavoz Esteban González Miranda.

 

Tomiño ofrece cen prazas públicas de educación infantil a partir deste ano

Foron publicadas as listaxes definitivas de nenos admitidos e en lista de agarda, nas dúas escolas infantís públicas que posúe o concello de Tomiño, despois de que remataran as obras na parroquia de Goián, onde se sitúa o segundo centro de educación infantil, con 60 prazas.

O período de matrícula será do 1 ao 10 de xuño, tendo que pasar as persoas interesadas pola escola infantil do Seixo, co fin de recoller a documentación necesaria (tamén os de Goián).

Segundo as listaxes publicadas, no Seixo están todas as aulas completas, con 7 nenos na aula de 0-1 anos; 12 na de 1-2 anos, e 19 na de 2-3 anos. 

En lista de agarda quedaron 16 cativos (sumando os tramos de  1-2 e 2-3 anos, xa que os bebés non teñen lista de espera).

Na nova escola infantil, situada na antiga casa médica de Goián, e cuxas obras veñen de rematarse cun investimento superior aos 600.000 euros, aínda quedan 5 vacantes na aula de 0-1 anos, mentres que as 2 aulas de 1-2 anos están completas xa, con 24 crianzas. O mesmo que a aula de 2-3 anos, con 19 cativos/as.

-En lista de agarda (sumando 1-2 e 2-3 anos ) teñen xa 10 nenos/as.

Os bebés nados nestes meses están a tempo aínda de conseguir unha praza, podéndose entregar a documentación ata o día 31 de agosto.

Os doutros grupos de idade tamén poden  inscribirse, neste caso, para entrar na listaxe de agarda.

A alcaldesa de Tomiño, Sandra González, responsable de Educación, anima ás familias a apuntar aos seus fillos e fillas, xa que aínda poden lograr unha praza pública, coas vantaxes que iso conleva para eles.

Datos demográficos de interese

A día de hoxe, en Tomiño hai 418 nenos de 0 a 3 anos e 3.651 persoas comprendidas no tramo de idade de 20 a 40 anos, en idade potencial de ter fillos.

A poboación total tomiñesa ascende aos 13.868 habitantes repartidos en 15 parroquias, cunha superficie total de 106 km. cadrados.