Índice

www.galiciasuroeste.info

 

XUÑO

 

Mércores, 15 de xuño de 2016

Presentación do II Campionato de Judo Eurocidade e o Campionato Ibérico de Kung Fu Eurocidade

Ás 11.00 horas de hoxe, no salón de plenos do Concello de Tui terá lugar a presentación do II Campionato de Judo Eurocidade, organizado polo Judo Club Valença, en colaboración coa Eurocidade Tui-Valença, que contará coa presenza do alcalde de Tui, Enrique Cabaleiro; o concelleiro da Eurocidade, Miguel Capón; os concelleiros de Deporte de Tui e Valença, Laureano Alonso e José Monte, así como a presidenta do Judo Club Valença, Argentina Rosa da Silva.

Ás 11.40 horas, no mesmo emprazamento, será a presentación do Campionato Ibérico de Kung Fu Eurocidade, organizado polo Club Deportivo DiSom Tui, en colaboración coa Eurocidade Tui-Valença e a Federación Galega de Kung Fu, e que contará coa presenza do alcalde de Tui, Enrique Cabaleiro, o concelleiro da Eurocidade, Miguel Capón, os concelleiros de Deportes de Tui e Valença, Laureano Alonso e José Monte, así como o presidente da Federación Galega de Kung Fu, Carlos Alonso, e o director do campionato, Eduardo Méndez Sanjurjo.

 

O San Xerome fixo entrega da súa revista “Aínda temos moito que andar” ao concelleiro de Servizos Sociais de Tui

Tres usuarios do Servizo de Adultos do Centro San Xerome Rosa, Borja e Miguel, xunto cunha das monitoras, achegáronse a Tui para facer entrega ao concelleiro de Servizos Sociais do número 8 da revista “Aínda temos moito que andar” que edita o centro.

A revista comezou a editarse no curso 2009-2010 coincidindo co 30 Aniversario do centro. Aínda que comezou cunha periodicidade semestral, na actualidade edítase anualmente. No número 8, correspondente a este 2016, incorporouse o sistema de lectura fácil. Na mesma recóllense seccións coma as  súas  propias  historias, entrevistas,  reportaxes  fotográficos  ou receitas de cociña.

Á revista está á venda ao prezo de 5€ na Tenda Atalaia do propio San Xerome na Guarda.

 

Catro pintores amosan a súa obra na Oficina Municipal de Turismo

A Oficina Municipal de Turismo, na praza de San Fernando, acolle ao longo deste mes de xuño a obra de catro pintores. Trátase de Marta Docampo Cabaleiro que presenta acuarelas; Roberto Trigas obras en pluma e tinta china; Javier Trigas con lapis de grafito, e Antonio Abalde que achega con distintas técnicas paisaxes galegos. Amais os que se acheguen ata a Oficina Municipal terán a oportunidade de ver traballar en directo a Antonio Abalde retratando distintos recunchos da cidade.

 

Onte abriu a exposición de traballos realizados pola Asociación de Amas de Casa

Na tarde de onte tivo lugar a apertura da exposición do traballos realizados polas alumnas dos distintos cursos impartidos pola Asociación de Amas de Casa de Tui na Sala de Exposicións Municipal  na Área Panorámica.

O acto contou coa presenza do alcalde de Tui, Enrique Cabaleiro, e da concelleira de Ensino María José González, xunto á directiva da Asociación de Amas de Casa.  

 

Máis de 120 alumnos de tres centros educativos tudenses participarán na Aloiada 2016

A realización de actividades deportivas en pleno contacto coa natureza e propiciar a convivencia entre o alumnado de distintos centros son parte dos obxectivos da Aloiada 2016, actividade, que chega a súa novena edición, organizada polos CEIP’s nº1, nº2 e de Pazos de Reis de Tui coa colaboración do Concello de Tui.  A presentación realizouse na casa do concello polo alcalde de Tui, Enrique Cabaleiro; o concelleiro de deportes, Laureano Alonso, o director Manuel Fálquez, e o profesor de educación física, Fernando Domínguez, do CEIP de Pazos de Reis;  a directora Cristina Novoa e o profesor de EF Alberto López; polo CEIP Nº1, polo seu director, Luís Herminio Ruíz, e a profesora de EF, Beatriz González do CEIP Nº2.

Aínda que inicialmente esta prevista para este xoves e venres debido ás previsións de choiva, a Aloiada celebrarase finalmente o próximo luns, 20, e martes, 21 de xuño. Na mesma van participar máis de 120 alumnos dos CEIP’s nº1, nº2 e de Pazos de Reis  que realizarán actividads deportivas no Parque Natural do Monte Aloia, na serra do Galiñeiro e no río Miño.

Na presentación o alcalde de Tui, Enrique Cabaleiro, lembrou que Tui é un dos concellos de Europa con maior extensión de Rede Natura e conta co primeiro parque natural de Galicia  de aí a importancia da implicación da comunidade educativa no coñecemento do medio no que se desenvolve para que o valoren e o respecten. Mentres o concelleiro de Deportes, Laureano Alonso, destacou que esta actividade é moi significativa porque ilustra coma os máis novos se inician na práctica deportiva. Felicitaba aos profesores e aos centros educativos por esta iniciativa.

O CEIP de Pazos de Reis súmase por primeira vez a esta iniciativa, coma explicaba o seu director, Manuel Fálquez. Destacaba amais coma esta actividade propiciará a convivencia entre o alumnado dos tres centros educativos. No mesmo senso se pronunciou a directora do CEIP nº1, Cristina Novoa, salientando que o próximo ano estes alumnos compartirán clases xa no instituto. Luís Ruíz, director do CEIP nº2 fixou coma reto de cara a edicións vindeiras estender esta actividade a todos os centros educativos do municipio.

Os profesores de Educación Física salientaron a realización destas actividades en plena natureza. Fernando Domínguez do CEIP de Pazos de Reis aludía a que esta será unha experiencia inesquecible para os cativos que terán a oportunidade de realizar actividades deportivas que non practican habitualmente. Alberto López do CEIP nº1, salientou coma neste caso aproveitan os recursos naturais con que se conta en Tui realizando actividades lúdicas disfrutando da natureza. Beatriz González do CEIP nº2 explicou que no programa están previstos obradoiros de escalada/rapel, primeiros auxilios, orientación ou nós, así coma unha marcha entre o Galiñeiro e o Aloia, a acampada no cumio do Aloia, e o descenso pola sendas do parque natural ata os muíños de Tripes e a beira do río onde practicarán piragüismo e remo en colaboración cos clubs locais.

 

Martes, 14 de xuño de 2016

Listado de admitidos nos Campamentos de Verán Tui 2016 e novo prazo de inscrición para as prazas dispoñibles

O pasado venres 10 de xuño pechouse o prazo de inscrición para os Campamentos de Verán Tui 2016, cun total de 172 inscritos nas dúas quendas ofertadas este ano.

Todos os nenos e nenas que presentaron a súa solicitude foron admitidos nas quendas solicitadas, polo tanto, tal e como indican as condicións xerais dos campamentos, dende hoxe martes, e ata o día 25 de xuño deberá facerse o pagamento da taxa establecida, que como nos últimos anos é de 30,56€ por cada quenda e neno.

Para facer este abono, todos os inscritos deberán pasar polo departamento de Tesourería do Concello de Tui e recoller o recibo correspondente á súa inscrición.

Dado que aínda quedan prazas dispoñibles para as dúas quendas deste ano, os interesados poderán realizar a inscrición e aboar a taxa, ata completar as prazas dispoñibles, dende hoxe, martes, e ata o venres, día 17.

 

Convocatoria dun minuto de silencio ás 12 horas de hoxe, en repulsa polos asasinatos de Orlando

O Concello de Tui súmase á convocatoria realizada pola Federación Española de Municipios e Provincias para gardar hoxe, martes, ás 12 horas, un minuto de silencio na Casa do Concello, en sinal de repulsa polos feitos acontecidos na fin de semana en Orlando.

Dende o Concello convídase á cidadanía a participar neste acto co que se manifestará a consternación este graves e lutuosos feitos, ao tempo que servirá de mostra de apoio ás vítimas e as súas familias, e de rexeitamento a actos de intolerancia coma este.

 

Hoxe preséntase a Aloiada 2016 que se celebrará este xoves e venres

Hoxe, martes, ás 11.00 horas, no concello de Tui, terá lugar a presentación da actividade Aloiada, organizada polo CEIP Nº1, Nº2 de Tui e o CEIP de Pazos de Reis, no que máis de 120 nenos realizarán diferentes actividades deportivas no Parque Natural do Monte Aloia e no río Miño.

Estarán presentes o alcalde de Tui, Enrique Cabaleiro; o concelleiro de deportes, Laureano Alonso; o director Manuel Fálquez, e o profesor de educación física, Fernando Domínguez, do CEIP de Pazos de Reis; a directora Cristina Novoa e o profesor de EF Alberto López polo CEIP Nº1, e polo CEIP Nº2, o director, Luís Herminio Ruíz, e a profesora de EF, Beatriz González

 

Zeljko Obradovic impartirá un Clínic de baloncesto en Tui

O sábado 2 de xullo celebrarase en Tui un Clínic de baloncesto enmarcado dentro da programación do Campus Joe Arlauckas-Tui, o Clínic será impartido por cinco ponentes de recoñecido prestixio, tanto a nivel nacional como internacional, que o longo de toda a xornada disertarán sobre diversos temas.

Carlos Vaqueiro, técnico de planificación e responsable da organización dos equipos das distintas modalidades do F.C. Porto.

Antonio Carrillo, experto na formación inicial de xogadores e de adestradores, contando no seu currículum con gran cantidade de publicacións científicas así como libros de referencia na formación de adestradores.

Pepe Laso, ex adestrador de Tau Cerámica, Fórum Valladolid e CAI Zaragoza, está considerado un dos mellores expertos na formación de adestradores.

Pepe Casal, ex preparador físico da Selección Española e de Pau Gasol, é un referente nacional en preparación física.

Zeljko Obradovic, o adestrador máis laureado na historia do baloncesto europeo, con oito Euroligas e infinidade de Copas e Ligas no seu currículum, actualmente adestrador do Fenerbahçe de Turquía.

Toda a información e inscricións atopanse na páxina www.campusjoearlauckastui.com

 

Luns, 13 de xuño de 2016

Tres tudenses participaron no Campionato de Europa de Policías e Bombeiros

Esta pasada fin de semana celebrouse en Huelva o Campionato de Europa de Policías e Bombeiros, no que o Concello de Tui tivo tres representantes participando en cinco disciplinas deportivas, triatlón, natación, judo, jiujitsu e TCA.

Alicia Araujo, policía nacional tudense, competiu na modalidade de natación en augas abertas e triatlón. A triatleta participou fai dúas semanas na triatlón Tui-Porriño, que lle serviu como adestramento para ambas as dúas disciplinas.

Ignacio Vilaboa, militar con sede en Pontevedra, integrante do Judo Club Tudense, competiu na modalidade de judo.

Por último, o policía local Avelino Martínez, participou en varias disciplinas, natación en 50 metros libres, jiujitsu, judo, no que xa acadou ata seis preseas nas últimas catro edicións (Pontevedra, Valencia, Tenerife e Bruselas), e TCA, que é unha combinada formada por oito probas, cross de 5.000 metros, lanzamento de peso, 100 metros lisos, 100 metros de nado libre, trepa de corda, press banca, dominadas e carreira de obstáculos.

 

Sábado, 11 de xuño de 2016

Tui acollerá do 4 ao 8 de xullo o Campus de Fútbol da Fundación Celta de Vigo

Do 4 ao 8 de xullo as instalacións deportivas municipais Álvarez Durán acollerán o Campus de Fútbol da Fundación Celta de Vigo en colaboración co Concello de Tui e o Tyde. Vai dirixido a rapaces e rapazas entre os 4 e os 16 anos que se poden inscribir ata o 1 de xullo ao través da web www.fundacioncelta.com.  O prezo por participante é de 130 euros, salvo para os xogadores do Tyde F.C. que aboarán 115 euros. As clases de luns a xoves serán de  10 a 14h e o venres de 10 a 18h, incluíndo o xantar e a festa fin de campus á que poderán asistir tamén as familias.

Onte foi presentado o Campus na casa do concello de Tui polo concelleiro de Deportes, Laureano Alonso, o presidente do Tyde F.C., Elias Vieiro, o director da Fundación Celta de Vigo, Germán Arteta e o responsable das escolas do Celta en Galicia, Diego García.

Laureano Alonso, concelleiro de Deportes, destacou que para o Concello é unha honra poder contar con esta colaboración co Celta e o Tyde, ao tempo que salientou a oportunidade que o Campus representa para mellorar as condicións técnicas do participantes.

Elías Vieiro, presidente do Tyde F.C., explicou que o ano pasado na primeira edición desta actividade en Tui contaron con 25 participantes, cifra que agardan superar este ano xa que é unha oportunidade para rapaces e rapazas de chegar mellor preparados e formados ao comezo da nova temporada.

O director da Fundación Celta de Vigo, Germán Arteta, destacou que cada participante recibirá unha equipación, e agradeceu a colaboración tanto do Concello coma do Tyde, que fan que se sintan en Tui coma na casa. O responsable das escolas do Celta en Galicia, Diego García, foi o encargado de dar os detalles técnicos explicando que haberá catro áreas nas que traballarán os cinco días do Campus: coordinación e psicomotricidade, técnico-táctico, multideporte e competicións individuais e colectiva. O mércores amais avanzaba que terán algunha sorpresa.

 

Venres, 10 de xuño de 2016

Ata o venres 17 pódense presentar as solicitudes para realizar as fogueiras de San Xoán

O Concello de Tui informa que ata o venres 17 de xuño está aberto o prazo para solicitar a autorización para a realización de Fogueiras de San Xoán. Os interesados deben cubrir o impreso normalizado, dispoñible na secretaría do concello ou na web municipal, e presentalo por rexistro de entrada xunto á documentación requirida (póliza de responsabilidade civil e plano de situación da fogueira).

No impreso farase constar o lugar exacto da fogueira, detallando a parroquia, aldea, rúa, tendo en conta que non se poderán realizar en terreos de natureza forestal ou que estean preto deles ou de vexetación susceptible de propagar o lume.  Amais debe respectarse unha distancia mínima de 20 metros entre a fogueira e as vivendas, vehículos de tracción mecánica, depósitos de combustible ou almacén de substancias especialmente inflamables.

As fogueiras realizaranse en buracos e terase a man mangueiras, extintores ou auga, e nas mesmas non se poderán queimar nin rodas nin plásticos.  É preciso amais contar cunha caixa de primeiros auxilios e póliza de responsabilidade civil cunha cobertura de 150 mil euros. Unha vez rematada a celebración a fogueira debe quedar completamente enterrada.

 

O 31 de xullo celebrarase a I Cronoescalada ao Monte Aloia

O domingo 31 de xullo celebrarase a I Cronoescalada ao Monte Aloia que forma parte da “Be Legend Bike Series 2016”. Este campionato está composto por tres probas en formato cronoescalada, que se realizarán ascendendo ao Monte Aloia en Tui, o 31 de xullo, ao Monte Xiabre de Vilagarcía de Arousa, o 28 de agosto, e ao Mirador da Curota, na Pobra de Caramiñal, o día 2 de outubro. As inscricións poden realizarse xa a través de páxina web www.belegend.es

Para promocionar esta I Cronoescalada ao Monte Aloia o triatleta tudense Gustavo Rodríguez realizou a subida ao Monte Aloia para facer a gravación do percorrido. Tras participar o pasado sábado no Campionato do Mundo de Duatlón, Gustavo Rodríguez está apoiando esta proba deportiva, que agarda reunir en Tui aos mellores escaladores da zona. A gravación realizada será subida á rede, a través dun coñecido portal especializado en ciclismo, para que todos os ciclistas interesados poidan dende casa e cun rodillo, competir contra o campión tudense, nunha espectacular ascensión ao Monte Aloia.

 

Terceiro Torneo de Kaiak Polo o domingo 12 na lagoa de Caldelas

Este domingo, 12 de xuño, celebrarase o terceiro trofeo da XXIII Liga Galega de Kaiak Polo, nas categorías sénior, sub21 e damas, organizado pola sección de Kaiak Polo do Club Piragüismo Penedo, en colaboración co Concello de Tui e a Federación Galega de Piragüismo. Disputarase na lagoa de Caldelas, dende as 09.00 ata as 18.00 horas.

Un total de nove equipos procedentes de toda Galicia enfrontaranse ao longo do día nas distintas categorías. Os equipos participantes son o Rodeira de Cangas sénior e sub21, Umia de Caldas de Reis, Copacabana de Ferrol sénior e sub21, Combarro de Pontevedra, Xuvenil de As Pontes (Coruña), Arcos de Valdevez (Portugal) e o propio club organizador, Club Penedo feminino de Caldelas.

Neste campionato homenaxearase a David Fernández “Michi”, irmán dunha das xogadoras do Club Penedo, falecido a semana pasada no río Miño.

 

Hoxe preséntase o II Campus Da Fundación Celta De Vigo En Tui

Hoxe venres, ás 11.00 horas, na sala de concelleiros do Concello de Tui, realizarase a presentación do II Campus da Fundación Celta de Vigo en Tui, que se desenvolverá a principios do mes de xullo, nas instalacións deportivas municipais “Álvarez Durán” do concello.

Neste acto estarán presentes o alcalde de Tui, Enrique Cabaleiro, o concelleiro da Eurocidade, Miguel Capón, o concelleiro de Deportes de Tui, Laureano Alonso, o presidente do Tyde F.C., Elias Vieiro, así como o director da Fundación Celta de Vigo, Germán Arteta.

 

Tui participa ata o domingo en Festur, Feira de Festas de Interese Turístico, en Silleda

O Concello de Tui está presente dende hoxe e até o domingo en Festur, a Feira de Festas de Interese Turístico, que celebra a súa terceira edición en Silleda coincidindo coa 39ª  Feira Internacional Abanca Semana Verde de Galicia. Tui participa ao ter as súas festas patronais na honra a San Telmo declaradas de interese turístico galego.

Con posto propio duns 10 metros cadrados promociónanse os atractivos turísticos da cidade dende o río Miño ao Monte Aloia e o conxunto histórico, xunto á gastronomía, a cultura, o deporte... Fotografías de gran tamaño dunha vista da cidade dende Valença, da cruz do Monte Aloia, da Catedral e ou das rúas empedradas do conxunto histórico reclaman a atención do visitante. Folletos turísticos, información da oferta hostaleira e de restauración, ou do Camiño Portugués de Santiago achegan aos que pasen pola feira as claves para visitar Tui.

 

Xoves, 9 de xuño de 2016

Hoxe, ás 20h, no Teatro Municipal concerto de Fin de Curso do Conservatorio de Tui

O alumnado do Conservatorio Profesional de Música de Tui rematará o curso escolar 2015/2016 cun concerto que terá lugar no Teatro Municipal, no edificio da Área Panorámica ás 20:00 horas de hoxe. No mesmo participarán preto dunha trintena de alumnos, incluíndo a actuación do grupo de  “Música en movemento”, conformado por 15 nenos e nenas, á que se sumarán 13 actuacións nas que participan 17 rapaces máis.

O director do Conservatorio, Rubén Pérez, anima a tódolos tudenses e veciños da comarca a acudir a un concerto “de gran nivel” e que promete ser “moi dinámico”.  Finaliza así o curso para os estudantes que interpretarán obras amplamente recoñecidas polo público asistente, pero no que a innovación na posta en escena será un aliciente fundamental.

A entrada ao concerto de fin de curso é totalmente de balde, pero por razóns organizativas e debido ao aforamento limitado, deberase recoller a entrada de forma anticipada no despacho de billetes dende ás 19h.

 

O Contencioso Administrativo falla a favor do Concello de Tui na concesión do título para legalizar a ampliación do cemiterio de Rebordáns

O Xulgado do Contencioso Administrativo nº2 de Pontevedra fallou a favor do Concello de Tui e da Comunidade de Montes Veciñal en Man Común de Rebordáns no recurso presentado pola Asociación de Veciños de Rebordáns e un particular, pola concesión do título habilitante para a legación da ampliación do cemiterio da parroquia de Rebordáns por parte do Concello de Tui en Xunta Local de Goberno do 9 de xuño de 2015.

A xuíza no fallo da sentenza inadmite o recurso presentado pola Asociación de Veciños por este acordo da Xunta Local de Goberno, e desestima o interposto polo particular, que naquel momento exercía coma presidente do colectivo veciñal. Ao tempo impón as costas do xuízo causadas tanto ao Concello coma á Comunidade de Montes, ata un máximo de 600 euros, a cargo da Asociación de Veciños e do particular. Contra esta sentencia cabe recurso de apelación ante o Tribunal Superior de Xustiza de Galicia.

Os feitos remóntanse á xullo de 2011 cando José Manuel Sousa Sousa presentou escrito para legalizar a ampliación do cemiterio de Rebordáns, alegando a Asociación de Veciños que non era presidente da mesma nin tiña documento acreditativo para exercer esta representación. A xuiza estima que aínda que dende o Concello non se requiriu documentación acreditativa da representación este defecto non é invalidante do proceso seguido no Concello. Posteriormente a Comunidade de Montes asume a promoción deste expediente, sendo  a propietaria dos terreos onde se levou a cabo a ampliación do camposanto

Na sentenza sinálase que a legalización da ampliación do cemiterio conta con todos os informes técnicos preceptivos tanto da administración local, coma da autonómica.  A xuíza estima que na demanda “non existe unha defensa do interese urbanístico, senón que existe unha disputa dentro da Asociación de Veciños” e apunta que a tramitación do expediente administrativo foi “impecable”.

 

Mércores, 8 de xuño de 2016

O Concello de Tui entrega a catro clubs tudenses o material subvencionado pola Deputación de Pontevedra

O concelleiro de Deportes de Tui, Laureano Alonso, entregou o material subvencionado aos catro clubs tudenses que o solicitaron no seu día á Deputación de Pontevedra.

O Club Deportivo Ribadelouro, o Club Deportivo Caldelas, A Quinta de Tui Fútbol Sala e a Escudería Doña Urraca, recibiron diferentes materiais: balóns, esteras, picas, conos, bandas elásticas, etc.

O Concello de Tui agradece á Deputación de Pontevedra o apoio brindado aos clubs deportivos da provincia, neste caso co aporte de material deportivo necesario para o desenvolvemento da súa actividade. Anima a todos os clubs a seguir solicitando estas axudas nos próximos anos.

 

O Conservatorio e a Escola de Música promoven o programa “Pon música na túa vida” para facilitar a elección de instrumento aos nenos de 7 a 10 anos

O Conservatorio Profesional de Música de Tui e a Escola de Música de Tui, en colaboración cos centros educativos tudenses, promoven o programa “Pon música na túa vida”, dirixido a nenos con idades entre os 7 e os 10 anos interesados na música. Co mesmo búscase facilitarlles a elección dun instrumento cando se matriculen nun destes centros de estudos musicais proporcionándolles experimentar cos instrumentos antes de decantarse por un deles.  Os días 28, 29 e 30 de xuño, en horario de mañá, asistirán a clases de instrumentos, ata un máximo de 3 da súa elección, nunha actividade gratuíta. Os nenos interesados deben cubrir o formulario nos seus centros de ensino ou na oficina do Conservatorio.

 

El Club Remo do Miño Tui consigue varias medallas en el ámbito autonomico (Castrelo do Miño) y en la Regata Internacional de Gondomar (Oporto)

Un fin de semana de competiciones para el Club Remo do Miño Tui.

Si el sábado se competía en Castrelo do Miño en una regata autonómica, donde nuestros remeros dieron muestras de estar óptimamente cara a el Campeonato Gallego y de España que se aproximan.

El domingo lo haría en Oporto en la regata Internacional de Gondomar, a la cual se desplazaron nueve clubes españoles y diecisiete portugueses, lo que haría de esta regata una de las más competitivas.

Carlota Gonzalez y Paula Prada, abrirían la competición en Oporto en la categoría absoluta. Aun siendo de la categoría cadete. En su eliminatoria quedaron en quinta posición, dejando a tres equipos absolutos por detrás de ellas, y cinco en el cómputo general.

Ya en el Cuatro Scull de su categoría,  conseguirían la medalla de Bronce. La tripulación estaba formada por, Carlota Gonzalez, Paula Prada, María Maidana Y Sara Gomez.

Ya en la categoría absoluta en el Cuatro Con Timonel, nuestros remeros, Francisco Javier Alvarez, Isaac Prada, Cristian Fernandez, Diego Das Dores Y La Timonel Raquel Comesaña. Conseguirían alzarse con la primera posición y por tanto la medalla de Oro. No dieron opción a los rivales, ya que salieron muy fuertes en primera posición y aguantando  para no desgastar a Diego que tendría que remar la final del Skiff absoluto, para la cual ya se había clasificado por la mañana. Diego Das Dores, inmediatamente al bajar del cuatro con timonel, tuvo que subir al Skiff y  conseguiría la Cuarta y muy meritoria cuarta posición, dado el nivel de esta prueba.

En Castrelo do Miño, una vez más nuestros remeros demostraron estar en  una grandísima forma, ya que en las pruebas que participaron demostraron estar a muy alto nivel. Llevándose cuatro primeros puestos, un segundo y cuatro terceros. Lo cual hace un balance muy positivo para las categorías futuras del club.

Estos Fueron los resultados:

4xCF  1º  Nuria Piña, Lara Alvarez, Iria Alvarez Y Lucia Gonzalez.

4x CM 1º Martin Sias, Nicolas Falquez, Ander Puga y Unai Puga

1x CF  2º Katia Cardoso

1x CM 3º  Raul Lago

2x CM 6º Mario Gonzalez Y Aitor Martinez

2x IM 3º Pablo Freiría Y Daniel Freiria

1x JF 3º Laura Freiria

2- ABSF  1º Aroha Rendo y Estefania

1x ABS M  1º Diego Das Dores

1x ABS M 3º Bruno Gonzalez

 

O Concello de Tui realiza melloras no mobiliario urbano e acomete  tarefas de limpeza en parques infantís das parroquias  e pequenas reparacións

Persoal municipal realiza estes días tarefas de mantemento e limpeza en todo o termo municipal co obxectivo de manter a limpeza e ornato na cidade. Estas actuación súmanse aos pequenos cambios en materia de tráfico para mellorar a circulación na cidade.

Así por unha banda operarios municipais acometen o pintado das farolas do casco urbano tudense tras proceder á limpeza das mesmas de carteis e anuncios. Deste xeito apóstase por manter o ornato na cidade para o que se solicita a colaboración cidadá. Compre lembrar que a ordenanza municipal de Limpeza e Ornato Público contempla sancións económicas pola colocación de carteis ou anuncios fóra dos lugares establecidos.

Por outra parte dende o Concello estase a realizar estes días a reposición de papeleiras en diversos lugares do casco urbano que foran retiradas ao estar en mal estado, e tras a súa reparación ou renovación volven ser instaladas.

No mesmo ámbito nos últimos días estanse a realizar labores de limpeza e desbroce nos parques infantís das parroquias tudenses. En concreto tense actuado no parque infantil situado xunto a antigo cuartel en Caldelas, no da Ponderosa en Rebordáns, no do Regueiro en Areas, no da Barca e nos de Circos e do Anxo, en Pazos de Reis. Tamén se mellorou o acceso ao parque infantil no Paseo Fluvial, e operarios municipais acondicionaron xa nos últimos días as instalacións das piscinas municipais ante a súa próxima apertura na época estival.  Tamén se teñen realizado pequenas reparacións na madeira da Ponte das Febres, en Ribadelouro, punto sinalado do paso de peregrinos. Amais téñense mellorado rexillas de desaugue nos xardíns ou na rúa Olímpicos Tudense, entre outros puntos, amais da reposición de sinais en mal estado.

A travesía da rúa Rosa Bahamonde pasa a ser dirección prohibida, e non se pode estacionar en parte da rúa Coengo Valiño

Por outra parte en materia de tráfico se teñen realizado pequenos cambios. Así a prolongación da rúa Rosa Bahamonde pasa a ser dirección prohibida salvo para a Policía Local, de tal xeito que os vehículos que circulen pola rúa Rosa Bahamonde terán que facer stop e xirar cara a esquerda en dirección á rúa Augusto González Besada. Para facilitar este xiro recortouse a esquina da intersección coa rúa Foxo e elimináronse os bolardos que había instalados.

Tamén nas últimas semanas estableceuse a prohibición de estacionamento na rúa Coengo Valiño dende o novo aparcamento habilitado neste vial ata o pavillón de deportes, para facilitar o tráfico nesta zona.

 

Martes, 7 de xuño de 2016

Este domingo celébrase a V Eurocidade 10 xon saída e  meta no Paseo da Corredoira de Tui

Máis de 400 persoas son as que se agardan que participen este domingo na V Eurocidade 10, unha proba deportiva organizada polo Club Atletismo Tui-Thermalia e a Eurocidade Tui-Valença.  Serán dez quilómetros de percorrido por Tui e Valença, sendo un evento único nas súas características xa que percorre dúas cidades, dous países e atravesa unha ponte internacional, amais de atravesar  o conxunto histórico tudense e a fortaleza valenciana.

A presentación desta proba tivo lugar na casa do concello de Tui por parte do concelleiro da Eurocidade, Miguel Capón; o concelleiro de Deportes de Tui, Laureano Alonso; o vareador de Desporto de Valença, José Monte, e o presidente do Club Atletismo Tui-Thermalia, Rafael Pérez.

Laureano Alonso sinalou como esta proba é especial para el xa que o ano pasado foi á primeira a que asistiu xa coma concelleiro de Deportes. Expuxo coma este evento contribúe a dinamizar as dúas cidades e dalas a coñecer, e convidou ao público a presenciar a carreira. 

O vereador de Desporto de Valença, José Monte, destacou o simbolismo desta proba que atravesa a vella ponte internacional e desexou que volva ser un éxito coma en edicións anteriores.

Rafael Pérez, presidente do Club Atletismo Tui-Thermalia, fixo fincapé no privilexio que terán os participantes de correr por dous países e por zonas monumentais.  E salientou  o espírito solidario deste evento xa que por unha banda encargaron os trofeos á asociación Avelaíña, e por outra 1€ de cada inscrición doarano ao SOS Tomiño-Baixo Miño.

Entre as novidades deste ano está o establecemento de premios en metálico de 150 € para o primeiro e a primeira clasificados absolutos, 100 € para o segundo e a segunda e 50 € para o terceiro e a terceira. Amais haberá trofeos para os tres primeiros de cada categoría tanto masculina coma feminina, e coma novidade tamén para os tres primeiros da Eurocidade homes e mulleres.

O prazo de inscrición está aberto ata este mércores, 8 de xuño, ás 23:59h a través de Championchipnorte. O prezo é de 4€, máis 1€ de aluguer do chip.

A saída e a liña de meta estará no Paseo da Corredoira. O percorrido irá pola rúa Augusto González Besada, Martínez Padín, Avenida de Portugal, cruzará a vella ponte internacional para facer un percorrido polo perímetro interior e polo exterior da muralla de Valença, regresará a Tui cruzando de novo a ponte, para pola beira do Miño achegarse ata os xardíns e rematar de novo na Corredoira.

 

Sábado, 4 de xuño de 2016

Hoxe celébrase a Liga Sub22 de Baloncesto en Tui

O vello pavillón deportivo de Tui albergará a liga Sub 22 de baloncesto, coa participación do Club Baloncesto Tui, o FEDESA Rosalía de Castro, Santo Domingo de Betanzos e o Leyma Basquet Coruña.

Ás 10.00 horas disputarase o partido entre o club local e o Rosalía de Castro, e ás 12.00 horas o partido entre os de Betanzos e o Basquet Coruña. Ás 17.00 xogaranse a terceira e cuarta praza, e a final disputarase ás 19.00 horas.

Nesta liga Sub22 participan oito equipos galegos durante tres fins de semana, sendo sedes nesta ocasión Tui e O Porriño. A organización corre a cargo da Federación Galega de Baloncesto, colaborando o Club Baloncesto Tui e o Concello de Tui.

 

Tui e o O Porriño acollerán o Campionato de España de Baloncesto Infantil Feminino

O Campionato Nacional de clubs, na categoría infantil feminino de baloncesto, se disputará nas localidades de Porriño e Tui, entre o 12 e o 18 de xuño, xogándose os encontros nos pavillóns deportivos municipais das dúas localidades.

Esta será a segunda ocasión na que o noso concello albergue, conxuntamente con Porriño, a organización dun Campionato de España de Baloncesto, dado que no ano 2011 se disputou o da categoría júnior masculino.

Trinta e dous equipos participarán ao longo da semana nesta competición, cuxo sorteo foi celebrado o mércores na casa do concello do Porriño, coa presenza do presidente da Federación Galega de Baloncesto, Francisco Martín, do concelleiro de deportes de Porriño, Manuel Carrera, do concelleiro de deportes de Tui, Laureano Alonso, así como do responsable da Federación Española de Baloncesto, David Aurich, e os presidentes do Club Baloncesto Porriño e Club Baloncesto Tui.

O pavillón deportivo municipal novo de Tui albergará partidos o domingo 12, o luns 13 e o martes 14, en horario de 10.00, 12.00, 16.00 e 18.00 horas, sendo o resto de partidos disputados na localidade veciña.

Así, na nosa cidade competirá o equipo campión do ano pasado, Snatt`s Femení St. Adriá, así como o Sant Josep, o Movistar Estudiantes, DKV Puerto, AD Infante, Perfumerías Avenida de Salamanca, Aranguren Multibasket e o terceiro equipo clasificado do País Vasco.

Na próxima semana empezarase a notar ambiente de baloncesto en Tui, dado que moitos dos trinta e dous equipos participantes, estarán aloxados en hoteis da nosa cidade. Por isto, o Concello de Tui da a benvida a todos os participantes e acompañantes deste campionato, esperando que teñan unha estancia agradable nas localidades veciñas de Tui e Porriño.

   

O luns preséntase a V Eurocidade 10

O próximo luns, 6 de xuño, ás 11.00 horas españolas, terá lugar a presentación da proba deportiva V Eurocidade 10, organizada polo Club Atletismo Tui-Thermalia e a Eurocidade Tui-Valença, que se disputará o próximo 12 de xuño.

Na mesma estarán presentes o alcalde de Tui, Enrique Cabaleiro, o presidente da Cámara de Valença, Jorge Salgueiro, os concelleiros de deportes de Tui e Valença, Laureano Alonso e José Monte, así como o presidente do Club Atletismo Tui-Thermalia, Rafael Pérez.

 

Venres, 3 de xuño de 2016

Concertos das bandas do Conservatorio e da Escola de Música na Praza da Inmaculada

A Praza da Inmaculada acollerá hoxe venres dous concertos a cargo das Bandas do Conservatorio Profesional de Música de Tui e da Escola de Música de Tui. ÁS 19h actuará a Banda da Escola de Música e ás 19.30h farao a Banda do Grao Profesional do Conservatorio.

 

A Biblioteca Municipal de Tui amplía o seu horario e abrirá ininterrompidamente de 9 a 21 horas de luns a venres

A Biblioteca Pública Municipal de Tui, situada no edificio da Área Panorámica, amplía a  64 horas a apertura semanal. De luns a venres o horario é de 9 a 21h de forma ininterrompida e os sábados de 9 a 13h, tanto no mes de xuño coma no de agosto. En xullo abrirá de 9 a 15h de luns a venres, e permanecerá pechada os sábados. A partir do 5 de setembro comezará o horario de inverno, no que a principal novidade será a apertura continuada de 8h a 21h de luns a venres, e manténdose os sábados de 9 a 13h.

Na actualidade a Biblioteca Pública Municipal de Tui conta con 5.815 socios, dos que 93 déronse de alta dende o 1 de xaneiro deste ano. Aqueles que desexen obter o carné da biblioteca teñen que achegar unha fotografía e o seu D.N.I.  Este documento permitiralles a retirada de libros de empréstito na propia biblioteca e daralles dereito a desconto nos espectáculos do Teatro Municipal de Tui.

Os fondos bibliográficos están integrados por máis de 40.700 exemplares dos que 138 se incorporaron no que vai deste ano. Dende o 1 de xaneiro a biblioteca tudense realizou 3.519 empréstitos de libros, correspondendo 2.161 a literatura infantil, sendo máis demandado “Diario de Greg” de Jeff Kiney.

Dende 2003 a Biblioteca Pública Municipal de Tui está situada no primeiro andar do edificio da Área Panorámica ocupando un espazo de 440 metros cadrados e ten unha capacidade para 112 usuarios.  Conta cunha recepción, sala infantil-xuvenil, unha sala de lectura e estudio, mediateca e hemeroteca, así coma almacén con zona de catalogación. Actualmente conta con 6 ordenadores a dispor dos seus usuarios aos que se pode acceder a través dun usuario e unha contrasinal. Así coma con rede wifi.  Na Sala de Lectura están a dispor a diario os xornais Faro de Vigo, La Voz de Galicia, Atlántico Diario, el País e El Mundo. Con carácter mensual reciben outras publicacións sobre deportes, economía, moda... 

 

Xoves, 2 de xuño de 2016

A Eurocidade acolle ás I Xornadas Ibéricas de Metroloxía e calidade

O alcalde de Tui, Enrique Cabaleiro, e o presidente da Cámara de Valença, Jorge Salgueiro Mendes, abrirán hoxe, ás 10.30 hora española as I Xornadas Ibéricas de Metroloxía e Calidade no auditorio do Centro de Innovaçao e Logística de Valença, xunto ao presidente do Instituto Politécnico de Viana do Castelo, IPVC, Rui Teixeira.

Estas I Xornadas Ibéricas de Metroloxía e Calidade están promovidas pola Eurocidade Tui-Valença xunto á Escola Superior de Ciencias Empresariais, ESCE, do Instituto Politécnico de Viana do Castelo.  Están formadas polo III Seminario Ibérico de Metroloxía e polo VIII Forum de Calidade ESCE-IPVC. Tras o éxito das anteriores edicións do Seminario Ibérico estas xornadas ofrecerán unhas serie de relatorios tanto sobre metroloxía coma sobre xestión da calidade, con atención especial á nova normativa ISO 9001:2015, e pondo en debate a metroloxía na era dixital. Nas mesmas van participar especialistas tanto portugueses coma españois brindando a oportunidade de intercambiar experiencias, comparar metodoloxías e métodos de traballo.  Tamén se darán a coñecer casos de colaboracións e proxectos conxuntos nestes ámbitos entre España e Portugal.

Como novidade este ano creouse o Premio Excelencia e Calidade Eurocidade Valença-Tui 2016 ao que concorreron empresas tanto do Alto Minho coma da provincia de Pontevedra. Co mesmo a Cámara de Valença e a ESCE buscan premiar ás organizacións e empresas que teñan desenvolvido acción para mellorar na súa eficiencia e competitividade aplicando ferramentas coma 5S, SMED, TPM, Lean, 6 Sigma, ou outras en sectores coma a industria, servizos, comercio e agricultura e pesca.

Tras o acto de apertura mañá ás 11 hora española comezará o primeiro dos paneis previstos sobre “A Metroloxía na Era Dixital”. Moderado por Juan Carlos Lago de TRW contará coa intervención de José Luís Prieto, director de metroloxia do LOMG  co título “Falamos de metroloxía”, e de Susana Costa e Silvia Silva da QTEC sobre “Calibracións e verificación de EMN na área dos ensaios e inspeccións”.

Luís Lorenzo Esperante da SIL moderará o segundo panel que comezará ás 12h coa intervención de Luís Pires de ABIMOTA e André Mendes de LABMETRO.

  

Convocado o proceso selectivo para a contratación de sete persoas para as piscinas municipais

Ante a próxima apertura das piscinas municipais coincidindo coa época estival o Concello de Tui convoca o proceso selectivo para a contratación de sete persoas de forma temporal. Trátase de tres socorristas e tres operarios de servizos diversos e mantemento, a tempo parcial,  e dun operario de mantemento a tempo completo.

As bases aparecen hoxe publicadas na web municipal e no Boletín Oficial da Provincia. Os interesados teñen ata o xoves 9 de xuño para presentar as instancias a documentación requirida para acceder ao proceso selectivo.

Tamén se convoca unha praza para a Oficina de Turismo

Por outra parte o Concello convoca o proceso selectivo para a contratación dun técnico medio, diplomado ou graduado en Turismo, para a realización de tarefas de información, animación e promoción turística na Oficina de Turismo de Tui. O contrato, a tempo completo, terá unha duración de tres meses.  As solicitudes pódense presentar ata este sábado 4 de xuño no rexistro de entrada do Concello de Tui.

 

Mércores, 1 de xuño de 2016

Este domingo Andaina polas Fragas e Levadas do Calvo e Deva

Este domingo, 5 de xuño, realizarase unha nova edición das andainas da Eurocidade, que nesta ocasión percorrerá as fragas e levadas dos ríos Calvo e Deva, no concello da Cañiza, cunha distancia de 15 quilómetros, de dificultade media, e un tempo estimado de duración de 4 horas.

A organización disporá dun autobús para realizar o desprazamento, que sairá ás 8.30, dende o Centro Interfederado de Tui, sendo o horario estimado de chegada a Tui sobre as 15.00 horas. É preciso a inscrición previa antes do mércores, 1 de xuño, a través da web www.andatui.es, cun prezo de 5€ para adultos e 3€ para menores de 12 anos. Neste prezo inclúese, ademais do desprazamento, o avituallamento na metade da andaina e o pincho ao remate da mesma

Toda a información relativa a estas andainas pódese consultar no Facebook, “Caminhadas Saudáveis e Andainas Saudables”, ou a través das webs dos clubs organizadores, Celtas do Minho en Valença e AndaTui Rego da Pedra en Tui.

 

Reunión informativa da Estratexia Local Participativa do programa Leader Galicia 2014/2020

Este xoves, 2 de xuño, ás 20h a Sala Félix Rodríguez da Área Panorámica acollerá unha reunión informativa sobre o Programa Leader Galicia 2014 – 2020 e a Estratexia Local Participativa que está a elaborar a Asociación de Desenvolvemento Rural Maiv – Baixo Miño da que forma parte o Concello de Tui.

Trala publicación no DOGA, o pasado 2 de marzo, das bases reguladoras para a selección de estratexias de desenvolvemento local, para a selección e recoñecemento dos grupos de desenvolvemento rural como entidades colaboradoras na xestión da medida Leader de Galicia e para a concesión da axuda preparatoria, cofinanciada polo Fondo Europeo Agrícola de Desenvolvemento Rural (Feader), no marco do PDR de Galicia 2014 – 2020, trabállase agora na elaboración desta estratexia.  Neste proceso é fundamental a participación activa das comunidades locais no seu deseño, que supoña un fluxo de información e unha influencia real no proceso de toma de decisións. A participación está aberta a todos os sectores públicos e privados do territorio, incluíndo a todos os colectivos que queiran participar.

Por este motivo dende o Concello de Tui convídase a asociacións, comunidades de montes, empresas e particulares a acudir á reunión deste xoves en Tui.