A Guarda - galiciasuroeste

Title
Vaya al Contenido

A Guarda

COMARCA
A GUARDA

Exposición das listas electorais para as eleccións do 12 de xullo
 
A Guarda, 23 de maio de 2020.  Entre os días 25 de maio e 1 de xuño, ambos inclusive, poderán consultarse na oficina do padrón municipal as listas do Censo Electoral que se utilizaran nas Eleccións ó Parlamento de Galicia do vindeiro 12 de xullo.
 
O horario de consulta será entre as 9.00 horas e as 14.00 horas, de luns a venres, consulta que deberá facerse de xeito individual, previa identificación da persoa (mediante D.N.I., pasaporte ou permiso de conducir).
 
É conveniente que aquelas persoas que houberan cambiado de domicilio, ou que cumpriran 18 anos recentemente comproben a súa correcta inscrición no censo.

A Comunidade de Montes de Camposancos abre un novo prazo para presentar candidatura á Xunta Rectora
A Comunidade de Montes de Camposancos, informas logo de acordar en asamblea xeral ordinaria convocar para o pasado 4 de abril eleccións para presidir a Xunta Rectora da CMVMC de Camposancos, abríndose un prazo de 10 días para a presentación candidaturas, transcurridos os cuales non se presentou ningunha, este organismo viuse na obriga de aprazar as elección pola ca coñecida problemática do Covid 19. Unha vez se está entrando en novas fases de desconfinamento, a Mesa Electoral entende que se debe abrir un novo periodo electoral de 10 días, como marcan os estatutos, de modo que poderán presentarse candidaturas ata o día 5 de xuño.
A data para a asamblea xeral extraordinaria para a celebración das eleccións convocarase tan pronto como legalmente sexa viable, non podendo celebrarse namentras non se poidan reunir máis de 100 personas, xa que ás asambleas asisten de media 105 comuneiros.


_________________________________

O concello da Guarda esixe á Xunta de Galicia que atenda as demandas do seu centro de Saúde

A Guarda, 22 de maio de 2020. O servizo de saúde pública no concello da Guarda ven sendo deficiente dende fai anos. En distintas ocasións, tanto dende o concello como dende o propio Centro de Saúde, trasladáronse demandas de mellora, aos responsables do SERGAS.
Dende finais do pasado ano 2019 ata que se declarou o estado de alarma pola alerta sanitaria provocada polo COVID-19, os veciños e veciñas da Guarda, xunto con persoal do centro, estiveron facendo concentracións todos os xoves ás 12 da mañá, pedindo melloras que permitiran un funcionamento normal do centro e unha correcta atención sanitaria aos usuarios do mesmo.
Dende que se declarou o estado da alarma ata a actualidade suspendéronse as reivindicacións de veciños e persoal do Centro, neses momentos había que centrarse na alerta sanitaria que estabamos a padecer.
O que está sucedendo na fase de desescalada na que nos atopamos é que a dotación de recursos humanos ao centro, lonxe de mellorar, sigue sendo precaria, con indicios de empeoramento cara ao futuro inmediato.
Por este motivo, o persoal do centro de Saúde fai pública unha carta na que describe esta situación de precariedade laboral, o que dificulta a atención sanitaria adecuada. A reestruturación provocada pola pandemia do coronavirus ven a agravar máis a situación.
A reestruturación mencionada hai que engadir os problemas que ven padecendo o Centro de Saúde dende fai anos: baixas prolongadas que se substitúen de forma parcial por curtos períodos de tempo. Tardes nas que en lugar dos tres médicos que corresponde só hai un atendendo. Un servizo de urxencias cun só equipo en lugar de dous, o que provoca longas ausencias dos sanitarios por atención domiciliaria ou traslados ao hospital. Un servizo de enfermería que non cumpre co ratio dun enfermeiro por cada médico. E así un longo etcétera que o persoal do Centro enumera na carta e que os veciños e veciñas da Guarda veñen sufrindo cunha atención deficiente.
Coa reestruturación pola pandemia a situación agravarase se non se reforza o cadro de persoal, tanto de profesionais médicos, como de enfermería e administración. Agora que se vai recobrando a normalidade sanitaria é necesario seguir controlando a entrada e os aforos, e dar asistencia a toda a atención ordinaria que quedou suspendida, sobre todo a de patoloxías crónicas. Ademais coa chegada do verán aumentará o número de persoas desprazadas á localidade co conseguinte aumento na carga de traballo. Se o SERGAS non subsana as deficiencias na dotación de persoal no Centro de Saúde da Guarda para atender a poboación de forma adecuada, haberá moitas dificultades no verán e sobre todo, no outono, por causa da gripe estacional.
________________________________

Unidade Móbil de inspección técnica de turismos na Guarda en maio e xuño
A Guarda, 21 de maio de 2020. A Unidade Móbil 6 de inspección técnica de turismos desplazarase ao concello da Guardado 25 ao 29 de maio e do 01 ao 05 de xuño, situándose na Estación de Servicio San Roque.
O horario de atención será de 9.00 a 13.30 horas e 15.15 a 18.00 horas. de luns a venres agá o último día, que será de só de mañá.
Pódese concerta cita previa chamando ao número de teléfono: 902 30 90 00, ou a través da web: www.sycitv.com - Cita previa.
A admisión de vehículos con características particulares estará condicionada á posibilidade de realizar as operacións de inspección regulamentarias.

Policía Local retomará o control da Zona Azul a partires do 25 de maio
A Guarda, 21 de maio de 2020. A Concellería de Tráfico e Mobilidade do Concello da Guarda informa que a partires do vindeiro luns día 25 de maio, retomará o funcionamento habitual do sistema de aparcamento con horario limitado da Zona Azul na vila.
Debido ás limitacións de mobilidade impostas dende a declaración do estado de alarma pola pandemia do Covid-19, decidiuse deixar sen efecto temporalmente esta zona de aparcamento con horario limitado.
A Zona Azul da Guarda permite un aparcamento limitado de unha hora en varias rúas do casco urbano da vila, favorecendo deste xeito a rotación de vehículos para facer compras e xestións. Os reloxos da Zona Azul se poden recoller de xeito gratuíto nas dependencias da Policía Local na Praza do Reló s/n ou nos comercios da zona.
A maiores da Zona Azul, dende a Concellería de Tráfico e Mobilidade do Concello da Guarda recórdase das zonas de aparcamento disuasorio existentes na Rúa Coruña, Campo de Fínola ou o aparcamento da “Eléctrica” con accesos dende as rúas Mariano Ordóñez e Rúa Brasil.

__________________________________

O concello da Guarda reactiva a obra pública e as contratacións de persoal

A Guarda, 19 de maio de 2020. As obras que se están desenvolvendo nestes momentos na localidade afectan a rúa San Queitano e a rúa Cal. Está pendente de rematar a primeira fase do plan de accesibilidade no seu tramo correspondente a rúa Galicia, nesta rúa están pendentes de elevar varios pasos de peóns.
Ademais iniciáronse as obras da rotonda da praia do Muíño, obra que licitou a Deputación de Pontevedra, que permite a unión da senda litoral coa senda da desembocadura do Miño.
O concello da Guarda está impulsando a contratación de obras, que contan con dispoñibilidade financeira, e que son importantes para o executivo local debido a que constitúen un revulsivo para a actividade económica, afectando de xeito directo á contratación e xeración de postos de traballo e, de xeito indirecto debido a incidencia que teñen noutros sectores pola adquisición de materiais, aluguer de maquinaria, etc.
Nestes intres dende o departamento técnico do concello se está a tramitar a obra da rúa Calvario (terceira fase), a renovación de beirarúas na baixada a Fedorento e fronte ao estadio municipal da Sangriña, peche perimetral do colexio infantil de Solanas, a reforma do entorno dos contedores soterrados no inicio da rúa Porto, asfaltado da rúa Pintán e do camiño do Campamento, dotación de luminarias en Bouza da Fonte e rúa Vigo, substitución de barandas no parque de Laxe Grande, melloras no interior da piscina municipal e a reposición dos tellados das dúas vivendas castrexas.
Por outra banda, retomouse o proceso de selección de persoal, dentro da liña 3 do Plan Concellos da Deputación de Pontevedra, persoal que é necesario para reforzar determinados servizos como a recollida do lixo, limpeza de praias ou desbroces de rúas.
Normalmente este persoal se contrata por un período de 9 meses pero ante a declaración do Estado de alarma suspendéronse os procesos selectivos, o concello ante a nova situación de desescalada decidiu reactivalos para posibilitar a contratación de persoal no prazo de tempo máis curto posible.
Con estas medidas o concello da Guarda manifesta o seu compromiso e impulso decidido, na medida das súas posibilidades, para reactivar a obra pública e o emprego.

__________________________________

A Guarda vive as Letras Galegas 2020 dun xeito diferente

A Guarda, 18 de maio de 2020. O pasado domingo día 17 de maio conmemorouse o Día das Letras Galegas 2020 e para celebralo nesta ocasión, a Concellería de Cultura, propuxo unha iniciativa na que moitos veciños foron convidados a participar compartindo e divulgando os versos e poemas escritos na nosa lingua.
Dende mediados da semana pasada foron moitos os que quixeron plasmar as súas letras na proposta “Tendal de Poemas” emprazando especialmente ás familias con nenos, a que escollesen un poema en lingua galega e o escribiran sobre un lenzo de tea, acompañando dunha bonita decoración ó gusto. Entre o material atopamos prendas de roupa vella (camisetas) ou anacos de tea (saba, mantel...) ó que se lle deu forma de prenda de roupa.
Os traballos están colocados polos participantes no tendal sito na contorna do Auditorio de San Benito, se aínda non participaches aínda é posible ata mediados desta semana, os traballos permanecerán ata final de mes, se a climatoloxía o permite.
Tamén se quixo conmemorar este ano as Letras Galegas con dous vídeos, por unha banda da Agrupación Cultural Guardesa e, pola outra, por parte do Equipo de Dinamización Lingüística do IES A Sangriña.
No caso do vídeo da Agrupación Cultural Guardesa, contouse coa participación de Julia Sobrino e Chuny Vázquez, que recitaron poemas do homenaxeado nesta edición, Ricardo Carvalho Calero.
O vídeo do IES A Sangriña leva por título "Conversa na rede - Ricardo Carvalho Calero" e trátase dunha conversa virtual entre alumnas e alumnos do IES A Sangriña (A Guarda) e profesoras, escritores e representantes de asociacións do ámbito da lingua e da cultura galegas.

_____________________________

Piueiro iza ao vento a Rosalía de Castro no Día das Letras Galegas

Baiona, 17 de maio de 2020.  "Lieders" de Rosalía de Castro é unha declaración de liberdade e está considerado como o primeiro manifesto feminista publicado en Galicia. Desde hoxe, Día das Letras  Galegas, a autora desta oda ondeará nos mares galegos grazas ao tributo que lle brindou a Asociación  Piueiro da Guarda,  que esta mañá estreou a súa nova vela coa imaxe de Rosalía e a lenda " Eu son libre". Joaquín  Cadilla, presidente da Asociación e home de mar, explica que elixiron a figura da poetisa padronesa como emblema por ser  "a atadeira da nosa cultura e, desde o ano pasado,  tamén  estrela non firmamento que nos guiará  nos roteiros polo océano da  nosa Cultura, de porto en porto. Da Guarda a Ribadeo".
A estrea da vela coincidiu tristemente na mesma semana da morte de  Staffan Mörling, etnógrafo e antropólogo sueco que, desde a súa primeira visita a Galicia en 1964, converteuse nun gran coñecedor, defensor e divulgador da cultura mariñeira galega. O seu recordo tamén foi izado coa simbólica vela de Piueiro tras un sentido minuto de silencio.
O acto desta mañá, no que se recitou un fragmento de Cantares Galegos mentres as gaitas clamaban o himno do antigo Reino de Galicia antes de soltar ao vento o himno oficial, tivo lugar no Monte Real Club de Iates de Baiona, onde  hiberna o  volanteiro, o barco reconstruído pola Asociación Piueiro, á espera de volver a casa: o porto da Guarda. Desde alí partirá, cando a pandemia o permita, en viaxes educativas e culturais.
No acto participaron, ademais dos membros da asociación, a madriña e o padriño da embarcación: Paula Alfonso e Javier de la Gándara.
O  volanteiro é un tipo de embarcación tradicional do que se ten referencia desde o século  XVII, que viviu o seu momento de maior gloria no  XIX e que desapareceu a comezos do XX coincidindo coa aparición dos arrastreiros.
Fragmento de "Lieders"
....Yo, sin embargo, soy libre, libre como los pájaros, como las brisas; como los árboles en el desierto y el pirata en la mar ...

Sergio Fernández Rodríguez advirte da presenza de cerámica e cuarcitas nun sendeiro por debaixo do Cancelón



A Guarda, 17 de maio de 2020. O domingo, 11 de maio, mentres Sergio Fernández corría polos sendeiros do Trega practicando deporte, chamoulle a atención, por debaixo do Cancelón, una acumulación de seixos dispostos coma un enlousado sobre o terreo así coma a presenza de cerámica, integrada na terra, a modo de “estratos”.
Fotografouna e foise para a casa teimando se “aquilo” tería algún valor arqueolóxico. O que tiña claro é que os cantos rodados no chegaron sós alí, e tampoco a cerámica “xurdiu” naquel lugar. Alguén máis preto a nós, ou máis ou menos loxe de 2020 os levou. Serán os arqueólogos os que dirán o posible valor, ou ningún valor, histórico/arqueolóxico da presenza deses restos de “barro cocido” e cuarcitas por debaixo do Cancelón.
No moi lonxe de alí, indo polo sendeiro cara ao sur, atópase o lugar de Bouzas, onde previamente á construcción do colexio M. Rodríguez Sinde, no ano 1993, ser localizaron restos de cerámica así como dunha construcción de entre os séculos II e IV d. de C. que se pensou que Bouzas  puido ter sido a orixe da Guarda.
__________________________________

A Mesa Local de Comercio da Guarda reúnese en sesión extraordinaria e cunha orde do día centrada nas medidas tomadas polo Concello para o sector

 
A Guarda, 15 de maio de 2020. O xoves 14 de maio tivo lugar unha sesión extraordinaria da Mesa Local de Comercio, na que ademais do Alcalde e as Concelleiras de Facenda e Desenvolvemento Local, participaron os/as representantes das catro asociacións vinculadas a este sector, a Asociación de Consumidores Aldraman, así como os/as portavoces do resto de grupos políticos.
 
Durante esta sesión deuse conta de todas as medidas económicas e de dinamización comercial adoptadas polo Concello desde o inicio da pandemia ata agora, e entre as que se inclúen retrasos ou exoneración de taxas municipais para negocios, aceleración de pagos a provedores/as, difusión durante o confinamento dos establecementos comerciais con servizo de entrega a domicilio e dos establecementos de hostalaría abertos durante a desescalada, ou campañas de sensibilización para o consumo local, entre outras.  
 
Unha das medidas que máis curiosidade provocou nos/as asistentes foi a da creación do “market place” da Guarda no que calquera comercio, praceiro/a, restaurante ou autónomo/a do sector primario, poderá vender os seus produtos online, tanto a nivel local, como no resto de España e Portugal.
 
O Alcalde Antonio Lomba aproveitou o punto número dous da orde do día para facer unha mención especial e expresar o seu agradecemento a todas as empresas que, desde o primeiro momento, achegaron a súa colaboración desinteresada doando todo tipo de material de protección ou elaborando mascarillas de tea. Pola súa parte, o Concello puxo a disposición da cidadanía aquel material do que se ía  dispoñendo ou se fabricaba en cada momento, dada a dificultade que tiveron tanto empresas como particulares durante o confinamento para conseguir mascarillas, luvas, xel ou pantallas.  
 
Por último abordouse o punto máis importante da sesión: a intención por parte do Concello de  elaborar un plan de dinamización económica axustado ás nosas particularidades, e para o que se contratará unha empresa consultora con experiencia  no asesoramento a entidades locais e no deseño deste tipo de medidas. Neste momento estanse valorando as ofertas e propostas de tres empresas que ofrecen este tipo de servizos e a mediados da semana que ven tomarase a decisión de cal se considera a máis axeitada para levar a cabo esta importante misión.
 
A Concelleira de Desenvolvemento Local Fátima Rodríguez destacou que a única vía para saír adiante será traballar unidas e unidos, e asegura que desde o equipo de goberno existe o firme compromiso de que cada evento, actividade e iniciativa teñan como principal obxectivo a reactivación, e polo tanto acaben revertendo economicamente nos negocios locais.
 
Tamén neste punto a Concelleira de Facenda Montserrat Magallanes destacou que se traballará neste plan de xeito colaborativo tanto co comercio, a hostalaría ou o turismo, pero sen esquecer a outro tipo de empresas da localidade como poderían ser aquelas do sector da pesca, e que resultan vitais para o pobo.  
 
Para rematar a sesión abriuse unha rolda de preguntas na que o Alcalde a as dúas edís responderon a todas aquelas cuestións relacionadas cos temas abordados durante a mañá, e o Alcalde finalizou cunha metáfora a modo de reflexión defendendo que o Concello non ten a obriga de dar o pan feito ás empresas, pero facilitará os ingredientes e a maquinaria para que elas sexan quen de elaboralo por si mesmas.

_________________________________

Anabam publica “Marcas e siglas dos mariñeiros da Guarda”

A Guarda, 14 de maio de 2020. Da autoría de Agustín Ferreira Lorenzo, co patrocinio da Xunta de Galicia, editado por Anabam coa colaboración do colectivo Piueiro, acaba de publicarse, e xa se pode adquirir nas librarías da Guarda, o libro “Marcas e siglas dos mariñeiros da Guarda”, un exhaustivo, completo e complexo traballo que contribúe a salvagardar o patrimonio inmaterial dunha comunidade, a dos mariñeiros guardeses, para a posteridade.
 
O libro, a toda cor e con 146 páxinas, lembra, nas primeiras, aos precursores na recolección das marcas mariñeiras: Eliseo Alonso, Ricardo Rodríguez Vicente e Antón Ferreira Lorenzo.
 
A “ilusión” do colectivo Anabam por crear o Museo do Mar da Guarda, e os intentos que o fixeron posible tras uns inicios na sede deste colectivo, despois no Centro Cultural e, finalmente, coa súa instalación definitiva na Atalaia, está tamén presente no libro.
 
“Marcas e siglas doas Mariñeiros da Guarda” é posible tamén grazas aos principais protagonistas: os homes que as posuíron e os familiares que facilitaron a información, materiais e fotografías que ilustran as páxinas deste libro.
 
25 anos despois de que Anabam publicase o primeiro destes estudos, da Autoría de Antón Ferreira, esta nova publicación amplía, mellora e actualiza aquela edición de 1995.


Aberto o prazo para reserva de prazas no Conservatorio Municipal de Música da Guarda


 
A Guarda, 14 de maio de 2010. Nestes intres está aberto o prazo de reserva de praza para os alumnos e alumnas de novo ingreso no Conservatorio Municipal de Música da Guarda de cara ao vindeiro curso 2020-2021.
 
Todos os interesados poden realizar a súa reserva a través da web do conservatorio http://www.edu.xunta.gal/centros/cmuselementalaguarda/
Se che gusta a música e estás interesado/a en tocar un instrumento, estudar música, coñecer novos compañeir@s, non dubides e fai xa a túa reserva.
 
A Concelleira delegada do Conservatorio, María Elena Baz destaca o esforzo realizado dende o Concello para o mantemento do Conservatorio, ampliando a oferta de servizos, engadindo que «apostar pola música é apostar por un bo futuro para os rapaces e rapazas, inculcando valores positivos coma o traballo en equipo, a responsabilidade, a disciplina, entre outros», animando a todos/as interesados/as a reservar a súa praza.

O BNG presenta novas medidas para unha saída social na Guarda a crise provocada pola COVID19
A Guarda, 14 de maio de 2020. O BNG da Guarda a través do seu portavoz municipal, Anxo Baz, vén de facer pública unha  iniciativa de novas medidas económicas e sociais para a saída da crise provocada pola COVID19.
O BNG xa presentou no pleno do día 5  deste mes unha serie de medidas urxentes para combater a crise social e económica provocada pola COVID19, aberta a amplialas coas achegas do resto da corporación, procurando o máximo consenso. Neste pleno acordouse a convocatoria dunha mesa técnica para abordar estas medidas.
O portavoz do BNG  afirma “que  medidas como a bonificación  nos recibos do lixo e a auga para comercios e hostalaría afectada polo cese de actividade  así como para as familias que teñan unha renda per cápita inferior ao IPREM (537,48 €/mensuais), a redución do importe das licenzas de apertura para o fomento e creación de novas empresas ou o incremento da partida de Emerxencia Social por citar só algunha das medidas, deben ser tratadas urxentemente. Por eso instamos ao alcalde, que convoque a mesa técnica acordada para avanzar nestas e noutras medidas o antes posibel”.
Anxo Baz presenta “estas medidas urxentes que deben ir acompañadas de outras de maior calado nas que interveña a Xunta de Galiza e o Goberno do Estado. A crise que se aveciña vai esixir levar adiante proxectos de futuro para promocionar e dinamizar a economía do noso concello. Nesa  liña consideramos que transformar a praza de abastos nun mercado de excelencia é prioritario para garantir o seu futuro e para  crear dinámicas locais que favorezan o comercio de proximidade  e  xeren emprego”.
O voceiro nacionalista tamén incidiu en que “O Concello da Guarda debe integrarse na rede de Concellos polo Espazo Público que promove a Deputación de Pontevedra o que propiciaría facer unha vila máis sostibel e humana. A distancia física  recomendada polas autoridades sanitarias, fai  máis  necesario que nunca  contar con espazos en rúas e prazas que permitan realizar actividades de esparcemento e desprazamentos a pé con seguridade. Nesta nova situación a prioridade peonil debe ser un obxectivo básico  en todas as rúas nas que sexa posíbel”.
_______________________________________

O concello da Guarda establece un plan de actuación para retomar a atención presencial  dos  servizos municipais no contexto do  covid 19



 
A Guarda, 13 de maio de 2020. Este pasado martes, 12 de maio, reuníronse no salón de plenos do concello da Guarda a Mesa de  Negociación   para dar traslado dos traballos que se están realizando por parte do equipo de goberno dende o inicio do estado de alarma, o 14 de marzo, e tamén da elaboración de protocolos  previos á reapertura de determinados servizos. Esta semana procedeuse a atender, con cita previa, na Biblioteca Municipal,  no Punto Limpo, así como na Casa do Concello.
 
Nesta reunión, o alcalde, Antonio Lomba, trasladou aos membros do comité de empresa e aos  representantes dos sindicatos a elaboración dun protocolo de servizos administrativos, elaborado por funcionarios municipais, documento que se remitiu aos traballadores e que está aberto ás modificacións que sexan necesarias para adaptarse á situación cambiante que xera o coronavirus. Neste documento se establece como forma de traballo preferente o teletraballo, que foi a fórmula  que se adoptou dende o inicio de estado de alarma por parte dos servizos administrativos do concello,  facéndoo compatible co necesario traballo presencial, para atender as necesidades dos veciños da localidade,  a través de cita previa para evitar o risco de contaxio. Hai que sinalar que outros departamentos do concello, considerados esenciais, están  traballando de xeito presencial dende o inicio do estado de alarma, tales como servizos sociais, policía local, Ges, persoal de servizos de recollida de lixo, limpeza viaria e vías e obras.
 
Tamén se informou da elaboración dun protocolo  para a implantación  de medidas preventivas  nos diferentes edificios ou lugares onde se reinicia a actividade,  a este protocolo guía se irán incorporando, como anexos, protocolos específicos como o do albergue, biblioteca ou oficina de turismo, entre outros. Para esta adecuación o concello da Guarda ten  establecido unha liñas de actuación para posibilitar a distancia social de 2 metros.  Procedeuse a compra de mamparas,  determináronse  uns itinerarios de seguridade, reforzouse   a limpeza e desinfección  non inmobles e colocáronse dispensadores de hidroxel, entre outras medidas.
 
A resposta da cidadanía a este retorno  está sendo moi positiva,  facendo uso  maioritario da atención telefónica e con cita previa,  posibilitando que non se produzan acumulación de persoas, nin colas de espera e permitindo unha  atención adecuada  do servizo.

O alcalde da Guarda solicita ao programa “El Hormiguero” que rectifique a súa descrición das Festas do Monte Santa Trega



A Guarda, 13 de maio de 2020. O alcalde da Guarda, Antonio Lomba, ven de remitir unha carta á dirección do programa “El Hormiguero” de Antena 3 despois do malestar e disconformidade postos de manifesto na emisión do pasado martes día 12 de maio de 2020, onde o colaborador habitual do programa “Marron”, fixo unas declaracións sobre as Festas do Monte Santa Trega que en nada exemplifican a esencia das festas, identificando erroneamente as arraigadas tradicións das mesmas.

Dende o consistorio se entende e defende a liberdade de expresión, pero non é certo que a explicación de Marron en antena represente á festa máis importante da vila da Guarda e da comarca, unha festa centenaria que está declarada como Festa de Interese Turístico de Galicia, e non precisamente polo que “Marron” destacou coma tradicións.

Tal e como manifestou o edil, as Festas do Monte Santa Trega son unha romaría popular que se celebra dende fai 108 anos, dende que “La Sociedad Pro-Monte Santa Tecla” organizara a primeira merenda na cima do Monte Santa Trega e, aínda que nas súas primeiras edicións tiñan só un carácter familiar e relixioso, pronto gañaron unha gran popularidade na comarca do Baixo Miño e resto de Galicia, inclusive nestes intres, a nivel Nacional.

Antonio Lomba quixo destacar na misiva que, o carácter desta Festa, ao son da percusión das 20 Bandas Mariñeiras, das cales a mais veterana ten xa 53 anos, é familiar e fraternal. Na cima do Monte Santa Trega (Declarado Monumento Histórico Artístico Nacional e Ben de Interese Cultural no ano 1931), veciños, familiares e coñecidos, reivindican o seu pasado castrexo e orgullo guardés de nacemento ou adopción. Así, estas festas son compartidas por todos os asistentes, dende os nonatos (que senten o sons e a percusión nas barrigas das súas nais) ata os centenarios. “É a festa de tod@s”, indicou Lomba.

Tal e como todo o pobo da Guarda coñece, a celebración comeza á primeira hora da mañá coa Subida ao Monte, cada un coa súa banda ou o seu grupo de amigos e familiares, coa alegría de todos os romeiros, tocando bombos, caixas e gaitas o “toque” representativo de cada banda ao son da música tradicional. Celebrase despois un “xantar popular” onde as familias guardesas comparten marisco, empanada, rosca de xema e demais viandas típicas da nosa gastronomía. Durante a tarde, os romeiros tocan e danzan incansablemente e se procede á “Xura” coa que se promete e pide volver o ano seguinte e onde se ten un recordo para os que xa non están. É certo que dita xura realízase con garrafóns de viño tinto, pero se fai de maneira organizada e controlada por cada banda e convidando aos foráneos a participar tamén nela.

Xa á tardiña os romeiros baixan de novo cara á vila, despois de pasar un día que é a nosa sinal de identidade e á que se aferran cada ano todos os guardeses para poder volver a repetir ao seguinte ano. Moitos Baixomiñotos que están fora, regresan á localidade para celebrala.

O alcalde da Guarda insistiu en que non se pode permitir que se fale das Festas do Monte Santa Trega coas palabras que falou “Marron” e por iso solicitase dende o consistorio local que se faga unha corrección de carácter público, xa que, coa súa descrición, poido crearse unha imaxe que non é a que corresponde ao carácter destas Festas, e que está a causar un malestar enorme na comunidade guardesa.

As Festas do Monte Santa Trega son un símbolo da tradición e do Patrimonio Inmaterial das xentes da Comarca do Baixo Miño, e tamén un sentimento de fraternidade profundo que se leva por dentro, esa é a verdadeira simboloxía das Festas do Monte e así quere o pobo da Guarda que continúe a ser.


__________________________________

A Guarda sen terrazas de restaurantes, pero coas das cafetarías montadas
A Guarda, 12/05/20. Os primeiros días da fase 1 da desescalada non teñen, en xeral, gran incidencia na Guarda, polo menos na restauración. No porto os restaurantes manteñen as persianas baixadas, en consecuencia non houbo terrazas instaladas. Soamente no centro da Guarda abriron algunhas das cafetarías máis concorridas, sendo posible saír deste “confinamento” sequera para tomar un café e compartir momentos coas amizades, iso si, gardando as distancias.
Nas cafeterías Art Café, La Botica e O´Xardín, é posible ver o movemento dos camareiros, coas medidas de prevención recomendadas, asistir aos clientes, posto que, como sabemos, o interior das cafetarías seguirán baleiras se non cambian as previsións, polo menos até o día 25.
O bo tempo favorece a presenza dos clientes no exterior que, nótase, tiñan ganas de saír á rúa, aínda que desde a fase 0 era posible pasear segundo os horarios establecidos. Agora, coa posibilidade que brindan outros servizos, ese tempo dalgunha maneira amplíase non para “pasear”, no sentido estrito da palabra, pero si para “camiñar” até a cafetaría que máis nos apeteza.

___________________________________

O concello da Guarda solicita a Portos de Galicia e Costas do Estado a anulación da taxa de terrazas do ano 2020


 
A Guarda, 10 de maio de 2020. O concello da Guarda aprobou, no pleno extraordinario celebrado o 5 de maio, unha modificación da ordenanza fiscal de ocupación por terrazas. A nova redacción conleva a anulación da taxa por mesas e cadeiras en solo de competencia municipal. Trátase de tomar unha medida económica que non grave, durante este ano 2020, aos bares e restaurantes coa taxa de terrazas.
 
Diante da situación de emerxencia sanitaria provocada pola pandemia orixinada polo virus COVID-19 que está a provocar graves prexuízos para a economía, o concello da Guarda está tomando unha serie de medidas para favorecer a recuperación económica, entres elas está a anulación da taxa de terrazas.
 
Ademais o alcalde da Guarda, Antonio Lomba, adquiriu o compromiso de ampliar a superficie das terrazas de competencia municipal alí onde fora posible, recurrindo incluso a peonalización dalgunhas rúas se houbera demanda por parte dos establecementos.
 
Dado que dun bo número de terrazas atópanse en solo de competencia de Portos de Galicia e algunha de Costas do Estado, o alcalde dirixiu sendos escritos ás dúas administracións solicitando que de forma excepcional, durante o ano 2020, adopten as mesmas medidas que xa tomou o concello. En aras de facilitar a recuperación do sector da restauración, un dos máis castigados pola crise.

A Guarda conmemora as Letras Galegas cun tendal de Poemas
 
A Guarda, 10 de maio de 2020. Achégase a conmemoración das Letras Galegas e para celebralo nesta ocasión a Concellería de Cultura propón unha iniciativa na que pretende que toda a veciñanza comparta e divulgue os versos e poemas escritos na nosa lingua.
 
A proposta “Tendal de Poemas” empraza ós veciños da Guarda, especialmente ás familias con nenos, a que escollan un poema en lingua galega e o escriban sobre un lenzo de tea, acompañando dunha bonita decoración ó gusto. O material a utilizar pode ser unha prenda de roupa vella (camiseta) ou anaco de tea (saba, mantel...) ó que lle demos forma de prenda de roupa. Tamén se poden conseguir siluetas xa listas para decorar nas librerías da vila: Cervantes, Ler ou Ideas.
 
Os traballos poderán ser colocados polos participantes no tendal que se disporá na contorna do Auditorio de San Benito a partir do xoves 14 de maio, ou se pode contactar coa concellería de cultura a través de cultura@aguarda.es e o colocaría o persoal municipal.  Os traballos permanecerán ata final de mes, se a climatoloxía o permite.
 
Podes ampliar a información nas Bases ou contactar con cultura@aguarda.es ou no teléfono 98661000 ext.5 para calquera dúbida.
________________________________________

O concello da Guarda destinará máis de 130.000€ a un plan de choque para a reactivación económica da vila


 
A Guarda, 09/05/2020. O pasado mes de marzo, e tan só 10 días despois do anuncio do estado de alarma, o Concello anunciaba un primeiro paquete de medidas económicas, que foi seguido por un segundo  paquete durante o mes de abril, ao que se sumou fai uns días a exención do pago de terrazas para establecementos hostaleiros. A través destas medidas pretendíase minimizar, na medida do posible, o impacto negativo desta crise na economía da veciñanza e das empresas na súa relación coa administración local.
 
A estas alturas da pandemia, e en pleno proceso de desescalada, desde o consistorio guardés temos claro que debemos poñer todos os nosos esforzos de cara á recuperación e reactivación económica local. Por este motivo levarase a cabo unha importante aposta a nivel de recursos municipais e valerémonos, nesta difícil tarefa, do apoio dunha empresa consultora especializada no deseño e posta en marcha de plans de dinamización turística e comercial a nivel municipal.  
 
Unha das principais medidas na que levamos traballando fai unhas semanas, e que temos previsión de que comece a funcionar a partir de mediados de maio, sería unha plataforma de venda online, que poderá ser utilizada por comerciantes e hostaleiros da localidade e que pretende relanzar as vendas nestes sectores, especialmente castigados polo coronavirus.
 
Preténdese crear un gran mercado virtual onde estean representados aqueles comercios, negocios de restauración, postos do mercado e incluso autónomos/as ou empresarios/as do sector primario que desexen vender os seus produtos, non só a nivel local senón tamén no resto de España e Portugal.  
 
De xeito paralelo porase en marcha unha campaña de sensibilización para o consumo no comercio local que estamos ultimando nestes días. Sabemos que A Guarda é un pobo solidario que sabe estar á altura das circunstancias, e estamos seguros/as de que a cidadanía quere un pobo con rúas cheas de vida e estará ao carón do comercio e a hostalaría local nestes duros momentos.
 
O próximo xoves 14 de maio trasladaremos con maior detalle todas estas iniciativas á Mesa Local de Comercio á que foron convocadas as persoas representantes das asociacións de comerciantes e empresarios/as (ACIGU, Mercado do Reló, AGUDE e Mercaguarda), a Asociación de Consumidores Aldraman, así como os portavoces dos grupos municipais, e na que poderemos recoller as súas inquedanzas e propostas respecto a esta situación nunca antes vivida.

________________________________________

Aberto o prazo para solicitar praza do curso 2020/21 na Escola Infantil Municipal da Guarda



A Guarda, 08/09/2020 .- O departamento de Servizos Sociais do Concello da Guarda informa da apertura do prazo para solicitar praza na Escola Infantil Municipal para o vindeiro curso 2020/21.
O prazo de presentación de solicitudes estará aberto do 11-22 de maio para nenos/as matriculados e con praza no curso anterior (2019/2020) e do 25 de maio ó 5 de xuño para nenos/as de novo ingreso.
A escola infantil municipal da Guarda é un centro de atención diurna de carácter socio educativo para os nenos e nenas de 3 meses a 3 anos de titularidade municipal.
Entre os seus obxectivos destacan a promoción e o fomento do desenvolvemento integral dos nenos e nenas e a aprendizaxe das habilidades cognitivas e creativas do neno e nena, facilitar a conciliación familiar entre a vida familiar e laboral, facilitar o desenvolvemento de valores individuais e sociais básicos: cooperación, solidariedade, respecto, etc…, lograr un equilibrio afectivo satisfactorio, respectar a singularidade e diversidade de cada menor, entre outros.
As familias interesadas deberán presentar a súa solicitude e a documentación requirida dentro do prazo establecido no regulamento de organización e funcionamento da escola infantil municipal publicado no BOP o 9 de outubro de 2009.
A documentación e impresos poderán descargala na web municipal e nas dependencias municipais. Para maior información dirixirse ao Departamento de Servizos Sociais do Concello da Guarda no teléfono 986 61 4507.
Regreso al contenido