O Rosal - galiciasuroeste

Title
Vaya al Contenido

O Rosal

COMARCA
Roi Alfonso Tojo proclámase vencedor do V Concurso de Xoves Intérpretes “Antonio Granja”

O Rosal, 28 de decembro de 2020. Este certame naceu fai 7 anos ca firme intención de incentivar o estudo dos xóvenes músicos galegos, especialmente os da abundante e exitosa canteira da Agrupación Musical do Rosal. Nesta edición participaron un total de 31 músicos chegados de diferentes puntos da xeografía galega.
Durante a fin de semana foron moitos os pequenos e grandes artistas que fixeron as delicias do público asistente ás audicións deste consolidado concurso. Así, na mañá do sábado participaron 20 aspirantes ós premios das categorías A (para solistas de entre 10 e 12 anos) e categoría B (de entre 13 e 16). Os gañadores foron Thai Otero Iglesias (violoncello) e Rubén Guerreiro Álvarez (saxofón) respectivamente. O xurado, formado por David González, Sara Pumar e Fernán Rodríguez, decidiu outorgar accésits a Álex Fornos, Antía Domínguez e Xiana Aldea polas súas interpretacións.
Xa durante a xornada dominical, os asistentes, puideron desfrutar dos participantes da categoría C (para solistas de entre 17 e 23 anos). O xurado formado nesta ocasión por Xabier Oliveira, Óscar González e Esteban Méndez, decidiu outorgar o 3o premio “Concello do Rosal” ó tuba Rubén Fernández, o 2o premio “Rodrigo Carrera” o percusionista Jorge Denis e o 1o premio, dotado con 500 € e un concerto como solista ca prestixiosa banda rosaleira ó saxofonista Roi Alfonso Tojo.
Este certame pretende render unha merecida homenaxe a Antonio Granja, un dos membros
fundadores da banda e que foi presidente durante moitos anos da Agrupación Musical do Rosal. O propio Antonio, emocionado, entregaba o trofeo, realizado polo artesán rosaleiro Xuxo Malone, ó gañador do concurso, non sen antes contar ó público asistente unha das moitas anécdotas que viviu como presidente da banda.
    
Os Reis Magos percorren os barrios do Rosal
O Rosal, 29 de decembro de 2020.- Este ano os Reis Magos chegan a todos os barrios do Rosal. Unha delegación cos tres Reis e un axudante que velará por garantir que se cumpran as medidas de prevención percorrerán os diferentes barrios durante os días 4 e 5 de xaneiro, facendo paradas en máis de 60 puntos do municipio. “Queremos achegar a programación de Nadal aos barrios, implicando á veciñanza e facendo que os nenos e nenas desfruten da visita dos Reis de xeito cómodo e seguro”, explica a alcaldesa, Ánxela Fernández Callís.
O Concello organizou un total catro equipos que se distribuirán para visitar en varios horarios diferentes puntos de Fornelos, Picón, Viso dos Eidos, Martín, Marzán, Cachada, Fecha, Pacenteo, Caselas, A Lomba, Couselo, Pías, Tamuxe, O Morán, San Miguel, Urgal, Valdemiñotos, Couso, Calvario, Cumieira, Telleira, Lagos, A Mata, Sandián, Novás, Rotea, Parada, Miranxe, San Xián, Portecelo, As Eiras e Tabagón.
A comitiva entrará nos barrios ao ritmo da música, aínda que será un acto estático no que se delimitarán os espazos para que o público que acuda poida manter as distancias de seguridade. Os Reis Magos levarán algunha sorpresa agochada para as nenas e nenos que lles visiten. En caso de choiva as actividades trasladaranse ás escolas unitarias. Dende o Concello quere agradecerse a colaboración das asociacións rosaleiras, sen as que non sería posible levar adiante actividades como esta.  
Os Reis Magos continuarán a súa visita polo Rosal o martes 5 pola tarde. Será a partir das 17.00 horas no pavillón municipal, onde estarán precedidos polos Trasgos do Thea. Para participar nesta actividade é necesaria inscrición previa a través da web do Concello. Estarán permitidas un máximo de 3 persoas por solicitude.
Os Reis nos barrios: puntos de encontro e horarios completos
Luns 4 de xaneiro
FORNELOS, PICÓN, VISO DOS EIDOS E MARTÍN
10.00 horas. Xestal, no lavadoiro
10.30 horas. Fonte do Picón
11.00 horas. Praza de Fornelos
12.00 horas. Sarrapó cruceiro
12.30 horas. Viso dos Eidos
13.00 horas. Praza de Martín
MARZÁN, CACHADA, FECHA E PACENTEO
10.00 horas. Xogo Marzán
10.30 horas. A Devesiña
11.00 horas. Camiño Campo Lameiro (esquina galiñeiro)
11.30 horas. A Cachada
12.00 horas. A Fecha
12.30 horas. Xogo Pacenteo
13.00 horas. Campo Dabute
13.30 horas. Troya
FORNELOS, CASELAS, A LOMBA, COUSELO E PÍAS
10.00 horas. Tanque de Caselas
10.30 horas. R2
11.00 horas. Ponte A Lomba
11.30 horas. Couselo de Abaixo
12.00 horas. Couselo
12.30 horas. Escola de Pías
13.00 horas. San Gregorio
PÍAS, TAMUXE, O MORÁN E SAN MIGUEL
10.00 horas. Parque Tamuxe, pista balonmán
10.30 horas. Morán, parada de autobús
11.00 horas. Escolas de San Miguel
11.30 horas. Camiño do Calvario, praza do cruceiro
12.00 horas. Alameda de San Miguel
12.30 horas. Alameda Cruz Vermella
13.00 horas. Parque de Pías
Martes 5 de xaneiro
URGAL, VALDEMIÑOTOS, COUSO E CALVARIO
10.00 horas. Urgal, cruce camiño do Fucheiro
10.30 horas. Parque Valdemiñotos
11.00 horas. Auditorio, estatua gaiteiro
11.30 horas. Barbuntín
12.00 horas. Carballeira do aparcadoiro das casas baratas
12.30 horas. Praza do Calvario
CUMIEIRA, TELLEIRA, LAGOS, A MATA E SANDIÁN
10.00 horas. Cruceiro da Fernanda (baixando pola farmacia)
10.30 horas. Parque A Telleira
11.00 horas. Lagos, Camiño Vello, enriba da ponte do vial
11.30 horas. Pista polideportiva
12.00 horas. Colexio da Mata
12.30 horas. Quesy
13.00 horas. Capela de Santa Ana
13.30 horas. Sandián, cruce do Camiño da Torre
NOVÁS, ROTEA, PARADA, MIRANXE, SAN XIÁN E PORTECELO
10.00 horas. Praza de Novás, campo de balonmán
10.30 horas. Parque A Mó
11.00 horas. A Rotea
11.30 horas. Parada
12.00 horas. Miranxe, parada de autobús
12.30 horas. Floro, aparcamento
13.00 horas. Praza de Sanxián
13.30 horas. Portecelo, explanada
EIRAS E TABAGÓN
10.00 horas. Escolas Tabagón
10.30 horas. Praza de San Pedro
11.00 horas. Volta da Mina
11.30 horas. Praza do Maio
12.00 horas. Palco das Eiras
12.30 horas. Igrexa das Eiras
13.00 horas. Escola das Eiras
   

O Rosal despide o ano con música, contos e visita dobre do Apalpador
O Rosal, 28 de decembro de 2020.- O Rosal quere despedir o ano por todo o alto: catro actividades para todos os públicos coas que desfrutar de tempo de lecer en familia antes de despedir o 2020. Música, contos e visita dobre do Apalpador e a Apalpadora forman parte desta programación con actividades de balde coas que se aposta pola cultura segura, xa que se celebran tomando todas as medidas de prevención acordes á situación epidemiolóxica actual, como aforo reducido, distancias de seguridade e o uso obrigatorio de máscara.
A primeira actividade da última semana do ano será a visita da Apalpadora de Iseo a Moura, que ven comprobar se as barrigas das nenas e nenos rosaleiros están cheas de boa comida. Será este luns 28 de decembro a partir das 17.00 horas na Praza do Calvario.
O martes 29 de decembro as rúas do Calvario encheranse a partir das 18.00 horas coa alegría e a música de Latexo Percusión. Un espectáculo de animación único que combina o visual da danza cos arranxos musicais baseados na batucada brasileira cos que transportarse a lugares do mundo nos que a ledicia, o ritmo e o movemento son parte da vida cotiá.
O día 30 de decembro será a quenda dos ‘Catro monos’ de A Tropa de Trapo, teatro para toda a familia na Praza do Calvario tecido a través de contos con música e historias que teñen moito que dicir, cun trasfondo social e cunha vertente pedagóxica moi coidada. ‘Catro monos’ conta a historia dun símbolo nacido hai moitos anos no Lonxano Oriente que viña do poder para reprimir ao pobo, os Tres Monos Sabios: un mono non oía o que pasaba ao seu redor, outro non quería ver o que tiña diante e o último calaba a boca para non dicir o que pensaba. A Tropa de Trapo dálle a volta ao conto para que os seus monos escoiten, vexan e falen, pensen, actúen e sexan catro. Ás 17.00 horas.
O ano rematará cunha nova visita do Apalpador, nesta ocasión da man da Deputación de Pontevedra. O encontro cos nenos e nenas do Rosal será o xoves 31 de decembro ás 17.00 horas na Praza do Calvario.
Todas estas iniciativas teñen como obxectivo ademais de ofertar unha ampla programación de Nadal segura o de dinamizar as rúas do Rosal, fomentando a presenza da veciñanza nelas e potenciando o comercio local.
 

O Concello conta cun novo remolque cisterna para o servizo de Vías e Obras

O Rosal, 23 de decembro de 2020.- O Concello do Rosal conta xa cunha nova incorporación no seu parque de vehículos. O municipio acaba de adquirir un remolque cisterna para empregar diferentes tarefas no servizo de Vías e Obras, un camión cun custo total de case 15.000 euros subvencionados a cargo do Plan Concellos 2018 da Deputación de Pontevedra.
Este novo remolque cisterna ten unha capacidade de 4.000 litros e está equipado con depresor e bomba centrífuga para presión, bésta lanza para amortecer, eixo con freo hidráulico, dúas saídas para máquina a presión, dous enroladores de mangueira, transmisión, unha mangueira de carga e esparexedor.
Con esta nova adquisición o Concello do Rosal continúa coa renovación do seu parque móbil de vehículos, incorporando outros novos para mellorar a atención dos distintos servizos públicos  e actualizando algúns dos vehículos cos que contaba, como unha furgoneta que se empregaba tamén no servizo de Vías e Obras con máis de 20 anos de antigüidade e que sufría constantes avarías.
   

Unha unidade móbil de doazón de sangue visitará o Rosal o vindeiro luns 28 de decembro
O Rosal, 22 de decembro de 2020.- Unha unidade móbil do Centro de Transfusión de Galicia desprazarase de novo ata O Rosal antes de acabar o ano. O autobús estará instalado na Praza do Calvario o vindeiro luns 28 de decembro e atenderá ao público de 10.00 a 14.00 e de 16.00 a 21.00 horas.
Na situación actual, na que necesariamente débense establecer medidas de prevención social encamiñadas a preservar a saúde de todos e todas, todas as persoas que desexen doar sangue deberán pedir cita previa chamando ao teléfono gratuíto 900 100 828 para escalonar a afluencia axeitada e ordenada dos e das doantes, evitando esperas a aglutinacións de xente.
O Centro de Transfusión continúa extremando os protocolos de seguridade para garantir a continuidade dun servizo esencial, que permite cada día salvar vidas de moitos enfermos ingresados nos hospitais galegos. Por este motivo, en cada unidade móbil o persoal segue uns protocolos de seguridade exhaustivos, usando luvas limpas con cada doante, limpando as padiolas despois de cada doazón, utilizando material esterilizado e dun só uso con cada paciente e facendo unha limpeza profunda da zona de venopunción con dobre desinfección. Ademais, cada unidade conta con líquido desinfectante á entrada e saída do autobús para que as persoas doantes o empreguen antes de acceder á zona de revisión de saúde e despois de realizar a doazón e de tomar o refrixerio.
Aínda que o persoal do Centro de Transfusión fai unha revisión de saúde a todas as persoas que acoden a doar para garantir a seguridade dos compoñentes da sangue, recomendan que non se vaia a doar sangue se nos últimos 15 días tívose febre, tose ou problemas respiratorios. Pídese aos doantes ademais agardar un metro de separación entre persoas nas zonas de espera.
Os hospitais galegos precisan ente 400 e 500 doazóns de sangue cada día para garantir a asistencia a moitas persoas que son sometidas a intervencións cirúrxicas, que sufriron accidentes de tráfico ou laborais, que padecen anemias, hemorraxias, cancros, leucemia, transplantes de órganos...
  

O Rosal festexa esta semana de Nadal co Apalpador, música e animación
O Rosal, 21 de decembro de 2020.- A programación de Nadal arranca no Rosal con música e animación polas rúas, coa visita do Apalpador para os máis pequenos e pequenas pero tamén cun concerto para público adulto. En total serán catro actividades de balde programadas para esta semana que contarán con todos os protocolos de prevención marcados polas autoridades sanitarias para garantir a saúde dos rosaleiros e rosaleiras. “Apostamos por unha cultura segura na que tomando todas as medidas de seguridade necesarias podamos manter actividades de lecer para pequenos e maiores coas que dinamizar as nosas rúas, fomentar a presenza de veciños e veciñas e potenciar o noso comercio local”, salienta a rexedora, Ánxela Fernández.
A primeira actividade programada será este mércores 23 de decembro na Praza do Calvario coa visita dobre do Apalpador, que estará acompañado por Os Monifates e o seu peculiar carromato, co que percorren as vilas coa importante misión de amosar o rica e variada música e instrumentación da cultura galega nun formato orixinal que conta coa participación dun variado elenco de bailaríns en forma de marionetas. Haberá sesión ás 16.30 e ás 17.45 horas. As persoas interesadas en participar deberán inscribirse previamente a través da web do Concello cun máximo de 3 persoas por inscrición.
O sábado 26 de decembro a animación continúa. Pola mañá, a partir das 11.00 horas, Os Carunchos percorrerá as rúas do Calvario coa súa música tradicional na que mesturan temas cantados da tradición oral co repertorio de gaiteiros solistas.
Xa pola tarde será a quenda de Uxía e o seu ‘Lume novo de Nadal’. A cantante chegará ás 20.00 horas ao Auditorio Municipal do Rosal para acender nestes tempos de incerteza un lume novo renovador a través de cantos tradicionais de Nadal para que axuden a todos os espectadores a coller novos folgos e revivir a alegría coa que se vivía este tempo antigamente. Un ambiente íntimo e doméstico sen moitos alardes técnicos para propiciar calor e proximidade, sempre seguindo as recomendacións e protocolos para garantir a seguridade de todos e todas. Necesaria inscrición previa na web do Concello.
A vindeira semana a programación continuará con máis actividades para todos os públicos. O luns 28 de decembro A Apalpadora de Iseo a Moura estará na Praza do Calvario ás 17h.
A programación preparada para este Nadal buscan tamén dinamizar o comercio local, levando aos rosaleiros e rosaleiras ás rúas e propiciando que realicen as súas compras no comercio de proximidade. Todas as actividades contarán con medidas de prevención como o aforo reducido, o mantemento das distancias de seguridade ou o uso de máscara, apostando así unha vez máis pola cultura segura.
 

O Concello comeza as obras de recuperación de hábitats naturais no espazo Rede Natura nas Eiras
O Rosal, 18 de decembro 2020.- O Concello do Rosal acaba de poñer en marcha o proxecto de recuperación de hábitats naturais no espazo Rede Natura nas Eiras, unhas obras que comezaron a executarse esta mesma semana e que se prolongarán durante o ano 2021 coas que se busca dar un impulso á recuperación e posta en valor das ribeiras do Miño ao seu paso polo municipio. Para a realización destas actuacións o Concello conseguiu unha subvención de máis de 24.000 euros da Xunta de Galicia ao abeiro das axudas a investimentos non produtivos vinculadas á realización de obxectivos agroambientais e climáticos en concellos incluídos na Rede Natura 2000, cofinanciadas con fondos Feader no marco do Prorgama de desenvolvemento rural (PDR) de Galicia 2014-2020.
Esta zona, integrada nunha franxa continua da ribeira galega do curso baixo do río Miño considerada Zona de Especial Conservación e Zona de Especial Proteccións para as Aves, vese afectada na época estival “pola grande afluencia de persoas que acoden a ela a desfrutar da praia ou da ruta homologada da Senda dos Pescadores, enchendo en ocasións de vehículos ata a beira mesma do río, ocupando áreas potenciais para actividades de lecer, deteriorándose a paisaxe e provocando danos á vexetación”, explica a concelleira de Medio Ambiente do Rosal, Sara Vicente.
Para evitar o progresivo deterioro, o Concello realizará varias intervencións que permitan a reordenación do espazo público empregando modelos máis respectuosos coa natureza, retirando os vehículos motorizados da contorna da praia das Eiras e da beira do río. Para iso xa está a habilitar unha zona de aparcamento en batería no límite do espazo natural, coincidente coa marxe da estrada local próxima á ribeira e con capacidade para coller ao moitos dos turismos que accedían ata a beira.
Esta medida complementarase coa instalación de estruturas que impidan o acceso dos vehículos ata a praia e cortando a pista existente na actualidade, que quedará para uso exclusivo de peóns e bicicletas, así como de ambulancias ou máquinas da comunidade de montes para o mantemento da zona. Todo isto vai permitir a rexeneración da zona e "mellorar o estado de conservación dos tipos de hábitat naturais así como as condicións do seu ámbito nos espazos protexidos Rede Natura 2000 con tipoloxía de zonas húmidas e corredores fluviais".
Por outra banda, promoverase a información e concienciación ambiental a través da instalación de sinalización que permita comprender os obxectivos beneficiosos de limitar o acceso de vehículos a motor e potenciar o uso peonil.
As actuacións rematarán coa eliminación de especies invasoras dispersas, así como do foco de robinia ou falsa acacia, unha árbore orixinaria do norte de América de presenza menos frecuente que a acacia negra pero cun comportamento invasor máis agresivo e de maior resistencia aos tratamentos. Estes traballos de erradicación son complementarios a outros levados a cabo noutras zonas do Baixo  Miño, como os que se desenvolven nas ribeiras de San Xoán de Tabagón e San Miguel de Tabagón por iniciativa das respectivas comunidades de montes.
 

Esta San Silvestre no Rosal córrese de foto en foto
O Rosal, 16 de decembro de 2020.- Nova realidade, novas formas de continuar celebrando a San Silvestre no Rosal. O Concello adaptou a tradicional carreira de fin de ano para que os rosaleiros e rosaleiras poidan seguir desfrutando do deporte saudable ao aire libre tendo en conta a actual situación epidemiolóxica e a nova realidade. Por este motivo, este ano O Rosal celebrará a ‘San Silvestre fotográfica’, un concurso aberto a todas as persoas no que para participar deberá facerse unha foto co dorsal da carreira en calquera espazo natural do concello “fomentanto así o deporte nestas datas tan entrañables ante a imposibilidade de organizar esta carreira de xeito tradicional”, como explica a alcaldesa, Ánxela Fernández.
As persoas interesadas en participar deberán inscribirse no concurso os días 21, 22, 23, 28 ou 29 de decembro nas propias instalacións do Concello de 08.00 a 14.00 horas. Para anotarse será preciso facilitar nome, apelidos, DNI e número de teléfono e unha vez inscritos faráselle entrega do dorsal correspondente.
Na fotografía o dorsal deberá aparecer nun lugar ben visible e terá que enviarse entre o 30 de decembro e o 6 de xaneiro, ambos os dous días incluídos, por correo electrónico ao enderezo participa@concellodorosal.gal. As imaxes serán colgadas nas redes sociais do Concello a partir do día 7 de xaneiro.
O venres 15 de xaneiro procederase a realizar un sorteo entre todas as persoas participantes, que competirán nunha única categoría cun único premio que consistirá nunha cesta con produtos típicos do Rosal.
Os pais, nais e titores de menores que participen deberán asinar a autorización correspondente no momento da inscrición para poder formar parte do concurso. A participación suporá a aceptación das bases e implicará o permiso ao Concello para publicar a fotografía co nome do autor ou autora na web e para arquivalo na súa base de datos.   
   
O Concello recupera a Fonte de Martín, no Camiño do Souto
O Rosal, 17 de decembro.- O Concello do Rosal continúa coa recuperación de elementos patrimoniais históricos espallados por toda a localidade. Os operarios municipais acaban de rematar os traballos de recuperación da Fonte de Martín, unha instalación data de 1917 situada no Camiño do Souto, no antigo camiño de acceso aos Muíños do Folón.
A fonte permanecía oculta á vista debido á gran cantidade de maleza que a recubría. Os operarios municipais levaron a cabo nos últimos días os traballos de eliminación de toda a herba e plantas que a recubrían, así como a limpeza da propia fonte e dos tanques de auga.
Xunto con estas tarefas tamén restaurou o firme da fonte, garantindo a seguridade de todas as persoas que se acheguen ata ela, e recuperouse un banco que estaba derruído e que permitirá á veciñanza desfrutar deste espazo.
Todas estas tarefas enmárcanse no plan posto en marcha polo goberno municipal para poñer en valor aquelas construcións singulares coas que conta O Rosal, como fontes e lavadoiros, e que xa comezaran coa recuperación da fonte de Marzán, un lavadoiro histórico situado na zona coñecida como o Campo da Fonte e datado do ano 1891.
  

Este Nadal fotografía O Rosal!
O Rosal, 16 de decembro de 2020.- O Concello continúa propoñendo iniciativas para dinamizar os espazos públicos do municipio nestas datas tan sinaladas. Así, dende este venres 18 de decembro, pon en marcha a mostra de fotografías ‘Nadal no Rosal’, un xogo que busca dar visibilidade á localidade rosaleira a través de imaxes. Anímase a toda a veciñanza a sacarse fotografías nas que apareza algún elemento decorativo de Nadal instalado polo Concello en espazos públicos, como os Reis Magos, arcos de luces, caixa de luz, árbores, luces... e a subilo ás redes sociais.
Non se trata dun concurso, senón dun espazo aberto a toda a poboación no que se pedirá compartir en Facebook imaxes de persoas e familias desfrutando do Nadal en zonas públicas do Rosal acompañadas do hashtag #NadalnoRosal, etiquetando ao @concellodorosal e indicando o lugar onde se realizou a fotografía.
No caso de que aparezan menores de idade, darase por feito que os adultos responsables dan o seu consentimento expreso para a utilización da imaxe en redes sociais. Ademais, o feito de compartir a fotografía suporá a conformidade para o emprego por parte do Concello da imaxe para futuros usos, como exposicións ou arquivo.
Pídese que todas estas fotografías se publique en redes do 18 ao 31 de decembro.
  
O Rosal tínguese de cor e mensaxe coa intervención artística da ilustradora Tamara Baz
O Rosal, 16 de decembro.- A entrada ao Rosal tínguese de cor e mensaxe cunha nova intervención mural realizada pola ilustradora Tamara Baz, unha obra coa que a autora fala a favor da igualdade real e efectiva entre todas as persoas. Este mural é unha das accións da campaña de sensibilización en igualdade do Concello rosaleiro ‘Revolucionando Mentes’, coa que se busca achegar á veciñanza unha nova conciencia social baseada no respecto por todas as persoas, independentemente do seu xénero.
“A información é a arma máis poderosa para cambiar a mentalidade da sociedade xeral, para concienciar á cidadanía sobre a importancia da igualdade real e efectiva e para inculcar un cambio de actitude e resposta ante as diferentes realidades que xiran arredor da muller. Invitamos a todo o mundo a pararse un momento diante deste mural e reflexionar sobre o reto colectivo que temos coa igualdade”, destacou a alcaldesa, Ánxela Fernández.
A obra xa pode visitarse no muro exterior do campo municipal de fútbol, un lugar elixido por ser un acceso moi transitado tanto por peóns como por vehículos e cun impacto visual no conxunto do núcleo urbano. O máis sincero agradecemento de parte do Concello á U.D. Ribera pola súa colaboración en todo momento para que esta intervención artística se fixera realidade. O mural contou cunha subvención da Deputación de Pontevedra para a súa realización e foi inaugurado este mércores coa presenza da deputada de Igualdade, Victoria Alonso, da alcaldesa do Rosal e da propia autora.
Esta intervención convértese así nunha “oportunidade para sensibilizar e facernos reflexionar, revolucionar mentes cara unha sociedade máis respectuosa e empática”, como salientou a artista. Tamara Baz traballou no seu deseño cunha estética “amable e alegre que invita a acoller o tema con optimismo”, empregando formas orgánicas e siluetas que insinúan pero deixan lugar á imaxinación e cun concepto que xira “arredor dunha mente aberta e viva onde caben as diversas realidades sociais, unha mente que evoluciona cara un futuro mellor”.
Dende o Concello optouse por esta forma de arte urbana para continuar coa campaña de sensibilización porque permite mostrar as obras á unha gran maioría, democratizando o acceso á arte e chegando gran parte da veciñanza de xeito libre e gratuíto. Unha ampla difusión coa que se busca facer chegar ao maior público posible a posta en valor da sororidade entre mulleres ante situacións de discriminación por razón de xénero e a afouteza para denunciar e intentar combater estas situacións. Búscase ademais sensibilizar a toda a cidadanía sobre unha problemática real e fomentar accións en favor da igualdade e corresponsabilidade.
  

A hostalería rosaleira súmase ao servizo para levar tras o peche obrigatorio a partir das 17h
O Rosal, 15 de decembro 2020.- Ante as novas medidas restritivas establecidas polas autoridades sanitarias tras o peche perimetral conxunto do Rosal, Tomiño e A Guarda, parte da hostalería do municipio decidiu manter a súa actividade ofertando comida preparada para levar ben recollendo no establecemento ou servindo a domicilio. Dende o Concello facemos unha relación actualizada dos bares e restaurantes rosaleiros que dispoñen nestes intres de servizo para levar:
·         A Competencia: encargos antes das 17.00 horas.
·         A do Quesy: venres, sábados e domingos de 19.00 a 20.00 horas
·         Quiosco O Chiringo: café e refrescos para levar en horario habitual.
·         Floro: venres, sábados e domingos de 19.00 a 20.00 horas.
·         O Lagar, en Eiras: venres, sábado e domingo tamén con servizo a domicilio. Para recoller no local encargos ata as 20.30 horas e recollida ata as 23.00 horas.
·         O Rolete: sábados, domingos e festivos de 20.00 a 22.30 horas soamente durante o mes de decembro.
·         Restaurante Juan: de 19.00 a 23.00 horas.
Dende o Concello queremos trasladar todo o noso apoio á hostalería, un dos sectores que tamén está a pasar por un dos seus momentos máis difíciles coa actual realidade sanitaria por mor da pandemia. Moitas grazas a todos e todas polo voso esforzo e pola vitalidade coa que seguides loitando por saír adiante aínda nas circunstancias máis adversas.
  

A Unidade Móbil de inspección técnica de vehículos estará no Rosal en xaneiro
O Rosal, 14 de decembro 2020.- A Unidade Móbil de inspección técnica de vehículos desprazarase ao concello do Rosal o vindeiro mes de xaneiro para a revisión tanto de ciclomotores. Esta unidade estará o mércores 20 de xaneiro no Pavillón Municipal e o horario de atención ao público será de 09.00 a 13.30 e de 15.15 a 18.00 horas.
As persoas interesadas poden solicitar cita previa:
·         Por teléfono: 902 30 90 00.
·         A través da páxina web www.sycitv.com - Cita previa
Dende a inspección técnica sinalan que a admisión de vehículos con características particulares estará condicionada á posibilidade de realizar as operacións de inspección regulamentaria.     
    
Visita a mostra do Xabarín Club e deixa a túa sinatura para unha canle infantil e xuvenil en galego 24 horas
O Rosal, 14 de decembro.- O Salón de Exposicións acolle ata o vindeiro mes de xaneiro a mostra ‘Asina! Por unha canle Xabarín Club 24 horas na TVG’, unha exposición creada polo alumnado do CEIP A Guía de Moaña ao abeiro da campaña da Mesa pola Normalización Lingüística para poñer en marcha unha proposición parlamentaria por iniciativa popular coa que conseguir unha canle con programación dirixida ao público infantil e xuvenil que garante unha canle en galego con contidos atractivos, de éxito actuais e pasados, educativos e de produción galega.
A mostra estará aberta ao público todos os martes de 17.00 a 19.00 horas, así como todos os días nos que haxa programada algunha actividade no Salón de Exposicións, permanecendo dispoñible dende media hora antes de comezar a actividade ata media hora despois de rematar.
Ademais de desfrutar da exposición durante a visita as persoas interesadas tamén poderán deixar a súa sinatura para respaldar a iniciativa e levar a proposición ao parlamento. Tamén se poderá asinar polas mañás achegándose ás dependencias do propio Concello en horario de 09.00 a 14.00 horas.
   

Recala no Rosal a campaña de información e sensibilización ‘Agresión Off’
O Rosal, 11 de decembro.- O Rosal acolle o vindeiro martes 15 de decembro ‘Agresión Off: Eu digo non á violencia sexual’, unha campaña posta en marcha pola Consellería de Emprego e Igualdade coa que derrubar estereotipos de xénero e comportamentos que poidan conducir á violencia a través de talleres e actividades lúdicas para todas as idades. O stand da campaña estará situado na Praza do Calvario de 16.00 a 20.00 horas e todas as actividades contarán coas medidas necesarias de prevención contra a COVID-19.
A través de obradoiros divididos en áreas de traballo con contidos concretos para sensibilizar contra a violencia sexual, as persoas participantes abordarán diferentes temáticas como o desmantelamento de estereotipos de xénero para combater o sexismo dende a infancia, os mitos sobre o amor, as alertas de micromachismos, a parella e a igualdade, a autoestima e valoración persoal, a violencia e as novas tecnoloxías, a educación en igualdade ou a importancia de estar informados.
Deste xeito en ‘Canto de estereotipada está a túa mente?’ reflexionarase sobre mensaxes que poden inducir moitas veces de xeito inconsciente a pensamentos esterotipados; co xogo interactivo ‘A ruleta do amor romántico’ falarase de mitos; visualizando fragmentos de contos, fábulas, refráns e ditos populares en ‘Non me contes contos’ reflexionarase sobre a información que se recibe e se transmite e co termómetro de ‘Onde está o límite?’ exporanse actitudes e comportamentos dentro da parella para debater sobre a delgada liña que separa unha relación aparentemente sa dunha relación tóxica.
Xogando cos espellos chega ‘Eu non necesito #filtros’ para reflexionar sobre a imaxe que queremos transmitir nas redes sociais; en ‘Estas segur@ de premer o botón de enviar?’ os e as participantes coñecendo os riscos e consecuencias do sexting deberán decidir se enviar contido relacionado con esta práctica; co móbil xogarase a ‘Kahood da Igualdade’, un xogo no que responder diferentes preguntas sobre violencia de xénero; e con códigos QR poderase acceder a información relacionada co programa.
Ademais destas actividades para persoas adultas tamén haberá obradoiros para os máis cativos: ‘O tótem do sexismo’ e ‘Verdade ou mito’. Todas as accións completaranse con dúas actividades para todos os públicos, unha coa que animar a todas as persoas participantes a sumar ideas ao decálogo contra a violencia sexual e outra coa que xogar a adiviñar quen está detrás de cada frase, se un home ou unha muller razoando o porqué.
   

O Nadal chega ao Rosal cargado de actividades para toda a familia
O Rosal, 10 de decembro de 2020.- O Nadal chama á porta no Rosal cunha axenda cargada de actividades para toda a familia. “A pesar das restricións pola COVID e mantendo todas as medidas de seguridade quixemos crear un ambiente de Nadal con actividades culturais e de lecer dirixidas a pequenos e maiores coas que dinamizar as nosas rúas, fomentar a presenza de veciños e veciñas e potenciar o comercio local”, explica a alcaldesa, Ánxela Fernández Callís.
A programación arrancará o vindeiro 23 de decembro coa primeira visita do Apalpador ao Rosal e coa música de Os Monifates, música tradicional nun formato acústico con instrumentos do máis variados. Comezará ás 16.30 horas na Praza do Calvario e será necesaria inscrición previa.
Xa o día 26 de decembro pola mañá será a quenda de Os Carunchos, que percorrerán as rúas do Calvario coa súa música tradicional a partir das 11.00 horas. Pola tarde, e previa inscrición, os rosaleiros e rosaleiras poderán desfrutar do concerto de Uxía ‘Lume novo de Nadal’ no Auditorio Municipal (20.00 horas).
O luns 28 de decembro A Apalpadora volve ao Rosal, nesta ocasión da man de Iseo a Moura a partir das 17.00 horas na Praza do Calvario. O día 29 de decembro a batucada de Latexo Percusión soará polas rúas da contorna do Calvario a partir das 18.00 horas. O mércores 30 La tropa de Trapo visitará a Praza do Calvario co seu espectáculo ‘Catro Monos’, catro contos para falar de como nos relacionamos entre nós e co medio, para que nenos, nenas e maiores rían, reflexionen, cante e soñen con outro mundo posible. A partir das 17.00 horas.
Antes de despedir o ano, o día 31 ás 17.00 horas O Apalpador regresa de novo ao Rosal para visitar a nenos e nenas na Praza do Calvario. A programación de Nadal rematará o 5 de xaneiro co espectáculo Os trasgos do Thea e a chegada dos Reis Magos ao Pavillón Municipal do Rosal a partir das 17.00 horas. Para esta actividade será necesaria inscrición previa.
Ademais de todas estas actividades, o Salón de Exposicións do Concello acollerá ata xaneiro ‘Asina! Por unha canle Xabarín Club 24 horas na TVG’, unha mostra creada e cedida polo alumnado do CEIP A Guía de Moaña realizada no marco da acción da Mesa pola Normalización Lingüística para por en marcha unha proposición parlamentaria por iniciativa popular coa que conseguir unha programación infantil e xuvenil en galego dispoñible as 24 horas do día en distintas plataformas.
Todas as actividades de Nadal buscan tamén dinamizar o comercio local, levando aos rosaleiros e rosaleiras ás ruas e propiciando que realicen as súas compras no comercio de proximidade. Ademais de dispoñer dun cartel animando á mercar nestas datas no comercio local, os establecementos decoraranse con ornamentación creada polo alumnado dos centros de ensino rosaleiros.
Como ven sendo habitual, o Concello organiza todas estas actividades contando coas medidas de prevención marcadas polas autoridades sanitarias, como o aforo reducido, o mantemento das distancias de seguridade ou o uso de máscara, apostando así unha vez máis pola cultura segura.   
     
La empresa Mirabel do Rosal gana uno de los Premios BBVA a los mejores productores sostenibles de España
O Rosal, 10 de decembro de 2020. Mirabel do Rosal fue seleccionada, de entre más de 60 candidatos de todo el territorio nacional como empresa comprometida con la sostenibilidad junto con los productos lácteos de Los Caserinos (Asturias); las frutas y verduras de Verdcamp Fruits (Tarragona) y Pomona Fruits (Lleida); las carnes de Carnísima (Huesca); y los cereales y los frutos secos de La Junquera (Murcia).
Desde 2013, BBVA y El Celler de Can Roca han trabajado conjuntamente para generar un impacto positivo en la sociedad con la puesta en marcha de diferentes iniciativas. En esta ocasión, el objetivo era unir la gastronomía y la sostenibilidad para ayudar en la transición hacia una vida sostenible a la vez que se apoya a los productores locales. Fruto de esa unión nacía el proyecto ‘Gastronomía sostenible’, que en plena irrupción de la pandemia dio un paso más con la búsqueda de los mejores productores, agricultores y ganaderos sostenibles de España a través de los Premios BBVA a los Mejores Productores Sostenibles.
“Con estos galardones hemos querido poner de relieve el compromiso que BBVA ha adquirido con la sostenibilidad y el apoyo a los pequeños productores. En un momento de incertidumbre como el actual, es importante impulsar premios como estos para visibilizar iniciativas de producción agroalimentaria sostenible que sirvan de inspiración, y de esta forma contribuir a una recuperación económica verde”, ha afirmado Alberto Cano, director de pymes de BBVA en España.
El jurado, formado por miembros de BBVA, El Celler de Can Roca y un representante de la consultora independiente ECODES, ha valorado el carácter innovador de los productos, los beneficios ambientales como la reducción de las emisiones de CO2 o la apuesta por una
economía circular, además de la repercusión social y económica de su producción. Todos los productos seleccionados cuentan con el sello oficial de agricultura y ganadería ecológica, certificado oficial de la Unión Europea (UE).
“El proyecto ‘Gastronomía sostenible’ nos está permitiendo sensibilizar sobre lo importante que es la alimentación y la cocina saludable, y lo necesarios que son esos pequeños productores de cercanía que miman el producto cuidando a la vez del planeta con una explotación sostenible y responsable de sus recursos”, ha afirmado Joan Roca. Para el chef catalán, estos premios le han permitido “conocer la amplia variedad de empresas que toman la sostenibilidad como base de su trabajo”.
Reconocimiento a los productores sostenibles Mirabel Do Rosal (Pontevedra) es una empresa agraria gallega, que surge como una iniciativa vecinal, dedicada a la producción y Comercialización de una fruta local y tradicional que se conoce con el nombre de Mirabel. En la actualidad cuentan con una superficie de cultivo de entorno a las 10 hectáreas en las que se utilizan técnicas de producción basadas en la agricultura ecológica. Durante la temporada de Mirabel (del 15 de julio al 10 de agosto), el producto se comercializa fresco, y durante todo el año la fruta se vende en almíbar, mermelada o dulce. “Este premio supone un reconocimiento al esfuerzo por promover valores vinculados a la sostenibilidad, y de poder acceder al mercado con productos de calidad, algo complicado desde lo rural. Que el premio venga de la mano de BBVA y El Celler de Can Roca es muy positivo para dar a conocer productos singulares”, ha afirmado Salvador Martínez, responsable de Mirabel Do Rosal.
Fomento de una vida saludable con productos de proximidad Desde junio de este año, ‘Gastronomía sostenible’ ha planteado mes a mes diferentes recetas basadas en productos de temporada seleccionados por los hermanos Roca. La plantilla de productores se amplía ahora con estas seis empresas premiadas que en breve incluirán sus productos en los envíos mensuales.
Cualquier persona puede suscribirse a ‘Gastronomía sostenible’ para recibir en sus casas la cesta del mes propuesta por los hermanos Roca, un proyecto autofinanciado cuyo precio es de 70 euros para cada pedido, y que cuenta varios ingredientes que permitirán cocinar dos recetas propuestas por el propio Joan Roca. El envío se completa con una botella de vino seleccionada especialmente por Josep Roca, sumiller de El Celler de Can Roca, para acompañar las recetas de cada mes.
  

A biblioteca municipal terá novos horarios durante os meses de decembro e xaneiro
O Rosal, 4 de decembro 2020.- A biblioteca municipal do Rosal modificará os seus horarios habituais para adaptarse aos festivos marcados no calendario durante os meses de decembro e xaneiro. Estes cambios comezarán este mesmo venres 4 de decembro, xornada na que as instalacións da biblioteca permanecerán pechadas ao público.
Con estes novos horarios, a biblioteca abrirá os días 9, 10, 15, 16 e 17 de decembro en horario de tarde, de 16.00 a 20.30 horas. As instalacións permanecerán pechadas dende o vindeiro día 18 de decembro ata finalizar as festas de nadal.
Dende o mesmo día 7 de xaneiro a biblioteca retomará o seu horario habitual: os luns de 15.30 a 20.30  horas e de martes a venres de 16.00 a 20.30 horas.
   
Chega ao Rosal o xabaril máis famoso
O Rosal, 4 de decembro.- O Xabarín Club arrasou nas tardes da TVG a finais do século pasado e ata deu nome á xeración de rapaces e rapazas que se achegaron a unha programación infantil e xuvenil en lingua galega. Este venres 4 de decembro o xabaril máis famoso das últimas décadas para moitos galegos e galegas chega ao Rosal, que acolle no Salón de Exposicións do Concello a mostra ‘Asina! Por unha canle Xabarín Club 24 horas na TVG’.
Esta exposición é unha das accións da Mesa pola Normalización Lingüística para por en marcha unha proposición parlamentaria por iniciativa popular coa que conseguir unha canle ‘Xabarín’, con programación dirixida ao público infantil e xuvenil e dispoñible en todas as plataformas de contidos audiovisuais así como app actualizadas que garantan unha canle en galego con contidos atractivos, de éxito actuais e pasados, educativos e de produción galega. Na mostra, as persoas interesadas en dar respaldo a esta iniciativa poderán deixar a súa sinatura para levar esta proposición ao parlamento.
Con esta iniciativa búscase ademais, entre outros obxectivos, que a Corporación de Radio Televisión Española emita todos os seus contidos con opción dobrada ao galego na programación de canle específica infantil e xuvenil e nos contidos da súa app e que a Xuta chegue a acordos con outras administracións e empresas como Movistar, Netflix, HBO... co fin de garantir a opción dobrada e lexendada ou galego en todas as plataformas dixitais de televisión.
Trátase así de reverter a situación actual, na que a lingua galega é a única oficial do estado que non conta cunha canle de emisión continuada de programación infantil e xuvenil, que ocupa apenas un 4,6% da programación semanal e o 2,7% na fin de semana. Lonxe quedan os anos 90, nos que Galicia se situou á vangarda dos contidos infantís e xuvenís coa programación do Xabarín Club na TVG, coa que se contribuíu decisivamente á normalización da lingua galega e á difusión da música, da produción audiovisual e escénica desenvolvida na comunidade.
A exposición estará aberta ao público ata o mes de xaneiro.
  

O Concello restaura a Fonte de Marzán, datada do ano 1891
O Rosal, 4 de decembro.- O Concello do Rosal vén de rematar as obras de restauración da Fonte de Marzán, un lavadoiro histórico situado na zona coñecida como o Campo da Fonte e que está datado do ano 1891.
Operarios municipais levaron a cabo nos últimos días os traballos para a limpeza do ámbito da fonte. Revisouse a canalización que trae a auga, un sumidoiro de pedra que estaba en boas condicións, e melloráronse á súa vez as drenaxes da fonte.
Tamén se aproveitaron  os traballos de restauración para arranxar as canalizacións polas que se desvía a auga dende a fonte e o lavadoiro para que os veciños da zona poidan continuar cos labores de regadío, sobre todo no verán.
Como complemento aos traballos no interior da fonte tamén se mellorou a accesibilidade creando unhas escaleiras e unha rampla, fixéronse muros de cachotería rústica de contención da estrada e construíuse unha varanda cunha fila de pedras rodeando a fonte. Ademais, preparouse un espazo de lecer e descanso con dous bancos para o uso e desfrute da veciñanza que se rematará coa colocación de elementos arbóreos.
Trátase dunha das primeiras accións de recuperación que levará a cabo o goberno municipal para poñer en valor aquelas construcións singulares cos que conta o Rosal, como fontes e lavadoiros, tan importantes para a sociedade rosaleira durante moitos anos. “Pouco a pouco iremos recuperando este tipo de elementos patrimoniais, dos que temos moitos por todo o municipio”, sinala a alcaldesa, Ánxela Fernández Callís.
   
O Rosal, campo de batalla de ‘A guerra das Galicsias’
O Rosal, 3 de decembro 2020.- Aventura intergaláctica para dar a benvida ao Nadal no Rosal. Este venres 4 de decembro Títeres Cachirulo chega ao municipio cunha obra para toda a familia, ‘A Guerra das Galicsias’, unha divertida experiencia interplanetaria do século XXI inspirada nas aventuras galácticas do século XX e nas tradicións máxicas, astrolóxicas, culturais e gastronómicas galegas.
A partir das 17.00 horas, o Salón de Exposicións do Concello acolle a historia de Marticia, unha zona poboada que está alerta porque as súas augas foron contaminadas cunha estraña substancia que provoca os máis insólitos efectos nos seus habitantes. Detrás destes sucesos atopase o malvado emperador de Omega, que planea unha invasión que soamente o amor e un pouco de maxia poden impedir.
Unha divertida obra de Títeres Cachirulo, unha compañía creada en 1985 que se caracteriza por unha rica produción de espectáculos que combina textos clásicos con outros de autoría propia dunha gran variedade temática e técnica cos que percorreron festivais internacionais de Europa e América obtendo importantes premios.
O Concello do Rosal continúa a apostar por unha cultura segura, polo que a actividade contará con todas as medidas de prevención marcadas polas autoridades sanitarias, como o aforo reducido, o mantemento das distancias de seguridade entre o público, o uso de xel hidroalcohólico e o emprego de máscara durante todo o espectáculo.
 

O Nadal inaugúrase no Rosal co acendido do alumeado este venres 4
O Rosal, 1 de decembro 2020.- O Nadal inaugúrase no Rosal este mesmo venres 4. A Praza do Calvario será o escenario elixido para celebrar o acendido do alumeado ás 19.00 horas, un acto que agochará algunhas sorpresas das que a veciñanza poderá desfrutar durante todas estas datas.
O Concello organizará ademais durante toda esa tarde na contorna da praza varias actividades pensadas para todos os públicos. Así, ás 17.00 horas Títeres Cachirulo estarán no Salón de Exposicións do Concello co seu espectáculo ‘A Guerra das Galicsias’, unha divertida aventura interplanetaria do século XXI inspirada nas aventuras galácticas do século XX e nas tradicións máxicas, astrolóxicas, culturais e gastronómicas de Galicia.
Pequenos e maiores poderán tamén desfrutar no mesmo espazo da exposición ‘Asina! Por unha canle Xabarín Club 24 horas na TVG’, unha mostra da Mesa pola Normalización Lingüística que traerá moitos recordos a diferentes xeracións e a través da que as persoas interesadas poderán colaborar coa súa sinatura na posta en marcha dunha proposición parlamentaria por iniciativa popular coa que conseguir unha canle con programación infantil e xuvenil en galego.
A xornada dará o pistoletazo de saída a unha campaña de Nadal cunha programación cultural para todos os públicos coa que propiciar a participación da veciñanza e fomentar o comercio local, sempre con todas medidas de seguridade necesarias.
Xunto con outras iniciativas que se darán a coñecer nos vindeiros días, este ano O Rosal contará coa colaboración activa na campaña de Nadal dos centros de ensino do Rosal, que prepararán os adornos que decorarán escaparates e interiores dos establecementos comerciais da contorna do Calvario que desexen participar.
Regreso al contenido