Tui - galiciasuroeste

Title
Vaya al Contenido

Tui

COMARCA
Ata finais deste mes pódense seguir solicitando os bonos de compra Activa Tui
Tui, 5 de abril de 2021. O 30 de abril remata o prazo para solicitar e consumir os preto de 1.600 bonos “Activa Tui” aínda dispoñibles da campaña posta en marcha polo Concello de Tui.  
O Concello de Tui destina a este fin 50.000 euros distribuídos en 5.000 bonos de consumo de 10 euros para canxear en compras superiores a 25 euros nos 67 establecementos participantes. As persoas de Tui, ou de calquera outro concello, maiores de 16 anos, poden solicitar até dous bonos en activa.tui.gal
Os bonos intégranse dentro do Plan de Reactivación económica do Concello de Tui e están concibidos como unha medida extraordinaria para axudar ao tecido empresarial a paliar os efectos económicos negativos derivados da pandemia da COVID-19 nas microempresas e persoas traballadoras autónomas do termo municipal. Para promocionar a participación dun gran número de establecemento pódese consumir 100 bonos como máximo en cada un deles. Adheríronse 67 establecementos de todos os ámbitos, incluído o comercio a hostalería. Tamén participan perruquerías, centros de beleza, ferraxerías, tendas de deporte ou hoteis, entre moitos outros.
Segundo explicou a concelleira de Comercio, Ana Mª Núñez, a campaña está tendo moi boa acollida entre o tecido comercial, hostaleiro e de restauración tudense, tamén entre os consumidores. Sinalaba amais que algúns dos establecementos xa chegaron ao máximo de 100 bonos que se poden canxear por local.
Resta só o mes de abril para solicitar e consumir as 2000 tarxetas desconto restantes que se poden solicitar a través do formulario habilitado en activa.tui.gal, enderezo onde tamén se pode consultar a lista de establecementos adheridos e os teléfonos de información.
   
A exposición “Estampas Anagrámicas” do tudense Rafael García Sánchez poderase visitar de novo en San Telmo despois de 87 anos
Tui, 5 de abril de 2021. “Estampas anagrámicas” é o título da exposición do tudense Rafael García Sánchez que dende este mércores, 7 de abril e até o 15 de maio, ser´poderá visitar na Sala Municipal de Exposicións do Concello de Tui.  Unha das peculiaridades desta mostra é que volve a exhibirse en Tui logo de 87 anos, pois o autor achegara esta colección para unha exposición celebrada no Casino tudense no ano 1934, ano no que se celebraron as festas de San Telmo no mes de xuño.
A segunda peculiaridade desta exposición é o seu contido. Son 72 láminas coa orixinalidade que cada debuxo, dedicado a unha persoa ou lugar, está realizado combinando as letras da cada palabra, pero asombrosamente esa combinación de letras logra reproducir ou a cara do personaxe ou o símbolo que identifica a cada lugar. Hai unha mestura de sinxeleza, de calidade no trazo e de modernidade logrando unhas imaxes que anticipan as técnicas de deseño contemporáneo.
Para a concelleira de Cultura, Sonsoles Vicente, esta exposición recupera para os tudenses a figura deste egrexio debuxante e ilustrador que enriqueceu e enriquece a vida cultural tudense. Rafael García Sánchez era ata o momento un gran descoñecido para os tudenses e con esta mostra recupérase a súa obra artística de notable valía e interese, pois a pesar do tempo transcorrido, as súas ilustracións “anagrámicas” seguen resultando actuais e cun trazo orixinal A exposición, engade, resulta de grande atractivo para todas as idades.
Rafael García Sánchez forma parte dunha xeración de ilustradores tudenses de alta calidade que abrangue a Eduardo Padín Rodríguez (Tui 1886 – Vigo 1979), José Izquierdo Durán “Yzquierdo” (Tui 1890 – Madrid 1930), Guillermo Taboada Infante (Tui 1909 – Madrid 2006) e José Castro Arines (Tui 1911 – Madrid 1997).
Esta colección foi entregada ao Concello de Tui no ano 2019 pola familia Arean Pereira e houbo que agardar ata agora para poder realizar esta exposición coincidindo co programa cultural de San Telmo.
Apuntes biográficos de RAFAEL GARCÍA SÁNCHEZ
Son escasos os datos biográficos que coñecemos.
Nace en Tui nos anos oitenta do século XIX. Foron seus pais Ignacio García e Generosa Sánchez e os seus irmáns José García Sánchez, afamado avogado tudense e correspondente do Faro de Vigo moitos anos, Manuel, médico militar, Ignacio, comisario de policía, e Purificación, casada co militar portugués Isidoro Pereira Padín. Rafael García Sánchez estivo solteiro.
En 1911 como empregado dunha casa industrial e traballando en Portugal foi detido en Régoa, acusado de conspiración contra a recentemente proclamada República portuguesa, e encarcerado en Porto e Lisboa durante once meses, liberado coa obriga de abandonar Portugal tras as xestións do ministro plenipotenciario na legación de España en Lisboa, Rodrigo de Saavedra y Vinent, II marqués de Villalobar.
Posteriormente na súa actividade profesional foi oficial de Facenda, adscrito a cidade de Tui, logo destinado, a petición propia, á Aduana de Behovía – Irun onte traballou ata a súa xubilación.
Dedicado dende novo ao mundo da ilustración, colabora en diversas publicacións como “Vida gallega” (1920), “Faro de Vigo” (1925) ou a revista tudense “La Semana” (1925).
Cultivou tamén a “cisografia”, técnica consistente no debuxo de persoas ou escenas recortadas en cartolina negra colocadas sobre un fondo luminoso; realizando diversas exposicións con esta técnica.
Exposición Estampas Anagrámicas
Esta exposición “Estampas anagrámicas” foi inaugurada, por vez primeira, no “Lar Gallego” de San Sebastián coincidindo coa festa do apóstolo Santiago do ano 1932.
En xuño do ano 1934 realiza de novo esta exposición no Casino de Tui, enviando a colección de estampas ao presidente de la Liga de Amigos de Tuy, don Rosendo Troncoso Bugarín, para amenizar o programa de festexos de San Telmo. “Habiamos admirado ya en otras ocasiones algunas de las sugestivas creaciones de este “verdadero artista” del lápiz y la pluma que le otorgaban con indiscutible derecho el titulo de gran dibujante” sinala o correspondente de El Pueblo Gallego.
No ano seguinte, nos meses de outubro e novembro de 1935, esta mostra foi presentada en Vigo nos salón de “Amigos del Arte”.
 

Inaugúrase a exposición “Estampas anagrámicas”
Tui, 6 de abril de 2021. Mañá mércores, 7 de abril, comeza a programación cultural de San Telmo.
Ás 19 h na Sala de Exposicións Municipal, na Área Panorámica, inaugúrase a exposición “Estampas anagrámicas de Rafael García Sánchez”. Recupérase así esta mostra que formou parte das festas de San Telmo de 1934. A inauguración correrá a cargo do alcalde, Enrique Cabaleiro, xunto aos membros da corporación municipal.
A programación prevista comezará previamente, ás 17 h, no Paseo da Corredoira co primeiro pase do pasarrúas que realizará Asacocirco co espectáculo “De Frac”. Volverá actuar ás 19 h.
Xa na carpa que se instalou na Corredoira, con capacidade para 120 persoas, actuará Pista Castro ás 18 h co espectáculo “Lila Star”. As entradas poden reservarse gratuitamente en tui.gal, e aquelas non validadas 10 minutos antes do inicio poderán ser reasignadas. A artista Beatriz Rubio presenta un espectáculo circense con múltiples acrobacias para toda a familia.
Ás 20 h a cita será no Teatro Municipal coa proxección da película “Ons” de Alfonso Zarauza. Está interpretada por Melania Cruz, Antonio Durán, Xulio Abonjo, Anaël Snoek e Marta Lado. Transcorre na illa de Ons onde recala un matrimonio para pasar o verán, pero a estancia alóngase e comezan a aflorar segredos gardados.  Está nomeada a 13 premios Mestre Mateo. O aforo está limitado a 180 butacas. As localidades deben reservarse en tui.gal, e no caso de non ser validadas 10 minutos antes do inicio poderán ser reasignadas.  
Programación de Actividades de San Telmo 2021
Do 7 ao 12 de abril
·         Na Sala de Exposicións Municipal “Estampas anagrámicas de Rafael García Sánchez”
Mércores 7
·         Ás 17 h no Paseo da Corredoira pasaRÚAs ASACOCIRCO “De Frac”
·         Ás 18 h na carpa no Paseo da Corredoira PISTA CATRO “Lila Star”
·         Ás 19 h no Paseo da Corredoira pasaRÚAs ASACOCIRCO “De Frac”
·         Ás 20 h no Teatro Municipal CINEMA “Ons”
  
O próximo luns ás 13 no Teatro Municipal terá lugar a entrega dos Premios Cidade de Tui 2021
Tui, 6 de abril de 2021. O próximo luns, 12 de abril, ás 13 h no Teatro Municipal de Tui terá lugar a Gala de entrega dos premios Cidade de Tui. Creáronse este ano co obxectivo de recoñecer anualmente aquelas personalidades ou entidades que pola súa dilatada traxectoria teñen contribuído á promoción e potenciación da nosa cidade.
Nesta primeira edición, correspondente ao ano 2021, o xurado designado pola Xunta de Goberno Local tudense acordou conceder os seguintes premios:
  • Categoría colectiva á Residencia “San Telmo” das Hermanitas de los Ancianos Desamparados. Dende 1882 as Hermanitas desenvolven en Tui a súa actividade de acollida aos maiores sen recursos dende aquela no seu Asilo e hoxe Residencia “San Telmo” teñen acollido a cerca de tres mil anciáns e anciás tanto de Tui como de todo o sur da provincia de Pontevedra continuando na actualidade con este xeneroso labor. Ao tempo teñen conseguido a implicación dun amplo sector da sociedade tudense, con actividades de voluntariado e altruísmo a prol dos residentes. Este galardón quere recoñecer esta ampla traxectoria de case 140 anos resaltando o labor da comunidade relixiosa, do persoal do centro e dos numerosos voluntarios que colaboran no mesmo... que o converten nun lugar de referencia para os tudenses.
  • Categoría individual:
  • A título póstumo a Alberto Estevez Piña, recentemente falecido, en recoñecemento a súa persoal traxectoria de  incansable animador da vida tudense (con especial referencia ás festas de San Telmo), ao seu traballo de divulgación da nosa historia a través dos seus blogs e publicación con especial lembranza ás dúas décadas de correspondente de “Faro de Vigo” en Tui, o carácter innovador das súa achegas cinematográficas no ámbito do documental "Romaría da  morte" (1974) y "Después del silencio" (1978).
  • A Silverio Rivas, en recoñecemento ao escultor ponteareán que instalou, hai xa máis de dúas décadas, o seu estudo na  parroquia tudense de Paramos, convertendo este lugar nun enclave de referencia da arte galega e nun espazo integrado no entorno e que enriquece substancialmente o patrimonio cultural tudense coa obra deste egrexio escultor, un dos principais expoñentes da arte contemporánea de Galicia. Silverio Rivas ten colaborado activamente na vida tudense, salientando o seu “Monumento aos represaliados”.
O xurado tamén acordou facer constar o recoñecemento a todas as persoas que estiveron na primeira liña da loita contra a Covid e solicitar que se garde un minuto de silencio polas vítimas no acto de entrega destes Premios.
O xurado estivo presidido polo alcalde, Enrique Cabaleiro González, e integrado por Margarita Pino Juste, catedrática da Universidade de Vigo, María Dolores Balseiro, profesora xubilada, Rosendo Bugarín González, médico, Jesús González López, xerente de Utingal, Antonio Alonso Martín, veciño, Jose A, Font Moldes, director da Radio Municipal e Marga Romero Lorenzo, escritora e profesora, actuando como secretario Rafael Sánchez Bargiela, funcionario do Concello.
O acto institucional de entrega destes Premios “Cidade de Tui” contará coa actuación Ramón Corral, percusión; Diego Alonso Vila, gaita; e Óscar e Pablo Mirás Sánchez alumnos de piano do Conservatorio Profesional de Música de Tui.
Para asistir á gala de entrega de premios é preciso reservar entrada de forma gratuíta en tui.gal.
   
Un programa monográfico resolverá as dúbidas da cidadanía sobre as axudas para vivenda convocadas nestes momentos
Tui, 6 de abril de 2021. A Oficina de Rehabilitación do Concello de Tui  informa e asesora na solicitude de axudas relacionadas coa vivenda que se convocan ao longo do ano. Nestes momentos son varias as convocatorias abertas e a demanda de información está a ser moi alta. Nestes momentos debido as restricións derivadas da actual situación de pandemia non é posible atender presencialmente a toda a cidadanía interesada nestas axudas. É por isto que dende a concellería de Patrimonio, en colaboración coa Radio Municipal de Tui, vaise realizar un programa especial a monográfico este xoves, de 12.30  a 13.30 h, na emisora municipal para poder responder as todas as dúbidas e preguntas que poida ter a cidadanía sobre as convocatorias abertas.  Así as cuestións poderán ser plantexadas en directo a través do 986 60 70 55, ou previamente enviadas por Whastapp ao  664 06 12 00.
Nestes momentos está aberto até finais de mes o prazo de solicitude das axudas para o alugamento de vivenda tanto para menores de 35 anos, coma para maiores desta idade.  Por outra até o 1 de setembro está aberta a convocatoria de axudas para a adquisición de vivenda no conxunto histórico de Tui. E tamén está aberto o prazo de solicitude de axudas para obras de rehabilitación, melloras de eficiencia enerxética e accesibilidade en vivendas construídas con anterioridade a 1996 en todo o termo municipal.
O resumo destas axudas pódese consultar na web municipal no apartado de Patrimonio ou recoller impreso na casa do concello.
  
C21 solicita a mellora da seguridade na subida de San Simón, en Ribadelouro,  pola ameaza dun eucalipto
Tui, 6 de abril de 2021. O concelleiro liberal, José Palacín, ven de solicitar por rexistro de entrada que a Concellería de Medio Rural tramite unha solución para o eucalipto que está inclinado sobre a estrada PO 2502 na subida de San Simón.
José Palacín aduce que dita árbore inclinouse de forma notable nestes dous últimos anos e que se atopa na beirarrúa frontal ao CRA de Ribadelouro, por iso pide unha solución para non ter que lamentar nun futuro posibles accidentes.
Do mesmo modo, dentro desta campaña #Tuiseguro, explica que na parroquia de Ribadelouro hai máis arbores susceptibles de causar problemas, por exemplo, moi cerca deste existe un piñeiro que está a punto de chocar co cableado eléctrico.   
 
En 2020 recicláronse 7.185 quilos de aceite de cociña usado en Tui
Tui, 7 de abril de 2021. No ano 2020 recicláronse en Tui, nos 25 contedores distribuídos ao longo do termo municipal, 7.185 quilos de aceite de cociña usado. Este residuo no caso de non reciclarse tería contaminado 7.903.500 litros de auga. En concreto produciuse un incremento de máis do 50% con respecto ao mesmo período do ano anterior, cando se reciclaron 3.626 quilos de aceite de cociña usado.
O contedor no que máis aceite se recolleu foi o situado na Avenida da Concordia con 730 litros, e en segundo lugar o da rúa Maristas, a carón da Praza de Abastos, con 710 litros recollidos durante todo o ano 2020. O terceiro punto no que máis aceite de cociña usado se recolleu foi o da rúa Rosa Bahamonde con 540 litros.
Na web municipal, no apartado de Medio Ambiente, pode consultarse o mapa coa localización dos 25 contedores situados tanto no centro urbano coma nas parroquias.
Dende o concello de Tui apóstase pola recollida selectiva dos distintos tipos de lixo. Amais dos contedores para a recollida de aceite de cociña usado, hai tamén, en convenio con Cáritas, contedores para depositar roupa e calzado usado. Na praza de Abastos e na entrada do Punto Limpo hai dous contedores para a recollida de tapóns de plástico en colaboración coa asociación Taporelmun.
Ao longo do último ano o Concello de Tui ten incrementado o número de contedores destinados tanto á recollida de envases coma de papel e cartón.  A isto engádese o Plan Municipal de Compostaxe cunha aposta pola recollida dos restos orgánicos tanto en composteiros individuais coma nos composteiros comunitarios.
  
Paco Nogueiras, Butaca Zero e Barafunda actúan mañá xoves na programación cultural de San Telmo
Tui,  7 de abril de 2021. A primeira cita do día é ás 17 h no Paseo da Corredoira co pasarrúas que realizará Barafaunda Animación co espectáculo “3 Pompeiras”, trátase dunha divertida animación chea de maxia e ilusión. Volverá actuar ás 19 h.
Xa na carpa que se instalou na Corredoira ás 18h actuará Paco Nogueiras co espectáculo “Brinca Vai”. Unha actuación para a que xa non quedan entradas dispoñibles. O músico e actor Paco Nogueiras combina música, animación e interpretación nun espectáculo no que combina cancións, animación e interpretacións cos ritmos e rexistros máis divertidos. O público asistente vivirá unha divertidísima viaxe chea de humor, baile e cancións.
Ás 20 h no Teatro Municipal é a quenda de ButacaZero con “32m2”. Esther F. Carrodeguas e Xavier Castiñeira son os ideadores, creadores, produtores e directores desta peza na que reflexionan sobre o confinamento partindo da experiencia propia. Sobre o escenario estarán Xurxo Cortázar e Nuria Gullón interpretando a  Mar e Xan, a parella protagonista desta traxicomedia, que viven no seu pisiño de 32m². O aforo está limitado a 180 butacas. As localidades deben reservarse en tui.gal.
Na Sala de Exposicións Municipal, na Área Panorámica, pódese a exposición “Estampas anagrámicas de Rafael García Sánchez”. Recupérase así esta mostra que formou parte das festas de San Telmo de 1934.
Programación de Actividades de San Telmo 2021
Do 7 ao 12 de abril
·         Na Sala de Exposicións Municipal “Estampas anagrámicas de Rafael García Sánchez”
Xoves 8
·             Ás 17 h no Paseo da Corredoira pasarrúas BARAFUNDA “3 Pompeiras”
·             Ás 18 h na carpa no Paseo da Corredoira PACO NOGUEIRAS “Brinca Vai”
·             Ás 19 h no Paseo da Corredoira pasarrúas BARAFUNDA “3 Pompeiras”
·             Ás 20 h no Teatro Municipal BUTACAZERO “32m2
 

“Musigal 2021” arranca este venres coa actuación de Andrea Pousa en Tui
Tui, 8 de abril de 2021. O Teatro Municipal de Tui é o lugar elixido para dar comezo a unha nova edición de Musigal, o programa da Deputación de Pontevedra que contribúe á difusión e promoción da música galega e en galego. Será este venres ás 20.00 horas cando a cantante tomiñense Andrea Pousa suba ás táboas do escenario para facer desfrutar ao público da súa voz nunha actuación que contará cos protoco9los e as medidas de seguridade sanitaria pertinentes. A deputada provincial Victoria Alonso será unha das persoas que asistan ao concerto, para o que é preciso reservar entrada a través do sitio web do concello.
A de Tui será a primeira das 55 actuacións que a Deputación ten programadas en toda a provincia. En total, serán 26 as agrupacións musicais que percorran os concellos de menos de 50.000 habitantes ata o 18 de decembro, cando Leilía poña o broche de ouro a esta edición de Musigal cun concerto na Illa de Arousa. Tras o concerto de Andrea Pousa en Tui, a próxima cita será con Roi Casal en Pontecesures o 16 de maio. A partir de aí, artistas como Guadi Galego, Baiuca, Tanxugueiras ou Milladoiro ofrecerán concertos gratuítos espallando a cultura musical galega por cada recuncho da provincia de Pontevedra.
Aínda que a maior parte das actuacións concéntranse nos meses de xullo e agosto, con 22 e 18 concertos respectivamente, a música non parará de soar durante todo o que queda de 2021. No marco de Musigal haberá dúas actuacións en maio, cinco en xuño e catro en setembro. Ademais, os meses de outubro e novembro contarán cun evento cada un.
Con este programa a Deputación de Pontevedra fai a cultura accesible ao conxunto da cidadanía e favorece a programación artística nos concellos. Do mesmo xeito, dinamiza a lingua galega e favorece a vivencia positiva e posta en valor do noso idioma.
   
Andrea Pousa preestrea mañá o seu novo traballo “Retorno” na programación cultural de San Telmo
Tui, 8 de abril de 2021. Música e espectáculos circenses centrarán mañá venres, 9 de abril, a terceira xornada da programación cultural de San Telmo.
Ás 17 h o Paseo da Corredoira volverá a encherse de cor e ilusión co pasarrúas que realizará Pistacatro co espectáculo “O Circo”. Volverá actuar ás 19 h.
Xa na carpa situada na Corredoira ás 18h actuará Circo Chosco co espectáculo “Riscando o Ceo”. Unha actuación para a que xa non quedan entradas dispoñibles. Un espectáculo para todos os públicos e inspirado no Principiño. Unha representación próxima e moi visual que fai que o público viaxe co perigo e a risa. Na mesma o circo aparece en forma de humor, maxia, risco, malabar, acrobacias e equilibrios imposibles.
Ás 20 h no Teatro Municipal de Tui a artista Andrea Pousa preestrea o seu segundo traballo discográfico “Retorno”, nun concerto que chega  da man do programa Musigal da Deputación. Un traballo no que converte en vangarda as súas raíces, marcando un antes e un despois na súa traxectoria musical. Neste traballo Andrea Pousa compuxo gran parte das letras e melodías do álbum baixo a produción do compositor e pianista portugués Paulo Borges. Estará acompañada no escenario por Miquel Queixas, Rafael Morales, Francisco J. Vaz, e Diego Mosquera. Será cunha posta en escena moi coidada e visual na que proxectarán vídeo creacións  e na que participarán tamén seis bailarinas de danza contemporánea.
As entradas poden reservarse gratuitamente en tui.gal, estando o aforo limitado a 180 butacas.
Por outra parte lembramos que pode visitarse na Sala de Exposicións Municipal, na Área Panorámica, a mostra “Estampas anagrámicas de Rafael García Sánchez”.
Programación de Actividades de San Telmo 2021
Do 7 ao 12 de abril
·         Na Sala de Exposicións Municipal “Estampas anagrámicas de Rafael García Sánchez”
Venres 9
·         Ás 17 h no Paseo da Corredoira pasarrúas PISTACATRO “O Circo“
·         Ás 18 h na carpa no Paseo da Corredoira CIRCO CHOSCO “Riscando o Ceo”
·         Ás 19 h no Paseo da Corredoira pasarrúas PISTACATRO “O Circo“
·         Ás 20 h no Teatro Municipal ANDREA POUSA “Retorno”
 
Converxencia 21 solicita unha corrección de números no Barrio de Eira Vella en Ribadelouro
Tui, 7 de abril de 2021. O concelleiro liberal, José Palacín, ven de constatar por rexistro de entrada a existencia dun problema relacionado ca numeración no barrio de Eira Vella, en Ribadelouro.
Esta cuestión causa problemas aos veciños debido a que os servizos de correos, reparto de paquetería e de comida a domicilio atópanse con varias casas marcadas co mesmo número.
C21 aproveita para solicitarlle ao goberno actual que siga traballando no inventario de camiños e a mellora da localización e numeración das vivendas  que iniciara o goberno de Carlos Vázquez Padín no ano 2018.  
 

A música protagoniza a programación cultural da fin de semana de San Telmo
Tui, 9 de abril de 2021. A música será a gran protagonista da fin de semana na programación cultural de San Telmo.
O Teatro Municipal acollerá mañá sábado, ás 20 h , a Mercedes Peón en concerto, nun evento para o que xa non quedan entradas dispoñibles. Xunto a Mónica de Nut e Ana Fernández, nunha posta en escena pensada para o Teatro tudense, presentará “Déixaas”.  
O domingo, tamén ás 20 h, será a quenda do tudense Víctor Coyote que regresa a Tui para presentar o seu último traballo “Las Comarcales”. Canda a el estará Ricardo Moreno e Gustavo Villamor, e coa participación dos tudenses Pancho Álvarez e Lucas Fernández.
Amais a Banda de Música Popular de Tui ofrecerá catro concerto. A banda ao completo baixo a dirección de Eloy Carrera actuará o luns, ás 20 h, no Teatro Municipal. Previamente mañá sábado ás 12 h na carpa da Corredoira actuará a sección de vento madeira, o domingo a sección de vento metal, e o luns os grupos de cámara.
As entradas poden reservarse gratuitamente en tui.gal, estando o aforo limitado a 180 butacas no caso do Teatro, e a 120 cadeiras na carpa.
Cada tarde continuarán os pasarrúas no Paseo da Corredoira con dous pases ás 17 e ás 19 h. Mañá sábado será con Fantoches Baj e “Velocíclopes”, o domingo con Troula Animación con “Circo Krasnovarak”, e o luns con Troula Animación e “Polis-Tolos”.
Tamén proseguen as 18 h os espectáculos para público familiar na carpa na Corredoira para os que están xa esgotadas as entradas. Mañá sábado actuará Fran Rei co espectáculo “O Super Heroe”, o domingo o Mago Teto con “Novas Tolemaxias” e o luns estará en concerto Uxía Lambona e a Banda Molona.
Tamén están previstos os pasarrúas das charangas tudenses A Tu Ritmo e Cantos Somos o sábado e o domingo ás 13 h, respectivamente.
O próximo luns, 12 de abril, día de San Telmo e festivo local en Tui está amais prevista a Gala de Entrega de Premios Cidade de Tui no Teatro Municipal ás 13 h. Os galardoados son o escultor Silverio Rivas, Alberto Estévez Piña a título póstumo, e a Residencia San Telmo. É preciso reservar entrada previamente en tui.gal.
Por outra parte lembramos que pode visitarse na Sala de Exposicións Municipal, na Área Panorámica, a mostra “Estampas anagrámicas de Rafael García Sánchez”. Mañá sábado abrirá de 9 a 14 h e de 16 a 20 h e o domingo e luns de 12 a 14 e de 16 a 20h .
Programación de Actividades de San Telmo 2021
Do 7 ao 12 de abril
·                     Na Sala de Exposicións Municipal “Estampas anagrámicas de Rafael García Sánchez”
Sábado 10
•    Ás 12 h na carpa no Paseo da Corredoira Sección de vento madeira da Banda de Música Popular de Tui
·                     •    Ás 13 h no Paseo da Corredoira pasarrúas  Charanga A TU RITMO
·                     •    Ás 17 h no Paseo da Corredoira pasarrúas  FANTOCHES BAJ “Velocíclopes”
·                     •    Ás 18 h na carpa no Paseo da Corredoira FRAN REI “Superheroe”
·                     •    Ás 19 h no Paseo da Corredoira pasarrúas  FANTOCHES BAJ “Velocíclopes”
·                     •    Ás 20 h no Teatro Municipal MERCEDES PEÓN “Déixaas”
Domingo 11
·                     •    Ás 12 h na carpa no Paseo da Corredoira Sección de vento metal da Banda de Música Popular de Tui
·                     •    Ás 13 h no Paseo da Corredoira pasarrúas  Charanga CANTOS SOMOS
·                     •    Ás 17 h no Paseo da Corredoira pasarrúas  TROULA ANIMACIÓN “Circo Krasnovarak”
·                     •    Ás 18 h na carpa no Paseo da Corredoira MAGO TETO “Novas Tolemaxias”
·                     •    Ás 19 h no Paseo da Corredoira pasarrúas  TROULA ANIMACIÓN “Circo Krasnovarak”
·                     •    Ás 20 h no Teatro Municipal VICTOR COYOTE “Las Comarcales”
Luns 12
·                     •    Ás 12 h na carpa no Paseo da Corredoira Grupos de Cámara da Banda de Música Popular de Tui
·                     •    Ás 13 h no Teatro Municipal Gala de entrega dos Premios Cidade de Tui
·                     •    Ás 17 h no Paseo da Corredoira pasarrúas  TROULA ANIMACIÓN “PolisTolos”
·                     •    Ás 18 h na carpa no Paseo da Corredoira UXIA LAMBONA E A BANDA MOLONA
·                     •    Ás 19 h no Paseo da Corredoira pasarrúas  TROULA ANIMACIÓN “PolisTolos”
·                     •    Ás 20 h no Teatro Municipal BANDA MUSICA POPULAR DE TUI
Entradas
·                     Reserva de entradas en tui.gal Máximo 2 entradas por persoa. O acceso ao espectáculo permitirase dende 30 minutos antes do inicio. As entradas non validades 10 minutos antes do comezo poderán ser reasignadas.
Notas
·                     Na Carpa no Paseo da Corredoira capacidade limitada a 120 cadeiras
·                     Teatro Municipal de Tui capacidade limitada a 180 butacas
No caso de meteoroloxía adversa os pasarrúas e os espectáculos previstos na carpa poderán ser adiados ou suspendidos. Informarase o mesmo día ás 12 h nas redes sociais municipais.
 

Tui conmemora o 350 aniversario da publicación do “Entremés famoso sobre a pesca do río Miño
Tui, 9 de abril de 2021.O luns, 12 de abril, festivo local en Tui, vai conmemorar o 350 aniversario da publicación da obra “Entremés famoso sobre a pesca do río Miño”.
O acto comezará ás 18 h no salón de sesións da casa do concello coa presentación do libro “Miño, o rio das letras”. No mesmo inclúese a edición facsímile do “Entremés famoso sobre a pesca no río Miño”.  Intervirán no acto Luís García Mañá, presidente da Asociación de Amigos do Couto Mixto; Xosé González Martínez, presidente da Fundación L. Peña Novo; Valentin García Gómez, secretario xeral de Política Lingüística; António Barbosa, presidente da Cámara de Monçao; un representante da Deputación de Pontevedra; e o alcalde de Tui, Enrique Cabaleiro.
A continuación terá lugar na rúa Ourense na zona axardinada a carón da Área Panorámica, a descuberta dun monumento conmemorativo do 350º aniversario da publicación da obra “Entremés famoso sobre a pesca do río Miño, doado  pola Escola de Canteiros de Poio. No mesmo actuarán Diego Alonso, gaita, e Ramón Corral, percusión.
 

Dolores Rodal doa ao Concello de Tui un cadro de Ricardo Padín de 1870
Tui, 13 de abril de 2021. A tudense Dolores Rodal García vén de doar ao Concello de Tui o lenzo “Vista de Tui” pintado polo artista tudense Ricardo Padín en 1870.  O acto formal da entrega tivo lugar o pasado venres, 9 de abril, no salón de plenos da casa do concello.
O alcalde de Tui, Enrique Cabaleiro, xunto a membros da corporación, recibiu a doazón deste cadro da man de Dolores Rodal e dos seus familiares.
Neste acto, tras a sinatura do correspondente documento de doazón, Dolores Rodal expresou o seu desexo e o da súa familia de que esta obra que chegara ao poder dos seus antepasados se incorporase á custodia do Concello tudense para que fose contemplado polo veciños e enriquecese o patrimonio municipal.
Pola súa banda, o alcalde Tui agradeceu, en nome propio e da Corporación Municipal, o xeneroso xesto de Dolores Rodal e a súa familia. Enrique Cabaleiro reiterou a gratitude en nome dos veciños e veciñas de Tui con Dolores Rodal García e a súa familia que expresan deste modo o seu compromiso de cariño coa nosa cidade.
Esta obra pictórica ten gran interese histórico pois recolle unha visión de Tui e Valença co río Miño, previa á construción da Ponte Internacional.  Pasará a estar nun lugar visible da Casa do Concello.
Características da obra:
·         “Vista de Tui”
·         Dimensións 113x91 cm.
·         Técnica: óleo sobre lenzo
·         Data: 1870 (figura na obra)
·         Autor: Ricardo Padín, pintor tudense da segunda metade do século XIX con obra dispersa en domicilios e coleccións privadas. Conta cunha técnica depurada e formalista. E pai do afamado pintor e debuxante Eduardo Padín Rodríguez.
·         Descrición: vista de Tui dende a Alameda de San Domingos, inxerida no debuxo dun escudo oblongo que no seu bordo superior leva o nome do autor ·R. PADIN” e no inferior figura escrito: “A LA SOCIEDAD RECREATIVA DE TUY” figurando por baixo a data de 1870. A composición pretende ser naturalista, colocando en primeiro plano unha pastora con ovellas e cabras para sinalar o aspecto bucólico e idealizado da representación que contrasta coa fidelidade na representación da paisaxe de Tui e Valença xunto co río Miño.
 
C21 solicita mellorar a ubicación dos contedores da estrada de Rebordáns
Tui, 13 de abril de 2021. Dentro do seu Plan #Tuiseguro, C21 ven de solicitar por rexistro de entrada que se proceda a mover os contedores que percorren a PO 3001 ou Estrada de Rebordáns para evitar a súa perigosa invasión dentro dos carrís de circulación.
O concelleiro centrista liberal, José Palacín, considera que: “Hai marxe de manobra para recolocalos e evitar posibles accidentes de circulación”. Concretamente nesa estrada existen tres puntos con contedores mal situados e que xa foron notificados a concellería correspondente.
   
OPINIÓN de C21
Valoración programación cultural san telmo 2021.
Por Eduardo Freiría
          Co transcorrer do tempo durante esta pandemia vanse recuperando actividades que estaban restrinxidas ou alo menos adaptándoas á situación na que vivimos. É o caso da programación cultural de San Telmo que tratou de encher o baleiro dunhas festas de San Telmo por imposibilidade de celebración.
           De partida, foi unha moi boa iniciativa por parte do Concello levar a cabo unha programación cultural durante estas datas e deste xeito non deixar orfa a nosa cidade de eventos que conmemorasen a celebración do noso patrón San Telmo. Non obstante, e a pesares da calidade da programación, os eventos quedaron totalmente descontextualizados, pois leváronse a cabo dun xeito que tanto se poderían programar nestas datas coma no verán, ou en calquera outra localidade sen máis particular que realizalos, pero sen ningún vínculo concreto; é dicir, este Goberno realizou unha programación cultural aséptica, sen un nexo directo coa celebración que corresponde, e todo iso despois de escoitar o discurso pronunciado pola Sra. Concelleira de Cultura na Gala de entrega dos premios “Cidade de Tui”, no que di apostar pola tradición. Evidentemente este foi un discurso que en nada ten que ver co espírito destas actividades realizadas, amosando polo tanto unha enorme incoherencia.
           Neste arenga a Sra. Concelleira se enorgullecía do legado e tradicións que co tempo ergueron a nosa cidade e a fixeron singular, non obstante, na praxe deulle as costas a esas tradicións tan singulares e que podían e debían ser incluídas na programación cultural de San Telmo 2021, pois non eran incompatibles coas normas sanitarias ou poderíanse adaptar, e deste xeito servirían para contextualizar e outorgar un sentido a programación cultural. Pola contra, decidiuse esquecer ese o noso acervo patrimonial e descartar unha apertura das celebracións a través dun pregón que enxalzase a un cidadán e a cidade mesma, decidiuse manter no esquecemento os tradicionais pasarrúas cos Xigantes e Cabezudos a pesares de que se celebraron pasarrúas con empresas privadas. Decidiuse omitir o desfile do traxe tradicional tudense ou obviar a Semana do Teatro Amador a pesares de que se realizaron actividades no Teatro Municipal. Xa non falemos dun mínimo engalanamento da cidade, da música ambiental, da celebración do Festival do Meixón baixo o novo formato e recuperado por C21, ou da tamén tradicional tirada de fogos de lucería como acto simbólico.
Reiteramos que todas estas actividades son perfectamente compatibles ou adaptables ás normas sanitarias vixentes.
           Concluíron estes actos cun novo evento, a entrega de premios “Cidade de Tui”, que nós valoramos favorablemente e que pola nosa parte queremos felicitar aos premiados e familiares polo seu recoñecemento ao labor desenvolvido. Acto para o que a concelleira desexaba un afianzamento no tempo, unha pena que non considerase tamén ese desexo para eventos de novo cuño coma o creado por C21 en 2019, o Concerto de Cidade “As badaladas de San Telmo”, actividade que precisamente aglutinaba os aspectos de patrimonio, tradición, singularidade, a máis de participación social e divulgación, posto que consideramos que na cultura o cidadán ten que ter un papel activo e que o coñecemento é fonte de progreso. Aspectos que tal vez descoñeza a Sra. Concelleira de Cultura dada a súa manifesta falta de sensibilidade nestas actividades.
Eduardo Freiría.
 

O Servizo de Orientación para o Emprego xestionou no primeiro trimestre do ano 50 ofertas de emprego
Tui, 15 de abril de 2021. O Servizo de Orientación para o Emprego xestionou no primeiro trimestre deste ano 50 ofertas de emprego, ao tempo que no servizo de intermediación contactaron con preto de 30 empresas. Outra das actividades desenvolvidas foi a impartición de obradoiros orientados a mellorar a busca de emprego.
Este servizo de orientación, situado no Centro Municipal de Formación en Guillarei, préstase previa cita. Nunha entrevista inicial realizan unha diagnose da situación persoal e profesional da persoa que acode, para orientala ben cara á Bolsa de Emprego Municipal ou cara outros recursos.  Precisamente nos tres primeiros meses do ano 50 persoas en busca activa de emprego se incorporaron a esta bolsa. Deste total 5 persoas accederon neste trimestre ao mercado laboral.
A concelleira de Formación e Emprego do Concello de Tui explicaba que “nestes momentos tan difíciles para o emprego o goberno municipal propúxose diminuír a taxa de desemprego do municipio”. En marzo produciuse un descenso no número de desempregados en Tui de 8 persoas con respecto ao mes de febreiro, situándose en 1.301 persoas das que  791 son mulleres e 510 son homes.
Dende o departamento de Formación neste trimestre – até o mes de xuño – teñen previsto impartir novos obradoiros dirixidos a persoas desempregadas empadroadas no municipio. En concreto serán Taller “Obxectivo profesional”; Taller “O Curriculum Vitae”; Taller “A entrevista de Traballo”  e Taller de “Ferramentas dixitais para a busca de Emprego”.
As persoas interesadas nestes obradoiros, en formar parte da bolsa de emprego municipal ou en solicitar cita para o servizo de orientación poden contactar co teléfono 986 60 32 28 ou co correo orientación@tui.gal.      
 
A Policía Local conta un vehículo eléctrico financiado cunha achega do Fondo de Compensación Ambiental da Xunta
Tui, 15 de abril de 2021. O alcalde de Tui, Enrique  Cabaleiro, recibiu esta mañá na casa do concello á directora xeral de Administración Local, Natalia Prieto, xunto ao membros da corporación municipal de Tui. O obxecto da visita foi comprobar o funcionamento do vehículo eléctrico, un Hyundai Kona, adquirido polo concello de Tui grazas á achega de 38.349,74 deste departamento autonómico.   O investimento realizado inclúe tanto o importe da adquisición do vehículo coma a instalación dun punto de recarga na nave municipal en Guillarei.
 
O alcalde de Tui, Enrique Cabaleiro, agradecía a colaboración da Xunta de Galicia co Concello de Tui na compra deste vehículo eléctrico destinado á Policía Local. Con esta adquisición dicía o rexedor “buscamos renovar o parque móbil e adaptarnos á nova normativa medioambiental”. Salientaba coma a colaboración doutras administración, neste caso a autonómica, “é fundamental para mellorar o servizos públicos”. Agradecía Enrique Cabaleiro a xestión realizada pola directora xeral de Administración Local, Natalia Prieto, e amosaba a disposición municipal a colaboración en todo aquilo que sexa necesario.
A directora xeral de Administración Local, Natalia Prieto, explicaba que a axuda para a adquisición deste vehículo eléctrico financiouse con cargo ao fondo de compensación Ambiental.  
O mandatario tudense e a directora xeral aproveitaron tamén o encontro para abordar outros temas de índole local relacionados coa xestión deste departamento autonómico.
 
O Concello de Tui crea o Foro do Camiño Portugués
Tui, 15 de abril de 2021. O Concello de Tui continua avanzando no impulso de iniciativas a prol do Camiño Portugués ao entender que esta ruta xacobea é un dos principais recursos patrimoniais e turísticos do concello. Neste senso pon en marcha unha iniciativa denominada “Foro do Camiño Portugués” co obxectivo de realizar cada mes unha charla sobre temáticas xacobeas relacionados coa peregrinación polo Camiño Portugués. Trátase dunha sesión presencial pero retransmitida en liña, en tui.gal,  para favorecer o acceso de todos os interesados.
Este ciclo comezará o próximo martes, 20 de abril, ás 19 h na Aula Cemit, no edificio Francisco Sánchez – antiga Área Panorámica - . O responsable da apertura deste foro será Juan Manuel López-Chaves Meléndez, fundador da Asociación Amigos de los Pazos de Vigo. López Chaves foi, entre outras moitas iniciativas, o organizador en Tui en 1984 do primeiro Encontro do Camiño Portugués e foi o promotor do recoñecemento do Camiño polo Consello de Europa nese mesmo ano 1984, ao aprobar a `recomendación 987´sobre o Camiño Francés, antecedente da declaración do Camiño de Santiago como “primeiro itinerario cultural europeo”. Con esta conferencia de apertura do “Foro do Camiño Portugués” o Concello de Tui quere renderlle un merecido e sinxelo recoñecemento.
O aforo para asistir presencialmente é limitado polo que é preciso realizar inscrición previa -por rigoroso orde de chegada- no correo electrónico: biblioteca@tui.gal. A conferencia poderá seguirse en director en tui.gal.
O Concello de Tui, sinala o concelleiro de Turismo e Camiño de Santiago, Laureano Alonso, está traballando con intensidade dende hai tempo na promoción do Camiño de Santiago polo noso territorio. A creación da Mesa do Camiño, o impulso a actividades diversas, publicacións, a posta en marcha do perfil de facebook “Camiño Portugués. Tui” con máis de 1700 amigos, etc  son mostra deste empeño. Algunhas actuacións quedaron interrompidas pola pandemia, outras se mantiveron adaptándose ás novas circunstancias. Laureano Alonso sinala que esta iniciativa de creación do “Foro do Camiño Portugués” inxírese na vontade do Concello de Tui de prepararse para o escenario post-covid no ámbito da peregrinación xacobea levando adiante novas iniciativas que contribúan ao posicionamento do Camiño Portugués e de Tui cara ao futuro.
 
C21 solicita que se perimetre con setos un barranco no parque fronte  ao CEIP de Rebordáns
Tui, 15 de abril de 2021. C21 continúa ca súa campaña #Tuiseguro, agora focalizado nas parroquias.  
O concelleiro liberal, José Palacín, ven de solicitar por rexistro de entrada que se perimetre con setos unha zona que da a un precipicio no parque que se atopa diante do CEIP de Rebordáns.
Palacín considera que todo o dispendio da Concellería de Parques e Xardíns non está redundando o suficiente na seguridade destes espazos públicos infantís e pon como exemplo a falla de compromiso co vallado do precipicio de Álvarez Blázquez que tras un ano non recibiu resposta e que supón un gravísimo perigo para os nenos.
  

Quince persoas incorporáronse a traballar ao concello de Tui ao abeiro do Plan Concellos
Tui, 16 de abril de 2021. Nas últimas semanas quince persoas incorporáronse a traballar ao concello de Tui tras ser contratadas grazas á achega da liña 3 de “Emprego para a conservación e funcionamento de bens e servizos municipais” do Plan de Obras e Servizos-Plan Concellos 2021 da Deputación de Pontevedra.
A incorporación aos seus postos de traballo tense realizado de xeito escalonado ao longo das últimas semanas.
Así foron contratadas 8 persoas coma peóns de desbroce durante oito meses cunha xornada parcial de 30 horas á semana. Amais a tempo completo e durante nove meses contratáronse a 1 oficial de segunda condutor, 2 oficiais segunda albanel,  1 oficial segunda cerralleiro – soldador, 1 oficial segunda carpinteiro e 2 animadoras turísticas para a Oficina de Turismo.  
As novas e novos traballadores foron recibidos na casa do concello polo alcalde, Enrique Cabaleiro, o concelleiro de Persoal, José Ramón Magán, e o concelleiro de Medio Rural, Rafael Estévez, que lles deron a benvida á plantilla municipal. Explicáronlles amais o seu cometido nos próximos meses.
  
O Concello de Tui destina case 240 mil euros á segunda liña de axudas Reactiva Tui
Tui, 16 de abril de 2021. O Concello de Tui destina 238.686,86 euros á segunda liña de axudas Reactiva Tui dirixida a persoas autónomas e microempresas do Concello de Tui. Deste total 190 mil euros están financiados con fondos propios e 48.686,886 a través da cantidade adicional da liña 2 do Plan Concellos da Deputación.  
As bases reguladoras desta segunda liña de axudas Reactiva Tui foron aprobadas por unanimidade en pleno, o pasado 25 de marzo, dentro do Plan de Reactivación económica local.
Tratase de axudas dirixidas aos establecementos comerciais, hostaleiros e demais negocios da cidade afectados polo peche perimetral, que mantivo ao Concello de Tui illado durante máis de 100 días, así como polas restricións sanitarias impostas para seguir facendo fronte a pandemia. Estes establecementos deberán acreditar unha baixada de facturación no último trimestre do ano 2020 superior ao 30% respecto ao mesmo período de 2019.
O prazo para a solicitude das axudas comezará tras a publicación do extracto das bases no Boletín Oficial da Provincia. Está pendente tamén a aprobación definitiva do expediente de recoñecemento de crédito extraordinario 1/2021, que habilita o importe destinado a facer efectivas tales axudas polo importe correspondente a aportación municipal.
As axudas de Reactiva Tui II oscilarán entre os 1.000 e os 1.500 euros. Poderanse beneficiar das mesmas persoas autónomas e microempresas de ata 10 traballadores en función da súa plantilla, co obxectivo de contribuír o mantemento da súa actividade económica e de emprego.
As solicitudes tramitaranse por rigoroso orde de entrada, tendo en conta que deben contar no momento da presentación con toda a documentación requirida. Coa experiencia adquirida tras a tramitación das axudas do primeiro Reactiva Tui modificouse o proceso de tramitación facéndoo máis sinxelo.
Cómpre lembrar que o Concello de Tui habilitou dentro do Plan de Reactivación  económica local para facer fronte a pandemia máis de 1.000.000 de euros. Deste total 280 mil euros destináronse á primeira liña de axudas dirixida a autónomos e microempresas.  Sumando os 240 mil euros desta segunda liña, no período dun ano o Concello de Tui ten mobilizado máis de medio millón de euros para apoiar aos sectores económicos da nosa cidade máis afectados pola covid-19.
Esta segunda liña é complementaria coa primeira liña na que se concederon 114 axudas cun importe de preto de 100 mil euros a aqueles establecementos que cumprían con todos os requisitos establecidos nas bases reguladoras.
Para explicar con detalle a convocatoria Reactiva II o luns 3 de maio está prevista unha xornada informativa, de xeito telemático, dende a casa do Concello.
A Concellería de Emprego, Comercio e Igualdade informa que as persoas autónomas e empresarias que teñan dúbidas sobre o proceso de solicitude poden consultar co centro de Municipal de Formación en Guillarei no 986 60 32 28 ou no correo electrónico comercio@tui.gal. As bases desta convocatoria unha vez publicadas poderán consultarse na área de Comercio na web municipal tui.gal.
 
Intercambio de alumnado Erasmus+, do alumnado de 6º de Educación Primaria do CEIP Plurilingüe Nº2 de Tui a Torrevieja (Alicante)
Tui, 16 de abril de 2021. Dentro do Programa Europeo Eramus+ que o O Ceip Plurilingüe Nº2 de Tui está levando a cabo durante os cursos 2018-2021 co nome de  “Promovendo un Estilo de Vida Saudable e Feliz”, o alumnado de 6º de Educación Primaria participará dende o mércores 14 ata ao venres 16 de abril de 2021,  nun “Intercambio virtual de alumnado a corto prazo” polo que visitará o CEIP As Culturas de Torrevieja Alicante.
Este Intercambio de alumnado, estaba previsto para o curso pasado, onde o alumnado de 6º do CEIP Nº2 de Tui tiña previsto viaxar ata a cidade alacantina para compartir unha semana de experiencias co alumnado de este centro organizador do evento e co alumnado do IES Comprensivo 2 de Varese de Italia. Debido ás circunstancias derivadas da pandemia tivo que ser cancelado.
Este curso esperábamos que o alumnado do CEIP Plurilingüe Nº2 de Tui, viaxara ata Alacante, pero finalmente a viaxe  e traballo do proxecto será virtual, para poñer en valor estilos de vida saudables e felices na Península Ibérica. Este será a segunda dun conxunto de mobilidades de alumnado para explorar a estreita relación entre España, Italia e Portugal.
Estas mobilidades teñen como obxectivo involucrar ao alumnado no proxecto, investigando e levando a cabo traballo de acondicionamento físico, talleres de alimentación saudable e clases de meditación, atención plena e Mindfulness. Durante a actividade o alumnado do CEIP Plurilingüe Nº2 de Tui aprenderán sobre a importancia de convivir cos seus compañeir@s das escolas de Alacante ( en España) e Varese ( en Italia), explorarán aspectos relacionados co proxecto de ambas culturas, respectando a cultura dos outros á vez que son embaixadores do seu propio país.
Estes días, o alumnado de Tui, terá a oportunidade de integrarse nas clases da escola de acollida, para compartir cultura, historia deportiva e dietética de cada rexión e participaran en actividades físicas, para gozar cos seus compañeir@s. Isto incluirá contacto coa lingua materna ( Galego, Español e Italiano), mellora no idioma do proxecto (inglés), historia, cultura, artes e educación física.
A participación nestas actividades aportará resultados moi positivos, podendo o alumnado comparar e contrastar as súas tradicións en actividades físicas e alimentación saudable, coas tradicións de Italia e Alacante, escolas situadas no Mediterráneo . Isto desenvolverá unha maior conciencia da diversidade cultural podendo incorporalos a aspectos das súas vidas cotiás.
Outro obxectivo fundamental deste Intercambio é desenvolver habilidades para a vida, como a tolerancia, o respecto, a independencia, a autonomía e o traballo en equipo. O alumnado de Tui integrarase nas clases da escola de acollida, compartirá co alumnado de estas escolas e de xeito virtual: tempo na escola, nas actividades diarias, etc.
Este será a segunda viaxe de Intercambio do alumnado do noso centro, quedando pendente de recibir en Tui, no vindeiro mes de xuño ao alumnado do Agrupamento de Escolas da Zona Urbana de Figueira da Foz Portugal, que coincidirán co alumnado do CEIP las Culturas de Torrevieja de Alacante. Durante o curso 2018 tivo lugar a primeira viaxe de Intercambio do alumnado do CEIP Nº2 ao Agrupamento de Escolas da Zona Urbana de Figueira, que durante unha semana estivo en Figueira gozando de todo o que esta oportunidade lles ofreceu.
Tamén está pendente de levar a cabo a última viaxe de formación para profesorado, que está prevista para o mes de maio. Previsiblemente será tamén de xeito virtual e será o punto de avaliación do traballo en equipo, das 5 escolas participantes no proxecto.
Todos compartimos formación, experiencias, traballos, talleres, viaxes, etc…
Erasmus+ é o programa Europeo de Educación, Formación, Xuventude e Deporte, que permite impulsar e axudar aos Sistemas de educación, Formación e Xuventude a promover unha ensinanza e aprendizaxe que doten ás persoas das capacidades necesarias para acceder ao mercado laboral e a sociedade actual e futura. O Sepie (Servizo Español para a internacionalización da Educación) será a axencia nacional española encargada da xestión, difusión, promoción e estudios de impacto do programa Erasmus+  do noso centro.
É unha gran oportunidade de mellorar as competencias do noso alumnado. O CEIP Plurilingüe Nº2 de Tui está moi satisfeito de colaborar neste proxecto europeo. Temos unha gran responsabilidade nas nosas actuacións, pero estamos convencidos de acadar os obxectivos con éxito, axudados por toda a comunidade educativa, a ANPA, o Concello e diversas entidades deportivas  e colaboradoras.
 

Regreso al contenido